ᱡᱟᱱᱟᱢ ᱚᱲᱟᱜ ᱨᱤᱱᱤᱡ ᱟᱢ ᱫᱚ ᱯᱟᱹᱨᱤ
ᱡᱟᱶᱟᱭ ᱚᱲᱟᱜ ᱨᱤᱱᱤᱡ ᱟᱢ ᱫᱚ ᱨᱟᱹᱱᱤ
ᱮᱴᱟᱜ ᱚᱲᱟ ᱨᱮ ᱟᱞᱚᱢ ᱟᱹᱱᱟᱹᱲᱤᱜ
ᱟᱞᱚᱢ ᱠᱟᱹᱢᱤ ᱡᱟᱦᱟᱱ ᱟᱹᱛᱷᱟᱹᱣᱲᱤ ᱿
ᱥᱟᱠᱚᱢ ᱥᱤᱸᱫᱩᱨ ᱛᱮᱢ ᱪᱤᱱᱦᱟᱹᱭᱮᱱᱟ
ᱟᱢ ᱫᱚ ᱵᱟᱹᱦᱩ ᱠᱩᱲᱤ
ᱵᱷᱤᱛᱟᱹᱨ ᱵᱟᱦᱮᱨ ᱵᱚᱸᱜᱟ ᱵᱳᱨᱳ
ᱟᱢ ᱫᱚ ᱫᱤᱱᱟᱹᱢ ᱮᱢ ᱥᱚᱡᱽ ᱿
ᱪᱷᱟᱛᱟ ᱫᱟᱨᱮ ᱥᱩᱠ ᱨᱮ ᱫᱚᱦᱚᱭᱮᱢ
ᱵᱟᱝᱠᱷᱟᱱ ᱮ ᱦᱤᱨᱚᱢ ᱟᱢᱟ
ᱦᱟᱱᱦᱟᱨ ᱦᱚᱧᱦᱟᱨ ᱥᱮᱵᱟ ᱠᱤᱱ ᱢᱮ
ᱵᱟᱝᱠᱷᱟᱱ ᱠᱤᱱ ᱨᱩᱦᱤᱫ ᱟᱢᱟ ᱿
ᱥᱟᱹᱜᱟᱹᱭ ᱢᱟᱱᱟᱣ ᱵᱟᱛᱟᱣ ᱢᱮ
ᱟᱡᱷᱱᱟᱨᱮᱭᱟ ᱡᱚᱯᱚᱴᱮᱫ ᱨᱮᱦᱚᱸ
ᱫᱮᱭᱟ ᱵᱚᱦᱚᱜ ᱨᱮ ᱥᱤᱢᱟᱹ ᱫᱚᱦᱚᱭ ᱢᱮ ᱿
ᱱᱮᱶᱛᱟ ᱵᱟᱨᱛᱮ ᱫᱮ ᱵᱟᱜᱤᱱ
ᱪᱩᱨᱩᱡ ᱦᱟᱹᱴᱤᱧ ᱟᱠᱚ ᱢᱮ
ᱟᱹᱛᱩ ᱴᱚᱞᱟ ᱯᱟᱨᱟᱵᱽ ᱯᱩᱱᱟᱹᱭ ᱨᱮ
ᱱᱤᱦᱟᱹᱛᱤ ᱥᱟᱴᱟᱣ ᱛᱚᱨᱟ ᱠᱚᱢ ᱿
ᱜᱚᱡ ᱜᱩᱨ ᱚᱲᱟᱜ ᱪᱟᱞᱟᱜ ᱢᱮ
ᱵᱟᱠᱷᱮᱬ ᱟᱛᱮ ᱨᱟᱜᱽ ᱢᱮ
ᱟᱹᱛᱩ ᱴᱚᱞᱟ ᱥᱩᱨᱩᱜ ᱢᱮ
ᱥᱩᱞᱩᱠ ᱱᱤᱨᱟᱹᱭ ᱛᱟᱦᱮᱱ ᱢᱮ ᱿
ᱱᱚᱶᱟ ᱜᱮ ᱛᱚ ᱡᱟᱶᱟᱭ ᱚᱲᱟᱜ ᱨᱮ
ᱵᱟᱹᱦᱩ ᱠᱩᱲᱤᱭᱟᱜ ᱟᱺᱜᱤᱵᱷᱟᱨ ᱿
***
