ᱮᱴᱟᱜ ᱚᱲᱟᱜ ᱥᱚᱵᱷᱟᱜ ᱞᱟᱹᱜᱤᱫ ᱜᱮ
ᱢᱤᱨᱛᱤᱠᱟ ᱨᱮ ᱠᱩᱲᱤ ᱦᱚᱯᱚᱱ ᱡᱟᱱᱟᱢ ᱫᱚ
ᱥᱟᱶᱛᱟ ᱟᱹᱨᱤᱪᱟᱹᱞᱤ ᱨᱮ ᱢᱮᱱᱟᱜ ᱟᱵᱚᱣᱟᱜ
ᱥᱮᱫᱟᱭ ᱠᱷᱚᱱ ᱜᱮ ᱱᱚᱶᱟ ᱵᱤᱫᱷᱟᱹᱱ ᱫᱚ ᱾
ᱥᱟᱠᱚᱢ ᱥᱤᱸᱫᱩᱨ ᱛᱮᱠᱚ ᱵᱟᱹᱱᱤᱡ ᱤᱫᱤ ᱠᱤᱫᱤᱧ
ᱥᱟᱶᱛᱮ ᱢᱟ.ᱡᱷᱤ ᱢᱚᱲᱮ ᱥᱟᱹᱠᱷᱤ ᱥᱚᱵᱷᱟ ᱠᱟᱛᱮ
ᱵᱮᱱᱟᱣ ᱟᱹᱱᱟᱹᱧ ᱛᱮᱦᱮᱧ ᱠᱷᱚᱱ ᱱᱟᱶᱟ ᱜᱷᱟᱨᱚᱸᱡᱽ
ᱟᱯᱟ ᱵᱟᱨᱮ ᱚᱲᱟᱜ – ᱫᱩᱣᱟᱹᱨ ᱵᱟᱹᱜᱤ ᱠᱟᱛᱮ ᱾
ᱞᱟᱹᱭ ᱟᱫ ᱫᱤᱧᱟᱭ ᱥᱟᱶᱛᱟ ᱟᱹᱨᱤᱪᱟᱹᱞᱤ
ᱡᱟᱶᱟᱭ ᱚᱲᱟᱜ ᱜᱮ ᱤᱧᱟᱜ ᱚᱲᱟᱜ-ᱫᱩᱣᱟᱹᱨ ᱫᱚ
ᱢᱚᱱᱮ ᱨᱮ ᱫᱚᱦᱚᱭ ᱢᱮ ᱠᱟᱛᱷᱟ ᱵᱟᱯᱞᱟ ᱛᱟᱭᱚᱢ
ᱡᱟᱶᱟᱭ ᱚᱲᱟᱜ ᱠᱷᱚᱱ ᱜᱮ ᱚᱰᱚᱠᱚᱜ ᱜᱩᱨ ᱛᱟᱭᱚᱢ ᱢᱟᱬᱟ ᱫᱚ ᱾
ᱡᱟᱶᱟᱭ ᱚᱲᱟᱜ ᱜᱮ ᱤᱧᱟᱜ ᱚᱲᱟᱜ-ᱫᱩᱣᱟᱹᱨ ᱫᱚ
ᱚᱱᱛᱚᱨ ᱢᱚᱱᱮ ᱨᱮ ᱠᱟᱛᱷᱟᱧ ᱜᱟ:ᱴ ᱫᱚᱦᱚ ᱠᱮᱫ
ᱫᱩᱞᱟᱹᱲ ᱤᱛᱟᱹᱧ ᱮᱨᱟ ᱡᱟᱶᱟᱭ ᱚᱲᱟᱜ ᱨᱮ
ᱡᱚᱛᱚ ᱦᱚᱲᱟᱜ ᱢᱚᱱᱮ ᱨᱮ ᱴᱷᱟᱶ ᱤᱧ ᱵᱮᱱᱟᱣ ᱠᱮᱫ ᱾
ᱥᱩᱞᱩᱠ-ᱱᱤᱨᱟᱹᱭ ᱛᱮ ᱛᱟᱦᱮᱸ ᱠᱚᱜᱼᱟ
ᱟᱹᱞᱤᱧᱟᱜ ᱛᱤᱨᱤ-ᱯᱩᱨᱩᱥ ᱫᱩᱞᱟᱹᱲ ᱥᱟᱹᱜᱟᱹᱭ
ᱟᱭᱳ ᱨᱩᱯ ᱛᱮ ᱫᱩᱞᱟᱹᱲ ᱤᱧ ᱥᱟᱨᱥᱟᱣᱟ
ᱦᱚᱯᱚᱱ ᱪᱮᱛᱟᱱ ᱨᱮ ᱟᱭᱳ ᱫᱩᱞᱟᱹᱲ ᱤᱧ ᱟᱞᱟᱭ ᱾
ᱦᱟᱱᱦᱟᱨ-ᱦᱚᱧᱦᱟᱨ ᱠᱤᱱ ᱟᱭᱳ-ᱵᱟᱵᱟ
ᱤᱨᱤᱞ ᱠᱚᱲᱟ-ᱠᱩᱲᱤ ᱵᱚᱭᱦᱟ ᱠᱤᱱ ᱦᱩᱭᱩᱜ
ᱡᱚᱛᱚ ᱥᱟᱶ ᱱᱟᱯᱟᱭ ᱥᱟᱹᱜᱟᱹᱭ ᱤᱧ ᱛᱳᱞ ᱫᱚᱦᱚᱭ
ᱡᱟᱭᱡᱭᱜᱽ ᱡᱤᱭᱟᱹᱲ ᱛᱟᱦᱮᱱ ᱜᱷᱟᱨᱚᱸᱡᱽ ᱟᱞᱮᱭᱟᱜ ᱾
ᱚᱲᱟᱜ-ᱫᱩᱣᱟᱹᱨ, ᱥᱚᱱᱮᱨ ᱜᱷᱟᱨᱚᱸᱡᱽ ᱤᱧᱟᱜ
ᱥᱩᱥᱟ.ᱨ – ᱥᱟᱢᱴᱟᱣᱟ.ᱧ ᱱᱟᱭ-ᱱᱟᱯᱟᱭ ᱛᱮ
ᱚᱲᱟᱜ ᱨᱤᱱ ᱵᱚᱸᱜᱟᱼᱵᱳᱨᱳ, ᱦᱟᱯᱲᱟᱢ ᱠᱚ
ᱫᱮᱵᱟ-ᱥᱮᱵᱟ ᱠᱚᱣᱟᱹᱧ ᱥᱟ.ᱨᱤ ᱱᱤᱨᱞᱟ. ᱢᱚᱱᱮ ᱛᱮ ᱾
ᱵᱩᱜᱤ-ᱵᱟᱹᱲᱤᱡᱟᱜ ᱨᱮ ᱜᱚᱲᱚ ᱜᱚᱯᱚᱲᱚ ᱞᱮ ᱫᱚᱦᱚᱭ
ᱥᱩᱠᱷ-ᱫᱩᱠᱷ ᱨᱮ ᱥᱟᱶᱛᱤᱧ ᱛᱟᱦᱮᱸ ᱠᱚᱜ
ᱡᱚᱛᱚᱣᱟᱜ ᱤᱧ ᱟᱞᱟᱭ ᱜᱷᱟᱨᱚᱸᱡᱽ ᱪᱮᱛᱟᱱ ᱨᱮ
ᱦᱩᱰᱤᱧ-ᱢᱟᱨᱟᱝ ᱡᱚᱛᱚ ᱢᱟᱹᱱ ᱤᱧ ᱮᱢᱟ ᱠᱚ ᱾
ᱡᱟᱶᱟᱭ ᱚᱲᱟᱜ ᱨᱮ ᱡᱚᱛᱚ ᱥᱟᱹᱜᱟᱹᱭ ᱤᱧ ᱧᱟᱢ ᱨᱮᱦᱚᱸ
ᱮᱱ ᱦᱚᱸ ᱦᱚᱯᱚᱱ ᱮᱨᱟ ᱫᱚ ᱯᱟᱞᱮᱫ ᱵᱟᱹᱧ ᱵᱮᱱᱟᱣᱚᱜ
ᱱᱮᱣᱟᱹᱨᱤ ᱵᱮᱱᱟᱣ ᱟᱠᱟᱱᱟ ᱤᱨᱤᱞ ᱠᱩᱲᱤ ᱦᱚᱸ
ᱜᱟᱯᱟ ᱮᱴᱟᱜ ᱚᱲᱟᱜ ᱨᱤᱱᱤᱡ ᱠᱤᱢᱤᱱ ᱮ ᱦᱩᱭᱩᱜ ᱾
ᱚᱱᱟᱛᱮ ᱩᱭᱦᱟᱹᱨ ᱫᱚᱦᱚᱭ ᱢᱟ ᱥᱟᱶᱛᱟ ᱨᱮ
ᱡᱟᱶᱟᱭ ᱚᱲᱟᱜ ᱨᱮ ᱛᱤᱨᱞᱟᱹ ᱦᱟᱜ ᱢᱟᱹᱱ ᱫᱚᱦᱚᱭ ᱢᱟ
ᱦᱚᱯᱚᱱ ᱮᱨᱟ ᱟᱨ ᱵᱟᱝ ᱠᱤᱢᱤᱱ ᱮ ᱦᱩᱭᱩᱜ
ᱡᱚᱛᱚ ᱜᱮ ᱞᱩᱠᱷᱤ ᱥᱚᱢᱟᱱ ᱢᱟᱹᱱ ᱮᱢᱟ ᱠᱚᱢᱟ ᱾
***
