ᱥᱟᱱᱛᱟᱲ ᱥᱟᱶᱛᱟᱨᱮ ᱡᱟᱶᱟᱭ ᱚᱲᱟᱜᱨᱮ ᱵᱟᱹᱦᱩ ᱠᱩᱲᱤᱭᱟᱜ ᱟᱺᱜᱤᱵᱷᱟᱨ ᱢᱮᱱᱛᱮ ᱫᱚ ᱡᱟᱦᱟᱸᱭ ᱱᱤᱪᱷᱚᱨᱟ ᱥᱮ ᱰᱟᱹᱜᱽᱣᱟᱹ ᱠᱩᱲᱤ ᱜᱤᱫᱽᱨᱟᱹ ᱟᱯᱱᱟᱨᱟᱜ ᱡᱟᱱᱟᱢ ᱚᱲᱟᱜ ᱢᱮᱱ ᱫᱚ ᱟᱯᱟ ᱵᱟᱲᱮ ᱚᱲᱟᱜ ᱠᱷᱚᱱᱟᱜ ᱡᱟᱭᱡᱩᱜᱽ ᱞᱟᱹᱜᱤᱫ ᱛᱮ ᱮᱴᱟᱜ ᱚᱲᱟᱜ ᱢᱮᱱ ᱫᱚ ᱡᱟᱶᱟᱭ ᱚᱲᱟᱜᱨᱮ ᱱᱟᱶᱟ ᱜᱷᱟᱨᱚᱸᱡᱽ ᱛᱟᱞᱟᱨᱮ ᱟᱡᱟᱜ ᱯᱟᱹᱣᱲᱤᱭ ᱜᱤᱰᱤᱭᱟ ᱢᱤᱫ ᱞᱩᱠᱷᱤ ᱵᱚᱸᱜᱟ ᱨᱩᱯᱛᱮ ᱟᱨ ᱚᱸᱰᱮ ᱟᱡᱟᱜ ᱚᱲᱟᱜ ᱜᱷᱟᱨᱚᱸᱡᱽ ᱨᱮᱱᱟᱜ ᱥᱟᱱᱟᱢ ᱞᱮᱠᱟᱱᱟᱜ ᱠᱟᱹᱢᱤ ᱠᱟᱹᱥᱱᱤ ᱛᱟᱞᱟᱛᱮ ᱟᱡᱟᱜ ᱥᱚᱱᱚᱛ ᱥᱚᱝᱥᱟᱨ ᱨᱮᱱᱟᱜ ᱡᱤᱭᱚᱱ ᱞᱟᱹᱣᱠᱟᱹ ᱫᱚ ᱢᱟᱲᱟᱝ ᱥᱮᱫ ᱰᱚᱭᱞᱟᱝ ᱤᱫᱤ ᱨᱮᱱᱟᱜ ᱮ ᱨᱤᱠᱟᱹᱭᱟ, ᱡᱟᱦᱟᱸ ᱛᱟᱞᱟᱛᱮ ᱟᱡᱟᱜ ᱜᱷᱟᱨᱚᱸᱡᱽ ᱵᱟᱠᱷᱳᱞ ᱨᱮᱱ ᱦᱚᱲ ᱠᱚ ᱱᱟᱭᱼᱱᱟᱯᱟᱭᱛᱮ ᱡᱤᱭᱚᱱ ᱠᱚ ᱠᱷᱟᱰᱟᱣ ᱢᱟ ᱾
ᱡᱟᱶᱟᱭ ᱚᱲᱟᱜᱨᱮ ᱵᱟᱹᱦᱩ ᱠᱩᱲᱤᱭᱟᱜ ᱟᱺᱜᱤᱵᱷᱟᱨ ᱫᱚ ᱟᱹᱰᱤ ᱜᱮ ᱫᱟᱢᱟᱱ ᱟᱱ ᱴᱷᱟᱶ ᱠᱟᱱ ᱜᱮᱭᱟ ᱾ ᱪᱮᱫᱟᱜ ᱥᱮ ᱢᱤᱫᱴᱟᱝ ᱠᱩᱲᱤ ᱜᱤᱫᱽᱨᱟᱹ ᱡᱮᱠᱷᱚᱱ ᱢᱤᱫ ᱴᱤᱰᱟᱹᱜ ᱵᱟᱦᱟ ᱥᱤᱸᱫᱩᱨ ᱟᱡᱟᱜ ᱢᱚᱞᱚᱝ ᱦᱚᱨᱟᱥᱤᱨᱮᱭ ᱧᱟᱢᱟ, ᱩᱱ ᱫᱚ ᱩᱱᱤ ᱫᱚ ᱡᱩᱨᱤ ᱯᱟᱹᱨᱤ ᱞᱮᱠᱟᱛᱮ ᱟᱭᱤᱡ ᱡᱟᱶᱟᱭᱤᱡ ᱦᱚᱲ ᱮ ᱦᱩᱭᱩᱜᱼᱟ ᱾ ᱟᱨ ᱚᱱᱟ ᱥᱟᱶ ᱥᱟᱶᱛᱮ ᱡᱟᱶᱟᱭ ᱚᱲᱟᱜ ᱨᱮᱱ ᱢᱤᱫ ᱥᱚᱦᱮᱫ ᱞᱮᱠᱟᱛᱮᱭ ᱞᱮᱠᱷᱟᱜᱼᱟ ᱾ ᱢᱮᱱ ᱫᱚ ᱩᱱᱤ ᱫᱚ ᱥᱟᱱᱟᱢ ᱞᱮᱠᱟᱱᱟᱜ ᱠᱟᱹᱢᱤ ᱛᱟᱞᱟᱛᱮ ᱟᱡᱟᱜ ᱥᱚᱝᱥᱟᱨ ᱜᱷᱟᱨᱚᱸᱡᱽ ᱚᱠᱟ ᱞᱮᱠᱟᱛᱮ ᱱᱟᱯᱟᱭ ᱛᱟᱦᱮᱸᱱᱟ ᱚᱱᱟ ᱠᱚ ᱨᱮᱱᱟᱜ ᱜᱮᱭ ᱠᱩᱨᱩᱢᱩᱴᱩᱭᱟ ᱾ ᱵᱟᱹᱦᱩ ᱠᱩᱲᱤ ᱫᱚ ᱚᱲᱟᱜ ᱨᱮᱱ ᱞᱩᱠᱷᱤ ᱠᱟᱱᱟᱭ ᱾ ᱢᱮᱱ ᱫᱚ ᱩᱱᱤ ᱫᱚ ᱵᱚᱸᱜᱟ ᱨᱤᱱᱤᱡ ᱟᱨ ᱢᱤᱫ ᱨᱩᱯ ᱾ ᱵᱚᱸᱜᱟ ᱡᱟᱦᱟᱸ ᱞᱮᱠᱟ ᱟᱡᱟᱜ ᱱᱟᱱᱟ ᱦᱩᱱᱟᱹᱨ ᱨᱩᱯ ᱛᱟᱞᱟᱛᱮ ᱱᱚᱶᱟ ᱫᱤᱥᱚᱢ ᱡᱟᱠᱟᱛ ᱨᱮᱱᱟᱜ ᱟᱺᱜᱤᱵᱷᱟᱨ ᱥᱮ ᱟᱡᱟᱜ ᱠᱟᱹᱢᱤ ᱠᱚᱭ ᱧᱮᱞ ᱥᱟᱢᱴᱟᱣ ᱮᱫᱟᱭ ᱟᱨ ᱡᱟᱦᱟᱸᱱ ᱫᱩᱠᱷ ᱵᱤᱯᱚᱫᱽ ᱨᱮ ᱟᱭᱤᱡ ᱥᱤᱨᱡᱚᱱᱤᱭᱟᱹ ᱢᱟᱹᱱᱢᱤ ᱠᱚᱭ ᱚᱣᱟᱨ ᱨᱟᱠᱟᱵᱮᱫ ᱠᱚᱣᱟ ᱥᱟᱶᱛᱮ ᱱᱟᱯᱟᱭ ᱫᱤᱥ ᱦᱩᱫᱤᱥ ᱛᱟᱞᱟᱛᱮ ᱫᱷᱚᱨᱚᱢ ᱰᱟᱦᱟᱨ ᱛᱮ ᱰᱟᱦᱨᱟᱣ ᱨᱮᱱᱟᱜ ᱮ ᱠᱩᱨᱩᱢᱩᱴᱩᱭᱮᱫ ᱠᱚᱣᱟ ᱾ ᱚᱱᱠᱟ ᱜᱮ ᱚᱲᱟᱜ ᱨᱮᱱ ᱵᱟᱹᱦᱩ ᱠᱩᱲᱤ ᱦᱚᱸ ᱟᱡᱟᱜ ᱱᱟᱱᱟ ᱦᱩᱱᱟᱹᱨ ᱨᱩᱯ ᱛᱟᱞᱟ ᱛᱮ ᱢᱮᱱ ᱫᱚ ᱦᱤᱞᱤ, ᱟᱭᱳ, ᱦᱚᱯᱚᱱ ᱟᱭᱳ, ᱢᱟᱨᱟᱝ ᱟᱭᱳ, ᱟᱨ ᱜᱚᱲᱚᱢ ᱵᱩᱰᱷᱤ ᱱᱚᱝᱠᱟ ᱜᱮ ᱚᱠᱛᱚ ᱡᱟᱹᱱᱤᱡ ᱟᱡᱟᱜ ᱱᱟᱱᱟ ᱦᱩᱱᱟᱹᱨ ᱨᱩᱯ ᱛᱟᱞᱟᱛᱮ ᱟᱡᱟᱜ ᱚᱲᱟᱜ ᱜᱷᱟᱨᱚᱸᱡᱽ ᱨᱮᱱᱟᱜ ᱫᱩᱠᱷᱼᱥᱩᱠᱷ, ᱨᱟᱹᱥᱠᱟᱹᱼᱨᱚᱢᱚᱡᱽ ᱠᱚᱭ ᱧᱮᱞ ᱥᱟᱢᱴᱟᱣ ᱮᱫᱟ ᱾ ᱩᱱᱤ ᱫᱚ ᱟᱡᱟᱜ ᱱᱟᱯᱟᱭ ᱟᱪᱟᱨᱼᱵᱮᱣᱦᱟᱨ ᱛᱟᱞᱟᱛᱮ ᱚᱲᱟᱜ ᱥᱟᱶᱛᱮ ᱟᱛᱳ ᱨᱮᱱ ᱥᱟᱱᱟᱢ ᱦᱚᱲ ᱥᱟᱞᱟᱜ ᱱᱟᱯᱟᱭ ᱛᱮ ᱥᱩᱞᱩᱠ ᱥᱟᱹᱜᱟᱹᱭ ᱮ ᱛᱮᱭᱟᱨᱟ ᱾
ᱱᱚᱸᱰᱮ ᱞᱟᱹᱭ ᱛᱚᱨᱟ ᱞᱟᱹᱠ ᱠᱟᱱᱟ ᱡᱮ – “ᱵᱟᱯᱞᱟ ᱛᱟᱭᱚᱢ ᱢᱮᱱ ᱫᱚ ᱡᱟᱶᱟᱭ ᱛᱟᱭᱚᱢ ᱢᱤᱫ ᱠᱩᱲᱤ ᱜᱤᱫᱽᱨᱟᱹ ᱫᱚ ᱯᱩᱭᱞᱩ ᱛᱮᱫᱚ ᱱᱟᱯᱟᱭ ᱟᱨ ᱥᱚᱱᱚᱛ ᱵᱟᱹᱦᱩ ᱢᱮᱱᱛᱮ ᱟᱡᱟᱜ ᱯᱩᱭᱞᱩ ᱩᱯᱨᱩᱢ ᱫᱚᱭ ᱧᱟᱢᱟ ᱾” ᱱᱤᱛᱚᱜ ᱫᱚ ᱡᱟᱶᱟᱭ ᱚᱲᱟᱜᱨᱮ ᱢᱤᱫ ᱵᱟᱹᱦᱩ ᱠᱩᱲᱤ ᱚᱠᱟ ᱞᱮᱠᱟ ᱠᱟᱹᱢᱤ ᱠᱟᱹᱥᱱᱤ ᱛᱟᱞᱟᱛᱮ ᱟᱡᱟᱜ ᱟᱺᱜᱤᱵᱷᱟᱨ ᱮ ᱜᱚᱜ ᱟᱠᱟᱫᱼᱟ ᱥᱮ ᱚᱠᱟ ᱞᱮᱠᱟᱛᱮᱭ ᱯᱩᱨᱟᱹᱣ ᱮᱫ ᱛᱟᱭᱟ ᱚᱱᱟᱜᱮ ᱞᱟᱛᱟᱨ ᱨᱮ ᱥᱚᱫᱚᱨ ᱦᱩᱭ ᱮᱱᱟ ᱾ ᱱᱚᱸᱰᱮ ᱫᱚ ᱤᱧᱟᱜ ᱢᱚᱛ ᱞᱮᱠᱟᱛᱮ ᱡᱟᱶᱟᱭ ᱚᱲᱟᱜᱨᱮ ᱵᱟᱹᱦᱩ ᱠᱩᱲᱤᱭᱟᱜ ᱟᱺᱜᱤᱵᱷᱟᱨ ᱫᱚ ᱵᱟᱨ ᱦᱟᱹᱴᱤᱧ ᱨᱮᱧ ᱦᱟᱹᱴᱤᱧ ᱟᱠᱟᱫᱟ ᱾ ᱚᱱᱟᱜᱮ ᱞᱟᱛᱟᱨ ᱨᱮ ᱜᱟᱞᱚᱪ ᱦᱩᱭᱮᱱᱟ ᱾ᱼ ᱟᱛᱳ ᱫᱤᱥᱚᱢ ᱨᱮᱱ ᱵᱟᱹᱦᱩ ᱠᱩᱲᱤᱭᱟᱜ ᱟᱺᱜᱤᱵᱷᱟᱨ ᱟᱛᱳ ᱫᱤᱥᱚᱢ ᱨᱮᱱ ᱵᱟᱹᱦᱩ ᱠᱩᱲᱤ ᱫᱚ ᱠᱟᱹᱢᱤ ᱞᱮᱠᱟᱛᱮ ᱟᱹᱣᱨᱤ ᱥᱮᱛᱟᱜ ᱠᱷᱚᱱ ᱜᱮ ᱵᱮᱨᱮᱫ ᱠᱟᱛᱮ ᱡᱚᱜᱽᱼᱨᱟᱪᱟ, ᱫᱩᱣᱟᱹᱲ ᱢᱩᱰᱩᱞᱤ, ᱜᱮᱡ ᱜᱩᱨᱤᱡ, ᱛᱷᱟᱹᱨᱤᱼᱵᱟᱹᱴᱤ ᱜᱤᱛᱤᱞ ᱜᱟᱥᱟᱣ, ᱚᱲᱟᱜᱼᱫᱩᱣᱟᱹᱨ ᱥᱟᱯᱷᱟ ᱥᱟᱹᱯᱷᱤ, ᱰᱟᱺᱜᱽᱨᱤ ᱜᱳᱲᱟ, ᱠᱟᱰᱟ ᱜᱳᱲᱟ ᱡᱚᱜᱽ, ᱤᱥᱤᱱᱼᱵᱟᱥᱟᱝ ᱛᱟᱞᱟᱛᱮ ᱡᱚᱢᱟᱜ ᱠᱚ ᱵᱮᱱᱟᱣ ᱨᱮᱱᱟᱜ ᱠᱩᱨᱩᱢᱩᱴᱩ ᱱᱚᱝᱠᱟᱱ ᱟᱭᱢᱟ ᱠᱟᱹᱢᱤ ᱛᱟᱞᱟᱛᱮ ᱟᱡᱟᱜ ᱠᱟᱹᱢᱤ ᱠᱚᱭ ᱠᱚᱨᱟᱣ ᱛᱟᱭᱟ ᱾
ᱤᱱᱟᱹ ᱛᱟᱭᱚᱢ ᱚᱲᱟᱜ ᱨᱮᱱᱟᱜ ᱠᱟᱹᱢᱤ ᱠᱚ ᱥᱟᱹᱛ ᱥᱟᱯᱲᱟᱣ ᱠᱟᱛᱮ ᱴᱤᱯᱷᱤᱱ ᱫᱟᱠᱟ ᱥᱟᱵ ᱠᱟᱛᱮ ᱵᱟᱹᱫᱽ ᱛᱮ ᱠᱟᱹᱢᱤ ᱪᱟᱞᱟᱜ, ᱚᱸᱰᱮ ᱠᱷᱚᱱᱟᱜ ᱦᱮᱡ ᱠᱟᱛᱮ ᱟᱨ ᱦᱚᱸ ᱦᱟᱱᱦᱟᱨ ᱟᱭᱳ, ᱦᱚᱧᱦᱟᱨ ᱵᱟᱵᱟ ᱥᱟᱶᱛᱮ ᱚᱲᱟᱜ ᱨᱮᱱ ᱜᱟᱹᱞᱤᱢ ᱠᱚ ᱡᱚᱢᱟᱜ ᱠᱚ ᱮᱢ ᱨᱮᱱᱟᱜ ᱮ ᱠᱩᱨᱩᱢᱩᱴᱩᱭᱟ ᱾ ᱱᱚᱛᱮ ᱟᱨ ᱦᱚᱸ ᱵᱮᱲᱟ ᱟᱹᱪᱩᱨᱚᱜ ᱥᱟᱶ ᱥᱟᱶᱛᱮ ᱢᱮᱱ ᱫᱚ ᱥᱤᱧ ᱪᱟᱸᱫᱚ ᱦᱟᱹᱥᱩᱨᱚᱜ ᱢᱟᱲᱟᱝ ᱠᱷᱚᱱ ᱜᱮ ᱟᱨ ᱦᱚᱸ ᱡᱚᱜᱼᱨᱟᱪᱟ, ᱫᱟᱜ ᱞᱩ, ᱧᱤᱫᱟᱹ ᱠᱤᱫᱩᱵ ᱨᱮ ᱪᱮᱫ ᱤᱥᱤᱱ ᱦᱩᱭᱩᱜᱼᱟ? ᱱᱚᱝᱠᱟᱱᱟᱜ ᱟᱭᱢᱟ ᱞᱮᱠᱟᱱᱟᱜ ᱪᱤᱱᱛᱟᱹ ᱵᱷᱟᱵᱽᱱᱟ ᱫᱤᱱᱟᱹᱢ ᱫᱤᱱᱜᱮ ᱢᱚᱱᱮ ᱵᱷᱤᱛᱨᱤ ᱨᱮᱭ ᱟᱹᱪᱩᱨ ᱵᱟᱲᱟᱭᱟ ᱾ ᱡᱟᱦᱟᱸ ᱫᱚ ᱚᱲᱟᱜ ᱨᱮᱱ ᱵᱟᱹᱦᱩ ᱠᱩᱲᱤ ᱪᱷᱟᱰᱟ ᱠᱟᱛᱮ ᱱᱚᱝᱠᱟᱱᱟᱜ ᱟᱺᱜᱤᱵᱷᱟᱨ ᱫᱚ ᱵᱟᱝ ᱠᱚ ᱯᱩᱨᱟᱹᱣ ᱫᱟᱲᱮᱭᱟᱜᱼᱟ ᱾ ᱟᱨ ᱦᱚᱸ ᱡᱟᱦᱟᱸᱱ ᱯᱚᱨᱚᱵᱽᱼᱯᱩᱱᱟᱹᱭ ᱠᱚᱨᱮ ᱯᱮᱲᱟᱼᱯᱟᱹᱲᱦᱟᱹ ᱫᱮᱵᱟ ᱥᱮᱵᱟ, ᱩᱱᱠᱩ ᱡᱚᱛᱚᱱ ᱡᱚᱜᱟᱣ ᱱᱚᱝᱠᱟᱱ ᱟᱭᱢᱟ ᱞᱮᱠᱟᱱ ᱠᱟᱹᱢᱤ ᱠᱚ ᱠᱚᱨᱟᱣ ᱦᱩᱭᱩᱜ ᱛᱟᱭᱟ ᱾
ᱤᱱᱟᱹ ᱛᱟᱭᱚᱢ ᱜᱤᱫᱽᱨᱟᱹ ᱠᱚ ᱛᱟᱦᱮᱸ ᱞᱮᱱᱠᱷᱟᱱ ᱩᱱᱠᱩ ᱡᱚᱜᱟᱣᱼᱡᱚᱛᱚᱱ, ᱩᱱᱠᱩ ᱤᱛᱩᱱᱼᱟᱥᱲᱟ ᱤᱫᱤ ᱟᱹᱜᱩ, ᱥᱮᱛᱟᱜ ᱧᱤᱫᱟᱹ ᱯᱟᱲᱦᱟᱣ ᱫᱩᱲᱩᱵ ᱦᱚᱪᱚ, ᱚᱠᱛᱚ ᱚᱠᱛᱚ ᱡᱚᱢᱟᱜ ᱧᱩᱣᱟᱜ ᱵᱮᱱᱟᱣ ᱱᱚᱝᱠᱟᱱᱟᱜ ᱟᱭᱢᱟ ᱠᱟᱹᱢᱤ ᱠᱚ ᱾ ᱚᱱᱟ ᱥᱟᱶᱛᱮ ᱥᱚᱝᱥᱟᱨ ᱡᱚᱜᱟᱣ ᱞᱟᱹᱜᱤᱫ ᱛᱮ ᱥᱟᱦᱟᱱᱼᱥᱟᱠᱟᱢ ᱟᱹᱜᱩ, ᱟᱲᱟᱜ ᱥᱤᱫ, ᱨᱚᱠᱚᱡ ᱦᱟᱞᱟᱝ, ᱥᱟᱠᱟᱢ ᱦᱮᱡ ᱱᱚᱝᱠᱟ ᱜᱮ ᱠᱟᱹᱢᱤ ᱛᱟᱞᱟᱛᱮ ᱟᱡᱟᱜ ᱚᱲᱟᱜ ᱵᱟᱠᱷᱳᱞ ᱫᱚᱭ ᱧᱮᱞ ᱥᱟᱢᱴᱟᱣᱟ ᱾
ᱥᱟᱦᱟᱨ ᱵᱟᱡᱟᱨ ᱨᱮᱱ ᱵᱟᱹᱦᱩ ᱠᱩᱲᱤᱭᱟᱜ ᱟᱺᱜᱤᱵᱷᱟᱨ ᱺ ᱥᱟᱦᱟᱨ ᱵᱟᱡᱟᱨ ᱨᱮᱱ ᱵᱟᱹᱦᱩ ᱠᱩᱲᱤᱭᱟᱜ ᱟᱺᱜᱤᱵᱷᱟᱨ ᱦᱚᱸ ᱟᱹᱰᱤ ᱜᱮ ᱡᱟᱹᱥᱛᱤᱭᱟ ᱾ ᱪᱮᱫᱟᱜ ᱥᱮ ᱩᱱᱤ ᱦᱚᱸ ᱥᱮᱛᱟᱜ ᱠᱷᱟᱱ ᱥᱮ ᱡᱚᱜ, ᱚᱲᱟᱜᱼᱫᱩᱣᱟᱹᱨ ᱥᱟᱯᱷᱟ ᱥᱟᱹᱯᱷᱤ, ᱡᱚᱢᱼᱧᱩ ᱛᱮᱭᱟᱨ ᱮᱢᱟᱱ ᱠᱟᱹᱢᱤ ᱛᱟᱞᱟᱛᱮ ᱟᱡᱟᱜ ᱠᱟᱹᱢᱤ ᱠᱚᱭ ᱠᱚᱨᱟᱣᱟ ᱾ ᱚᱱᱟ ᱥᱟᱶᱛᱮ ᱡᱟᱶᱟᱭ ᱡᱩᱫᱤ ᱚᱯᱷᱤᱥ ᱠᱟᱹᱢᱤ ᱛᱮᱭ ᱪᱟᱞᱟᱜᱼᱟ ᱛᱚᱵᱮ ᱠᱷᱟᱱ ᱩᱱᱤ ᱞᱟᱹᱜᱤᱫ ᱡᱩᱫᱟᱹ ᱛᱮ ᱡᱚᱢᱟᱜ ᱛᱮᱭᱟᱨ, ᱩᱱᱤ ᱥᱟᱹᱛ ᱥᱟᱯᱲᱟᱣ, ᱥᱟᱶᱛᱮ ᱜᱤᱫᱽᱨᱟᱹ ᱠᱚ ᱞᱟᱹᱜᱤᱫ ᱡᱚᱢᱟᱜ ᱛᱮᱭᱟᱨ ᱟᱨ ᱩᱱᱠᱩ ᱤᱛᱩᱱ ᱟᱥᱲᱟ ᱛᱮ ᱤᱫᱤ ᱟᱹᱜᱩ, ᱤᱱᱟᱹ ᱛᱟᱭᱚᱢ ᱩᱱᱠᱩᱣᱟᱜ ᱠᱩᱥᱤ ᱞᱮᱠᱟᱛᱮ ᱴᱤᱯᱷᱤᱱ ᱠᱚ ᱱᱟᱯᱟᱭ ᱛᱮ ᱥᱟᱡᱟᱣ ᱠᱟᱛᱮ ᱮᱢ ᱱᱚᱝᱠᱟᱱᱟᱜ ᱱᱟᱱᱟ ᱦᱩᱱᱟᱹᱨ ᱠᱟᱹᱢᱤ ᱛᱟᱞᱟᱛᱮ ᱟᱡᱟᱜ ᱠᱟᱹᱢᱤᱭ ᱠᱚᱨᱟᱣ ᱛᱟᱭᱟ ᱾ ᱤᱱᱟᱹ ᱛᱟᱭᱚᱢ ᱛᱤᱠᱤᱱ ᱵᱮᱲᱟ ᱦᱩᱭ ᱥᱟᱶ ᱥᱟᱶᱛᱮ ᱫᱟᱠᱟ ᱫᱟᱜ ᱢᱟᱺᱰᱤ ᱠᱚ ᱤᱥᱤᱱ ᱵᱟᱥᱟᱝ ᱨᱮᱱᱟᱜ ᱠᱩᱨᱩᱢᱩᱴᱩ, ᱤᱱᱟᱹ ᱠᱚ ᱥᱟᱹᱛ ᱠᱟᱛᱮ ᱚᱲᱟᱜ ᱨᱮᱱ ᱦᱟᱱᱦᱟᱨ ᱟᱭᱳ, ᱦᱚᱧᱦᱟᱨ ᱵᱟᱵᱟ ᱥᱟᱶᱛᱮ ᱥᱟᱱᱟᱢ ᱦᱚᱲ ᱠᱚ ᱡᱚᱢᱟᱜ ᱮᱢ ᱱᱚᱝᱠᱟᱜᱮ ᱫᱤᱱᱟᱹᱢ ᱫᱤᱱ ᱨᱮᱱᱟᱜ ᱠᱟᱹᱢᱤ ᱠᱟᱹᱥᱱᱤ ᱛᱟᱞᱟᱛᱮ ᱩᱱᱤ ᱫᱚ ᱟᱡᱟᱜ ᱠᱟᱹᱢᱤ ᱠᱚᱭ ᱯᱩᱨᱟᱹᱣ ᱛᱟᱭᱟ ᱾ ᱟᱨ ᱦᱚᱸ ᱡᱩᱫᱤ ᱚᱲᱟᱜ ᱨᱮᱱ ᱵᱟᱹᱦᱩ ᱠᱩᱲᱤ ᱚᱯᱷᱤᱥ ᱛᱮᱭ ᱥᱮᱱᱚᱜᱼᱟ, ᱛᱚᱵᱮ ᱠᱷᱟᱱ ᱩᱱᱤᱭᱟᱜ ᱟᱺᱜᱤᱵᱷᱟᱨ ᱫᱚ ᱟᱨ ᱦᱚᱸ ᱵᱟᱹᱲᱛᱤ ᱠᱷᱚᱱᱟᱜ ᱵᱟᱹᱲᱛᱤᱜ ᱛᱟᱭᱟ ᱾ ᱪᱮᱫᱟᱜ ᱥᱮ ᱱᱚᱛᱮ ᱚᱲᱟᱜ ᱥᱚᱝᱥᱟᱨ ᱨᱮᱱᱟᱜ ᱡᱚᱜᱼᱨᱟᱪᱟ ᱟᱨ ᱱᱚᱛᱮ ᱚᱯᱷᱤᱥ ᱠᱟᱪᱷᱟᱨᱤ ᱨᱮᱱᱟᱜ ᱠᱟᱜᱚᱡᱽ ᱠᱚᱞᱚᱢ ᱥᱟᱵ ᱵᱟᱱᱟᱨ ᱯᱟᱦᱴᱟ ᱜᱮ ᱟᱹᱰᱤ ᱥᱚᱢᱟᱱ ᱵᱷᱟᱵᱽᱛᱮ ᱧᱮᱞ ᱥᱟᱢᱴᱟᱣ ᱦᱩᱭᱩᱜ ᱠᱟᱱ ᱛᱟᱭᱟ ᱾ ᱢᱮᱱᱫᱚ ᱩᱱᱤ ᱫᱚ ᱚᱲᱟᱜ ᱜᱷᱟᱨᱚᱸᱡᱽ ᱥᱟᱶ ᱥᱟᱶᱛᱮ ᱥᱟᱱᱛᱟᱲ ᱥᱟᱶᱛᱟ ᱨᱮᱱᱟᱜ ᱥᱮᱪᱮᱫ ᱠᱟᱹᱢᱤ ᱛᱚᱨᱟᱣ ᱨᱟᱠᱟᱵ ᱨᱮᱱᱟᱜ ᱟᱺᱜᱤᱵᱷᱟᱨ ᱦᱚᱸᱭ ᱜᱚᱜ ᱟᱠᱟᱫᱟ ᱾ ᱢᱩᱪᱟᱹᱫ ᱨᱮ ᱱᱚᱶᱟ ᱜᱮ ᱢᱮᱱ ᱜᱟᱱᱚᱜᱼᱟ ᱡᱮ ᱡᱟᱶᱟᱭ ᱚᱲᱟᱜᱨᱮ ᱵᱟᱹᱦᱩ ᱠᱩᱲᱤᱭᱟᱜ ᱟᱺᱜᱤᱵᱷᱟᱨ ᱫᱚ ᱮᱠᱷᱮᱱ ᱠᱟᱹᱢᱤ ᱠᱟᱹᱥᱱᱤ ᱥᱩᱢᱩᱝ ᱫᱚ ᱵᱟᱝ ᱠᱟᱱ ᱛᱟᱭᱟ ᱾ ᱪᱟᱦᱮ ᱟᱛᱳ ᱫᱤᱥᱚᱢ ᱦᱩᱭᱩᱜ, ᱪᱟᱦᱮ ᱚᱱᱟ ᱫᱚ ᱥᱟᱦᱟᱨ ᱵᱟᱡᱟᱨ ᱦᱩᱭᱩᱜ ᱩᱱᱤ ᱫᱚ ᱥᱟᱱᱛᱟᱲ ᱥᱟᱶᱛᱟ ᱢᱮᱱ ᱫᱚ ᱟᱡᱟᱜ ᱥᱚᱢᱟᱡᱽ ᱱᱟᱯᱟᱭ ᱛᱮ ᱴᱮᱠᱟᱣ ᱫᱟᱨᱟᱢ ᱞᱟᱹᱜᱤᱫ ᱛᱮ ᱥᱮᱪᱮᱫ, ᱥᱟᱶᱦᱮᱫ, ᱯᱟᱹᱨᱥᱤ, ᱫᱷᱚᱨᱚᱢᱼᱠᱚᱨᱚᱢ, ᱱᱮᱼᱱᱮᱢᱟᱪᱟᱨ, ᱟᱹᱨᱤᱼᱪᱟᱹᱞᱤ ᱱᱟᱯᱟᱭ ᱛᱮ ᱡᱤᱭᱟᱹᱲ ᱫᱚᱦᱚᱭ ᱨᱮᱱᱟᱜ ᱟᱺᱜᱤᱵᱷᱟᱨ ᱦᱚᱸ ᱢᱮᱱᱟᱜ ᱟᱠᱟᱫ ᱛᱟᱭᱟ ᱾
ᱚᱱᱟ ᱛᱟᱭᱚᱢ ᱜᱷᱟᱨᱚᱸᱡᱽ ᱥᱚᱝᱥᱟᱨ ᱨᱮᱱᱟᱜ ᱠᱟᱹᱢᱤ ᱛᱟᱞᱟᱨᱮ ᱟᱨ ᱦᱚᱸ ᱥᱟᱶᱦᱮᱫ ᱪᱟᱨᱪᱟᱣ, ᱮᱱᱮᱡᱼᱥᱮᱨᱮᱧ, ᱠᱷᱮᱞᱚᱸᱰ, ᱚᱯᱷᱤᱥ ᱛᱮ ᱪᱟᱞᱟᱣ ᱱᱚᱝᱠᱟᱱ ᱟᱭᱢᱟ ᱠᱟᱹᱢᱤ ᱨᱮᱱᱟᱜ ᱟᱺᱜᱤᱵᱷᱟᱨ ᱮ ᱜᱚᱜ ᱟᱠᱟᱫᱟ ᱾ ᱡᱟᱦᱟᱸ ᱫᱚ ᱟᱹᱰᱤ ᱜᱚᱨᱚᱵᱽ ᱟᱨ ᱨᱟᱹᱥᱠᱟᱹ ᱨᱮᱱᱟᱜ ᱟᱹᱭᱠᱟᱹᱣ ᱠᱟᱱ ᱜᱮᱭᱟ ᱾
***
