ᱩᱭᱦᱟᱹᱨ

ᱠᱟᱹᱴᱤᱡ ᱜᱤᱫᱟᱹᱨ ᱫᱚᱭ ᱩᱭᱦᱟᱹᱨ ᱡᱚᱝ ᱠᱟᱱ,
ᱵᱟᱵᱟ ᱪᱮᱫ ᱡᱚᱢᱟᱜ ᱮ ᱟᱹᱜᱩᱣᱟᱹᱧ,
ᱞᱟᱡ ᱯᱮᱨᱮᱡ ᱤᱧ ᱡᱚᱢ ᱡᱚᱝᱟ ᱿

ᱞᱟᱹᱴᱩ ᱜᱤᱫᱽᱨᱟᱹ ᱫᱚᱭ ᱩᱭᱦᱟᱹᱨ ᱡᱚᱝ ᱠᱟᱱ,
ᱜᱟᱯᱟ ᱯᱩᱨᱤᱠᱷᱟ ᱨᱮ ᱪᱮᱫ ᱤᱧ ᱚᱞᱟ,
ᱡᱟᱛᱮ ᱫᱤᱥᱚᱢ ᱨᱮ ᱧᱩᱛᱩᱢ ᱤᱧ ᱦᱟᱹᱨ ᱡᱚᱝ ᱿

ᱡᱩᱣᱟᱹᱱ ᱦᱚᱲ ᱫᱚᱭ ᱩᱭᱦᱟᱹᱨ ᱡᱚᱝ ᱠᱟᱱ,
ᱜᱟᱯᱟ ᱚᱠᱟ ᱨᱤᱧ ᱠᱟᱹᱢᱤ ᱱᱟᱞᱦᱟᱭ,
ᱵᱟᱨ ᱵᱮᱲᱟ ᱡᱚᱢ ᱟᱨ ᱞᱟᱡ ᱟᱹᱥᱩᱞᱚᱜ ᱞᱟᱹᱜᱤᱫ ᱿

ᱦᱟᱲᱟᱢ ᱦᱚᱲ ᱫᱚᱲ ᱫᱚᱭ ᱩᱭᱦᱟᱹᱨ ᱡᱚᱝ ᱠᱟᱱ,
ᱦᱚᱱ ᱠᱤᱢᱤᱱ ᱵᱟᱲᱮ ᱱᱟᱯᱟᱭ ᱨᱮᱠᱚ ᱛᱟᱸᱦᱮᱱ ᱢᱟ,
ᱵᱟᱨ ᱠᱟᱛᱷᱟ ᱥᱤᱵᱤᱞ ᱟᱲᱟᱝ ᱛᱮᱠᱚ ᱨᱚᱲ ᱥᱟᱰᱮᱭᱟᱹᱧ ᱢᱟ ᱿

ᱰᱟᱺᱜᱣᱟᱹ ᱢᱚᱱᱮ ᱫᱚᱭ ᱩᱭᱦᱟᱹᱨ ᱡᱚᱝ ᱠᱟᱱ,
ᱫᱩᱞᱟᱹᱲᱤᱭᱟᱹ ᱥᱟᱶ ᱨᱚᱯᱚᱲ ᱞᱟᱸᱫᱟ ᱠᱟᱛᱷᱟ,
ᱡᱤᱣᱤ ᱯᱮᱨᱮᱡ ᱮᱯᱮᱢ ᱪᱟᱯᱟᱞ ᱠᱟᱛᱷᱟ ᱿

ᱮᱸᱜᱟᱛ ᱢᱚᱱᱮ ᱫᱚᱭ ᱩᱭᱦᱟᱹᱨ ᱡᱚᱝ ᱠᱟᱱ,
ᱜᱤᱫᱽᱹᱨᱟ ᱞᱟᱹᱜᱤᱫ ᱪᱮᱫ ᱤᱧ ᱤᱥᱤᱱ ᱵᱟᱥᱟᱝ,
ᱡᱟᱛᱮ ᱜᱤᱫᱽᱨᱟᱹᱭ ᱨᱟᱹᱥᱠᱟᱹ ᱜᱚᱫᱚᱜ ᱿

ᱟᱯᱟᱛ ᱛᱮᱫ ᱫᱚᱭ ᱩᱭᱦᱟᱹᱨ ᱡᱚᱝ ᱠᱟᱱ,
ᱴᱟᱠᱟ ᱟᱨ ᱵᱟᱹᱲᱛᱤ ᱪᱮᱠᱟᱹᱧ ᱠᱟᱢᱟᱣ,
ᱮᱨᱟᱼᱦᱚᱯᱚᱱᱮᱨᱟ ᱞᱟᱹᱜᱤᱫ ᱦᱚᱨᱚᱜ ᱵᱟᱸᱫᱮᱧ ᱥᱟᱡᱟᱣ ᱿

ᱦᱚᱯᱚᱱ ᱛᱮᱫ ᱫᱚᱭ ᱩᱭᱦᱟᱹᱨ ᱡᱚᱝ ᱠᱟᱱ,
ᱵᱟᱵᱟ ᱴᱷᱮᱱ ᱠᱷᱚᱱ ᱪᱮᱠᱟ ᱴᱟᱠᱟᱹᱧ ᱦᱟᱛᱟᱣ,
ᱵᱟᱵᱟ ᱟᱜ ᱴᱟᱠᱟ ᱛᱮ ᱜᱟᱹᱰᱤᱧ ᱦᱟᱛᱟᱣ ᱿

ᱵᱤᱴᱤ ᱛᱟᱭ ᱫᱚᱭ ᱩᱭᱦᱟᱹᱨ ᱡᱚᱝ ᱠᱟᱱ,
ᱦᱤᱡᱩᱜ ᱯᱟᱜᱟᱨ ᱥᱮᱴᱮᱨ ᱵᱮᱲᱟ ᱛᱮ,
ᱫᱟᱨᱟᱭ ᱯᱟᱨᱟᱵᱽ ᱞᱟᱹᱜᱤᱫ ᱥᱟᱡᱽ ᱜᱚᱦᱱᱟᱹᱧ ᱦᱟᱛᱟᱣ ᱿

ᱞᱟᱹᱠᱛᱤ ᱡᱟᱹᱱᱤᱡ ᱩᱭᱦᱟᱹᱨ ᱜᱟᱵᱟᱱ ᱤᱫᱤᱜ
ᱚᱠᱛᱚ ᱡᱟᱹᱱᱤᱡ ᱩᱭᱦᱟᱹᱨ ᱯᱷᱮᱨᱟᱣ ᱤᱫᱤᱜ,
ᱦᱚᱲ ᱡᱟᱹᱱᱤᱡ ᱩᱭᱦᱟᱹᱨ ᱵᱚᱫᱚᱞ ᱤᱫᱤᱜ ᱿

ᱩᱭᱦᱟᱹᱨ ᱨᱮᱱᱟᱝ ᱜᱚᱱᱚᱝ ᱵᱟᱹᱱᱩᱜ,
ᱩᱭᱦᱟᱹᱨ ᱨᱮᱱᱟᱝ ᱢᱩᱪᱟᱹᱫ ᱵᱟᱹᱱᱩᱜ,
ᱩᱭᱦᱟᱹᱨ ᱩᱭᱦᱟᱹᱨ ᱛᱮᱜᱮ ᱡᱤᱣᱤ ᱢᱩᱪᱟᱹᱫᱚᱜ ᱿

***