ᱮᱛᱚᱦᱚᱵ ᱨᱮ ᱜᱮ ᱢᱮᱱ ᱜᱟᱱᱚᱜᱼᱟ ᱢᱤᱫᱴᱟᱹᱝ ᱠᱩᱲᱤ ᱦᱚᱯᱚᱱ ᱥᱮ ᱢᱤᱫ ᱛᱤᱨᱞᱟᱹ ᱦᱚᱯᱚᱱᱟᱜ ᱥᱚᱝᱥᱟᱨ, ᱵᱟᱯᱞᱟ ᱛᱟᱭᱚᱢ ᱫᱚ ᱟᱹᱰᱤᱜᱮ ᱢᱟᱨᱟᱝᱚᱜᱼᱟ ᱪᱮᱫᱟᱜ ᱥᱮ ᱩᱱᱤ ᱫᱚ ᱵᱟᱨᱭᱟ ᱜᱷᱟᱨᱚᱸᱡᱽ ᱨᱮᱱᱟᱜ ᱠᱟᱛᱷᱟᱭ ᱵᱩᱡᱷᱟᱹᱣᱼᱟ ᱟᱨ ᱚᱱᱟ ᱥᱟᱶᱻᱥᱟᱶ ᱛᱮ ᱟᱡᱟᱜ ᱫᱟᱭᱵᱷᱟᱨ ᱟᱸᱜᱚᱪ ᱠᱟᱛᱮ ᱚᱠᱟᱨᱮ ᱛᱤᱱᱟᱹᱜ ᱟᱺᱜᱤᱵᱷᱟᱨ ᱥᱟᱶᱛᱟᱭ ᱞᱟᱫᱮ ᱟᱠᱟᱣᱟᱫᱮᱭᱟ ᱚᱱᱟ ᱥᱟᱨᱟ ᱜᱷᱟᱹᱲᱤ ᱛᱚᱨᱟᱣ ᱤᱫᱤ ᱨᱮᱱᱟᱜ ᱨᱤᱠᱟᱹ ᱫᱚᱭ ᱫᱚᱦᱚᱭᱟ ᱾
ᱥᱚᱢᱟᱡᱽ ᱨᱮᱱᱟᱜ ᱫᱟᱭᱵᱷᱟᱨ ᱥᱟᱱᱟᱢ ᱠᱚᱜᱮ ᱛᱚᱨᱟᱣ ᱨᱮᱱᱟᱜ ᱡᱟᱦᱟᱸ ᱠᱟᱹᱢᱤᱦᱚᱨᱟ ᱛᱟᱦᱮᱸᱱᱟ ᱚᱱᱟ ᱠᱚᱫᱚ ᱥᱟᱱᱟᱢ ᱜᱮ ᱛᱤᱨᱞᱟᱹ ᱦᱚᱯᱚᱱ ᱫᱟᱨᱟᱭ ᱛᱮᱜᱮ ᱮᱛᱚᱦᱚᱵᱚᱜᱼᱟ ᱟᱨ ᱢᱩᱪᱟᱹᱫᱚᱜᱼᱟ ᱾ ᱛᱚᱵᱮ ᱥᱟᱶᱛᱟ ᱠᱷᱚᱱ ᱫᱚ ᱜᱷᱟᱨᱚᱸᱡᱽ ᱪᱮᱛᱟᱱ ᱨᱮᱱᱟᱜ ᱫᱟᱭᱵᱷᱟᱨ ᱪᱮ ᱟᱺᱜᱤᱵᱷᱟᱨ ᱫᱚ ᱟᱹᱰᱤ ᱜᱮ ᱵᱟᱹᱲᱛᱤᱭᱟ ᱠᱷᱟᱹᱞᱤ ᱜᱤᱫᱽᱨᱟᱹ ᱥᱩᱢᱩᱝ ᱫᱚ ᱪᱮᱫᱟᱜ, ᱜᱷᱟᱨᱚᱸᱡᱽ ᱨᱤᱱ ᱥᱟᱱᱟᱢ ᱦᱚᱲ ᱠᱚ ᱪᱮᱛᱟᱱ ᱨᱮᱜᱮ ᱟᱡᱟᱜ ᱡᱟᱦᱟᱸ ᱵᱟᱝ ᱡᱟᱦᱟᱸ ᱟᱺᱜᱤᱵᱷᱟᱨ ᱞᱮᱛᱟᱲ ᱜᱮᱭᱟ ᱾
ᱡᱮᱜᱮᱛ ᱨᱤᱱ ᱥᱟᱱᱟᱢ ᱟᱹᱫᱤᱵᱟᱹᱥᱤ ᱠᱚ ᱢᱩᱫᱽᱨᱮ ᱟᱹᱨᱤᱪᱟᱹᱞᱤ ᱨᱮᱱᱟᱜ ᱱᱟᱯᱟᱭ ᱰᱟᱦᱟᱨ ᱯᱟᱸᱡᱟ ᱞᱟᱹᱜᱤᱫ ᱦᱚᱨᱟ ᱩᱫᱩᱜ ᱫᱚ ᱟᱵᱚ ᱥᱟᱱᱛᱟᱱ ᱥᱟᱶᱛᱟ ᱨᱤᱱ ᱟᱹᱜᱤᱞ ᱦᱟᱯᱲᱟᱢ ᱠᱚᱣᱟᱜ ᱩᱭᱦᱟᱹᱨ, ᱵᱷᱟᱵᱽᱱᱟ, ᱵᱷᱮᱭᱟᱬ ᱩᱱᱟᱹᱜ ᱥᱚᱨᱮᱥ ᱫᱟᱨᱟᱭ ᱛᱮᱜᱮ ᱟᱵᱚᱣᱟᱜ ᱡᱟᱹᱛᱤ, ᱥᱟᱶᱛᱟ, ᱫᱷᱚᱨᱚᱢ, ᱨᱟᱭᱨᱤᱛ, ᱟᱪᱟᱨ ᱵᱮᱵᱷᱟᱨ, ᱞᱟᱹᱭ ᱞᱟᱠᱪᱟᱨ, ᱟᱹᱨᱤᱪᱟᱹᱞᱤ, ᱡᱮᱜᱮᱛ ᱨᱮ ᱡᱚᱛᱚ ᱠᱷᱚᱱ ᱩᱛᱟᱹᱨ ᱡᱚᱛᱚ ᱠᱷᱚᱱ ᱡᱟᱹᱱᱤᱡ ᱥᱚᱨᱮᱥᱟ ᱾ ᱚᱱᱟ ᱛᱮᱜᱮ ᱟᱵᱚᱣᱟᱜ ᱥᱚᱥᱱᱚᱜ ᱱᱤᱛᱚᱜ ᱫᱷᱟᱹᱵᱤᱡ ᱡᱤᱣᱤᱫ ᱢᱮᱱᱟᱜ ᱜᱮᱭᱟ ᱾ ᱚᱠᱟ ᱥᱟᱶᱛᱟ ᱚᱠᱟ ᱞᱮᱠᱟᱱᱟ ᱛᱤᱨᱞᱟᱹ ᱦᱚᱯᱚᱱ ᱠᱚᱣᱟᱜ ᱟᱪᱟᱨ, ᱵᱮᱵᱷᱟᱨ ᱧᱮᱞ ᱛᱮᱜᱮ ᱵᱟᱰᱟᱭ ᱧᱟᱢᱚᱜᱼᱟ ᱾ ᱟᱵᱚᱣᱟᱜ ᱥᱟᱶᱛᱟ ᱨᱮᱦᱚᱸ ᱠᱚᱲᱟ ᱟᱨ ᱠᱩᱲᱤ ᱢᱩᱫᱽᱨᱮ ᱠᱟᱹᱢᱤᱦᱚᱨᱟ ᱟᱹᱰᱤ ᱱᱟᱯᱟᱭ ᱦᱟᱹᱴᱤᱧ ᱟᱠᱟᱱᱟ ᱟᱨ ᱱᱤᱛᱚᱜ ᱫᱷᱟᱹᱵᱤᱡ ᱛᱮᱦᱚᱸ ᱚᱱᱟ ᱨᱮᱱᱟᱜ ᱰᱟᱦᱟᱨ ᱛᱮᱜᱮ ᱵᱚᱱ ᱰᱟᱦᱨᱟᱣ ᱤᱫᱤᱜ ᱠᱟᱱᱟ ᱾
ᱢᱤᱫᱴᱟᱹᱝ ᱵᱟᱹᱦᱩ ᱠᱩᱲᱤ ᱜᱮ ᱨᱤᱠᱟᱹᱭᱟᱭ ᱩᱴᱤ ᱩᱴᱤ ᱠᱟᱛᱷᱟ ᱵᱩᱴᱟᱹ ᱥᱟᱹᱦᱤᱸᱡ ᱵᱟᱰᱟᱭ ᱠᱟᱛᱮ ᱚᱠᱟ ᱠᱟᱹᱢᱤ ᱚᱠᱟᱨᱮ ᱞᱟᱜᱟᱛᱚᱜᱼᱟ ᱚᱱᱟ ᱧᱮᱞ ᱥᱟᱢᱴᱟᱣ ᱾ ᱵᱟᱹᱦᱩ ᱠᱩᱲᱤ ᱜᱮ ᱵᱚᱸᱜᱟ ᱨᱮᱱᱟᱜ ᱥᱟᱡᱽᱼᱥᱟᱯᱲᱟᱣ, ᱯᱟᱨᱟᱵᱽᱼᱯᱩᱱᱟᱹᱭ ᱨᱮᱱᱟᱜ ᱜᱮᱡ ᱜᱩᱨᱤᱡ, ᱵᱚᱸᱜᱟ ᱵᱳᱨᱳ ᱯᱮᱨᱮᱡᱼᱩᱢᱟᱹᱬ, ᱥᱟᱹᱜᱟᱹᱭ ᱯᱟᱸᱡᱟ ᱟᱛᱮ ᱢᱟᱱᱟᱣ ᱵᱟᱛᱟᱣ, ᱚᱲᱟᱜ ᱜᱷᱟᱹᱨᱱᱤ ᱫᱟᱨᱟᱭ ᱛᱮᱜᱮ ᱥᱩᱥᱟᱹᱨᱚᱜᱼᱟ ᱾ ᱜᱟᱱᱟᱰᱮ ᱨᱮᱱᱟᱜ ᱜᱟᱸᱰᱮ ᱠᱟᱴ ᱱᱚᱶᱟ ᱥᱟᱦᱟ ᱨᱮᱱᱟᱜ ᱥᱟᱱᱟᱢ ᱠᱟᱹᱢᱤᱼᱦᱚᱨᱟ ᱜᱟᱱᱟᱰᱮ ᱦᱟᱱᱟ ᱥᱟᱦᱟ ᱵᱟᱝ ᱯᱟᱨᱚᱢᱚᱜᱼᱟ ᱾ ᱪᱮᱫᱟᱜ ᱪᱮ ᱚᱲᱟᱜ ᱨᱤᱱᱤᱡ ᱜᱷᱟᱹᱨᱱᱤ ᱜᱮ ᱩᱱ ᱫᱚ ᱵᱮᱸᱜᱮᱫ ᱩᱨᱤᱡ ᱠᱟᱛᱮ ᱵᱩᱜᱤᱭᱟᱜ ᱮ ᱟᱯᱱᱟᱨᱟ ᱟᱨ ᱵᱟᱹᱲᱤᱡᱟᱜ ᱫᱚᱭ ᱥᱟᱦᱟ ᱥᱟᱺᱜᱤᱧ ᱠᱟᱜᱼᱟ ᱾ ᱱᱤᱨᱚᱲ ᱢᱚᱱᱮ, ᱱᱤᱥᱴᱟᱹ ᱡᱤᱣᱤ, ᱟᱨ ᱯᱩᱥᱴᱟᱹᱣ ᱨᱚᱲ ᱛᱟᱞᱟᱛᱮ ᱢᱤᱫᱴᱟᱹᱝ ᱮᱴᱟᱜ ᱚᱲᱟᱜᱼᱮ ᱟᱯᱱᱟᱨᱼᱟ ᱟᱨ ᱡᱤᱣᱤᱫ ᱡᱤᱵᱚᱱ ᱵᱷᱩᱨ ᱜᱚᱲᱚ ᱨᱮᱫᱚ ᱞᱮᱛᱟᱲ ᱜᱮᱭ ᱛᱟᱦᱮᱸᱱᱟ ᱾
ᱟᱹᱣᱨᱤ ᱵᱟᱯᱞᱟ ᱫᱷᱟᱹᱵᱤᱡ ᱫᱚ ᱢᱤᱫ ᱠᱩᱲᱤ ᱜᱤᱫᱽᱨᱟᱹ ᱰᱟᱺᱜᱽᱣᱟᱹ ᱟᱨ ᱵᱟᱯᱞᱟ ᱛᱟᱭᱚᱢ ᱫᱚ ᱵᱟᱹᱦᱩ ᱮᱨᱟ ᱨᱮ ᱞᱮᱠᱷᱟᱜᱼᱟᱭ ᱩᱱᱜᱮ ᱟᱡᱟᱜ ᱥᱟᱹᱨᱤ ᱡᱤᱭᱚᱱ ᱮᱛᱚᱦᱚᱵᱚᱜᱼᱟ ᱟᱡᱟᱜ ᱠᱟᱹᱨᱤ ᱛᱟᱞᱟᱛᱮ ᱠᱟᱹᱨᱫᱷᱟᱹᱱᱤ ᱩᱫᱩᱜ ᱨᱮᱜᱮ ᱟᱡᱟᱜ ᱜᱷᱟᱨᱚᱸᱡᱽ ᱩᱯᱨᱩᱢᱩᱜᱼᱟ ᱾ ᱱᱟᱶᱟ ᱚᱲᱟᱜ ᱫᱩᱣᱟᱹᱨ ᱨᱮᱱᱟᱜ ᱥᱩᱥᱟᱹᱨ ᱢᱟᱨᱥᱟᱞ ᱨᱤᱠᱟᱹ ᱠᱟᱛᱮ ᱥᱟᱶᱟᱨ ᱥᱟᱹᱦᱤᱸᱡ ᱜᱷᱟᱨᱚᱸᱡᱽ ᱮ ᱵᱮᱱᱟᱣ ᱨᱟᱠᱟᱵᱟ ᱾ ᱪᱮᱫᱟᱜ ᱥᱮ ᱚᱱᱟ ᱜᱷᱟᱨᱚᱸᱡᱽ ᱨᱤᱱᱤᱡ ᱱᱤᱛ ᱫᱚ ᱩᱱᱤ ᱜᱮ ᱜᱷᱟᱹᱨᱱᱤ ᱾ ᱠᱩᱠᱷᱤ ᱠᱚᱞᱮ ᱨᱮ ᱦᱚᱲ ᱦᱚᱯᱚᱱ ᱡᱟᱝ ᱨᱚᱦᱚᱭ ᱫᱷᱟᱹᱨᱛᱤ ᱨᱮ ᱩᱱᱤ ᱦᱚᱵᱚᱨ ᱦᱟᱨᱟ, ᱱᱟᱥᱮ ᱢᱟᱨᱟᱝ ᱮᱱ ᱠᱷᱟᱱ ᱨᱚᱲ ᱪᱮᱫ ᱚᱪᱚ ᱟᱨ ᱥᱤᱠᱷᱱᱟᱹᱛ ᱚᱞᱼᱯᱟᱲᱦᱟᱣ ᱪᱮᱫ ᱚᱪᱚ ᱠᱟᱛᱮ ᱵᱟᱹᱭ ᱵᱟᱹᱭ ᱛᱮ ᱚᱠᱛᱚ ᱡᱟᱹᱱᱤ ᱟᱹᱨᱤᱪᱟᱹᱞᱤ, ᱟᱪᱟᱨ ᱵᱮᱵᱷᱟᱨ, ᱫᱷᱚᱨᱚᱢ ᱠᱚᱨᱚᱢ ᱥᱮᱱ ᱟᱹᱭᱩᱨ ᱟᱹᱜᱩ ᱥᱩᱛᱩᱜ ᱟᱹᱜᱩ ᱨᱮᱱᱟᱜ ᱫᱟᱭᱵᱷᱟᱨ ᱫᱚ ᱩᱱᱤ ᱟᱭᱳ ᱦᱚᱲ ᱴᱷᱮᱱ ᱜᱮ ᱵᱤᱥᱛᱤ ᱠᱟᱭᱛᱮ ᱞᱟᱫᱮ ᱛᱟᱦᱮᱸᱱᱟ ᱾ ᱚᱱᱠᱟ ᱜᱮ ᱫᱤᱱ ᱫᱤᱱ ᱛᱮ ᱜᱤᱫᱽᱨᱟᱹ ᱠᱚ ᱠᱚ ᱦᱟᱨᱟ ᱵᱩᱨᱩ ᱞᱮᱱᱠᱷᱟᱱ ᱩᱱᱠᱩ ᱵᱟᱯᱞᱟ ᱠᱟᱠᱚ ᱟᱨ ᱟᱠᱚᱨᱤᱱ ᱜᱤᱫᱽᱨᱟᱹ ᱠᱚᱦᱚᱸ ᱦᱟᱨᱟ ᱵᱩᱨᱩ ᱫᱷᱟᱹᱵᱤᱡ ᱠᱚ ᱧᱮᱞ ᱜᱮᱭᱟ ᱾
ᱱᱚᱝᱠᱟ ᱜᱮ ᱵᱟᱹᱦᱩ ᱠᱩᱲᱤ ᱠᱚᱫᱚ ᱥᱚᱝᱥᱟᱨ ᱛᱮᱭᱟᱨ ᱨᱤᱠᱟᱹ ᱠᱚ ᱡᱚᱣᱟᱣ ᱚᱪᱚᱭᱟ ᱾ ᱜᱷᱟᱨᱚᱸᱡᱽ ᱧᱮᱞ ᱥᱟᱢᱴᱟᱣ ᱟᱨ ᱦᱟᱯᱲᱟᱢ ᱵᱩᱰᱤ ᱮᱨᱟ ᱡᱚᱛᱚᱱ ᱥᱟᱶᱻᱥᱟᱶ ᱛᱮ ᱚᱱᱟ ᱜᱷᱟᱨᱚᱸᱡᱽ ᱨᱤᱱ ᱦᱟᱯᱮᱱ ᱫᱤᱱ ᱨᱤᱱ ᱫᱚᱥᱟᱨ ᱯᱤᱲᱦᱤ ᱦᱚᱸᱠᱚ ᱡᱟᱱᱟᱢ ᱠᱚᱣᱟ ᱟᱨ ᱜᱷᱟᱨᱚᱸᱡᱽ ᱥᱚᱝᱥᱟᱨ ᱫᱚ ᱟᱠᱚ ᱛᱟᱭᱚᱢ ᱵᱤᱫᱟᱹᱞ ᱛᱮᱦᱚᱸ ᱚᱱᱠᱟ ᱜᱮ ᱛᱚᱸᱜᱮ ᱤᱫᱤᱜᱼᱟ ᱾ ᱫᱚᱦᱲᱟ ᱛᱮ ᱚᱱᱟ ᱚᱲᱟᱜ ᱟᱨ ᱦᱚᱸ ᱱᱟᱸᱟ ᱵᱟᱹᱦᱩ ᱠᱩᱲᱤ ᱠᱚ ᱦᱮᱡ ᱠᱟᱛᱮ ᱠᱚ ᱥᱮᱯᱮᱧ ᱫᱟᱨᱟᱢᱟ ᱾
***
