ᱦᱩᱞᱜᱟᱹᱨᱤᱭᱟᱹ ᱥᱤᱫᱚ ᱠᱟᱹᱱᱦᱩ ᱛᱤᱠᱤᱱᱟᱜ ᱡᱟᱱᱟᱢ ᱫᱚ ᱱᱤᱛᱚᱜᱟᱜ ᱡᱷᱟᱨᱠᱷᱚᱸᱰ ᱯᱚᱱᱚᱛ, ᱥᱟᱦᱮᱵᱽᱜᱚᱸᱡᱽ ᱦᱚᱱᱚᱛ ᱨᱮᱭᱟᱜ ᱵᱷᱚᱜᱽᱱᱟᱰᱤ ᱟᱹᱛᱩ ᱨᱮ ᱾ ᱟᱹᱠᱤᱱ ᱥᱩᱢᱩᱝ ᱦᱩᱞᱜᱟᱹᱨᱤᱭᱟᱹ ᱫᱚ ᱵᱟᱹᱠᱤᱱ ᱛᱟᱦᱮᱸ ᱠᱟᱱᱟ ᱥᱟᱶᱛᱮ ᱵᱚᱭᱦᱟ ᱪᱟᱸᱫᱽ, ᱵᱷᱟᱭᱨᱚ, ᱢᱤᱥᱨᱟᱛ ᱯᱷᱩᱞᱚᱼᱡᱷᱟᱱᱚ ᱛᱤᱠᱤᱱ ᱦᱚᱸ ᱾
ᱢᱳᱜᱳᱞ ᱯᱟᱹᱲᱤᱭᱟᱹ ᱠᱚᱨᱮ ᱠᱷᱚᱱ ᱜᱮ ᱟᱵᱚ ᱥᱟᱱᱛᱟᱲ ᱠᱚᱫᱚ ᱵᱤᱨ ᱵᱩᱨᱩ ᱢᱟᱜ ᱯᱷᱟᱫᱟ ᱠᱟᱛᱮ ᱢᱤᱫ ᱡᱟᱭᱜᱟ ᱠᱷᱚᱱ ᱟᱨ ᱢᱤᱫ ᱡᱟᱭᱜᱟ ᱨᱮ ᱰᱤᱼᱰᱟᱹᱦᱤ ᱠᱚ ᱵᱮᱱᱟᱣ ᱤᱫᱤᱭᱮᱫ ᱛᱟᱦᱮᱸ ᱠᱟᱱᱟ, ᱚᱱᱟ ᱠᱚᱨᱮ ᱱᱟᱜ ᱠᱷᱟᱡᱽᱱᱟ ᱠᱚᱫᱚ ᱪᱮᱫ ᱦᱚᱸ ᱵᱟᱠᱚ ᱮᱢᱮᱫ ᱛᱟᱦᱮᱸᱫ ᱾ ᱟᱹᱛᱩ ᱢᱟᱹᱡᱷᱤ ᱢᱚᱬᱮ ᱟᱛᱮ ᱜᱮ ᱥᱟᱱᱛᱟᱲ ᱫᱚ ᱡᱩᱢᱤ ᱡᱟᱭᱜᱟ ᱫᱚᱠᱚ ᱵᱮᱱᱟᱣ ᱡᱚᱝ ᱠᱟᱱ ᱛᱟᱦᱮᱸᱫ ᱾ ᱟᱹᱛᱩ ᱩᱭᱦᱟᱹᱨ ᱞᱮᱠᱟ ᱛᱮ ᱢᱟᱹᱡᱷᱤ ᱜᱮᱭ ᱛᱟᱦᱮᱸ ᱠᱟᱱᱟ ᱦᱟᱥᱟ ᱨᱤᱱᱤᱡ ᱢᱟᱹᱞᱤᱠ ᱫᱚ ᱾ ᱤᱸᱜᱽᱨᱮᱡᱽ ᱥᱚᱨᱠᱟᱨᱮ ᱦᱮᱡ ᱮᱱ ᱛᱟᱭᱚᱢ ᱪᱟᱹᱥᱤ ᱠᱚᱴᱷᱮᱫ ᱠᱷᱚᱱ ᱠᱷᱟᱡᱽᱱᱟ ᱩᱴᱷᱟᱹᱣ ᱠᱚ ᱮᱦᱚᱵ ᱠᱮᱫᱼᱟ ᱾ ᱩᱱ ᱫᱚ ᱥᱟᱱᱛᱟᱲ ᱠᱚᱫᱚ ᱡᱚᱝᱜᱚᱞ ᱢᱚᱦᱚᱞ ᱨᱮᱠᱚ ᱴᱷᱟᱹᱶ ᱞᱮᱱᱟ ᱟᱨ ᱟᱠᱚᱣᱟᱜ ᱫᱷᱚᱱ ᱥᱚᱢᱯᱚᱛᱤ ᱮᱫᱤ ᱠᱟᱛᱮ ᱫᱚ ᱮᱴᱟᱜ ᱠᱚᱫᱚ ᱪᱮᱫ ᱦᱚᱸ ᱵᱟᱠᱚ ᱵᱟᱰᱟᱭ ᱡᱚᱝ ᱠᱟᱱ ᱛᱟᱦᱮᱸ ᱠᱟᱱᱟ ᱾ ᱡᱚᱝᱜᱚᱞ ᱢᱚᱦᱚᱞ ᱨᱮᱭᱟᱜ ᱜᱮ ᱨᱟᱭᱯᱩᱨ, ᱯᱷᱩᱞᱠᱩᱥᱢᱟ, ᱥᱤᱢᱞᱟᱯᱟᱞ, ᱯᱟᱨᱜᱟᱱᱟ ᱠᱚ ᱵᱚᱨᱫᱷᱚᱢᱟᱱ ᱡᱤᱞᱟ ᱥᱟᱶ ᱤᱥᱴ ᱤᱱᱰᱤᱭᱟᱹ ᱠᱚᱢᱯᱟᱱᱤ ᱟᱹᱭᱫᱟᱹᱨᱤ ᱨᱮ ᱦᱮᱡ ᱮᱱᱟ ᱾
ᱚᱱᱟ ᱛᱟᱭᱚᱢ ᱫᱚ ᱦᱟᱥᱟ ᱢᱟᱹᱞᱤᱠ ᱫᱚ ᱢᱟᱹᱡᱷᱤ ᱵᱟᱝ ᱦᱩᱭ ᱠᱟᱛᱮ ᱡᱚᱢᱤᱫᱟᱨ ᱠᱚ ᱦᱩᱭ ᱮᱱᱟ ᱟᱨ ᱟᱠᱚ ᱜᱮ ᱠᱷᱟᱡᱽᱱᱟ ᱠᱚ ᱩᱴᱷᱟᱹᱣ ᱠᱮᱫᱼᱟ ᱾ ᱞᱚᱨᱰ ᱠᱚᱨᱱᱟᱣᱟᱞᱤᱥ (Lord Cornwallis) ᱫᱚ ᱟᱹᱰᱤ ᱡᱩᱛ ᱥᱟᱹᱦᱤᱡ ᱜᱮ ᱠᱟᱹᱱᱩᱱ ᱮ ᱛᱚᱞ ᱞᱮᱫᱼᱟ ᱾ ᱡᱚᱢᱤᱫᱟᱨ ᱠᱚ ᱡᱚᱛᱚ ᱦᱚᱲ ᱠᱚ ᱯᱟᱴᱟ ᱠᱚ ᱮᱢᱟ ᱠᱚᱢᱟ ᱟᱨ ᱠᱷᱟᱡᱽᱱᱟ ᱤᱫᱤ ᱠᱟᱛᱮ ᱚᱱᱟ ᱨᱮ ᱴᱷᱟᱹᱣᱠᱟᱹ ᱥᱟᱹᱦᱤᱸᱡ ᱚᱞ ᱛᱟᱦᱮᱸᱱ ᱢᱟ ᱾ ᱢᱮᱱ ᱢᱟ ᱡᱚᱢᱤᱫᱟᱨ ᱠᱚᱫᱚ ᱚᱱᱟ ᱵᱟᱝ ᱠᱟᱹᱢᱤ ᱠᱟᱛᱮ ᱟᱹᱰᱤ ᱞᱮᱠᱟᱛᱮ ᱥᱟᱱᱛᱟᱲ ᱠᱚᱠᱚ ᱮᱲᱮ ᱠᱮᱫ ᱠᱚᱣᱟ ᱾ ᱨᱤᱱ ᱠᱚᱠᱚ ᱮᱢᱟᱫ ᱠᱚᱣᱟ, ᱟᱨ ᱨᱤᱱ ᱨᱮᱭᱟᱜ ᱥᱩᱫᱽ ᱠᱚᱦᱚᱸ ᱰᱷᱮᱨ ᱜᱮᱠᱚ ᱞᱟᱜᱟᱣ ᱮᱫ ᱛᱟᱦᱮᱸ ᱠᱟᱱᱟ ᱾ ᱤᱸᱜᱽᱨᱮᱡᱽ ᱠᱚ ᱦᱚᱲ ᱦᱚᱯᱚᱱᱟᱜ ᱦᱟᱥᱟ ᱡᱟᱭᱜᱟ ᱡᱚᱢᱤᱫᱟᱨ ᱢᱟᱦᱟᱡᱚᱱ ᱴᱷᱮᱫ ᱠᱚ ᱱᱤᱞᱟᱹᱢ ᱮᱫ ᱛᱟᱦᱮᱸ ᱠᱟᱱᱟ ᱾ ᱥᱟᱱᱛᱟᱲ ᱠᱚ ᱟᱹᱰᱤ ᱢᱩᱥᱠᱤᱞ ᱨᱮᱠᱚ ᱯᱟᱲᱟᱣ ᱞᱮᱱᱟ ᱾ ᱚᱱᱟ ᱡᱟᱞᱟᱛᱮ ᱥᱟᱱᱛᱟᱲ ᱠᱚ ᱦᱟᱱᱛᱮᱼᱱᱷᱟᱛᱮ ᱞᱮᱱᱟ ᱾
ᱵᱤᱨ ᱵᱷᱩᱢ, ᱫᱷᱟᱲᱵᱷᱩᱢ, ᱢᱟᱱᱵᱷᱩᱢ, ᱦᱟᱡᱟᱨᱤᱵᱟᱜᱽ, ᱢᱮᱫᱽᱱᱤᱯᱩᱨ ᱠᱚᱨᱮ ᱠᱷᱚᱱ ᱱᱤᱛᱚᱜᱟᱜ ᱰᱩᱢᱠᱟᱹ ᱡᱤᱞᱟ ᱨᱮᱭᱟᱜ ᱥᱟᱱᱛᱟᱲ ᱯᱟᱨᱜᱟᱱᱟ ᱨᱮᱠᱚ ᱦᱮᱡ ᱡᱟᱣᱨᱟ ᱞᱮᱱᱟ ᱾ ᱑᱘᱓᱒ᱼ᱓᱓ ᱥᱟᱞᱮ ᱨᱮ ᱫᱟᱢᱤᱱᱼᱤᱼᱠᱳ ᱨᱮᱱᱟᱜ ᱥᱤᱢᱟᱹ ᱛᱚᱞ ᱦᱩᱭ ᱮᱱ ᱫᱚ ᱤᱱ ᱦᱤᱞᱚᱜ ᱠᱷᱚᱱ ᱜᱮ ᱥᱟᱱᱛᱟᱲ ᱠᱚ ᱨᱟᱡᱽᱢᱚᱦᱚᱞ ᱨᱮᱭᱟᱜ ᱵᱩᱨᱩ ᱥᱚᱸᱜᱷᱟ ᱡᱟᱭᱜᱟ ᱱᱟᱣᱟ ᱫᱟᱢᱤᱱᱼᱤᱼᱠᱳ ᱵᱤᱨ ᱵᱩᱨᱩ ᱢᱟᱜ ᱯᱷᱟᱫᱟ ᱠᱟᱛᱮ ᱚᱱᱟ ᱚᱛᱼᱦᱟᱥᱟ ᱨᱮ ᱱᱟᱱᱟ ᱦᱩᱱᱟᱹᱨ ᱪᱟᱥ ᱟᱵᱟᱫᱽ ᱠᱟᱛᱮ ᱠᱚ ᱛᱟᱦᱮᱸ ᱠᱟᱱ ᱛᱟᱦᱮᱸᱫᱚᱜ ᱾ ᱟᱹᱰᱤ ᱰᱷᱮᱨ ᱪᱟᱥ ᱠᱚᱠᱚ ᱦᱩᱭ ᱚᱪᱚ ᱞᱮᱫᱼᱟ ᱾ ᱡᱚᱢᱤᱫᱟᱨ ᱠᱚ ᱚᱸᱰᱮ ᱦᱚᱸ ᱠᱚ ᱥᱚᱲᱚ ᱵᱚᱞᱚ ᱞᱮᱱᱟ ᱟᱨ ᱟᱠᱚᱣᱟᱜ ᱠᱷᱟᱡᱽᱱᱟ ᱱᱟᱦᱟᱪᱟᱨ ᱠᱚ ᱮᱦᱚᱵ ᱠᱮᱫᱼᱟ ᱾ ᱡᱚᱢᱤᱫᱟᱨ ᱢᱟᱦᱟᱡᱚᱱ ᱤᱸᱜᱽᱨᱮᱡᱽ ᱥᱟᱶ ᱢᱤᱫ ᱠᱟᱛᱮ ᱥᱟᱱᱛᱟᱲ ᱠᱚᱣᱟᱜ ᱚᱛᱼᱦᱟᱥᱟ ᱨᱮ ᱟᱠᱚᱣᱟᱜ ᱦᱚᱠ ᱟᱹᱭᱫᱟᱹᱨᱤ ᱠᱚ ᱫᱟᱹᱵᱤᱭᱮᱫ ᱛᱟᱦᱮᱫ ᱾ ᱥᱟᱱᱛᱟᱲ ᱫᱚ ᱩᱱᱠᱩ ᱨᱤᱱ ᱠᱤᱨᱤᱧ ᱜᱩᱛᱤ ᱠᱚ ᱛᱟᱦᱮᱸᱭᱮᱱᱟ ᱾ ᱠᱤᱨᱤᱧᱼᱟᱹᱠᱷᱨᱤᱧ ᱞᱟᱹᱜᱤᱫ ᱢᱟᱦᱟᱡᱚᱱ ᱴᱷᱮᱱ ᱜᱮ ᱨᱤᱱ ᱠᱚ ᱦᱟᱛᱟᱣ ᱦᱩᱭ ᱟᱠᱚ ᱠᱟᱱ ᱛᱟᱦᱮᱸᱫ ᱾ ᱨᱤᱱ ᱮᱢ ᱨᱩᱣᱟᱹᱲ ᱦᱚᱸ ᱟᱹᱰᱤ ᱟᱸᱴ ᱜᱮ ᱛᱟᱦᱮᱸ ᱠᱟᱱᱟ ᱾ ᱵᱟᱠᱚ ᱦᱟᱞᱟ ᱫᱟᱲᱮᱭᱟᱫ ᱠᱷᱟᱱ ᱡᱚᱛᱚ ᱚᱲᱟᱜ ᱦᱚᱲ ᱠᱚ ᱟᱹᱠᱷᱨᱤᱧᱚᱜ ᱠᱟᱱ ᱛᱟᱦᱮᱸ ᱾ ᱨᱤᱱ ᱨᱮᱭᱟᱜ ᱥᱩᱫᱽ ᱫᱚ ᱥᱟᱭ ᱨᱮ ᱢᱚᱬᱮ ᱜᱮᱞ ᱠᱷᱚᱱ ᱢᱚᱬᱮ ᱥᱟᱭ ᱦᱟᱹᱵᱤᱡ ᱵᱟᱹᱲᱛᱤ ᱤᱫᱤᱜ ᱠᱟᱱ ᱛᱟᱦᱮᱸᱫ ᱾ ᱱᱚᱝᱠᱟᱛᱮ ᱦᱚᱲ ᱦᱚᱯᱚᱱᱟᱜ ᱚᱲᱟᱜ ᱫᱩᱣᱟᱹᱨ ᱦᱚᱠ ᱟᱹᱭᱫᱟᱹᱨᱤ ᱡᱚᱛᱚ ᱪᱷᱤᱱ ᱪᱷᱚᱛᱚᱨ ᱪᱟᱵᱟ ᱞᱮᱱᱟ ᱾
ᱱᱚᱣᱟ ᱫᱩᱠ, ᱯᱩᱞᱤᱥ, ᱠᱚᱴ ᱠᱩᱪᱨᱤ ᱠᱚᱨᱮ ᱪᱤᱞᱤ ᱦᱚᱸ ᱵᱟᱠᱚ ᱟᱸᱡᱚᱢᱮᱫ ᱛᱟᱦᱮᱸᱫ ᱾ ᱩᱞᱴᱟᱹ ᱩᱱᱠᱩ ᱜᱮ ᱦᱟᱱᱟ ᱱᱷᱟᱣᱟ ᱫᱚᱥ ᱠᱟᱛᱮ ᱠᱚ ᱡᱤᱦᱚᱞᱮᱫ ᱠᱚ ᱛᱟᱦᱮᱸᱫ ᱾ ᱵᱷᱟᱜᱚᱞᱯᱩᱨ ᱵᱚᱨᱫᱷᱚᱢᱟᱱ ᱨᱮᱞ ᱞᱟᱹᱭᱤᱱ ᱵᱮᱱᱟᱣ ᱞᱟᱹᱜᱤᱫ ᱟᱹᱰᱤ ᱜᱟᱱ ᱥᱟᱱᱛᱟᱲ ᱠᱚ ᱡᱚᱨ ᱡᱩᱞᱩᱢ ᱫᱟᱞ ᱛᱚᱞ ᱠᱟᱛᱮ ᱵᱤᱱ ᱠᱩᱲᱟᱹᱭ ᱛᱮᱠᱚ ᱠᱟᱹᱢᱤ ᱦᱚᱪᱚᱭᱮᱫ ᱠᱚ ᱛᱟᱦᱮᱸᱫ ᱾ ᱯᱤᱴᱩᱠ ᱤᱸᱜᱽᱨᱮᱡᱽ ᱟᱨ ᱢᱟᱦᱟᱡᱚᱱ ᱠᱚ ᱚᱱᱟ ᱥᱩᱨ ᱠᱚᱨᱮ ᱛᱟᱦᱮᱸ ᱠᱟᱱ ᱟᱹᱛᱩ ᱠᱷᱚᱱ ᱥᱤᱢ ᱥᱩᱠᱨᱤ ᱮᱢᱟᱱ ᱠᱚ ᱡᱚᱨ ᱡᱚᱵᱚᱨ ᱠᱚ ᱟᱹᱫᱟᱹᱭ ᱮᱫ ᱠᱚ ᱛᱟᱦᱮᱸᱫ ᱾ ᱠᱩᱲᱤ ᱦᱚᱯᱚᱱ ᱪᱮᱛᱟᱱ ᱦᱚᱸ ᱟᱹᱰᱤ ᱵᱟᱹᱲᱤᱡ ᱱᱟᱦᱟᱪᱟᱨ ᱡᱚᱨ ᱡᱚᱵᱚᱨ ᱠᱚ ᱠᱟᱹᱢᱤ ᱠᱟᱱ ᱛᱟᱦᱮᱸᱫ ᱾ ᱵᱮᱥᱼᱵᱮᱥ ᱦᱟᱥᱟ ᱠᱚ ᱞᱤᱞ ᱪᱟᱥ ᱞᱟᱹᱜᱤᱫ ᱠᱚ ᱨᱮᱡ ᱦᱚᱪᱚ ᱞᱮᱱᱟ ᱾ ᱫᱷᱚᱱ ᱫᱩᱨᱤᱵᱽ ᱰᱟᱺᱜᱽᱨᱤ ᱢᱮᱨᱚᱢ ᱨᱮᱡ ᱦᱚᱪᱚ ᱥᱟᱶᱼᱥᱟᱶ ᱚᱲᱟᱜ ᱠᱚᱦᱚᱸ ᱠᱚ ᱟᱛᱟᱨᱮᱫ ᱛᱟᱦᱮᱸᱫ ᱾ ᱥᱟᱱᱛᱟᱲ ᱠᱚ ᱟᱹᱰᱤ ᱜᱮᱠᱚ ᱦᱟ.ᱞᱤᱠ ᱮᱱᱟ ᱾
ᱱᱚᱶᱟ ᱠᱚ ᱥᱤᱫᱚᱼᱠᱟᱹᱱᱦᱩ ᱛᱤᱠᱤᱱ ᱵᱟᱝ ᱠᱤᱱ ᱧᱮᱞ ᱥᱟᱦᱟᱣ ᱫᱟᱲᱮᱭᱟᱜ ᱠᱟᱱ ᱛᱟᱦᱮᱸᱫᱚᱜ ᱾ ᱱᱚᱜᱼᱚᱭ ᱱᱚᱝᱠᱟ ᱟᱹᱠᱩᱛ ᱚᱠᱛᱚ ᱨᱮ ᱢᱟᱨᱟᱝ ᱵᱳᱨᱳᱣᱟᱜ ᱟᱸᱫᱮ ᱦᱮᱡ ᱟᱫ ᱠᱤᱱᱟ ᱟᱨ ᱢᱤᱢᱤᱫ ᱫᱷᱟᱣ ᱠᱟᱛᱮ ᱮᱭᱟᱭ ᱫᱷᱟᱣ ᱵᱷᱮᱜᱟᱨᱼᱵᱷᱮᱜᱟᱨ ᱨᱩᱯ ᱛᱮ ᱢᱟᱨᱟᱝ ᱵᱳᱨᱳᱭ ᱧᱮᱞ ᱧᱟᱢ ᱞᱮᱫᱮᱭᱟ ᱥᱤᱫᱚ ᱾ ᱢᱟᱨᱟᱝ ᱵᱳᱨᱳᱣᱟᱜ ᱟᱸᱫᱮ ᱧᱟᱢ ᱠᱟᱛᱮ ᱥᱟᱱᱛᱟᱲ ᱦᱚᱲ ᱠᱚᱣᱟᱜ ᱡᱚᱛᱚ ᱫᱩᱠ ᱥᱟᱢᱴᱟᱣ ᱞᱟᱹᱜᱤᱫ ᱛᱮ ᱥᱤᱫᱚᱼᱠᱟᱹᱱᱦᱩ ᱠᱤᱱ ᱛᱤᱸᱜᱩᱭᱮᱱᱟ ᱾ ᱜᱚᱴᱟ ᱯᱟᱲᱟ ᱨᱤᱱ ᱦᱚᱲ ᱠᱚ ᱥᱟᱞᱟᱜ ᱠᱤᱱ ᱜᱟᱞᱢᱟᱨᱟᱣ ᱠᱮᱫᱼᱟ ᱟᱨ ᱥᱟᱨᱡᱚᱢ ᱜᱤᱨᱟᱹ ᱮᱢ ᱠᱟᱛᱮ ᱑᱘᱕᱕ ᱛᱤᱥᱟ ᱡᱩᱱ ᱨᱮ ᱵᱷᱚᱜᱽᱱᱟᱰᱤ ᱰᱟᱹᱦᱤ ᱨᱮ ᱠᱚ ᱡᱟᱨᱣᱟ ᱮᱱᱟ ᱾ ᱚᱱᱟ ᱫᱩᱯᱩᱲᱩᱵ ᱨᱮ ᱜᱮᱞ ᱦᱟᱡᱟᱨ ᱫᱤᱥᱚᱢ ᱦᱚᱲ ᱡᱟᱨᱣᱟ ᱠᱚ ᱛᱟᱦᱮᱸ ᱠᱟᱱᱟ ᱾
ᱮᱭᱟᱭ ᱡᱩᱞᱟᱹᱭ ᱑᱘᱕᱕ ᱦᱤᱞᱚᱜ ᱫᱤᱜᱷᱤ ᱛᱷᱟᱱᱟ ᱨᱤᱱᱤᱡ ᱫᱟᱨᱜᱟ ᱢᱚᱦᱮᱥ ᱞᱟᱞ ᱫᱳᱛᱚ ᱟᱨ ᱠᱮᱱᱟᱨᱟᱢ ᱵᱷᱚᱜᱚᱛ ᱠᱚ ᱦᱮᱞᱮᱡ ᱠᱮᱫ ᱠᱤᱱ ᱠᱷᱟᱱ ᱜᱮ ᱦᱩᱞ ᱫᱚ ᱮᱦᱚᱵ ᱥᱟᱹᱛ ᱮᱱᱟ ᱾ ᱥᱟᱦᱮᱵᱽ ᱨᱤᱱ ᱯᱷᱟᱹᱫᱽ ᱯᱟᱞᱴᱚᱱ ᱠᱚ ᱥᱮᱴᱮᱨᱮᱱᱟ ᱥᱤᱫᱚᱼᱠᱟᱹᱱᱦᱩ ᱛᱤᱠᱤᱱᱟᱜ ᱟᱹᱭᱩᱨ ᱛᱮ ᱞᱟᱹᱰᱷᱟᱹᱭ ᱦᱚᱸ ᱮᱦᱚᱵ ᱮᱱᱟ ᱾ ᱪᱟᱸᱫᱽ ᱵᱷᱟᱭᱨᱚ ᱛᱤᱠᱤᱱ ᱦᱚᱸ ᱞᱟᱹᱰᱷᱟᱹᱭ ᱨᱮᱠᱤᱱ ᱢᱮᱥᱟ ᱮᱱᱟ ᱟᱨ ᱯᱷᱩᱞᱚᱼᱡᱷᱟᱱᱚ ᱛᱤᱠᱤᱱ ᱦᱚᱸ ᱞᱟᱹᱰᱷᱟᱹᱭ ᱨᱮᱠᱤᱱ ᱥᱮᱞᱮᱫ ᱮᱱᱟ ᱟᱨ ᱥᱟᱱᱟᱢ ᱠᱩᱲᱤ ᱦᱚᱯᱚᱱ ᱠᱤᱱ ᱟᱹᱭᱩᱨ ᱠᱮᱫ ᱠᱚᱣᱟ ᱾ ᱮᱦᱚᱵ ᱨᱮ ᱱᱚᱶᱟ ᱞᱟᱹᱰᱷᱟᱹᱭ ᱡᱚᱢᱤᱫᱟᱨ ᱟᱨ ᱥᱟᱹᱦᱩᱠᱟᱹᱨ ᱠᱚ ᱵᱤᱨᱩᱫᱽ ᱛᱟᱦᱮᱸ ᱠᱟᱱ ᱨᱮᱦᱚᱸ ᱛᱟᱭᱚᱢ ᱛᱮ ᱥᱟᱱᱟᱢ ᱦᱚᱲ ᱠᱚ ᱵᱟᱰᱟᱭ ᱠᱮᱫᱼᱟ ᱞᱟᱹᱰᱷᱟᱹᱭ ᱵᱨᱤᱴᱤᱥ ᱠᱚ ᱵᱤᱨᱩᱫᱽ ᱨᱮ ᱦᱩᱭᱩᱜ ᱠᱟᱱᱟ ᱾
ᱢᱤᱫ ᱥᱮᱱ, ᱟᱜᱼᱥᱟᱨ ᱠᱟᱹᱯᱤ ᱛᱟᱨᱣᱟᱲᱮ ᱞᱮᱠᱟᱱ ᱢᱟᱨᱮ ᱥᱟᱯᱟᱵ ᱟᱨ ᱢᱤᱫ ᱥᱮᱱ ᱱᱟᱦᱟᱜ ᱥᱟᱯᱟᱵ ᱵᱟᱸᱫᱩᱠ, ᱠᱟᱢᱟᱱ, ᱜᱩᱞᱤ ᱮᱱ ᱨᱮᱦᱚᱸ ᱥᱟᱱᱛᱟᱲ ᱠᱚ ᱡᱤᱣᱤ ᱟᱞᱟᱭ ᱠᱟᱛᱮ ᱠᱚᱲᱟᱢ ᱚᱰᱟᱣ ᱠᱟᱛᱮ ᱠᱚ ᱞᱟᱹᱰᱷᱟᱹᱭ ᱞᱮᱫᱼᱟ ᱾ ᱵᱨᱤᱴᱤᱥ ᱯᱷᱟᱹᱫᱽ ᱠᱚᱣᱟᱜ ᱢᱟᱭᱟᱢ ᱛᱮ ᱯᱤᱭᱟᱞᱟᱯᱩᱨ ᱜᱟᱰᱟ ᱫᱟᱜ ᱟᱨᱟᱜ ᱪᱟᱵᱟ ᱞᱮᱱᱟ ᱾ ᱚᱱᱟ ᱞᱟᱹᱰᱷᱟᱹᱭ ᱨᱮ ᱵᱨᱤᱴᱤᱥ ᱠᱚᱣᱟᱜ ᱟᱹᱰᱤ ᱢᱟᱨᱟᱝ ᱦᱟᱨ ᱦᱩᱭ ᱞᱮᱱᱟ ᱾
ᱱᱚᱶᱟ ᱞᱟᱹᱰᱷᱟᱹᱭ ᱨᱮ ᱥᱟᱱᱛᱟᱲ ᱠᱚ ᱟᱹᱰᱤ ᱫᱷᱟᱣ ᱜᱮᱠᱚ ᱫᱟᱲᱮ ᱟᱠᱟᱱᱟ ᱾ ᱱᱚᱶᱟ ᱦᱩᱞ ᱥᱮᱸᱜᱮᱞ ᱫᱚ ᱪᱷᱚᱴᱱᱟᱜᱽᱯᱩᱨ ᱨᱮᱭᱟᱜ ᱦᱟᱡᱟᱨᱤᱵᱟᱜᱽ ᱫᱷᱟᱹᱵᱤᱡ ᱞᱟᱜᱟᱣ ᱥᱮᱴᱮᱨᱮᱱᱟ ᱾ ᱚᱸᱰᱮ ᱫᱚ ᱦᱩᱞ ᱥᱮᱸᱜᱮᱞ ᱚᱨᱡᱩᱱ ᱢᱟᱹᱡᱷᱤ, ᱞᱩᱵᱟᱹᱭ ᱢᱟᱹᱡᱷᱤ ᱟᱨ ᱵᱷᱚᱭᱨᱚ ᱢᱟᱹᱡᱷᱤ ᱥᱟᱵ ᱟᱹᱭᱩᱨ ᱠᱮᱫᱼᱟ ᱾ ᱩᱱᱠᱩ ᱦᱚᱸ ᱵᱨᱤᱴᱤᱥ ᱥᱚᱨᱠᱟᱨ ᱨᱤᱱ ᱦᱚᱲ ᱠᱚᱦᱚᱸ ᱠᱚ ᱜᱚᱡ ᱠᱮᱫ ᱠᱚᱣᱟ ᱾ ᱤᱸᱜᱨᱮᱡᱽ ᱠᱚ ᱱᱚᱶᱟ ᱞᱟᱹᱰᱷᱟᱹᱭ ᱡᱟᱦᱟᱸ ᱞᱮᱠᱟᱨᱮ ᱫᱟᱲᱮ ᱞᱟᱹᱜᱤᱫ ᱟᱵᱚᱨᱤᱱ ᱦᱚᱲ ᱠᱚ ᱜᱮᱞ ᱦᱟᱡᱟᱨ ᱴᱟᱠᱟ ᱨᱮᱱᱟᱜ ᱞᱚᱵᱽ ᱠᱚ ᱮᱢᱟᱫ ᱠᱚᱣᱟ ᱾ ᱚᱱᱟ ᱴᱟᱠᱟ ᱞᱚᱵᱽ ᱛᱮ ᱟᱵᱚᱨᱤᱱ ᱦᱚᱲ ᱜᱮ ᱥᱤᱫᱚ ᱫᱚ ᱤᱸᱜᱽᱨᱮᱡᱽ ᱴᱷᱮᱱ ᱠᱚ ᱥᱟᱵ ᱦᱚᱪᱚ ᱠᱮᱫᱮᱭᱟ ᱾ ᱩᱱᱤ ᱫᱚ ᱥᱟᱵ ᱠᱟᱛᱮ ᱠᱚ ᱯᱟᱹᱥᱤ ᱠᱮᱫᱮᱭᱟ ᱾ ᱚᱱᱟ ᱛᱟᱭᱚᱢ ᱤᱸᱜᱽᱨᱮᱡᱽ ᱠᱚ ᱟᱹᱛᱩᱼᱟᱹᱛᱩ ᱥᱮᱸᱜᱮᱞ ᱠᱚ ᱫᱷᱚᱨᱟᱣ ᱟᱛᱟᱨ ᱠᱮᱫᱼᱟ ᱾ ᱚᱱᱟ ᱛᱮᱦᱚᱸ ᱵᱟᱠᱚ ᱫᱟᱲᱮ ᱞᱮᱱ ᱠᱷᱟᱱ ᱢᱟᱨᱥᱟᱞ ᱞᱚ ᱠᱚ ᱞᱟᱹᱜᱩ ᱠᱮᱫᱼᱟ ᱾
ᱞᱟᱹᱰᱷᱟᱹᱭ ᱨᱮ ᱫᱟᱲᱮ ᱞᱟᱹᱜᱤᱫ ᱯᱟᱹᱠᱩᱲ ᱨᱮ ᱢᱤᱫ ᱧᱤᱫᱟᱹ ᱛᱮ ᱢᱟᱨᱴᱮᱞ ᱴᱟᱣᱟᱨ ᱠᱚ ᱵᱮᱱᱟᱣ ᱠᱮᱫᱼᱟ ᱾ ᱚᱱᱟ ᱠᱷᱚᱱ ᱩᱠᱩ ᱠᱟᱛᱮ ᱦᱩᱞᱜᱟᱹᱨᱤᱭᱟᱹ ᱠᱚ ᱪᱮᱛᱟᱱ ᱨᱮ ᱜᱩᱲᱤ ᱠᱚ ᱪᱟᱞᱟᱣ ᱠᱮᱫᱼᱟ ᱾ ᱚᱱᱟᱛᱮ ᱟᱹᱰᱤ ᱜᱟᱱ ᱦᱩᱞᱜᱟᱹᱨᱤᱭᱟᱹ ᱠᱚ ᱜᱚᱡ ᱦᱚᱪᱚᱭᱮᱱᱟ ᱾ ᱚᱱᱟ ᱨᱮ ᱪᱟᱸᱫᱽ ᱵᱷᱟᱭᱨᱚ ᱦᱚᱸ ᱠᱤᱱ ᱜᱚᱡ ᱦᱚᱪᱚᱭᱮᱱᱟ ᱾ ᱢᱩᱪᱟᱹᱫ ᱨᱮ ᱦᱩᱞᱜᱟᱹᱨᱤᱭᱟᱹ ᱠᱚᱦᱚᱸ ᱠᱚ ᱥᱟᱵ ᱦᱚᱪᱚᱭᱮᱱᱟ ᱾ ᱠᱟᱹᱱᱦᱩ ᱫᱚ ᱯᱟᱸᱪ ᱠᱟᱹᱴᱷᱤᱭᱟᱹ ᱵᱟᱲᱮ ᱫᱟᱨᱮ ᱨᱮᱠᱚ ᱯᱟᱹᱥᱤ ᱜᱚᱡ ᱠᱮᱫᱮᱭᱟ ᱟᱨ ᱦᱩᱞᱜᱟᱹᱨᱤᱭᱟᱹ ᱠᱚᱦᱚᱸ ᱠᱚ ᱯᱟᱹᱥᱤ ᱠᱮᱫ ᱠᱚᱣᱟ ᱾ ᱦᱩᱞ ᱛᱟᱭᱚᱢ ᱦᱚᱸ ᱥᱟᱱᱛᱟᱲ ᱫᱚ ᱪᱮᱫ ᱦᱚᱸ ᱵᱟᱠᱚ ᱧᱟᱢ ᱫᱟᱲᱮᱭᱟᱫᱼᱟ ᱢᱮᱱᱛᱮ ᱱᱟᱜᱟᱢᱤᱭᱟᱹ ᱠᱚᱠᱚ ᱢᱮᱱᱟ ᱾ ᱥᱟᱱᱛᱟᱲ ᱯᱟᱨᱜᱟᱱᱟ ᱨᱮ ᱦᱩᱭ ᱞᱮᱱ ᱥᱟᱱᱛᱟᱲ ᱦᱩᱞ ᱫᱚ ᱥᱤᱧᱚᱛ ᱫᱤᱥᱚᱢ ᱨᱮ ᱡᱚᱛᱚ ᱠᱷᱚᱱ ᱢᱟᱨᱟᱝ ᱟᱨ ᱡᱩᱢᱤᱫᱽ ᱞᱟᱹᱰᱷᱟᱹᱭ ᱛᱟᱦᱮᱸ ᱠᱟᱱᱟ ᱾
***
