ᱟᱭᱳ ᱟᱲᱟᱝ ᱟᱜ ᱫᱤᱥ ᱦᱩᱫᱤᱥ

ᱟᱭᱳ ᱟᱲᱟᱝ ᱨᱮᱱᱟᱜ ᱫᱚᱥᱟᱨ ᱢᱮᱱᱮᱛ ᱫᱚ ᱠᱩᱲᱤ ᱦᱚᱯᱚᱱᱟᱜ ᱟᱲᱟᱝ ᱥᱮ ᱟᱭᱳᱣᱟᱜ ᱟᱲᱟᱝ᱾ ᱠᱩᱲᱤ ᱦᱚᱯᱚᱱ ᱟᱡᱟᱜ ᱩᱭᱦᱟᱹᱨ, ᱟᱡᱟᱜ ᱵᱷᱟᱵᱽᱱᱟ ᱟᱨ ᱟᱡᱟᱜ ᱦᱩᱫᱤᱥ ᱱᱚᱶᱟ ᱯᱟᱛᱷᱟᱢ ᱦᱚᱛᱮᱛᱮ ᱡᱮᱜᱮᱛ ᱨᱮᱭ ᱥᱚᱫᱚᱨᱟ ᱾

ᱡᱟᱦᱟᱸ ᱜᱷᱟᱨᱚᱸᱡᱽ ᱨᱮ ᱟᱭᱳ ᱢᱮᱱᱟᱭᱟ ᱟᱨ ᱟᱭᱳᱣᱟᱜ ᱟᱲᱟᱝ ᱦᱚᱯᱚᱱ ᱠᱚᱠᱚ ᱟᱸᱡᱚᱢ ᱮᱫᱼᱟ, ᱩᱱᱠᱩ ᱦᱚᱯᱚᱱ ᱫᱚ ᱥᱚᱨᱮᱥ ᱟᱹᱥᱩᱞᱚᱜ ᱦᱚᱨ ᱰᱟᱦᱟᱨ ᱠᱚ ᱧᱟᱢ ᱡᱚᱝ ᱠᱟᱱ ᱜᱮᱭᱟ ᱾ ᱡᱟᱦᱟᱸ ᱥᱟᱶᱛᱟ ᱨᱮ ᱠᱩᱲᱤ ᱦᱚᱯᱚᱱ ᱠᱚ ᱥᱮᱪᱮᱫ ᱟᱠᱟᱱᱟ ᱚᱱᱟ ᱥᱟᱶᱛᱟ ᱫᱚ ᱢᱟᱬᱟᱝ ᱛᱮ ᱞᱟᱦᱟ ᱟᱠᱟᱱ ᱜᱮᱭᱟ, ᱟᱨ ᱡᱟᱦᱟᱸ ᱫᱤᱥᱚᱢ ᱨᱮ ᱫᱤᱥᱚᱢ ᱥᱟᱥᱚᱱ ᱨᱮ ᱠᱩᱲᱤ ᱦᱚᱯᱚᱱᱟᱜ ᱛᱤ ᱞᱚᱴᱷᱟ ᱢᱮᱱᱟᱜᱼᱟ, ᱚᱱᱟ ᱫᱤᱥᱚᱢ ᱫᱚ ᱡᱮᱜᱮᱛ ᱨᱮ ᱟᱹᱰᱤ ᱱᱟᱯᱟᱭ ᱜᱮ ᱩᱛᱱᱟᱹᱣ ᱟᱠᱟᱱᱟ ᱾ᱟᱭᱳ ᱫᱚ ᱛᱤᱥ ᱦᱚᱸ ᱢᱤᱫ ᱞᱮᱠᱟ ᱫᱚ ᱵᱟᱭ ᱩᱭᱦᱟᱹᱨᱟ ᱾ ᱟᱭᱳ ᱫᱚ ᱚᱞ ᱯᱟᱲᱦᱟᱣᱜ ᱮ ᱢᱮᱱ ᱨᱮᱦᱚᱸ ᱞᱟᱹᱭ ᱞᱟᱠᱪᱟᱨ ᱵᱟᱧᱪᱟᱣ ᱦᱚᱸᱭ ᱢᱮᱱ ᱜᱮᱭᱟ, ᱥᱮᱨᱢᱟ ᱨᱮ ᱩᱰᱟᱹᱣᱜ ᱮ ᱢᱮᱱ ᱨᱮᱦᱚᱸ ᱫᱷᱟᱹᱨᱛᱤ ᱫᱷᱩᱲᱤ ᱩᱭᱩᱝ ᱦᱚᱸᱭ ᱢᱮᱱ ᱜᱮᱭᱟ ᱟᱨ ᱫᱤᱥᱚᱢ ᱫᱤᱥᱚᱢ ᱫᱟᱬᱟᱱ ᱮ ᱢᱮᱱ ᱨᱮᱦᱚᱸ ᱡᱟᱱᱟᱢ ᱟᱹᱛᱩ ᱫᱤᱥᱚᱢ ᱦᱤᱨᱤ ᱫᱚ ᱟᱡ ᱨᱤᱱ ᱦᱚᱯᱚᱱ ᱮ ᱩᱭᱦᱟᱹᱨ ᱟᱠᱚ ᱜᱮᱭᱟ ᱾

ᱟᱭᱳ ᱫᱚ ᱛᱤᱥ ᱦᱚᱸ ᱵᱮᱨᱛᱷᱟ ᱟᱲᱟᱝ ᱫᱚ ᱵᱟᱭ ᱨᱚᱲᱟ ᱾ ᱟᱭᱳ ᱫᱚ ᱛᱤᱥ ᱦᱚᱸ ᱵᱟᱹᱲᱤᱡ ᱦᱚᱨ ᱫᱚ ᱵᱟᱭ ᱩᱫᱩᱜᱟ, ᱟᱭᱳ ᱟᱲᱟᱝ ᱫᱚ ᱥᱮᱨᱢᱟ ᱥᱤᱧ ᱪᱟᱸᱫᱚ ᱡᱩᱞᱩᱜ ᱥᱮᱸᱜᱮᱞ ᱠᱷᱚᱱ ᱦᱚᱸ ᱱᱤᱨᱚᱲᱟ, ᱟᱭᱳ ᱡᱟᱦᱟᱸ ᱟᱲᱟᱝ ᱮ ᱨᱟᱲᱟᱝᱟ, ᱚᱱᱟ ᱫᱚ ᱵᱚᱸᱜᱟ ᱵᱳᱨᱳᱣᱟᱜ ᱟᱲᱟᱝ ᱥᱟᱶ ᱵᱟᱨᱟᱵᱟᱹᱨᱤᱭᱟ ᱾ᱚᱱᱟᱛᱮ ᱡᱮᱜᱮᱛ ᱡᱟᱠᱟᱛ ᱨᱤᱱ ᱟᱭᱳ ᱦᱚᱲ ᱠᱚ, ᱟᱯᱟᱱ ᱟᱹᱯᱤᱱᱟᱜ ᱢᱚᱱᱮ ᱨᱮᱱᱟᱜ ᱠᱟᱛᱷᱟ, ᱟᱯᱟᱱ ᱟᱹᱯᱤᱱᱟᱜ ᱚᱱᱛᱚᱨ ᱨᱮᱱᱟᱜ ᱟᱲᱟᱝ, ᱱᱚᱶᱟ ᱟᱭᱳ ᱟᱲᱟᱝ ᱢᱮᱞᱟᱝᱠᱤ ᱦᱚᱛᱮᱛᱮ ᱯᱷᱚᱴᱮᱞ ᱞᱟᱹᱜᱤᱫ, ᱞᱟᱹᱭ ᱥᱚᱫᱚᱨ ᱞᱟᱹᱜᱤᱫ ᱫᱟᱣ ᱮ ᱪᱟᱞ ᱟᱠᱚ ᱠᱟᱱᱟ᱾ ᱟᱭᱳ ᱟᱲᱟᱝ ᱵᱟᱧᱪᱟᱣ ᱫᱚᱦᱚᱭ ᱫᱤᱥ ᱦᱩᱫᱤᱥ ᱛᱮ ᱥᱟᱡᱟᱣ ᱟᱠᱟᱱ ᱢᱮᱞᱟᱝᱠᱤ ᱜᱮ “ᱟᱭᱳ ᱟᱲᱟᱝ” ᱫᱚ ᱾

ᱦᱩᱫᱤᱥ
ᱱᱚᱶᱟ ‘ᱟᱭᱳ ᱟᱲᱟᱝ ᱜᱷᱟᱨᱚᱸᱡᱽ’ ᱨᱮ ᱫᱚ ᱥᱤᱧᱚᱛ ᱥᱟᱶ ᱥᱟᱶᱛᱮ ᱱᱮᱯᱟᱞ, ᱵᱟᱝᱞᱟᱫᱮᱥ ᱟᱨ ᱡᱮᱜᱮᱛ ᱨᱮᱱᱟᱜ ᱡᱟᱦᱟᱸ ᱫᱤᱥᱚᱢ ᱟᱨᱵᱟᱝ ᱴᱚᱴᱷᱟ ᱨᱮᱜᱮ ᱥᱟᱱᱛᱟᱲ ᱟᱭᱳ ᱦᱚᱲ ᱠᱚ ᱢᱮᱱᱟᱜ ᱵᱚᱱᱟ, ᱡᱚᱛᱚ ᱦᱚᱲ ᱜᱮ ᱥᱮᱞᱮᱫᱚᱜ ᱞᱟᱹᱜᱤᱫ ᱫᱟᱣ ᱵᱚᱱ ᱧᱟᱢᱟ ᱾ ᱠᱩᱲᱤ ᱦᱚᱯᱚᱱᱟᱜ ᱢᱚᱱᱮ ᱨᱮᱦᱚᱸ ᱟᱹᱰᱤ ᱞᱮᱠᱟᱱ ᱠᱟᱛᱷᱟ ᱜᱩᱨᱞᱟᱹ ᱜᱷᱟᱱᱴᱟᱜᱼᱟ, ᱠᱩᱥᱤ, ᱨᱟᱹᱥᱠᱟᱹ, ᱫᱩᱠ, ᱵᱷᱟᱵᱽᱱᱟ ᱞᱮᱠᱟᱱ ᱞᱮᱠᱟᱱ ᱠᱟᱛᱷᱟ ᱾ ᱥᱟᱶᱛᱟ ᱨᱮᱱᱟᱜ ᱨᱟᱭᱨᱤᱛ ᱟᱨ ᱜᱷᱟᱨᱚᱸᱡᱽ ᱨᱮᱱᱟᱜ ᱜᱷᱩᱲ ᱵᱷᱤᱲ ᱠᱷᱟᱹᱛᱤᱨ ᱟᱠᱚᱣᱟᱜ ᱢᱚᱱᱮ ᱨᱮᱱᱟᱜ ᱦᱩᱰᱩᱜ ᱠᱟᱛᱷᱟ ᱢᱚᱱᱮ ᱜᱟᱺᱦᱤᱨ ᱨᱮᱜᱮ ᱵᱟᱹᱭᱥᱟᱹᱣ ᱛᱟᱦᱮᱸᱱᱟ ᱾ ᱢᱤ ᱢᱤᱫ ᱵᱮᱲᱟ ᱢᱚᱱᱮ ᱨᱮᱱᱟᱜ ᱠᱟᱛᱷᱟ ᱯᱷᱚᱴᱮᱞ ᱥᱟᱱᱟ ᱜᱚᱫ ᱮ ᱨᱮᱦᱚᱸ ᱢᱤᱫ ᱠᱩᱲᱤ ᱦᱚᱯᱚᱱ, ᱜᱷᱟᱨᱚᱸᱡᱽ ᱨᱮᱱᱟᱜ ᱜᱚᱲᱚ ᱟᱱᱟᱴ ᱠᱷᱟᱹᱛᱤᱨ, ᱢᱮᱞᱟᱝᱠᱤ ᱨᱮᱱᱟᱜ ᱚᱵᱷᱟᱵᱽ ᱠᱷᱟᱹᱛᱤᱨ ᱫᱟᱣ ᱜᱮ ᱵᱟᱭ ᱧᱟᱢᱟ ᱾ ᱢᱤᱫ ᱠᱩᱲᱤ ᱦᱚᱯᱚᱱ ᱟᱡ ᱦᱚᱸ ᱥᱟᱶᱛᱟ ᱥᱩᱥᱟᱹᱨ ᱥᱟᱱᱟ ᱮᱭᱟ, ᱟᱡ ᱦᱚᱸ ᱥᱟᱶᱦᱮᱫ ᱥᱟᱶᱦᱟ ᱥᱟᱱᱟ ᱮᱭᱟ ᱟᱨ ᱪᱤᱠᱤ ᱯᱟᱹᱨᱥᱤ ᱦᱚᱸ ᱪᱷᱟᱨᱟᱣ ᱥᱟᱱᱟ ᱮᱭᱟ ᱾ ᱛᱚᱵᱮ ᱚᱱᱟ ᱟᱡᱟᱜ ᱟᱸᱥ ᱟᱡᱟᱜ ᱢᱚᱱᱮ ᱜᱟᱺᱦᱤᱨ ᱨᱮ ᱵᱟᱝ ᱜᱚᱥᱚ ᱢᱚᱥᱚᱫ ᱚᱪᱚ ᱠᱟᱛᱮ ᱯᱷᱩᱴᱟᱹᱣ ᱨᱟᱠᱟᱵ ᱢᱟ, ᱯᱷᱚᱴᱮᱞ ᱚᱰᱚᱠᱚᱜ ᱢᱟ ᱱᱚᱶᱟ ‘ᱟᱭᱳ ᱟᱲᱟᱝ’ ᱢᱮᱞᱟᱝᱠᱤ ᱦᱚᱛᱮᱛᱮ, ᱱᱚᱶᱟ ᱜᱮ ᱟᱭᱳ ᱟᱲᱟᱝ ᱟᱜ ᱯᱩᱭᱞᱩ ᱦᱩᱫᱤᱥ ᱫᱚ ᱾

ᱥᱟᱱᱛᱟᱲ ᱥᱟᱶᱛᱟ ᱫᱚ ᱟᱹᱰᱤ ᱜᱮ ᱥᱚᱨᱮᱥ ᱥᱟᱶᱛᱟ ᱠᱟᱱᱟ ᱾ ᱱᱚᱶᱟ ᱥᱟᱶᱛᱟ ᱨᱮᱜᱮ ᱠᱩᱲᱤ ᱦᱚᱯᱚᱱ ᱠᱚᱫᱚ ᱪᱮᱫ ᱠᱟᱹᱢᱤ ᱞᱟᱹᱜᱤᱫ ᱦᱚᱸ ᱵᱟᱝ ᱠᱚ ᱟᱠᱚᱴ ᱟᱠᱟᱱᱟ ᱾ ᱚᱞ ᱯᱟᱲᱦᱟᱣ ᱠᱷᱚᱱ ᱮᱛᱚᱦᱚᱵ ᱠᱟᱛᱮ ᱡᱮᱛᱮ ᱞᱮᱠᱟᱱ ᱠᱟᱹᱢᱤ ᱟᱡᱟᱜ ᱠᱩᱥᱤ ᱡᱟᱹᱱᱤᱭ ᱛᱚᱨᱟᱣ ᱫᱟᱲᱮᱭᱟᱜᱼᱟ ᱾ ᱤᱠᱷᱟᱹᱱ ᱮᱱ ᱦᱚᱸ ᱱᱤᱛᱚᱜ ᱫᱷᱟᱹᱵᱤᱡ ᱱᱚᱶᱟ ᱧᱮᱞᱚᱜ ᱠᱟᱱ ᱜᱮᱭᱟ, ᱟᱵᱚ ᱥᱟᱶᱛᱟ ᱨᱮ ᱟᱭᱳ ᱦᱚᱲ ᱠᱚᱣᱟᱜ ᱥᱟᱶᱛᱟ ᱥᱟᱶᱦᱮᱫ ᱞᱟᱹᱜᱤᱫ ᱮᱱᱮᱢ ᱫᱚ ᱱᱟᱥᱮ ᱠᱚᱢ ᱜᱮᱭᱟ ᱾ ᱵᱟᱝ ᱫᱚ ᱟᱭᱳ ᱦᱚᱲ ᱠᱚ ᱞᱟᱹᱜᱤᱫ ᱢᱮᱞᱟᱝᱠᱤ ᱨᱮᱱᱟᱜ ᱟᱱᱟᱴ ᱠᱷᱟᱹᱛᱤᱨ ᱟᱨ ᱵᱟᱝ ᱫᱚ ᱟᱭᱳ ᱦᱚᱲ ᱠᱚᱣᱟᱜ ᱥᱟᱶᱛᱟ ᱥᱟᱶᱦᱮᱫ ᱪᱮᱛᱟᱱ ᱨᱮ ᱩᱭᱦᱟᱹᱨ ᱨᱮᱱᱟᱜ ᱠᱷᱟᱴᱚ ᱠᱷᱟᱹᱛᱤᱨ ᱾ ᱤᱠᱷᱟᱹᱱ ᱱᱚᱶᱟ ᱦᱚᱸ ᱩᱱᱟᱹᱝ ᱜᱮ ᱥᱟᱹᱨᱤ ᱠᱟᱛᱷᱟ ᱠᱟᱱᱟ, ᱡᱟᱦᱟᱸ ᱥᱟᱶᱛᱟ ᱨᱮ ᱥᱮᱪᱮᱫ ᱟᱢᱮᱴ ᱨᱮ ᱟᱭᱳ ᱦᱚᱲ ᱠᱚᱠᱚ ᱠᱷᱟᱴᱚ ᱜᱮᱭᱟ, ᱥᱟᱶᱛᱟ ᱥᱟᱶᱦᱮᱫ ᱪᱟᱨᱪᱟ ᱨᱮ ᱟᱭᱳ ᱦᱚᱲ ᱠᱚ ᱛᱟᱭᱚᱢ ᱟᱠᱟᱱᱟ, ᱚᱱᱟ ᱥᱟᱶᱛᱟ ᱨᱮᱱᱟᱜ ᱩᱛᱱᱟᱹᱣ ᱨᱤᱦᱤᱴ ᱫᱚ ᱱᱟᱥᱮ ᱠᱚᱢ ᱜᱮ ᱛᱟᱦᱮᱸᱱᱟ ᱾ ᱟᱭᱳᱣᱟᱜ ᱥᱮᱪᱮᱫ ᱵᱮᱜᱚᱨ, ᱟᱭᱳᱣᱟᱜ ᱪᱤᱨᱜᱟᱹᱞ ᱵᱮᱜᱚᱨ ᱟᱨ ᱟᱭᱳᱣᱟᱜ ᱠᱩᱨᱩᱢᱩᱴᱩ ᱵᱮᱜᱚᱨ ᱦᱚᱯᱚᱱ ᱪᱤᱠᱟᱹᱛᱮᱭ ᱞᱟᱦᱟ ᱜᱟᱱ ᱠᱚᱜᱼᱟ᱾

ᱚᱱᱟᱛᱮ ᱡᱮᱜᱮᱛ ᱡᱟᱠᱟᱛ ᱨᱤᱱ ᱡᱮᱛᱮ ᱟᱭᱳ ᱦᱚᱲ (ᱡᱚᱛᱚ ᱵᱚᱭᱚᱥ ᱨᱤᱱ ᱠᱩᱲᱤ ᱦᱚᱯᱚᱱ) ᱠᱚ ᱴᱷᱮᱱ ᱟᱭᱳ ᱟᱲᱟᱝ ᱜᱷᱟᱨᱚᱸᱡᱽ ᱯᱟᱦᱴᱟ ᱠᱷᱚᱱ ᱱᱮᱦᱚᱸᱨ ᱛᱟᱦᱮᱸᱱ ᱠᱟᱱᱟ, ᱫᱮᱻᱫᱮᱞᱟ ᱛᱟᱦᱮᱸᱱ ᱠᱟᱱᱟ, ᱥᱟᱹᱜᱩᱱ ᱫᱟᱨᱟᱢ ᱛᱟᱦᱮᱸᱱ ᱠᱟᱱᱟ, ᱱᱚᱶᱟ ᱟᱭᱳ ᱟᱲᱟᱝ ᱢᱮᱞᱟᱝᱠᱤ ᱛᱮ ᱥᱟᱱᱟᱢ ᱠᱚᱵᱚᱱ ᱨᱮᱞᱟᱣ ᱦᱤᱡᱩᱜ ᱢᱟ, ᱟᱯᱟᱱ ᱟᱹᱯᱤᱱ ᱢᱚᱱᱮ ᱨᱮᱱᱟᱜ ᱩᱭᱦᱟᱹᱨ, ᱦᱩᱫᱤᱥ ᱼ ᱠᱟᱹᱦᱱᱤ, ᱚᱱᱚᱬᱦᱮ, ᱚᱱᱚᱞ ᱛᱮ ᱵᱚᱱ ᱜᱟᱞᱟᱝ ᱜᱟᱵᱟᱱ ᱢᱟ ᱟᱨ ᱵᱚᱱ ᱩᱫᱩᱜ ᱥᱚᱫᱚᱨ ᱢᱟ, ᱟᱵᱚ ᱵᱚᱱ ᱪᱮᱫᱚᱜ ᱥᱟᱶᱛᱮ ᱟᱵᱚ ᱦᱚᱛᱮᱛᱮ ᱱᱟᱥᱮ ᱥᱟᱱᱟᱢ ᱠᱚ ᱥᱮᱪᱮᱫ ᱠᱚ ᱨᱮᱱᱟᱜ ᱫᱟᱣ ᱵᱚᱱ ᱟᱢᱮᱴ ᱢᱟ ᱾ᱥᱟᱱᱛᱟᱲ ᱥᱟᱶᱛᱟ ᱨᱮᱱ ᱠᱩᱲᱤ ᱦᱚᱯᱚᱱ ᱠᱚᱣᱟᱜ ᱯᱩᱭᱞᱩ ᱢᱮᱞᱟᱝᱠᱤ ᱟᱵᱚᱣᱟᱜ ᱩᱭᱦᱟᱹᱨ ᱛᱮ ᱟᱵᱚᱣᱟᱜ ᱦᱩᱱᱟᱹᱨ ᱛᱮ ᱫᱮ ᱵᱚᱱ ᱥᱟᱡᱟᱣ ᱥᱚᱵᱷᱟᱭᱟ, ᱫᱮᱵᱚᱱ ᱛᱤᱸᱜᱩ ᱠᱮᱴᱮᱡᱟ, ᱫᱮᱵᱚᱱ ᱦᱟᱨᱟ ᱨᱟᱠᱟᱵᱟ ᱟᱨ ᱵᱚᱱ ᱞᱟᱦᱟ ᱤᱫᱤᱭᱟ ᱞᱟᱦᱟ ᱥᱮᱫ ᱾ ᱟᱜᱟᱢ ᱵᱤᱫᱟᱹᱞ ᱟᱜᱟᱢ ᱠᱩᱲᱤ ᱦᱚᱯᱚᱱ ᱞᱟᱹᱜᱤᱫ ᱢᱤᱫ ᱫᱚᱲᱦᱚ ᱢᱮᱞᱟᱝᱠᱤ ᱵᱚᱱ ᱵᱮᱱᱟᱣᱟ ᱟᱨ ᱢᱤᱫ ᱱᱟᱶᱟ ᱱᱟᱜᱟᱢ ᱵᱚᱱ ᱚᱞᱼᱛᱚᱞᱟ ᱾

@@@