ᱫᱤᱱᱟᱹᱢ ᱠᱷᱚᱵᱚᱨ ᱠᱟᱜᱚᱡᱽ ᱨᱮ
ᱟᱨ ᱵᱟᱝᱠᱷᱟᱱ ᱧᱮᱞᱟᱢ ᱧᱮᱱᱮᱞᱚᱢ ᱠᱷᱚᱵᱚᱨ ᱪᱮᱱᱮᱞ ᱨᱮ,
ᱛᱤᱱᱟᱹᱜ ᱞᱮᱠᱟᱱ ᱱᱤᱨᱜᱷᱤᱱ ᱱᱟᱦᱟᱪᱟᱨ
ᱛᱤᱨᱞᱟᱹ ᱪᱮᱛᱟᱱ ᱨᱮ ᱾
ᱦᱮᱸᱦᱮᱸᱞᱳᱜ ᱫᱚ ᱵᱟᱝᱼᱟ ᱛᱟᱦᱮᱸᱱ ᱦᱩᱭᱩᱜ ᱪᱤᱨᱜᱟᱹᱞ,
ᱟᱢ ᱞᱟᱹᱜᱤᱫ ᱛᱮᱫᱚ ᱛᱤᱨᱞᱟᱹ ᱵᱟᱹᱱᱩᱜ ᱟᱱᱟᱝ ᱯᱷᱩᱨᱜᱟᱹᱞ ᱾
ᱪᱤᱠᱟᱹᱢ ᱩᱭᱦᱟᱹᱨ ᱥᱟᱺᱜᱤᱧ ᱛᱟᱲᱟᱢ__
ᱪᱤᱠᱟᱹᱢ ᱫᱟᱬᱟᱱ ᱡᱷᱟᱹᱞ ?
ᱦᱚᱲᱢᱚ ᱛᱟᱞᱟ ᱨᱩᱢᱩᱭ ᱪᱳᱢᱳᱞ ᱵᱚᱛᱚᱨ ᱜᱮᱪᱚ ᱵᱟᱛᱞᱟᱜ,
ᱦᱚᱨ ᱵᱤᱨᱛᱮ ᱛᱟᱲᱟᱢ ᱵᱟᱲᱟ ᱢᱚᱱᱮ ᱛᱮᱫᱚᱢ ᱮᱠᱞᱟᱜ ᱾
ᱚᱲᱟᱜ ᱠᱷᱚᱱ ᱫᱚ ᱵᱟᱦᱮᱨ ᱠᱟᱛᱮ__
ᱚᱠᱟ ᱟᱫᱚᱢ ᱪᱟᱞᱟᱜ ?
ᱥᱤᱵᱚᱲ ᱥᱟᱲᱜᱚᱢ ᱢᱟᱹᱱ ᱢᱚᱦᱚᱛ,
ᱛᱟᱲᱟᱢ ᱯᱤᱪᱷᱩ ᱦᱟᱲᱟᱜ ᱛᱚᱦᱚᱫ ᱾
ᱡᱟᱦᱟᱸ ᱛᱤᱱᱟᱹᱜ ᱮᱢ ᱦᱚᱦᱚᱭ ᱨᱮᱦᱚᱸ___
ᱵᱟᱝ ᱮᱢ ᱧᱟᱢᱟ ᱥᱚᱦᱚᱫ ᱾
ᱥᱮᱫᱟᱭ ᱢᱟᱛᱚ ᱛᱟᱦᱮᱸ ᱛᱟᱦᱮᱸ ᱠᱟᱱᱟᱢ ᱥᱤᱧ ᱮᱥᱮᱫ ᱯᱚᱴᱚᱢ,
ᱛᱮᱦᱮᱧ ᱢᱟᱛᱚ ᱢᱟᱹᱱ ᱢᱚᱦᱚᱛ ᱛᱟᱢ ᱫᱚ ᱥᱚᱞᱚᱢ ᱞᱚᱴᱚᱢ ᱾
ᱟᱹᱱᱟᱹᱲᱤ ᱦᱚᱨ ᱛᱮ ᱪᱤᱠᱟᱹᱢ ᱛᱟᱲᱟᱢ___
ᱡᱟᱱᱚᱣᱟ ᱫᱚᱠᱚ ᱡᱚᱡᱚᱢ ᱾
ᱦᱮᱰᱮᱡ ᱨᱟᱠᱟᱵ ᱚᱱᱛᱚᱨ ᱥᱟᱱᱟᱢ,
ᱢᱤᱪᱷᱟᱹᱜ ᱠᱟᱱᱟ ᱛᱤᱨᱞᱟᱹ ᱡᱟᱱᱟᱢ ᱾
ᱥᱟᱹᱜᱟᱹᱭ ᱵᱟᱹᱱᱩᱜ ᱪᱤᱯᱤᱱᱟᱹᱣ ᱵᱟᱹᱱᱩᱜ___
ᱟᱢ ᱫᱚ ᱚᱠᱚᱭ ᱠᱟᱱᱟᱢ ᱾
ᱢᱟᱱᱚᱣᱟ ᱪᱤᱱᱛᱮ ᱡᱟᱱᱣᱟ ᱡᱷᱚᱛᱚ,
ᱡᱚᱡᱚᱢ ᱠᱟᱱᱼᱠᱚ ᱱᱩᱠᱩ ᱜᱮᱛᱚ ᱾
ᱪᱤᱠᱟᱹ ᱠᱟᱛᱮᱢ ᱴᱮᱠᱟᱣ ᱫᱟᱨᱟᱢ___
ᱡᱩᱜᱩᱫ ᱛᱟᱦᱮᱸᱱ ᱨᱮᱛᱚ ᱾
ᱫᱤᱥᱚᱢ ᱛᱟᱞᱟ ᱨᱮ ᱵᱟᱹᱱᱩᱜ ᱟᱱ ᱱᱤᱨᱟᱹᱭ,
ᱵᱟᱹᱲᱛᱤᱜ ᱠᱟᱱᱟ ᱥᱤᱵᱚᱲᱤᱭᱟᱹ ᱟᱜ ᱠᱟᱹᱭ ᱾
ᱞᱟᱞᱚᱪᱤᱭᱟᱹ ᱞᱟᱞᱚᱪ ᱢᱚᱱᱮ ᱠᱷᱚᱱ ᱫᱚ___
ᱪᱤᱠᱟᱹᱢ ᱧᱟᱢ ᱨᱤᱦᱟᱹᱭ ?
ᱞᱳᱥᱳ ᱯᱳᱸᱰᱳ ᱚᱲᱮᱡ ᱮᱱ ᱞᱩᱜᱽᱲᱤ,
ᱠᱮᱫᱮᱫ ᱮᱱᱛᱟᱢ ᱥᱟᱹᱜᱩᱱ ᱯᱟᱹᱣᱲᱤ ᱾
ᱦᱚᱲ ᱠᱚ ᱠᱚᱭᱚᱜᱽ ᱞᱟᱡᱟᱣ ᱯᱟᱠᱟᱲ__
ᱫᱩᱱᱭᱟᱹ ᱫᱚ ᱛᱟᱢ ᱟᱹᱱᱟᱹᱲᱤ ᱾
ᱵᱷᱤᱛᱟᱹᱨ ᱚᱱᱛᱚᱨ ᱦᱚᱸᱛᱚ ᱦᱟᱦᱟᱠᱟᱨ,
ᱡᱤᱭᱚᱱ ᱡᱟᱹᱛᱤ ᱡᱷᱚᱛᱚ ᱡᱟᱨ ᱠᱷᱟᱨ ᱾
ᱥᱩᱸᱭᱟᱹ ᱥᱤᱸᱰᱟᱹᱝ ᱠᱩᱪᱤᱛ ᱢᱚᱱᱮ__
ᱚᱠᱚᱭ ᱜᱮᱵᱟᱭ ᱚᱣᱟᱨ ?
ᱪᱤᱠᱟᱹᱢ ᱫᱟᱬᱟᱱ ᱨᱤᱞᱤ ᱯᱷᱤᱞᱤ,
ᱮᱰᱟᱣ ᱯᱮᱨᱮᱡ ᱪᱷᱟᱸᱫᱟ ᱡᱷᱟᱹᱞᱤ
ᱯᱟᱴᱷᱮ ᱠᱟᱛᱮᱢ ᱞᱟᱦᱟᱜ ᱨᱮᱫᱚ__
ᱡᱟᱸᱜᱮ ᱜᱮ ᱩᱛᱟᱹᱦᱩᱞᱤ ᱾
ᱤᱥᱠᱩᱞ ᱠᱚᱞᱮᱡᱽ ᱚᱯᱷᱤᱥ ᱟᱫᱟᱞᱚᱛ,
ᱛᱤᱨᱞᱟᱹ ᱠᱚᱣᱟᱜ ᱢᱤᱫ ᱜᱮ ᱦᱟᱞᱚᱛ,
ᱵᱟᱹᱱᱩᱜ ᱥᱚᱦᱚᱫ ᱵᱟᱹᱱᱩᱜ ᱟᱱ ᱱᱤᱨᱟᱹᱭ___
ᱵᱟᱱᱩᱜᱼᱟ ᱯᱟᱨᱟᱝᱜᱚᱛ ᱾
ᱢᱟᱬᱟᱝ ᱟᱠᱟᱱ ᱠᱚ ᱥᱚᱥᱱᱚᱜ ᱡᱟᱹᱛᱤ,
ᱫᱷᱚᱨᱟᱣ ᱟᱠᱟᱫ ᱠᱚ ᱢᱟᱨᱥᱟᱞ ᱵᱟᱹᱛᱤ ᱾
ᱩᱠᱩ ᱫᱟᱱᱟᱝ ᱨᱮᱫᱚ ᱡᱷᱚᱛᱚᱢ___
ᱥᱟᱶᱛᱟ ᱡᱚᱡᱚᱢ ᱦᱩᱛᱤ ᱾
ᱫᱟᱹᱭᱤ ᱫᱚ ᱚᱠᱚᱭ ᱛᱮᱦᱮᱧ ᱱᱚᱣᱟ ᱨᱮ ?
ᱪᱮᱫ ᱵᱚ ᱠᱷᱚᱡᱟ ᱥᱚᱥᱱᱚᱜ ᱥᱟᱶᱛᱟ ᱨᱮ ?
ᱵᱩᱦᱤᱱ ᱞᱮᱠᱟᱱ ᱢᱚᱱ ᱟᱭᱳ ᱞᱮᱠᱟᱱ ᱫᱷᱚᱱ___
ᱛᱤᱨᱞᱟᱹ ᱛᱮᱦᱮᱧ ᱚᱠᱟᱻᱨᱮ ?
***
