ᱫᱷᱟᱹᱨᱛᱤ ᱟᱭᱳᱭ ᱨᱚᱫᱷᱚᱱ ᱮᱫᱟ
ᱤᱝᱨᱮᱡᱽ ᱠᱚᱣᱟᱜ ᱥᱮᱸᱜᱮᱞ ᱴᱩᱴᱤ ᱛᱮ,
ᱦᱚᱲᱢᱚ ᱢᱟᱭᱟᱢ ᱛᱚᱱᱚᱞ ᱟᱠᱟᱱ
ᱢᱮᱲᱦᱮᱫ ᱨᱮᱱᱟᱜ ᱥᱤᱠᱲᱤ ᱛᱮ ᱾
ᱱᱟᱹᱭ ᱠᱟᱹᱥᱟᱹᱭ ᱜᱤᱛᱤᱞ ᱵᱟᱹᱞᱤ
ᱟᱹᱛᱩᱜ ᱠᱟᱱᱟ ᱴᱟᱹᱴᱤ ᱡᱷᱟᱹᱨᱤ,
ᱜᱟᱰᱟ ᱢᱩᱰᱩ ᱵᱩᱨᱩ ᱫᱷᱟᱥᱱᱟ
ᱥᱮᱛᱮᱧᱚᱜ ᱠᱟᱱ ᱢᱟᱭᱟᱢ ᱡᱷᱟᱨᱱᱟ ᱾
ᱥᱟᱺᱜᱤᱧ ᱠᱷᱚᱱᱟᱜ ᱵᱤᱨ ᱟᱲᱟᱝ
ᱟᱸᱡᱚᱢ ᱥᱮᱴᱮᱨᱚᱜᱼᱟ ᱢᱩᱦᱤᱢ ᱟᱱᱟᱝ,
ᱥᱟᱠᱚᱣᱟ ᱚᱨᱚᱝ ᱨᱟᱲᱟᱝ ᱨᱟᱲᱟᱝ
ᱛᱟᱠᱮᱨᱚᱜ ᱠᱟᱱᱟ ᱜᱚᱴᱟ ᱚᱣᱟᱝ ᱾
ᱴᱟᱢᱟᱠ, ᱛᱩᱢᱫᱟᱜ, ᱨᱮᱜᱽᱲᱟ, ᱡᱷᱟᱹᱭ
ᱥᱟᱰᱮ ᱦᱤᱡᱩᱜ ᱠᱟᱱ ᱠᱚᱨᱛᱟᱞ ᱫᱟᱹᱭ,
ᱛᱤᱨᱭᱳ, ᱵᱟᱱᱟᱢ ᱨᱟᱶᱟᱜ ᱠᱟᱱᱟ
ᱟᱛᱮᱱ ᱯᱮᱥᱮ ᱥᱟᱱᱟᱢ ᱠᱚᱛᱮ ᱢᱟᱹᱭ ᱾
ᱵᱟᱵᱚᱱ ᱛᱟᱸᱦᱮᱱ ᱛᱤᱸᱜᱩ ᱛᱷᱤᱨ
ᱞᱟᱲᱟᱣ ᱟᱵᱚᱱ ᱢᱟᱭᱟᱢ ᱥᱤᱨ,
ᱞᱟᱥᱮᱨ ᱟᱵᱚᱱ ᱛᱟᱨᱣᱟᱲᱮ
ᱦᱮᱞᱮᱡ ᱠᱚᱣᱟ ᱵᱚᱱ ᱵᱟᱹᱭᱨᱤ ᱾
ᱡᱟᱹᱛᱤ ᱫᱷᱚᱨᱚᱢ ᱵᱟᱧᱪᱟᱣ ᱞᱟᱹᱜᱤᱫ
ᱮᱵᱷᱮᱱᱚᱜ ᱯᱮᱥᱮ ᱦᱩᱞᱜᱟᱹᱨᱤᱭᱟᱹ,
ᱫᱤᱥᱚᱢ ᱥᱟᱸᱜᱷᱟᱨ ᱥᱟᱸᱜᱷᱟᱨᱤᱭᱟᱹ
ᱟᱸᱜᱚᱪ ᱯᱮᱥᱮ ᱱᱟᱜᱟᱢᱤᱭᱟᱹ ᱾
***
