“ᱟᱭᱳ ᱟᱲᱟᱝ ᱤᱼᱯᱟᱛᱷᱟᱢ” ᱨᱮᱱᱟᱜ ᱱᱚᱶᱟ ᱥᱟᱯᱲᱟᱣ ᱫᱚ ᱮᱭᱟᱭ ᱟᱱᱟᱜ ᱥᱟᱯᱲᱟᱣ ᱠᱟᱱᱟ ᱾ ᱡᱮᱜᱮᱛ ᱡᱟᱠᱟᱛ ᱨᱤᱱ ᱥᱟᱱᱛᱟᱲ ᱠᱩᱲᱤ ᱦᱚᱯᱚᱱ ᱚᱱᱚᱞᱤᱭᱟᱹ ᱠᱚ ᱦᱚᱛᱮᱛᱮ ᱥᱟᱡᱟᱣ ᱥᱟᱯᱲᱟᱣᱜ ᱠᱟᱱ ᱯᱮᱼᱪᱟᱸᱫᱚᱠᱤᱭᱟᱹ ᱱᱚᱶᱟ ᱥᱟᱶᱦᱮᱫ ᱤᱼᱯᱟᱛᱷᱟᱢ ᱫᱚ ᱮᱛᱚᱦᱚᱵ ᱥᱟᱯᱲᱟᱣ ᱠᱷᱚᱱ ᱛᱩᱨᱩᱭ ᱟᱱᱟᱜ ᱥᱟᱯᱲᱟᱣ ᱫᱷᱟᱹᱵᱤᱡ ᱫᱚ ᱱᱟᱶᱟ ᱚᱱᱚᱞᱤᱭᱟᱹ, ᱢᱟᱨᱮ ᱚᱱᱚᱞᱤᱭᱟᱹ ᱥᱟᱱᱟᱢ ᱠᱚᱜᱮ ᱟᱠᱚ ᱟᱠᱚᱣᱟᱜ ᱞᱮᱠᱟᱱ ᱞᱮᱠᱟᱱ ᱥᱟᱛᱟᱢ ᱪᱮᱛᱟᱱ ᱨᱮ, ᱚᱠᱚᱭ ᱫᱚ ᱚᱱᱚᱞ, ᱚᱠᱚᱭ ᱫᱚ ᱚᱱᱚᱬᱦᱮ, ᱚᱠᱚᱭ ᱫᱚ ᱥᱮᱨᱮᱧ ᱟᱨ ᱚᱠᱚᱭ ᱫᱚ ᱟᱠᱚᱣᱟᱜ ᱛᱚᱨᱡᱚᱢᱟ ᱦᱩᱱᱟᱹᱨ ᱜᱮᱠᱚ ᱩᱫᱩᱜ ᱥᱚᱫᱚᱨ ᱞᱮᱫᱼᱟ ᱾
ᱤᱠᱷᱟᱹᱱ ᱱᱚᱶᱟ ᱮᱭᱟᱭ ᱟᱱᱟᱜ ᱥᱟᱯᱲᱟᱣ ᱨᱮᱱᱟᱜ ᱠᱷᱟᱥ ᱠᱟᱛᱷᱟ ᱫᱚ ᱱᱚᱶᱟ ᱜᱮ ᱠᱟᱱᱟ ᱪᱤ ᱱᱤᱭᱟᱹ ᱫᱷᱟᱣ ᱫᱚ ᱢᱤᱫ ᱠᱷᱟᱥ ᱥᱟᱛᱟᱢ ᱪᱮᱛᱟᱱ ᱨᱮ ᱚᱞ ᱚᱪᱚ, ᱥᱟᱯᱲᱟᱣ ᱚᱪᱚ ᱠᱚ ᱨᱮᱱᱟᱜ ᱠᱩᱨᱩᱢᱩᱴᱩ ᱟᱠᱟᱱᱟ ᱾ ᱟᱨ ᱚᱱᱟ ᱠᱷᱟᱥ ᱥᱟᱛᱟᱢ ᱫᱚ ᱦᱩᱭᱩᱜ ᱠᱟᱱᱟ – “ᱡᱟᱶᱟᱭ ᱚᱲᱟᱜ ᱨᱮ ᱵᱟᱹᱦᱩ ᱠᱩᱲᱤᱭᱟᱜ ᱟᱺᱜᱤᱵᱷᱟᱨ (DUTY & RESPONSIBILITY OF A MARRIED WOMAN IN HER IN-LAWS HOME)᱾”
ᱱᱚᱶᱟ ᱥᱟᱛᱟᱢ ᱪᱮᱛᱟᱱ ᱨᱮ ᱚᱞ ᱥᱟᱸᱜᱮ ᱨᱮᱱᱟᱜ ᱦᱩᱫᱤᱥ ᱫᱚ ᱱᱚᱶᱟ ᱜᱮ ᱠᱟᱱᱟ ᱡᱮ ᱠᱩᱲᱤ ᱦᱚᱯᱚᱱ ᱠᱚ, ᱠᱩᱲᱤ ᱜᱤᱫᱽᱨᱟᱹ ᱠᱚ ᱡᱟᱶᱟᱭ ᱚᱲᱟᱜ ᱨᱮ ᱢᱤᱫ ᱵᱟᱹᱦᱩ ᱠᱩᱲᱤᱭᱟᱜ ᱟᱺᱜᱤᱵᱷᱟᱨ ᱥᱟᱶ ᱟᱠᱚᱣᱟᱜ ᱩᱭᱦᱟᱹᱨ ᱟᱨ ᱟᱠᱚᱣᱟᱜ ᱚᱞ, ᱟᱠᱚᱣᱟᱜ ᱜᱟᱞᱟᱝ ᱜᱟᱵᱟᱱ ᱦᱚᱛᱮᱛᱮ ᱜᱮ ᱩᱯᱨᱩᱢ ᱚᱪᱚ ᱠᱚ ᱾
ᱥᱟᱶᱛᱟ ᱨᱮ, ᱜᱷᱟᱨᱚᱸᱡᱽ ᱨᱮ, ᱡᱟᱶᱟᱭ ᱚᱲᱟᱜ ᱨᱮ ᱟᱠᱚᱣᱟᱜ ᱟᱺᱜᱤᱵᱷᱟᱨ ᱟᱠᱚ ᱛᱮ ᱩᱭᱦᱟᱹᱨ ᱚᱪᱚ ᱠᱚ, ᱱᱚᱶᱟ ᱪᱮᱛᱟᱱ ᱨᱮ ᱟᱠᱚᱣᱟᱜ ᱩᱭᱦᱟᱹᱨ, ᱟᱨ ᱠᱟᱹᱴᱤᱡ ᱡᱩᱴᱤᱡᱟᱜ ᱟᱨ ᱫᱚᱲᱦᱚ ᱚᱪᱚᱭ, ᱵᱮᱥ ᱟᱨ ᱵᱟᱹᱲᱤᱡᱟᱜ ᱠᱟᱹᱢᱤ ᱟᱨ ᱵᱮᱵᱷᱟᱨ ᱪᱮᱛᱟᱱ ᱨᱮ ᱩᱨᱩᱢ ᱧᱟᱢ ᱚᱪᱚ ᱾ ᱟᱠᱚᱣᱟᱜ ᱩᱭᱦᱟᱹᱨ ᱦᱚᱛᱮᱛᱮ, ᱟᱠᱚᱣᱟᱜ ᱚᱞᱼᱵᱮᱞ ᱦᱚᱛᱮᱛᱮ ᱮᱴᱟᱜ ᱦᱚᱲ ᱠᱚ ᱱᱟᱥᱮ ᱥᱮᱪᱮᱫ ᱥᱮᱴᱮᱨ ᱟᱠᱚ ᱟᱨ ᱮᱴᱟᱜ ᱦᱚᱲᱟᱜ ᱩᱭᱦᱟᱹᱨ ᱟᱨ ᱚᱞᱼᱵᱮᱞ ᱦᱚᱛᱮᱛᱮ ᱞᱟᱹᱭ ᱞᱟᱹᱯᱟᱹᱭ, ᱮᱯᱮᱢ ᱪᱟᱯᱟᱞ ᱦᱚᱛᱮᱛᱮ ᱟᱠᱚ ᱦᱚᱸ ᱱᱟᱥᱮ ᱥᱮᱪᱮᱫ ᱟᱨᱡᱟᱣ ᱚᱪᱚ ᱡᱚᱝ ᱾
ᱚᱱᱟ ᱞᱮᱠᱟᱛᱮ ᱱᱚᱶᱟ ᱥᱟᱯᱲᱟᱣ ᱫᱚ ᱟᱹᱰᱤ ᱜᱮ ᱥᱚᱨᱮᱥ ᱦᱩᱭ ᱟᱠᱟᱱᱟ ᱾ ᱡᱚᱛᱚ ᱠᱷᱚᱱ ᱵᱟᱹᱲᱛᱤ ᱠᱷᱟᱥ ᱠᱟᱛᱷᱟ ᱫᱚ ᱱᱚᱶᱟ ᱠᱟᱱᱟ, ᱰᱟᱺᱜᱽᱣᱟᱹ ᱠᱩᱲᱤ ᱜᱤᱫᱽᱨᱟᱹ ᱠᱚᱦᱚᱸ ᱱᱚᱶᱟ ᱥᱟᱛᱟᱢ ᱪᱮᱛᱟᱱ ᱨᱮ ᱟᱠᱚᱣᱟᱜ ᱩᱭᱦᱟᱹᱨ, ᱵᱷᱟᱵᱽᱱᱟ ᱟᱹᱰᱤ ᱜᱮ ᱥᱚᱨᱮᱥ ᱠᱚ ᱜᱟᱞᱟᱝ ᱜᱟᱵᱟᱱ ᱟᱠᱟᱫᱼᱟ ᱾ ᱟᱠᱚᱣᱟᱜ ᱜᱷᱟᱨᱚᱸᱡᱽ ᱜᱚᱲᱦᱚᱱ ᱞᱟᱦᱟᱨᱮ ᱟᱠᱚᱣᱟᱜ ᱢᱚᱱᱮᱨᱮ ᱱᱚᱶᱟ ᱩᱭᱦᱟᱹᱨ ᱥᱟᱨᱥᱟᱣ ᱚᱪᱚᱭ ᱫᱚ ᱛᱟᱭᱚᱢ ᱫᱟᱨᱟᱢ ᱟᱠᱚᱣᱟᱜ ᱡᱤᱭᱚᱱ ᱞᱟᱹᱜᱤᱫ ᱱᱤᱦᱟᱹᱛᱤ ᱜᱮ ᱱᱟᱯᱟᱭ ᱠᱟᱹᱢᱤ ᱨᱮ ᱦᱤᱡᱩᱜᱼᱟ ᱾ ᱡᱟᱶᱟᱭ ᱚᱲᱟᱜ ᱨᱮ ᱜᱷᱟᱨᱚᱸᱡᱽ ᱨᱮᱭᱟᱜ ᱵᱷᱟᱹᱨᱭᱟᱹ ᱜᱚᱜ ᱠᱟᱛᱮ ᱛᱟᱲᱟᱢ ᱟᱠᱟᱫ ᱚᱠᱛᱚ ᱨᱮ ᱠᱷᱟᱬᱟ, ᱠᱷᱚᱪᱟ, ᱟᱱᱟᱴ, ᱡᱟᱸᱜᱮ ᱟᱞᱜᱟ ᱛᱮᱠᱚ ᱥᱟᱢᱟᱝ ᱫᱟᱲᱮᱭᱟᱜᱼᱟ, ᱟᱞᱜᱟ ᱛᱮᱠᱚ ᱯᱟᱨᱚᱢ ᱫᱟᱲᱮᱭᱟᱜᱼᱟ ᱾ ᱩᱱ ᱡᱚᱦᱚᱜ ᱱᱚᱰᱮ ᱠᱚ ᱜᱟᱞᱟᱝ ᱜᱟᱵᱟᱱ ᱟᱠᱟᱫ ᱟᱠᱚᱣᱟᱜ ᱠᱟᱛᱷᱟ ᱜᱮ ᱟᱠᱚ ᱱᱤᱦᱟᱹᱛᱤ ᱠᱚ ᱩᱭᱦᱟᱹᱨᱟ ᱟᱨ ᱚᱱᱟ ᱞᱮᱠᱟᱛᱮ ᱞᱟᱦᱟᱱᱛᱤ ᱯᱟᱹᱣᱲᱤ ᱠᱚ ᱞᱟᱦᱟᱭᱟ ᱾
ᱥᱟᱶᱛᱟ ᱨᱮᱱᱟᱜ ᱞᱟᱹᱭ ᱞᱟᱠᱪᱟᱨ, ᱢᱟᱞᱚᱴ ᱟᱫᱚᱜ ᱦᱚᱨ ᱠᱷᱚᱱ ᱚᱣᱟᱨ ᱨᱟᱠᱟᱵᱽ, ᱥᱟᱶᱛᱟ ᱨᱤᱱ ᱢᱟᱹᱱᱢᱤ ᱠᱚᱣᱟᱜ ᱩᱭᱦᱟᱹᱨ ᱱᱟᱯᱟᱭ ᱦᱚᱨ ᱛᱮ ᱚᱨ ᱤᱫᱤ ᱟᱨ ᱵᱟᱹᱦᱩ ᱠᱩᱲᱤ ᱠᱚ ᱪᱮ ᱱᱤᱛᱚᱜ ᱨᱤᱱ ᱠᱩᱲᱤ ᱜᱤᱫᱽᱨᱟᱹ ᱠᱚᱣᱟᱜ ᱢᱚᱱᱮ ᱠᱮᱴᱮᱡ ᱚᱪᱚᱭ ᱫᱚ ᱚᱞᱼᱵᱮᱞ ᱦᱚᱨᱟ ᱜᱮ ᱡᱚᱛᱚ ᱠᱷᱚᱱ ᱱᱟᱯᱟᱭ ᱟᱨ ᱥᱚᱨᱮᱥ ᱦᱚᱨ ᱰᱟᱦᱟᱨ ᱠᱟᱱᱟ ᱾ ᱦᱚᱲ ᱫᱚ ᱚᱠᱚᱭ ᱮ ᱞᱟᱹᱭ ᱟᱢᱟ, ᱟᱯᱚᱱ ᱛᱮᱜᱮ ᱵᱩᱜᱤ ᱟᱨ ᱵᱟᱹᱲᱤᱡ ᱛᱟᱞᱟᱨᱮ ᱛᱩᱞᱟᱹᱡᱚᱠᱷᱟ ᱠᱟᱛᱮ ᱵᱟᱹᱲᱤᱡᱟᱜ ᱫᱚ ᱮᱨᱮᱲ ᱟᱨ ᱱᱟᱯᱟᱭᱟᱜ ᱫᱚ ᱟᱯᱱᱟᱨ ᱡᱚᱝ ᱠᱟᱛᱮ ᱢᱟᱬᱟᱝ ᱛᱮ ᱞᱟᱦᱟᱜ ᱦᱩᱭᱩᱜᱼᱟ ᱾
***
