ᱜᱚᱨᱚᱵᱽ ᱟᱴᱠᱟᱨᱚᱜ
ᱢᱚᱱᱮ ᱢᱚᱱᱮ ᱛᱮ,
ᱨᱟᱹᱥᱠᱟᱹ ᱟᱹᱭᱠᱟᱹᱣᱚᱜ
ᱦᱚᱲᱢᱚ ᱥᱤᱨ ᱥᱤᱨ ᱛᱮ ᱾
ᱱᱚᱶᱟ ᱫᱷᱟᱹᱨᱛᱤ ᱨᱮ
ᱡᱩᱢᱤᱫᱚᱜ ᱟᱞᱮ ᱛᱤᱨᱞᱟᱹ,
ᱟᱫᱚ ᱵᱟᱝ ᱞᱮ ᱛᱟᱸᱦᱮᱱ
ᱮᱴᱟᱜ ᱦᱚᱲᱟᱜ ᱦᱤᱨᱞᱟᱹ ᱾
ᱛᱤᱨᱞᱟᱹ ᱵᱮᱜᱚᱨ ᱜᱷᱟᱸᱨᱚᱡᱽ ᱥᱟᱱᱟᱢ
ᱱᱤᱥᱩᱱ ᱛᱟᱸᱦᱮᱱ ᱜᱮᱭᱟ,
ᱧᱩᱛᱟᱹᱛ ᱜᱷᱟᱸᱨᱚᱡᱽ ᱨᱮᱦᱚᱸ ᱛᱤᱨᱞᱟᱹ
ᱵᱟᱹᱛᱤᱭ ᱡᱮᱨᱮᱫᱽ ᱜᱮᱭᱟ ᱾
ᱪᱟᱥ ᱠᱟᱹᱢᱤ ᱠᱷᱚᱱ
ᱩᱰᱟᱹᱱ ᱜᱟᱹᱰᱤ ᱛᱚᱠ,
ᱥᱟᱱᱟᱢ ᱠᱟᱹᱢᱤ ᱨᱮᱭ
ᱞᱟᱦᱟ ᱥᱮᱱᱚᱜ ᱾
ᱫᱤᱥᱚᱢ ᱥᱤᱢᱟᱹᱨᱮ
ᱢᱮᱱᱟᱜ ᱠᱳᱣᱟ ᱛᱤᱨᱞᱟᱹ,
ᱦᱚᱭ ᱡᱤᱣᱤ ᱢᱮᱱᱟᱜ ᱛᱟᱠᱚ
ᱵᱷᱟᱨᱚᱛ ᱜᱚ ᱴᱷᱮᱱ ᱦᱤᱨᱞᱟᱹ ᱾
ᱥᱮᱛᱟᱜ ᱠᱷᱚᱱ ᱟᱹᱭᱩᱵ
ᱢᱚᱱᱮ ᱢᱩᱨᱩᱠᱷ ᱟᱛᱮ,
ᱠᱟᱹᱢᱤ ᱨᱮᱠᱚ ᱩᱲᱩᱝ ᱥᱩᱲᱩᱝ
ᱵᱚᱦᱚᱜ ᱛᱩᱞ ᱠᱟᱛᱮ ᱾
ᱡᱟᱱᱟᱢ ᱠᱷᱚᱱ ᱜᱩᱡᱩᱜ ᱥᱟᱱᱟᱢ ᱠᱟᱹᱢᱤ ᱨᱮ
ᱢᱮᱱᱟᱜ ᱛᱟᱠᱚ ᱜᱩᱱ,
ᱛᱤᱨᱞᱟᱹ ᱵᱟᱝᱠᱷᱟᱱ ᱚᱠᱟ
ᱠᱟᱹᱢᱤ ᱦᱚᱸ ᱵᱟᱝ ᱥᱟᱹᱜᱩᱱ ᱾
ᱮᱵᱷᱟᱨᱮᱥᱴ ᱡᱤᱛᱠᱟᱹᱨ ᱠᱷᱚᱱ
ᱫᱤᱥᱚᱢ ᱪᱟᱪᱞᱟᱣ ᱫᱷᱟᱹᱵᱤᱡ ᱛᱮ,
ᱵᱟᱝᱠᱚ ᱯᱟᱹᱪᱷᱟᱹᱠ ᱞᱟᱦᱟ ᱥᱮᱱᱚᱜ
ᱦᱩᱞ ᱨᱮᱦᱚᱸ ᱡᱤᱣᱤ ᱟᱞᱟᱭ ᱟᱛᱮ ᱾
ᱢᱮᱱᱟᱜ ᱛᱟᱠᱚ ᱫᱟᱭᱟ ᱫᱩᱞᱟᱹᱲ
ᱮᱸᱜᱟᱛ ᱵᱟᱨᱟ ᱵᱟᱹᱨᱤ,
ᱵᱟᱹᱲᱤᱡ ᱟᱫ ᱠᱚ ᱧᱮᱞ ᱨᱮᱫᱚ
ᱨᱩᱯ ᱛᱟᱠᱚ ᱫᱚ ᱠᱟᱹᱞᱤ ᱵᱚᱸᱜᱟ ᱠᱩᱲᱤ ᱾
ᱛᱤᱨᱞᱟᱹ ᱦᱚᱯᱚᱱ ᱡᱟᱱᱟᱢ
ᱵᱟᱦᱟ ᱵᱟᱜᱟᱱ ᱵᱟᱦᱟ ᱞᱮᱠᱟ,
ᱜᱷᱟᱸᱨᱚᱡᱽ ᱨᱮᱭᱟᱜ ᱪᱟᱹᱨᱭᱟᱹᱠᱚᱸᱲ
ᱥᱟᱱᱟᱢ ᱠᱚ ᱟᱸᱫᱚᱲ ᱠᱟᱜᱼᱟ ᱾
ᱛᱤᱨᱞᱟᱹ ᱦᱚᱯᱚᱱ ᱡᱟᱱᱟᱢ ᱵᱟᱝᱠᱷᱟᱱ
ᱜᱷᱟᱸᱨᱚᱡᱽ ᱧᱩᱛᱟᱹᱛᱚᱜ,
ᱥᱤᱨᱡᱚᱱ ᱨᱮᱭᱟᱜ ᱟᱹᱨᱤ
ᱥᱟᱱᱟᱢ ᱢᱤᱪᱷᱟᱹ ᱜᱚᱫᱚᱜ ᱾
***
