“ᱠᱩᱲᱤᱼᱵᱟᱹᱦᱩ ᱠᱩᱲᱤ ᱟᱭᱳᱼᱦᱟᱱᱦᱟᱨ ᱟᱭᱳ
ᱛᱤᱨᱞᱟᱹ ᱦᱟᱜ ᱡᱩᱫᱟᱹ ᱡᱩᱫᱟᱹ ᱧᱩᱛᱩᱢ
ᱚᱞ ᱯᱟᱲᱦᱟᱣ ᱥᱮᱪᱮᱫ ᱞᱮᱱᱠᱷᱟᱱᱮ
ᱦᱩᱱᱟᱹᱨ ᱛᱮ ᱡᱚᱲᱟᱣ ᱡᱩᱴᱤᱡ ᱟᱭᱟᱭ ᱩᱯᱩᱨᱩᱢ” ᱾
ᱢᱤᱫ ᱥᱩᱥᱟᱹᱨ ᱥᱟᱶᱟᱨ ᱱᱤᱨᱟᱹᱭ ᱱᱤᱯᱷᱚᱴ ᱥᱟᱶᱛᱟ ᱜᱚᱲᱦᱚᱱ ᱞᱟᱹᱜᱤᱫ ᱛᱮᱠᱷᱟᱱ ᱛᱤᱨᱞᱟᱹ ᱚᱞ ᱯᱟᱲᱦᱟᱣ ᱥᱮᱪᱮᱫ ᱥᱤᱠᱷᱱᱟᱹᱛᱚᱜ ᱫᱚ ᱟᱹᱰᱤ ᱟᱹᱰᱤ ᱫᱚᱨᱠᱟᱨ ᱟᱨ ᱞᱟᱹᱠᱛᱤ ᱢᱮᱱᱟᱜᱼᱟ ᱾ ᱟᱭᱳ ᱜᱮ ᱟᱡ ᱨᱤᱱ ᱜᱤᱫᱽᱨᱟᱹ ᱯᱤᱫᱽᱨᱟᱹ ᱠᱚᱨᱤᱱ ᱯᱩᱭᱞᱩ ᱢᱟᱪᱮᱛᱟᱹᱱᱤ ᱠᱟᱱᱟᱭ ᱾ ᱟᱭᱳ ᱦᱚᱲ ᱥᱮᱪᱮᱫ ᱠᱚᱜ ᱠᱷᱟᱱᱮ ᱵᱟᱰᱟᱭ ᱫᱟᱲᱮᱭᱟᱜ ᱟᱭ ᱚᱠᱟ ᱵᱮᱥᱟ ᱟᱨ ᱚᱠᱟ ᱵᱷᱟᱹᱜᱤᱭᱟ ᱾ ᱦᱚᱱ ᱦᱚᱯᱚᱱ ᱠᱚᱛᱟᱭ ᱱᱟᱯᱟᱭ ᱥᱮᱪᱮᱫ ᱞᱟᱯᱷᱟᱝ ᱥᱟᱪᱟᱨᱦᱮᱫ ᱪᱮᱫ ᱪᱤᱱᱦᱟᱹᱣ ᱥᱤᱠᱷᱟᱹᱣ ᱫᱟᱲᱮ ᱟᱠᱚ ᱟᱭ ᱾ ᱤᱠᱷᱟᱹᱱ ᱟᱵᱚ ᱥᱟᱶᱛᱟ ᱨᱮ ᱠᱚᱲᱟ ᱠᱷᱚᱱ ᱠᱩᱲᱤᱭᱟᱜ ᱥᱮᱪᱮᱫ ᱫᱚᱨ ᱫᱚ ᱟᱹᱰᱤ ᱠᱚᱢᱟ ᱾ ᱚᱱᱟᱛᱮ ᱛᱚᱯᱷᱟᱛ ᱟᱨ ᱵᱟᱝ ᱚᱱᱛᱚᱨ ᱰᱮᱦᱮᱨ ᱧᱮᱞᱚᱜᱼᱟ ᱾ ᱟᱵᱚ ᱨᱤᱱ ᱛᱤᱱᱟ.ᱜ ᱜᱟᱱ ᱢᱟᱨᱮᱦᱟᱹᱴᱤᱭᱟᱹ ᱩᱭᱦᱟᱹᱨ ᱵᱷᱟᱵᱽᱱᱟ
ᱟᱭᱳ ᱵᱟᱵᱟ ᱢᱟᱠᱚ ᱢᱮᱱᱟ ᱦᱚᱯᱚᱱ ᱮᱢ ᱚᱞ ᱯᱟᱲᱦᱟᱣ ᱚᱪᱚ ᱠᱟᱭ ᱠᱷᱟᱱ ᱢᱤᱫ ᱫᱤᱱᱮ ᱟᱹᱥᱩᱞ ᱢᱮᱭᱟ ᱾ ᱟᱨ ᱦᱚᱯᱚᱱ ᱮᱨᱟ ᱢᱟ ᱮᱴᱟᱜ ᱚᱲᱟᱜ ᱫᱩᱣᱟᱹᱨ ᱛᱮ ᱪᱟᱞᱟᱜ ᱟᱭ ᱾ ᱵᱮᱥ ᱵᱷᱟ.ᱜᱤ ᱠᱟᱹᱢᱤ ᱯᱟᱹᱭᱴᱟᱹᱲᱤ ᱠᱚᱢ ᱪᱮᱫ ᱥᱮᱬᱟ ᱟᱭ ᱠᱷᱟᱱ ᱡᱟᱦᱟᱸ ᱛᱤᱥ ᱠᱟᱛᱷᱟ ᱵᱟᱢ
ᱟᱸᱡᱚᱢᱟ ᱾ ᱱᱚᱛᱮ ᱥᱚᱨᱠᱟᱨ ᱫᱚᱭ ᱠᱟᱠᱞᱮ ᱮᱫᱼᱟ ᱠᱚᱲᱟ ᱟᱨ ᱠᱩᱲᱤ ᱜᱤᱫᱽᱨᱟᱹ ᱵᱟᱱᱟᱨ ᱜᱮ ᱠᱤᱱ ᱢᱤᱫ ᱥᱚᱢᱟᱱᱟ ᱾ ᱠᱚᱲᱟ ᱜᱤᱫᱽᱨᱟᱹ ᱞᱮᱠᱟ ᱜᱮ ᱠᱩᱲᱤ ᱜᱤᱫᱽᱨᱟᱹ ᱟᱜ ᱦᱚᱸ ᱟᱹᱭᱫᱟᱹᱨᱤ ᱢᱮᱱᱟᱜᱼᱟ ᱚᱞ ᱯᱟᱲᱦᱟᱣ ᱠᱟᱛᱮ ᱱᱤᱡᱚᱨ ᱡᱟᱸᱜᱟ ᱛᱮ ᱛᱤᱸᱜᱩ ᱠᱮᱴᱮᱡᱚᱜ ᱞᱟᱹᱜᱤᱫ ᱾ ᱫᱤᱥᱚᱢ ᱨᱮ ᱮᱴᱟᱜ ᱡᱟᱹᱛᱤ ᱠᱚ ᱞᱮᱠᱟ ᱟᱵᱚ ᱥᱟᱶᱛᱟ ᱨᱤᱱ ᱛᱤᱨᱞᱟᱹ ᱦᱚᱯᱚᱱ ᱠᱚᱣᱟᱜ ᱥᱮᱪᱮᱫ ᱫᱚᱨ ᱫᱚ ᱩᱱᱠᱩ ᱥᱟᱶ ᱵᱟᱭ ᱵᱟᱨᱟᱵᱟᱹᱨᱤᱭᱟ ᱾
ᱛᱤᱨᱞᱟᱹ ᱥᱮᱪᱮᱫ ᱨᱮᱱᱟᱜ ᱞᱟᱹᱠᱛᱤ ᱟᱨ ᱞᱟᱵᱽ ᱺ ᱛᱤᱨᱞᱟᱹ ᱥᱮᱪᱮᱫ ᱞᱮᱱᱠᱷᱟᱱᱮ ᱟᱜᱟᱢ ᱫᱟᱨᱟᱢ ᱨᱮ ᱱᱟᱯᱟᱭ ᱡᱤᱵᱚᱱ ᱠᱷᱟᱸᱰᱟᱣ ᱞᱟᱹᱜᱤᱫ ᱟᱹᱰᱤ ᱞᱮᱠᱟᱱ ᱟᱹᱥᱩᱞᱚᱜ ᱨᱮᱱᱟᱜ ᱯᱟᱱᱛᱷᱟ ᱟᱨ ᱵᱟᱝ ᱛᱟᱠ ᱮ ᱧᱟᱢᱟ ᱾ ᱡᱮᱞᱮᱠ ᱪᱟᱹᱠᱨᱤ ᱱᱩᱠᱨᱤ, ᱵᱮᱯᱟᱨ ᱟᱯᱟᱨ, ᱞᱩᱜᱽᱲᱤ ᱞᱟᱯᱚ ᱥᱤᱞᱟᱹᱭ, ᱥᱟᱬᱮᱥ ᱜᱮᱭᱟᱱ ᱛᱮ ᱪᱟᱥᱵᱟᱥ ᱮᱢᱟᱱ ᱾ ᱟᱵᱚ ᱥᱟᱶᱛᱟ ᱨᱮ ᱧᱮᱞᱚᱜ ᱠᱟᱱ ᱠᱟᱹᱡ ᱠᱟᱹᱡ ᱩᱢᱮᱨ ᱨᱮ ᱠᱩᱥᱤᱵᱟᱹᱥᱤ ᱛᱮ ᱧᱟᱯᱟᱢ ᱵᱟᱯᱞᱟ ᱟᱨ ᱤᱱᱟᱹ ᱛᱟᱭᱚᱢ ᱠᱟᱹᱣᱰᱤ ᱟᱱᱟᱴ ᱠᱷᱟᱹᱛᱤᱨ ᱜᱷᱟᱨᱚᱸᱡᱽ ᱪᱚᱲᱟᱣ ᱨᱮ ᱚᱵᱷᱟᱵᱽ ᱦᱟᱨᱠᱮᱛ ᱮᱴᱠᱮᱴᱚᱬᱮ ᱾ ᱛᱟᱭᱚᱢ ᱵᱤᱫᱟᱹᱞ ᱫᱚ ᱱᱟᱢᱟᱞ ᱟᱹᱥᱩᱞᱚᱜ ᱵᱟᱝ ᱠᱷᱟᱱ ᱦᱟᱺᱰᱤ ᱯᱟᱣᱨᱟᱹ ᱟᱠᱷᱨᱤᱧ ᱪᱷᱟᱰᱟ ᱟᱨ ᱪᱮᱫ ᱩᱯᱟᱹᱭ ᱥᱮ ᱪᱟᱨᱟ ᱜᱮ ᱵᱟᱝ ᱛᱟᱦᱮᱸᱱ ᱠᱟᱱᱟ ᱾ ᱚᱱᱟᱛᱮ
ᱛᱤᱨᱞᱟᱹ ᱦᱚᱯᱚᱱ ᱥᱮᱪᱮᱫᱚᱜ ᱱᱤᱦᱟ.ᱛᱤ ᱫᱚᱨᱠᱟᱨᱚᱜ ᱠᱟᱱᱟ ᱾ ᱡᱟᱦᱟᱸ ᱛᱮ ᱟᱵᱚ ᱥᱟᱶᱛᱟ ᱨᱮᱱᱟᱜ ᱱᱚᱣᱟ ᱡᱮᱞᱢᱮ ᱴᱮᱠᱮᱨ ᱪᱤᱛᱟᱹᱨ ᱵᱚᱫᱚᱞ ᱦᱩᱭ ᱫᱟᱲᱮᱭᱟᱜᱼᱟ ᱾
ᱛᱤᱨᱞᱟᱹ ᱥᱮᱪᱮᱫ ᱠᱚᱜ ᱠᱷᱟᱱᱮ ᱟᱡᱟᱜ ᱦᱚᱠ ᱟᱹᱭᱫᱟᱹᱨᱤ ᱵᱟᱵᱚᱛ ᱛᱮ ᱵᱟᱰᱟᱭ ᱫᱟᱲᱮᱭᱟᱜ ᱟᱭ ᱾ ᱥᱟᱶᱛᱟ ᱨᱮ ᱧᱮᱞᱚᱜ ᱠᱟᱱ ᱦᱚᱱ ᱠᱤᱢᱤᱱ ᱪᱮᱛᱟᱱ ᱱᱟᱦᱟᱪᱟᱨ ᱠᱩᱥᱤᱜ ᱠᱷᱟᱱᱮᱢ ᱫᱚᱦᱚ ᱮᱼᱠᱟᱱᱟ ᱾ ᱵᱟᱠᱷᱟᱱ ᱵᱟᱨᱚ ᱨᱚᱸᱡᱚᱱ ᱥᱟᱛᱟᱣ ᱠᱟᱛᱮᱢ ᱵᱟᱹᱜᱤ ᱮᱼᱠᱟᱱᱟ ᱾ ᱟᱨ ᱵᱟᱝ ᱠᱷᱟᱱᱮᱢ ᱪᱷᱩᱴᱠᱤ ᱟᱭ ᱠᱟᱱᱟ ᱾ ᱱᱚᱝᱠᱟᱱ ᱡᱟᱭᱜᱟ ᱨᱮᱫᱚ ᱠᱩᱲᱤ ᱦᱚᱯᱚᱱ ᱥᱮᱪᱮᱫ ᱠᱚᱜ ᱠᱷᱟᱱᱮ ᱟᱹᱭᱤᱱ ᱠᱟᱹᱱᱩᱱ ᱨᱮᱱᱟᱜ ᱟᱥᱨᱟ ᱤᱫᱤ ᱠᱟᱛᱮ ᱟᱡᱟᱜ ᱦᱚᱠ ᱞᱟᱹᱜᱤᱫ ᱞᱟᱹᱲᱦᱟᱹᱭ ᱫᱟᱲᱮᱭᱟᱜ ᱟᱭ ᱾ ᱟᱨ ᱜᱮ ᱛᱤᱨᱞᱟᱹ ᱠᱚ ᱥᱮᱪᱮᱫᱚᱜ ᱠᱷᱟᱱ ᱱᱟᱵᱟᱞᱤᱠ ᱵᱟᱯᱞᱟ ᱠᱚᱢᱚᱜ ᱥᱟᱶᱛᱮ ᱟᱭᱳ ᱵᱮᱱᱟᱣᱜ ᱚᱠᱛᱮ ᱜᱤᱫᱽᱨᱟᱹ ᱥᱟᱶᱛᱮ ᱮᱸᱜᱟᱛ ᱦᱟᱱᱟᱥ ᱫᱚᱨ ᱦᱚᱸ ᱪᱟᱵᱟ ᱫᱟᱲᱮᱭᱟᱜᱼᱟ ᱾
ᱛᱤᱨᱞᱟᱹ ᱥᱮᱪᱮᱫ ᱨᱮ ᱥᱚᱨᱠᱟᱨᱤ ᱯᱚᱨᱛᱚᱱ ᱺ ᱟᱵᱚ ᱟᱹᱫᱤᱵᱟᱹᱥᱤ ᱠᱩᱲᱤ ᱜᱤᱫᱽᱨᱟᱹ ᱠᱚ ᱞᱟᱹᱜᱤᱫ ᱥᱚᱨᱠᱟᱨ ᱟᱵᱟᱥᱤᱠ ᱠᱚᱱᱭᱟᱥᱨᱚᱢ ᱟᱹᱰᱤ ᱴᱷᱟᱶ ᱨᱮ ᱵᱮᱱᱟᱣ ᱟᱠᱟᱫᱟᱭ ᱾ ᱡᱟᱦᱟᱸ ᱨᱮ ᱤᱱᱠᱟᱹ ᱯᱚᱞᱟ ᱛᱮ ᱡᱚᱢ ᱧᱩ ᱠᱷᱟᱛᱟ ᱠᱚᱞᱚᱢ ᱯᱚᱛᱚᱵ ᱥᱟᱶᱛᱮ ᱭᱩᱱᱤᱯᱷᱚᱨᱢ
ᱠᱚ ᱧᱟᱢ ᱮᱫᱼᱟ ᱚᱞ ᱯᱟᱲᱦᱟᱣ ᱵᱟᱠᱷᱨᱟ ᱾ ᱤᱱᱟᱹ ᱨᱮᱦᱚᱸ ᱥᱟᱶᱛᱟ ᱨᱤᱱ ᱥᱟᱱᱟᱢ ᱠᱩᱲᱤ ᱜᱤᱫᱽᱨᱟᱹ ᱚᱞᱚᱜ ᱯᱟᱲᱦᱟᱣ ᱞᱟᱹᱜᱤᱫ ᱫᱟᱣ ᱵᱟᱠᱚ ᱧᱟᱢ ᱫᱟᱲᱮᱭᱟᱜ ᱠᱟᱱᱟ ᱾ ᱡᱟᱦᱟᱸ ᱛᱤᱱᱟ.ᱜ ᱠᱚ ᱯᱟᱲᱦᱟᱣᱜ ᱠᱟᱱᱟ ᱩᱱᱠᱩ ᱢᱩᱫᱽ ᱨᱮ ᱟᱫᱷᱟᱱ ᱫᱚ ᱦᱟᱭᱤᱼᱥᱠᱩᱞ ᱛᱟᱭᱚᱢ ᱟᱨ ᱢᱟᱲᱟᱝ ᱥᱮᱫ ᱵᱟᱠᱚ ᱯᱟᱲᱦᱟᱣᱜ ᱠᱟᱱᱟ ᱾ ᱚᱠᱟᱨᱮ ᱜᱷᱟᱨᱚᱸᱡᱽ ᱨᱮ ᱴᱟᱠᱟ ᱯᱩᱭᱥᱟᱹ ᱟᱱᱟᱴ ᱛᱟᱦᱮᱸᱱ ᱠᱟᱱᱟ ᱛᱚ ᱚᱠᱟ ᱠᱚᱨᱮ ᱫᱚ ᱠᱩᱲᱤ ᱜᱤᱫᱽᱨᱟᱹ ᱦᱟᱜ ᱵᱟᱝ ᱨᱟᱹᱡᱤ ᱛᱮ ᱨᱮᱦᱚᱸ ᱠᱚ ᱵᱟᱯᱞᱟ ᱠᱟᱠᱚ ᱠᱟᱱᱟ ᱾ ᱚᱱᱟ ᱞᱟᱹᱜᱤᱫ ᱟᱭᱳ ᱵᱟᱵᱟ ᱠᱚ ᱵᱩᱡᱷᱟᱹᱣᱜ ᱟᱨ ᱪᱤᱨᱜᱟᱹᱞᱚᱜ ᱫᱚᱨᱠᱟᱨᱚᱜ ᱠᱟᱱᱟ ᱾ ᱠᱩᱲᱤ ᱜᱤᱫᱽᱨᱟᱹ ᱦᱚᱸ ᱞᱟᱯᱷᱟᱝ ᱪᱮᱥᱮᱫ ᱚᱪᱚ ᱠᱚ ᱞᱟᱹᱜᱤᱫ ᱟᱠᱚᱣᱟᱜ ᱡᱟᱸᱜᱟ ᱛᱮ ᱛᱤᱸᱜᱩ ᱠᱮᱴᱮᱡ ᱚᱪᱚ ᱟᱠᱚ ᱞᱟᱹᱜᱤᱫ ᱫᱟᱣ ᱮᱢᱟ ᱠᱚ
ᱵᱟᱠᱷᱨᱟ ᱾ ᱚᱱᱠᱟ ᱜᱮ ᱠᱚᱞᱮᱡᱽ ᱤᱱᱵᱷᱚᱨᱥᱤᱴᱤ ᱠᱚᱨᱮ ᱧᱩᱛᱩᱢ ᱚᱞ ᱞᱟᱹᱜᱤᱫ ᱟᱨ ᱪᱟᱹᱠᱨᱤ ᱧᱟᱢ ᱠᱚᱨᱮ ᱦᱚᱸ ᱠᱩᱲᱤ ᱠᱚ ᱞᱟᱹᱜᱤᱫ ᱫᱚ ᱨᱟᱠᱷᱟ ᱢᱮᱱᱟᱜᱼᱟ ᱾
ᱱᱤᱛᱱᱟᱝ ᱥᱟᱶᱛᱟᱨᱮ ᱛᱤᱨᱞᱟᱹ ᱥᱮᱪᱮᱫ ᱺ ᱱᱤᱛᱚᱜᱟᱜ ᱡᱩᱜᱽ ᱨᱮ ᱟᱹᱰᱤ ᱞᱮᱠᱟᱱ ᱴᱚᱴᱷᱟᱨᱮ ᱟᱵᱚ ᱨᱤᱱ ᱛᱤᱨᱞᱟᱹ ᱠᱚ ᱥᱮᱴᱮᱨ ᱫᱟᱲᱮ ᱟᱠᱟᱣ ᱟᱫᱟᱜᱼᱟ ᱾ ᱰᱟᱠᱛᱚᱨ, ᱤᱱᱡᱤᱱᱤᱭᱟᱨ, ᱯᱨᱚᱯᱷᱮᱥᱚᱨ, ᱯᱩᱞᱤᱥ ᱯᱷᱚᱨᱥ, ᱥᱯᱚᱨᱴᱥ ᱟᱛᱷᱮᱞᱮᱴᱤᱠᱥ ᱮᱢᱟᱱ ᱠᱚᱨᱮ ᱾ ᱟᱨ ᱛᱤᱱᱟ.ᱜ ᱜᱟᱱ ᱫᱚ ᱫᱤᱥᱚᱢ ᱫᱩᱱᱤᱭᱟᱹ ᱨᱮ ᱦᱚᱸ ᱟᱠᱚᱣᱟᱜ ᱧᱩᱛᱩᱢ ᱠᱚ ᱢᱟᱨᱥᱟᱞ ᱫᱟᱲᱮ ᱟᱠᱟᱣ ᱟᱫᱟ ᱾ ᱚᱱᱛᱮ ᱫᱚ ᱛᱤ ᱠᱟᱹᱴᱩᱵ ᱨᱮ ᱞᱮᱠᱷᱟ ᱥᱤᱫ ᱤᱱᱟ.ᱜ ᱜᱟᱱ ᱨᱮᱦᱚᱸ ᱜᱮ ᱠᱚ ᱾ ᱢᱟᱦᱟ ᱢᱟᱹᱦᱤᱢ ᱨᱟᱥᱴᱨᱚᱯᱚᱛᱤ ᱢᱟᱹᱱᱤᱡ ᱫᱨᱚᱣᱯᱚᱫᱤ ᱢᱩᱨᱢᱩ, ᱮᱵᱷᱚᱨᱮᱥᱴ ᱦᱮᱢᱟᱞ ᱩᱥᱩᱞ ᱵᱩᱨᱩ ᱴᱩᱭ ᱫᱮᱡ ᱨᱮ ᱢᱟᱹᱭ ᱵᱤᱱᱤᱛᱟ ᱥᱚᱨᱮᱱ, ᱯᱚᱫᱽᱢᱚ ᱥᱨᱤ ᱰᱨᱹ ᱫᱚᱢᱚᱭᱚᱱᱛᱤ ᱵᱮᱥᱨᱟ, ᱢᱟᱹᱱᱤᱡ ᱡᱚᱢᱩᱱᱟ ᱴᱩᱰᱩ, ᱢᱟᱹᱱᱤᱡ ᱪᱟᱹᱢᱤ ᱢᱩᱨᱢᱩ ᱮᱢᱟᱱ ᱾ ᱱᱩᱠᱩ ᱥᱟᱱᱟᱢ ᱛᱤᱨᱞᱟᱹ ᱦᱚᱯᱚᱱ ᱟᱠᱚᱣᱟᱜ ᱥᱮᱪᱮᱫ ᱟᱨ ᱦᱩᱱᱟᱹᱨ ᱫᱟᱲᱮ ᱛᱮ ᱛᱮᱦᱮᱧ ᱩᱱᱟ.ᱜ ᱞᱟᱯᱷᱟᱝ ᱴᱷᱟᱶ ᱨᱮᱠᱚ ᱥᱮᱴᱮᱨ ᱫᱟᱲᱮ ᱟᱠᱟᱣ ᱟᱫᱟᱜᱼᱟ ᱾
ᱡᱟᱭ ᱛᱮᱫ ᱺ ᱢᱤᱫ ᱠᱚᱲᱟ ᱦᱚᱯᱚᱱ ᱚᱞ ᱯᱟᱲᱦᱟᱣᱜ ᱠᱷᱟᱱᱮ ᱟᱡ ᱥᱩᱢᱩᱝ ᱮᱠᱞᱟ ᱜᱮ ᱥᱮᱪᱮᱫᱚᱜ ᱟᱭ ᱾ ᱤᱠᱷᱟᱹᱱ ᱢᱤᱫ ᱛᱤᱨᱞᱟᱹ ᱦᱚᱯᱚᱱ ᱚᱞ ᱯᱟᱲᱦᱟᱣᱜ ᱠᱷᱟᱱᱮ ᱥᱟᱱᱟᱢ ᱜᱷᱟᱨᱚᱸᱡᱽ ᱦᱚᱲ ᱠᱚ ᱥᱮᱪᱮᱫᱚᱜᱼᱟ ᱾ ᱜᱷᱟᱨᱚᱸᱡᱽ ᱨᱤᱱ ᱥᱟᱱᱟᱢ ᱦᱚᱲ ᱠᱚᱣᱟᱜ ᱡᱚᱛᱚᱱ, ᱵᱩᱜᱤ ᱟᱨ ᱵᱷᱟᱹᱞᱟᱹᱭ ᱞᱟᱹᱜᱤᱫ ᱛᱤᱨᱞᱟᱹ ᱟᱜ ᱮᱱᱮᱢ ᱟᱨ ᱟᱞᱟᱭ ᱫᱚ ᱠᱚᱲᱟ ᱦᱚᱯᱚᱱ ᱠᱷᱚᱱ ᱟᱹᱰᱤ ᱵᱤᱥᱛᱤᱭᱟ ᱾ ᱚᱱᱟ ᱛᱮ ᱟᱹᱛᱩ ᱫᱤᱥᱚᱢ ᱛᱟᱭ ᱥᱚᱦᱚᱨ ᱵᱟᱡᱟᱨ ᱛᱤᱨᱞᱟᱹ ᱠᱚ ᱞᱟᱯᱷᱟᱝ ᱥᱮᱪᱮᱫ ᱧᱟᱢ ᱵᱟᱠᱷᱨᱟ ᱡᱚᱛᱚ ᱠᱚᱛᱮ ᱠᱩᱨᱩᱢᱩᱴᱩᱭ ᱞᱟ.ᱠᱛᱤᱜ ᱠᱟᱱᱟ ᱾ ᱥᱟᱱᱟᱢ ᱛᱤᱨᱞᱟᱹ ᱦᱚᱯᱚᱱ ᱚᱞ ᱯᱟᱲᱦᱟᱣ ᱨᱮᱱᱟᱜ ᱛᱟᱠ ᱠᱚ ᱧᱟᱢ ᱫᱟᱲᱮᱭᱟᱜ ᱮᱱᱟᱝ ᱟᱨ ᱫᱟᱣ ᱠᱚ ᱦᱟᱛᱟᱣ ᱞᱮ ᱮᱱᱟᱝ ᱜᱮ ᱟᱵᱚ ᱡᱟᱹᱛᱤ ᱥᱟᱶᱛᱟ ᱞᱟᱦᱟᱜᱼᱟ ᱞᱟᱯᱷᱟᱝ ᱚᱜᱼᱟ ᱾
ᱟᱵᱚ ᱥᱟᱶᱛᱟ ᱨᱮ ᱛᱤᱨᱞᱟᱹ ᱫᱤᱥᱟᱹ ᱛᱮ ᱢᱤᱫ ᱚᱱᱚᱬᱦᱮ ᱤᱧ ᱫᱚᱲᱚᱢ ᱠᱮᱫᱼᱟ ᱼ
ᱛᱤᱨᱞᱟᱹ ᱡᱚᱱᱚᱢ
ᱤᱧ ᱫᱚ ᱥᱟᱫᱮᱨ ᱦᱚᱯᱚᱱ ᱮᱨᱟ ᱫᱩᱞᱟᱹᱲᱤᱭᱟᱹ ᱢᱤᱥᱮᱨᱟ
ᱚᱠᱚᱭ ᱨᱤᱱ ᱫᱚ ᱪᱷᱟᱛᱟ ᱩᱢᱩᱞ ᱡᱩᱨᱤ ᱡᱤᱛᱟᱹ ᱾
ᱦᱟᱛᱚᱢ ᱠᱟᱹᱠᱤ ᱢᱟᱹᱢᱤ ᱦᱤᱞᱤ ᱚᱠᱚᱭ ᱨᱤᱱ
ᱚᱠᱚᱭ ᱨᱤᱱ ᱫᱚ ᱦᱚᱱ ᱠᱤᱢᱤᱱ ᱾
ᱢᱤᱫ ᱟᱭᱳ ᱦᱟᱱᱦᱟᱨ ᱟᱭᱳ
ᱟᱨ ᱦᱚᱸ ᱠᱟᱹᱱᱟᱹᱧ ᱜᱚᱲᱚᱢ ᱟᱭᱳ ᱾
ᱛᱤᱨᱞᱟᱹ ᱨᱩᱯ ᱛᱤᱧ ᱡᱟᱱᱟᱢ ᱟᱠᱟᱱ
ᱛᱷᱚᱵᱽᱲᱮ ᱞᱟᱵᱽᱲᱮ ᱫᱩᱧ ᱵᱟᱝ ᱠᱟᱱ ᱾
ᱥᱟᱶᱛᱟ ᱵᱟᱭ ᱡᱚᱴᱮᱫ ᱚᱪᱚ ᱟᱹᱧ ᱱᱟᱦᱮᱞ ᱠᱟᱸᱬᱵᱟ
ᱤᱧ ᱞᱟᱹᱜᱤᱫ ᱥᱟᱹᱲᱤᱢ ᱫᱮᱡ ᱢᱟᱱᱟ ᱢᱟ.ᱱᱛᱤ ᱵᱟᱨᱚᱱ ᱜᱮᱭᱟ ᱾
ᱤᱠᱷᱟᱹᱱ ᱥᱟᱵ ᱞᱮᱠᱷᱟᱱᱤᱧ ᱱᱚᱱᱚᱞ ᱠᱚᱞᱚᱢ
ᱞᱟᱯᱷᱟᱝ ᱞᱟᱥᱟᱬᱦᱮᱫᱚᱜ ᱛᱤᱧ ᱛᱤᱨᱞᱟᱹ ᱡᱚᱱᱚᱢ ᱾
ᱦᱩᱭ ᱫᱟᱲᱮ ᱟᱜᱼᱟᱹᱧ ᱢᱤᱫ ᱢᱟᱪᱮᱛᱟᱹᱱᱤ
ᱰᱟᱠᱛᱚᱨ ᱠᱟᱛᱮ ᱥᱮᱵᱟ ᱫᱟzᱮ ᱟᱠᱚᱣᱟᱹᱧ ᱨᱩᱜᱤ ᱾
ᱥᱤᱯᱟᱹᱦᱤ ᱵᱩᱨᱫᱤ ᱛᱮ ᱫᱤᱥᱚᱢ ᱦᱚᱨᱦᱚ
ᱵᱟᱹᱭᱨᱤ ᱴᱷᱮᱱ ᱠᱷᱚᱱ ᱥᱤᱧ ᱚᱛ ᱫᱩᱜ ᱫᱚᱦᱚ ᱾
ᱪᱟᱸᱫᱚ ᱛᱟᱨᱟᱥ ᱫᱟᱜ ᱡᱟᱹᱲᱤ ᱴᱷᱚᱯ ᱞᱮᱠᱟᱧ ᱱᱤᱨᱞᱟᱹ
ᱵᱟ.ᱱᱩᱜ ᱠᱚ ᱵᱟᱹᱭᱨᱤ ᱵᱟ.ᱱᱩᱜ ᱛᱤᱧ ᱟᱹᱱᱟ.ᱲᱤ ᱵᱤᱨᱱᱟᱹ ᱾
ᱜᱚᱨᱚᱡᱽ ᱥᱤᱵᱤᱞ ᱫᱟᱭᱟ ᱫᱩᱞᱟᱹᱲ ᱤᱠᱟᱹ
ᱜᱩᱱ ᱛᱮ ᱥᱟᱹᱜᱟᱹᱭ ᱤᱧ ᱥᱩᱞᱩᱠ ᱥᱩᱜᱩᱲ ᱥᱩᱨᱟᱹ ᱾
ᱚᱛ ᱨᱮ ᱡᱟᱝ ᱚᱢᱚᱱ ᱯᱚᱴᱠᱚᱡ ᱦᱟᱨᱟ ᱵᱩᱨᱩᱜ ᱞᱮᱠᱟ
ᱚᱱᱛᱚᱨ ᱚᱲᱮᱡ ᱢᱟᱭᱟᱢ ᱨᱚᱰᱚᱡ ᱢᱟᱹᱱᱢᱤ ᱡᱟᱹᱛᱤᱧ ᱵᱟᱧᱪᱟᱣᱼᱟ ᱾
ᱛᱚᱵᱮ ᱨᱮᱦᱚᱸ ᱜᱮ
ᱮᱱ ᱦᱚᱸ ᱜᱮ!
ᱡᱤᱵᱚᱱ ᱨᱮᱱᱟᱜ ᱛᱤᱠᱤᱱ ᱛᱟᱨᱟᱥᱤᱧ ᱚᱠᱛᱮ
ᱴᱷᱟᱺᱴ ᱴᱩᱣᱟᱹᱨ ᱱᱟᱪᱟᱨ ᱱᱤᱫᱷᱟᱹᱱ ᱠᱚ ᱵᱮᱲᱟ ᱨᱮ ᱾
ᱠᱷᱟᱹᱲᱤ ᱱᱟᱹᱲᱤ ᱨᱮ ᱤᱧ ᱜᱤᱧ ᱩᱫᱩᱜᱚᱜᱼᱟ
ᱥᱤ ᱞᱮᱠᱷᱟᱱ ᱰᱷᱮᱞᱟᱠ ᱨᱟᱠᱟᱵ ᱞᱮᱠᱟ ᱾
ᱰᱟ.ᱦᱬᱤ ᱯᱟᱺᱜᱽᱬᱤ ᱱᱟᱡᱚᱢ
ᱤᱧ ᱫᱚ ᱚᱛᱮ ᱦᱚᱲᱤᱧ ᱡᱚᱡᱚᱢ ᱾
ᱡᱟᱦᱟᱸᱭ ᱜᱚᱲᱦᱚᱱ ᱟᱭ ᱩᱱᱟ.ᱜ ᱫᱩᱞᱟᱹᱲ ᱡᱚᱛᱚᱱ
ᱩᱱᱤ ᱪᱮ ᱱᱟᱥᱟᱣ ᱠᱮᱭᱟᱭ ᱢᱟᱹᱱᱢᱤ ᱡᱤᱵᱚᱱ ?
ᱢᱟᱹᱱ ᱥᱟᱨᱦᱟᱣ ᱤᱧ ᱟᱛᱟᱝ ᱟᱸᱡᱽᱞᱮ ᱞᱮᱠᱟ
ᱫᱚᱥ ᱫᱩᱥᱟᱹᱣ ᱢᱟᱜᱟᱞ ᱦᱩᱧ ᱥᱟᱦᱟᱣ ᱠᱟᱜᱼᱟ ᱾
ᱡᱮᱢᱚᱱ ᱞᱚᱞᱚᱼᱨᱟᱵᱟᱝᱼᱡᱟᱹᱯᱩᱫ ᱞᱮᱵᱮᱫᱼᱛᱷᱟᱹᱭᱟᱹᱼᱞᱟ
ᱫᱷᱟᱹᱨᱛᱤ ᱟᱭᱳᱭ ᱥᱟᱦᱟᱣ ᱫᱟᱲᱮᱭᱟᱜ ᱠᱟᱱᱟ ᱾
ᱥᱟᱦᱟᱣ ᱴᱟᱨᱦᱟᱣ ᱫᱟᱲᱮᱭᱟᱜ ᱛᱮᱜᱮᱧ ᱯᱟᱞᱮ
ᱢᱤᱨᱛᱷᱤᱠᱟ ᱥᱟᱶ ᱛᱩᱞᱩᱡᱚᱜᱼᱟᱭ ᱛᱤᱨᱞᱟᱹ ᱡᱮᱜᱮᱛ ᱨᱮ ᱾
ᱢᱤᱫ ᱵᱟᱨᱟᱵᱟᱹᱨᱤ ᱥᱚᱢᱟᱱ ᱦᱟᱢᱟᱞ ᱫᱚᱨᱡᱟ
ᱡᱩᱜᱮ ᱡᱩᱜᱮ ᱛᱤᱨᱞᱟᱹ ᱫᱷᱟᱹᱨᱛᱤ ᱥᱟᱞᱟᱜ ᱮ ᱧᱟᱢᱟ ᱾
***
