ᱢᱤᱫ ᱨᱟᱭᱵᱟᱨ ᱦᱟᱲᱟᱢ ᱵᱤᱨ ᱯᱟᱨᱚᱢ ᱟᱹᱛᱩ ᱨᱮᱭ ᱨᱟᱭᱵᱟᱨᱚᱜ ᱠᱟᱱᱟ ᱾ ᱫᱤᱱ ᱜᱮ ᱵᱤᱨ ᱦᱚᱨ ᱛᱮᱭ ᱦᱤᱡᱩᱜ ᱥᱮᱱᱚᱜᱼᱟ ᱾ ᱟᱨ ᱤᱱᱟᱹ ᱚᱠᱛᱚ ᱨᱮᱜᱮ ᱢᱤᱫᱴᱟᱹᱝ ᱵᱟᱱᱟ ᱦᱟᱲᱟᱢ ᱫᱚ ᱚᱱᱟ ᱦᱚᱨ ᱛᱮᱜᱮ ᱫᱟᱜ ᱧᱩᱭ ᱟᱬᱜᱚᱱᱟ ᱾ ᱟᱫᱚ ᱢᱤᱫ ᱫᱤᱱ ᱫᱚ ᱩᱱᱤ ᱵᱟᱱᱟ ᱦᱟᱲᱟᱢ ᱫᱚ ᱩᱱᱤ ᱨᱟᱭᱵᱟᱨ ᱦᱟᱲᱟᱢ ᱮ ᱢᱮᱛᱟ ᱟᱭ ᱠᱟᱱᱟ, “ ᱮ ᱦᱟᱲᱟᱢ ᱦᱟᱯᱮ ᱥᱮ ᱛᱤᱸᱜᱩ ᱞᱮᱱ ᱢᱮ, ᱫᱤᱱ ᱜᱮ ᱚᱠᱟ ᱛᱮᱢ ᱦᱤᱡᱩᱜ ᱥᱮᱱᱚᱜ ᱠᱟᱱᱟ ? ᱛᱮᱦᱮᱧ ᱫᱚ ᱞᱟᱝ ᱡᱚᱢ ᱢᱮᱭᱟ ᱾ ᱟᱫᱚ ᱮᱱᱠᱷᱟᱱ ᱩᱱᱤ ᱨᱟᱭᱵᱟᱨ ᱦᱟᱲᱟᱢ ᱢᱟ ᱵᱟᱱᱟ ᱦᱟᱲᱟᱢᱟᱜ ᱠᱟᱛᱷᱟ ᱟᱸᱡᱚᱢ ᱛᱮᱭ ᱵᱚᱛᱚᱨ ᱜᱚᱫ ᱮᱱᱟ ᱾ ᱢᱚᱱᱮ ᱛᱮᱭ ᱢᱮᱱ ᱡᱚᱝ ᱠᱟᱱᱟ, ᱛᱮᱦᱮᱧ ᱫᱚᱸᱧ ᱦᱟᱵᱽᱲᱟᱣ ᱮᱱᱟ ᱵᱟᱱᱟ ᱢᱚᱪᱟᱨᱮ ᱾ ᱟᱫᱚ ᱵᱟᱱᱟ ᱦᱟᱲᱟᱢ ᱮ ᱢᱮᱱ ᱚᱪᱚᱜ ᱠᱟᱱᱟ, ᱨᱟᱭᱵᱟᱨ ᱦᱟᱲᱟᱢ ᱮ ᱢᱮᱱᱮᱫᱼᱟ, ᱡᱚᱢ ᱠᱷᱟᱢᱮᱢ ᱡᱚᱢᱤᱧᱟ ᱢᱮᱱᱠᱷᱟᱱ ᱤᱧ ᱢᱟ ᱟᱹᱰᱤ ᱢᱟᱨᱟᱝ ᱠᱟᱹᱢᱤᱨᱮ ᱢᱮᱱᱟᱹᱧᱟ ᱾ ᱚᱱᱟ ᱠᱟᱹᱢᱤ ᱯᱩᱨᱟᱹᱣ ᱚᱪᱚᱣᱟᱹᱧ ᱢᱮ ᱟᱫᱚ ᱱᱷᱟᱜ ᱡᱚᱢᱤᱧ ᱢᱮ ᱾ ᱟᱫᱚ ᱵᱟᱱᱟ ᱦᱟᱲᱟᱢ ᱮ ᱢᱮᱱᱮᱫᱼᱟ, ᱪᱮᱫ ᱠᱟᱹᱢᱤᱨᱮ ᱢᱮᱱᱟᱢᱟ ? ᱞᱚᱜᱚᱱ ᱞᱟᱹᱭ ᱢᱮ ᱟᱨᱵᱟᱝ ᱠᱷᱟᱱ ᱤᱧ ᱡᱚᱢ ᱢᱮᱭᱟ ᱾ ᱟᱫᱚ ᱨᱟᱭᱵᱟᱨ ᱦᱟᱲᱟᱢ ᱮ ᱢᱮᱱᱮᱫᱼᱟ, ᱤᱧ ᱫᱚ ᱵᱟᱨᱭᱟ ᱚᱲᱟᱜ ᱤᱧ ᱢᱤᱫᱴᱷᱮᱱᱟ ᱟᱨ ᱵᱟᱨ ᱦᱚᱲᱤᱧ ᱢᱤᱫ ᱴᱷᱮᱱ ᱠᱤᱱ ᱞᱟᱹᱜᱤᱫ ᱾ ᱟᱫᱚ ᱤᱱᱟᱹ ᱛᱟᱭᱚᱢ ᱫᱚᱢ ᱡᱚᱢᱤᱧ ᱨᱮᱦᱚᱸ ᱾
ᱟᱫᱚ ᱤᱱᱟᱹ ᱠᱷᱟᱱ ᱩᱱᱤ ᱵᱟᱱᱟ ᱦᱟᱲᱟᱢ ᱮ ᱢᱮᱱᱮᱫᱼᱟ, ᱪᱮᱫ ᱞᱮᱠᱟᱢ ᱢᱤᱫ ᱴᱷᱮᱱ ᱠᱤᱱᱟ ᱵᱟᱨ ᱦᱚᱲ ᱫᱚ ? ᱢᱟᱥᱮ ᱮᱱᱠᱷᱟᱱ ᱤᱧ ᱦᱚᱸᱧ ᱮᱠᱞᱟ ᱜᱮᱭᱟ, ᱤᱧ ᱦᱚᱸ ᱧᱟᱯᱟᱢ ᱚᱪᱚ ᱤᱧ ᱢᱮ ᱢᱤᱫᱴᱟᱹᱝ ᱵᱩᱰᱷᱤ ᱥᱟᱞᱟᱜ ᱾ ᱮᱱᱠᱷᱟᱱ ᱩᱱᱤ ᱨᱟᱭᱵᱟᱨ ᱦᱟᱲᱟᱢ ᱢᱟ ᱛᱟᱹᱦᱩᱸᱭ ᱵᱚᱛᱚᱨ ᱮᱱᱟ ᱾ ᱢᱮᱱᱮᱫ ᱟᱭ, ᱥᱟᱲᱟ, ᱪᱟᱵᱟ ᱠᱮᱫᱤᱧᱟᱭ, ᱚᱠᱟᱨᱮᱭᱟ ᱵᱟᱱᱟ ᱵᱩᱰᱷᱤ ᱫᱚᱸᱧ ᱧᱟᱢ ᱟᱭᱟ ? ᱟᱫᱚ ᱛᱤᱥ ᱜᱮ ᱩᱱᱤ ᱨᱟᱭᱵᱟᱨ ᱦᱟᱲᱟᱢ ᱮ ᱦᱤᱡᱩᱜ ᱥᱮᱱᱚᱜᱼᱟ ᱠᱟᱛᱷᱟ ᱤᱫᱤ ᱟᱹᱜᱩ, ᱤᱱᱟᱹ ᱦᱤᱞᱚᱜ ᱜᱮ ᱵᱟᱱᱟ ᱦᱟᱲᱟᱢ ᱦᱚᱸᱭ ᱦᱚᱨᱚᱵᱚᱨᱚ ᱮᱭᱟ ᱾ ᱜᱷᱮᱨᱟᱣ ᱠᱟᱛᱮᱭ ᱢᱮᱛᱟᱭᱟ, ᱪᱮᱞᱮ ᱛᱤᱥᱮᱢ ᱧᱟᱯᱟᱢ ᱚᱪᱚ ᱤᱧᱟ ᱥᱮ ᱵᱟᱝ ? ᱟᱨᱵᱟᱝ ᱠᱷᱟᱱ ᱤᱧ ᱡᱚᱢ ᱢᱮᱭᱟ ᱾ ᱟᱫᱚ ᱩᱱᱤ ᱨᱟᱭᱵᱟᱨ ᱦᱟᱲᱟᱢ ᱦᱚᱸᱭ ᱢᱮᱱᱟ, ᱦᱟᱯᱮ ᱱᱚᱶᱟ ᱠᱟᱹᱢᱤ ᱢᱟᱬᱟᱝ ᱪᱟᱵᱟ ᱚᱪᱚ ᱟᱹᱧ ᱢᱮ ᱟᱫᱚ ᱱᱷᱟᱜ ᱟᱢᱤᱧ ᱧᱟᱯᱟᱢ ᱚᱪᱚ ᱢᱮᱭᱟ ᱾
ᱟᱫᱚ ᱩᱱᱤ ᱨᱟᱭᱵᱟᱨ ᱦᱟᱲᱟᱢ ᱫᱚ ᱪᱮᱫ ᱞᱮᱠᱟ ᱨᱮᱪᱚ ᱵᱩᱫᱷᱤᱭ ᱧᱟᱢ ᱠᱮᱫᱼᱟ ᱾ ᱟᱫᱚ ᱢᱤᱫ ᱫᱤᱱ ᱫᱚ ᱢᱤᱫᱴᱟᱹᱝ ᱢᱟᱨᱟᱝ ᱫᱷᱟᱨᱟ ᱵᱩᱨᱟᱹᱭ ᱧᱟᱢ ᱠᱮᱫᱼᱟ ᱟᱨ ᱢᱤᱫᱴᱟᱹᱝ ᱵᱟᱵᱮᱨ ᱟᱹᱜᱩ ᱠᱟᱛᱮᱭ ᱦᱮᱡ ᱮᱱᱟ ᱾ ᱟᱫᱚ ᱵᱟᱱᱟ ᱦᱟᱲᱟᱢ ᱮ ᱢᱮᱛᱟᱭ ᱠᱟᱱᱟ, ᱫᱮᱞᱟ ᱛᱮᱦᱮᱧ ᱫᱚ ᱟᱢ ᱦᱚᱸ ᱵᱩᱰᱷᱤ ᱥᱟᱶᱤᱧ ᱧᱟᱯᱟᱢ ᱚᱪᱚ ᱢᱮᱭᱟ ᱾ ᱮᱱᱠᱷᱟᱱ ᱵᱟᱱᱟ ᱦᱟᱲᱟᱢ ᱢᱟ ᱨᱟᱹᱥᱠᱟᱹ ᱛᱮ ᱞᱚᱜᱚᱱ ᱮ ᱢᱮᱱᱮᱫᱼᱟ, ᱢᱟᱢᱟ!! ᱞᱚᱜᱚᱱ ᱫᱷᱟᱨᱟ ᱧᱟᱯᱟᱢ ᱚᱪᱚ ᱤᱧ ᱢᱮ ᱾ ᱟᱹᱰᱤ ᱫᱤᱱ ᱠᱷᱚᱱ ᱛᱟᱺᱜᱤᱨᱮ ᱢᱮᱱᱟᱹᱧᱟ ᱾ ᱮᱱᱠᱷᱟᱱ ᱩᱱᱤ ᱨᱟᱭᱵᱟᱨ ᱦᱟᱲᱟᱢ ᱮ ᱢᱮᱛᱟᱭ ᱠᱟᱱᱟ, ᱢᱟ ᱛᱚᱵᱮ ᱱᱚᱶᱟ ᱵᱩᱨᱟᱹ ᱨᱮ ᱵᱚᱞᱚᱱ ᱢᱮ ᱾ ᱮᱱᱠᱷᱟᱱ ᱩᱱᱤ ᱵᱟᱱᱟ ᱦᱟᱲᱟᱢ ᱮ ᱢᱮᱱᱮᱫᱼᱟ, ᱱᱚᱶᱟ ᱵᱩᱨᱟᱹ ᱨᱮᱫᱚ ᱪᱮᱫᱟᱜ ᱤᱧ ᱵᱚᱞᱚᱱᱟ ?ᱟᱫᱚ ᱩᱱᱤ ᱨᱟᱭᱵᱟᱨ ᱦᱟᱲᱟᱢ ᱮ ᱢᱮᱱᱮᱫᱼᱟ, ᱱᱚᱝᱠᱟ ᱜᱮ ᱤᱧ ᱫᱚ ᱵᱩᱨᱟᱹ ᱨᱮ ᱥᱟᱸᱵᱟᱣ ᱠᱟᱛᱮ ᱜᱮᱧ ᱧᱟᱯᱟᱢ ᱚᱪᱚᱭᱮᱫ ᱠᱚᱣᱟ ᱾ ᱟᱫᱚ ᱩᱱᱤ ᱵᱟᱱᱟ ᱦᱟᱲᱟᱢ ᱮ ᱢᱮᱱᱮᱫᱼᱟ, ᱥᱟᱹᱨᱤ ᱜᱮ!!! ᱟᱫᱚ ᱨᱟᱭᱵᱟᱨ ᱦᱟᱲᱟᱢ ᱮ ᱢᱮᱱᱮᱫᱼᱟ, ᱥᱟᱹᱨᱤ ᱵᱟᱝᱠᱷᱟᱱ ᱫᱚ!!! ᱞᱚᱜᱚᱱ ᱵᱩᱨᱟᱹ ᱨᱮ ᱵᱚᱞᱚ ᱦᱚᱫᱚᱜ ᱢᱮ !! ᱟᱨ ᱥᱤᱸᱫᱩᱨ ᱠᱚ ᱥᱟᱵ ᱵᱚᱨᱟᱛ ᱠᱟᱜ ᱢᱮ ᱾ ᱟᱨ ᱤᱧ ᱱᱚᱶᱟ ᱵᱚᱥᱛᱟ ᱱᱷᱟᱜ ᱤᱧ ᱛᱚᱞ ᱠᱟᱜ ᱠᱟᱱᱟ ᱟᱨ ᱩᱱᱤ ᱵᱟᱱᱟ ᱵᱩᱰᱷᱤ ᱱᱷᱟᱜ ᱵᱚᱥᱛᱟᱭ ᱨᱟᱲᱟ ᱟᱠᱟᱫ ᱨᱮᱜᱮ ᱟᱢ ᱫᱚ ᱱᱷᱟᱜ ᱥᱟᱸᱜᱮ ᱥᱟᱝ ᱠᱚᱞᱠᱩᱞᱤ ᱠᱟᱛᱮ ᱤᱛᱩᱫ ᱜᱚᱫᱮ ᱢᱮ ᱾
ᱟᱫᱚ ᱚᱱᱟ ᱠᱚ ᱠᱟᱛᱷᱟ ᱟᱸᱡᱚᱢ ᱛᱮ ᱪᱩᱨᱟᱹᱢᱟᱨᱟ ᱩᱱᱤ ᱵᱟᱱᱟ ᱦᱟᱲᱟᱢ ᱫᱚ ᱵᱚᱥᱛᱟ ᱵᱷᱤᱛᱨᱤᱭ ᱵᱚᱞᱚ ᱜᱚᱫ ᱮᱱᱟ ᱾ ᱟᱫᱚ ᱪᱩᱨᱢᱟᱨ ᱩᱱᱤ ᱨᱟᱭᱵᱟᱨ ᱦᱟᱲᱟᱢ ᱫᱚ ᱵᱟᱱᱟᱦᱟᱜ ᱵᱚᱥᱛᱟ ᱢᱚᱪᱟ ᱠᱚ ᱛᱚᱞ ᱮᱥᱮᱫ ᱠᱟᱛᱮ ᱢᱤᱫᱴᱟᱹᱝ ᱦᱟᱯᱟ ᱛᱮ ᱫᱚᱢᱮᱭ ᱫᱟᱞ ᱠᱮᱫᱮᱭᱟ ᱩᱱᱤ ᱵᱟᱱᱟ ᱦᱟᱲᱟᱢ ᱫᱚ ᱩᱞᱴᱟᱹᱣ ᱟᱛᱮ ᱾ ᱫᱟᱞ ᱵᱷᱟᱜᱟᱣ ᱮᱱᱛᱮᱭ ᱜᱚᱦᱚᱲ ᱤᱫᱤ ᱠᱟᱛᱮ ᱱᱟᱹᱭ ᱫᱟᱜ ᱨᱮᱭ ᱪᱟᱯᱟᱫ ᱪᱟᱹᱰᱩ ᱜᱚᱫ ᱠᱟᱫᱮᱭᱟ ᱾ ᱟᱫᱚ ᱩᱱᱤ ᱨᱟᱭᱵᱟᱨ ᱦᱟᱲᱟᱢ ᱫᱚ ᱢᱚᱱᱮ ᱠᱩᱥᱤ ᱠᱟᱛᱮᱭ ᱨᱩᱣᱟᱹᱲᱮᱱᱟ ᱡᱮ ᱛᱮᱦᱮᱧ ᱠᱷᱚᱱᱟᱜ ᱵᱟᱱᱟ ᱦᱟᱲᱟᱢ ᱴᱷᱮᱱ ᱠᱷᱚᱱ ᱫᱚ ᱯᱟᱨᱟᱝᱜᱚᱛ ᱤᱧ ᱧᱟᱢ ᱠᱮᱫᱼᱟ ᱢᱮᱱᱛᱮ ᱾
ᱟᱫᱚ ᱩᱱᱤ ᱵᱟᱱᱟ ᱦᱟᱲᱟᱢ ᱢᱟ ᱱᱟᱹᱭ ᱱᱟᱹᱭ ᱛᱮᱭ ᱟᱹᱛᱩ ᱥᱮᱱᱚᱜ ᱠᱟᱱᱟ ᱾ ᱱᱟᱹᱭ ᱨᱮᱱᱟᱜ ᱞᱟᱛᱟᱨ ᱜᱷᱟᱴ ᱥᱮᱫᱨᱮ ᱢᱤᱫᱴᱟᱹᱝ ᱵᱟᱱᱟ ᱵᱩᱰᱷᱤ ᱫᱚ ᱫᱟᱜ ᱧᱩᱭ ᱟᱬᱜᱚ ᱞᱮᱱᱟ ᱾ ᱟᱫᱚ ᱚᱱᱟ ᱛᱚᱞ ᱵᱩᱨᱟᱹ ᱟᱹᱛᱩ ᱦᱤᱡᱩᱜ ᱠᱟᱱ ᱧᱮᱞ ᱛᱮ ᱵᱟᱱᱟ ᱵᱩᱰᱷᱤ ᱫᱚᱭ ᱢᱮᱱ ᱡᱚᱝ ᱠᱟᱱᱟ, ᱪᱮᱫ ᱵᱷᱟᱞᱟ ᱟᱹᱛᱩ ᱦᱤᱡᱩᱜ ᱠᱟᱱᱟ ? ᱦᱟᱯᱮ ᱥᱮ ᱜᱚᱦᱚᱲ ᱨᱟᱠᱟᱵ ᱠᱟᱛᱮᱧ ᱧᱮᱞᱟ ᱾ ᱡᱩᱫᱤ ᱡᱚᱢ ᱡᱤᱱᱤᱥ ᱢᱮᱱᱟᱜ ᱠᱷᱟᱱ ᱫᱚᱹᱧ ᱡᱚᱢᱟ ᱾
ᱟᱫᱚ ᱩᱱᱤ ᱵᱟᱱᱟ ᱵᱩᱰᱷᱤ ᱫᱚ ᱪᱩᱨᱟᱹᱢᱟᱨᱟ ᱚᱱᱟ ᱵᱚᱥᱛᱟ ᱫᱚ ᱜᱷᱩᱴᱩ ᱥᱮᱫ ᱜᱚᱦᱚᱲ ᱨᱟᱠᱟᱵ ᱠᱟᱛᱮ ᱚᱱᱟ ᱛᱚᱞ ᱫᱚᱭ ᱨᱟᱲᱟᱭᱮᱫᱼᱟ ᱾ ᱟᱫᱚ ᱤᱱᱟᱹ ᱠᱷᱟᱱ ᱜᱮ ᱩᱱᱤ ᱵᱟᱱᱟ ᱦᱟᱲᱟᱢ ᱫᱚ ᱩᱱᱤ ᱨᱟᱭᱵᱟᱨ ᱦᱟᱲᱟᱢ ᱟᱜ ᱠᱟᱛᱷᱟ ᱞᱮᱠᱟᱛᱮ ᱚᱱᱟ ᱯᱚᱴᱚᱢ ᱥᱤᱸᱫᱩᱨ ᱫᱚ ᱨᱟᱲᱟ ᱠᱟᱛᱮ ᱤᱛᱩᱫ ᱞᱟᱹᱜᱤᱫ ᱛᱮᱭ ᱥᱟᱯᱲᱟᱣ ᱵᱚᱨᱟᱛ ᱟᱠᱟᱱᱟ ᱾ ᱟᱫᱚ ᱡᱟᱦᱟᱸ ᱞᱮᱠᱟ ᱩᱱᱤ ᱵᱟᱱᱟ ᱵᱩᱰᱷᱤ ᱡᱚᱢᱟᱜ ᱢᱮᱱᱛᱮᱭ ᱨᱟᱲᱟ ᱟᱠᱟᱫᱼᱟ, ᱥᱮ ᱩᱱᱤ ᱵᱟᱱᱟ ᱦᱟᱲᱟᱢ ᱫᱚ ᱵᱟᱱᱟ ᱵᱩᱰᱷᱤᱭ ᱤᱛᱩᱫ ᱜᱚᱫ ᱠᱟᱫᱮᱭᱟ ᱾ ᱟᱨ ᱩᱱᱤ ᱵᱟᱱᱟ ᱦᱟᱲᱟᱢ ᱫᱚ ᱨᱟᱹᱥᱠᱟᱹ ᱛᱮᱭ ᱠᱚᱞᱠᱩᱞᱤ ᱜᱚᱫ ᱠᱮᱫᱼᱟ ᱾
ᱵᱟᱱᱟ ᱦᱟᱲᱟᱢ ᱫᱚ ᱟᱫᱚ ᱛᱤᱨᱮ ᱥᱟᱵ ᱠᱟᱛᱮ ᱵᱟᱱᱟ ᱵᱩᱰᱷᱤ ᱟᱡᱟᱜ ᱚᱲᱟᱜ ᱮ ᱤᱫᱤ ᱠᱮᱫᱮᱭᱟ ᱾ ᱟᱫᱚ ᱤᱱᱟᱹ ᱦᱤᱞᱚᱜ ᱠᱷᱚᱱᱟᱜ ᱟᱹᱠᱤᱱ ᱜᱮ ᱵᱟᱹᱦᱩ ᱡᱟᱶᱟᱭ ᱥᱮ ᱦᱟᱲᱟᱢ ᱵᱩᱰᱷᱤ ᱞᱮᱠᱟ ᱠᱤᱱ ᱛᱟᱦᱮᱸ ᱮᱱᱟ ᱾ ᱟᱨ ᱡᱟᱦᱟᱸᱱᱟᱜ ᱜᱮ ᱵᱤᱨ, ᱵᱩᱨᱩ, ᱜᱟᱰᱟ, ᱢᱩᱰᱩ ᱨᱮ ᱡᱤᱞ ᱦᱟᱹᱠᱩ ᱟᱨᱵᱟᱝ ᱟᱲᱟᱜ ᱥᱟᱠᱟᱢ ᱠᱤᱱ ᱫᱩᱠᱷᱢᱟᱹ ᱞᱮᱠᱷᱟᱱ ᱩᱱᱤ ᱨᱟᱭᱵᱟᱨ ᱦᱟᱲᱟᱢ ᱠᱤᱱ ᱤᱫᱤ ᱚᱴᱚ ᱜᱚᱫ ᱟᱭᱟ ᱾ ᱟᱨ ᱠᱤᱱ ᱢᱮᱛᱟ ᱟᱭᱟ, ᱟᱢᱮᱢ ᱨᱟᱭᱵᱟᱨ ᱟᱫ ᱞᱤᱧ ᱛᱮ ᱟᱹᱞᱤᱧ ᱞᱤᱧ ᱧᱟᱯᱟᱢ ᱮᱱᱛᱮ ᱟᱹᱞᱤᱧᱟᱜ ᱥᱩᱞᱩᱠ ᱥᱚᱝᱥᱟᱨ ᱪᱟᱹᱞᱩᱭᱮᱱ ᱛᱟᱹᱞᱤᱧᱟ ᱟᱨᱵᱟᱝ ᱠᱷᱟᱱ ᱟᱹᱞᱤᱧ ᱫᱚ ᱦᱩᱱᱟᱹᱝ ᱱᱚᱝᱠᱟ ᱜᱮ ᱞᱤᱧ ᱛᱟᱦᱮᱸ ᱠᱚᱜᱼᱟ ᱾
***
