ᱠᱩᱲᱤ ᱦᱚᱯᱚᱱ ᱡᱟᱱᱟᱢ
ᱚᱠᱟ ᱵᱩᱜᱤ ᱚᱠᱟ ᱵᱟᱹᱲᱤᱡ
ᱚᱠᱟ ᱨᱮᱪᱚ ᱛᱤᱱ ᱨᱮᱢ ᱵᱟᱹᱲᱤᱡᱚᱜ
ᱵᱟᱝ ᱨᱮ ᱨᱚᱲᱚᱜᱚᱼᱟ ᱿
ᱡᱟᱱᱟᱢ ᱚᱲᱟᱜ ᱨᱮ ᱛᱟᱦᱮᱱ ᱵᱷᱩᱨ ᱫᱚ
ᱟᱳᱚ ᱵᱟᱵᱟ ᱟᱯᱟ ᱵᱟᱨᱮ ᱢᱚᱦᱚᱛ ᱫᱤᱥᱟᱹ ᱠᱟᱛᱮ
ᱠᱟᱛᱷᱟ ᱵᱟᱝᱜᱤᱧ ᱟᱸᱡᱚᱢ ᱚᱪᱚ ᱠᱚᱣᱟ ᱢᱮᱱᱛᱮ
ᱡᱤᱣᱤ ᱞᱩᱠᱩᱫ ᱞᱩᱠᱩᱫ ᱿
ᱵᱟᱢ ᱨᱚᱲ ᱨᱮ ᱢᱮᱱ ᱟᱠᱚ
ᱠᱩᱲᱤ ᱜᱤᱫᱨᱟᱹᱭ ᱜᱚᱨᱚᱵᱽ ᱜᱮᱭᱟ
ᱨᱚᱲ ᱨᱮᱢᱟᱢ ᱢᱮᱱ ᱟᱠᱚ
ᱢᱚᱪᱟ ᱨᱮ ᱞᱟᱜᱟᱢ ᱵᱟᱹᱱᱩᱜ ᱿
ᱦᱟᱴ ᱯᱟᱛᱟᱛᱢ ᱫᱟᱲᱟᱱ ᱨᱮ
ᱢᱮᱱ ᱟᱠᱚ ᱠᱩᱲᱤ ᱜᱤᱫᱽᱨᱟᱭ ᱵᱟᱲᱤᱡ ᱜᱮᱭᱟ
ᱤᱥᱠᱩᱞ ᱠᱚᱞᱮᱡᱽ ᱵᱮᱲᱟ ᱨᱮ
ᱢᱮᱛᱟᱢᱟ ᱠᱚ ᱦᱟᱱᱤ ᱱᱩᱭ ᱥᱟᱶ ᱮᱢ ᱧᱮᱞᱮ ᱿
ᱡᱟᱶᱟᱭ ᱚᱲᱟ ᱨᱮ ᱞᱩᱠᱩᱫ ᱞᱩᱠᱩᱫ
ᱚᱠᱟᱹᱧ ᱜᱟᱱᱮᱫ ᱚᱠᱟᱹᱧ ᱵᱟᱹᱲᱤᱡᱮᱫ
ᱦᱟᱱᱦᱟᱨ ᱦᱚᱸᱧᱦᱟᱨ ᱚᱲᱟᱜ ᱦᱚᱲ
ᱯᱟᱪᱷᱮ ᱠᱚ ᱟᱲᱤᱥᱟᱹᱧ ᱠᱟᱱ ᱿
ᱫᱟᱠᱟ ᱩᱛᱩ ᱤᱥᱤᱱ ᱵᱟᱥᱟᱝ ᱢᱤᱼᱢᱤ ᱫᱤᱱ
ᱫᱟᱠᱟ ᱡᱟᱹᱣ ᱜᱚᱫᱚ ᱩᱛᱩ ᱨᱚᱝᱜᱚ ᱜᱚᱫᱚ
ᱞᱩ ᱦᱟᱴᱤᱧ ᱛᱮ ᱢᱤᱼ ᱢᱤ ᱫᱤᱱ
ᱩᱛᱩ ᱫᱟᱠᱟ ᱦᱚᱸ ᱠᱚᱢ ᱜᱚᱫᱚᱜ ᱿
ᱯᱮᱲᱟ ᱯᱩᱨᱵᱷᱩ ᱠᱚ ᱦᱤᱡᱩᱜ ᱨᱮ
ᱞᱚᱴᱟ ᱫᱟᱜ ᱨᱚᱲ ᱥᱟᱰᱮ ᱟᱭᱟᱢ
ᱟᱨᱦᱚᱸ ᱢᱮᱛᱟᱢᱟ ᱯᱷᱟᱞᱱᱟ ᱵᱟᱦᱩ
ᱵᱮᱵᱷᱟᱨ ᱫᱚ ᱵᱟᱭ ᱵᱟᱰᱟᱭ ᱿
ᱡᱟᱦᱟᱸ ᱥᱮᱫ ᱮᱢ ᱥᱮᱱᱚᱜ ᱨᱮ
ᱡᱤᱣᱤ ᱞᱩᱠᱩᱫ ᱞᱩᱠᱩᱫ
ᱱᱚᱭᱟ ᱦᱚᱲᱢᱚᱧ ᱨᱚᱯᱷᱟ ᱠᱮᱭᱟ ᱥᱮ ᱵᱟᱝ
ᱱᱚᱶᱟ ᱦᱚᱲᱢᱚ ᱪᱷᱤᱛᱤ ᱵᱤᱛᱤ ᱛᱤᱧ ᱿
ᱛᱤᱨᱞᱟᱹ ᱡᱤᱣᱤ ᱦᱩᱰᱩᱜ ᱦᱩᱰᱩᱜ
ᱚᱠᱟ ᱨᱮ ᱫᱚ ᱱᱤᱨᱟᱭ ᱛᱟᱦᱮᱱ
ᱚᱠᱟ ᱨᱮ ᱫᱚ ᱥᱚᱨᱮᱥ ᱛᱟᱦᱮᱱ
ᱵᱟᱝ ᱜᱮ ᱨᱚᱲᱚᱜᱚ ᱿
***
