ᱢᱮᱛᱟᱢ ᱟᱠᱚ ᱦᱤᱞᱤ ᱫᱟᱹᱭ
ᱟᱢ ᱜᱮ ᱡᱚᱛᱚᱱᱤᱭᱟᱹ,
ᱟᱢ ᱜᱮ ᱡᱟᱱᱟᱢ ᱟᱭᱳ ᱞᱮᱠᱟ
ᱜᱷᱟᱨᱚᱸᱡᱽ ᱥᱟᱸᱜᱷᱟᱨᱤᱭᱟᱹ ᱾
ᱥᱮᱛᱟᱜ ᱛᱚᱨᱟ ᱵᱮᱨᱮᱫ ᱠᱟᱛᱮ
ᱡᱚᱜ ᱨᱟᱪᱟ ᱥᱟᱹᱛ ᱠᱟᱛᱮ,
ᱪᱷᱚᱸᱪ ᱟᱢᱟᱜ ᱚᱲᱟᱜ ᱫᱩᱣᱟᱹᱨ
ᱜᱮᱡᱼᱜᱩᱨᱤᱡ ᱟᱛᱮ ᱾
ᱡᱚᱢᱟᱜ ᱧᱩᱣᱟᱜ ᱡᱚᱜᱟᱣ ᱞᱟᱹᱜᱤᱫ
ᱟᱢ ᱜᱮ ᱫᱤᱱᱟᱹᱢ ᱦᱤᱞᱚᱜ,
ᱤᱥᱤᱱ ᱮᱫᱟᱢ ᱫᱟᱠᱟ ᱫᱟᱜ ᱢᱟᱺᱰᱤ
ᱟᱢ ᱜᱮ ᱥᱮᱛᱟᱜ ᱧᱤᱫᱟᱹ ᱾
ᱟᱢᱟᱜ ᱫᱩᱞᱟᱹᱲ ᱢᱟᱭᱟ ᱥᱩᱛᱟᱹᱢ
ᱜᱟᱞᱟᱝ ᱮᱫᱟᱢ ᱵᱤᱸᱫᱤ ᱞᱮᱠᱟ,
ᱜᱩᱛᱩ ᱮᱫᱟᱢ ᱫᱟᱨᱮ ᱵᱟᱦᱟ
ᱢᱟᱞᱟ ᱢᱩᱫᱟᱹᱢ ᱞᱮᱠᱟ ᱾
ᱪᱟᱛᱚᱢ ᱵᱟᱠᱷᱳᱞ ᱠᱮᱴᱮᱡᱽ ᱞᱟᱹᱜᱤᱫ
ᱵᱮᱱᱟᱣ ᱮᱫᱟᱢ ᱜᱷᱟᱨᱚᱸᱡᱽ ᱢᱩᱨᱟᱹᱭ,
ᱥᱩᱠ ᱥᱟᱶᱟᱭ ᱫᱚᱦᱚᱭ ᱞᱟᱹᱜᱤᱫ
ᱛᱮᱭᱟᱨ ᱮᱫᱟᱢ ᱥᱩᱞᱩᱠ ᱥᱟᱹᱜᱟᱹᱭ ᱾
ᱥᱟᱡᱟᱣ ᱮᱫᱟᱢ ᱨᱤᱞᱤᱯᱷᱤᱞᱤ
ᱡᱚᱛᱚᱱ ᱡᱚᱜᱟᱣ ᱠᱟᱛᱮ,
ᱟᱭᱳ,ᱵᱟᱵᱟ, ᱵᱚᱭᱦᱟᱼᱢᱤᱥᱤ
ᱢᱟᱱᱟᱣ ᱜᱩᱱᱟᱹᱣ ᱠᱟᱛᱮ ᱾
ᱵᱚᱸᱜᱟ ᱵᱩᱨᱩ ᱫᱮᱵᱟ ᱥᱮᱵᱟ
ᱵᱷᱤᱛᱟᱹᱨ ᱚᱲᱟᱜ ᱨᱮ,
ᱠᱷᱚᱡᱚᱜ ᱠᱟᱱᱟᱢ ᱥᱩᱞᱩᱠ ᱱᱤᱨᱟᱹᱭ
ᱱᱮᱦᱚᱨ ᱡᱚᱦᱟᱨ ᱟᱛᱮ ᱾
***
