ᱥᱤᱨᱡᱚᱱ ᱨᱮᱱᱟᱜ ᱠᱟᱛᱷᱟ ᱠᱚᱵᱚᱱ ᱫᱤᱥᱟᱹ ᱞᱮᱠᱷᱟᱱ ᱜᱮ ᱵᱟᱰᱟᱭ ᱧᱟᱢ ᱟᱵᱚᱱ ᱠᱩᱲᱤ ᱦᱚᱯᱚᱱ ᱜᱮ ᱡᱟᱦᱟᱱᱟᱜ ᱟᱱᱟᱴ ᱥᱤᱨᱡᱟᱹᱣ ᱞᱮᱱᱠᱷᱟᱱ ᱟᱹᱰᱤ ᱟᱞᱜᱟᱛᱮ ᱟᱱᱟᱴ ᱠᱚ ᱥᱚᱞᱦᱮ ᱫᱟᱲᱮᱭᱟᱜᱼᱟ ᱥᱮ ᱠᱚ ᱥᱚᱞᱦᱮ ᱠᱟᱜᱼᱟ ᱾ ᱱᱚᱶᱟ ᱢᱚᱧᱪᱚ ᱯᱩᱨᱤ ᱨᱮ ᱢᱟᱹᱱᱢᱤ ᱥᱤᱨᱡᱚᱱ ᱛᱟᱭᱚᱢ ᱢᱟᱹᱱᱢᱤᱭᱟᱜ ᱡᱚᱢᱟᱜ ᱟᱨᱡᱟᱣ ᱞᱟᱹᱜᱤᱫ ᱴᱷᱟᱹᱠᱩᱨ ᱫᱚ ᱪᱟᱥ ᱨᱮᱱᱟᱜ ᱠᱟᱛᱷᱟᱭ ᱩᱭᱦᱟᱹᱨ ᱞᱮᱫᱼᱟ ᱾ ᱪᱟᱥ ᱠᱟᱹᱢᱤ ᱨᱮᱢᱟ ᱱᱟᱦᱮᱞ ᱞᱟᱜᱟᱣᱜᱼᱟ, ᱚᱱᱟ ᱱᱟᱦᱮᱞ ᱵᱮᱱᱟᱣ ᱞᱟᱹᱜᱤᱫ ᱴᱷᱟᱹᱠᱩᱨ ᱫᱚ ᱵᱤᱨᱼᱨᱮ ᱫᱟᱨᱮ ᱢᱟᱜ ᱠᱟᱛᱮ ᱱᱟᱦᱮᱞ ᱵᱮᱱᱟᱣ ᱮ ᱨᱤᱠᱟᱹ ᱠᱮᱫᱼᱟ ᱾ ᱢᱮᱱᱠᱷᱟᱱ ᱤᱥᱤ ᱟᱨᱟᱬ ᱱᱟᱦᱮᱞ ᱨᱮᱱᱟᱜ ᱚᱲᱵᱚᱝ ᱜᱮ ᱵᱟᱭ ᱜᱟᱱ ᱫᱟᱲᱮᱭᱟᱫᱼᱟ ᱾ ᱠᱷᱟᱱ ᱴᱷᱟᱹᱠᱩᱨ ᱫᱚ ᱚᱲᱟᱜ ᱛᱮ ᱨᱩᱣᱟᱹᱲ ᱠᱟᱛᱮ ᱞᱟᱸᱜᱟ ᱨᱮᱸᱜᱮᱡ ᱡᱟᱞᱟ ᱛᱮ ᱠᱩᱠᱩᱡ ᱠᱟᱛᱮᱭ ᱜᱤᱛᱤᱡ ᱛᱷᱤᱨ ᱮᱱᱟ ᱾ ᱚᱱᱟ ᱛᱟᱠ ᱨᱮᱜᱮ ᱴᱷᱟᱹᱠᱨᱟᱹᱱ ᱫᱚ ᱱᱟᱦᱮᱞ ᱵᱮᱱᱟᱣ ᱠᱟᱛᱮ ᱴᱷᱟᱹᱠᱩᱨ ᱥᱩᱨ ᱥᱮᱫ ᱨᱮᱜᱮ ᱴᱮᱸᱰᱟᱨ ᱠᱟᱫᱼᱟᱭ, ᱤᱱᱟᱹ ᱛᱟᱭᱚᱢ ᱞᱚᱴᱟ ᱨᱮ ᱫᱟᱜ ᱟᱹᱜᱩ ᱠᱟᱛᱮ ᱫᱟᱠᱟ ᱡᱚᱢ ᱞᱟᱹᱜᱤᱫ ᱮ ᱦᱚᱦᱚ ᱟᱭ ᱠᱟᱱᱟ, ᱟᱨᱮ ᱢᱮᱛᱟᱭ ᱠᱟᱱᱟ ᱟᱢ ᱫᱚ ᱪᱮᱫ ᱞᱮᱠᱟ ᱵᱟᱝ ᱮᱢ ᱜᱤᱛᱤᱡ ᱟᱠᱟᱱ, ᱱᱟᱦᱮᱞ ᱞᱮᱠᱟ ᱾ ᱴᱷᱟᱹᱠᱨᱟᱹᱱᱟᱜ ᱦᱚᱦᱚ ᱛᱮ ᱵᱮᱨᱮᱫ ᱠᱟᱛᱮ ᱧᱮᱞ ᱟᱭ ᱟᱡ ᱥᱩᱨ ᱨᱮ ᱱᱟᱦᱮᱞ ᱴᱮᱸᱰᱟᱨ ᱢᱮᱱᱟᱜᱼᱟ ᱾ ᱢᱚᱱᱮ ᱛᱮᱭ ᱵᱩᱡᱷᱟᱹᱣ ᱧᱟᱢ ᱠᱮᱫᱼᱟ ᱡᱮ ᱱᱚᱶᱟ ᱱᱟᱦᱮᱞ ᱫᱚ ᱴᱷᱟᱹᱠᱨᱟᱹᱱ ᱜᱮᱭ ᱵᱮᱱᱟᱣ ᱟᱠᱟᱫᱼᱟ ᱾ ᱱᱚᱶᱟ ᱠᱚ ᱠᱟᱛᱷᱟ ᱠᱷᱚᱱ ᱜᱮ ᱵᱟᱰᱟᱭ ᱧᱟᱢᱚᱜᱼᱟ, ᱠᱩᱲᱤ ᱦᱚᱯᱚᱱᱟᱜ ᱜᱮ ᱜᱷᱟᱨᱚᱸᱡᱽ ᱨᱮᱱᱟᱜ ᱫᱟᱭ ᱫᱟᱹᱣᱤᱛ ᱥᱮ ᱟᱺᱜᱤᱵᱷᱟᱨ ᱫᱚ ᱟᱹᱰᱤ ᱵᱟᱹᱲᱛᱤ ᱜᱮ ᱢᱮᱱᱟᱜᱼᱟ ᱾
ᱠᱩᱲᱤ ᱦᱚᱯᱚᱱᱟᱜ ᱡᱚᱱᱚᱢ ᱜᱮᱛᱚ ᱮᱴᱟᱜ ᱚᱲᱟᱜ ᱾ ᱢᱤᱫᱴᱟᱹᱝ ᱠᱩᱲᱤ ᱜᱤᱫᱽᱨᱟᱹ ᱡᱟᱱᱟᱢ ᱠᱟᱛᱮ ᱦᱟᱨᱟ ᱵᱳᱨᱳ ᱞᱮᱱ ᱠᱷᱟᱱ ᱜᱮ ᱫᱳᱞ ᱵᱟᱫᱳᱞ ᱨᱟᱹᱦᱤ ᱰᱟᱹᱰᱤᱛᱮ ᱡᱟᱶᱟᱭ ᱚᱲᱟᱜ ᱛᱮᱵᱚ ᱵᱤᱫᱟᱹᱭ ᱠᱟᱭᱟ, ᱡᱟᱶᱟᱭ ᱚᱲᱟᱜ ᱜᱮᱛᱚ ᱟᱡᱟᱜ ᱚᱲᱟᱜ ᱾ ᱠᱩᱲᱤ ᱜᱤᱫᱽᱨᱟᱹ ᱨᱩᱯᱛᱮ ᱡᱟᱱᱟᱢ ᱞᱮᱱᱠᱷᱟᱱ ᱡᱟᱶᱟᱭ ᱚᱲᱟᱜ ᱫᱚ ᱪᱟᱞᱟᱜ ᱛᱮᱜᱮ ᱦᱩᱭᱩᱜᱼᱟ ᱾ ᱱᱚᱶᱟ ᱠᱟᱛᱷᱟ ᱠᱚ ᱫᱤᱥᱟᱹ ᱠᱟᱛᱮ ᱢᱤᱫᱴᱟᱹᱝ ᱥᱮᱨᱮᱧ ᱤᱧ ᱩᱭᱦᱟᱹᱨ ᱠᱮᱫᱼᱟ_____
ᱟᱭᱳ ᱵᱟᱵᱟ ᱚᱲᱟᱜ ᱨᱮ
ᱥᱟᱹᱜᱩᱱ ᱴᱷᱤᱞᱤ ᱜᱮᱪᱚᱭ ᱫᱟᱱᱟᱝ ᱞᱤᱫᱤᱧ
ᱢᱚᱬᱮ ᱠᱚ ᱥᱟᱨ ᱥᱟᱹᱜᱩᱱ
ᱛᱩᱨᱩᱭ ᱩᱚ ᱟᱥᱤᱨᱵᱟᱫᱽ
ᱩᱞᱮ ᱵᱷᱟᱹᱨᱣᱟᱹᱜ ᱜᱮᱪᱚᱭ ᱥᱟᱢᱟᱝ ᱠᱤᱫᱤᱧ ᱾ ______
ᱥᱟᱹᱨᱤ ᱫᱚ ᱥᱟᱹᱨᱤ ᱜᱮ, ᱠᱩᱲᱤ ᱜᱤᱫᱽᱨᱟᱹ ᱫᱚ ᱡᱟᱶᱟᱭ ᱚᱲᱟᱜ ᱨᱮᱜᱮ ᱥᱚᱵᱷᱟᱜ ᱟᱭ, ᱡᱟᱶᱟᱭ ᱚᱲᱟᱜ ᱜᱮᱛᱚ ᱟᱡᱟᱜ ᱚᱲᱟᱜ ᱾ ᱚᱱᱟ ᱚᱲᱟᱜ ᱨᱮᱱ ᱥᱟᱱᱟᱢ ᱠᱚᱜᱮᱭ ᱟᱯᱱᱟᱨ ᱠᱚᱣᱟ ᱠᱩᱥᱤ ᱟᱨ ᱨᱟᱹᱥᱠᱟᱹ ᱢᱚᱱᱮᱛᱮ ᱾ ᱢᱤᱫ ᱵᱟᱹᱦᱩ ᱠᱩᱲᱤ ᱨᱩᱯᱛᱮ ᱩᱯᱨᱩᱢ ᱦᱚᱸ ᱦᱩᱭᱩᱜ ᱛᱟᱭᱟ ᱱᱟᱯᱟᱭ ᱵᱟᱹᱦᱩ ᱢᱮᱱᱛᱮ ᱾ ᱩᱱᱤ ᱫᱚ ᱫᱟᱜ ᱞᱮᱠᱟ ᱜᱮ ᱛᱤᱢᱤᱱ ᱨᱮᱪᱚ ᱥᱟᱱᱟᱢ ᱠᱚ ᱴᱷᱮᱱ ᱜᱮᱭ ᱥᱚᱲᱚ ᱢᱮᱥᱟ ᱠᱚᱜᱼᱟ ᱾ ᱟᱭᱳ ᱵᱟᱵᱟ ᱥᱤᱠᱷᱟᱹᱣ ᱠᱟᱛᱷᱟ, ᱦᱟᱱᱦᱟᱨ ᱟᱭᱳ ᱵᱤᱱᱛᱤ ᱠᱟᱛᱷᱟ ᱥᱟᱱᱟᱢᱟᱜ ᱫᱤᱥᱟᱹ ᱠᱟᱛᱮ ᱯᱟᱱᱛᱮ ᱧᱟᱢ ᱡᱚᱝ ᱟᱭ ᱟᱡᱟᱜ ᱠᱟᱹᱢᱤ ᱦᱚᱨᱟ, ᱫᱤᱥᱟᱹ ᱜᱚᱫᱟᱭ ᱵᱤᱫᱟᱹᱭ ᱵᱮᱲᱟ ᱢᱟᱛᱠᱚᱢ ᱵᱩᱴᱟᱹ ᱨᱮᱱᱟᱜ ᱠᱟᱛᱷᱟ ᱾
ᱡᱮᱠᱷᱚᱱ ᱜᱮ ᱢᱤᱫᱴᱟᱹᱝ ᱠᱩᱲᱤ ᱜᱤᱫᱽᱨᱟᱹ ᱵᱟᱯᱞᱟ ᱡᱚᱦᱚᱜ ᱢᱚᱞᱚᱝ ᱦᱚᱨᱟᱥᱤ ᱨᱮ ᱫᱟᱹᱣᱲᱟᱹ ᱪᱮᱛᱟᱱ ᱨᱮ ᱵᱚᱸᱜᱟ ᱞᱮᱠᱟ ᱫᱚᱨᱚ ᱫᱚᱨᱚ ᱥᱤᱸᱫᱩᱨ ᱮᱢ ᱦᱚᱨᱚᱜ ᱟᱭᱟ ᱩᱱ ᱨᱮᱜᱮ ᱢᱚᱱᱮ ᱫᱚ ᱵᱚᱫᱚᱞ ᱩᱛᱟᱹᱨᱚᱜ ᱛᱟᱭᱟ ᱾ ᱵᱟᱯᱞᱟ ᱠᱟᱛᱮᱢ ᱟᱹᱜᱩᱭᱮ ᱠᱟᱱᱟ ᱚᱲᱟᱜ ᱞᱩᱠᱷᱤ ᱨᱩᱯᱛᱮ ᱟᱢᱟᱜ ᱚᱲᱟᱜ, ᱫᱩᱲ ᱫᱟᱜ ᱨᱩ ᱠᱟᱛᱮᱢ ᱟᱛᱟᱝ ᱟᱫᱮᱨᱮ ᱠᱟᱱᱟ ᱾ ᱩᱱ ᱨᱮᱜᱮ ᱩᱱᱤ ᱫᱚ ᱵᱚᱸᱜᱟ ᱫᱟᱲᱮ ᱦᱚᱸᱭ ᱧᱟᱢ ᱩᱛᱟᱹᱨᱮᱫ ᱠᱟᱱᱟ ᱾ ᱩᱱᱤ ᱫᱚ ᱵᱚᱸᱜᱟ ᱜᱮ ᱠᱟᱱᱟᱭ ᱟᱢᱟᱜ ᱵᱩᱜᱤ ᱵᱟᱹᱲᱤᱡ ᱧᱮᱞ ᱫᱟᱨᱟᱢ ᱨᱮᱱᱟᱜ ᱫᱟᱲᱮ ᱢᱮᱱᱟᱜ ᱛᱟᱭᱟ ᱾ ᱥᱚᱱᱮᱜᱚᱲ ᱥᱤᱠᱲᱤ ᱛᱮ ᱟᱢ ᱥᱚᱸᱜᱮ ᱛᱚᱯᱚᱞ ᱢᱤᱫ ᱟᱠᱟᱱᱟᱭ ᱾ ᱢᱟᱭᱟ ᱡᱷᱟᱹᱞᱤ ᱛᱮᱭ ᱡᱷᱟᱹᱞᱤ ᱩᱛᱟᱹᱨ ᱢᱮᱭᱟᱭ ᱾ ᱟᱢᱮᱢ ᱨᱩᱣᱟᱹ ᱦᱟᱹᱥᱩ ᱞᱮᱱᱨᱮ ᱡᱚᱜᱟᱣ ᱡᱚᱛᱚᱱ ᱢᱮᱭᱟᱭ, ᱟᱢᱮᱢ ᱩᱥᱟᱹᱫ ᱞᱮᱱᱨᱮ ᱵᱟᱹᱱᱤᱡ ᱢᱚᱱᱮ ᱡᱤᱣᱤ ᱦᱚᱸᱭ ᱞᱟᱲᱮᱡ ᱠᱟᱛᱟᱢᱟ ᱾ ᱟᱨ ᱟᱢᱮᱢ ᱵᱟᱹᱦᱤᱡ ᱞᱮᱱᱠᱷᱟᱱ ᱢᱚᱱᱮ ᱡᱤᱣᱤ ᱜᱚᱴᱟ ᱠᱟᱛᱮ ᱛᱤᱭᱟᱹᱜ ᱥᱚᱡᱷᱮ ᱠᱟᱢᱟᱭ ᱵᱟᱠᱛᱚ ᱠᱟᱢᱟᱭ ᱾ ᱚᱠᱛᱚ ᱡᱟᱹᱱᱤᱡ ᱟᱨᱟᱜ ᱯᱩᱸᱰ ᱦᱚᱸ ᱵᱮᱸᱜᱮᱫ ᱟᱢᱟᱭ ᱾ ᱟᱵᱚ ᱥᱟᱱᱛᱟᱲ ᱥᱟᱶᱛᱟ ᱨᱮᱱ ᱵᱟᱹᱦᱩ ᱠᱩᱲᱤ ᱠᱚᱣᱟᱜ ᱠᱟᱹᱢᱤ ᱨᱮᱱᱟᱜ ᱫᱷᱟᱨᱟ ᱦᱚᱨᱟ ᱫᱚ ᱯᱟᱞᱮ ᱢᱤᱫ ᱜᱮ ᱛᱟᱵᱚᱱᱟ ᱾ ᱮᱱᱠᱷᱟᱱ ᱱᱟᱦᱟᱜ ᱢᱟ ᱠᱤᱪᱷᱤ ᱫᱚᱵᱚᱱ ᱥᱮᱪᱮᱫ ᱟᱠᱟᱱᱟ ᱟᱹᱰᱤ ᱞᱟᱯᱷᱟᱝ ᱥᱮᱪᱮᱫ ᱛᱮ ᱟᱨ ᱠᱤᱪᱷᱤ ᱫᱚ ᱟᱫᱷᱟ ᱥᱮᱪᱮᱫ ᱛᱮ ᱟᱨ ᱟᱫᱚᱢ ᱠᱚᱫᱚ ᱮᱠᱟᱞ ᱜᱮ ᱵᱟᱝ ᱟ ᱾ ᱛᱚᱵᱮ ᱠᱷᱟᱱ ᱟᱵᱚ ᱦᱚᱸ ᱯᱟᱞᱮ ᱚᱱᱠᱟ ᱜᱮ ᱡᱩᱫᱟᱹ ᱡᱩᱫᱟᱹ ᱚᱲᱟᱜ ᱫᱩᱣᱟᱹᱨ ᱵᱚᱱ ᱧᱟᱢ ᱡᱚᱝᱼᱟ ᱾ ᱟᱨ ᱟᱵᱚ ᱱᱟᱜ ᱫᱤᱥᱟᱹ ᱦᱩᱫᱤᱥ ᱦᱚᱸ ᱯᱟᱞᱮ ᱡᱩᱫᱟᱹ ᱜᱮ ᱦᱩᱭᱩᱜ ᱛᱟᱵᱚᱱᱟ ᱾ ᱟᱵᱚᱱᱟᱜ ᱠᱟᱹᱢᱤ ᱨᱮᱱᱟᱜ ᱫᱷᱟᱨᱟ ᱦᱚᱨᱟ ᱠᱚᱦᱚᱸ ᱱᱟᱥᱮ ᱫᱚ ᱡᱩᱫᱟᱹᱜ ᱜᱮᱭᱟ ᱾
ᱢᱤᱫᱴᱟᱹᱝ ᱵᱟᱹᱦᱩ ᱠᱩᱲᱤ ᱫᱚ ᱯᱩᱭᱞᱩ ᱨᱮ ᱩᱭᱦᱟᱹᱨᱟᱭ ᱟᱡᱟᱜ ᱚᱲᱟᱜ ᱫᱩᱣᱟᱹᱨ ᱚᱠᱟ ᱞᱮᱠᱟ ᱨᱮ ᱱᱟᱯᱟᱭ ᱫᱚᱦᱚ ᱠᱟᱛᱮ ᱯᱩᱨᱟᱹ ᱡᱚᱛᱚᱱ ᱟᱛᱮ ᱛᱤᱱᱟᱹᱜ ᱢᱚᱡᱽ ᱟᱨ ᱥᱳᱜᱷᱳᱲ ᱥᱟᱹᱦᱤᱡ ᱜᱷᱟᱨᱚᱸᱡᱽ ᱛᱟᱭᱮ ᱥᱟᱡᱟᱣ ᱥᱟᱯᱲᱟᱣᱼᱟ, ᱟᱡᱟᱜ ᱚᱠᱟ ᱞᱮᱠᱟᱱ ᱦᱟᱞᱚᱛ ᱥᱮ ᱚᱵᱚᱥᱛᱟ ᱩᱱᱤ ᱫᱚ ᱚᱱᱠᱟ ᱞᱮᱠᱟ ᱜᱮ ᱟᱡᱟᱜ ᱫᱟᱲᱮ ᱫᱤᱥᱟᱹ ᱠᱟᱛᱮ ᱜᱮ ᱠᱟᱹᱢᱤ ᱤᱫᱤᱭᱟᱭ ᱾ ᱠᱟᱹᱢᱤ ᱛᱟᱞᱟ ᱨᱮᱜᱮ ᱧᱮᱞ ᱦᱩᱭᱩᱜ ᱛᱟᱭᱟ ᱦᱟᱱᱦᱟᱨ ᱦᱚᱧᱦᱟᱨ ᱟᱡ ᱨᱮᱱ ᱢᱚᱱ ᱡᱩᱨᱤ ᱥᱟᱶᱛᱮ ᱜᱤᱫᱟᱹᱨ ᱯᱤᱫᱟᱹᱨ ᱾ ᱚᱠᱛᱚ ᱨᱮ ᱵᱮᱨᱮᱫ ᱠᱟᱛᱮ ᱡᱚᱜ ᱜᱤᱰᱤ ᱜᱤᱛᱤᱞ ᱜᱷᱟᱥᱟᱣ ᱤᱥᱤᱱ ᱵᱟᱥᱟᱝ ᱠᱟᱛᱮ ᱚᱲᱟᱜ ᱨᱮᱱ ᱥᱟᱱᱟᱢ ᱠᱚ ᱚᱠᱛᱚ ᱨᱮ ᱡᱚᱢ ᱧᱩ ᱚᱪᱚ ᱠᱚ ᱦᱩᱭᱩᱜ ᱛᱟᱭᱟ ᱾ ᱟᱨ ᱜᱤᱫᱟᱹᱨ ᱯᱤᱫᱟᱹᱨ ᱠᱚ ᱥᱟᱯᱲᱟᱣ ᱠᱟᱛᱮ ᱤᱛᱩᱱ ᱟᱥᱲᱟ ᱛᱮ ᱵᱷᱮᱡᱟ ᱠᱟᱠᱚ ᱦᱩᱭᱩᱜᱼᱟ ᱾ ᱩᱱᱠᱩᱟᱜ ᱚᱞ ᱯᱟᱲᱦᱟᱣ ᱚᱠᱟ ᱞᱮᱠᱟ ᱦᱩᱭᱩᱜ ᱠᱟᱱᱟ ᱚᱱᱟ ᱦᱚᱱ ᱱᱤᱦᱟᱹᱛ ᱜᱮ ᱫᱤᱥᱟᱹ ᱛᱚᱨᱟ ᱨᱮᱱᱟᱜ ᱞᱟᱹᱠᱛᱤ ᱢᱮᱱᱟᱜᱼᱟ ᱾ ᱧᱮᱞ ᱫᱟᱨᱟᱢ ᱦᱩᱭᱩᱜ ᱛᱟᱭᱟ ᱯᱮᱲᱟ ᱯᱟᱹᱲᱦᱟᱹ, ᱜᱷᱟᱨᱚᱸᱡᱽ ᱨᱮᱱᱟᱜ ᱡᱟᱸᱦᱟ ᱠᱚ ᱠᱟᱹᱢᱤ ᱢᱮᱱᱟᱜᱼᱟ ᱚᱱᱟ ᱠᱚᱢᱟ ᱠᱟᱹᱢᱤ ᱛᱮᱜᱮ ᱦᱩᱭᱩᱜᱼᱟ ᱾ ᱚᱠᱛᱚ ᱡᱟᱹᱱᱤᱡ ᱟᱹᱯᱟᱹᱥᱩᱞᱚᱜ ᱞᱟᱹᱜᱤᱫ ᱵᱟᱦᱮᱨᱚᱜ ᱦᱚᱱ ᱦᱩᱭᱩᱜ ᱜᱮᱭᱟ ᱾ ᱟᱵᱚ ᱦᱚᱲ ᱦᱚᱯᱚᱱ ᱠᱚᱫᱚ ᱡᱟᱹᱥᱛᱤ ᱠᱟᱭᱛᱮ ᱱᱟᱞᱦᱟ ᱛᱩᱢᱟᱹᱞ ᱠᱟᱛᱮ ᱵᱚ ᱡᱚᱢᱟ, ᱪᱟᱥ ᱠᱟᱛᱮ ᱵᱚ ᱟᱹᱥᱩᱞᱚᱜᱼᱟ ᱾ ᱛᱩᱫ ᱨᱚᱦᱚᱭ ᱡᱮᱨᱮᱲ ᱯᱚᱛᱟᱣ ᱜᱮᱡ ᱜᱩᱨᱤᱡ ᱥᱟᱠᱟᱢ ᱦᱮᱡ ᱯᱟᱛᱲᱟ ᱯᱟᱹᱴᱤ ᱥᱟᱦᱟᱱ ᱫᱤᱯᱤᱞ ᱟᱵᱚ ᱫᱚ ᱥᱟᱱᱟᱢ ᱠᱟᱹᱢᱤ ᱜᱮᱵᱚ ᱵᱟᱰᱟᱭᱟ ᱾
ᱟᱛᱷᱟᱢ ᱠᱟᱹᱢᱤ ᱛᱟᱞᱟ ᱨᱮᱦᱚᱸ ᱢᱤᱫᱴᱟᱹᱝ ᱵᱟᱹᱦᱩ ᱠᱩᱲᱤ ᱫᱚ ᱟᱡᱟᱜ ᱚᱲᱟᱜ ᱫᱩᱣᱟᱹᱨ ᱫᱚ ᱵᱟᱭ ᱰᱷᱤᱞᱟᱹᱣᱼᱟ, ᱱᱟᱦᱟᱜ ᱢᱟᱛᱚᱭ ᱥᱤᱠᱷᱤᱛ ᱟᱠᱟᱱ ᱟᱡ ᱦᱚᱸ ᱟᱡ ᱨᱮᱱ ᱚᱲᱟᱜ ᱦᱚᱲ ᱠᱚ ᱱᱟᱯᱟᱭ ᱫᱚᱦᱚ ᱨᱮᱱᱟᱜ ᱟᱺᱜᱤᱵᱷᱟᱨ ᱢᱟᱭ ᱜᱚᱜ ᱵᱷᱟᱹᱨᱭᱟᱹ ᱟᱠᱟᱫ ᱜᱮ ᱚᱱᱟ ᱥᱟᱶ ᱥᱟᱶᱛᱮ ᱜᱤᱫᱽᱨᱟᱹ ᱯᱤᱫᱽᱨᱟᱹ ᱠᱚ ᱱᱟᱯᱟᱭ ᱦᱚᱨ ᱰᱟᱦᱟᱨ ᱩᱫᱩᱜ ᱟᱠᱚᱣᱟᱭ ᱟᱨ ᱱᱟᱭᱛᱮ ᱱᱟᱯᱟᱭᱛᱮ ᱦᱟᱨᱟ ᱵᱳᱨᱳ ᱠᱟᱛᱮ ᱟᱹᱰᱤ ᱞᱟᱯᱷᱟᱝ ᱥᱮᱪᱮᱫ ᱦᱚᱪᱚ ᱠᱚ ᱞᱟᱹᱜᱤᱫ ᱩᱭᱦᱟᱹᱨ ᱵᱷᱟᱵᱽᱱᱟ ᱦᱚᱸᱭ ᱫᱚᱦᱚᱭᱟ ᱾ ᱚᱠᱟ ᱞᱮᱠᱟᱨᱮ ᱵᱷᱟᱜᱮ ᱞᱮᱠᱟ ᱠᱚ ᱚᱞᱚᱜᱼᱟ ᱱᱟᱯᱟᱭ ᱚᱨᱡᱚ ᱠᱚ ᱧᱟᱢᱟ, ᱚᱱᱟ ᱠᱟᱛᱷᱟ ᱫᱤᱥᱟᱹ ᱠᱟᱛᱮ ᱚᱠᱛᱚ ᱡᱟᱹᱱᱤᱡ ᱤᱛᱩᱱ ᱟᱥᱲᱟ ᱵᱷᱮᱡᱟ ᱥᱟᱶᱛᱮ ᱜᱤᱫᱽᱨᱟᱹ ᱛᱩᱞᱩᱡ ᱢᱮᱫ ᱞᱩᱛᱩᱨ ᱨᱮᱱᱟᱜ ᱦᱚᱸ ᱱᱤᱦᱟᱹᱛ ᱜᱮ ᱞᱟᱹᱠᱛᱤ ᱢᱮᱱᱟᱜᱼᱟ ᱾ ᱩᱱᱠᱩ ᱟᱜ ᱟᱜᱟᱢᱼᱮ ᱩᱭᱦᱟᱹᱨᱼᱟ ᱾ ᱤᱱᱟᱹ ᱥᱩᱢᱩᱝ ᱫᱚ ᱵᱟᱝᱼᱟ ᱦᱟᱱᱦᱟᱨ ᱟᱭᱳ ᱦᱚᱧᱦᱟᱨ ᱵᱟᱵᱟ ᱛᱟᱹᱠᱤᱱᱟᱜ ᱵᱩᱜᱤ ᱵᱟᱹᱲᱤᱡ ᱧᱮᱞ ᱦᱚᱸ ᱫᱟᱹᱭᱤᱛ ᱠᱟᱱ ᱛᱟᱭᱟ, ᱩᱱᱠᱤᱱ ᱠᱤᱱ ᱨᱩᱣᱟᱹ ᱦᱟᱹᱥᱩ ᱞᱮᱱᱠᱷᱟᱱ ᱡᱚᱜᱟᱣ ᱡᱚᱛᱚᱱ ᱦᱚᱸ ᱦᱩᱭᱩᱜᱼᱟ ᱾ ᱥᱟᱶᱛᱟ ᱛᱟᱞᱟ ᱨᱮᱱᱟᱜ ᱡᱟᱸᱦᱟ ᱠᱟᱹᱢᱤ ᱠᱚ ᱢᱮᱱᱟᱜ ᱛᱟᱵᱚᱱᱟ ᱚᱱᱟ ᱠᱚᱦᱚᱸ ᱠᱟᱹᱢᱤ ᱠᱟᱜ ᱦᱩᱭᱩᱜ ᱛᱟᱭᱟ ᱾ ᱜᱤᱫᱽᱨᱟᱹ ᱠᱚ ᱦᱟᱨᱟ ᱞᱮᱱᱠᱷᱟᱱ ᱟᱯᱱᱟᱨ ᱡᱟᱸᱜᱟ ᱛᱮᱠᱚ ᱛᱤᱸᱜᱩ ᱠᱮᱴᱮᱡ ᱞᱮᱱᱠᱷᱟᱱ ᱩᱱᱠᱩ ᱦᱚᱸ ᱦᱤᱨᱞᱟᱹ ᱠᱟᱠᱚ ᱨᱮᱱᱟᱜ ᱠᱟᱛᱷᱟ ᱦᱚᱸ ᱩᱭᱦᱟᱹᱨ ᱦᱩᱭᱩᱜ ᱛᱟᱭᱟ ᱾ ᱠᱩᱲᱤ ᱜᱤᱫᱽᱨᱟᱹ ᱠᱷᱟᱱ ᱱᱟᱯᱟᱭ ᱚᱲᱟᱜ ᱫᱩᱣᱟᱹᱨ ᱧᱮᱞ ᱠᱟᱛᱮ ᱜᱚᱝ ᱠᱟᱭ ᱦᱩᱭᱩᱜᱼᱟ, ᱟᱨ ᱠᱚᱲᱟ ᱜᱤᱫᱽᱨᱟᱹ ᱠᱷᱟᱱ ᱱᱟᱯᱟᱭ ᱵᱟᱹᱦᱩ ᱟᱹᱜᱩᱣᱟᱭ ᱦᱩᱭᱩᱜᱼᱟ ᱾ ᱟᱡ ᱪᱮᱫ ᱞᱮᱠᱟ ᱢᱤᱫ ᱚᱠᱛᱮ ᱠᱤᱢᱤᱱ ᱢᱮᱱᱛᱮ ᱦᱟᱱᱦᱟᱨ ᱟᱭᱳᱭ ᱟᱛᱟᱝ ᱟᱫᱮᱨ ᱞᱮᱫᱮᱭᱟ ᱚᱱᱠᱟ ᱜᱮ ᱟᱡ ᱦᱚᱸ ᱠᱤᱢᱤᱱ ᱟᱯᱱᱟᱨ ᱠᱟᱛᱮ ᱩᱫᱩᱜ ᱪᱮᱫ ᱟᱭ ᱦᱩᱭᱩᱜ ᱛᱟᱭᱟ ᱾ ᱱᱚᱝᱠᱟ ᱜᱮ ᱯᱟᱹᱦᱤᱞ ᱠᱷᱚᱱᱟᱜ ᱱᱤᱭᱚᱢ ᱫᱚ ᱪᱟᱹᱞᱩ ᱦᱮᱡ ᱟᱠᱟᱱᱟ ᱾
ᱢᱩᱪᱟᱹᱫ ᱨᱮ ᱥᱧ ᱫᱚ ᱱᱤᱭᱟᱹ ᱜᱤᱧ ᱞᱟᱹᱭᱼᱟ ᱢᱤᱫᱴᱟᱹᱝ ᱵᱟᱹᱦᱩ ᱠᱩᱲᱤ ᱚᱠᱟ ᱚᱠᱛᱚ ᱚᱠᱟ ᱞᱮᱠᱟᱱᱟᱜ ᱠᱟᱹᱢᱤ ᱦᱩᱭ ᱟᱭᱟ ᱟᱡᱟᱜ ᱦᱚᱸ ᱚᱱᱠᱟ ᱞᱮᱠᱟᱱ ᱫᱟᱲᱮ ᱢᱮᱱᱟᱜ ᱜᱮᱭᱟ ᱾ ᱟᱨ ᱩᱱ ᱡᱚᱦᱚᱜ ᱫᱚ ᱚᱱᱠᱟ ᱚᱱᱠᱟ ᱞᱮᱠᱟ ᱜᱮᱭ ᱠᱟᱹᱢᱤ ᱤᱫᱤᱭᱟ ᱚᱲᱟᱜ ᱥᱚᱝᱥᱟᱨ ᱨᱮᱱᱟᱜ ᱥᱟᱶᱛᱮ ᱱᱚᱶᱟ ᱡᱮᱜᱮᱫ ᱥᱚᱝᱥᱟᱨ ᱨᱮᱱᱟᱜ ᱟᱺᱜᱤᱵᱷᱟᱨ ᱦᱚᱸ ᱜᱚᱜ ᱵᱷᱟᱹᱨᱭᱟᱹ ᱫᱟᱲᱮᱭᱟᱜ ᱜᱮᱭᱟᱭ ᱯᱟᱞᱮ ᱾ ᱠᱩᱲᱤ ᱦᱚᱯᱚᱱ ᱴᱷᱮᱱ ᱜᱮ ᱥᱟᱱᱟᱢ ᱞᱮᱠᱟᱱ ᱫᱟᱲᱮ ᱢᱮᱱᱟᱜᱼᱟ ᱾ ᱱᱚᱶᱟ ᱠᱟᱛᱷᱟ ᱞᱟᱹᱭ ᱞᱟᱹᱭᱛᱮ ᱢᱤᱫᱴᱟᱹᱝ ᱛᱩᱢᱟᱹᱞ ᱧᱟᱢ ᱥᱮᱨᱮᱧ ᱤᱧ ᱩᱭᱦᱟᱹᱨ ᱜᱚᱫ ᱠᱮᱫᱼᱟ____
“ᱫᱩᱠ ᱵᱮᱜᱚᱨ ᱥᱩᱠ ᱫᱚ ᱫᱤᱥᱚᱢ ᱨᱮ ᱵᱟᱹᱱᱩᱜᱼᱟ
ᱠᱟᱹᱢᱤ ᱵᱮᱜᱚᱨ ᱠᱩᱲᱟᱹᱭ ᱵᱟᱝ ᱜᱮ ᱧᱟᱢᱚᱜ
ᱜᱟᱛᱮ ᱠᱩᱲᱤ ᱠᱟᱛᱷᱟ ᱟᱞᱚᱢ ᱟᱸᱡᱚᱢ ᱮᱱᱟ
ᱡᱟᱣᱟᱭ ᱚᱲᱟᱜ ᱠᱷᱚᱱᱟᱜ ᱟᱞᱚᱢ ᱫᱟᱹᱲᱟ
ᱡᱟᱣᱟᱭ ᱚᱲᱟᱜ ᱜᱮᱛᱚ ᱟᱢᱟᱜ ᱚᱲᱟᱜ ᱠᱟᱱᱟ
ᱠᱟᱹᱢᱤ ᱡᱚᱝ ᱢᱮ ᱟᱞᱚᱢ ᱠᱟᱹᱦᱤᱸᱥᱚᱜᱼᱟ ᱾”
***
