ᱠᱚᱠᱚᱨ ᱜᱷᱩᱴᱩ ᱧᱩᱛᱩᱢᱟᱱ ᱟ.ᱛᱩ ᱨᱮ ᱥᱚᱢᱵᱟ.ᱨᱤ ᱧᱩᱛᱩᱢᱟᱱ ᱢᱤᱫ ᱵᱩᱰᱷᱤᱭ ᱛᱟᱸᱦᱮ ᱠᱟᱱᱟ ᱾ ᱩᱱᱤ ᱵᱩᱰᱷᱤ ᱨᱮᱱ ᱵᱟᱨᱭᱟ ᱦᱚᱯᱚᱱ ᱛᱟᱭ ᱟᱨ ᱢᱤᱫ ᱦᱚᱯᱚᱱᱮᱨᱟ ᱛᱟᱭ ᱾ ᱥᱚᱢᱵᱟ.ᱨᱤ ᱵᱩᱰᱷᱤ ᱨᱮᱱ ᱪᱷᱟᱛᱟ ᱫᱟᱨᱮ ᱫᱚ ᱟᱭᱢᱟ ᱫᱤᱱ ᱨᱮ ᱵᱚᱸᱜᱟ ᱫᱤᱥᱚᱢ ᱛᱮᱭ ᱪᱟᱞᱟᱣ ᱟᱠᱟᱱᱟ ᱾ᱚᱱᱟᱛᱮ ᱟᱭᱢᱟ ᱮᱴᱠᱮᱴᱚᱬᱮ ᱥᱟᱦᱟᱣ ᱞᱟᱦᱟ ᱠᱟᱛᱮᱫ ᱜᱮ ᱥᱟᱱᱟᱢ ᱜᱤᱫᱽᱨᱟᱹ ᱠᱚᱭ ᱦᱟᱨᱟ ᱵᱩᱨᱩ ᱠᱮᱫ ᱠᱚᱣᱟ ᱾
ᱤᱱᱟᱹ ᱛᱟᱭᱚᱢ ᱢᱟᱨᱟᱝ ᱦᱚᱯᱚᱱ ᱟᱡ ᱛᱮᱜᱮ ᱱᱟᱢᱟᱞ ᱫᱤᱥᱚᱢ ᱠᱷᱚᱱᱟᱜ ᱵᱟᱹᱦᱩᱭ ᱟᱹᱜᱩ ᱟᱱᱟ ᱟᱨ ᱦᱩᱰᱤᱧ ᱦᱚᱯᱚᱱ ᱫᱚ ᱵᱟᱯᱞᱟ ᱠᱟᱛᱮᱭ ᱟᱹᱜᱩ ᱟᱫᱮᱭᱟ ᱾ ᱱᱚᱝᱠᱟ ᱠᱟᱛᱮᱫ ᱫᱤᱱ ᱠᱚ ᱱᱟᱯᱟᱭ ᱜᱮ ᱯᱟᱨᱚᱢ ᱪᱟᱞᱟᱜ ᱠᱟᱱ ᱛᱟᱸᱦᱮᱱᱟ ᱢᱮᱱᱠᱷᱟᱱ ᱚᱠᱟ ᱥᱮᱱᱟᱜ ᱦᱚᱭ ᱦᱤᱥᱤᱫ ᱛᱮᱪᱚ ᱛᱟᱭᱚᱢ ᱫᱟᱨᱟᱢ ᱫᱚᱠᱚ ᱟᱯᱟᱱ ᱟᱹᱯᱤᱱ ᱮᱱᱟ ᱢᱮᱱ ᱫᱚ ᱵᱷᱤᱱᱟᱹ ᱮᱱᱟ ᱠᱚ ᱾ ᱥᱚᱢᱵᱟᱹᱨᱤ ᱵᱩᱰᱷᱤ ᱟᱨ ᱟᱭᱤᱡ ᱦᱚᱯᱚᱱᱮᱨᱟ ᱥᱚᱨᱚᱞᱟ ᱛᱟᱹᱠᱤᱱ ᱫᱚ ᱢᱤᱫ ᱴᱷᱮᱱ ᱠᱤᱱ ᱛᱟᱸᱦᱮᱭᱮᱱᱟ ᱾ ᱟᱨ ᱢᱟᱨᱟᱝᱤᱡ ᱦᱚᱯᱚᱱ ᱛᱮᱫ ᱛᱟᱠᱚ ᱫᱚ ᱱᱟᱹᱭᱦᱟᱹᱨ ᱢᱮᱱ ᱫᱚ ᱱᱟᱢᱟᱞ ᱫᱤᱥᱚᱢ ᱛᱮᱠᱚ ᱪᱟᱞᱟᱣ ᱮᱱᱟ ᱟᱨ ᱛᱟᱞᱟᱭᱤᱡ ᱦᱚᱯᱚᱱ ᱛᱮᱫ ᱫᱚ ᱟᱹᱛᱩ ᱫᱤᱥᱚᱢ ᱨᱮᱜᱮ ᱠᱚ ᱛᱟᱸᱦᱮᱭᱮᱱᱟ ᱾ ᱥᱟᱱᱟᱢ ᱠᱚᱜᱮ ᱱᱤᱛ ᱫᱚ ᱟᱯᱟᱱ ᱟᱹᱯᱤᱱ ᱠᱟᱛᱮ ᱠᱚ ᱡᱚᱢ ᱡᱚᱢ ᱠᱟᱱᱟ ᱾
ᱯᱟᱲᱦᱟᱣ ᱢᱟ ᱟᱹᱰᱤ ᱥᱟᱺᱜᱤᱧ ᱨᱮᱱᱟᱜ ᱠᱟᱛᱷᱟ ᱢᱤᱫ ᱵᱤᱛᱟᱹ ᱞᱟᱡ ᱟᱹᱥᱩᱞ ᱞᱟᱹᱜᱤᱫ ᱛᱮ ᱥᱚᱨᱚᱞᱟ ᱟᱨ ᱟᱡ ᱟᱭᱳ ᱥᱚᱢᱵᱟᱹᱨᱤ ᱵᱩᱰᱷᱤ ᱛᱟᱠᱤᱱ ᱦᱚᱲᱟᱜ ᱠᱟᱹᱢᱤ ᱠᱚ ᱠᱤᱱ ᱪᱟᱞᱟᱜᱼᱟ ᱾ ᱚᱱᱟᱛᱮ ᱥᱚᱨᱚᱞᱟ ᱫᱚ ᱱᱤᱛ ᱫᱷᱟᱹᱵᱤᱡ ᱛᱮᱦᱚᱸ ᱤᱥᱠᱩᱞ ᱨᱮᱱᱟᱜ ᱜᱟᱱᱟᱰᱮ ᱦᱚᱸ ᱵᱟᱭ ᱞᱮᱵᱮᱫ ᱫᱟᱲᱮ ᱠᱟᱣᱫᱟ ᱾ ᱮᱱᱦᱚᱸ ᱟᱭᱢᱟ ᱮᱴᱠᱮᱴᱚᱬᱮ ᱥᱟᱦᱟᱣ ᱞᱟᱦᱟ ᱠᱟᱛᱮᱫ ᱜᱮ ᱡᱤᱭᱚᱱ ᱫᱚᱠᱤᱱ ᱵᱤᱛᱟᱹᱣ ᱤᱫᱤᱭᱮᱫ ᱛᱟᱹᱠᱤᱱᱟ ᱾ ᱢᱤᱫ ᱫᱤᱱᱚᱜ ᱥᱚᱢᱵᱟᱹᱨᱤ ᱵᱩᱰᱷᱤ ᱴᱷᱮᱱ ᱠᱷᱚᱵᱚᱨ ᱦᱮᱡ ᱮᱱᱟ ᱵᱟᱝᱢᱟ ᱟᱭᱤᱡ ᱢᱟᱨᱟᱝ ᱦᱚᱯᱚᱱ ᱥᱚᱵᱟᱱᱟᱜ ᱵᱚᱦᱚᱜ ᱵᱟᱹᱲᱤᱡ ᱟᱠᱟᱱ ᱛᱟᱭᱟ ᱢᱮᱱ ᱫᱚ ᱠᱷᱮᱯᱟ ᱟᱠᱟᱱᱟᱭ ᱾ ᱦᱟᱱᱟ ᱱᱟᱣᱟᱭ ᱵᱚᱠᱟᱣᱜ ᱠᱟᱱᱟ ᱪᱮᱞᱮ ᱦᱚᱸ ᱵᱟᱭ ᱩᱨᱩᱢᱮᱫ ᱠᱚᱣᱟ ᱾ ᱥᱚᱵᱟᱱ ᱨᱮᱱ ᱫᱚ ᱱᱤᱛ ᱫᱚ ᱵᱟᱨᱭᱟ ᱦᱚᱯᱚᱱᱮᱨᱟ ᱛᱟᱭ ᱟᱨᱦᱚᱸ ᱟᱭᱤᱡ ᱮᱨᱟ ᱦᱤᱨᱟᱹ ᱫᱚ ᱦᱟᱢᱟᱞ ᱦᱚᱲᱢᱚ ᱢᱮᱱᱟᱭᱟ ᱱᱚᱝᱠᱟᱱ ᱚᱠᱛᱚ ᱨᱮ ᱥᱚᱵᱟᱱᱟᱜ ᱵᱚᱦᱚᱜ ᱵᱟᱹᱲᱤᱡ ᱟᱠᱟᱱ ᱛᱟᱭᱟ ᱾ ᱚᱡᱷᱟ ᱚᱲᱟᱜ, ᱡᱟᱱ ᱚᱲᱟᱜ ᱜᱚᱴᱟ ᱠᱚ ᱟᱥᱮᱱ ᱠᱮᱫᱮᱭᱟ ᱮᱱᱛᱮ ᱨᱮᱦᱚᱸ ᱥᱚᱵᱟᱱ ᱫᱚ ᱵᱟᱭ ᱵᱮᱥ ᱞᱮᱱ ᱜᱮᱭᱟ ᱾
ᱤᱱᱟᱹ ᱛᱟᱭᱚᱢ ᱯᱟᱜᱽᱞᱟ ᱜᱟᱨᱚᱫ ᱨᱮ ᱠᱷᱚᱵᱚᱨ ᱪᱟᱞᱟᱣ ᱮᱱᱟ ᱟᱨ ᱚᱸᱰᱮᱱ ᱦᱚᱲ ᱠᱚ ᱦᱮᱡ ᱮᱱᱛᱮ ᱥᱚᱵᱟᱱ ᱫᱚ ᱠᱚ ᱤᱫᱤ ᱠᱮᱫᱮᱭᱟ ᱯᱟᱜᱽᱞᱟ ᱜᱟᱨᱚᱫ ᱛᱮ ᱾ ᱥᱚᱵᱟᱱ ᱨᱮᱱ ᱮᱨᱟᱛ ᱛᱮᱫ ᱫᱚ ᱟᱯᱟ ᱵᱟᱨᱮ ᱚᱲᱟᱜ ᱨᱮᱜᱮᱭ ᱛᱟᱸᱦᱮᱭᱮᱱᱟ ᱾ ᱯᱩᱱ ᱢᱚᱬᱮ ᱥᱮᱨᱢᱟ ᱯᱟᱨᱚᱢ ᱮᱱ ᱛᱟᱭᱚᱢ ᱥᱚᱵᱟᱱ ᱫᱚᱭ ᱵᱮᱥ ᱮᱱᱟ ᱟᱨ ᱚᱲᱟᱜ ᱛᱮᱭ ᱨᱩᱣᱟᱹᱲ ᱦᱮᱡ ᱮᱱᱟ ᱾ ᱤᱱᱟᱹ ᱛᱟᱭᱚᱢ ᱱᱟᱹᱭᱦᱟᱹᱨ ᱮ ᱪᱟᱞᱟᱣ ᱮᱱᱟ ᱟᱭᱤᱡ ᱮᱨᱟ ᱟᱨ ᱜᱤᱫᱽᱨᱟᱹ ᱯᱤᱫᱽᱨᱟᱹ ᱟᱜᱩ ᱾ ᱱᱤᱛ ᱫᱚ ᱥᱚᱵᱟᱱ ᱨᱮᱱ ᱟᱨ ᱢᱤᱫ ᱠᱚᱲᱟ ᱜᱤᱫᱽᱨᱟᱹᱭ ᱦᱩᱭ ᱟᱠᱟᱱ ᱛᱟᱭᱟ ᱾ ᱱᱚᱝᱠᱟ ᱠᱟᱛᱮᱫ ᱟᱹᱰᱤ ᱱᱟᱯᱟᱭ ᱛᱮ ᱫᱤᱱ ᱠᱚ ᱯᱟᱨᱚᱢᱚᱜ ᱠᱟᱱ ᱛᱟᱠᱚ ᱛᱟᱸᱦᱮᱫ, ᱢᱮᱱᱠᱷᱟᱱ ᱢᱤᱫ ᱫᱤᱱ ᱧᱮᱞ ᱮᱱᱟ ᱥᱚᱢᱵᱟᱹᱨᱤ ᱵᱩᱰᱷᱤ ᱫᱚ ᱨᱩᱣᱟᱹ ᱟᱡᱟᱨ ᱨᱮᱭ ᱯᱟᱲᱟᱣ ᱮᱱᱟ ᱾ ᱟᱹᱰᱤ ᱞᱮᱠᱟᱱ ᱨᱟᱱ ᱢᱩᱨᱜᱟᱹᱱ ᱠᱟᱛᱮ ᱨᱮᱦᱚᱸ ᱥᱚᱢᱵᱟᱹᱨᱤ ᱫᱚ ᱵᱟᱭ ᱵᱟᱧᱪᱟᱣ ᱞᱮᱱᱟ ᱾ ᱛᱤᱱᱟᱹᱜ ᱟᱥᱟ ᱛᱟᱦᱮᱸ ᱠᱟᱱ ᱛᱟᱭᱟ ᱡᱮ ᱢᱟᱨᱟᱝ ᱦᱚᱯᱚᱱ ᱥᱚᱵᱟᱱ ᱛᱟᱠᱤᱱ ᱵᱟᱯᱞᱟ ᱠᱟᱹᱠᱤᱱᱟᱭ ᱢᱮᱱᱛᱮᱫ ᱟᱨ ᱜᱤᱫᱽᱨᱟᱹ ᱠᱚᱭ ᱪᱷᱟᱹᱴᱭᱟᱹᱨ ᱠᱟᱠᱚᱣᱟ ᱾
ᱢᱮᱱᱠᱷᱟᱱ ᱥᱚᱢᱵᱟᱹᱨᱤ ᱵᱩᱰᱷᱤᱭᱟᱜ ᱱᱚᱶᱟ ᱠᱩᱠᱢᱩ ᱫᱚ ᱠᱩᱠᱢᱩ ᱨᱮᱜᱮ ᱛᱟᱸᱦᱮᱭᱮᱱ ᱛᱟᱭᱟ ᱾ ᱥᱚᱢᱵᱟᱹᱨᱤ ᱵᱩᱰᱷᱤ ᱵᱚᱸᱜᱟ ᱛᱟᱞᱟᱭᱮᱱ ᱛᱟᱭᱚᱢ ᱥᱚᱵᱟᱱ ᱛᱟᱠᱚ ᱫᱚ ᱟᱨ ᱦᱚᱸ ᱱᱟᱹᱭᱦᱟᱹᱨ ᱠᱚ ᱨᱩᱣᱟᱹᱲ ᱪᱟᱞᱟᱣ ᱮᱱᱟ ᱾ ᱢᱮᱱ ᱫᱚ ᱱᱟᱢᱟᱞ ᱫᱤᱥᱚᱢ ᱛᱮ ᱠᱚ ᱪᱟᱞᱟᱣ ᱮᱱᱟ ᱾ ᱠᱟᱹᱢᱤᱭᱟᱹ ᱠᱚ ᱡᱚᱢ ᱟᱠᱚ ᱡᱟᱦᱟᱸ ᱛᱤᱥ ᱠᱚᱨᱮ ᱫᱚ ᱟᱹᱛᱩ ᱫᱤᱥᱚᱢ ᱠᱚᱦᱚᱸ ᱠᱚ ᱥᱮᱱᱚᱜ ᱛᱟᱸᱦᱮᱫ ᱾ ᱱᱤᱛ ᱫᱚ ᱥᱚᱵᱟᱱ ᱨᱮᱱ ᱢᱟᱨᱟᱝ ᱢᱟᱨᱟᱝ ᱜᱤᱫᱽᱨᱟᱹ ᱠᱚ ᱠᱚ ᱦᱟᱨᱟ ᱟᱠᱟᱱ ᱛᱟᱭᱟ ᱾ ᱟᱡ ᱟᱭᱳ ᱵᱚᱸᱜᱟ ᱛᱟᱞᱟᱭᱮᱱ ᱛᱟᱭᱚᱢ ᱥᱚᱵᱟᱱ ᱫᱚ ᱟᱹᱰᱤ ᱡᱟᱹᱥᱛᱤ ᱠᱷᱚᱱ ᱡᱟᱹᱥᱛᱤ ᱜᱮ ᱦᱟᱺᱰᱤ ᱯᱟᱹᱣᱨᱟᱹ ᱧᱩᱭ ᱮᱛᱚᱦᱚᱵ ᱠᱮᱫᱟ ᱾ ᱠᱷᱟᱹᱞᱤ ᱥᱚᱵᱟᱱ ᱥᱩᱢᱩᱝ ᱫᱚ ᱵᱟᱝᱟ ᱟᱭᱤᱡ ᱮᱨᱟ ᱦᱤᱨᱟᱹᱢᱩᱱᱤ ᱦᱚᱸ ᱦᱟᱺᱰᱤ ᱯᱟᱹᱣᱨᱟᱹᱭ ᱧᱩᱭᱮᱫᱟ ᱾ ᱵᱟᱱᱟ ᱦᱚᱲ ᱜᱮ ᱥᱤᱧ ᱧᱤᱫᱟᱹ ᱦᱟᱺᱰᱤ ᱯᱟᱹᱣᱨᱟᱹ ᱨᱮ ᱠᱤᱱ ᱡᱚᱵᱮ ᱠᱚᱜ ᱠᱟᱱᱟ ᱾ ᱜᱤᱫᱽᱨᱟᱹ ᱠᱚᱦᱚᱸ ᱚᱠᱛᱚ ᱨᱮ ᱡᱚᱢ ᱧᱩ ᱦᱚᱸ ᱵᱟᱠᱚ ᱧᱟᱢᱟ ᱾ ᱟᱹᱠᱤᱱ ᱦᱚᱸ ᱵᱟᱝ ᱠᱤᱱ ᱵᱟᱯᱞᱟᱜ ᱠᱟᱱᱟ ᱟᱨ ᱜᱤᱫᱽᱨᱟᱹ ᱠᱚᱦᱚᱸ ᱵᱟᱝ ᱠᱤᱱ ᱪᱷᱟᱹᱴᱭᱟᱹᱨ ᱮᱫ ᱠᱚᱣᱟ ᱾ ᱵᱟᱱᱟᱨ ᱠᱩᱲᱤ ᱜᱤᱫᱽᱨᱟᱹ ᱜᱮᱠᱤᱱ ᱦᱟᱨᱟ ᱡᱩᱣᱟᱹᱱ ᱮᱱᱟ ᱟᱨ ᱱᱤᱡᱮ ᱛᱮᱜᱮ ᱠᱤᱱ ᱴᱷᱟᱶ ᱮᱱᱟ ᱢᱮᱱ ᱫᱚ ᱡᱟᱶᱟᱭ ᱮᱱᱟ ᱠᱤᱱ ᱵᱤᱱ ᱪᱷᱟᱹᱴᱭᱟᱹᱨ ᱛᱮᱜᱮ ᱾
ᱢᱮᱱᱠᱷᱟᱱ ᱠᱩᱠᱞᱤ ᱫᱚ ᱱᱚᱶᱟ ᱜᱮ ᱠᱟᱱᱟ ᱡᱮ ᱱᱚᱜᱼᱚᱭ ᱡᱮ ᱱᱩᱠᱤᱱ ᱵᱚᱭᱦᱟ ᱠᱩᱲᱤ ᱵᱤᱱ ᱪᱷᱟᱹᱴᱭᱟᱹᱨ ᱛᱮᱠᱤᱱ ᱡᱟᱶᱟᱭ ᱮᱱᱟ ᱟᱨ ᱟᱡ ᱮᱸᱜᱟᱛ ᱟᱯᱟᱛ ᱦᱚᱸ ᱵᱟᱝ ᱠᱤᱱ ᱵᱟᱯᱞᱟ ᱟᱠᱟᱱᱟ ᱱᱩᱠᱤᱱᱟᱜ ᱛᱟᱭᱚᱢ ᱫᱟᱨᱟᱢ ᱚᱠᱟ ᱞᱮᱠᱟ ᱛᱮ ᱵᱟᱯᱞᱟ ᱦᱩᱭᱩᱜ ᱛᱟᱹᱠᱤᱱᱟ ?
***
