ᱢᱤᱫᱴᱟ.ᱝ ᱠᱩᱲᱤ ᱦᱚᱯᱚᱱᱟᱜ ᱡᱟᱱᱟᱢ
ᱡᱟᱦᱟᱸᱭ ᱴᱷᱮᱱ ᱢᱮᱱᱟᱜ ᱟᱨ ᱢᱤᱫ ᱥᱤᱨᱡᱚᱱ ᱫᱟᱲᱮ
ᱮᱱᱦᱚᱸ ᱪᱮᱫᱟᱜ ᱩᱱᱤ ᱪᱮᱛᱟᱱ ᱨᱮ ᱵᱟᱹᱲᱤᱡ ᱱᱚᱡᱚᱨ
ᱥᱟᱶᱛᱟ ᱦᱟᱜ ᱵᱟᱹᱲᱤᱡ ᱩᱭᱦᱟᱹᱨ
ᱠᱚᱲᱟ ᱦᱚᱯᱚᱱᱟᱜ ᱵᱟᱹᱲᱤᱡ ᱱᱚᱡᱚᱨ
ᱢᱮᱱᱟᱜᱼᱟ ᱱᱚᱣᱟ ᱫᱚ ᱥᱮᱫᱟᱭ ᱠᱷᱚᱱ ᱜᱮ
ᱡᱮᱢᱚᱱ ᱚᱞ ᱛᱳᱞ ᱟᱠᱟᱱᱟ ᱵᱤᱫᱷᱤᱼᱵᱤᱫᱷᱟᱹᱱ ᱨᱮ
ᱡᱚᱠᱷᱚᱱ ᱢᱤᱫᱴᱟᱹᱝ ᱠᱩᱲᱤ ᱜᱤᱫᱽᱨᱟᱹ
ᱱᱚᱣᱟ ᱫᱷᱩᱲᱤ ᱫᱷᱟᱹᱨᱛᱤ ᱟᱹᱣᱨᱤ ᱞᱮᱵᱮᱫ ᱚᱠᱛᱚ
ᱟᱭᱳᱣᱟᱜ ᱠᱩᱠᱷᱤ ᱨᱮ, ᱟᱨᱮ ᱪᱟᱸᱫᱚ ᱢᱟᱹᱫᱽ ᱨᱮ
ᱵᱮᱱᱟᱣᱮᱫ ᱟᱭ ᱟᱡᱟᱜ ᱛᱟᱲᱟᱢ ᱰᱟᱦᱟᱨ
ᱢᱚᱱᱮ ᱨᱮ ᱢᱤᱫᱴᱟᱹᱝ ᱜᱮ ᱟᱸᱥ ᱫᱚᱦᱚ ᱠᱟᱛᱮ
ᱱᱚᱣᱟ ᱫᱷᱩᱲᱤᱼᱫᱷᱟᱹᱨᱛᱤ ᱨᱮ ᱞᱮᱵᱮᱫ ᱞᱟᱹᱜᱤᱫ
ᱟᱡᱟᱜ ᱴᱷᱟᱶ ᱮ ᱯᱟᱱᱛᱮᱭᱮᱫ ᱱᱚᱣᱟ ᱩᱭᱦᱟᱹᱨ ᱠᱟᱛᱮ
ᱪᱮᱫ ᱢᱤᱨᱛᱤᱠᱟ ᱨᱮ ᱤᱧᱟᱜ ᱵᱟᱞᱮ ᱤᱞ
ᱯᱷᱟ.ᱠᱬᱟᱹᱜ ᱨᱮ ᱵᱚᱫᱚᱞ ᱫᱟᱲᱮᱭᱟᱜᱼᱟᱹᱧ ?
ᱡᱩᱫᱤ ᱞᱮᱵᱮᱫ ᱠᱮᱫ ᱟᱹᱧ ᱫᱷᱩᱲᱤᱼᱫᱷᱟᱹᱨᱛᱤ
ᱛᱚᱵᱮ ᱪᱮᱫ ᱥᱮᱨᱢᱟ ᱞᱟᱯᱷᱟᱝ ᱨᱮ ᱩᱰᱟᱹᱣ ᱫᱟᱲᱮᱭᱟᱜᱼᱟᱹᱧ ?
ᱱᱚᱣᱟ ᱫᱚ ᱠᱩᱲᱤ ᱦᱚᱯᱚᱱᱟᱜ ᱚᱞᱚᱝ ᱞᱤᱠᱷᱚᱱ
ᱡᱩᱜᱽ ᱵᱚᱫᱚᱞᱚᱜ ᱠᱟᱱᱟ, ᱠᱩᱲᱤᱼᱠᱚᱲᱟ ᱡᱚᱛᱚ ᱢᱤᱫ ᱥᱚᱢᱟᱱ
ᱮᱱᱦᱚᱸ ᱥᱟᱶᱛᱟ ᱨᱮ, ᱜᱷᱟᱨᱚᱸᱡᱽ ᱨᱮ ᱱᱤᱛᱦᱚᱸ ᱢᱮᱱᱟᱜᱼᱟ
ᱠᱩᱲᱤᱼᱠᱚᱲᱟ ᱜᱤᱫᱽᱨᱟᱹ ᱨᱮ ᱚᱨᱚᱠᱼᱯᱷᱚᱨᱚᱠ
ᱢᱮᱱᱠᱷᱟᱱ ᱚᱠᱚᱭ ᱚᱠᱟᱞᱮᱠᱟᱭ ᱠᱚᱯᱟᱲᱟᱱᱟ
ᱚᱠᱚᱭ ᱫᱚ ᱵᱮᱥ, ᱚᱠᱚᱭᱟᱜ ᱫᱚ ᱵᱟᱹᱲᱤᱡ ᱠᱚᱯᱟᱲ
ᱵᱟᱰᱟᱭ ᱠᱟᱛᱷᱟ ᱢᱮᱱ ᱟᱠᱚ ᱥᱮᱫᱟᱭ ᱠᱷᱚᱱ ᱜᱮ
ᱡᱚᱛᱚ ᱠᱷᱚᱱ ᱥᱳᱨᱮᱥ ᱜᱮᱭᱟ ᱠᱩᱲᱤ ᱦᱚᱯᱚᱱ ᱡᱟᱱᱟᱢ
ᱟᱨ ᱠᱩᱲᱤ ᱦᱚᱯᱚᱱ ᱡᱟᱱᱟᱢ ᱫᱚ ᱮᱴᱟᱜ ᱚᱲᱟᱜ ᱥᱚᱵᱷᱟᱜ ᱞᱟᱹᱜᱤᱫ ᱜᱮ
ᱡᱩᱫᱤ ᱢᱤᱫ ᱠᱩᱲᱤ ᱨᱤᱱ ᱱᱟᱣᱟ ᱯᱮᱲᱟ ᱵᱟᱝ ᱠᱚ ᱥᱟᱨᱼᱥᱟᱹᱜᱩᱱᱚᱜ
ᱚᱠᱚᱭ ᱦᱚᱸ ᱵᱟᱝ ᱠᱚ ᱥᱤᱵᱤᱞ ᱟᱭᱟ
ᱛᱚᱵᱮ ᱚᱠᱚᱭ ᱴᱷᱮᱱ ᱟᱹᱛᱷᱟᱹᱣᱲᱤ ᱫᱚ ᱴᱷᱟᱶ ᱮ ᱧᱟᱢᱟ ?
ᱮᱱᱠᱷᱟᱱ ᱩᱱᱤᱭᱟᱜ ᱚᱲᱟᱜ ᱫᱩᱣᱟᱹ ᱨ ᱫᱚ ᱚᱠᱟᱨᱮ ?
ᱪᱮᱫᱟᱜ ᱥᱮ ᱠᱩᱲᱤᱭᱟᱜ ᱫᱚ ᱡᱟᱶᱟᱭ ᱚᱲᱟᱜ ᱜᱮ ᱚᱲᱟᱜ ᱫᱩᱣᱟᱹᱨ
ᱚᱞᱚᱝ ᱞᱤᱠᱷᱚᱱ ᱨᱮ ᱠᱚᱯᱟᱲ ᱛᱟᱭ ᱯᱚᱥᱟᱜ ᱜᱮᱭᱟ
ᱪᱟᱹᱠᱨᱤᱼᱵᱟᱹᱠᱨᱤ ᱦᱚᱸ ᱵᱟᱝ ᱧᱟᱢ ᱞᱮᱱᱠᱷᱟᱱ
ᱪᱮᱫ ᱟᱭᱳᱼᱵᱟᱵᱟ ᱚᱲᱟᱜ ᱨᱮ ᱴᱟᱷᱶ ᱮ ᱧᱟᱢᱟ ?
ᱫᱟᱫᱟᱼᱦᱤᱞᱤ ᱦᱤᱨᱞᱟᱹ ᱨᱮ ᱥᱩᱠ ᱛᱮ ᱡᱤᱭᱚᱱ ᱮ ᱠᱷᱟᱸᱰᱟᱣᱟ?
ᱢᱤᱫ ᱫᱤᱱ ᱟᱭᱳᱼᱵᱟᱵᱟ ᱵᱟᱝ ᱛᱟᱦᱮᱱ ᱨᱮ ᱟᱫᱚ ᱚᱠᱚᱭ ᱟᱥᱨᱟ ᱨᱮ?
ᱡᱟᱦᱟᱸ ᱛᱤᱥ ᱦᱤᱞᱤᱼᱫᱟᱫᱟ ᱥᱤᱠᱤᱲ ᱥᱟᱹᱜᱟᱹᱭ ᱵᱟᱝ ᱥᱟᱦᱟᱣ ᱨᱮ
ᱪᱮᱫ ᱟᱭᱳ ᱵᱟᱵᱟ ᱚᱲᱟᱜ ᱨᱮ ᱟᱡᱟᱜ ᱦᱚᱠ ᱮ ᱧᱟᱢᱟ?
ᱚᱠᱚᱭ ᱫᱚ ᱫᱚᱞ ᱵᱟᱫᱚᱞᱤ ᱟᱛᱮ ᱠᱚ ᱵᱟᱹᱱᱤᱡ ᱤᱫᱤ ᱠᱮᱫᱮ
ᱚᱠᱚᱭ ᱫᱚ ᱜᱩᱲᱫᱟᱹᱣ ᱧᱟᱯᱟᱢ ᱮᱱ ᱥᱚᱝᱥᱟᱨ ᱡᱚᱝ ᱟᱱᱟᱭ
ᱚᱠᱚᱭ ᱫᱚ ᱛᱟᱦᱮᱭᱮᱱ ᱢᱟᱨᱮ ᱥᱮᱛᱟ ᱵᱩᱥᱩᱵ ᱞᱮᱠᱟ
ᱟᱱᱟᱴ ᱫᱚ ᱩᱱᱤ ᱠᱩᱲᱤ ᱦᱚᱯᱚᱱᱟᱜ ᱜᱮ ᱛᱟᱦᱮᱸᱭᱮᱱᱟ
ᱮᱱ ᱦᱚᱸ ᱦᱚᱲᱟᱜ ᱪᱷᱤᱼ ᱛᱷᱩ ᱫᱮᱭᱟ ᱠᱟᱛᱮ
ᱟᱡᱟᱜ ᱡᱟᱸᱜᱟ ᱨᱮ ᱛᱤᱸᱜᱩ ᱠᱮᱴᱮᱡ ᱮᱱᱟᱭ
ᱮᱱᱛᱮ ᱨᱮᱦᱚᱸ ᱡᱟᱸᱜᱮ ᱫᱚ ᱥᱟᱢᱟᱝ ᱦᱩᱭ ᱠᱟᱱ ᱜᱮᱭᱟ
ᱠᱟᱨᱚᱱ ᱩᱱᱤᱭᱟᱜ ᱱᱟᱥᱮ ᱩᱢᱮᱨ ᱵᱟᱹᱲᱛᱤ ᱜᱚᱫ ᱮᱱᱟ
ᱡᱟᱦᱟᱸ ᱠᱟᱨᱚᱱ ᱛᱮ ᱟᱡ ᱱᱤᱛ ᱦᱟᱹᱵᱤᱡ ᱴᱷᱟᱶ ᱵᱟᱭ ᱧᱟᱢ ᱟᱠᱟᱫ
ᱛᱚᱵᱮ ᱥᱟᱱᱟᱢ ᱜᱟᱹᱠᱷᱩᱲᱟᱱ, ᱵᱩᱫᱷᱤᱼᱡᱤᱣᱤᱭᱟᱱ ᱠᱚ
ᱟᱯᱟᱱᱼᱟᱹᱯᱤᱱ ᱩᱭᱦᱟᱹᱨ ᱵᱷᱟᱹᱵᱤ ᱱᱚᱡᱚᱨ ᱛᱮᱠᱚ ᱠᱚᱭᱚᱜ ᱟᱭ ᱠᱟᱱ
ᱪᱮᱫᱟᱜ ᱵᱟᱭ ᱥᱚᱝᱥᱟᱨ ᱡᱚᱝ ᱠᱟᱱᱟ ?
ᱯᱟᱪᱷᱮ ᱡᱟᱦᱟᱱ ᱦᱩᱲᱟᱹᱜ ᱢᱟᱛᱚ ᱵᱟᱹᱱᱩᱜ ᱱᱩᱭ ᱨᱮ!
ᱤᱫᱩ ᱯᱟᱪᱷᱮ ᱚᱠᱚᱭ ᱥᱟᱶ ᱫᱩᱞᱟᱹᱲ ᱥᱟᱹᱜᱟᱹᱭ ᱪᱟᱞᱟᱜ ᱠᱟᱱ!
ᱥᱮᱛᱟᱜ ᱨᱮ ᱚᱰᱚᱠ ᱠᱟᱛᱮ ᱪᱟᱸᱫᱚ ᱦᱟᱹᱥᱩᱨᱚᱜ ᱨᱮ ᱚᱲᱟᱜ ᱛᱮ ᱥᱮᱴᱮᱨᱚᱜ
ᱟᱭᱢᱟ ᱞᱮᱠᱟᱱ ᱠᱟᱛᱷᱟ ᱨᱚᱲ ᱢᱟᱸᱜᱟᱞ ᱨᱮᱠᱚ ᱪᱷᱩᱴᱟᱹᱣ ᱠᱚᱜ ᱦᱚᱲ
ᱟᱹᱛᱩᱼ ᱴᱚᱞᱟ, ᱥᱟᱭᱼ ᱯᱩᱲᱥᱤ ᱨᱤᱱ ᱠᱟᱹᱢᱤᱼ ᱠᱟᱹᱥᱱᱤ ᱠᱩᱲᱤ ᱦᱚᱯᱚᱱ ᱠᱚ
ᱪᱮᱫ ᱦᱚᱸ ᱵᱟᱝ ᱢᱮᱱ ᱠᱟᱛᱮ ᱥᱩᱢᱩᱝ ᱟᱸᱡᱚᱢ ᱛᱷᱤᱨ ᱠᱟᱜᱼᱟ ᱠᱚ
ᱢᱚᱞᱚᱝ ᱨᱮᱱᱟᱜ ᱩᱫᱽᱜᱟᱹᱨ ᱫᱟᱜ, ᱱᱚᱛᱮ ᱳᱯᱤᱥ ᱠᱟᱹᱢᱤ ᱞᱟᱸᱜᱟ ᱛᱮ
ᱟᱨ ᱱᱚᱛᱮ ᱦᱚᱲᱟᱜ ᱵᱮᱼᱵᱟᱹᱲᱤᱡ ᱨᱚᱲ ᱫᱮᱭᱟ ᱠᱟᱛᱮ
ᱮᱱ ᱦᱚᱸ ᱚᱲᱟᱜ ᱛᱮ ᱨᱩᱣᱟᱹᱲ ᱦᱤᱡᱩᱜᱼᱟᱭ
ᱟᱨ ᱱᱚᱣᱟ ᱜᱮ ᱞᱮᱛᱟᱲ ᱢᱚᱱᱮ ᱨᱮ ᱩᱭᱦᱟᱹᱨᱟᱭ……ᱹᱹ
ᱪᱮᱫᱟᱜ ᱤᱧ ᱡᱟᱱᱟᱢ ᱮᱱᱟ ᱠᱩᱲᱤ ᱜᱤᱫᱽᱨᱟᱹ ?
ᱪᱮᱫ ᱠᱩᱲᱤ ᱦᱚᱯᱚᱱ ᱡᱟᱱᱟᱢ ᱫᱚ ᱠᱟᱹᱭ ᱠᱟᱱᱟ?
ᱢᱤᱫ ᱠᱩᱲᱤ ᱦᱚᱯᱚᱱ ᱛᱟᱦᱮᱸ ᱢᱟᱨᱮ ᱞᱮᱱᱠᱷᱟᱱ
ᱪᱮᱫ ᱩᱱᱤᱭᱟᱜ ᱫᱚ ᱜᱩᱡᱩᱜ ᱦᱚᱨ ᱰᱟᱦᱟᱨ ᱜᱮ……ᱹᱹ?
ᱵᱟᱝᱟ………ᱹᱹᱹᱹ
ᱦᱚᱲᱟᱜ ᱢᱚᱪᱟ ᱫᱚ ᱛᱤᱥ ᱦᱚᱸ ᱵᱟᱢ ᱵᱚᱸᱫᱚ ᱫᱟᱲᱮᱭᱟᱜᱼᱟ
ᱵᱮᱥᱟᱜ ᱮᱢ ᱠᱟᱹᱢᱤ, ᱵᱟᱹᱲᱤᱡᱟᱜ ᱮᱢ ᱠᱟᱹᱢᱤ
ᱦᱚᱲᱟᱜ ᱫᱚ ᱦᱟᱱᱟ ᱼᱱᱷᱟᱣᱟ ᱨᱚᱲ ᱜᱮ ᱠᱟᱹᱢᱤ
ᱥᱤᱧ ᱪᱟᱸᱫᱚ ᱫᱚ ᱩᱱ ᱚᱠᱛᱚ ᱦᱚᱸᱭ ᱨᱟᱠᱟᱵᱚᱜ ᱜᱮᱭᱟ
ᱡᱚᱠᱷᱚᱱ ᱡᱮᱜᱮᱛ ᱡᱟᱠᱟᱛ ᱦᱚᱲ ᱡᱟᱹᱯᱤᱫ ᱨᱮᱠᱚ ᱛᱟᱦᱮᱸᱱᱟ
ᱚᱱᱠᱟ ᱜᱮ ᱱᱤᱡᱚᱨᱟᱜ ᱞᱩᱛᱩᱨ ᱵᱚᱸᱫᱽ ᱞᱟᱹᱠᱛᱤ ᱠᱟᱱᱟ
ᱟᱢᱟᱜ ᱠᱟᱹᱢᱤ ᱟᱢ ᱥᱟᱢᱴᱟᱣ ᱡᱚᱝ ᱢᱮ
ᱡᱤᱭᱚᱱ ᱟᱹᱰᱤ ᱱᱟᱯᱟᱭ ᱛᱮ ᱠᱷᱟᱸᱰᱟᱣᱚᱜᱼᱟ
ᱟᱨ ᱟᱢ ᱟᱢᱟᱜ ᱢᱚᱱ ᱠᱩᱥᱤᱜ ᱡᱤᱭᱚᱱ ᱮᱢ ᱠᱷᱟᱸᱰᱟᱣ ᱫᱟᱲᱮᱭᱟᱜᱼᱟ ᱾
@@@
