ᱠᱟᱛᱷᱟ ᱨᱮᱠᱚ ᱢᱮᱱ
ᱟᱢ ᱫᱚ ᱛᱤᱨᱞᱟᱹ ᱡᱚᱱᱚᱢ
ᱮᱴᱟᱜ ᱚᱲᱟᱜ ᱦᱤᱨᱞᱟᱹ ᱾
ᱟᱢ ᱛᱤᱨᱞᱟᱹ ᱵᱟᱨ ᱡᱤᱭᱚᱱ
ᱰᱟᱺᱜᱽᱣᱟᱹ ᱡᱤᱭᱚᱱ ᱵᱟ.ᱦᱩ ᱡᱤᱭᱚᱱ
ᱪᱟᱞᱟᱜ ᱜᱮᱭᱟᱢ ᱢᱤᱫ ᱫᱤᱱ
ᱵᱮᱱᱟᱣᱜ ᱜᱮᱭᱟᱢ ᱢᱤᱫ ᱫᱤᱱ ᱾
ᱮᱴᱟᱜ ᱚᱲᱟᱜ ᱨᱟ.ᱱᱤ
ᱮᱴᱟᱜ ᱚᱲᱟᱜ ᱜᱷᱟ.ᱨᱱᱤ
ᱡᱟᱶᱟᱭ ᱚᱲᱟᱜ ᱜᱮ ᱟᱢᱟᱜ ᱚᱲᱟᱜ
ᱵᱮᱱᱟᱣᱮ ᱚᱱᱟ ᱚᱲᱟᱜ ᱵᱟ.ᱦᱩ ᱠᱩᱲᱤ ᱾
ᱟᱢ ᱫᱚᱢ ᱥᱟᱡᱟᱣᱜ ᱵᱟ.ᱦᱩ ᱨᱩᱯ ᱨᱮ
ᱟᱢᱟᱜ ᱟᱺᱜᱤᱵᱷᱟᱨ ᱦᱚᱸ ᱰᱮᱦᱮᱨᱚᱜ
ᱚᱱᱟ ᱚᱲᱟᱜ ᱨᱮᱱᱟᱜ ᱟᱺᱜᱤᱵᱷᱟᱨ
ᱚᱱᱟ ᱚᱲᱟᱜ ᱨᱮᱱᱟᱜ ᱫᱟᱭᱵᱷᱟᱨ
ᱥᱟᱱᱟᱢ ᱵᱟ.ᱦᱩ ᱠᱩᱲᱤ ᱵᱷᱟᱨ ᱾
ᱫᱟᱭᱠᱟ ᱥᱟᱱᱟᱢ ᱛᱚᱨᱟᱣ ᱟᱢ
ᱪᱷᱟᱛᱟ ᱫᱟᱨᱮ ᱠᱷᱚᱱ ᱮᱦᱚᱵ ᱠᱟᱛᱮ
ᱥᱟ.ᱜᱟᱹᱭ ᱥᱟᱱᱟᱢ ᱚᱲᱟᱜ ᱨᱮᱱᱟᱜ ᱠᱟ.ᱢᱤ
ᱥᱟᱱᱟᱢ ᱵᱚᱸᱜᱟ ᱵᱳᱨᱳ
ᱥᱟᱱᱟᱢ ᱯᱮᱲᱟ ᱵᱮᱵᱷᱟᱨ
ᱥᱟᱱᱟᱢ ᱥᱟᱶᱛᱟ ᱥᱚᱢᱟᱡᱽ
ᱥᱟᱱᱟᱢ ᱠᱟ.ᱢᱤ ᱟᱢᱟᱜ ᱟᱺᱜᱤᱵᱷᱟᱨ ᱾
ᱯᱩᱭᱞᱩ ᱫᱟᱭᱠᱟ ᱪᱷᱟᱛᱟ ᱫᱟᱨᱮ
ᱩᱱᱤᱭᱟᱜ ᱦᱚᱨᱚᱜ ᱵᱟᱸᱫᱮ ᱠᱷᱚᱱ
ᱡᱚᱢ ᱧᱩ ᱫᱷᱟᱹᱵᱤᱡ ᱟᱢᱟᱜ ᱜᱮ ᱾
ᱫᱚᱥᱟᱨ ᱫᱟᱭᱠᱟ ᱟᱢᱟᱜ
ᱱᱟᱶᱟ ᱥᱟ.ᱜᱟᱹᱭ ᱧᱟᱢ
ᱥᱟ.ᱜᱟᱹᱭ ᱛᱟᱞᱟ ᱛᱮᱢ ᱛᱚᱞᱚᱜ
ᱠᱤᱢᱤᱱ ᱵᱟ.ᱦᱩ ᱟᱭᱳ ᱥᱟ.ᱜᱟᱹᱭ
ᱟᱭᱢᱟ ᱛᱮᱢ ᱛᱚᱞᱚᱜ ᱾
ᱱᱟᱶᱟ ᱥᱟ.ᱜᱟᱹᱭ ᱡᱚᱲᱟᱣᱜ
ᱦᱟᱱᱦᱟᱨ ᱟᱭᱳ ᱦᱚᱧᱦᱟᱨ ᱵᱟᱵᱟ
ᱡᱟᱱᱟᱢ ᱟᱭᱳ ᱵᱟᱵᱟ ᱥᱟᱹᱭᱠᱟᱹᱛ
ᱫᱩᱞᱟ.ᱲ ᱢᱟᱹᱱ ᱮᱢ ᱪᱟᱞ ᱟᱹᱠᱤᱱ
ᱡᱚᱢ ᱧᱩ ᱦᱚᱨᱚᱜ ᱵᱟᱸᱫᱮ
ᱥᱟᱱᱟᱢ ᱫᱩᱠ ᱥᱩᱠ ᱮᱢ ᱵᱩᱡᱷᱟ.ᱣ ᱛᱟᱹᱠᱤᱱ ᱾
ᱵᱟᱦᱟ ᱦᱚᱧᱦᱟᱨ ᱦᱚᱧᱦᱟᱨ
ᱥᱟ.ᱜᱟᱹᱭ ᱟ.ᱰᱤ ᱦᱟᱢᱟᱞ
ᱟᱡᱟᱜ ᱥᱟᱵ ᱥᱟᱢᱟᱱ
ᱡᱚᱴᱮᱫ ᱵᱟᱹᱱᱩᱜ ᱟᱢᱟᱜ
ᱧᱩᱛᱩᱢ ᱵᱟᱝ ᱜᱮᱢ ᱥᱟᱵᱽ ᱛᱟᱭ
ᱚᱰᱚᱠ ᱵᱚᱞᱚᱱ ᱧᱟᱯᱟᱢ ᱦᱚᱨ ᱦᱚᱸᱢ ᱥᱟᱦᱟᱭ ᱾
ᱜᱩᱨ ᱠᱟᱛᱮ ᱨᱮᱦᱚᱸ ᱟᱡ ᱧᱩᱛᱩᱢ
ᱵᱚᱸᱜᱟ ᱠᱩᱲᱟᱹᱣ ᱨᱮᱦᱚᱸ ᱵᱟᱝ ᱜᱮᱢ ᱠᱟ.ᱢᱤ ᱛᱟᱭ
ᱥᱟᱱᱟᱢ ᱫᱟᱭᱠᱟ ᱢᱟᱱᱟᱣ ᱵᱟᱛᱟᱣ ᱟᱢ ᱾
ᱟᱡᱷᱱᱟᱨ ᱫᱟ.ᱭ ᱦᱚᱸ ᱫᱟ.ᱭ ᱜᱮᱢ ᱢᱮᱛᱟᱭ
ᱛᱤᱥ ᱦᱚᱸ ᱫᱮᱭᱟ ᱵᱟᱢ ᱡᱚᱴᱮᱫᱽ ᱛᱟᱭ
ᱛᱤᱥ ᱦᱚᱸ ᱵᱟᱢ ᱧᱩᱛᱩᱢ ᱮ ᱪᱮ ᱫᱤᱯᱤᱭ ᱟᱭ ᱾
ᱤᱨᱤᱞ ᱠᱚᱲᱟ ᱠᱩᱲᱤ ᱥᱟ.ᱜᱟ.ᱭ ᱟ.ᱰᱤ ᱥᱤᱵᱤᱞ
ᱥᱟᱱᱟᱢ ᱠᱟᱛᱷᱟ ᱠᱤᱱ ᱞᱟ.ᱭ ᱥᱚᱫᱚᱨ
ᱡᱟᱶᱟᱭ ᱚᱲᱟᱜ ᱦᱚᱲ ᱥᱟᱱᱟᱢ
ᱥᱟ.ᱜᱟᱹᱭ ᱛᱟᱞᱟᱛᱮ ᱢᱟᱹᱱ ᱮᱢ ᱪᱟᱞ ᱟᱢ ᱾
ᱥᱮᱛᱟᱜ ᱯᱟᱭᱟᱝ ᱯᱩᱭᱩᱝ ᱨᱮ
ᱵᱮᱨᱮᱫ ᱟᱢᱟᱜ ᱯᱩᱭᱞᱩ ᱜᱮ
ᱡᱚᱜ ᱨᱟᱪᱟ ᱜᱟᱥᱟᱣ ᱢᱟᱡᱟᱣ
ᱟᱢᱟᱜ ᱠᱟ.ᱢᱤ ᱠᱟ.ᱥᱢᱤ ᱠᱟᱱ ᱜᱮ ᱾
ᱤᱥᱤᱱ ᱠᱟᱛᱮ ᱡᱚᱢ ᱮᱢᱟ ᱠᱚ ᱦᱚᱸ
ᱟᱢᱟᱜ ᱫᱟᱭᱠᱟ ᱫᱟᱭᱠᱟ ᱜᱮ
ᱞᱚᱴᱟ ᱫᱟᱜ ᱤᱫᱤ ᱠᱟᱛᱮ ᱡᱚᱢ ᱫᱚ ᱢᱮᱛᱟ ᱠᱚᱢ
ᱵᱟᱝ ᱥᱟᱵᱽ ᱵᱷᱩᱨ ᱪᱮ ᱢᱮᱛᱟᱢ ᱵᱷᱩᱨ ᱫᱚ
ᱵᱟᱢ ᱫᱚᱦᱚ ᱜᱤᱰᱤ ᱞᱚᱴᱟ ᱫᱟᱜ ᱫᱚ ᱾
ᱜᱤᱫᱟ.ᱨ ᱯᱤᱫᱟ.ᱨ ᱡᱚᱜᱟᱣ ᱡᱚᱛᱚᱱ ᱨᱮ
ᱚᱲᱟᱜ ᱦᱚᱲ ᱨᱩᱣᱟᱹ ᱨᱟᱵᱟᱝ ᱨᱮ ᱦᱚᱸ
ᱟᱢᱟᱜ ᱫᱟᱭᱠᱟ ᱜᱮ ᱾
ᱯᱟᱨᱟᱵᱽ ᱯᱩᱱᱟᱹᱭ ᱨᱮ ᱦᱚᱸ ᱟᱢ ᱛᱤᱨᱞᱟᱹ ᱜᱮ
ᱟᱢ ᱜᱮᱢ ᱥᱚᱡᱽ ᱥᱟᱯᱲᱟᱣ ᱥᱟᱱᱟᱢ ᱜᱮ
ᱛᱚᱵᱮ ᱜᱮ ᱵᱚᱸᱜᱟ ᱵᱳᱨᱳ ᱚᱰᱚᱠ
ᱯᱮᱲᱟ ᱯᱩᱨᱵᱷᱩ ᱦᱤᱡᱩᱜ ᱨᱮᱦᱚᱸ ᱾
ᱟᱢ ᱛᱤᱨᱞᱟᱹ ᱜᱮ ᱢᱟᱬᱟᱝ ᱟᱢ
ᱯᱮᱨᱮᱡ ᱞᱚᱴᱟ ᱫᱟᱜ ᱮᱢ ᱚᱰᱚᱠ
ᱜᱚᱰ ᱟᱠᱚᱢ ᱡᱚᱦᱟᱨ ᱟᱠᱚᱢ
ᱥᱟ.ᱜᱟᱹᱭ ᱡᱟᱹᱱᱤᱡ ᱟᱢ
ᱥᱚᱢᱟᱡᱽ ᱥᱟᱶᱛᱟ ᱱᱤᱨᱟᱹᱭ ᱱᱟᱯᱟᱭ ᱨᱮ
ᱟᱢ ᱛᱤᱨᱞᱟᱹ ᱟᱜ ᱦᱚᱸ ᱫᱟᱭᱠᱟ ᱜᱮ
ᱵᱟ.ᱦᱩ ᱠᱩᱲᱤᱢ ᱥᱟᱡᱟᱣ ᱮᱱ
ᱥᱟᱱᱟᱢ ᱟᱺᱜᱤᱵᱷᱟᱨ ᱟᱢᱟᱜ ᱮᱱ ᱾
