ᱞᱟᱦᱟ ᱛᱮᱵᱚ ᱵᱟᱰᱟᱭ ᱞᱮᱜᱮ ᱵᱟᱹᱦᱩ ᱠᱩᱲᱤ ᱫᱚ ᱚᱠᱚᱭ? ᱟᱨ ᱡᱟᱶᱟᱭ ᱚᱲᱟᱜ ᱫᱚ ᱚᱠᱟᱨᱮ? ᱠᱩᱲᱤ ᱜᱤᱫᱽᱨᱟᱹ ᱡᱚᱠᱷᱚᱱ ᱜᱮ ᱵᱚᱱ ᱵᱟᱯᱞᱟᱭᱮ ᱠᱟᱱᱟ ᱩᱱᱜᱮ ᱩᱱᱤᱫᱚ ᱵᱟᱹᱦᱩᱠᱩᱲᱤ ᱵᱚᱱ ᱢᱮᱛᱟᱭ ᱠᱟᱱᱟ ᱾ ᱟᱨ ᱡᱟᱦᱟᱸ ᱜᱷᱟᱨᱚᱸᱡᱽ ᱨᱮ ᱩᱱᱤ ᱠᱩᱲᱤ ᱜᱤᱫᱽᱨᱟᱹ ᱵᱟᱯᱞᱟ ᱠᱟᱛᱮ ᱚᱲᱟᱜ ᱮ ᱵᱚᱞᱚᱱ ᱠᱟᱱᱟ ᱼ ᱚᱱᱟᱜᱮ ᱛᱟᱭ ᱩᱱᱤᱭᱟᱜ ᱫᱚ ᱡᱟᱶᱟᱭ ᱚᱲᱟᱜ ᱾ ᱡᱚᱠᱷᱚᱱ ᱜᱮ ᱩᱱᱤ ᱠᱩᱲᱤ ᱜᱤᱫᱽᱨᱟᱹ ᱡᱟᱱᱟᱢ ᱚᱲᱟᱜ, ᱡᱟᱱᱟᱢ ᱟᱹᱛᱩ ᱠᱷᱚᱱ ᱠᱚ ᱵᱤᱫᱟᱹᱭ ᱮᱭᱟ ᱩᱱᱨᱮ ᱟᱡ ᱨᱮᱱ ᱢᱟᱹᱡᱷᱤ, ᱡᱟᱶᱟᱭ ᱟᱹᱛᱩ ᱨᱮᱱ ᱢᱟᱹᱡᱷᱤ ᱦᱚᱛᱮᱛᱮ ᱡᱟᱶᱟᱭ ᱴᱷᱮᱱᱮ ᱪᱟᱞ ᱠᱟᱭᱟ ᱼ ᱩᱱ ᱡᱚᱠᱷᱮᱡ ᱠᱚ ᱢᱮᱱᱟ ᱼ “ᱵᱟᱹᱦᱩ ᱠᱩᱲᱤᱭᱟᱜ ᱡᱤᱞ ᱦᱚᱸ ᱡᱤᱞ, ᱡᱟᱝ ᱦᱚᱸ ᱡᱟᱝ ᱟᱯᱮ ᱞᱮ ᱪᱟᱞᱟᱫ ᱯᱮᱭᱟ ᱾” ᱱᱚᱶᱟ ᱠᱟᱛᱷᱟ ᱨᱮᱭᱟᱜ ᱢᱮᱱᱮᱛ ᱫᱚ ᱼ ᱵᱟᱹᱦᱩᱠᱩᱲᱤ ᱡᱤᱵᱚᱱ ᱵᱷᱳᱨ ᱟᱹᱥᱩᱞ ᱮ ᱨᱮᱭᱟᱜ ᱟᱨ ᱜᱚᱡ ᱯᱚᱨᱮ ᱡᱟᱝ ᱵᱟᱦᱟ ᱱᱟᱹᱭᱨᱮ ᱵᱳᱦᱮᱞ ᱠᱟᱜ ᱨᱮᱭᱟᱜ ᱡᱤᱢᱢᱟᱹ ᱫᱚ ᱡᱟᱶᱟᱭ ᱚᱲᱟᱜ ᱨᱤᱱ ᱠᱚᱣᱟᱜ ᱠᱟᱱᱟ ᱾ ᱵᱟᱹᱦᱩᱠᱩᱲᱤ ᱫᱚ ᱡᱤᱵᱚᱱ ᱵᱷᱳᱨ ᱡᱟᱶᱟᱭ ᱚᱲᱟᱜ ᱨᱮ ᱛᱟᱦᱮᱱ ᱞᱟᱹᱜᱤᱫ, ᱡᱟᱶᱟᱭ ᱚᱲᱟᱜ ᱜᱮ ᱟᱡᱟᱜ ᱱᱤᱡᱮᱨ ᱚᱲᱟᱜ ᱢᱟᱱᱟᱣ ᱞᱟᱹᱜᱤᱫ, ᱡᱟᱶᱟᱭ ᱚᱲᱟᱜ ᱨᱮᱭᱟᱜ ᱵᱚᱝᱥᱚ ᱵᱟᱲᱦᱟᱣ ᱞᱟᱹᱜᱤᱫ, ᱡᱟᱶᱟᱭ ᱚᱲᱟᱜ ᱨᱮᱭᱟᱜ ᱞᱟᱦᱟᱱᱛᱤ ᱞᱟᱹᱜᱤᱫ, ᱡᱟᱶᱟᱭ ᱚᱲᱟᱜ ᱨᱮᱱ ᱦᱚᱲᱠᱚ ᱛᱟᱞᱟᱨᱮ ᱛᱟᱦᱮᱱ ᱞᱟᱹᱜᱤᱫ, ᱢᱚᱱᱮ ᱠᱟᱛᱮ ᱡᱟᱶᱟᱭ ᱚᱲᱟᱜᱨᱮ ᱵᱚᱞᱚᱱ ᱟᱭ ᱾ ᱱᱚᱶᱟ ᱦᱩᱫᱤᱥ ᱠᱚ ᱢᱚᱱᱮᱨᱮ ᱫᱚᱦᱚ ᱠᱟᱛᱮ ᱥᱟᱱᱟᱢ ᱵᱟᱹᱦᱩ ᱠᱩᱲᱤ ᱜᱮ ᱡᱟᱶᱟᱭ ᱚᱲᱟᱜ ᱨᱮᱠᱚ ᱵᱚᱞᱚᱱᱟ ᱾ ᱤᱠᱷᱟᱹᱱ ᱥᱟᱱᱟᱢ ᱡᱟᱶᱟᱭ ᱚᱲᱟᱜ ᱟᱹᱛᱩ ᱫᱤᱥᱚᱢ ᱦᱚᱸ ᱦᱳᱭ ᱫᱟᱲᱮᱭᱟᱜᱼᱟ ᱟᱨ ᱵᱟᱝᱠᱷᱟᱱ ᱥᱚᱦᱚᱨ ᱵᱟᱡᱟᱨ ᱦᱚᱸ ᱦᱳᱭ ᱫᱟᱲᱮᱭᱟᱜᱼᱟ ᱾ ᱟᱹᱛᱩ ᱫᱤᱥᱚᱢ ᱨᱮᱭᱟᱜ ᱠᱟᱹᱢᱤᱼᱠᱟᱹᱥᱱᱤ ᱟᱨ ᱥᱚᱦᱚᱨ ᱵᱟᱡᱟᱨ ᱜᱷᱟᱨᱚᱸᱡᱽ ᱨᱮᱭᱟᱜ ᱠᱟᱹᱢᱤᱼᱠᱟᱹᱥᱱᱤ ᱟᱞᱟᱫᱟ ᱟᱞᱟᱫᱟ ᱜᱮᱭᱟ ᱾ ᱟᱹᱛᱩ ᱫᱤᱥᱚᱢ ᱜᱷᱟᱨᱚᱸᱡᱽ ᱨᱮᱭᱟᱜ ᱠᱟᱹᱢᱤᱼᱠᱟᱹᱥᱱᱤ ᱠᱚ ᱫᱚ ᱚᱲᱟᱜ ᱫᱩᱣᱟᱹᱨ ᱥᱟᱯᱷᱟᱼᱥᱟᱹᱯᱷᱤ ᱫᱚᱦᱚ, ᱤᱥᱤᱱ ᱵᱟᱥᱟᱝ ᱠᱟᱹᱢᱤ, ᱪᱟᱥᱼᱵᱟᱥ ᱠᱟᱹᱢᱤ, ᱵᱚᱸᱜᱟᱼᱵᱳᱨᱳ ᱠᱟᱹᱢᱤ, ᱯᱮᱲᱟ ᱫᱟᱨᱟᱢ, ᱦᱟᱴ ᱵᱟᱡᱟᱨ ᱥᱚᱣᱫᱟ, ᱥᱟᱦᱟᱱ ᱥᱟᱠᱟᱢ ᱫᱟᱜ ᱟᱹᱜᱩ ᱟᱨ ᱜᱤᱫᱽᱨᱟᱹ ᱠᱚ ᱚᱞᱚᱜ ᱯᱟᱲᱦᱟᱣ ᱨᱮ ᱞᱟᱦᱟᱜ ᱞᱟᱹᱜᱤᱫ ᱠᱩᱨᱩᱢᱩᱴᱩ ᱜᱮ ᱟᱥᱚᱞ ᱠᱟᱹᱢᱤ ᱠᱚ ᱠᱟᱱᱟ ᱾ ᱡᱟᱶᱟᱭ ᱚᱲᱟᱜ ᱨᱮᱱ ᱦᱚᱲ ᱠᱚ ᱟᱸᱥᱚᱜᱼᱟ ᱱᱚᱶᱟ ᱠᱟᱹᱢᱤ ᱠᱚᱜᱮ ᱵᱟᱹᱦᱩᱠᱩᱲᱤ ᱪᱮ ᱠᱤᱢᱤᱱ ᱫᱚ ᱱᱟᱯᱟᱭ ᱛᱮ, ᱨᱟᱹᱥᱠᱟᱹ ᱛᱮ ᱠᱟᱹᱢᱤ ᱤᱫᱤᱭᱟᱭ ᱾ ᱥᱚᱦᱚᱨ ᱵᱟᱡᱟᱨ ᱜᱷᱟᱨᱚᱸᱡᱽ ᱨᱮᱭᱟᱜ ᱠᱟᱹᱢᱤ ᱫᱚ ᱟᱹᱛᱩ ᱫᱤᱥᱚᱢ ᱨᱮᱭᱟᱜ ᱠᱟᱹᱢᱤ ᱠᱷᱚᱱ ᱫᱚ ᱟᱞᱟᱫᱟ ᱜᱮᱭᱟ ᱾ ᱥᱚᱦᱚᱨ ᱵᱟᱡᱟᱨ ᱨᱮᱫᱚ ᱚᱲᱟᱜ ᱥᱟᱯᱷᱟᱥᱟᱹᱯᱷᱤ ᱫᱚᱦᱚ, ᱤᱥᱤᱱ ᱵᱟᱥᱟᱝ, ᱜᱤᱫᱽᱨᱟᱹ ᱠᱚ ᱚᱞᱚᱜ ᱯᱟᱲᱦᱟᱣ, ᱡᱚᱛᱚᱱ ᱡᱳᱜᱟᱣ, ᱯᱮᱲᱟ ᱵᱮᱣᱦᱟᱨ, ᱦᱟᱱᱦᱟᱨ ᱦᱚᱧᱦᱟᱨ ᱥᱮᱵᱟᱫᱮᱵᱟ, ᱵᱚᱸᱜᱟᱵᱳᱨᱳ ᱥᱮᱵᱟ, ᱱᱤᱭᱟᱹ ᱠᱚ ᱠᱟᱹᱢᱤ ᱜᱮ ᱢᱮᱱᱟᱜᱼᱟ ᱾ ᱡᱟᱶᱟᱭ ᱚᱲᱟᱜ ᱨᱤᱱ ᱠᱚ ᱟᱥᱚᱜᱼᱟ ᱱᱟᱶᱟ ᱵᱟᱹᱦᱩ ᱥᱮ ᱠᱤᱢᱤᱱ ᱛᱟᱠᱚ ᱱᱚᱶᱟ ᱠᱟᱹᱢᱤ ᱠᱚ ᱱᱟᱯᱟᱭ ᱛᱮ ᱨᱟᱹᱥᱠᱟᱹ ᱛᱮ ᱠᱚᱨᱟᱣ ᱤᱫᱤᱭᱟᱭ ᱾
ᱥᱚᱦᱚᱨ ᱵᱟᱡᱟᱨ ᱵᱟᱹᱦᱩᱠᱩᱲᱤ ᱚᱞᱚᱜ ᱯᱟᱲᱦᱟᱣ ᱦᱚᱛᱮᱛᱮ ᱱᱩᱠᱨᱤ ᱪᱟᱹᱠᱨᱤ ᱨᱮᱦᱚᱸ ᱢᱮᱱᱟᱜ ᱠᱚᱣᱟ ᱾ ᱚᱠᱚᱭ ᱫᱚ ᱰᱟᱠᱛᱟᱨ ᱚᱠᱚᱭ ᱫᱚ ᱱᱟᱨᱥ, ᱤᱧᱡᱤᱱᱤᱭᱟᱨ, ᱚᱯᱷᱤᱥᱟᱨ, ᱢᱟᱥᱴᱟᱨ, ᱥᱚᱨᱠᱟᱨᱤ ᱚᱯᱷᱤᱥᱟᱨ, ᱥᱚᱨᱠᱟᱨᱤ ᱚᱯᱷᱤᱥ, ᱠᱳᱴᱼᱠᱟᱹᱪᱦᱟᱹᱨᱤ, ᱚᱠᱚᱭ ᱫᱚ ᱯᱨᱟᱭᱵᱷᱮᱴ ᱠᱳᱢᱯᱟᱱᱤ ᱠᱚᱨᱮ ᱦᱚᱸ ᱠᱚ ᱧᱮᱞᱚᱜ ᱠᱟᱱᱟ ᱾ ᱵᱟᱹᱦᱩᱠᱩᱲᱤ ᱚᱠᱚᱭ ᱫᱚ ᱞᱮᱵᱟᱨ ᱠᱟᱹᱢᱤ ᱦᱚᱸ ᱠᱚ ᱠᱟᱹᱢᱤ ᱠᱟᱱᱟ ᱾ ᱱᱩᱠᱩ ᱵᱟᱹᱦᱩᱠᱩᱲᱤ ᱡᱟᱦᱟᱸᱭ ᱯᱩᱭᱥᱟᱹ ᱟᱨᱡᱟᱣ ᱠᱟᱹᱢᱤᱨᱮ ᱢᱮᱱᱟᱜ ᱠᱚᱣᱟ ᱼ ᱥᱚᱢᱚᱭ ᱨᱮ ᱚᱰᱳᱠᱚᱜ ᱦᱳᱭᱳᱜᱼᱟ ᱠᱟᱹᱢᱤ ᱞᱟᱹᱜᱤᱫ ᱟᱨ ᱠᱟᱹᱢᱤ ᱞᱟᱸᱜᱟ ᱠᱟᱛᱮ ᱚᱲᱟᱜ ᱠᱚ ᱨᱩᱣᱟᱹᱲᱟ ᱾ ᱩᱱᱠᱩ ᱴᱷᱮᱱ ᱚᱲᱟᱜ ᱠᱟᱹᱢᱤ ᱟᱥᱟ ᱫᱚᱦᱚ ᱫᱚ ᱵᱟᱝ ᱞᱟᱹᱠᱛᱤ ᱠᱟᱱᱟ ᱾ ᱚᱲᱟᱜ ᱨᱮᱱᱟᱜ ᱠᱟᱹᱢᱤ ᱞᱟᱹᱜᱤᱫ ᱫᱚ ᱚᱲᱟᱜ ᱨᱮᱱ ᱦᱚᱲ ᱠᱚᱣᱟᱜ ᱜᱚᱲᱚ ᱮᱢᱚᱜ ᱞᱟᱹᱠᱛᱤ ᱠᱟᱱᱟ ᱟᱨ ᱵᱟᱝᱠᱷᱟᱱ ᱠᱟᱹᱢᱤᱱ ᱫᱚᱦᱚ ᱞᱟᱹᱠᱛᱤ ᱠᱟᱱᱟ ᱾ ᱱᱚᱝᱠᱟᱱ ᱩᱭᱦᱟᱹᱨ ᱡᱟᱶᱟᱭ ᱚᱲᱟᱜ ᱨᱮᱱ ᱦᱚᱲ ᱠᱚᱣᱟᱜ ᱢᱚᱱᱮᱨᱮ ᱟᱹᱜᱩ ᱫᱚᱨᱠᱟᱨ ᱾ ᱵᱟᱝᱠᱷᱟᱱ ᱱᱚᱶᱟ ᱠᱟᱨᱚᱱ ᱛᱮ ᱜᱷᱟᱨᱚᱸᱡᱽ ᱨᱮ ᱚᱥᱟᱱᱛᱤ ᱦᱤᱡᱩᱜᱼᱟ ᱾ ᱠᱤᱢᱤᱱ ᱵᱟᱦᱨᱮ ᱠᱷᱚᱱ ᱯᱩᱭᱥᱟᱹ ᱟᱨᱡᱟᱣ ᱠᱟᱛᱮ ᱟᱹᱜᱩᱭᱟᱭ ᱟᱨ ᱩᱱᱤ ᱜᱮ ᱚᱲᱟᱜ ᱨᱮᱱᱟᱜ ᱥᱟᱱᱟᱢ ᱠᱟᱹᱢᱤ ᱯᱩᱨᱟᱹᱣ ᱟᱭ ᱱᱚᱝᱠᱟᱱ ᱟᱥᱟ ᱫᱚᱦᱚ ᱜᱮ ᱵᱟᱝ ᱩᱪᱤᱛ ᱠᱟᱱᱟ ᱾ ᱚᱞᱚᱜ ᱯᱟᱲᱦᱟᱣ ᱵᱟᱹᱦᱩᱠᱩᱲᱤ ᱟᱠᱚᱣᱟᱜ ᱵᱮᱠᱛᱤᱜᱚᱛᱚ ᱥᱚᱠ ᱢᱮᱱᱟᱜ ᱛᱟᱠᱚᱣᱟ ᱾ ᱚᱠᱚᱭ ᱫᱚ ᱚᱞᱼᱵᱮᱞ ᱢᱮᱱᱢᱮ ᱥᱟᱶᱦᱮᱫ ᱪᱚᱨᱪᱟ, ᱚᱠᱚᱭ ᱫᱚ ᱜᱟᱭᱱᱟᱦᱟᱨ, ᱚᱠᱚᱭ ᱫᱚ ᱥᱚᱢᱟᱡᱽ ᱥᱩᱥᱟᱹᱨᱤᱭᱟᱹ ᱞᱮᱠᱟᱛᱮ ᱠᱟᱹᱢᱤ ᱥᱟᱱᱟᱭᱮᱫ ᱠᱚᱣᱟ ᱾ ᱩᱱᱠᱩ ᱱᱚᱶᱟ ᱥᱩᱡᱳᱜᱽ ᱡᱟᱶᱟᱭ ᱚᱲᱟᱜ ᱨᱮᱠᱚ ᱧᱟᱢ ᱢᱟ ᱾ ᱱᱚᱣᱟ ᱞᱟᱹᱜᱤᱫ ᱡᱟᱶᱟᱭ ᱚᱲᱟᱜ ᱨᱮᱱ ᱦᱚᱲ ᱠᱚᱣᱟᱜ ᱜᱚᱲᱚ ᱨᱮᱭᱟᱜ ᱞᱟᱹᱠᱛᱤ ᱢᱮᱱᱟᱜᱼᱟ ᱾
ᱚᱠᱟ ᱚᱠᱟ ᱨᱮᱫᱚ ᱧᱮᱞᱚᱜ ᱠᱟᱱᱟ ᱮᱴᱟᱜ ᱡᱟᱹᱛᱤ ᱵᱟᱹᱦᱩᱠᱩᱲᱤ ᱠᱚ ᱦᱤᱡᱩᱜ ᱠᱟᱱᱟ ᱾ ᱮᱴᱟᱜ ᱡᱟᱹᱛᱤ ᱨᱮᱱ ᱵᱟᱹᱦᱩᱠᱩᱲᱤ ᱠᱚ ᱥᱟᱱᱛᱟᱲ ᱥᱚᱢᱟᱡᱽ ᱨᱮᱠᱚ ᱦᱤᱡᱩᱜ ᱠᱟᱱᱟ ᱾ ᱱᱩᱠᱩ ᱵᱟᱹᱦᱩᱠᱩᱲᱤ ᱠᱚᱣᱟᱜ ᱫᱚ ᱡᱚᱛᱚ ᱠᱷᱚᱱ ᱢᱟᱨᱟᱝ ᱫᱟᱭᱤᱛᱭᱚ ᱫᱚ ᱟᱵᱚᱣᱟᱜ ᱥᱟᱱᱛᱟᱲ ᱯᱟᱹᱨᱥᱤ ᱪᱮᱫ ᱞᱟᱹᱠᱛᱤ ᱠᱟᱱᱟ ᱾ ᱡᱮᱢᱚᱱ ᱚᱲᱟᱜ ᱨᱮᱱ ᱦᱚᱲ ᱠᱚ ᱥᱟᱶ ᱯᱮᱲᱟ ᱠᱚ ᱥᱟᱶ ᱥᱟᱱᱛᱟᱲ ᱯᱟᱹᱨᱥᱤ ᱛᱮ ᱨᱚᱲ ᱫᱟᱲᱮᱭᱟᱜ ᱢᱟᱭ ᱾ ᱟᱨ ᱟᱡ ᱨᱮᱱ ᱜᱤᱫᱽᱨᱟᱹ ᱠᱚᱦᱚᱸ ᱥᱟᱱᱛᱟᱲ ᱯᱟᱹᱨᱥᱤ ᱥᱮᱬᱟ ᱟᱠᱚ ᱢᱟᱭ ᱾ ᱱᱚᱝᱠᱟᱱ ᱵᱟᱹᱦᱩᱠᱩᱲᱤ ᱠᱚᱦᱚᱸ ᱥᱟᱱᱛᱟᱲ ᱠᱚᱣᱟᱜ ᱟᱹᱨᱤᱪᱟᱹᱞᱤ, ᱨᱤᱛᱤ ᱨᱤᱣᱟᱡᱽ, ᱵᱚᱸᱜᱟ ᱵᱳᱨᱳ ᱠᱚᱭ ᱧᱮᱞ ᱪᱤᱱᱦᱟᱹᱣ ᱠᱚ ᱢᱟᱭ ᱾ ᱵᱟᱹᱦᱩᱠᱩᱲᱤᱭᱟᱜ ᱡᱟᱶᱟᱭ ᱚᱲᱟᱜ ᱨᱮ ᱟᱺᱜᱤᱵᱷᱟᱨ ᱱᱚᱶᱟ ᱪᱮᱛᱟᱱ ᱨᱮᱦᱚᱸ ᱞᱟᱫᱮ ᱢᱮᱱᱟᱜᱼᱟ ᱩᱱᱤᱭᱟᱜ ᱵᱟᱯᱞᱟ ᱼ ᱪᱮᱫ ᱞᱮᱠᱟᱛᱮ ᱦᱳᱭ ᱟᱠᱟᱱᱟ ᱾ ᱵᱟᱹᱦᱩᱠᱩᱲᱤ ᱡᱟᱶᱟᱭ ᱚᱲᱟᱜ ᱨᱮᱱ ᱦᱚᱲ ᱠᱚ ᱧᱮᱞ ᱠᱟᱛᱮ ᱠᱩᱥᱤ ᱠᱟᱛᱮ ᱵᱟᱯᱞᱟ ᱠᱟᱛᱮ ᱠᱚ ᱟᱹᱜᱩ ᱟᱠᱟᱫᱮᱭᱟ ᱥᱮ ᱡᱟᱶᱟᱭ ᱠᱚᱲᱟ ᱜᱮ ᱟᱡᱟᱜ ᱠᱩᱥᱤᱛᱮ ᱵᱟᱹᱦᱩᱠᱩᱲᱤ ᱟᱹᱜᱩ ᱟᱠᱟᱫᱮᱭᱟᱭ ᱾ ᱡᱟᱶᱟᱭ ᱠᱚᱲᱟ ᱡᱩᱫᱤ ᱟᱡᱟᱜ ᱠᱩᱥᱤᱛᱮ ᱵᱟᱹᱦᱩᱠᱩᱲᱤᱭ ᱟᱹᱜᱩ ᱟᱠᱟᱫᱮᱭᱟ ᱟᱨ ᱡᱟᱶᱟᱭ ᱚᱲᱟᱜ ᱨᱮᱱ ᱦᱚᱲ ᱠᱚᱣᱟᱜ ᱠᱩᱥᱤ ᱵᱟᱹᱱᱩᱜᱼᱟ, ᱮᱱᱠᱷᱟᱱ ᱵᱟᱹᱦᱩᱠᱩᱲᱤᱭᱟᱜ ᱡᱚᱛᱚ ᱠᱟᱹᱢᱤ ᱜᱮ ᱵᱟᱠᱚ ᱠᱩᱥᱤᱭᱟᱜᱼᱟ ᱟᱨ ᱩᱱᱤ ᱵᱟᱹᱜᱤ ᱨᱮᱭᱟᱜ ᱠᱚ ᱪᱮᱥᱴᱟᱭᱟ ᱾ ᱵᱟᱹᱦᱩᱠᱩᱲᱤᱭᱟᱜ ᱡᱚᱛᱚ ᱠᱟᱹᱢᱤ ᱨᱮᱜᱮ ᱫᱳᱥᱠᱚ ᱯᱟᱸᱡᱟ ᱧᱟᱢᱟ ᱾ ᱟᱨ ᱩᱱᱤ ᱥᱟᱹᱥᱛᱤ ᱠᱚ ᱮᱢᱟᱭᱟ ᱾ ᱡᱮᱢᱚᱱ ᱡᱟᱶᱟᱭ ᱚᱲᱟᱜ ᱠᱷᱚᱱ ᱟᱡ ᱛᱮᱜᱮ ᱨᱩᱣᱟᱹᱲ ᱡᱚᱝ ᱢᱟᱭ ᱟᱡᱟᱜ ᱚᱲᱟᱜ ᱛᱮ ᱾ ᱱᱚᱝᱠᱟᱱ ᱯᱚᱨᱤᱥᱛᱷᱤᱛᱤ ᱨᱮᱫᱚ ᱡᱟᱶᱟᱭ ᱚᱲᱟᱜᱨᱮ ᱵᱟᱹᱦᱩᱠᱩᱲᱤᱭᱟᱜ ᱟᱺᱜᱤᱵᱷᱟᱨ ᱦᱟᱛᱟᱣ ᱫᱚ ᱟᱹᱰᱤ ᱜᱮ ᱠᱩᱴᱷᱤᱱᱟ ᱾
ᱟᱹᱛᱩ ᱫᱤᱥᱚᱢ ᱨᱮᱫᱚ ᱨᱮᱸᱜᱮᱡ ᱦᱚᱲ ᱜᱮᱠᱚ ᱵᱟᱹᱲᱛᱤ ᱛᱟᱵᱳᱱᱟ᱾ ᱩᱱᱠᱩ ᱟᱫᱚᱢ ᱫᱚ ᱵᱟᱯᱞᱟ ᱠᱟᱛᱮ ᱵᱟᱹᱦᱩ ᱵᱟᱠᱚ ᱟᱹᱜᱩᱭᱮᱫ ᱠᱚᱣᱟ ᱾ ᱫᱟᱲᱮ ᱦᱚᱸ ᱵᱟᱹᱱᱩᱜᱼᱟ ᱾ ᱩᱱᱠᱩ ᱨᱮᱱ ᱦᱚᱯᱚᱱ ᱠᱚᱜᱮ ᱟᱠᱚ ᱠᱩᱥᱤ ᱛᱮ ᱵᱟᱹᱦᱩ ᱠᱚ ᱟᱹᱜᱩᱭᱮᱫ ᱠᱚᱣᱟ ᱟᱨ ᱢᱟᱹᱡᱷᱤ ᱢᱚᱬᱮ ᱦᱚᱲᱠᱚ ᱟᱛᱮ ᱛᱤᱨᱤᱞ ᱛᱟᱨᱚᱵ ᱠᱟᱛᱮ ᱵᱟᱯᱞᱟ ᱨᱮᱭᱟᱜ ᱠᱟᱹᱢᱤ ᱠᱚ ᱯᱩᱨᱟᱹᱣ ᱠᱟᱜ ᱠᱟᱱᱟ ᱾ ᱱᱚᱝᱠᱟᱱ ᱵᱟᱯᱞᱟ ᱨᱮ ᱟᱹᱰᱤᱜᱟᱱ ᱟᱭᱳ ᱵᱟᱵᱟ ᱠᱚᱣᱟᱜ ᱟᱨ ᱚᱲᱟᱜ ᱦᱚᱲ ᱠᱚᱣᱟᱜ ᱵᱟᱹᱦᱩᱠᱩᱲᱤ ᱫᱚᱦᱚ ᱨᱮᱭᱟᱜ ᱢᱚᱛ ᱜᱮ ᱵᱟᱹᱱᱩᱜᱼᱟ ᱾ ᱱᱚᱝᱠᱟᱱᱟᱜ ᱜᱷᱚᱴᱚᱱᱟ ᱟᱹᱰᱤ ᱡᱟᱭᱜᱟᱨᱮ ᱧᱮᱞ ᱟᱠᱟᱱᱟ ᱾ ᱚᱠᱟ ᱨᱮᱫᱚ ᱵᱟᱯᱞᱟ ᱠᱟᱛᱮ ᱟᱹᱜᱩ ᱠᱟᱛᱮ ᱨᱮᱦᱚᱸ ᱠᱚ ᱥᱟᱠᱟᱢ ᱚᱲᱮᱡ ᱠᱟᱛᱮ ᱠᱚ ᱵᱟᱹᱜᱤᱭᱮᱫ ᱠᱚᱣᱟ ᱾ ᱱᱚᱝᱠᱟᱱ ᱜᱷᱚᱴᱚᱱᱟ ᱠᱚ ᱧᱮᱞ ᱠᱟᱛᱮ ᱜᱮ ᱒᱐᱐᱔ ᱨᱮ ᱤᱧ ᱛᱤᱨᱞᱟᱹ ᱪᱮᱛᱟᱱ ᱨᱮ ᱢᱤᱫᱴᱟᱹᱝ ᱚᱱᱚᱞ ᱤᱧ ᱚᱞ ᱟᱠᱟᱫᱼᱟ ᱼ ᱧᱩᱛᱩᱢ ᱫᱚ “ᱥᱟᱱᱛᱟᱲ ᱠᱩᱲᱤ ᱦᱚᱯᱚᱱᱟᱜ ᱜᱚᱱᱚᱝ ᱫᱚ ᱠᱤ ᱡᱚᱛᱷᱟᱛ ᱠᱟᱱᱟ? ᱱᱚᱶᱟ ᱜᱮ ᱤᱧᱟᱹᱜ ᱠᱩᱠᱞᱤ ᱫᱚ ᱫᱤᱥᱚᱢ ᱦᱚᱲ ᱠᱚ ᱴᱷᱮᱱ ᱾” ᱫᱚᱥᱟᱨ ᱫᱚ ᱼ ᱛᱤᱨᱞᱟᱹ ᱧᱩᱛᱩᱢ ᱢᱤᱫᱴᱟᱹᱝ ᱚᱱᱚᱬᱦᱮᱧ ᱚᱞ ᱟᱠᱟᱫᱼᱟ ᱚᱱᱟᱨᱮ ᱵᱟᱹᱦᱩᱠᱩᱲᱤᱭᱟᱜ ᱚᱵᱚᱥᱛᱷᱟ ᱟᱨ ᱫᱟᱭᱤᱛᱭᱚ ᱨᱮᱱᱟᱜ ᱪᱤᱛᱟᱹᱨ ᱤᱧ ᱥᱟᱵ ᱨᱟᱠᱟᱵ ᱟᱠᱟᱫᱼᱟ ᱾
ᱚᱱᱟᱜᱮ ᱱᱤᱛᱚᱜ ᱤᱧ ᱟᱸᱡᱚᱢ ᱥᱟᱸᱜᱮ ᱟᱵᱚ ᱠᱟᱱᱟ ᱼ ᱚᱱᱚᱬᱦᱮᱸ ᱧᱩᱛᱩᱢ ᱫᱚ ᱼ
“ᱛᱤᱨᱞᱟᱹ”
ᱪᱷᱟᱹᱰᱣᱤ ᱧᱩᱛᱩᱢ ᱟᱞᱚᱢ ᱦᱟᱛᱟᱣ,
ᱚᱠᱚᱭᱟᱜ ᱠᱟᱛᱷᱟ ᱟᱞᱚᱢ ᱵᱟᱛᱟᱣ ᱾
ᱡᱟᱦᱟᱸ ᱛᱤᱱᱟᱹᱜ ᱠᱚ ᱥᱟᱸᱛᱟᱣ ᱢᱮ,
ᱩᱱᱟᱹᱜ ᱟᱢ ᱫᱚ ᱫᱩᱞᱟᱹᱲᱟᱠᱚ ᱢᱮ ᱾
ᱚᱲᱟᱜ ᱟᱢᱟᱜ, ᱥᱟᱶᱛᱟ ᱟᱢᱟᱜ ᱫᱤᱥᱚᱢ ᱟᱢᱟᱜ,
ᱚᱲᱟᱜ ᱟᱞᱚᱢ ᱵᱟᱹᱜᱤᱭᱟᱛᱟᱢ ᱾
ᱵᱟᱹᱜᱤᱭᱮᱫ ᱢᱮᱭᱟ ᱠᱚ, ᱟᱢ ᱟᱞᱚᱢ ᱵᱟᱹᱜᱤ ᱟᱛᱳ,
ᱛᱟᱦᱮᱱ ᱢᱮ ᱛᱟᱯᱟᱢ ᱛᱳᱯᱳᱫ ᱠᱟᱛᱮ ᱾
ᱨᱟᱺᱰᱤ, ᱪᱷᱟᱹᱰᱣᱤ, ᱵᱟᱺᱡᱷᱤ, ᱰᱟᱹᱱ ᱠᱚ ᱢᱮᱛᱟᱢ,
ᱟᱞᱚᱢ ᱟᱲᱤᱥᱚᱜ, ᱟᱞᱚᱢ ᱠᱟᱺᱦᱤᱥᱚᱜ ᱾
ᱯᱟᱹᱴᱩᱵᱽ ᱢᱮ ᱡᱟᱹᱱᱩᱢ ᱡᱷᱟᱹᱱᱴᱤ,
ᱛᱤᱸᱜᱩᱭ ᱢᱮ ᱟᱢᱟᱜ ᱨᱟᱡᱽᱟᱹᱨᱤ ᱾
ᱦᱤᱥᱟᱹᱥᱩᱭᱟᱹ ᱵᱟᱹᱜᱤ ᱠᱟᱛᱮ,
ᱨᱤᱞᱟᱹᱢᱟᱞᱟ ᱫᱷᱟᱹᱨᱛᱤ ᱛᱟᱞᱟ,
ᱢᱟᱹᱱ ᱫᱚ ᱫᱚᱦᱚᱭ ᱛᱟᱢ ᱾
ᱜᱩᱛᱩ ᱜᱟᱞᱟᱝ ᱢᱟᱹᱞᱤ ᱵᱟᱦᱟ ᱛᱮ,
ᱚᱱᱛᱚᱨ ᱫᱚ ᱥᱟᱡᱟᱣ ᱛᱟᱢ ᱾
ᱚᱱᱟ ᱨᱮᱱᱟᱜ ᱥᱚᱸᱫᱷᱟᱲ ᱥᱚᱼᱛᱮ,
ᱟᱸᱫᱳᱲ ᱪᱟᱵᱟᱭ ᱢᱮ ᱾
ᱛᱤᱨᱞᱟᱹ ᱢᱮᱱᱟᱜ ᱢᱮᱭᱟ,
ᱮᱴᱟᱜ ᱦᱚᱲᱟᱜ ᱦᱤᱨᱞᱟᱹ,
ᱥᱮᱛᱟᱜ ᱥᱤᱸᱜᱟᱹᱲ ᱠᱟᱹᱢᱤ ᱢᱮ,
ᱵᱮᱱᱟᱣᱜ ᱢᱮ ᱢᱟᱹᱱᱢᱤ ᱫᱚᱨᱚᱫᱤᱭᱟᱹ ᱾
ᱫᱷᱟᱹᱨᱛᱤ ᱛᱟᱞᱟ ᱵᱟᱱᱟ ᱦᱚᱲᱟᱜ ᱜᱮ
ᱦᱚᱠ ᱫᱚ ᱥᱚᱢᱟᱱ ᱥᱚᱢᱟᱱ,
ᱜᱚᱲᱚᱢᱵᱟ ᱜᱮ ᱚᱲᱟᱜ ᱨᱮ ᱢᱮᱱᱟᱭ
ᱫᱤᱥᱟᱹᱭ ᱮᱢᱚᱜ ᱠᱟᱱ ᱾
ᱦᱟᱨᱟᱵᱩᱨᱩᱭ ᱛᱟᱢ ᱟᱢᱟᱜ ᱡᱟᱛᱤ,
ᱟᱢᱟᱜ ᱥᱟᱱᱛᱟᱲᱤ ᱯᱟᱨᱥᱤ,
ᱨᱟᱹᱜᱷᱩ ᱢᱩᱨᱢᱩᱭ ᱵᱮᱱᱟᱣ ᱦᱚᱴᱚᱠᱟᱣᱫ ᱢᱮ
ᱟᱠᱷᱚᱨ ᱼ ᱚᱞᱪᱤᱠᱤ ᱾
ᱛᱚᱯᱚᱞ ᱟᱠᱟᱱᱮᱢ ᱢᱟᱭᱟ ᱢᱳᱦᱚᱛᱮ,
ᱨᱮᱸᱜᱮᱡ ᱛᱮᱛᱟᱝ ᱡᱟᱞᱟᱨᱮ,
ᱪᱟᱞᱟᱜ ᱮᱢ ᱱᱟᱞᱦᱟ ᱠᱟᱹᱢᱤ ᱛᱮ ᱾
ᱠᱟᱹᱴᱤᱡ ᱠᱟᱹᱴᱤᱡ ᱜᱤᱫᱽᱨᱟᱹ ᱠᱚ,
ᱟᱢ ᱜᱮᱢ ᱡᱚᱛᱚᱱ ᱦᱟᱨᱟ ᱠᱚ ᱾
ᱟᱞᱚᱢ ᱟᱹᱲᱤᱥᱚᱜ, ᱟᱞᱚᱢ ᱠᱟᱺᱦᱤᱥᱚᱜ,
ᱠᱟᱲᱟᱝ ᱧᱩᱛᱟᱹᱛ,
ᱚᱜᱚᱢ ᱫᱚᱨᱭᱟ ᱯᱟᱭᱨᱟ ᱯᱟᱨᱚᱢ ᱢᱮ ᱾
ᱚᱞᱚᱜ ᱤᱛᱟᱹ ᱮᱨ ᱢᱮ,
ᱥᱟᱱᱟᱢ ᱚᱲᱟᱜ ᱫᱤᱣᱟᱹᱨ ᱫᱩᱣᱟᱹᱨ ᱛᱮ ᱾
ᱟᱢ ᱪᱷᱟᱹᱰᱣᱤ ᱞᱟᱹᱜᱤᱫ ᱛᱮ
ᱚᱲᱟᱜ ᱨᱮᱱ ᱡᱚᱛᱚ ᱠᱚ ᱢᱤᱫᱚᱜ
ᱦᱟᱥᱟ ᱞᱟᱼᱞᱟ ᱠᱟᱛᱮ ᱡᱷᱩᱲᱤ ᱠᱚ ᱯᱮᱨᱮᱡᱽ ᱾
ᱫᱤᱯᱤᱞ ᱟᱢ ᱠᱚ ᱦᱟᱥᱟ ᱡᱷᱩᱲᱤ,
ᱥᱟᱱᱟᱢ ᱮᱠᱷᱮᱱ ᱮᱨᱮᱞ ᱠᱚᱲᱟ ᱠᱩᱲᱤ ᱾
ᱮᱱᱦᱚᱸ ᱛᱟᱦᱮᱱ ᱢᱮ ᱦᱟᱥᱟ ᱜᱟᱫᱟᱞ ᱨᱮ,
ᱛᱟᱹᱠᱤᱡ ᱛᱟᱯᱟᱠᱤᱡ,
ᱠᱚᱞᱥᱟ ᱢᱟᱜᱟᱞ ᱫᱩᱱᱤᱭᱟᱹ ᱛᱟᱞᱟᱨᱮ ᱾
ᱚᱠᱚᱭ ᱫᱚᱭ ᱢᱮᱱᱟ ᱫᱟᱠᱟ ᱴᱩᱠᱩᱡᱨᱮ
ᱵᱤᱥᱫᱚᱭ ᱠᱷᱟᱸᱡᱚ ᱠᱟᱱ,
ᱠᱟᱲᱟᱝ ᱠᱷᱚᱪᱟᱝ ᱨᱮ ᱦᱮᱸᱫᱮ ᱟᱨᱟᱜ,
ᱟᱢ ᱥᱟᱢᱟᱝ ᱨᱮ ᱡᱟᱡᱤᱞᱢᱟᱱ ᱾
ᱮᱱᱦᱚᱸ ᱛᱤᱨᱞᱟᱹ ᱛᱤᱸᱜᱩ ᱠᱮᱴᱮᱡᱚᱜ ᱢᱮ,
ᱨᱟᱡᱽ ᱯᱟᱴᱟ ᱫᱚ ᱦᱟᱛᱟᱣ ᱢᱮ,
ᱱᱟᱶᱟ ᱱᱟᱶᱟ ᱨᱟᱭᱨᱤᱛ,
ᱫᱷᱟᱹᱨᱛᱤ ᱨᱮ ᱟᱹᱜᱩᱭ ᱢᱮ ᱾
ᱟᱹᱨᱩ ᱨᱩᱣᱟᱹᱲ ᱢᱮ, ᱥᱟᱱᱛᱟᱲ ᱥᱟᱶᱛᱟ,
ᱱᱤᱭᱟᱹᱜᱮ ᱛᱟᱦᱮᱸᱭᱮᱱᱟ ᱛᱤᱨᱞᱟᱹ ᱼ ᱟᱢᱴᱷᱮᱱ ᱟᱸᱥ ᱾
ᱛᱤᱨᱞᱟᱹᱢ ᱦᱚᱨᱚᱜᱽ ᱢᱮᱬᱦᱮᱫ ᱥᱟᱠᱚᱢ ᱞᱮᱸᱜᱟ ᱛᱤ ᱨᱮ,
ᱟᱢ ᱨᱮᱱ ᱡᱟᱶᱟᱭ ᱫᱚ ᱢᱮᱬᱦᱮᱫ ᱥᱟᱠᱚᱢ
ᱦᱚᱨᱚᱜ ᱮᱢ ᱡᱚᱡᱚᱢ ᱛᱤ ᱨᱮ ᱾
ᱛᱚᱵᱮᱭᱮᱱᱟ ᱛᱚ ᱛᱩᱞᱟᱹᱰᱟᱺᱰᱤ ᱫᱚ
ᱥᱚᱢᱟᱱ ᱥᱚᱢᱟᱱᱚᱜ ᱾
ᱛᱤᱨᱞᱟᱹ ᱼ ᱥᱤᱵᱤᱞ ᱥᱤᱵᱤᱞ ᱠᱟᱛᱷᱟ ᱛᱮ
ᱦᱚᱲᱠᱚ ᱟᱭᱩᱨ ᱠᱚᱢ
ᱥᱚᱝᱥᱟᱨ ᱥᱟᱹᱢᱩᱫᱽ ᱨᱮᱱᱟᱝ ᱚᱜᱚᱢ ᱫᱚᱨᱭᱟ
ᱯᱟᱭᱨᱟ ᱯᱟᱨᱚᱢ ᱢᱮ
ᱥᱟᱶᱛᱟ ᱥᱩᱥᱟᱹᱨ ᱠᱟᱹᱢᱤᱦᱚᱨᱟ ᱼ
ᱟᱢ ᱴᱷᱮᱱ ᱛᱟᱦᱮᱸᱭᱮᱱ ᱟᱸᱥ ᱾
ᱛᱤᱨᱞᱟᱹ ᱫᱚ ᱟᱞᱚᱢ ᱫᱚᱦᱚᱭᱮᱭᱟ ᱠᱩᱪᱤᱛ ᱨᱮ,
ᱟᱢᱟᱜ ᱡᱟᱸᱜᱟ ᱞᱟᱛᱟᱨ ᱨᱮ
ᱫᱟᱣ ᱫᱚ ᱩᱱᱤ ᱦᱚᱸ ᱮᱢᱟᱭ ᱢᱮ
ᱫᱷᱟᱹᱨᱛᱤ ᱛᱟᱞᱟ ᱨᱮ ᱾
ᱟᱢ ᱦᱚᱸ ᱛᱚᱭ ᱥᱮᱯᱮᱧ ᱟᱠᱟᱫ ᱢᱮ
ᱛᱮᱜᱮ ᱢᱮᱱᱟᱜ ᱢᱮᱭᱟ,
ᱱᱤᱛ ᱦᱚᱸ ᱡᱟᱡᱤᱞᱢᱟᱱ, ᱥᱩᱥᱟᱹᱨ ᱢᱮᱱᱟᱜ ᱢᱮ,
ᱟᱢᱟᱜ ᱥᱟᱶᱛᱟ ᱛᱟᱞᱟᱨᱮ ᱾
ᱟᱪᱟᱨ ᱵᱤᱪᱟᱹᱨ, ᱞᱟᱭᱼᱞᱟᱠᱪᱟᱨ,
ᱢᱟᱹᱡᱷᱤ ᱯᱟᱨᱜᱟᱱᱟ, ᱜᱚᱰᱮᱛ ᱨᱮᱱᱟᱜ,
ᱛᱤᱨᱞᱟᱹ ᱦᱚᱸ ᱮᱢᱟᱭ ᱢᱮ ᱦᱚᱠ ᱟᱹᱭᱫᱟᱹᱨᱤ ᱾
ᱩᱥᱟᱹᱫᱼᱩᱯᱩᱥᱟᱹᱫ ᱢᱟᱱᱣᱟ ᱡᱤᱭᱚᱱ ᱨᱮ
ᱡᱟᱭᱡᱩᱜᱮ ᱛᱟᱦᱮᱱᱟ, ᱡᱩᱜᱮ ᱡᱩᱜᱮ ᱛᱟᱦᱮᱱᱟ,
ᱟᱢᱟᱜ ᱢᱟᱨᱥᱟᱞ ᱟᱦᱞᱟ ᱾
ᱦᱟᱢᱮᱴ ᱢᱮ ᱫᱷᱟᱹᱨᱛᱤ ᱛᱟᱞᱟ,
ᱥᱟᱱᱛᱟᱲ ᱡᱟᱹᱛᱤᱭᱟᱜ ᱢᱟᱹᱱ ᱢᱟᱹᱪᱤ,
ᱟᱹᱭᱩᱨ ᱠᱚᱢ ᱥᱤᱵᱤᱞ ᱟᱲᱟᱝ ᱛᱮ,
ᱥᱟᱱᱟᱢ ᱡᱩᱭᱟᱹᱱ ᱠᱚᱲᱟ ᱠᱩᱲᱤ ᱾
ᱦᱟᱛᱟᱣ ᱢᱮ ᱦᱚᱠ ᱟᱹᱭᱫᱟᱹᱨᱤ,
ᱡᱳᱞ ᱢᱮ ᱫᱮᱣᱦᱮ ᱵᱟᱹᱛᱤ,
ᱞᱮᱜᱮᱡ ᱞᱮᱜᱮᱡ ᱫᱷᱟᱹᱨᱛᱤ ᱛᱟᱞᱟ,
ᱵᱮᱱᱟᱣᱜ ᱢᱮ ᱨᱟᱝᱠᱤᱱᱤ ᱾
***
