ᱦᱤᱡᱩᱜ ᱨᱮᱦᱚᱸ ᱡᱟᱸᱜᱮ ᱫᱟᱨᱟᱢ
ᱥᱩᱭᱟᱹ ᱡᱟᱹᱨᱤ ᱨᱮᱱᱟᱜ ᱟᱲᱟᱝ,
ᱤᱧ ᱫᱚ ᱵᱟᱝᱤᱧ ᱧᱤᱨ
ᱱᱚᱱᱚᱞ ᱵᱟᱝ ᱤᱧ ᱛᱷᱤᱨ ᱾
ᱩᱠᱩ ᱢᱮᱱᱟᱜ ᱥᱟᱹᱨᱤ ᱡᱤᱱᱤᱥ
ᱥᱟᱶᱛᱟ ᱵᱤᱨᱟᱹᱫᱟᱹᱞᱤ ᱟᱹᱱᱤᱡ,
ᱥᱟᱦᱟᱨᱮ ᱢᱮᱱᱟᱜ ᱦᱚᱠ ᱟᱹᱭᱫᱟᱹᱨ
ᱵᱟᱵᱚᱱ ᱵᱟᱛᱟᱣ ᱥᱤᱭᱮᱡᱟᱹᱨ ᱾
ᱞᱟᱹᱲᱦᱟᱹᱭ ᱛᱮ ᱦᱟᱛᱟᱣ ᱟᱵᱚᱱ ᱟᱵᱚᱱᱟᱜ ᱡᱚᱥ
ᱥᱟᱦᱟ ᱠᱟᱛᱮᱫ ᱩᱱᱠᱩ ᱢᱚᱴᱟ ᱟᱱ ᱵᱚᱦᱚᱜ,
ᱢᱩᱠᱷᱚᱥ ᱦᱚᱨᱚᱜ ᱢᱟᱹᱱᱢᱤ ᱥᱟᱱᱟᱢ
ᱥᱟᱡᱟᱣᱚᱜ ᱠᱚ ᱯᱚᱨᱚᱥᱩᱨᱟᱢ ᱾
ᱥᱚᱱᱚᱛ ᱠᱟᱹᱢᱤ ᱧᱩᱛᱩᱢ ᱛᱮ
ᱦᱟᱱᱟ ᱱᱷᱟᱣᱟ ᱯᱷᱟᱱᱫᱤ ᱛᱮ,
ᱠᱤᱥᱟᱹᱬ ᱠᱚᱫᱚ ᱵᱮᱱᱟᱣᱚᱜ ᱠᱚ ᱱᱮᱛᱟ
ᱨᱮᱸᱜᱮᱡ ᱠᱚᱫᱚ ᱟᱠᱚ ᱠᱚᱨᱮᱱ ᱥᱮᱛᱟ ᱾
ᱠᱚᱞᱥᱟ ᱢᱟᱜᱟᱞ ᱵᱚᱦᱚᱜ ᱛᱤᱨᱩᱵ
ᱡᱟᱸᱜᱟ ᱞᱟᱛᱟᱨ ᱫᱩᱲᱩᱵ ᱛᱷᱤᱨᱩᱜ,
ᱟᱸᱥ ᱧᱟᱧᱟᱢ ᱫᱤᱥᱟᱹ ᱛᱮ
ᱢᱮᱱᱟᱜ ᱵᱚᱱᱟ ᱡᱚᱲ ᱛᱤᱛᱮ ᱾
ᱵᱟᱝ ᱠᱚ ᱮᱢᱚᱜ ᱥᱟᱦᱟᱜ ᱨᱮᱫᱚ
ᱞᱟᱹᱲᱦᱟᱹᱭ ᱛᱮᱧ ᱦᱟᱛᱟᱣ ᱤᱧ ᱫᱚ,
ᱞᱟᱪᱷᱟ ᱪᱮᱛᱟᱱ ᱱᱚᱱᱚᱞ ᱛᱮ
ᱞᱟᱹᱲᱦᱟᱹᱭ ᱨᱮ ᱥᱚᱦᱚᱫ ᱤᱧ ᱯᱮ
ᱥᱟᱱᱟᱢ ᱠᱚᱛᱮ ᱾
ᱦᱤᱡᱩᱜ ᱨᱮᱦᱚᱸ ᱡᱟᱸᱜᱮ ᱫᱟᱨᱟᱢ
ᱥᱤᱭᱮᱡᱟᱨᱤ ᱨᱮᱱᱟᱜ ᱟᱲᱟᱝ,
ᱤᱧ ᱫᱚ ᱵᱟᱝᱤᱧ ᱧᱤᱨ
ᱱᱚᱧᱚᱞ ᱵᱟᱝ ᱤᱧ ᱛᱷᱤᱨ ᱾
***
ᱱᱟᱯᱟᱭ ᱜᱟᱞᱟᱝ ᱜᱟᱵᱟᱱ