ᱤᱼᱯᱟᱛᱷᱟᱢ ᱫᱚ ᱪᱮᱫ?
ᱤᱼᱯᱟᱛᱷᱟᱢ ᱥᱮ ᱤᱼᱢᱮᱜᱟᱡᱤᱱ (ELECTRONICS MEGAZINE) ᱫᱚ ᱳᱱᱞᱤᱱᱮ ᱨᱮ ᱯᱟᱨᱥᱟᱞᱚᱜ ᱢᱤᱫ ᱯᱟᱛᱷᱟᱢ ᱠᱟᱱᱟ ᱾ ᱳᱱᱞᱤᱱᱮ ᱣᱮᱵᱥᱤᱴᱮ ᱨᱮ ᱚᱞ ᱵᱮᱞ ᱠᱚ ᱯᱟᱨᱥᱟᱞ ᱞᱮᱠᱷᱟᱱ, ᱢᱤᱫ ᱜᱷᱟᱹᱲᱤᱠ ᱨᱮᱜᱮ ᱡᱮᱜᱮᱛ ᱡᱟᱠᱟᱛ ᱨᱤᱱ ᱥᱟᱶᱦᱮᱫ ᱫᱩᱞᱟᱹᱲᱤᱭᱟᱹ ᱠᱚ ᱟᱵᱚᱣᱟᱜ ᱚᱞᱼᱵᱮᱞ ᱠᱚ ᱯᱟᱲᱦᱟᱣ ᱫᱟᱲᱮᱭᱟᱜᱼᱟ ᱾
ᱟᱭᱳ ᱟᱲᱟᱝ ᱫᱚ ᱥᱟᱱᱛᱟᱲ ᱠᱩᱲᱤ ᱚᱱᱚᱞᱤᱭᱟᱹ ᱠᱚᱣᱟᱜ ᱢᱤᱫ ᱥᱟᱶᱦᱮᱫ ᱢᱮᱞᱟᱝᱠᱤ ᱠᱟᱱᱟ᱾ ᱥᱟᱶᱦᱮᱫ ᱫᱚ ᱚᱞ ᱛᱮ ᱦᱩᱭᱩᱜ ᱟᱨ ᱪᱟᱨᱪᱟ ᱛᱮ ᱦᱩᱭᱩᱜ, ᱮᱱᱮᱡ ᱠᱟᱛᱮ ᱦᱩᱭᱩᱜ ᱟᱨᱵᱟᱝ ᱥᱮᱨᱮᱧ ᱠᱟᱛᱮ ᱦᱩᱭᱩᱜ, ᱡᱟᱦᱟᱸ ᱞᱮᱠᱟᱛᱮᱜᱮ ᱠᱩᱲᱤ ᱦᱚᱯᱚᱱ ᱠᱚ ᱟᱠᱚᱣᱟᱜ ᱥᱟᱶᱦᱮᱫ ᱦᱩᱱᱟᱹᱨ ᱱᱚᱶᱟ ᱚᱱᱞᱟᱭᱤᱱ ᱢᱮᱞᱟᱝᱠᱤ ᱦᱚᱛᱮᱛᱮ ᱡᱮᱜᱮᱛ ᱨᱮ ᱟᱵᱚ ᱨᱤᱱ ᱦᱚᱲ ᱦᱚᱯᱚᱱ ᱴᱷᱮᱱ ᱵᱚᱱ ᱥᱮᱴᱮᱨ ᱫᱟᱲᱮᱭᱟᱜᱼᱟ ᱾
ᱱᱤᱛᱚᱜ ᱞᱮᱠᱟᱱ ᱡᱩᱜᱽᱨᱮ ᱳᱱᱞᱟᱭᱤᱱ ᱛᱮ ᱟᱹᱰᱤ ᱞᱮᱠᱟᱱ ᱠᱟᱹᱢᱤ ᱦᱚᱨᱟ ᱪᱟᱞᱟᱜ ᱠᱟᱱᱟ᱾ ᱥᱟᱶᱦᱮᱫ ᱪᱮᱛᱟᱱ ᱨᱮ ᱠᱟᱹᱢᱤᱦᱚᱨᱟ ᱦᱚᱸ ᱟᱹᱰᱤᱜᱟᱱ ᱜᱮ ᱟᱹᱰᱤ ᱨᱤᱦᱤᱴ ᱨᱮ ᱪᱟᱞᱟᱜ ᱠᱟᱱᱟ᱾ ᱡᱟᱦᱟᱸ ᱞᱮᱠᱟ ᱯᱩᱭᱞᱩ ᱨᱮᱜᱮ ᱵᱚ ᱧᱩᱢ ᱦᱟᱞᱟᱝ ᱫᱟᱲᱮᱭᱟᱜᱼᱟ, ‘ᱵᱤᱨᱢᱟᱹᱞᱤ ᱤᱼᱯᱟᱛᱷᱟᱢ’, ᱱᱚᱶᱟ ᱫᱚ ᱥᱟᱱᱛᱟᱲ ᱥᱟᱶᱛᱟ ᱨᱮᱱᱟᱜ ᱥᱟᱱᱛᱟᱲᱤ ᱯᱟᱹᱨᱥᱤ ᱛᱮ ᱯᱩᱭᱞᱩ ᱤᱼᱯᱟᱛᱷᱟᱢ ᱠᱟᱱᱟ ᱾ ᱱᱚᱶᱟ ᱨᱮᱫᱚ ᱠᱩᱲᱤ ᱠᱚᱲᱟ ᱥᱟᱱᱟᱢ ᱠᱚᱜᱮ ᱟᱠᱚᱣᱟᱜ ᱚᱞᱼᱵᱮᱞ ᱠᱚ ᱯᱟᱨᱥᱟᱞ ᱥᱚᱫᱚᱨ ᱚᱪᱚ ᱫᱟᱲᱮᱭᱟᱜᱼᱟ ᱾ ᱚᱱᱠᱟ ᱜᱮ ᱱᱚᱶᱟ ‘ᱟᱭᱳ ᱟᱲᱟᱝ ᱤᱼᱯᱟᱛᱷᱟᱢ’ ᱫᱚ ᱥᱟᱱᱛᱟᱲ ᱥᱟᱶᱛᱟ ᱨᱤᱱ ᱥᱩᱢᱩᱝ ᱠᱩᱲᱤ ᱦᱚᱯᱚᱱ ᱚᱱᱚᱞᱤᱭᱟᱹ ᱠᱚ ᱞᱟᱹᱜᱤᱫ ᱯᱩᱭᱞᱩ ᱤᱼᱯᱟᱛᱷᱟᱢ ᱠᱟᱱᱟ ᱾
ᱱᱤᱛᱚᱜ ᱥᱟᱱᱛᱟᱲ ᱥᱟᱶᱛᱟ ᱨᱮᱱ ᱟᱹᱰᱤᱜᱟᱱ ᱠᱩᱲᱤ ᱦᱚᱯᱚᱱ ᱠᱚᱜᱮ ᱥᱟᱶᱦᱮᱫ ᱚᱞᱼᱵᱮᱞ ᱥᱮ ᱥᱟᱶᱦᱮᱫ ᱪᱟᱨᱪᱟ ᱨᱮᱠᱚ ᱟᱬᱜᱚ ᱦᱮᱡ ᱟᱠᱟᱱᱟ ᱾ ᱟᱹᱰᱤ ᱜᱟᱱ ᱠᱩᱲᱤ ᱦᱚᱯᱚᱱ ᱜᱮ ᱥᱟᱶᱦᱮᱫ ᱪᱟᱨᱪᱟ ᱨᱮᱱᱟᱜ ᱥᱩᱵᱤᱫᱷᱟ ᱠᱚ ᱧᱟᱢᱮᱫ ᱥᱟᱶᱼᱥᱟᱶᱛᱮ ᱟᱨ ᱦᱚᱸ ᱚᱱᱠᱟᱱ ᱟᱹᱰᱤᱜᱟᱱ ᱠᱩᱲᱤ ᱦᱚᱯᱚᱱ ᱢᱮᱱᱟᱜ ᱠᱚᱣᱟ, ᱡᱟᱦᱟᱸᱭ ᱠᱚᱫᱚ ᱚᱞᱼᱵᱮᱞ ᱠᱟᱛᱮ ᱨᱮᱦᱚᱸ ᱯᱚᱛᱚᱵ ᱯᱩᱛᱷᱤ ᱪᱷᱟᱯᱟ ᱯᱟᱨᱥᱟᱞ ᱞᱟᱹᱜᱤᱫ ᱚᱠᱩᱲᱟᱹᱱ ᱠᱷᱟᱹᱛᱤᱨ ᱥᱟᱶᱦᱮᱫ ᱪᱟᱨᱪᱟ ᱠᱷᱚᱱ ᱠᱚ ᱯᱟᱹᱪᱷᱞᱟᱹ ᱜᱚᱫᱚᱜᱼᱟ ᱾ ᱟᱠᱚᱣᱟᱜ ᱢᱚᱱᱮ ᱜᱟᱹᱦᱤᱸᱨ ᱨᱮᱱᱟᱜ ᱠᱟᱛᱷᱟ, ᱦᱚᱲ ᱴᱷᱮᱱ ᱥᱮᱴᱮᱨ ᱚᱪᱚ ᱨᱮᱠᱚ ᱟᱱᱟᱴ ᱮᱴᱠᱮᱴᱚᱬᱮ ᱜᱚᱫᱚᱜ ᱠᱟᱱᱟ ᱾ ᱚᱱᱠᱟᱱ ᱠᱩᱲᱤ ᱦᱚᱯᱚᱱ ᱠᱚᱣᱟᱜ ᱥᱟᱶᱦᱮᱫ ᱚᱞᱼᱵᱮᱞ ᱜᱮ ᱫᱤᱥᱚᱢ ᱦᱚᱲ ᱴᱷᱮᱱ ᱥᱚᱫᱚᱨ ᱞᱟᱹᱜᱤᱫ ᱱᱚᱶᱟ ᱤᱼᱯᱟᱛᱷᱟᱢ ᱫᱚ ᱮᱛᱚᱦᱚᱵ ᱦᱩᱭ ᱮᱱᱟ ᱾
ᱱᱤᱛᱚᱜ ᱱᱚᱶᱟ ᱤᱼᱯᱟᱛᱷᱟᱢ ᱨᱮ ᱥᱤᱧᱚᱛ ᱫᱤᱥᱚᱢ ᱥᱟᱶᱼᱥᱟᱶᱛᱮ ᱥᱤᱧᱚᱛ ᱠᱷᱚᱱ ᱵᱟᱦᱨᱮ ᱨᱤᱱ ᱠᱩᱲᱤ ᱚᱱᱚᱞᱤᱭᱟᱹ ᱠᱚᱦᱚᱸ ᱱᱚᱶᱟ ᱨᱮ ᱟᱠᱚᱣᱟᱜ ᱚᱞᱼᱵᱮᱞ ᱠᱚ ᱪᱷᱟᱯᱟ ᱯᱟᱨᱥᱟᱞ ᱫᱟᱲᱮᱭᱟᱜ ᱠᱟᱱᱟ ᱾ ᱚᱱᱟ ᱨᱮᱱᱟᱜ ᱚᱲᱟᱜ ᱥᱟᱦᱴᱟ ᱥᱮ Home Page ᱨᱮᱱᱟᱜ ᱪᱤᱛᱟᱹᱨ ᱜᱮ ᱞᱟᱛᱟᱨ ᱨᱮᱵᱚ ᱧᱮᱞ ᱫᱟᱲᱮᱭᱟᱜᱼᱟ ᱾
