ᱢᱤᱫᱴᱟᱹᱝ ᱠᱩᱲᱤ ᱜᱤᱫᱽᱨᱟ. ᱟᱭᱳ ᱵᱟᱵᱟ ᱚᱲᱟᱜ ᱠᱷᱚᱱ ᱡᱚᱠᱷᱚᱱ ᱜᱮ ᱡᱟᱶᱟᱭ ᱚᱲᱟᱜ ᱛᱮᱭ ᱵᱤᱫᱟ.ᱭᱚᱜ-ᱜ, ᱵᱤᱫᱟ.ᱭ ᱚᱠᱛᱚ ᱢᱟᱛᱠᱚᱢ ᱵᱩᱴᱟ. ᱠᱚᱣᱟᱠᱚ ᱵᱟᱱᱟᱨ ᱯᱟᱦᱴᱟ ᱨᱮᱱ ᱢᱟ.ᱡᱷᱤ ᱵᱟᱵᱟ ᱥᱮ ᱜᱩᱱᱤ ᱜᱩᱨᱤᱵᱠᱚ ᱟᱛᱮ ᱟᱨ ᱟᱛᱳ ᱯᱮᱲᱟ ᱫᱤᱥᱚᱢ ᱯᱮᱲᱟ ᱠᱚ ᱛᱟᱞᱟᱨᱮ, ᱵᱟ.ᱦᱩ ᱡᱟᱶᱟᱭ ᱠᱚ ᱫᱩᱲᱩᱵ ᱠᱤᱱᱟ ᱵᱮᱲᱟ ᱨᱟᱠᱟᱵ ᱥᱮᱫ ᱥᱟᱢᱟᱝ ᱠᱟᱛᱮ ᱾
ᱥᱟᱢᱟᱝ ᱨᱮ ᱢᱤᱫ ᱞᱚᱴᱟ ᱫᱟᱜ ᱠᱚ ᱫᱚᱦᱚᱭᱟ ᱾
ᱩᱱᱨᱮ ᱠᱩᱲᱤ ᱜᱤᱫᱽᱨᱟᱹ ᱟᱛᱳ ᱨᱮᱱ ᱢᱟ.ᱡᱷᱤ ᱵᱟᱵᱟ ᱠᱩᱲᱤ ᱜᱤᱫᱽᱨᱟᱹᱭ ᱠᱩᱞᱤᱭᱮᱭᱟ, ᱱᱚᱶᱟ ᱞᱚᱴᱟ ᱫᱟᱜ ᱫᱚ ᱢᱟ.ᱭ ᱯᱷᱟᱨᱪᱟ ᱜᱮᱭᱟ ᱥᱮ ᱵᱚᱰᱮ ᱜᱮᱭᱟ ᱾ ᱩᱱᱨᱮ ᱢᱟ.ᱭᱮ ᱛᱮᱞᱟᱭᱟ ᱯᱷᱟᱨᱪᱟ ᱜᱮᱭᱟ ᱾ ᱟᱫᱚ ᱢᱟ.ᱡᱷᱤ ᱵᱟᱵᱟᱭ ᱢᱮᱛᱟᱭᱟ ᱦᱚᱭ ᱵᱤᱴᱤ ᱱᱚᱶᱟ ᱯᱮᱨᱮᱡ ᱞᱚᱴᱟ ᱫᱟᱜ ᱚᱠᱟ ᱞᱮᱠᱟ ᱢᱮᱱᱟᱜᱼᱟ, ᱟᱢ ᱦᱚᱸ ᱚᱱᱠᱟ ᱜᱮ ᱛᱟᱦᱮᱸᱱ ᱢᱮ ᱾ ᱟᱨ ᱩᱱ ᱫᱤᱱ ᱫᱚ ᱜᱟᱛᱮ ᱠᱚ ᱥᱟᱞᱟᱜ ᱫᱟᱜ ᱞᱩ ᱜᱷᱟᱴ, ᱯᱩᱠᱷᱨᱤ ᱜᱷᱟᱴ, ᱟᱲᱟᱜ ᱥᱤᱫ, ᱜᱟ.ᱭ ᱜᱩᱯᱤ, ᱰᱟᱸᱜᱽᱨᱟ ᱜᱩᱯᱤ, ᱥᱟᱠᱟᱢ ᱦᱮᱡ ᱥᱮ ᱡᱟᱦᱟᱸ ᱥᱮᱫ ᱜᱮᱢ ᱪᱟᱞᱟᱜ ᱠᱟᱱ ᱛᱟᱦᱮᱸᱱᱟ ᱛᱮᱦᱮᱧ ᱠᱷᱚᱱ ᱫᱚ ᱚᱱᱟ ᱠᱚᱫᱚ ᱦᱤᱲᱤᱧ ᱠᱟᱜ ᱢᱮ ᱾
ᱟᱨ ᱱᱤᱛᱚᱜ ᱫᱚ ᱡᱟᱶᱟᱭ ᱚᱲᱟᱜ ᱛᱮᱢ ᱪᱟᱞᱟᱜ ᱠᱟᱱᱟ ᱾ ᱦᱟᱱᱦᱟᱨ ᱦᱚᱧᱦᱟᱨ ᱨᱩᱯ ᱛᱮ ᱟᱭᱳ ᱵᱟᱵᱟᱢ ᱧᱟᱢ ᱠᱤᱱᱟ, ᱫᱟᱜ ᱞᱩ ᱜᱷᱟᱴ, ᱛᱩᱯᱩᱱ ᱜᱷᱟᱴ, ᱥᱟᱠᱟᱢ ᱦᱮᱡ, ᱟᱲᱟᱜ ᱥᱤᱫ, ᱫᱟᱠᱟ ᱤᱥᱤᱱ, ᱩᱛᱩ ᱤᱥᱤᱱ ᱟᱞᱚᱢ ᱦᱤᱲᱤᱧ ᱥᱟ.ᱨᱤ ᱠᱟᱜ-ᱟ ᱾ ᱟᱨ ᱚᱲᱟᱜ ᱨᱮ ᱡᱟᱸᱦᱟᱭ ᱜᱮ ᱯᱮᱲᱟ ᱯᱟ.ᱦᱲᱟ. ᱠᱚ ᱦᱮᱡ ᱥᱮᱴᱮᱨ ᱞᱮᱱ ᱠᱷᱟᱱ ᱯᱮᱨᱮᱡ ᱞᱚᱴᱟ ᱫᱟᱜ ᱥᱩᱨ ᱠᱟᱛᱮ ᱜᱚᱰ ᱡᱚᱦᱟᱨ ᱟᱠᱚ ᱢᱮ, ᱟᱨ ᱵᱩᱜᱤ ᱵᱟ.ᱲᱤᱡ ᱠᱷᱚᱵᱚᱨ ᱠᱚᱢ ᱠᱩᱞᱤ ᱠᱚᱣᱟ ᱚᱠᱟ ᱠᱷᱚᱱ ᱠᱚ ᱦᱮᱡ ᱟᱠᱟᱱᱟ ᱢᱮᱱᱛᱮ ᱾ ᱠᱚᱲᱟ ᱦᱚᱯᱚᱱ ᱠᱚᱫᱚ ᱫᱚᱠᱛᱟ ᱥᱟᱠᱟᱢ ᱮᱢ ᱮᱢᱟ ᱠᱚᱣᱟ ᱾
ᱟᱨ ᱡᱟᱦᱟᱸ ᱛᱤᱥ ᱡᱟᱸᱦᱟᱱᱟᱜ ᱠᱚ ᱢᱮᱛᱟᱢ ᱫᱩᱠ ᱨᱮ ᱵᱤᱯᱚᱫᱽ ᱨᱮ, ᱫᱟᱠᱟ ᱨᱚᱸᱜᱚᱜ, ᱩᱛᱩ ᱨᱚᱸᱜᱚᱜ ᱾ ᱡᱟᱶᱟᱭ ᱚᱲᱟᱜ ᱨᱮᱱ ᱟᱛᱳ ᱢᱟ.ᱡᱷᱤ ᱵᱟᱵᱟ ᱴᱷᱮᱱ ᱮᱢ ᱨᱟᱜ ᱨᱚᱫᱷᱚᱱᱚᱜ-ᱟ ᱾ ᱚᱱᱟ ᱥᱟᱶᱛᱮ ᱡᱟᱶᱟᱭ ᱠᱚᱲᱟ ᱦᱚᱸᱠᱚ ᱢᱮᱛᱟᱭᱟ ᱛᱮᱦᱮᱧ ᱠᱷᱚᱱ ᱫᱚ ᱵᱟ.ᱵᱩ ᱱᱩᱭ ᱦᱚᱯᱚᱱ ᱮᱨᱟ ᱞᱮ ᱪᱟᱞᱟᱫ ᱵᱤᱱᱟ ᱡᱟᱝ ᱦᱚᱸ ᱡᱟᱝ, ᱛᱚᱨᱚᱡ ᱦᱚᱸ ᱛᱚᱨᱚᱡ ᱞᱮ ᱮᱢᱟᱫ ᱵᱤᱱᱟ ᱾
ᱚᱱᱟ ᱥᱟᱶᱛᱮ ᱠᱚᱲᱟ ᱜᱤᱫᱽᱨᱟᱹ ᱟᱛᱳ ᱨᱮᱱ ᱢᱟ.ᱡᱷᱤ ᱵᱟᱵᱟ ᱠᱚᱲᱟ ᱜᱤᱫᱽᱨᱟᱹ ᱦᱚᱸᱠᱚ ᱠᱩᱞᱤᱭᱮᱭᱟ ᱢᱟᱛᱠᱚᱢ ᱵᱩᱴᱟ.ᱨᱮ, ᱵᱟ.ᱵᱩ ᱯᱮᱨᱮᱡ ᱞᱚᱴᱟ ᱫᱟᱜ ᱫᱚ ᱯᱷᱟᱨᱪᱟ ᱜᱮᱭᱟ ᱥᱮ ᱵᱚᱰᱮ ᱜᱮᱭᱟ ᱾ ᱩᱱᱨᱮ ᱠᱚᱲᱟ ᱜᱤᱫᱽᱨᱟᱹ ᱛᱮᱞᱟᱭ ᱮᱢᱟ ᱯᱷᱟᱨᱪᱟ ᱜᱮᱭᱟ ᱢᱮᱱᱛᱮ ᱾ ᱦᱚᱭ ᱵᱟ.ᱵᱩ, ᱛᱮᱦᱮᱧ ᱠᱷᱚᱱ ᱫᱚ ᱥᱮᱸᱫᱽᱨᱟᱢ ᱪᱟᱞᱟᱜ ᱠᱟᱨᱠᱟᱢ ᱪᱟᱞᱟᱜ ᱞᱚᱜᱚᱱ ᱚᱲᱟᱜ ᱛᱮ ᱦᱤᱡᱩᱜ ᱢᱮ ᱾ ᱟᱨ ᱡᱟᱝ ᱡᱟᱝ ᱫᱚ ᱡᱚᱢ ᱢᱮ ᱟᱨ ᱡᱮᱞ ᱡᱮᱞ ᱫᱚ ᱟ.ᱜᱩ ᱛᱟᱨᱟᱭ ᱢᱮ, ᱟᱨ ᱡᱟᱸᱦᱟᱜᱮᱢ ᱡᱚᱢᱟ ᱛᱟᱨᱟ ᱫᱚ ᱡᱚᱢ ᱢᱮ ᱟᱨ ᱛᱟᱨᱟ ᱫᱚ ᱴᱷᱮᱢᱟ ᱫᱟᱨᱟᱭ ᱢᱮ ᱾ ᱱᱚᱝᱠᱟ ᱠᱟᱛᱮ ᱱᱟᱶᱟ ᱵᱟ.ᱦᱩ ᱡᱟᱶᱟᱭ ᱫᱚ ᱟᱺᱜᱤᱵᱷᱟᱨ ᱠᱚ ᱜᱚᱜ ᱟᱫ ᱠᱤᱱᱟ ᱱᱟᱭᱛᱮ ᱱᱟᱯᱟᱭ ᱛᱮ ᱟ.ᱠᱤᱱᱟᱜ ᱥᱩᱞᱩᱠ ᱡᱤᱭᱚᱱ ᱜᱷᱟᱨᱚᱸᱡᱽ ᱨᱮ ᱠᱤᱱ ᱵᱚᱞᱚᱱᱟ ᱾
ᱵᱟ.ᱦᱩ ᱠᱩᱲᱤ ᱫᱚ ᱡᱟᱶᱟᱭ ᱚᱲᱟᱜ ᱨᱮᱱᱟᱜ ᱜᱟᱱᱟᱰᱮᱭ ᱞᱮᱵᱮᱫᱟ ᱱᱟᱶᱟ ᱜᱷᱟᱨᱚᱸᱡᱽ ᱨᱮ ᱾ ᱟᱡᱤᱡ ᱛᱤᱨᱤ ᱡᱩᱨᱤᱭᱟᱜ ᱛᱤᱛᱤ ᱥᱟᱯᱟᱵ ᱠᱟᱛᱮ ᱥᱩᱞᱩᱠ ᱜᱷᱟᱨᱚᱸᱡᱽ ᱠᱤᱱ ᱛᱮᱭᱟᱨᱟ ᱾
ᱢᱤᱫᱴᱟᱹᱝ ᱵᱟ.ᱦᱩ ᱠᱩᱲᱤ ᱫᱚ ᱡᱟᱶᱟᱭ ᱚᱲᱟᱜ ᱨᱮ ᱥᱟᱱᱟᱢ ᱦᱚᱲ ᱥᱟᱶ ᱮ ᱩᱯᱨᱩᱢᱚᱜ-ᱟ ᱾ ᱦᱟᱱᱦᱟᱨ, ᱦᱚᱧᱦᱟᱨ, ᱵᱟᱦᱚᱧᱦᱟᱨ , ᱮᱨᱮᱞ ᱠᱚᱲᱟ, ᱮᱨᱮᱞ ᱠᱩᱲᱤ ᱾ ᱥᱮᱛᱟᱜ ᱨᱮ ᱵᱮᱨᱮᱫ ᱠᱟᱛᱮ ᱜᱩᱨᱤᱡ ᱰᱳᱸᱵᱳᱜ ᱞᱚᱴᱟ ᱫᱟᱜ ᱟᱛᱮ ᱚᱲᱟᱜ ᱫᱩᱣᱟ.ᱨ ᱵᱟᱦᱨᱮ ᱠᱚᱭ ᱪᱷᱚᱸᱪᱟ ᱜᱩᱨᱤᱡ ᱟᱛᱮ ᱾ ᱥᱟᱶᱛᱮ ᱜᱩᱨᱤᱡ ᱫᱟᱜ ᱞᱮᱣᱦᱟ ᱠᱟᱛᱮ ᱨᱟᱪᱟ ᱠᱚ ᱠᱷᱟ.ᱨᱟ.ᱭ ᱠᱚ ᱜᱚᱴᱟ ᱜᱩᱨᱤᱡ ᱫᱟᱜ ᱮ ᱤᱨᱪᱤᱭᱟ, ᱟᱨᱮ ᱡᱚᱜ ᱥᱟᱯᱷᱟᱭᱟ ᱚᱱᱟ ᱫᱚᱠᱚ ᱞᱟ.ᱭᱟ ᱚᱲᱟᱜ ᱫᱩᱣᱟ.ᱨ ᱥᱩᱫᱫᱷᱚᱜ-ᱟ ᱾ ᱥᱟᱶᱛᱮ ᱪᱩᱞᱦᱟᱹ ᱠᱚᱦᱚᱸᱭ ᱞᱚᱛᱟᱭᱟ ᱜᱩᱨᱤᱡ ᱛᱮ, ᱵᱷᱤᱛᱟ.ᱨ ᱵᱟᱦᱮᱨ ᱜᱚᱴᱟᱭ ᱡᱚᱜ ᱥᱟᱯᱷᱟᱭᱟ ᱾ ᱚᱱᱟ ᱛᱟᱭᱚᱢ ᱛᱷᱟ.ᱨᱤ ᱵᱟᱹᱴᱤ ᱠᱚᱭ ᱜᱟᱥᱟᱣ ᱯᱷᱟᱨᱪᱟᱭᱟ, ᱵᱟᱥᱤ ᱞᱩᱜᱽᱲᱤ ᱠᱚᱫᱚ ᱫᱚᱦᱚ ᱠᱟᱛᱮ ᱥᱟᱯᱷᱟ ᱞᱩᱜᱽᱲᱤ ᱛᱮ ᱯᱟᱞᱟᱴ ᱠᱟᱛᱮ ᱫᱟᱠᱟ ᱩᱛᱩ ᱠᱚ ᱤᱥᱤᱱ ᱵᱟᱥᱟᱝ ᱮ ᱪᱷᱩᱴᱟ.ᱣᱜ-ᱟ ᱾ ᱤᱥᱤᱱ ᱠᱟᱛᱮ ᱟᱭᱳ ᱵᱟᱵᱟ ᱫᱚ ᱡᱚᱢᱠᱚᱭ ᱮᱢ ᱟᱹᱠᱤᱱᱟ ᱟᱭᱳ ᱵᱟᱵᱟ ᱫᱚ ᱵᱚᱸᱜᱟ ᱞᱮᱠᱟ ᱜᱮ ᱢᱟᱱᱟᱣ ᱜᱩᱱᱟ.ᱣ ᱦᱳᱭᱳᱜ-ᱟ ᱾ ᱥᱚᱢᱚᱭ ᱨᱮ ᱠᱟᱹᱢᱤ ᱧᱩ ᱥᱮ ᱩᱢ ᱯᱷᱟᱨᱪᱟ, ᱛᱮᱠᱮ ᱥᱚᱵᱚᱫ ᱚᱲᱟᱜ ᱫᱩᱣᱟᱹᱨ ᱵᱷᱟᱜᱮ ᱫᱚᱦᱚᱭ ᱜᱮ ᱵᱟ.ᱦᱩ ᱠᱩᱲᱤᱭᱟᱜ ᱠᱟᱹᱢᱤ ᱠᱟᱱᱟ ᱾ ᱵᱚᱸᱜᱟᱜ ᱨᱮ ᱵᱩᱨᱩᱜ ᱨᱮ ᱩᱢ ᱯᱷᱟᱨᱪᱟ ᱠᱟᱛᱮ ᱵᱟᱝ ᱡᱚᱢ ᱧᱩ ᱠᱟᱛᱮ ᱱᱤᱨᱵᱟᱨ ᱨᱮ ᱛᱟᱦᱮᱸ ᱠᱟᱛᱮ ᱞᱟ.ᱠᱛᱤ ᱨᱮᱭᱟᱜ ᱜᱮ ᱦᱟᱺᱰᱤ ᱫᱟᱠᱟ ᱠᱚᱫᱚ ᱫᱚᱦᱚ ᱡᱟ.ᱨᱩᱲ ᱠᱟᱱᱟ ᱾ ᱵᱚᱸᱜᱟ ᱵᱳᱨᱳ ᱨᱮᱦᱚᱸ ᱵᱟ.ᱦᱩ ᱠᱩᱲᱤ ᱥᱮ ᱛᱤᱨᱞᱟ. ᱵᱟᱝᱠᱷᱟᱱ ᱜᱮ ᱪᱮᱫ ᱥᱟ.ᱜᱩᱱ ᱠᱟ.ᱢᱤ ᱦᱚᱸ ᱵᱟᱝ ᱜᱟᱱᱚᱜ-ᱟ ᱾ ᱵᱚᱸᱜᱟ ᱯᱟᱛᱲᱟ, ᱯᱷᱩᱲᱩᱜ, ᱠᱷᱳᱭ ᱠᱷᱟ.ᱡᱟ.ᱲᱤ, ᱛᱟᱵᱮᱱ ᱱᱚᱶᱟ ᱠᱚ ᱛᱮᱭᱟᱨ ᱨᱮ ᱵᱟ.ᱦᱩ ᱠᱩᱲᱤᱭᱟᱜ ᱜᱮ ᱟᱺᱜᱤᱵᱷᱟᱨ ᱫᱚ ᱾ ᱱᱟᱶᱟ ᱡᱟᱶᱟᱭ ᱦᱚᱨᱚᱜ ᱪᱤᱱ ᱵᱟ.ᱦᱩ ᱦᱚᱨᱚᱜ ᱪᱤᱱ ᱨᱮ ᱚᱲᱟᱜ ᱠᱷᱚᱱ ᱳᱰᱳᱠᱚᱜ ᱞᱟᱦᱟ ᱵᱟ.ᱦᱩ ᱠᱩᱲᱤ ᱥᱮ ᱟᱭᱳ ᱦᱚᱲ ᱜᱮ ᱥᱟ.ᱜᱩᱱ ᱞᱚᱴᱟ ᱫᱟᱜ ᱵᱚᱱ ᱫᱚᱲᱚᱢ ᱦᱚᱴᱚ ᱠᱟᱜ ᱠᱟᱱᱟ ᱾
ᱵᱟᱦᱚᱧᱦᱟᱨ ᱠᱚᱫᱚ ᱵᱟᱵᱟ ᱞᱮᱠᱟ, ᱵᱚᱠᱚᱛ ᱵᱟ.ᱦᱩ ᱠᱩᱲᱤ ᱫᱚ ᱵᱟᱭ ᱡᱚᱴᱮᱫ ᱮᱭᱟ, ᱢᱤᱫ ᱯᱟᱨᱠᱚᱢ ᱨᱮ ᱵᱟᱭ ᱫᱩᱲᱩᱵ-ᱟ ᱵᱟᱦᱚᱧᱦᱟᱨ ᱥᱟᱢᱟᱝ ᱨᱮ ᱩᱵ ᱟᱲᱟᱜ, ᱥᱮ ᱞᱩᱜᱽᱲᱤ ᱠᱚ ᱵᱟᱭ ᱡᱚᱴᱮᱫᱽ ᱛᱟᱭᱟ ᱧᱩᱛᱩᱢ ᱧᱩᱢ ᱠᱟᱛᱮ ᱵᱟᱭ ᱦᱚᱦᱚᱣᱟᱭᱟ ᱾ ᱢᱟ.ᱱ ᱟᱛᱮ ᱜᱮᱭ ᱨᱚᱲ ᱟᱭᱟ ᱥᱮᱭ ᱢᱟᱱᱟᱣ ᱜᱩᱱᱟ.ᱣ ᱮᱭᱟ ᱾ ᱟᱨ ᱮᱨᱮᱞ ᱠᱚᱲᱟ ᱮᱨᱮᱞ ᱠᱩᱲᱤ ᱠᱚᱠᱚ ᱛᱟᱦᱮᱸᱱ ᱠᱷᱟᱱ ᱵᱟ.ᱦᱩ ᱠᱩᱲᱤ ᱜᱮ ᱮᱸᱜᱟᱛ ᱞᱮᱠᱟᱭ ᱛᱤᱸᱜᱩᱱᱟ ᱨᱩᱣᱟ.ᱜ ᱨᱮ ᱦᱟᱹᱥᱩ ᱨᱮ, ᱫᱩᱠᱷ ᱵᱤᱯᱚᱫᱽ ᱨᱮ ᱟᱭᱳ ᱞᱮᱠᱟᱜᱮᱭ ᱫᱟᱯᱟᱞ ᱟᱡᱟᱜ ᱟᱧᱪᱟᱨ ᱞᱩᱜᱽᱲᱤ ᱛᱮ ᱚᱱᱛᱚᱨ ᱛᱟᱞᱟᱨᱮ ᱾
ᱢᱤᱫᱴᱟᱹᱝ ᱜᱤᱫᱽᱨᱟᱹᱭ ᱡᱟᱱᱟᱢ ᱞᱮᱱᱠᱷᱟᱱ ᱵᱚᱥᱢᱚᱛᱟ ᱨᱮ ᱟᱭᱳ ᱚᱠᱟ ᱞᱮᱠᱟ ᱟᱭᱟᱜ ᱠᱚᱲᱟᱢ ᱛᱳᱣᱟᱛᱮᱭ ᱦᱟᱨᱟᱵᱩᱨᱩᱜ-ᱟ ᱞᱚᱠᱟ ᱪᱮᱨᱮᱡ ᱟᱞᱞᱟᱫ ᱫᱩᱞᱟ.ᱲ ᱛᱮ ᱾ ᱪᱮᱫ ᱞᱮᱠᱟ ᱪᱟᱪᱳ ᱰᱤᱰᱤ ᱠᱟᱛᱮ ᱞᱟᱦᱟ ᱥᱮᱫ ᱯᱟ.ᱣᱲᱤᱭ ᱜᱤᱰᱤᱭᱟ, ᱟᱭᱳ ᱟᱲᱟᱝ ᱛᱮᱭ ᱥᱮᱪᱮᱫᱚᱜ ᱠᱟᱱ ᱵᱟ.ᱭ-ᱵᱟ.ᱭᱛᱮ ᱾
ᱚᱱᱠᱟᱜᱮ ᱡᱟᱶᱟᱭ ᱚᱲᱟᱜ ᱨᱮ ᱵᱟ.ᱦᱩ ᱠᱩᱲᱤᱭᱟᱜ ᱟᱺᱜᱤᱵᱷᱟᱨ ᱦᱚᱸ ᱥᱟᱱᱟᱢ ᱠᱷᱚᱱ ᱪᱮᱛᱟᱱᱨᱮ ᱾ ᱵᱟ.ᱦᱩ ᱠᱩᱲᱤ ᱜᱮ ᱢᱤᱫᱴᱟᱹᱝ ᱥᱩᱞᱩᱠ ᱜᱷᱟᱨᱚᱸᱡᱽ ᱮ ᱛᱮᱭᱟᱨ ᱫᱟᱲᱮᱭᱟᱜ-ᱟ, ᱟᱨ ᱵᱟᱝ ᱠᱷᱟᱱᱮ ᱨᱟ.ᱯᱩᱫ ᱫᱟᱲᱮᱭᱟᱜ-ᱟ ᱾ ᱚᱱᱟᱛᱮ ᱵᱟ.ᱦᱩ ᱠᱩᱲᱤ ᱫᱚ ᱟ.ᱰᱤ ᱛᱤᱠᱷᱳᱲ ᱟᱨ ᱱᱤᱨᱚᱲ ᱛᱟᱦᱮᱸᱱ ᱦᱳᱭᱳᱜ ᱛᱟᱭᱟ, ᱮᱛᱚᱢ ᱠᱚᱸᱭᱮ ᱞᱟᱦᱟ ᱛᱟᱭᱚᱢ ᱜᱚᱴᱟ ᱥᱮᱫ ᱫᱤᱥᱟ. ᱠᱟᱛᱮ ᱢᱚᱱᱮ ᱩᱨᱤᱡ ᱠᱟᱛᱮ ᱢᱚᱱᱮ ᱠᱮᱴᱮᱡ ᱠᱟᱛᱮ ᱛᱟᱸᱦᱮ ᱦᱳᱭ ᱟᱭᱟ ᱾ ᱡᱟᱸᱦᱟ ᱞᱮᱠᱟᱱ ᱦᱚᱭ ᱵᱷᱟᱹᱨᱰᱳ, ᱫᱟᱜ ᱡᱟ.ᱯᱩᱫ, ᱥᱤᱛᱩᱝ ᱞᱚᱞᱚ, ᱨᱮᱭᱟᱲ ᱨᱟᱵᱟᱝ, ᱡᱟᱸᱦᱟ ᱞᱮᱠᱟᱱ ᱫᱩᱠᱷ ᱫᱟᱸᱫᱮᱨ ᱜᱮ ᱦᱤᱡᱩᱜ ᱥᱟᱱᱟᱢᱟᱜ ᱜᱮ ᱚᱣᱟᱨ ᱦᱳᱭᱳᱜ ᱛᱟᱭᱟ ᱾
ᱵᱟ.ᱦᱩ ᱠᱩᱲᱤ ᱜᱮ ᱛᱤᱨᱞᱟ. ᱟᱨ ᱛᱤᱨᱞᱟ. ᱜᱮ ᱟᱭᱳ,
ᱚᱱᱟ ᱠᱷᱚᱱ ᱥᱚᱨᱮᱥ ᱪᱮᱫ ᱢᱮᱱᱟᱜ-ᱟ ᱾
ᱚᱱᱟᱛᱮ ᱟᱭᱳ ᱥᱮ ᱵᱟ.ᱦᱩ ᱠᱩᱲᱤᱭᱟᱜ ᱟᱺᱜᱤᱵᱷᱟᱨ ᱫᱚ ᱟ.ᱰᱤ ᱞᱟᱯᱷᱟᱝ ᱨᱮ ᱾
***
