ᱥᱟᱝ ᱵᱟᱸᱫᱳ ᱱᱟᱹᱲᱤ ᱞᱮᱠᱟ
ᱟᱢ ᱫᱚ ᱡᱟᱱᱟᱢ ᱟᱭᱳ ᱾
ᱟᱢ ᱜᱮ ᱤᱧᱤᱡ ᱡᱟᱱᱟᱢ ᱫᱟᱛᱟ
ᱟᱢ ᱜᱮ ᱤᱧᱤᱡ ᱛᱳᱣᱟ ᱫᱟᱨᱮ
ᱟᱢ ᱜᱮ ᱤᱧᱤᱡ ᱡᱟᱱᱟᱢ ᱫᱷᱩᱲᱤ,
ᱥᱳᱞᱳ ᱟᱱᱟ ᱡᱟᱦᱮᱨ ᱜᱟᱲ ᱾
ᱟᱭᱳ ᱫᱩᱞᱟᱹᱲ ᱠᱷᱚᱱ ᱥᱚᱨᱮᱥ
ᱫᱩᱞᱟᱹᱲ ᱵᱟᱱᱩᱜ-ᱟ ᱡᱚᱞᱚᱠ ᱯᱩᱨᱤᱨᱮ,
ᱯᱟᱸᱡᱟᱛᱮ ᱵᱟᱢ ᱧᱟᱢ ᱜᱚᱴᱟ
ᱥᱚᱨᱚᱜᱽ ᱯᱟᱛᱟᱞ ᱢᱚᱧᱪᱚᱯᱩᱨᱤ ᱨᱮ ᱾
ᱦᱚᱭ ᱫᱟᱜ ᱨᱤᱢᱤᱞ ᱥᱟᱹᱨᱫᱤ ᱡᱟᱹᱯᱩᱫ
ᱟᱭᱳ ᱟᱧᱪᱟᱨ ᱜᱮᱛᱚ ᱪᱷᱟᱢᱰᱟ,
ᱟᱭᱳ ᱟᱧᱪᱟᱨ ᱜᱮᱛᱚ ᱞᱚᱞᱚ
ᱥᱤᱛᱩᱝ ᱫᱩᱠ ᱡᱟᱞᱟ ᱨᱮᱭᱟᱲ ᱠᱟᱱᱰᱟ ᱾
ᱟᱢᱟᱜ ᱥᱳᱦᱟᱜᱽ ᱫᱩᱞᱟᱹᱲ ᱢᱟᱭᱟᱛᱮ
ᱥᱟᱦᱟᱣ ᱨᱮᱭᱟᱜ ᱫᱤᱞ ᱫᱟᱲᱮᱛᱮ,
ᱟᱢᱫᱚ ᱟᱭᱳ ᱡᱟᱱᱟᱢ ᱞᱤᱫᱤᱧᱟᱢ
ᱱᱚᱣᱟ ᱵᱚᱥᱢᱚᱛᱟ ᱛᱟᱞᱟᱨᱮ ᱾
ᱫᱷᱟᱹᱨᱛᱤᱨᱮ ᱤᱧ ᱡᱟᱱᱟᱢ ᱠᱷᱟᱹᱛᱤᱨ
ᱫᱩᱠ ᱦᱟᱨᱠᱮᱛ ᱡᱷᱚᱛᱚ ᱫᱮᱭᱟ ᱠᱟᱛᱮ,
ᱟᱹᱜᱩ ᱞᱤᱫᱤᱧᱟᱢ ᱱᱚᱣᱟ ᱥᱳᱱᱮᱨ ᱜᱟᱲᱨᱮ ᱾
ᱜᱮᱞ ᱪᱟᱸᱫᱳ ᱜᱮᱞ ᱢᱟᱦᱟ ᱵᱤᱸᱫᱤ ᱞᱮᱠᱟ
ᱛᱚᱞ ᱠᱟᱛᱮ ᱫᱚᱦᱚ ᱞᱤᱫᱤᱧᱟᱢ
ᱟᱢᱟᱜ ᱥᱟᱹᱜᱟᱹᱭ ᱱᱟᱹᱲᱤᱛᱮ ᱾
ᱦᱚᱵᱚᱨ ᱦᱟᱞᱟᱝ ᱠᱟᱛᱮ ᱪᱚᱜ ᱪᱮᱨᱮᱡ
ᱞᱤᱫᱤᱧᱟᱢ ᱟᱢᱟᱜ ᱠᱚᱲᱟᱢ
ᱟᱧᱪᱟᱨ ᱠᱚᱞᱮᱨᱮ ᱾
ᱟᱢ ᱜᱮ ᱟᱭᱳ ᱡᱟᱱᱟᱢ ᱫᱟᱨᱮ
ᱟᱢᱜᱮ ᱤᱧᱨᱮᱱ ᱛᱳᱣᱟ ᱫᱟᱨᱮ ᱾
ᱦᱟᱨᱟ ᱠᱤᱫᱤᱧᱟᱢ ᱟᱢᱟᱜ ᱛᱳᱣᱟ ᱛᱮ
ᱫᱟᱭᱟ ᱫᱚᱠᱠᱷᱤᱱᱟ ᱢᱟᱭᱟ ᱛᱷᱩᱢ ᱛᱮ ᱾
ᱥᱮᱸᱲᱟ ᱠᱟᱣᱫᱤᱧᱟᱢ ᱯᱳᱭᱞᱳ ᱡᱟᱱᱟᱢ ᱟᱭᱳ ᱟᱲᱟᱝ ᱾
ᱟᱢᱟᱜ ᱟᱧᱪᱟᱨ ᱠᱚᱞᱮᱨᱮ ᱛᱚᱞ
ᱠᱟᱛᱮ ᱪᱤᱱᱦᱟᱹᱣ ᱞᱤᱫᱤᱧᱟᱢ ᱥᱟᱶᱛᱟ
ᱥᱚᱢᱟᱡᱽ ᱟᱹᱨᱤᱪᱟᱹᱞᱤ ᱟᱪᱟᱨ ᱵᱮᱣᱦᱟᱨ,
ᱪᱤᱱᱦᱟᱹᱣ ᱞᱤᱫᱤᱧᱟᱢ ᱡᱟᱹᱛ ᱫᱷᱚᱨᱚᱢ
ᱥᱟᱹᱨᱤ ᱡᱟᱱᱟᱢ ᱯᱟᱹᱨᱥᱤ ᱨᱚᱲ ᱾
ᱨᱤᱞᱟᱹᱢᱟᱞᱟ ᱥᱟᱶᱛᱟ ᱛᱟᱞᱟᱨᱮ ᱯᱷᱩᱴᱟᱹᱣ
ᱵᱟᱦᱟ ᱞᱮᱠᱟᱹᱧ ᱯᱷᱩᱴᱟᱹᱣ ᱮᱱ,
ᱮᱭᱟᱭ ᱡᱟᱱᱟᱢ ᱨᱮᱦᱚᱸ ᱵᱟᱹᱧ ᱦᱟᱞᱟ
ᱫᱟᱲᱮᱭᱟᱜ ᱟᱢᱟᱜ ᱛᱳᱣᱟ ᱨᱤᱱ ᱾
ᱟᱢᱟᱜ ᱤᱧᱟᱜ ᱫᱩᱞᱟᱹᱲ ᱥᱟᱹᱜᱟᱹᱭ
ᱥᱤᱧ ᱧᱤᱫᱟᱹ ᱥᱮᱛᱟᱜ ᱟᱹᱭᱩᱵ
ᱵᱟᱠᱡᱩᱞᱩᱝ ᱞᱮᱠᱟ ᱰᱤᱜᱤ ᱰᱤᱜᱤ
ᱡᱳᱞᱳᱜ-ᱟ ᱡᱮᱣᱮᱫ ᱵᱷᱳᱨ ᱾
ᱟᱢᱫᱚ ᱡᱟᱱᱟᱢ ᱟᱭᱳ ᱥᱚᱨᱮᱥᱟᱢ,
ᱟᱢᱟᱜ ᱛᱳᱣᱟ ᱫᱟᱨᱮ ᱨᱮᱭᱟᱜ
ᱥᱚᱨᱮᱥ ᱥᱟᱹᱜᱟᱹᱭ ᱠᱷᱚᱫᱟ ᱛᱟᱦᱮᱱᱟ
ᱟᱨᱟᱜ ᱥᱮᱭᱟᱭ ᱛᱮ ᱟᱭᱳ ᱟᱧᱪᱟᱨ ᱨᱮ ᱾
***
