ᱚᱲᱟᱜ ᱫᱩᱣᱟᱹᱨ ᱜᱚᱴᱟ ᱡᱚᱵᱽᱨᱟ ᱰᱷᱟᱱ ᱰᱷᱟᱱ ᱾ ᱫᱟᱜ ᱟᱨᱮᱡ ᱨᱮ ᱟᱺᱭᱴᱷᱟᱹ ᱛᱷᱟᱹᱨᱤ ᱵᱟᱹᱴᱤ ᱨᱚᱱᱮᱵᱚᱱᱮ ᱾ ᱴᱩᱠᱩᱡ ᱴᱷᱤᱞᱤ ᱨᱮ ᱢᱤᱫ ᱴᱷᱚᱯ ᱫᱟᱜ ᱵᱟᱝ ᱛᱮ ᱨᱚᱦᱚᱲ ᱴᱷᱟᱝᱠᱟ ᱴᱷᱟᱲᱟᱝ ᱾ ᱨᱚᱛᱚᱱ ᱟᱡ ᱫᱟᱹᱭ ᱫᱚ ᱯᱟᱨᱠᱚᱢ ᱨᱮ ᱯᱟᱴᱜᱟᱸᱰᱚ ᱫᱩᱲᱩᱵ ᱴᱷᱤᱠ ᱠᱟᱛᱮ ᱜᱤᱫᱽᱨᱟᱹ ᱦᱚᱵᱚᱨ ᱠᱟᱭᱟᱭ ᱟᱨ ᱪᱮᱨᱮᱡ ᱮᱭᱟᱭ ᱾ ᱢᱮᱱᱟᱭ “ᱤᱧᱤᱡ ᱨᱟᱡᱟ ᱵᱮᱴᱟ, ᱤᱧᱤᱡ ᱥᱚᱱᱟ ᱵᱮᱴᱟ, ᱰᱤᱰᱤ ᱜᱚᱫᱚᱜ ᱟᱭ ᱪᱟᱪᱚ ᱜᱚᱫᱚᱜ ᱟᱭ ᱟᱨ ᱫᱟᱹᱲ ᱠᱟᱛᱮ ᱛᱟᱲᱟᱢ ᱜᱚᱫ ᱠᱟᱜ ᱟᱭ” ᱾ ᱜᱤᱫᱽᱨᱟᱹ ᱦᱟᱜ ᱛᱤ ᱠᱟᱹᱴᱩᱵ ᱢᱤᱢᱤᱫ ᱴᱤᱭᱟᱝ ᱥᱟᱵ ᱩᱫᱩᱜ ᱠᱟᱛᱮ ᱢᱮᱱᱟᱭ “ᱨᱟᱡᱟ ᱵᱮᱴᱟ ᱛᱤᱧ ᱱᱚᱣᱟ ᱛᱮ ᱫᱟᱹᱛᱟᱹᱱᱤ ᱟᱭ, ᱱᱚᱣᱟ ᱛᱮ ᱦᱩᱛᱩᱢᱚᱜ ᱟᱭ, ᱱᱚᱣᱟ ᱛᱮ ᱫᱟᱠᱟ ᱡᱚᱢ ᱟᱭ, ᱱᱚᱣᱟ ᱛᱮ ᱩᱛᱩ ᱡᱚᱢ ᱟᱭ ᱟᱨ ᱱᱚᱣᱟ ᱛᱮ ᱫᱚ ᱚᱞᱚᱜ ᱟᱥᱲᱟ ᱥᱮᱱᱚᱜ ᱟᱭ ᱢᱟᱨ ᱜᱚ ᱵᱩᱰᱷᱤ ᱨᱟᱴᱟᱯᱟᱴᱟ ᱦᱚᱭ ᱫᱟᱜ ᱫᱟᱨᱟᱭ ᱠᱟᱱᱟ ᱥᱟᱦᱟᱱ ᱥᱟᱠᱟᱢ ᱠᱚ ᱩᱢᱩᱞ ᱜᱚᱫᱽ ᱢᱮ ᱵᱟᱝᱠᱷᱟᱱ ᱫᱚ ᱞᱚᱦᱚᱫ ᱪᱟᱵᱟᱜᱼᱟ” ᱾ ᱢᱮᱱ ᱯᱩᱨᱟᱹᱣ ᱪᱷᱚᱴ ᱦᱟᱛᱞᱟᱜ ᱨᱮ ᱠᱩᱲᱩᱠᱩᱛᱩ ᱮᱭᱟᱭ ᱾ ᱵᱩᱠᱲᱩ ᱛᱮ ᱜᱤᱫᱽᱨᱟᱹ ᱦᱚᱯᱚᱱ ᱠᱷᱤᱴᱤ ᱠᱷᱤᱴᱤ ᱞᱟᱸᱫᱟᱭᱟᱭ ᱾ ᱥᱟᱶᱛᱮ ᱟᱡ ᱦᱚᱸ ᱦᱮᱴᱮ ᱦᱮᱴᱮ ᱞᱟᱸᱫᱟ ᱛᱟᱨᱟᱭᱟᱭ ᱾ ᱟᱨ ᱜᱮ ᱡᱚᱡᱚᱢ ᱛᱤ ᱛᱟᱭ ᱪᱮᱛᱟᱱ ᱥᱮᱫ ᱛᱩᱞ ᱨᱟᱠᱟᱵ ᱟᱛᱟᱝ ᱧᱚᱜ ᱠᱟᱛᱮ ᱢᱮᱱᱟᱭ “ᱫᱮᱥᱮ ᱪᱟᱸᱫᱚ ᱢᱟᱢᱚ ᱥᱚᱱᱟ ᱛᱷᱟᱹᱨᱤ ᱨᱮ ᱛᱳᱣᱟ ᱫᱟᱠᱟ ᱨᱩᱯᱟᱹ ᱜᱤᱱᱟᱹ ᱨᱮ ᱡᱤᱞ ᱩᱛᱩ ᱨᱟᱡᱟ ᱵᱮᱴᱟ ᱛᱤᱧ ᱱᱚᱢ ᱜᱚᱫᱽ ᱟᱭ ᱪᱟᱠᱚᱵ ᱪᱟᱠᱚᱵ……” ᱾
ᱮᱸᱜᱟ ᱦᱚᱯᱚᱱᱟᱜ ᱪᱮᱯᱮᱨᱮᱡ, ᱞᱟᱯᱟᱸᱫᱟ, ᱫᱩᱯᱩᱞᱟᱹᱲ ᱧᱮᱞ ᱵᱷᱟᱜᱟᱣ ᱟᱹᱲᱤᱥ ᱪᱟᱵᱟ ᱮᱱᱠᱷᱟᱱ ᱨᱚᱛᱚᱱ ᱢᱮᱱ ᱟᱭ “ᱮ ᱫᱟᱹᱭ ᱪᱟᱸᱫᱚ ᱢᱟᱢᱚ ᱫᱚ ᱧᱤᱫᱟᱹ ᱞᱮᱱ ᱮᱱᱟᱝ ᱦᱤᱡᱩᱜ ᱟᱭ ᱫᱤᱱ ᱵᱮᱲᱟ ᱫᱚ ᱵᱟᱝᱼᱟ” ᱾ ᱮᱱᱠᱷᱟᱱ ᱟᱡ ᱫᱟᱹᱭ ᱢᱮᱱ ᱨᱩᱣᱟᱹᱲᱟᱭ “ᱵᱟᱝᱠᱷᱟᱱ ᱢᱟ ᱪᱟᱸᱫᱚ ᱢᱟᱢᱚ ᱥᱟᱹᱨᱤ ᱥᱟᱹᱨᱤ ᱫᱟᱠᱟ ᱩᱛᱩ ᱮᱢ ᱜᱚᱫᱚᱜ ᱠᱟᱱᱟᱭ ᱾ ᱤᱧ ᱢᱟ ᱠᱷᱟᱹᱞᱤ ᱠᱷᱟᱹᱞᱤ ᱢᱮᱱ ᱮᱫᱼᱟᱧ ᱨᱟᱡᱟ ᱵᱮᱴᱟ ᱛᱤᱧ ᱵᱷᱩᱞᱟᱹᱣ ᱮ ᱞᱟᱹᱜᱤᱫ ᱾ ᱵᱟᱪᱮ ᱵᱮᱴᱟ, ᱵᱟᱪᱮ ᱥᱚᱱᱟ, ᱵᱟᱪᱮ ᱫᱷᱚᱱᱚ ᱾ ᱟᱢ ᱢᱟᱢᱚ ᱪᱮᱫ ᱢᱮᱱ ᱠᱟᱱᱟᱭ ᱪᱟᱸᱫᱚ ᱱᱤᱛ ᱵᱟᱝ ᱦᱤᱡᱩᱜ ᱟᱭ ᱾ ᱱᱤᱫᱟᱹ ᱞᱮᱱ ᱮᱱᱟᱝ ᱦᱤᱡᱩᱜ ᱟᱭ ᱾
ᱨᱚᱛᱚᱱ ᱟᱨᱦᱚᱸ ᱢᱮᱱᱟᱭ “ᱮ ᱫᱟᱹᱭ ᱢᱟᱲᱟᱝ ᱫᱷᱟᱣ ᱤᱧ ᱦᱮᱡ ᱞᱟᱱ ᱫᱚ ᱟᱢ ᱱᱟᱣᱟ ᱱᱟᱣᱟ ᱟᱹᱜᱩ ᱛᱟᱨᱟᱨᱮ” ᱾
ᱼ ᱦᱚᱭ ᱛᱚ ᱦᱮᱡ ᱞᱟᱱᱟᱢ ᱟᱫᱚ ᱪᱮᱫ ᱪᱮᱠᱟ ᱮᱱᱛᱮ ?
ᱼ ᱮ ᱫᱟᱹᱭ ᱩᱱᱡᱷᱚᱜ ᱢᱟ ᱵᱩᱜᱤᱛᱟᱨᱟᱢ ᱠᱟᱹᱢᱤ ᱠᱟᱱ ᱛᱟᱦᱮᱱ ᱮᱠᱥᱯᱨᱮᱥ ᱜᱟᱹᱰᱤ ᱞᱮᱠᱟ ᱢᱤᱫ ᱨᱚᱜᱚᱲ ᱛᱮ ᱾ ᱢᱤᱫ ᱰᱚᱸᱰᱮᱠ ᱦᱚᱸ ᱵᱤᱱ ᱡᱤᱨᱟᱹᱣ ᱫᱩᱲᱩᱵ ᱛᱤᱸᱜᱩ ᱵᱟᱲᱟ ᱠᱟᱛᱮᱱ ᱾ ᱥᱤᱢ ᱠᱚ ᱨᱟᱜ ᱨᱮ ᱵᱮᱨᱮᱫ ᱠᱟᱛᱮ ᱜᱮᱡ ᱜᱩᱨᱤᱡ ᱡᱚᱜ ᱨᱟᱪᱟᱢ ᱮᱦᱚᱵ ᱮᱫ ᱛᱟᱦᱮᱱ ᱾ ᱪᱟᱸᱫᱚ ᱨᱟᱠᱟᱵ ᱥᱟᱶᱛᱮ ᱤᱥᱤᱱ ᱵᱟᱥᱟᱝ ᱦᱚᱸᱢ ᱥᱟᱹᱛ ᱮᱫ ᱛᱟᱦᱮᱱ ᱾ ᱟᱨᱜᱮ ᱥᱟᱹᱲᱤᱢ ᱨᱮ ᱯᱟᱨᱣᱟ ᱠᱚ ᱡᱮᱰᱮᱨ ᱠᱩᱠᱩᱰᱩᱵᱩᱨ ᱵᱟᱲᱟᱭ ᱛᱮᱠᱷᱟᱱ ᱦᱟᱱᱦᱟᱨ ᱢᱮ ᱫᱟᱹᱛᱟᱹᱱᱤᱜ ᱴᱷᱟᱶ ᱨᱮ ᱞᱚᱴᱟ ᱫᱟᱜ ᱮᱢ ᱫᱚᱲᱚᱢ ᱟᱭ ᱠᱟᱱ ᱛᱟᱦᱮᱸᱱ ᱾ ᱦᱩᱛᱩᱢ ᱯᱷᱩᱨᱪᱟᱹ ᱠᱟᱛᱮᱫ ᱵᱟᱹᱥᱭᱟᱹᱢᱚᱜ ᱞᱟᱹᱜᱤᱫ ᱾ ᱤᱠᱷᱟᱹᱱ ᱱᱤᱭᱟᱹ ᱫᱷᱟᱣ ᱢᱟ ᱟᱢ ᱧᱮᱞ ᱛᱮ ᱦᱟᱦᱟᱲᱟ ᱜᱤᱧ ᱵᱩᱡᱷᱟᱹᱣ ᱮᱼᱫᱟ ᱾ ᱟᱢ ᱫᱚᱢ ᱫᱩᱲᱩᱵ ᱜᱤᱰᱤ ᱟᱠᱟᱱᱟ ᱫᱩᱢ ᱫᱩᱢ ᱫᱩᱢᱦᱟᱹ ᱞᱮᱠᱟ ᱾ ᱟᱨ ᱦᱟᱱᱦᱟᱨ ᱢᱮ ᱫᱚ ᱵᱩᱰᱷᱤ ᱦᱚᱲ ᱵᱮᱪᱨᱟ ᱠᱟᱵᱟᱠᱩᱵᱩ ᱪᱷᱩᱴᱟᱹᱣ ᱟᱠᱟᱱᱟᱭ ᱠᱟᱹᱢᱤ ᱨᱮ ᱴᱷᱩᱠᱩᱨ ᱴᱷᱩᱠᱩᱨ ᱾ ᱮ ᱫᱟᱹᱭ ᱪᱮᱫ ᱞᱟᱹᱜᱤᱫ ? ᱪᱮᱫ ᱠᱷᱟᱹᱛᱤᱨ ?
ᱼ ᱟᱢ ᱛᱷᱚᱝᱞᱚᱜ ᱠᱚᱠᱞᱚ ᱨᱚᱛᱚᱱ ᱤᱱᱟᱹᱜ ᱦᱚᱸ ᱵᱟᱢ ᱴᱷᱤᱠᱟᱹ ᱫᱟᱲᱮᱭᱟᱜ ᱠᱟᱱᱟ ᱾ ᱩᱱᱡᱷᱚᱜ ᱫᱚ ᱵᱮᱴᱟ ᱛᱤᱧ ᱠᱚᱞᱮ ᱨᱮ ᱵᱟᱭ ᱛᱟᱦᱮ ᱠᱟᱱᱟ ᱾ ᱱᱤᱛᱚᱝ ᱪᱮ ᱜᱤᱫᱽᱨᱟᱹ ᱢᱮᱥᱟ ᱚᱱᱠᱟ ᱢᱟᱲᱟᱝ ᱞᱮᱠᱟᱧ ᱠᱟᱹᱢᱤ ᱫᱟᱲᱮᱭᱟᱜᱼᱟ ᱾
ᱼ ᱮᱱᱦᱚᱸ ᱛᱚ ᱫᱟᱹᱭ, ᱜᱤᱫᱽᱨᱟᱹ ᱜᱮᱛᱚᱢ ᱥᱟᱵ ᱵᱷᱩᱞᱟᱹᱣ ᱚᱪᱚ ᱮᱭᱟ ᱦᱟᱱᱦᱟᱨ ᱢᱮ ᱾ ᱟᱢ ᱫᱚ ᱫᱟᱲᱮ ᱦᱚᱲ ᱠᱟᱱᱟᱢ ᱾ ᱚᱱᱟ ᱠᱟᱹᱢᱤ ᱠᱚ ᱢᱤᱫ ᱰᱚᱸᱰᱮᱠ ᱠᱷᱟᱱᱮᱢ ᱥᱟᱹᱛ ᱜᱚᱫ ᱠᱟᱜᱼᱟ ᱾ ᱦᱚᱦᱚ ᱟᱢ ᱠᱟᱱᱟᱭ, ᱟᱸᱡᱚᱢ ᱮᱫᱼᱟᱢ ᱾ ᱮᱱᱦᱚᱸ ᱵᱟᱢ ᱜᱚᱝ ᱮ ᱠᱟᱱᱟ ᱾ ᱮ ᱫᱟᱹᱭ ᱪᱮᱫ ᱞᱟᱹᱜᱤᱫ ? ᱪᱮᱫ ᱠᱷᱟᱹᱛᱤᱨ ?
ᱼ ᱳ ᱦᱚ! ᱟᱢ ᱫᱩᱸᱫᱷᱟᱹ ᱵᱟᱹᱵᱩ ᱨᱟᱭ ᱫᱚ ᱮᱱᱟᱝ ᱠᱷᱚᱱ ᱠᱷᱟᱹᱞᱤ ᱛᱮᱲᱮᱫᱜᱷᱚᱲᱮᱫ ᱠᱩᱞᱤ ᱠᱩᱞᱤ ᱛᱮᱢ ᱟᱴᱠᱟᱨ ᱪᱟᱵᱟ ᱚᱪᱚ ᱠᱤᱫᱤᱧᱟ ᱾ ᱪᱮᱫ ᱞᱟᱹᱜᱤᱫ ? ᱪᱮᱫ ᱠᱷᱟᱹᱛᱤᱨ ? ᱢᱮᱱ ᱢᱮᱱ ᱛᱮ ᱾ ᱟᱸᱡᱚᱢ ᱞᱮᱢᱮ ᱫᱤᱞᱟᱹᱭ ᱢᱮᱱ ᱠᱟᱛᱮ ᱞᱩᱛᱩᱨ ᱥᱩᱨ ᱨᱮ ᱠᱷᱟᱭᱠᱷᱭ ᱟᱭᱟᱭ ᱾ ᱢᱮᱱᱟᱭ “ ᱮ ᱨᱚᱛᱚᱱ ᱩᱱ ᱡᱷᱚᱜ ᱫᱚ ᱵᱟᱹᱧ ᱠᱟᱹᱢᱤ ᱠᱷᱟᱱ ᱯᱟᱪᱷᱮ ᱵᱟᱠᱚ ᱠᱩᱥᱤ ᱮᱢᱟᱱᱟᱹᱧᱟ ᱟᱨ ᱱᱚᱣᱟ ᱚᱲᱟᱜ ᱨᱮ ᱵᱟᱠᱚ ᱠᱷᱟᱴᱟᱣ ᱚᱪᱚ ᱟᱹᱧᱟ ᱚᱱᱟ ᱵᱚᱨᱚ ᱵᱚᱛᱚᱨ ᱢᱚᱱᱮ ᱨᱮ ᱛᱟᱦᱮ ᱞᱟᱱᱟ ᱾ ᱦᱟᱱᱦᱟᱨ ᱤᱧ ᱠᱟᱛᱷᱟ ᱠᱟᱛᱷᱟ ᱨᱮ ᱟᱸᱡᱚᱢ ᱦᱩᱥᱤᱭᱟᱹᱨ ᱚᱪᱚ ᱤᱧᱟᱭ ᱾ ᱢᱮᱱ ᱟᱭ “ᱫᱟᱠᱟ ᱠᱷᱟᱱ ᱥᱟᱥᱛᱟ ᱠᱟᱹᱦᱩ ᱾ ᱫᱟᱲᱮ ᱠᱷᱟᱱ ᱥᱟᱥᱛᱟ ᱵᱟᱹᱦᱩ” ᱾ ᱩᱱ ᱚᱠᱛᱚ ᱟᱢ ᱛᱮᱧᱟᱝ ᱟᱜ ᱨᱚᱡᱽᱜᱟᱨ ᱦᱚᱸ ᱵᱟᱝ ᱛᱟᱦᱮᱸ ᱠᱟᱱᱟ ᱾ ᱱᱤᱛᱚᱝ ᱢᱟ ᱟᱢ ᱛᱮᱧᱟᱝ ᱪᱟᱣᱠᱤᱫᱟᱨ [ᱣᱟᱪᱢᱮᱱ] ᱱᱩᱠᱨᱤ ᱧᱟᱢ ᱟᱠᱟᱫᱟᱭ ᱾ ᱟᱨ ᱜᱮ ᱨᱮᱦᱮᱫ ᱥᱮᱸᱫᱮᱡ ᱜᱟᱹᱰᱤᱭᱟᱹᱣ ᱫᱚᱲᱦᱚ ᱠᱟᱛᱮ ᱫᱟᱨᱮ ᱰᱟᱹᱨ ᱥᱟᱠᱟᱢ ᱥᱚᱸᱫᱷᱮ ᱨᱮ ᱵᱟᱦᱟ ᱡᱚ ᱥᱟᱵ ᱮᱱ ᱞᱮᱠᱟ ᱠᱚᱞᱮᱨᱮ ᱵᱮᱴᱟ ᱛᱤᱧ ᱢᱮᱱᱟᱭᱟ ᱾ ᱱᱤᱛᱚᱝ ᱤᱧ ᱵᱟᱹᱜᱤ ᱵᱷᱟᱜᱟᱣ ᱢᱟ ᱟᱹᱰᱤ ᱥᱟᱺᱜᱤᱧ ᱨᱮᱱᱟᱜ ᱠᱟᱛᱷᱟ ᱾ ᱱᱚᱣᱟ ᱚᱲᱟᱜ ᱠᱷᱚᱱ ᱚᱪᱚᱜ ᱥᱟᱦᱟ ᱤᱧ ᱞᱟᱹᱜᱤᱫ ᱡᱚᱴᱮᱫ ᱦᱚᱸ ᱵᱟᱠᱚ ᱡᱚᱴᱮᱫ ᱵᱤᱰᱟᱹᱣ ᱫᱟᱲᱮ ᱟᱹᱧᱟ ᱚᱠᱚᱭ ? ᱤᱧᱟᱜ ᱠᱩᱥᱤ ᱠᱟᱹᱢᱤ ᱨᱮᱦᱚᱸᱧ ᱟᱨ ᱵᱟᱹᱧ ᱠᱟᱹᱢᱤ ᱨᱮᱦᱚᱸ ᱾
ᱼ ᱳ …ᱹᱹᱹ ᱦᱚ! ᱚᱱᱠᱟ ᱟᱞᱚᱢ ᱢᱮᱱᱟ ᱫᱟᱹᱭ ᱾ ᱡᱟᱦᱟᱸ ᱛᱤᱱᱟᱜ ᱨᱮᱦᱚᱸ ᱦᱟᱱᱦᱟᱨ ᱢᱮ ᱫᱚ ᱢᱟᱨᱟᱝ ᱦᱚᱲ ᱠᱟᱱᱟᱭ ᱾ ᱟᱢ ᱥᱩᱫᱷᱨᱟᱹᱣ ᱵᱩᱡᱷᱟᱹᱣ ᱞᱟᱹᱜᱤᱫ ᱵᱟᱨᱯᱚᱫᱽ ᱪᱮᱫ ᱠᱟᱛᱷᱟᱭ ᱢᱮᱛᱟᱫ ᱢᱮᱠᱷᱟᱱ ᱚᱱᱟᱢ ᱦᱟᱞᱟ ᱨᱩᱣᱟᱹᱲ ᱮ ᱠᱟᱱᱟ ᱵᱟᱝ? ᱦᱟᱸᱰᱮᱱᱤᱡ ᱟᱵᱚ ᱟᱭᱳ ᱟᱢᱟᱜ ᱵᱮᱥ ᱟᱨ ᱵᱷᱟᱹᱜᱤ ᱞᱟᱹᱜᱤᱫ ᱢᱤᱫ ᱜᱤᱫᱽᱨᱟᱹ ᱠᱷᱚᱱ ᱛᱤᱱᱟᱹᱜ ᱮ ᱮᱜᱮᱨ, ᱨᱩᱦᱤᱫ, ᱫᱟᱞᱛᱚᱞ, ᱪᱮᱴᱟᱜ ᱟᱠᱟᱫ ᱢᱮᱭᱟ ᱾ ᱟᱫᱚ ᱪᱮᱫ ᱮᱢ ᱦᱟᱞᱟ ᱨᱩᱣᱟᱹᱲ ᱟᱠᱟᱫᱮᱭᱟ ᱦᱟᱸ? ᱟᱨᱮ, ᱦᱟᱱᱦᱟᱨ ᱢᱮ ᱦᱚᱯᱚᱱ ᱡᱟᱱᱟᱢ ᱠᱟᱛᱮ ᱦᱟᱨᱟᱵᱩᱨᱩ ᱞᱮᱫᱮᱭᱟᱭ ᱢᱮᱱᱛᱮ ᱜᱮᱥᱮ ᱛᱮᱦᱮᱧ ᱱᱚᱣᱟ ᱚᱲᱟᱜ ᱨᱮᱢ ᱚᱰᱚᱠ ᱵᱚᱞᱚᱱ ᱠᱟᱱᱟ ᱞᱤᱥᱚᱭ ᱞᱚᱥᱤᱭ ᱫᱩᱸᱫᱷᱤ ᱾ ᱤᱱᱟᱹᱜ ᱦᱚᱸ ᱵᱟᱢ ᱴᱷᱤᱠᱟᱹ ᱫᱟᱲᱮᱭᱟᱜ ᱠᱟᱱᱟ ᱾ ᱤᱧ ᱜᱮᱢ ᱢᱮᱛᱟᱧ ᱠᱟᱱᱟ ᱠᱷᱟᱹᱞᱤ ᱛᱷᱚᱝᱞᱚᱜ ᱠᱚᱠᱞᱚᱹ ᱫᱩᱸᱫᱷᱟᱹ ᱾
ᱴᱷᱤᱠ ᱩᱱ ᱡᱷᱚᱜ ᱨᱚᱛᱚᱱ ᱟᱡ ᱛᱮᱧᱟᱝ ᱧᱤᱫᱟᱹ ᱥᱤᱯᱷᱴ ᱰᱤᱣᱩᱴᱤ ᱪᱟᱵᱟ ᱠᱟᱛᱮ ᱚᱲᱟᱜ ᱥᱮᱴᱮᱨᱚᱜᱼᱟᱭ ᱾ ᱯᱤᱸᱰᱟᱹ ᱴᱷᱮᱱ ᱥᱟᱭᱠᱮᱞ ᱴᱮᱸᱰᱟᱨ ᱜᱚᱫ ᱠᱟᱛᱮ ᱫᱩᱣᱟᱹᱨ ᱨᱮ ᱪᱟᱹᱴᱠᱤ ᱛᱩᱛᱩᱫ ᱛᱩᱞᱩᱡ ᱢᱮᱱᱟᱭ “ᱟᱭᱳ ᱩᱱᱟᱜ ᱜᱟᱨᱟᱜ ᱜᱟᱨᱟᱜ ᱮ ᱦᱚᱦᱚ ᱟᱢ ᱠᱟᱱ ᱫᱚ ᱾ ᱵᱟᱢ ᱟᱸᱡᱚᱢ ᱮᱫᱼᱟ ᱥᱮ ᱪᱮᱫ? ᱪᱮ ᱯᱟᱪᱷᱮ ᱞᱩᱛᱩᱨ ᱛᱟᱢ ᱤᱬᱜᱩᱫ ᱛᱮ ᱛᱮᱯᱮᱫ ᱤᱞᱟᱹᱫ ᱥᱟᱭ ᱟᱠᱟᱱᱟ ᱾ ᱫᱮᱥᱮ ᱛᱚᱵᱮ ᱫᱩᱲᱩᱭ ᱫᱩᱲᱩᱭ ᱞᱚᱞᱚ ᱫᱟᱜ ᱫᱩᱞ ᱠᱟᱛᱮᱧ ᱥᱟᱯᱷᱟ ᱯᱷᱩᱨᱪᱟᱹ ᱧᱚᱜ ᱠᱟᱢᱟ ᱾ ᱨᱚᱛᱚᱱ ᱟᱡ ᱛᱮᱧᱟᱝ ᱱᱚᱝᱠᱟ ᱪᱮᱴᱟᱜ ᱟᱫᱮ ᱞᱮᱠᱟ ᱵᱷᱟᱫᱮᱥ ᱟᱫᱮ ᱠᱷᱟᱱ ᱨᱚᱛᱚᱱ ᱟᱡ ᱫᱟᱹᱭ ᱪᱩᱨᱟᱹᱢᱟᱨᱟ ᱫᱩᱲᱩᱵ ᱠᱷᱚᱱ ᱫᱟᱹᱲ ᱵᱮᱨᱮᱫ ᱟᱭ ᱾ ᱨᱚᱲ ᱨᱚᱲ ᱛᱮ “ᱱᱩᱭ ᱜᱤᱫᱽᱨᱟᱹ ᱦᱚᱸ ᱠᱷᱟᱹᱞᱤ ᱤᱧ ᱴᱷᱮᱱ ᱜᱮ ᱤᱧ ᱴᱷᱮᱱ ᱜᱮ ᱪᱮᱛᱟᱛ ᱦᱚᱸ ᱵᱟᱭ ᱠᱟᱹᱢᱤ ᱚᱪᱚ ᱟᱢᱟ” ᱾ ᱮᱱᱠᱷᱚᱱ ᱛᱮ ᱜᱤᱫᱽᱨᱟᱹ ᱫᱚ ᱨᱚᱛᱚᱱ ᱦᱚᱵᱚᱨ ᱚᱴᱚ ᱟᱭ ᱛᱮ ᱜᱚᱲᱟ ᱪᱟᱞᱟᱜ ᱛᱩᱞᱩᱡ ᱢᱮᱱᱟᱭ “ᱦᱚᱭ ᱦᱚᱭ ᱪᱟᱞᱟᱜ ᱠᱟᱱᱟᱧ ᱭᱳ ᱪᱟᱞᱟᱜ ᱠᱟᱱᱟᱧ” ᱾ ᱦᱟᱱᱦᱟᱨ ᱛᱮᱫᱟᱜ ᱛᱤ ᱠᱷᱚᱱ ᱠᱟᱺᱦᱰᱩᱢ ᱪᱷᱟᱰᱟᱣ ᱠᱚᱭ ᱟᱹᱜᱩᱭᱟᱭ ᱟᱨ ᱢᱮᱱᱟᱭ “ ᱫᱟ ᱭᱳ ᱫᱤᱯᱤᱞ ᱟᱹᱧ ᱵᱤᱱ ᱤᱧ ᱜᱮ ᱦᱟᱸᱜ ᱜᱩᱨᱤᱡ ᱫᱚ ᱫᱤᱱ ᱤᱧ ᱜᱤᱰᱤᱭᱟ ᱾ ᱟᱹᱵᱤᱱ ᱫᱚ ᱵᱮᱴᱟ ᱥᱟᱵ ᱵᱷᱩᱞᱟᱹᱣ ᱵᱟᱲᱟ ᱮ ᱵᱤᱱ ᱾
ᱨᱚᱛᱚᱱ ᱟᱡ ᱛᱮᱧᱟᱝ ᱨᱚᱛᱚᱱ ᱞᱟᱹᱭ ᱟᱭᱟᱭ “ᱱᱤᱭᱟᱹ ᱦᱟᱹᱞᱤ ᱟᱢ ᱫᱟᱹᱭ ᱪᱮᱠᱟᱜ ᱠᱟᱱ ᱪᱚᱭ ᱪᱮᱛᱟᱛ ᱠᱟᱹᱢᱤ ᱜᱮ ᱵᱟᱭ ᱧᱮᱞ ᱧᱟᱢᱟ, ᱵᱟᱭ ᱚᱱᱢᱟᱱᱼᱟ ᱾ ᱟᱫᱚ ᱠᱟᱹᱴᱤᱡ ᱪᱟᱨᱱᱟᱣ ᱵᱟᱲᱟ ᱞᱮᱠᱷᱟᱱ ᱡᱚᱛᱚᱣᱟᱜ ᱮ ᱴᱷᱤᱠᱟᱹ ᱜᱚᱫᱟ ᱟᱨ ᱡᱚᱛᱚᱣᱟᱜ ᱜᱮ ᱠᱟᱹᱢᱤᱭᱟᱭ” ᱾ ᱮᱱᱠᱷᱟᱱ ᱨᱚᱛᱚᱱ ᱢᱮᱱᱟᱭ “ᱮ ᱛᱮᱧᱟᱝ ᱤᱧ ᱫᱟᱹᱭ ᱫᱚ ᱢᱚᱱᱮᱨᱮ ᱜᱚᱨᱚᱵᱽ ᱫᱷᱚᱢᱚᱠ ᱟᱡᱟᱨ ᱛᱟᱹᱯᱩᱜ ᱵᱟᱥᱟ ᱟᱠᱟ ᱦᱟᱫᱮᱭᱟ ᱾ ᱟᱡᱟᱜ ᱜᱟᱯᱟᱞ ᱢᱟᱨᱟᱣ ᱠᱷᱚᱱᱤᱧ ᱛᱩᱱᱩᱢ ᱧᱟᱢ ᱟᱠᱟᱫᱼᱟ ᱾ ᱟᱫᱩᱧ ᱵᱩᱡᱷᱟᱹᱣ ᱵᱟᱲᱟ ᱟᱠᱟᱫ ᱫᱮᱭᱟ ᱦᱟᱸᱜ ᱾ ᱟᱨ ᱟᱢ ᱦᱚᱸ ᱛᱮᱧᱟᱝ ᱛᱟᱞᱟᱨᱮ ᱛᱟᱞᱟᱨᱮ ᱢᱤᱫ ᱵᱟᱨ ᱯᱟᱱ ᱨᱟᱱ ᱢᱟ ᱱᱚᱝᱠᱟ ᱨᱚᱲ ᱵᱷᱟᱫᱮᱥ ᱠᱟᱛᱮᱢ ᱯᱟᱲᱟᱣ ᱟᱭ ᱠᱟᱱ ᱜᱮᱭᱟ ᱾ ᱟᱸᱥ ᱛᱤᱧ ᱞᱟᱜᱮ ᱜᱮᱦᱟᱸᱜ ᱵᱮᱥ ᱠᱟᱛᱮ ᱵᱚᱫᱚᱞ ᱨᱩᱣᱟᱹᱲᱚᱜ ᱟᱭ ᱢᱟᱲᱟᱝ ᱞᱮᱠᱟ ᱩᱛᱟᱹᱨ ᱾ ᱟᱡ ᱛᱮᱧᱟᱝ ᱢᱮᱱ ᱜᱚᱫᱟᱭ “ ᱟᱪᱷᱟ, ᱟᱪᱷᱟ! ᱛᱚᱵᱮ ᱟᱢ ᱦᱚᱸᱢ ᱯᱚᱨᱚᱠ ᱟᱠᱟᱫ ᱫᱮᱭᱟ ᱟᱢ ᱫᱟᱹᱭ ᱫᱚ”᱾
ᱨᱚᱛᱚᱱ ᱫᱚ ᱢᱚᱱᱮ ᱢᱚᱱᱮ ᱛᱮ ᱜᱩᱱᱤ ᱵᱷᱟᱹᱵᱤᱛ ᱛᱩᱞᱟᱹ ᱡᱚᱠᱷᱟᱭᱟᱭ ᱟᱡ ᱥᱟᱢᱟᱝ ᱨᱮ ᱟᱡ ᱫᱟᱹᱭ ᱟᱜ ᱛᱟᱹᱨᱩᱵ ᱞᱮᱠᱟᱱ ᱦᱩᱸᱠᱨᱟᱹᱣ ᱨᱚᱲ ᱾ ᱟᱨ ᱟᱡ ᱛᱮᱧᱟᱝ ᱥᱟᱢᱟᱝ ᱨᱮ ᱠᱷᱟᱱ ᱫᱚ ᱵᱚᱞᱟᱣ ᱢᱤᱨᱩ ᱞᱮᱠᱟᱱ ᱞᱤᱴᱷᱩᱨ ᱠᱮᱱᱮᱠᱚᱛᱮ ᱟᱲᱟᱝ ᱾ ᱟᱸᱡᱚᱢ ᱠᱟᱛᱮ ᱢᱟ ᱵᱷᱟᱹᱲᱩᱢᱵᱷᱟᱜ ᱪᱟᱵᱟᱜ ᱟᱭ ᱾ ᱴᱷᱟᱶ ᱡᱟᱭᱜᱟ ᱡᱟᱹᱱᱤ ᱨᱟᱭ ᱠᱟᱠᱟᱲᱵᱟᱝ ᱥᱟᱸᱜᱮᱥᱟᱝ ᱦᱚᱲᱢᱚ ᱨᱮᱱᱟᱜ ᱨᱚᱝ ᱵᱚᱫᱚᱞ ᱠᱟᱛᱷᱟᱭ ᱩᱭᱦᱟᱹᱨ ᱜᱚᱫᱟ ᱾ ᱥᱟᱶᱛᱮ ᱟᱨᱦᱚᱸᱭ ᱩᱭᱦᱟᱹᱨ ᱧᱟᱢᱟ ᱮᱴᱟᱜ ᱦᱚᱲ ᱨᱤᱱ ᱦᱚᱯᱚᱱ ᱮᱨᱟ ᱡᱟᱦᱟᱸ ᱛᱤᱱᱟᱹᱜ ᱠᱩᱨᱩᱢᱩᱴᱩ ᱨᱤᱠᱟᱹᱭ ᱨᱮᱦᱚᱸ “ᱜᱷᱟᱨᱚᱸᱡᱽ” ᱨᱮᱱᱟᱜ ᱫᱩᱯᱩᱞᱟᱹᱲ ᱥᱟᱹᱜᱟᱹᱭ ᱵᱟᱭ ᱦᱮᱣᱮᱨ, ᱦᱮᱞᱣᱮᱫ, ᱠᱟᱥᱟ ᱫᱟᱲᱮᱭᱟᱜᱼᱟ ᱾ ᱪᱮ ᱥᱤᱯᱤᱵᱤᱞ ᱥᱚᱦᱟᱜᱽ ᱦᱚᱸ ᱵᱟᱭ ᱥᱤᱠᱤᱲ, ᱥᱟᱵᱟᱜ, ᱥᱤᱴᱷᱟᱹ ᱫᱟᱲᱮᱭᱟᱜᱼᱟ ᱾ ᱡᱩᱫᱤ ᱚᱲᱟᱜ ᱨᱤᱱ ᱦᱚᱯᱚᱱ ᱧᱮᱞ ᱠᱟᱛᱮ ᱵᱟᱰᱟᱭ ᱵᱩᱡᱷᱟᱹᱣ ᱴᱷᱤᱠᱟᱹ ᱫᱟᱲᱮᱭᱟᱭ ᱚᱠᱟ ᱫᱚ ᱵᱩᱜᱤ ᱟᱨ ᱚᱠᱟ ᱫᱚ ᱵᱟᱹᱲᱤᱡ ᱦᱩᱭᱩᱜ ᱠᱟᱱᱟ ᱜᱷᱟᱨᱚᱸᱡᱽ ᱨᱮ ᱾ ᱟᱨ ᱵᱷᱩᱞ ᱟᱜ ᱮᱨᱮᱲ ᱦᱮᱥᱮ ᱜᱤᱰᱤ ᱠᱟᱛᱮ ᱴᱷᱤᱠ ᱟᱜ ᱟᱯᱱᱟᱨ ᱠᱷᱟᱱ ᱜᱮ ᱜᱷᱟᱨᱚᱸᱡᱽ ᱨᱮ ᱥᱩᱠ ᱥᱟᱹᱱᱛᱤ ᱛᱷᱟᱯᱚᱱᱚᱜᱼᱟ ᱾ ᱱᱚᱛᱮ ᱦᱟᱦᱟᱲᱟ ᱛᱮ ᱨᱚᱛᱚᱱᱟᱜ ᱢᱮᱫ ᱠᱚᱠᱚᱨ ᱞᱮᱠᱟ ᱢᱟᱨᱟᱝ ᱢᱟᱨᱟᱝ ᱞᱟᱸᱰᱟᱞᱩᱸᱰᱩ ᱠᱚᱜ ᱥᱟᱶᱛᱮ ᱢᱚᱪᱟ ᱦᱚᱸ ᱴᱚᱨᱚᱰᱟᱝ ᱞᱮᱠᱟ ᱪᱟᱦᱟᱵ ᱵᱷᱟᱲᱚ ᱠᱚᱜᱼᱟ ᱾ ᱦᱚᱵᱚᱨ ᱟᱠᱟᱫᱮ ᱵᱷᱚᱬᱡᱟ ᱜᱤᱫᱽᱨᱟᱹ ᱟᱜ ᱛᱤ ᱠᱟᱹᱴᱩᱵ ᱛᱮ ᱞᱩᱴᱤ ᱨᱮ ᱛᱷᱟᱯᱟ ᱴᱷᱮᱵ ᱵᱟᱡᱟᱣ ᱮᱱᱠᱷᱟᱱᱮ ᱵᱷᱮᱭᱟᱬᱚᱜ ᱥᱟᱶᱛᱮ ᱢᱚᱪᱟ ᱵᱷᱤᱲᱟᱹᱣ ᱜᱚᱫᱟᱭ ᱾
***
