ᱢᱩᱡ

ᱟ.ᱭᱩᱵ ᱖ ᱴᱲᱟᱝ, ᱥᱣᱤᱢᱤᱝ ᱯᱩᱞ (Swimming pool) ᱨᱮ ᱯᱟᱭᱨᱟ ᱪᱮᱫᱚᱜ ᱨᱮᱱᱟᱜ ᱛᱮᱦᱮᱧ ᱜᱮ ᱛᱟ.ᱧ ᱮᱛᱚᱦᱚᱵ ᱫᱤᱱ ᱾ ᱮᱱᱟᱝ ᱦᱚᱨᱚᱜ ᱞᱩᱜᱽᱲᱤ ᱵᱚᱫᱚᱞ ᱠᱟᱛᱮ ᱯᱟᱭᱨᱟᱜ ᱞᱟ.ᱜᱤᱫ ᱤᱧ ᱦᱚᱨᱚᱵᱚᱨᱚᱜ ᱠᱟᱱᱟ ᱾ ᱯᱩᱞ ᱨᱮᱱᱟᱜ ᱢᱟᱨᱮ ᱫᱟᱜ ᱵᱚᱫᱚᱞ ᱠᱟᱛᱮ ᱱᱚᱣᱟᱱᱟᱜ ᱠᱚ ᱯᱮᱨᱮᱡ ᱮᱫ-ᱟ ᱾ ᱚᱱᱟ ᱨᱮ ᱠᱞᱚᱨᱤᱱ (Chlorine) ᱥᱟᱶᱛᱮ ᱟᱨ ᱜᱮ ᱪᱮᱫ ᱨᱟᱱ ᱠᱚ ᱪᱚᱝ ᱠᱚ ᱮᱢ ᱢᱮᱥᱟᱭ ᱞᱟ.ᱜᱤᱫ ᱾ ᱮᱱᱟᱝ ᱠᱷᱚᱱ ᱛᱟᱺᱜᱤ ᱛᱟᱺᱜᱤ ᱛᱮᱧ ᱟ.ᱲᱤᱥ ᱪᱟᱵᱟ ᱮᱱᱟ ᱾ ᱟᱫᱚᱹᱧ ᱠᱩᱞᱤ ᱠᱮᱫ ᱠᱚᱣᱟ, ᱟᱨ ᱛᱤᱱᱟᱹᱜ ᱜᱷᱟ.ᱲᱤᱠ ᱞᱟᱜᱟᱣᱚᱜ-ᱟ ᱾ ᱢᱤᱫ ᱦᱚᱲ ᱮ ᱢᱮᱱ ᱠᱮᱫᱟ, ᱟᱨᱮ ᱢᱟᱰᱟᱢ ᱢᱟᱨᱮ ᱫᱟᱜ ᱨᱮ ᱩᱱᱟᱹᱜ ᱢᱩᱡ ᱠᱚ ᱪᱟᱯᱮ ᱞᱮᱱᱟ, ᱵᱟᱝ ᱫᱚ ᱛᱮᱛᱟᱝ ᱡᱟᱞᱟ ᱛᱮ, ᱦᱚᱲ ᱠᱚ complain ᱠᱮᱫ ᱛᱮ ᱨᱟᱱ ᱞᱮ ᱮᱢᱮᱫᱟ ᱾ ᱦᱩᱭ ᱥᱟ.ᱛ ᱜᱚᱫᱚᱜ ᱠᱟᱱᱟ ᱟᱨ ᱢᱤᱫ ᱜᱷᱟ.ᱲᱤᱠ ᱾

ᱢᱩᱡ ᱠᱟᱛᱷᱟ ᱟᱸᱡᱚᱢ ᱛᱟᱨᱟ ᱠᱷᱟᱱ ᱜᱮ ᱢᱤᱫ ᱢᱟᱨᱮ ᱜᱷᱚᱴᱚᱱ ᱤᱧᱟᱜ ᱢᱮᱫ ᱥᱟᱢᱟᱝ ᱨᱮ ᱡᱷᱟᱞᱠᱟᱣ ᱜᱚᱫ ᱮᱱᱟ ᱾ ᱩᱭᱦᱟ.ᱨ ᱦᱮᱡ ᱮᱱᱟ ᱤᱧ ᱛᱩᱞᱩᱡᱟᱜ ᱱᱟᱥᱮ ᱯᱩᱞᱩᱜ ᱯᱩᱞᱩᱜ ᱤᱧᱟᱜ ᱢᱮᱫ ᱥᱟᱢᱟᱝ ᱨᱮ ᱢᱤᱫ ᱫᱟ.ᱭ ᱵᱩᱰᱷᱤ ᱟᱜ ᱢᱩᱴᱷᱟᱹᱱ, ᱫᱩᱞᱟ.ᱲ ᱢᱮᱥᱟ ᱜᱚᱨᱚᱡᱽ ᱟ.ᱰᱤ ᱱᱟᱯᱟᱭᱟᱜ !!

ᱤᱧᱮ ᱡᱟᱱᱟᱢ ᱠᱮᱫᱤᱧ ᱥᱟᱶᱛᱮ ᱟᱭᱳ ᱛᱤᱧ ᱫᱚ ᱟ.ᱰᱤ ᱜᱮ ᱡᱤᱞᱚᱠᱷᱚᱞᱚ ᱦᱚᱲᱢᱚ ᱟᱨ ᱦᱟᱱᱟᱱᱟᱣᱟ ᱨᱩᱣᱟ. ᱦᱟ.ᱥᱩ ᱛᱮᱭ ᱞᱩᱦᱩᱡᱩᱨᱤ ᱪᱟᱵᱟ ᱮᱱᱟ ᱾ ᱠᱷᱟᱱ ᱜᱮ ᱫᱤᱥᱚᱢ ᱠᱷᱚᱱ ᱜᱚᱲᱚᱢ ᱟᱭᱳᱣᱟᱜ ᱡᱩᱨ ᱛᱮ ᱟ.ᱞᱤᱧ ᱫᱚ ᱵᱟᱱᱟ ᱦᱚᱲ ᱜᱮ ᱢᱟᱢᱚ ᱚᱲᱟᱜ ᱠᱚ ᱤᱫᱤ ᱚᱴᱚ ᱠᱟᱫ ᱞᱤᱧᱟ, ᱪᱮᱠᱟᱛᱮ ᱚᱸᱰᱮ ᱫᱚ ᱟ.ᱞᱤᱧ ᱧᱮᱞ ᱥᱟᱢᱴᱟᱣ ᱟᱨ ᱡᱚᱛᱚᱱ ᱞᱟ.ᱜᱤᱫ ᱢᱤᱫ ᱦᱚᱲ ᱮ ᱛᱟᱦᱮᱸ ᱠᱟᱱᱟ ᱾ ᱵᱟᱥᱚ ᱫᱟ.ᱭ ! ᱥᱩᱨ ᱥᱟ.ᱜᱟ.ᱭ ᱨᱮᱱᱤᱡ ᱫᱟ.ᱭ ᱵᱩᱰᱷᱤ ᱾ ᱩᱱᱤ ᱫᱚ ᱢᱟᱢᱚ ᱵᱟᱵᱟ ᱟᱡ ᱦᱟᱛᱚᱢ ᱾ ᱦᱚᱲ ᱠᱚ ᱢᱮᱱᱟ ᱟᱨ ᱥᱟ.ᱨᱤ ᱦᱚᱸ ᱥᱟ.ᱨᱤ ᱜᱮ, ᱟ.ᱰᱤ ᱫᱟᱭᱟ ᱟᱹᱱᱤᱡ ᱟᱨ ᱟ.ᱰᱤ ᱜᱮ ᱠᱩᱨᱩᱢᱩᱴᱩ ᱠᱟ.ᱢᱤ ᱡᱚᱝ ᱛᱮᱱᱤᱡ ᱾ ᱟ.ᱛᱩ ᱨᱮ ᱜᱮ ᱴᱷᱟᱶ ᱞᱮᱱᱟᱭ, ᱤᱠᱷᱟᱹᱱ ᱡᱟᱶᱟᱭ ᱛᱟᱭ ᱫᱚ ᱪᱮᱫ ᱠᱚ ᱪᱚᱝ ᱵᱟᱭ ᱠᱩᱥᱤ ᱞᱮᱱ ᱪᱮ ᱪᱮᱫ ᱠᱷᱟᱹᱛᱤᱨ ᱪᱚᱝ ᱜᱤᱫᱽᱨᱟ. ᱯᱤᱫᱽᱨᱟ. ᱠᱚ ᱵᱟ.ᱜᱤ ᱜᱤᱰᱤ ᱠᱟᱛᱮ ᱱᱟᱢᱟᱞ ᱫᱤᱥᱚᱢ ᱱᱟᱞᱦᱟᱭ ᱥᱮᱱ ᱮᱱᱟ ᱫᱚ ᱥᱮᱱ ᱥᱟᱺᱜᱤᱧ ᱟᱨ ᱵᱟᱭ ᱨᱩᱣᱟ.ᱲ ᱞᱮᱱᱟ ᱾ ᱛᱟᱭᱚᱢ ᱛᱮ ᱟᱸᱡᱚᱢ ᱮᱱᱟ ᱪᱤ ᱩᱱᱤ ᱫᱚ ᱚᱱᱛᱮ ᱨᱮ ᱟᱨ ᱢᱤᱫᱴᱟᱹᱝ ᱮ ᱡᱚᱴᱟᱣᱟᱱᱟ ᱾ ᱠᱷᱟᱱ ᱜᱮ ᱫᱟ.ᱭ ᱵᱩᱰᱷᱤ ᱫᱚ ᱢᱚᱱᱮ ᱡᱤᱣᱤ ᱠᱚ ᱜᱚᱴᱟ ᱠᱮᱫᱟᱭ, ᱜᱤᱫᱽᱨᱟ. ᱠᱚ ᱦᱟᱨᱟ ᱵᱩᱨᱩ ᱠᱚ ᱞᱟ.ᱜᱤᱫ ᱮ ᱨᱤᱠᱟ. ᱠᱮᱫᱼᱟ ᱾ ᱩᱱ ᱡᱚᱦᱚᱜ ᱠᱷᱚᱱ ᱜᱮ ᱢᱟᱢᱚ ᱚᱲᱟᱜ ᱨᱮ ᱠᱟ.ᱢᱤ ᱜᱚᱲᱚ ᱞᱮᱠᱟ ᱢᱮᱱᱟᱜ ᱟ.ᱜᱩ ᱟᱠᱟᱫᱮᱭᱟ ᱾

ᱥᱟ.ᱨᱤ ᱠᱟᱛᱷᱟ ᱢᱮᱱ ᱞᱮᱠᱷᱟᱱ ᱱᱩᱭ ᱫᱟ.ᱭ ᱵᱩᱰᱷᱤ ᱫᱚ ᱫᱷᱟᱹᱭ ᱵᱩᱰᱷᱤ ᱞᱮᱠᱟ ᱟᱨ ᱥᱟᱶᱛᱮ ᱤᱧ ᱟᱭᱳ ᱞᱮᱠᱟ ᱜᱮ ᱾ ᱤᱧᱟᱜ ᱤᱡ ᱫᱟᱜ ᱟ.ᱨᱩᱵ ᱠᱷᱚᱱ ᱮᱦᱚᱵ ᱠᱟᱛᱮ ᱨᱩᱣᱟ. ᱦᱟ.ᱥᱩ ᱨᱮ ᱱᱚᱨᱥ (Nurse) ᱞᱮᱠᱟ ᱟ.ᱞᱤᱧ ᱵᱟᱱᱟ ᱦᱚᱲᱟᱜ ᱡᱚᱛᱚᱱ ᱟᱺᱜᱤᱵᱷᱟᱨ ᱮ ᱫᱤᱯᱤᱞ ᱞᱮᱫᱼᱟ ᱾

ᱢᱤᱫ ᱫᱤᱱ ᱜᱤᱞᱟ.ᱥ ᱛᱳᱣᱟ ᱨᱮ ᱪᱟᱯᱮ ᱞᱮᱱ ᱢᱤᱫᱴᱟᱹᱝ ᱢᱩᱡ ᱤᱧ ᱧᱩ ᱠᱷᱟ.ᱲ ᱟᱱᱛᱮ ᱵᱚᱛᱚᱨ ᱛᱮ ᱠᱤᱠᱭᱟ.ᱣ ᱟᱛᱮᱧ ᱨᱟᱜ ᱠᱮᱫᱟ ᱾ ᱢᱩᱡ ! ᱢᱩᱡ ! ᱞᱟᱡ ᱨᱮ ᱜᱮᱨ ᱤᱧᱟᱭ, ᱪᱮᱠᱟ.ᱧ ᱚᱰᱚᱠᱮᱭᱟ ᱾ ᱫᱟ.ᱭ ᱵᱩᱰᱷᱤ ᱟᱸᱡᱚᱢ ᱠᱟᱛᱮ ᱦᱚᱨᱚᱵᱚᱨᱚᱭ ᱥᱮᱴᱮᱨᱮᱱᱟ ᱟᱨ ᱵᱟᱰᱟᱭ ᱠᱟᱛᱮ ᱞᱟᱸᱫᱟ ᱢᱮᱥᱟᱭ ᱨᱚᱲ ᱠᱮᱫᱟ, ᱮ ᱵᱤᱴᱤ ᱱᱩᱭ ᱢᱩᱡ ᱫᱚ ᱞᱟᱡ ᱨᱮ ᱠᱷᱟ.ᱲ ᱮᱱ ᱥᱟᱶᱛᱮ ᱜᱮᱭ ᱜᱚᱡ ᱮᱱᱟ, ᱥᱟᱦᱮᱫ ᱵᱟᱝ ᱛᱮ ᱾ ᱤᱠᱷᱟᱹᱱ ᱢᱤᱫ ᱫᱤᱱ ᱦᱤᱞᱚᱜ ᱟᱢ ᱫᱚ ᱫᱟᱜ ᱨᱮᱢ ᱯᱟᱭᱨᱟᱜ ᱠᱷᱟᱱ ᱚᱦᱚᱢ ᱩᱱᱩᱢᱚᱜ-ᱟ, ᱪᱮᱠᱟᱛᱮ ᱢᱩᱡ ᱫᱚ ᱫᱟᱜ ᱨᱮ ᱫᱚ ᱠᱚ ᱪᱟᱯᱮᱜᱼᱟ ᱾ ᱟᱞᱚᱢ ᱵᱚᱛᱚᱨ ᱵᱷᱟᱵᱽᱱᱟᱜᱼᱟ, ᱦᱚᱭ ᱪᱮ ᱾

ᱫᱟ.ᱭ ᱵᱩᱰᱷᱤᱭᱟᱜ ᱠᱟᱛᱷᱟ ᱟᱸᱡᱚᱢ ᱠᱟᱛᱮ ᱤᱧ ᱦᱚᱸ ᱤᱱᱟ. ᱦᱤᱞᱚᱜ ᱫᱚ ᱫᱚᱢᱮᱧ ᱨᱟ.ᱥᱠᱟ. ᱞᱮᱱᱟ ᱾ ᱠᱩᱞᱤ ᱜᱚᱫ ᱠᱮᱫᱮᱭᱟ.ᱧ ᱮᱱᱠᱷᱟᱱ ᱫᱟ.ᱭ ᱫᱮᱞᱟ ᱛᱚᱵᱮ ᱠᱷᱟᱱ ᱟᱵᱚᱣᱟᱜ ᱜᱟ.ᱰᱤᱭᱟ. ᱨᱮᱧ ᱯᱟᱭᱨᱟᱜᱼᱟ ᱟᱨ ᱜᱟᱯᱟ ᱫᱚ ᱠᱷᱟᱲᱟᱝ ᱜᱟᱰᱟ ᱨᱮᱧ ᱰᱩᱭᱞᱟ.ᱝ ᱵᱚᱦᱮᱞᱚᱜᱼᱟ ᱾ ᱤᱧᱟᱜ ᱨᱚᱲ ᱟᱸᱡᱚᱢ ᱠᱟᱛᱮ ᱡᱚᱛᱚ ᱦᱚᱲ ᱫᱚᱢᱮ ᱠᱚ ᱞᱟᱸᱫᱟ ᱠᱮᱫᱼᱟ ᱾ ᱤᱠᱷᱟᱹᱱ ᱫᱟ.ᱭ ᱵᱩᱰᱷᱤ ᱫᱚ ᱩᱛᱤᱥᱩᱛᱤᱭ ᱵᱚᱛᱚᱨᱮᱱᱟ ᱟᱨ ᱮ ᱢᱮᱱ ᱠᱮᱫᱟ, ᱦᱟᱭ ᱨᱮ ᱮ ᱵᱤᱴᱤ, ᱮ ᱫᱩᱞᱟ.ᱲᱤ, ᱱᱤᱛᱚᱜ ᱫᱚᱢ ᱦᱩᱰᱤᱧ ᱜᱮᱭᱟ ᱟᱨ ᱠᱟ.ᱴᱤᱡ ᱥᱮᱬᱟ ᱞᱮᱱ ᱢᱮ ᱥᱮ, ᱢᱟᱥᱮ ᱱᱤᱛ ᱢᱤᱫᱴᱟᱹᱝ ᱢᱩᱡ ᱜᱮᱢ ᱡᱚᱢ ᱟᱠᱟᱫᱮᱭᱟ ᱾ ᱟᱨ ᱜᱮ ᱥᱟᱸᱜᱮ ᱫᱷᱟᱨᱟ ᱢᱩᱡ ᱡᱚᱢ ᱞᱮ ᱠᱚ ᱢᱮᱥᱮ ᱾ ᱵᱟᱲᱜᱮ ᱨᱮᱱᱟᱜ ᱵᱟ.ᱨᱩ ᱫᱟᱨᱮ ᱨᱮ ᱥᱟᱸᱜᱮ ᱦᱟᱣ ᱯᱚᱴᱚᱢ, ᱥᱟᱸᱜᱮ ᱢᱩᱡ, ᱦᱟᱯᱮ ᱛᱤᱭᱩᱜ ᱠᱟᱛᱮᱧ ᱠᱚᱴᱟ ᱟᱢᱟ ᱾ ᱵᱩᱞᱩᱝ ᱢᱟ.ᱨᱤᱪ ᱢᱮᱥᱟ ᱠᱟᱛᱮᱧ ᱨᱤᱫ ᱟᱢᱟ ᱾ ᱢᱟᱢᱚᱭ ᱢᱮᱱ ᱜᱚᱫ ᱠᱮᱫᱼᱟ, ᱵᱷᱟ.ᱬᱡᱤ ᱜᱳ, ᱢᱩᱡ ᱫᱚ ᱟ.ᱰᱤ ᱞᱮᱠᱟᱱ ᱟᱠᱚ ᱾ ᱫᱟ.ᱭ ᱵᱩᱰᱷᱤᱭ ᱢᱮᱱ ᱠᱮᱫᱼᱟ, ᱵᱟᱨ ᱞᱮᱠᱟᱱ ᱟᱠᱚ ᱾ ᱛᱟᱨᱟ ᱫᱚ ᱦᱮᱸᱫᱮ ᱟᱨ ᱛᱤᱱᱟᱹᱜ ᱫᱚ ᱠᱚ ᱟᱨᱟᱜ ᱜᱮᱭᱟ ᱾ ᱟᱨᱟᱜ ᱠᱚ ᱫᱚ ᱠᱚ ᱜᱮᱜᱮᱨᱟ ᱟᱨ ᱦᱮᱸᱫᱮ ᱠᱚ ᱫᱚ ᱵᱟᱝ ᱠᱚ ᱜᱮᱜᱮᱨᱟ ᱾ ᱢᱟᱢᱚ ᱵᱟᱵᱟ ᱞᱟᱸᱫᱟ ᱢᱮᱥᱟᱭ ᱨᱚᱲ ᱠᱮᱫᱟ, ᱮ ᱦᱟᱛᱚᱢ ! ᱠᱚᱱᱴᱟ ᱟᱨ ᱥᱩᱱᱩᱢ ᱢᱩᱡ ᱦᱚᱸ ᱛᱚ ᱠᱚ ᱦᱮᱸᱫᱮ ᱜᱮ ᱫᱚ ᱾ ᱩᱱᱠᱩᱣᱟᱜ ᱜᱮᱨ ᱫᱚᱢ ᱦᱤᱲᱤᱧ ᱠᱮᱫᱼᱟ, ᱦᱟᱱᱮ ᱵᱟ.ᱨᱩ ᱵᱤᱞᱤ ᱛᱤᱭᱩᱜᱽ ᱡᱚᱦᱚᱜ ᱪᱮᱫ ᱞᱮᱠᱟ ᱫᱟᱨᱮ ᱨᱮ ᱠᱚᱱᱴᱟ ᱠᱚ ᱜᱮᱨ ᱞᱮᱫ ᱢᱮᱭᱟ ᱾ ᱟᱨ ᱢᱤᱫ ᱫᱷᱟᱣ ᱦᱚᱨ ᱛᱮ ᱛᱟᱲᱟᱢ ᱦᱤᱡᱩᱜ ᱡᱚᱠᱷᱟ ᱥᱩᱱᱩᱢ ᱢᱩᱡ ᱜᱮᱨ ᱛᱮ ᱛᱤᱱᱟᱹᱜ ᱮᱢ ᱡᱚᱞᱚᱱ ᱞᱮᱱᱟ !! ᱯᱟ.ᱨᱟ.ᱣ ᱚᱡᱷᱟᱭ ᱡᱷᱟᱲ ᱠᱮᱫ ᱢᱮ ᱛᱮᱢ ᱵᱮᱥ ᱞᱮᱱᱟ ᱾ ᱚᱱᱟ ᱠᱚ ᱫᱚᱢ ᱦᱤᱲᱤᱧ ᱠᱮᱫᱟ ᱾ ᱫᱟ.ᱭ ᱵᱩᱰᱷᱤᱭ ᱢᱮᱱ ᱠᱮᱫᱟ, ᱚᱦᱟᱭ, ᱮ ᱵᱟᱹᱵᱩ ᱚᱱᱟ ᱪᱮᱧ ᱦᱤᱲᱤᱧ ᱠᱮᱭᱟ, ᱱᱩᱠᱩ ᱡᱟᱞᱪᱟᱴᱟᱜ ᱢᱩᱡ !!!

ᱟᱪᱠᱟ ᱜᱮ ᱢᱚᱵᱟᱭᱤᱞ ᱨᱮᱱᱟᱜ ᱯᱷᱳᱱ ᱥᱟᱰᱮ ᱛᱮ ᱤᱧᱟᱜ ᱩᱭᱦᱟ.ᱨ ᱦᱚᱸ ᱨᱟᱯᱩᱫ ᱮᱱᱟ ᱾

ᱧᱮᱞᱟ.ᱧ ᱫᱚ ᱨᱟ.ᱣᱞᱠᱮᱞᱟ ᱠᱷᱚᱱ ᱟᱭᱳᱭ ᱯᱷᱳᱱ ᱟᱠᱟᱫᱼᱟ ᱾ ᱠᱷᱚᱵᱚᱨ ᱫᱚ ᱟ.ᱰᱤ ᱵᱷᱟᱵᱽᱱᱟ ᱨᱮᱭᱟᱜ ᱜᱮ ᱾ ᱜᱚᱲᱚᱢ ᱟᱭᱳ ᱛᱤᱧ ᱟ.ᱰᱤ serious, ᱫᱟᱜ ᱫᱟᱠᱟ ᱠᱚ ᱵᱟ.ᱜᱤ ᱩᱛᱟ.ᱨ ᱾ ᱯᱟᱞᱮᱱ ᱢᱩᱪᱟ.ᱫ ᱵᱮᱲᱟ ! ᱩᱢᱮᱨ ᱠᱚ ᱦᱚᱸ ᱟ.ᱰᱤᱜᱟᱱ ᱜᱮ ᱦᱩᱭ ᱟᱠᱟᱱᱟ ᱾ ᱟᱭᱳᱭ ᱢᱮᱱ ᱠᱮᱫᱟ, ᱪᱷᱩᱴᱤ ᱠᱚᱢ ᱧᱟᱢ ᱠᱷᱟᱱ ᱞᱚᱜᱚᱱ ᱛᱮ ᱞᱚᱜᱚᱱ ᱫᱤᱥᱚᱢ ᱢᱟᱢᱚ ᱚᱲᱟᱜ ᱜᱮ ᱥᱮᱴᱮᱨᱚᱜ ᱢᱮ ᱾ ᱟᱞᱮ ᱫᱚ ᱞᱮ ᱥᱮᱴᱮᱨ ᱦᱟᱱᱛᱟᱲᱚᱜ ᱠᱟᱱᱟ ᱾ ᱦᱚᱨᱚᱵᱚᱨᱚᱭᱮᱱᱟ.ᱧ flight availability ᱧᱮᱞ ᱠᱮᱫᱟ.ᱧ ᱧᱤᱫᱟᱹ ᱑᱑ ᱴᱟᱲᱟᱝ ᱨᱮ ᱢᱮᱱᱟᱜ-ᱟ ᱾ ᱴᱤᱠᱮᱴ ᱵᱩᱠ ᱠᱮᱫ ᱥᱟᱶᱛᱮ ᱚᱯᱷᱤᱥ ᱛᱮ ᱯᱷᱳᱱ ᱠᱟᱛᱮ ᱪᱷᱩᱴᱤᱧ ᱦᱟᱛᱟᱣ ᱠᱮᱫᱼᱟ ᱾ ᱫᱚᱥᱟᱨ ᱦᱤᱞᱚᱜ ᱥᱮᱛᱟᱜ ᱔ ᱴᱟᱲᱟᱝ ᱵᱷᱩᱵᱚᱱᱮᱥᱣᱚᱨ ᱨᱮ ᱩᱰᱟ.ᱱ ᱜᱟ.ᱰᱤ ᱠᱷᱚᱱ ᱟᱬᱜᱚ ᱛᱚᱨᱟ ᱜᱮ ᱢᱟᱢᱚ ᱚᱲᱟᱜ ᱛᱮᱧ ᱢᱚᱦᱚᱸᱰᱟ ᱮᱱᱟ ᱟᱨ ᱑᱐ ᱴᱟᱲᱟᱝ ᱚᱠᱛᱮ ᱨᱮᱧ ᱥᱮᱴᱮᱨ ᱮᱱᱟ ᱾ ᱤᱧ ᱧᱮᱞ ᱥᱟᱶᱛᱮ ᱜᱚᱲᱚᱢ ᱟᱭᱳᱣᱟᱜ ᱜᱚᱥᱚ ᱢᱮᱫᱦᱟ ᱡᱤᱭᱟ.ᱲ ᱜᱚᱫ ᱮᱱᱟ ᱾ ᱧᱟᱞᱟᱜ ᱜᱮ ᱨᱚᱲ ᱞᱮᱠᱟ.ᱧ ᱟᱸᱡᱚᱢ ᱠᱮᱫᱼᱟ, ᱥᱩᱢᱤ ᱵᱤᱴᱤ ! ᱪᱮᱫ ᱤᱧᱟᱜ ᱜᱚᱡ ᱦᱚᱲᱢᱚ ᱧᱮᱧᱮᱞ ᱜᱮᱢ ᱥᱮᱴᱮᱨᱮᱱᱟ !! ᱱᱤᱛᱚᱜ ᱫᱚ ᱵᱟ.ᱧ ᱜᱩᱡᱩᱜ-ᱟ ᱾

ᱛᱮᱞᱟ ᱨᱩᱣᱟ.ᱲ ᱟᱫᱮᱭᱟ.ᱧ, ᱟᱭᱳ ᱩᱱᱟᱹᱜ ᱫᱚ ᱟᱞᱚᱢ ᱵᱷᱟᱵᱽᱱᱟᱜ-ᱟ ᱥᱮ, ᱥᱟᱺᱜᱤᱧ ᱨᱮ ᱢᱮᱱᱟᱜ ᱞᱮ ᱨᱮᱦᱚᱸ ᱞᱮ ᱩᱭᱦᱟ.ᱨ ᱮᱫ ᱢᱮ ᱜᱮᱭᱟ ᱞᱮᱛᱟᱲ ᱜᱷᱟᱱᱮ ᱜᱮ ᱾ ᱤᱧᱟᱜ ᱠᱟᱛᱷᱟ ᱟᱸᱡᱚᱢ ᱠᱟᱛᱮ ᱜᱤᱛᱤᱡ ᱠᱷᱚᱱ ᱵᱮᱨᱮᱫ ᱥᱟᱱᱟ ᱠᱮᱫᱮᱭᱟ ᱾ ᱮᱱᱠᱷᱟᱱ ᱤᱧ ᱟᱭᱳ ᱜᱚᱲᱚ ᱠᱟᱛᱮ ᱫᱩᱲᱩᱵ ᱠᱟᱫᱮᱭᱟᱭ ᱾ ᱜᱚᱲᱚᱢ ᱟᱭᱳᱭ ᱢᱮᱱ ᱠᱮᱫᱼᱟ ! ᱤᱧ ᱞᱮᱠᱟ ᱵᱟᱥᱚ ᱟᱢ ᱫᱟ.ᱭ ᱵᱩᱰᱷᱤ ᱦᱚᱸᱭ ᱛᱷᱟᱠᱟᱣ ᱟᱠᱟᱱᱟ, ᱩᱭᱦᱟ.ᱨ ᱮᱭᱟ ᱪᱮᱢ ᱵᱟᱝ ᱟ ? ᱟ.ᱰᱤ ᱫᱷᱟᱣ ᱜᱮ ᱢᱮᱱ ᱵᱟᱲᱟ ᱠᱮᱫᱼᱟᱭ ᱥᱩᱢᱤ ᱵᱤᱴᱤ ᱥᱮᱬᱟ ᱠᱟᱛᱮ ᱢᱤᱫ ᱫᱷᱟᱣ ᱦᱚᱸ ᱵᱟᱭ ᱦᱮᱡ ᱞᱮᱱᱟ ᱾ ᱩᱱᱟᱹᱜ ᱤᱧ ᱩᱭᱦᱟ.ᱨᱮ ᱠᱟᱱᱟ ᱾ ᱦᱮᱡ ᱟᱠᱟᱱ ᱨᱮᱢ ᱦᱤᱨᱤ ᱠᱟᱭ ᱢᱮ ᱵᱟᱲᱮ ᱾ ᱱᱟᱥᱮ ᱜᱷᱟ.ᱲᱤᱠ ᱜᱟᱞᱢᱟᱨᱟᱣ ᱠᱟᱛᱮ ᱵᱟᱥᱚ ᱫᱟ.ᱭ ᱧᱮᱧᱮᱞ ᱤᱧ ᱥᱮᱱ ᱮᱱᱟ ᱾ ᱟᱠᱚ ᱟᱲᱟᱜ, ᱦᱟᱱᱟ ᱴᱚᱞᱟ ᱾

ᱡᱟ.ᱯᱤᱫ ᱛᱷᱤᱨ ᱢᱮᱫ !! ᱥᱟᱦᱮᱫ ᱦᱚᱸ ᱵᱟ.ᱱᱩᱜ ᱞᱮᱠᱟ ᱾ ᱵᱷᱤᱛ ᱟᱲᱮ ᱟᱲᱮ ᱛᱮ ᱥᱟᱸᱜᱮ ᱢᱩᱡ ᱠᱚ ᱨᱮᱞᱟᱣ ᱟᱠᱟᱱᱟ ᱾ ᱡᱚᱛᱚ ᱢᱩᱡᱟᱜ ᱢᱚᱪᱟ ᱨᱮ ᱯᱩᱸᱰ ᱜᱮ ᱪᱮᱫ ᱠᱚ ᱪᱚᱝ ᱠᱚ ᱜᱮᱨ ᱟ.ᱛᱠᱤᱨ ᱤᱫᱤᱭᱮᱫᱼᱟ ! ᱜᱤᱫᱽᱨᱟ.ᱧ ᱛᱟᱦᱮᱸ ᱡᱚᱦᱚᱜ ᱢᱤᱫ ᱫᱷᱟᱣ ᱫᱟ.ᱭ ᱵᱩᱰᱷᱤᱧ ᱠᱩᱞᱤ ᱞᱮᱫᱮᱭᱟ, ᱱᱩᱠᱩ ᱢᱩᱡ ᱫᱚ ᱪᱮᱫ ᱠᱷᱟᱹᱛᱤᱨ ᱱᱚᱝᱠᱟ ᱨᱮᱞᱟᱣ ᱠᱟᱛᱮ ᱜᱮ ᱠᱚ ᱥᱮᱱᱚᱜ-ᱟ ?

ᱩᱱ ᱡᱚᱦᱚᱜ ᱫᱟ.ᱭ ᱵᱩᱰᱷᱤᱭ ᱞᱟᱹᱭ ᱞᱮᱫᱼᱟ, ᱱᱩᱠᱩ ᱢᱩᱡ ᱫᱚ ᱟ.ᱰᱤ ᱜᱮ ᱠᱚ ᱡᱩᱢᱤᱫᱟ ᱾ ᱟᱨ ᱥᱩᱞᱩᱠ ᱥᱟ.ᱜᱟ.ᱭ ᱛᱟᱠᱚ ᱾ ᱜᱚᱲᱚ ᱜᱚᱯᱚᱲᱚ ᱠᱚ ᱠᱟ.ᱢᱤᱭᱟ, ᱠᱩᱨᱩᱢᱩᱴᱩ ᱠᱚ ᱠᱷᱟᱴᱟᱣᱚᱜ-ᱟ, ᱧᱮᱞ ᱠᱚᱢ ᱦᱟ.ᱱᱠᱩ ᱛᱟᱨᱟ ᱫᱚ ᱢᱤᱢᱤᱴᱟᱹᱝ ᱠᱚ ᱜᱚᱜ ᱟᱠᱟᱣᱟᱱᱟ ᱾ ᱯᱟᱞᱮᱱ ᱵᱟ.ᱭᱨᱤ ᱠᱚ ᱥᱟᱶ ᱨᱮ ᱛᱩᱯᱩᱫ ᱛᱮ ᱟᱫᱷᱟᱱ ᱫᱚ ᱠᱚ ᱦᱟ.ᱞᱤᱠ ᱟᱠᱟᱱᱟ ᱾ ᱦᱟᱥᱯᱟᱛᱟᱞ ᱜᱮ ᱠᱚ ᱤᱫᱤᱭᱮᱫ ᱠᱚᱣᱟ ᱾ ᱟᱨ ᱩᱱᱠᱩ ᱥᱮᱵᱟ ᱠᱚ ᱞᱟ.ᱜᱤᱫ ᱤᱧ ᱞᱮᱠᱟᱱ ᱠᱚ ᱢᱮᱱᱟᱜ ᱠᱚᱣᱟ ᱾ ᱱᱚᱶᱟ ᱜᱮ ᱥᱟᱶᱟᱨ ᱥᱟᱶᱛᱟ ᱫᱚ ᱾ ᱢᱩᱡ ᱧᱮᱞ ᱛᱮ ᱢᱟᱨᱟᱝ ᱥᱤᱠᱷᱱᱟ.ᱛ ᱧᱟᱢᱚᱜᱼᱟ ᱾

ᱥᱟ.ᱨᱤ ᱜᱮ, ᱵᱟᱥᱚ ᱫᱟ.ᱭ ᱵᱩᱰᱷᱤ ᱦᱚᱸ ᱢᱤᱫ ᱢᱩᱡ ᱜᱮ !!

ᱚᱠᱛᱚ ᱵᱟᱝ ᱯᱚᱞᱚᱢ ᱠᱟᱛᱮ ᱚᱸᱰᱮ ᱠᱷᱚᱱ ᱜᱮ ᱦᱟᱭᱫᱨᱟᱵᱟᱫᱽ ᱟᱯᱚᱞᱳ ᱦᱚᱥᱯᱤᱴᱟᱞ (Hyderabad Apolo Hospital) ᱨᱮᱱᱤᱡ ᱢᱤᱫ ᱰᱟᱠᱛᱚᱨ ᱡᱚᱴᱟᱣ ᱴᱷᱮᱱ ᱤᱧ ᱯᱷᱳᱱ ᱠᱮᱫᱼᱟ, ᱟᱨ ᱤᱧ ᱱᱮᱦᱚᱸᱨ ᱠᱮᱫᱮᱭᱟ, Emergency ᱢᱤᱫ ᱟ.ᱰᱤ close relative ᱥᱟᱶ ᱛᱮᱧ ᱤᱫᱤ ᱛᱟᱨᱟᱭᱮ ᱠᱟᱱᱟ ᱿ please arrange for personalized treatment in ICU.

ᱢᱤᱫ ᱪᱟᱸᱫᱚ ᱛᱟᱭᱚᱢ, ᱵᱟᱥᱚ ᱫᱟ.ᱭ ᱪᱮᱸᱜᱷᱟ ᱠᱮᱴᱮᱡ ᱟᱠᱟᱱᱟᱭ ᱾ ᱤᱧ ᱧᱮᱞ ᱥᱟᱶᱛᱮ ᱢᱮᱫ ᱫᱟᱜ ᱛᱟᱭ ᱦᱤᱰᱤᱨ ᱦᱤᱰᱤᱨ ᱡᱚᱨᱚᱜ ᱠᱟᱱᱟ ᱾ ᱛᱤ ᱛᱮ ᱜᱮᱧ ᱡᱚᱫ ᱠᱮᱫᱮᱭᱟ, ᱫᱟ.ᱭ ᱤᱧ ᱦᱚᱸ ᱟᱢ ᱞᱮᱠᱟᱜᱮ, ᱢᱩᱡ !! ᱟᱞᱟᱝ ᱫᱚ ᱵᱟᱨᱟᱵᱟ.ᱨᱤ ᱜᱮ !!

***