ᱢᱟᱱᱚᱛᱟᱱ ᱜᱚᱢᱠᱮ ᱡᱚᱫᱩᱢᱚᱬᱤ ᱵᱮᱥᱨᱟ ᱛᱤᱠᱤᱱ ᱫᱚ ᱢᱤᱫ ᱧᱩᱛᱩᱢᱟᱱ ᱥᱟᱱᱛᱟᱲᱤ ᱚᱱᱚᱞᱤᱭᱟᱹ, ᱚᱱᱚᱬᱦᱤᱭᱟᱹ ᱠᱟᱱᱟ ᱠᱤᱱ ᱾ ᱟᱹᱠᱤᱱ ᱫᱚ ᱑᱗/᱓/᱑᱙᱖᱔ ᱥᱟᱞᱮ ᱨᱮ ᱠᱤᱱ ᱡᱟᱱᱟᱢ ᱟᱠᱟᱱᱟ ᱾ ᱡᱚᱫᱩᱢᱚᱬᱤ ᱵᱮᱥᱨᱟ ᱜᱚᱢᱠᱮ ᱛᱤᱠᱤᱱ ᱫᱚ ᱒᱐᱐᱖ ᱥᱟᱞᱮ ᱨᱮ ᱥᱟᱦᱤᱛᱭᱚ ᱮᱠᱟᱰᱮᱢᱤ, ᱱᱟᱶᱟ ᱫᱤᱞᱞᱤ ᱯᱟᱦᱴᱟ ᱠᱷᱚᱱ ᱥᱟᱦᱤᱛᱭᱚ ᱮᱠᱟᱰᱮᱢᱤ ᱯᱩᱭᱞᱩ ᱢᱩᱬᱩᱛ ᱥᱤᱨᱯᱷᱟᱹ ᱛᱮ ᱠᱤᱱ ᱢᱟᱹᱱ ᱦᱟᱞᱟᱝ ᱟᱠᱟᱱᱟ ᱾
ᱡᱚᱫᱩᱢᱚᱬᱤ ᱵᱮᱥᱨᱟ ᱜᱚᱢᱠᱮ ᱛᱤᱠᱤᱱᱟᱜ ᱡᱟᱱᱟᱢ ᱟᱹᱛᱩ ᱫᱚ ᱠᱚᱨᱚᱧᱡᱟᱭᱤ, ᱵᱤᱥᱩᱭ ᱵᱽᱞᱚᱠ, ᱢᱚᱭᱩᱨᱵᱷᱚᱸᱡᱽ ᱦᱚᱱᱚᱛ, ᱳᱰᱤᱥᱟ ᱯᱚᱱᱚᱛ ᱨᱮ ᱾ ᱡᱟᱱᱟᱢ ᱵᱟᱵᱟ ᱧᱩᱛᱩᱢ ᱫᱚ ᱵᱚᱸᱜᱟ ᱛᱟᱞᱟ ᱟᱠᱟᱱ ᱵᱤᱠᱨᱟᱹᱢ ᱵᱮᱥᱨᱟ ᱟᱨ ᱡᱟᱱᱟᱢ ᱟᱭᱳ ᱫᱚ ᱵᱚᱸᱜᱟ ᱫᱤᱥᱚᱢ ᱟᱠᱟᱱ ᱢᱟᱞᱦᱚ ᱵᱮᱥᱨᱟ ᱢᱮᱱᱛᱮ ᱧᱩᱛᱩᱢ ᱟᱹᱠᱤᱱᱟ ᱾
ᱟᱹᱠᱤᱱ ᱫᱚ ᱑᱙᱘᱔ ᱥᱟᱞᱮᱨᱮ ᱠᱚᱴᱚᱠ ᱨᱮᱭᱟᱜ ᱨᱮᱵᱷᱮᱱᱥᱟ ᱢᱟᱨᱟᱝ ᱵᱤᱨᱫᱟᱹᱜᱟᱲ ᱠᱷᱚᱱ B.Com. ᱠᱤᱱ ᱯᱟᱲᱦᱟᱣ ᱟᱠᱟᱱᱟ ᱾ ᱯᱩᱪᱷᱤᱢ ᱵᱟᱸᱜᱽᱞᱟ, ᱠᱷᱚᱲᱚᱜᱽᱯᱩᱨ ᱨᱮ ᱨᱮᱞᱣᱮ ᱪᱟᱹᱠᱨᱤ ᱨᱮ ᱠᱤᱱ ᱠᱟᱹᱢᱤ ᱠᱟᱱ ᱛᱟᱦᱮᱸᱫ ᱾
ᱥᱟᱶᱦᱮᱫ ᱪᱟᱨᱪᱟ
ᱢᱟᱱᱚᱛᱟᱱ ᱡᱚᱫᱩᱢᱚᱬᱤ ᱵᱮᱥᱨᱟ ᱜᱚᱢᱠᱮ ᱛᱤᱠᱤᱱ ᱫᱚ ᱵᱷᱟᱨᱚᱛ ᱡᱟᱠᱟᱛ ᱥᱟᱱᱛᱟᱲᱤ ᱚᱱᱚᱞᱤᱭᱟᱹ ᱜᱟᱶᱛᱟ ᱨᱮᱱᱤᱡ ᱵᱩᱱᱤᱭᱟᱹᱫᱤᱭᱟᱹ ᱟᱨ ᱵᱩᱱᱤᱭᱟᱹᱫᱤᱭᱟᱹ ᱥᱩᱛᱨᱮᱛ ᱒᱐᱑᱒ ᱥᱟᱞᱮ ᱫᱷᱟᱹᱵᱤᱡ ᱠᱤᱱ ᱛᱟᱦᱮᱸ ᱠᱟᱱᱟ ᱾ ᱤᱱᱟᱹ ᱛᱟᱭᱚᱢ ᱒᱐᱑᱖ ᱥᱟᱞᱮ ᱫᱷᱟᱹᱵᱤᱡ ᱵᱷᱟᱨᱚᱛ ᱡᱟᱠᱟᱛ ᱥᱟᱱᱛᱟᱲᱤ ᱚᱱᱚᱞᱤᱭᱟᱹ ᱜᱟᱶᱛᱟ ᱨᱮᱱᱤᱡ ᱯᱟᱨᱥᱮᱛ ᱠᱤᱱ ᱛᱟᱦᱮᱸ ᱠᱟᱱᱟ ᱾ ᱥᱟᱦᱤᱛᱭᱚ ᱮᱠᱟᱰᱮᱢᱤ ᱱᱟᱶᱟ ᱫᱤᱞᱞᱤ ᱨᱮᱱᱤᱡ ᱥᱟᱱᱛᱟᱲᱤ ᱫᱤᱥᱟᱹ ᱩᱫᱩᱜᱤᱭᱟᱹ ᱞᱮᱠᱟᱛᱮ ᱠᱚᱱᱵᱷᱮᱱᱚᱨ ᱦᱚᱸ ᱠᱤᱱ ᱛᱟᱦᱮᱸ ᱠᱟᱱᱟ ᱾ ᱱᱤᱭᱟᱹ ᱚᱠᱛᱚ ᱨᱮ ᱪᱟᱭᱱᱟ ᱫᱤᱥᱚᱢ ᱮᱭᱟᱭ ᱢᱟᱦᱟᱸ ᱞᱟᱹᱜᱤᱫ ᱠᱤᱱ ᱥᱟᱸᱜᱷᱟᱨ ᱞᱮᱫᱼᱟ ᱾ ᱟᱹᱠᱤᱱᱟᱜ ᱢᱤᱫ ᱚᱱᱚᱬᱦᱮ ᱯᱩᱛᱷᱤ ᱵᱷᱟᱵᱽᱱᱟ ᱒᱐᱐᱒ ᱥᱟᱞᱮ ᱨᱮ ᱠᱤᱱ ᱩᱰᱷᱟᱹᱣ ᱥᱟᱹᱜᱩᱱ ᱟᱠᱟᱫ-ᱟ ᱾ ᱤᱱᱟᱹ ᱛᱟᱭᱚᱢ ᱟᱭᱢᱟ ᱯᱚᱛᱚᱵ ᱯᱩᱛᱷᱤ ᱪᱷᱟᱯᱟ ᱯᱟᱨᱥᱟᱞ ᱛᱟᱺᱜᱤ ᱨᱮ ᱢᱮᱱᱟᱜ-ᱟ ᱾ ᱟᱹᱰᱤ ᱞᱮᱠᱟᱱ ᱯᱟᱛᱷᱟᱢ ᱠᱚᱨᱮ ᱥᱟᱯᱲᱮᱛ ᱞᱮᱠᱟᱛᱮ ᱠᱤᱱ ᱠᱟᱹᱢᱤ ᱟᱠᱟᱫ-ᱟ, ᱚᱱᱟ ᱠᱚ ᱵᱷᱤᱛᱨᱤ ᱠᱷᱚᱱ ᱛᱤᱱᱟᱹᱝ ᱜᱟᱱ ᱯᱟᱛᱷᱟᱢ ᱫᱚ ᱦᱩᱭᱩᱜ ᱠᱟᱱᱟ – ᱡᱤᱣᱤ ᱡᱷᱟᱨᱱᱟ, ᱯᱷᱟᱹᱜᱩᱱ ᱠᱳᱭᱮᱞ, ᱢᱟᱱᱛᱟᱨ ᱮᱢᱟᱱ ᱾ ᱥᱟᱦᱤᱛᱭᱚ ᱮᱠᱟᱰᱮᱢᱤ ᱱᱟᱣᱟ ᱫᱤᱞᱞᱤ ᱨᱮ ᱠᱚᱱᱵᱷᱮᱱᱚᱨ ᱞᱮᱠᱟᱛᱮ ᱦᱚᱸ ᱠᱤᱱ ᱛᱟᱦᱮᱸ ᱠᱟᱱᱟ ᱒᱐᱐᱘ ᱠᱷᱚᱱ ᱒᱐᱑᱒ ᱥᱟᱞᱮ ᱫᱷᱟᱹᱵᱤᱡ ᱾ ᱚᱱᱟ ᱥᱟᱶᱛᱮ ᱟᱹᱰᱤ ᱜᱟᱱ ᱜᱟᱶᱛᱟ ᱠᱚ ᱥᱟᱶ ᱡᱤᱵᱚᱱ ᱵᱷᱳᱨ ᱥᱚᱦᱮᱛ ᱞᱮᱠᱟᱛᱮ ᱡᱩᱦᱩᱲᱟᱹᱣ ᱨᱮᱦᱚᱸ ᱠᱤᱱ ᱛᱟᱦᱮᱸ ᱠᱟᱱᱟ ᱾
ᱢᱟᱹᱱ ᱥᱤᱨᱯᱷᱟᱹ
ᱡᱚᱫᱩᱢᱚᱬᱤ ᱵᱮᱥᱨᱟ ᱜᱚᱢᱠᱮ ᱛᱤᱠᱤᱱ ᱫᱚ ᱒᱐᱐᱖ ᱥᱟᱞᱮᱨᱮ ᱥᱟᱦᱤᱛᱭᱚ ᱮᱠᱟᱰᱮᱢᱤ ᱥᱤᱨᱯᱷᱟᱹ ᱛᱮ ᱠᱤᱱ ᱢᱟᱹᱱ ᱦᱟᱞᱟᱝ ᱟᱠᱟᱱᱟ ᱾ ᱚᱱᱟ ᱥᱟᱶᱛᱮ “ᱰᱨ. ᱵᱤᱹ ᱟᱨᱹ ᱟᱢᱵᱮᱫᱽᱠᱚᱨ ᱯᱷᱮᱞᱳᱥᱤᱯ” ᱑᱙᱙᱒ ᱥᱟᱞᱮ ᱨᱮ ᱠᱤᱱ ᱟᱛᱟᱝ ᱟᱠᱟᱫ-ᱟ ᱾ ᱱᱚᱶᱟ ᱥᱟᱶᱛᱮ ᱟᱹᱰᱤ ᱜᱟᱱ ᱜᱟᱶᱛᱟ ᱯᱟᱦᱴᱟ ᱠᱷᱚᱱ ᱢᱟᱹᱱ ᱥᱟᱨᱦᱟᱣᱱᱟ ᱦᱚᱸ ᱠᱤᱱ ᱪᱟᱞ ᱟᱠᱟᱱᱟ ᱾ ᱚᱱᱟ ᱜᱟᱶᱛᱟ ᱠᱚ ᱢᱟᱹᱫᱽᱨᱮ ᱛᱤᱱᱟᱹᱝ ᱜᱟᱱ ᱜᱟᱶᱛᱟ ᱫᱚ ᱦᱩᱭᱩᱜ ᱠᱟᱱᱟ,
ᱥᱟᱱᱛᱟᱲᱤ ᱵᱷᱟᱥᱟ ᱢᱚᱨᱪᱟ ᱠᱷᱚᱱ ᱒᱐᱐᱐ ᱥᱟᱞᱮᱨᱮ ᱾
ᱠᱟᱹᱯᱩᱨᱢᱩᱞᱤ ᱯᱚᱛᱨᱤᱠᱟ, ᱠᱚᱴᱚᱠ ᱯᱟᱦᱴᱟ ᱠᱷᱚᱱ ᱒᱐᱐᱖ ᱥᱟᱞᱮᱨᱮ ᱾
ᱵᱟᱢᱚᱱᱜᱷᱟᱹᱴᱤ ᱢᱚᱦᱚᱛᱥᱚᱵᱚ ᱯᱟᱦᱴᱟ ᱠᱷᱚᱱ ᱒᱐᱐᱖ ᱥᱟᱞᱮᱨᱮ ᱾
ASECA ᱠᱷᱚᱲᱚᱜᱽᱯᱩᱨ ᱪᱟᱸᱜᱟ ᱯᱟᱦᱴᱟ ᱠᱷᱚᱱ ᱒᱐᱐᱖ ᱥᱟᱞᱮᱨᱮ ᱾
ᱡᱩᱜᱽ ᱡᱟᱨᱯᱟ ᱜᱟᱶᱛᱟ, ᱥᱤᱝᱜᱩᱨ ᱯᱟᱦᱴᱟ ᱠᱷᱚᱱ ᱒᱐᱐᱖ ᱥᱟᱞᱮᱨᱮ ᱾
ᱞᱟᱦᱟᱱᱛᱤ ᱯᱚᱛᱨᱤᱠᱟ ᱯᱟᱦᱴᱟ ᱠᱷᱚᱱ ᱒᱐᱐᱗ ᱨᱮ ᱟᱨ ᱦᱚᱸ ᱱᱚᱝᱠᱟ ᱜᱮ ᱟᱹᱰᱤ ᱜᱟᱱ ᱢᱟᱹᱱ ᱥᱟᱨᱦᱟᱣ ᱠᱤᱱ ᱟᱢᱮᱴ ᱟᱠᱟᱫ-ᱟ ᱾
ᱜᱩᱨ
ᱢᱟᱱᱚᱛᱟᱱ ᱡᱚᱫᱩᱢᱚᱢᱤ ᱜᱚᱢᱠᱮ ᱛᱤᱠᱤᱱ ᱫᱚ ᱥᱟᱱᱛᱟᱲ ᱥᱟᱶᱛᱟ ᱨᱮᱱᱤᱡ ᱟᱹᱰᱤ ᱜᱮ ᱜᱩᱱ ᱢᱟᱱᱟᱣ ᱜᱟᱹᱠᱷᱩᱲ ᱜᱚᱢᱠᱮ ᱠᱤᱱ ᱛᱟᱦᱮᱸ ᱠᱟᱱᱟ ᱾ ᱥᱟᱶᱦᱮᱫ ᱜᱷᱟᱨᱚᱸᱡᱽ ᱨᱮ ᱟᱹᱠᱤᱱ ᱫᱚ ᱥᱟᱱᱟᱢ ᱚᱱᱚᱞᱤᱭᱟᱹ ᱠᱚ ᱞᱟᱹᱜᱤᱫ ᱵᱟᱵᱟ ᱞᱮᱠᱟ ᱠᱤᱱ ᱛᱤᱸᱜᱩ ᱞᱮᱱ ᱛᱟᱦᱮᱸᱫ ᱾ ᱟᱹᱠᱤᱱᱟᱜ ᱱᱚᱝᱠᱟ ᱚᱵᱮᱲᱟᱨᱮ ᱨᱮ ᱥᱟᱱᱟᱢ ᱠᱚ ᱴᱩᱣᱟᱹᱨ ᱚᱴᱚ ᱠᱟᱛᱮ ᱫᱷᱟᱹᱨᱛᱤ ᱯᱩᱨᱤ ᱠᱷᱚᱱ ᱵᱚᱸᱜᱟ ᱫᱤᱥᱚᱢ ᱛᱮ ᱡᱟᱭᱡᱩᱜᱽ ᱥᱮᱱ ᱥᱟᱹᱨᱤᱜ ᱫᱚ ᱥᱟᱱᱛᱟᱲ ᱥᱟᱶᱛᱟ ᱟᱨ ᱥᱟᱶᱦᱮᱫ ᱞᱟᱹᱜᱤᱫ ᱟᱹᱰᱤ ᱜᱮ ᱢᱟᱨᱟᱝ ᱠᱷᱤᱛᱤ ᱠᱟᱱᱟ ᱾ ᱥᱟᱱᱛᱟᱲ ᱥᱟᱶᱛᱟ ᱨᱮ ᱟᱹᱠᱤᱱᱟᱜ ᱱᱚᱶᱟ ᱴᱷᱟᱶ ᱫᱚ ᱛᱤᱥ ᱦᱚᱸ ᱚᱠᱚᱭ ᱦᱚᱸ ᱵᱟᱝ ᱜᱮ ᱠᱚ ᱯᱮᱨᱮᱡ ᱯᱩᱨᱩᱱ ᱫᱟᱲᱮᱭᱟᱜᱼᱟ ᱾ ᱱᱚᱝᱠᱟ ᱛᱮ ᱟᱹᱠᱤᱱᱟᱜ ᱜᱩᱨ ᱫᱚ ᱢᱟᱹ ᱒᱓ ᱹ ᱖ᱹ ᱒᱐᱒᱒ ᱦᱤᱛ ᱦᱤᱞᱚᱜ ᱦᱩᱭ ᱞᱮᱱᱟ ᱾ ᱢᱟᱱᱚᱛᱟᱱ ᱡᱚᱫᱩᱢᱚᱬᱤ ᱵᱮᱥᱨᱟ ᱜᱚᱢᱠᱮ ᱛᱤᱠᱤᱱ ᱟᱵᱚ ᱠᱚ ᱛᱟᱞᱟᱨᱮ ᱵᱟᱹᱱᱩᱜ ᱠᱤᱱ ᱨᱮᱦᱚᱸ ᱟᱹᱠᱤᱱᱟᱜ ᱠᱟᱹᱢᱤ, ᱟᱹᱠᱤᱱᱟᱜ ᱩᱭᱦᱟᱹᱨ ᱫᱚ ᱟᱵᱚ ᱥᱟᱶᱛᱟ ᱟᱨ ᱟᱵᱚ ᱠᱚᱣᱟᱜ ᱚᱱᱛᱚᱨ ᱠᱚᱬᱨᱮ ᱡᱟᱭᱡᱩᱜᱽ ᱠᱷᱚᱫᱟ ᱠᱟᱛᱮ ᱛᱟᱦᱮᱱᱟ ᱾
***
