ᱢᱮᱫ ᱫᱟᱜ ᱨᱮ ᱥᱚᱱᱟ ᱪᱟᱛᱚᱢ

ᱡᱷᱟᱨᱠᱷᱚᱸᱰ ᱯᱚᱱᱚᱛ ᱨᱮᱭᱟᱜ ᱥᱟᱢᱟᱝ ᱥᱤᱝᱵᱷᱩᱢ ᱡᱮᱞᱟ ᱨᱮ, ᱰᱚᱠᱟᱰᱤ ᱧᱩᱛᱩᱢᱟᱱᱟᱜ ᱢᱤᱫ ᱟᱹᱛᱩ ᱢᱮᱱᱟᱜᱼᱟ ᱾ ᱚᱱᱟ ᱟᱹᱛᱩ ᱨᱮᱱᱟᱜ ᱢᱤᱫ ᱜᱷᱟᱨᱚᱸᱡᱽ ᱨᱮ ᱯᱮ ᱦᱚᱲ ᱠᱚ ᱛᱟᱦᱮᱸᱱᱟ, ᱠᱩᱱᱤ ᱟᱨ ᱟᱡ ᱨᱤᱱ ᱜᱚᱼᱵᱟᱵᱟ ᱾ ᱟᱹᱛᱩ ᱫᱤᱥᱚᱢ ᱠᱟᱱᱟ ᱾ ᱠᱩᱱᱤ ᱚᱞᱚᱜ ᱠᱟᱱ ᱥᱟᱶᱛᱮ ᱦᱩᱰᱤᱧ ᱧᱚᱜ ᱫᱚᱠᱟᱱ ᱛᱟᱭ ᱢᱮᱱᱟᱜᱼᱟ ᱾ ᱚᱱᱟ ᱫᱚᱠᱟᱱ ᱨᱮᱭᱟᱜ ᱯᱩᱭᱥᱟᱹ ᱛᱮᱜᱮ ᱟᱡᱟᱜ ᱚᱞᱚᱜ ᱠᱷᱚᱨᱪᱟ ᱫᱚ ᱛᱟᱭ ᱚᱰᱚᱠᱚᱜ ᱠᱟᱱᱟ ᱾ ᱟᱡ ᱨᱤᱱ ᱜᱚ ᱵᱟᱵᱟ ᱫᱚ ᱪᱟᱥ ᱵᱟᱥ ᱜᱮ ᱠᱤᱱ ᱠᱟᱹᱢᱤᱭᱟ ᱾ ᱟᱥᱟᱲ ᱵᱚᱸᱜᱟ ᱫᱤᱱ ᱠᱟᱱᱟ ᱥᱚᱠᱛᱚ ᱡᱷᱚᱢ ᱡᱷᱚᱢ ᱫᱟᱜ ᱜᱚᱴᱟ ᱧᱤᱫᱟᱹᱭ ᱫᱟᱜ ᱟᱠᱟᱫᱼᱟ ᱾ ᱵᱟᱹᱫᱽ ᱵᱟᱹᱭᱦᱟᱹᱲ ᱜᱚᱴᱟ ᱞᱟᱞᱮ ᱪᱟᱯᱮ ᱟᱠᱟᱱᱟ ᱾ ᱥᱤᱢᱨᱟᱜ ᱥᱮᱛᱟᱜ ᱥᱮᱛᱟᱜ ᱟᱠᱚ ᱠᱩᱰᱟᱹᱢ ᱨᱮᱱᱟᱜ ᱜᱷᱟᱨᱚᱸᱡᱽ ᱨᱮ ᱜᱷᱟᱨᱚᱸᱡᱽ ᱢᱩᱠᱷᱤᱭᱟᱹᱭ ᱦᱚᱦᱚᱭᱟ, “ᱵᱮᱨᱮᱫ ᱯᱮ ᱞᱚᱜᱚᱱ ᱥᱮᱛᱟᱜ ᱮᱱᱟ ᱾ ᱛᱮᱦᱮᱧ ᱫᱚ ᱜᱚᱴᱟ ᱧᱤᱫᱟᱹᱭ ᱫᱟᱜ ᱠᱮᱫᱼᱟ ᱾” ᱩᱱᱤᱭᱟᱜ ᱦᱚᱦᱚ ᱟᱸᱡᱚᱢ ᱛᱮ ᱠᱩᱱᱤ ᱟᱡ ᱵᱟᱵᱟ ᱦᱚᱸᱭ ᱵᱮᱨᱮᱫᱼᱟ ᱾ ᱠᱩᱱᱤ, ᱟᱭᱳᱭ ᱦᱚᱦᱚᱣᱟᱭᱟ, ᱼ ᱮ ᱯᱟᱹᱜᱽᱞᱤ ᱵᱮᱨᱮᱫ ᱢᱮ ! ᱟᱵᱚᱣᱟᱜ ᱵᱟᱹᱫᱽ ᱠᱚ ᱦᱚᱸ ᱯᱮᱨᱮᱡ ᱮᱱᱟ ᱯᱟᱞᱮ, ᱛᱮᱦᱮᱧ ᱠᱷᱚᱱ ᱟᱵᱚ ᱦᱚᱸ ᱵᱟᱹᱫᱽ ᱠᱟᱹᱢᱤ ᱵᱚᱱ ᱮᱦᱚᱵᱟ ᱾ ᱦᱳᱲᱳ ᱠᱚᱵᱚ ᱨᱚᱦᱚᱭᱟ ᱾ ᱟᱹᱡᱤᱡ ᱜᱷᱤᱨᱱᱤ (ᱠᱩᱱᱤ ᱟᱭᱳ) ᱵᱮᱨᱮᱫ ᱟᱭ ᱢᱮᱫ ᱤᱛᱠᱤᱫ ᱤᱛᱠᱤᱫ ᱛᱮ ᱾ “ᱩᱱᱟᱹᱜ ᱮᱢ ᱜᱟᱨᱡᱟᱣᱚᱜ ᱠᱟᱱ ᱫᱚ ?” ᱼ ᱦᱚᱭ ᱟᱢ ᱫᱚ ᱥᱟᱸᱰᱟᱝ ᱠᱚᱜ ᱢᱮᱜᱮ, ᱵᱟᱢ ᱟᱸᱡᱚᱢ ᱮᱫᱼᱟ ᱾ ᱨᱚᱴᱮ ᱵᱟᱹᱨᱩᱰᱟᱝ ᱪᱮᱫ ᱞᱮᱠᱟ ᱴᱮᱨᱮᱼᱴᱮᱨᱮ ᱠᱚ ᱨᱟᱜᱮᱫᱼᱟ ᱾ ᱜᱚᱴᱟ ᱧᱤᱫᱟᱹᱭ ᱫᱟᱜ ᱟᱠᱟᱫᱼᱟ ᱾ ᱟᱵᱚ ᱦᱚᱸ ᱦᱳᱲᱳ ᱨᱚᱦᱚᱭ ᱵᱚᱱ ᱮᱦᱚᱵᱟ ᱾

ᱞᱚᱜᱚᱱ ᱵᱮᱨᱮᱫ ᱛᱮ ᱫᱟᱠᱟ ᱠᱚ ᱪᱚᱸᱫᱟᱭ ᱢᱮ, ᱟᱨ ᱵᱤᱴᱤ ᱠᱩᱱᱤ ᱦᱚᱸ ᱦᱚᱦᱚ ᱵᱮᱨᱮᱫ ᱮᱢ ᱾ ᱞᱚᱜᱚᱱ ᱠᱟᱹᱢᱤ ᱦᱩᱭ ᱛᱮ ᱪᱚᱞᱚ ᱵᱟᱹᱫᱽ ᱵᱚᱱ ᱥᱮᱱᱚᱜᱼᱟ ᱾ ᱠᱩᱱᱤ ᱟᱡ ᱟᱭᱳᱭ ᱵᱮᱨᱮᱫ ᱛᱮ ᱪᱩᱞᱦᱟᱹ ᱠᱚ ᱪᱷᱚᱸᱪ ᱠᱟᱛᱮ ᱫᱟᱠᱟᱭ ᱪᱚᱸᱫᱟᱭᱟ ᱾ ᱫᱟᱠᱟ ᱠᱚ ᱤᱥᱤᱱ ᱵᱟᱥᱟᱝ ᱦᱩᱭ ᱛᱮᱜᱮ ᱥᱮᱛᱟᱜ ᱢᱟᱨᱥᱟᱞ ᱮᱱᱟ ᱾ ᱠᱩᱱᱤ ᱟᱡ ᱟᱭᱳ ᱠᱩᱱᱤ ᱦᱚᱦᱚ ᱟᱭᱟᱭ, “ᱵᱤᱴᱤ ᱵᱮᱨᱮᱫ ᱢᱮᱭᱳ, ᱫᱮᱞᱟ ᱥᱮᱛᱟᱜ ᱮᱱᱟ ᱾” ᱠᱩᱱᱤ ᱵᱮᱨᱮᱫ ᱛᱮ ᱢᱮᱫᱼᱟᱦᱟ ᱠᱚ ᱟᱵ ᱯᱷᱟᱹᱨᱪᱟᱹ ᱠᱟᱛᱮ ᱢᱮᱨᱚᱢ ᱠᱚᱭ ᱚᱰᱚᱠ ᱠᱚᱣᱟ ᱾ ᱵᱟᱦᱨᱮ ᱪᱷᱟᱴᱠᱟ ᱠᱩᱞᱦᱤ ᱥᱮᱫ ᱨᱮᱭᱟᱜ ᱠᱷᱩᱱᱴᱤ ᱨᱮ ᱛᱚᱞ ᱠᱟᱠᱚᱼᱣᱟᱭ ᱾ ᱢᱮᱨᱚᱢ ᱪᱷᱟᱴᱠᱟ ᱥᱮᱫ ᱨᱮ ᱛᱚᱞ ᱛᱟᱭᱚᱢ ᱢᱮᱞᱟ ᱪᱟᱹᱲᱤ ᱨᱮ ᱵᱚᱨᱟᱭ ᱟᱴᱮᱫᱽ ᱛᱮ ᱯᱟᱲᱦᱟᱣᱚᱜ ᱮ ᱫᱩᱲᱩᱵᱼᱟ ᱾ ᱟᱡ ᱟᱭᱳ ᱫᱚ ᱜᱚᱴᱟ ᱡᱚᱜ ᱠᱚᱭ ᱥᱟᱹᱛ ᱠᱮᱫᱼᱟ ᱾ ᱟᱡ ᱵᱟᱵᱟ ᱫᱚ ᱰᱟᱸᱜᱽᱨᱟ ᱠᱤᱱ ᱟᱨᱟᱬ ᱮ ᱡᱚᱲᱟᱣ ᱠᱤᱱ ᱛᱮ ᱱᱟᱦᱮᱞ ᱫᱚ ᱜᱚᱜ ᱤᱫᱤ ᱠᱟᱛᱮ ᱵᱟᱹᱫᱽ ᱥᱤᱭᱩᱜ ᱮ ᱪᱟᱞᱟᱣᱚᱜᱼᱟ ᱾ ᱠᱩᱱᱤ ᱟᱭᱳ ᱠᱩᱱᱤᱭ ᱢᱮᱛᱟᱭᱟ, “ ᱵᱤᱴᱤ, ᱫᱩ ᱤᱱᱟᱹᱜ ᱜᱮ ᱯᱟᱲᱦᱟᱣᱜ ᱢᱮ ᱾ ᱱᱤᱛ ᱫᱚ ᱪᱚᱞᱚ ᱫᱟᱹᱛᱟᱹᱱᱤ ᱠᱟᱛᱮ ᱫᱟᱠᱟ ᱡᱚᱢ ᱢᱮ, ᱟᱨ ᱵᱟᱹᱫᱽ ᱞᱟᱝ ᱥᱮᱱᱚᱜᱼᱟ ᱾” ᱠᱩᱱᱤ ᱢᱮᱱᱟᱭ,ᱼ ᱵᱟᱝᱟ ᱭᱳ, ᱤᱧ ᱫᱚ ᱫᱚᱠᱟᱱ ᱤᱧ ᱡᱷᱤᱡᱟ ᱾ ᱟᱡ ᱟᱭᱳᱭ ᱛᱮᱞᱟ ᱨᱩᱣᱟᱹᱲ ᱜᱚᱫᱟ, “ᱦᱚᱭ ᱛᱚᱵᱮ! ᱵᱤᱴᱤ ᱟᱢ ᱫᱚ ᱫᱟᱠᱟ ᱠᱚ ᱡᱚᱢ ᱠᱟᱛᱮ ᱥᱮᱱᱚᱜ ᱢᱮ ᱞᱚᱜᱚᱱ, ᱟᱨ ᱤᱧ ᱫᱩᱧ ᱥᱮᱱᱚᱜ ᱠᱟᱱᱟ ᱾ ᱫᱟᱠᱟ ᱠᱚ ᱥᱟᱸᱵᱟᱣ ᱠᱟᱛᱮ ᱵᱟᱹᱫᱽ ᱛᱮ ᱟᱢ ᱵᱟᱵᱟ ᱱᱟᱦᱟᱜ ᱨᱮᱸᱜᱮᱡ ᱛᱮᱭ ᱜᱷᱩᱨᱜᱷᱩᱨᱟᱹᱣ ᱪᱟᱵᱟ ᱦᱟᱠᱟᱱᱟ ᱾ ᱨᱟᱹᱜᱤ ᱛᱮ ᱱᱟᱦᱟᱜ ᱵᱟᱝᱠᱷᱟᱱ ᱟᱭᱟᱝ ᱵᱤᱧ ᱞᱮᱠᱟᱭ ᱥᱟᱲ ᱜᱚᱫᱚᱜᱼᱟ ᱾” ᱼ ᱦᱚᱭ ᱭᱳ, ᱫᱩ ᱥᱮᱱᱚᱜ ᱢᱮ, ᱤᱧ ᱦᱚᱸ ᱫᱚᱠᱟᱱ ᱛᱮ ᱱᱟᱦᱟᱜ ᱤᱧ ᱥᱮᱱᱚᱜᱼᱟ ᱾

ᱠᱩᱱᱤ ᱫᱟᱹᱛᱟᱹᱱᱤ ᱠᱟᱛᱮ ᱫᱟᱠᱟᱭ ᱡᱚᱢᱟ ᱾ ᱢᱮᱨᱚᱢ ᱠᱚ ᱜᱚᱰᱟ ᱥᱮᱫ ᱞᱟᱜᱟ ᱤᱫᱤ ᱠᱟᱛᱮ ᱛᱚᱞ ᱦᱚᱴᱚ ᱠᱟᱠᱚᱣᱟᱭ ᱾ ᱚᱲᱟᱜ ᱨᱩᱣᱟᱹᱲ ᱠᱟᱛᱮ ᱟᱥᱲᱟ ᱚᱞᱚᱜ ᱡᱷᱚᱞᱟ ᱠᱚ ᱟᱨ ᱫᱚᱠᱟᱱ ᱨᱮᱱᱟᱜ ᱪᱟᱹᱵᱤ ᱠᱟᱹᱴᱷᱤ ᱠᱚ ᱥᱟᱵ ᱠᱟᱛᱮ ᱫᱚᱠᱟᱱ ᱮ ᱥᱮᱱᱚᱜᱼᱟ ᱾ ᱫᱚᱠᱟᱱ ᱮ ᱡᱷᱤᱡ ᱠᱮᱫᱼᱟ ᱾ᱟᱥᱲᱟ ᱪᱟᱞᱟᱣ ᱚᱠᱛᱚ ᱟᱹᱣᱨᱤ ᱦᱩᱭᱩᱜ ᱵᱷᱩᱨ ᱚᱱᱟ ᱫᱚᱠᱟᱱ ᱨᱮᱭ ᱛᱟᱦᱮᱸᱱᱼᱟ ᱾ ᱫᱚᱠᱟᱱ ᱨᱮᱫᱚ ᱜᱤᱫᱽᱨᱟᱹ ᱵᱷᱩᱞᱟᱹᱣ ᱡᱚᱢᱟᱜ ᱟᱨ ᱚᱞ ᱯᱟᱲᱦᱟᱣ ᱨᱮ ᱵᱟᱠᱷᱨᱟ ᱠᱚᱞᱚᱢ ᱟᱨ ᱠᱷᱟᱛᱟ ᱠᱚᱜᱮ ᱢᱮᱱᱟᱜᱼᱟ ᱾ ᱟᱥᱲᱟ ᱥᱮᱱᱚᱜ ᱚᱠᱛᱚ ᱦᱩᱭ ᱞᱮᱱ ᱠᱷᱟᱱ, ᱫᱚᱠᱟᱱ ᱵᱚᱸᱫᱽ ᱠᱟᱛᱮ ᱚᱞᱚᱜ ᱟᱥᱲᱟ ᱛᱮᱭ ᱥᱮᱱᱚᱜᱼᱟ ᱾ ᱛᱮᱦᱮᱧ ᱫᱚ ᱟᱥᱲᱟ ᱥᱮᱴᱮᱨᱚᱜ ᱛᱮ ᱱᱟᱥᱮ ᱵᱤᱞᱚᱢ ᱧᱚᱜ ᱮᱱᱟᱭ ᱾ ᱫᱩᱣᱟᱹᱨ ᱥᱮᱴᱮᱨ ᱠᱟᱛᱮ ᱢᱮᱱᱟᱭ, ᱼ ᱢᱟᱪᱮᱛ ᱜᱚᱢᱠᱮ ᱪᱮᱫ ᱵᱷᱤᱛᱟᱹᱨ ᱤᱧ ᱦᱮᱡ ᱫᱟᱲᱮᱭᱟᱜᱼᱟ ? ᱢᱟᱪᱮᱛ ᱟᱡ ᱥᱮᱫ ᱠᱚᱭᱚᱜ ᱠᱟᱛᱮᱫ ᱮ ᱢᱮᱱᱟ, “ᱦᱮᱡ ᱮᱱᱟᱢ !” ᱢᱟᱪᱮᱛ ᱠᱟᱛᱷᱟᱭ ᱛᱚᱸᱜᱮᱭᱟ, “ᱟᱢ ᱫᱚ ᱪᱮᱫᱟᱜ ᱮᱢ ᱦᱤᱡᱩᱜ ᱠᱟᱱᱟ ᱚᱞᱚᱜ ᱫᱚ? ᱟᱢ ᱫᱚ ᱟᱞᱚᱢ ᱦᱤᱡᱩᱜᱼᱟ ᱾ ᱟᱢ ᱚᱠᱛᱚ ᱨᱮ ᱟᱥᱲᱟ ᱵᱟᱢ ᱦᱮᱡ ᱫᱟᱲᱮᱭᱟᱜ ᱠᱟᱱᱟ ᱟᱨ ᱟᱢ ᱪᱤᱠᱟᱛᱮ ᱚᱞᱚᱜ ᱮᱢ ᱥᱮᱬᱟ ᱠᱮᱭᱟ ᱾ ᱟᱢ ᱫᱚ ᱠᱷᱟᱹᱞᱤ ᱟᱢ ᱟᱭᱳ ᱵᱟᱵᱟ ᱛᱤᱠᱤᱱᱟᱜ ᱴᱟᱠᱟ ᱯᱩᱭᱥᱟᱹ ᱜᱮᱢ ᱵᱚᱨᱵᱟᱫᱽ ᱮᱫᱼᱟ ᱾” ᱠᱩᱱᱤ ᱢᱟᱪᱮᱛᱟᱜ ᱠᱟᱛᱷᱟ ᱟᱸᱡᱚᱢ ᱠᱟᱛᱮ ᱢᱮᱫ ᱫᱟᱜ ᱜᱮᱛᱟᱭ ᱡᱚᱨᱚᱜ ᱠᱟᱱᱟ ᱦᱤᱰᱤᱨᱼᱦᱤᱰᱤᱨ ᱾ ᱠᱩᱱᱤ ᱚᱠᱛᱚ ᱨᱮ ᱟᱥᱲᱟ ᱵᱟᱝ ᱦᱤᱡᱩᱜ ᱨᱮᱱᱟᱜ ᱠᱩᱲᱟᱹᱭ ᱮ ᱧᱟᱢ ᱠᱮᱫᱼᱟ ᱾ ᱜᱷᱟᱹᱲᱤᱠ ᱦᱤᱡᱩᱜ ᱠᱷᱟᱹᱛᱤᱨ ᱞᱩᱛᱩᱨ ᱨᱮ ᱥᱟᱵ ᱠᱟᱛᱮ ᱫᱩᱣᱟᱹᱨ ᱥᱩᱨ ᱨᱮᱠᱚ ᱛᱤᱸᱜᱩ ᱚᱪᱚ ᱮᱭᱟ ᱾ ᱟᱹᱰᱤ ᱜᱷᱟᱹᱲᱤᱠ ᱠᱩᱱᱤ ᱞᱩᱛᱩᱨ ᱨᱮ ᱥᱟᱵ ᱠᱟᱛᱮᱭ ᱛᱤᱸᱜᱩ ᱟᱠᱟᱱᱟ ᱾ ᱵᱚᱦᱚᱜ ᱛᱤᱨᱩᱵ ᱠᱟᱛᱮ ᱾ ᱢᱮᱫ ᱫᱟᱜ ᱛᱟᱭ ᱞᱤᱸᱜᱤ ᱨᱚᱦᱚᱲᱚᱜ ᱠᱟᱱᱟ, ᱫᱟᱭᱟ ᱜᱮ ᱾ ᱟᱹᱰᱤ ᱜᱷᱟᱹᱲᱤᱠ ᱯᱚᱨᱮ ᱢᱟᱪᱮᱛ ᱮ ᱢᱮᱱᱟ, “ᱢᱟ ᱫᱩᱲᱩᱵ ᱢᱮ ᱱᱤᱛ ᱫᱚ, ᱟᱨ ᱜᱟᱯᱟ ᱠᱷᱚᱱ ᱚᱠᱛᱚ ᱨᱮᱢ ᱦᱤᱡᱩᱜᱼᱟ ᱾ ᱵᱟᱝᱠᱷᱟᱱ ᱱᱚᱰᱮ ᱵᱟᱹᱧ ᱵᱚᱞᱚ ᱚᱪᱚᱣᱟᱢᱟ ᱾”

ᱤᱠᱟᱹ ᱠᱟᱹᱧ ᱢᱮ ᱢᱟᱪᱮᱛ ᱜᱚᱢᱠᱮ, ᱜᱟᱯᱟ ᱠᱷᱚᱱ ᱚᱠᱛᱚ ᱨᱮᱜᱤᱧ ᱦᱤᱡᱩᱜᱼᱟ ᱾ ᱢᱮᱫᱼᱫᱟᱜ ᱠᱚ ᱡᱚᱫ ᱡᱚᱫ ᱛᱮ ᱚᱛ ᱠᱷᱚᱱ ᱡᱷᱚᱞᱟᱭ ᱥᱟᱵ ᱨᱟᱠᱟᱵᱽ ᱛᱮ ᱟᱡ ᱨᱤᱱ ᱜᱟᱛᱮ ᱠᱩᱲᱤ ᱥᱟᱨᱚ ᱥᱩᱨ ᱨᱮᱭ ᱫᱩᱲᱩᱵ ᱮᱱᱟ ᱾
ᱠᱤᱪᱷᱤ ᱜᱷᱟᱹᱲᱤᱠ ᱛᱟᱭᱚᱢ ᱮᱴᱟᱜ ᱢᱟᱪᱮᱛ ᱮ ᱦᱮᱡ ᱮᱱᱛᱮ, ᱟᱨ ᱦᱚᱸ ᱯᱟᱲᱦᱟᱣ ᱛᱟᱠᱚ ᱦᱩᱭ ᱮᱱᱟ ᱾ ᱚᱱᱟ ᱯᱚᱨᱮ ᱴᱤᱯᱷᱤᱱ (ᱫᱟᱠᱟ ᱡᱚᱢ) ᱪᱷᱩᱴᱤ ᱦᱩᱭ ᱮᱱᱟ ᱾ ᱠᱩᱱᱤ ᱫᱚ ᱠᱞᱟᱥ ᱚᱲᱟᱜ ᱠᱷᱚᱱ ᱜᱮ ᱵᱟᱭ ᱚᱰᱚᱠ ᱞᱮᱱᱟ ᱾ ᱚᱸᱰᱮ ᱜᱮ ᱫᱩᱲᱩᱵ ᱟᱠᱟᱱᱟᱭ ᱾ ᱩᱱᱤ ᱢᱟᱪᱮᱛ ᱟᱜ ᱠᱟᱛᱷᱟ ᱩᱭᱦᱟᱹᱨ ᱛᱮ ᱡᱤᱣᱤ ᱛᱟᱭ ᱞᱚᱜ ᱠᱟᱱᱟ ᱾ ᱥᱟᱨᱚ ᱵᱟᱦᱨᱮ ᱫᱚᱠᱟᱱ ᱠᱷᱚᱱ ᱵᱟᱨ ᱴᱟᱠᱟ ᱨᱮᱭᱟᱜ ᱜᱚᱞᱜᱩᱞᱟᱹᱭ ᱠᱤᱨᱤᱧ ᱟᱹᱜᱩ ᱠᱮᱫ ᱛᱮ ᱠᱩᱱᱤᱭ ᱢᱮᱛᱟᱭ ᱟ, “ᱱᱮ ᱠᱩᱱᱤ ᱡᱚᱢ ᱢᱮ ᱛᱮᱦᱮᱧ ᱢᱟ ᱠᱞᱟᱥ ᱠᱷᱚᱱ ᱵᱟᱦᱨᱮ ᱜᱮ ᱵᱟᱝᱮᱢ ᱚᱰᱚᱠᱚᱜ ᱠᱟᱱ ᱫᱚ?” ᱼ ᱦᱚᱭ ᱵᱟᱹᱧ ᱚᱰᱚᱠ ᱞᱮᱱ ᱜᱮᱭᱟ ᱾ ᱢᱟᱪᱮᱛ ᱮᱱᱟᱝ ᱪᱮᱫ ᱞᱮᱠᱟᱭ ᱢᱮᱛᱟᱫ ᱫᱤᱧᱟ ᱾ ᱚᱞᱚᱜ ᱵᱟᱢ ᱪᱮᱫ ᱠᱮᱭᱟ ᱾ ᱪᱤᱠᱟᱹ ᱵᱟᱹᱧ ᱪᱮᱫ ᱠᱮᱭᱟ ᱾ ᱥᱚᱠᱛᱚᱧ ᱯᱟᱲᱦᱟᱣᱜᱼᱟ ᱾ ᱪᱤᱠᱟᱹ ᱵᱟᱹᱧ ᱪᱮᱫᱟ ᱾ ᱤᱧ ᱫᱩᱧ ᱯᱟᱲᱦᱟᱣᱜᱼᱟ, ᱟᱢ ᱫᱚ ᱫᱩ ᱥᱮᱱᱚᱜ ᱢᱮ ᱾ ᱥᱟᱨᱚᱭ ᱢᱮᱱᱟ, ᱼ ᱮ ᱠᱩᱱᱤ ᱪᱚᱞᱚ ᱥᱮ ᱪᱟᱞᱼᱠᱤᱛᱼᱠᱤᱛ ᱞᱟᱝ ᱠᱷᱮᱞᱟ ᱾ ᱟᱢ ᱫᱚ ᱚᱱᱮ ᱚᱱᱠᱟ ᱢᱟᱪᱮᱛᱟᱜ ᱠᱟᱛᱷᱟ ᱛᱮᱜᱮᱢ ᱢᱚᱠᱚᱧ ᱜᱚᱫᱚᱜ ᱠᱟᱱᱟ ᱾ ᱼ ᱵᱟᱝ ᱥᱟᱨᱚ ᱟᱢ ᱫᱚ ᱵᱟᱢ ᱵᱟᱰᱟᱭᱟ ᱤᱧ ᱫᱩᱧ ᱵᱚᱠᱟ ᱜᱮᱭᱟ ᱾ ᱚᱱᱟ ᱛᱮᱜᱮ ᱢᱟᱪᱮᱛ ᱫᱚ ᱚᱱᱠᱟᱭ ᱢᱮᱛᱟᱫ ᱫᱤᱧᱟ ᱾ ᱤᱧ ᱫᱚ ᱯᱟᱲᱦᱟᱣ ᱦᱚᱪᱚᱣᱟᱹᱧ ᱢᱮ, ᱟᱢ ᱫᱚ ᱥᱮᱱᱚᱜ ᱢᱮ ᱾ ᱼ ᱦᱚᱭ ᱛᱚᱵᱮ ᱢᱟ ᱛᱟᱦᱮᱸᱱ ᱢᱮ ᱤᱧ ᱫᱩᱧ ᱥᱮᱱᱚᱜ ᱠᱟᱱᱟ ᱾ ᱥᱟᱨᱚᱭ ᱥᱮᱱᱮᱱ ᱛᱟᱭᱚᱢ ᱠᱩᱱᱤ ᱫᱚ ᱢᱤᱫ ᱦᱤᱸᱫᱤ ᱯᱚᱛᱚᱵ ᱚᱰᱚᱠ ᱠᱟᱛᱮ ᱚᱱᱚᱬᱦᱮᱭ ᱥᱚᱲᱠᱷᱚᱭᱮᱫ ᱟ ᱾ ᱥᱚᱲᱠᱷᱚ ᱜᱮ ᱵᱟᱝ ᱮ ᱥᱚᱲᱠᱷᱚ ᱫᱟᱲᱮᱭᱟᱜ ᱠᱟᱱᱟ ᱾ ᱪᱮᱫᱟᱜ ᱥᱮ ᱢᱟᱪᱮᱛᱟᱜ ᱠᱟᱛᱷᱟ ᱜᱮ ᱱᱤᱛ ᱦᱟᱹᱵᱤᱡ ᱵᱟᱭ ᱦᱤᱲᱤᱧ ᱫᱟᱲᱮᱭᱟᱜ ᱠᱟᱱᱟ ᱾ ᱚᱱᱟ ᱛᱮ ᱮᱴᱟᱜᱟᱜ ᱠᱟᱛᱷᱟ ᱠᱚᱜᱮ ᱵᱚᱦᱚᱜ ᱨᱮ ᱵᱟᱭ ᱠᱷᱟᱹᱲ ᱫᱟᱲᱮᱭᱟᱜ ᱠᱟᱱᱟ ᱾ ᱫᱟᱠᱟ ᱡᱚᱢ ᱚᱠᱛᱚ ᱪᱟᱵᱟᱭᱮᱱᱟ ᱾ ᱛᱟᱭᱚᱢ ᱫᱚ ᱡᱚᱛᱚ ᱜᱤᱫᱽᱨᱟᱹ ᱠᱚ ᱦᱮᱡ ᱨᱩᱣᱟᱹᱲ ᱮᱱᱟ ᱠᱞᱟᱥ ᱚᱲᱟᱜ ᱛᱮ ᱾ ᱟᱡ ᱦᱚᱸ ᱛᱤ ᱡᱟᱸᱜᱟ ᱠᱚ ᱠᱟᱹᱴᱤᱡ ᱛᱤᱭᱟᱹᱨ ᱵᱟᱲᱟ ᱧᱚᱜ ᱠᱟᱛᱮ ᱟᱨ ᱦᱚᱸᱭ ᱫᱩᱲᱩᱵ ᱨᱩᱣᱟᱹᱲ ᱮᱱᱟ ᱾ ᱢᱤᱫᱴᱟᱹᱝ ᱱᱟᱶᱟ ᱢᱟᱪᱮᱛ ᱮ ᱵᱚᱞᱚᱭᱮᱱᱟ ᱾ ᱩᱱ ᱚᱠᱛᱚ ᱫᱚ ᱥᱮᱨᱮᱧ ᱠᱞᱟᱥ ᱛᱟᱠᱚ ᱛᱟᱦᱮᱸ ᱠᱟᱱᱟ ᱾

ᱼ ᱩᱱᱤ ᱢᱟᱪᱮᱛ ᱫᱚ ᱢᱤᱫ ᱢᱤᱫ ᱦᱚᱲ ᱦᱚᱦᱚ ᱠᱟᱛᱮ ᱡᱚᱛᱚ ᱦᱚᱲ ᱮ ᱥᱮᱨᱮᱧ ᱦᱚᱪᱚᱭᱮᱫ ᱠᱚᱣᱟ ᱾ ᱠᱩᱱᱤᱭᱟᱜ ᱚᱠᱛᱚ ᱦᱚᱸ ᱦᱮᱡ ᱮᱱᱟ ᱾ ᱢᱟᱪᱮᱛ ᱥᱩᱨ ᱮ ᱥᱮᱱ ᱮᱱᱛᱮ, ᱥᱟᱱᱟᱢ ᱜᱤᱫᱽᱨᱟᱹ ᱥᱟᱢᱟᱝ ᱨᱮ ᱛᱤᱸᱜᱩ ᱠᱟᱛᱮ ᱥᱮᱨᱮᱧ ᱦᱩᱭᱩᱜᱼᱟ ᱾ ᱢᱟᱪᱮᱛ ᱮ ᱢᱮᱱᱮᱫᱼᱟ ᱾ ᱡᱟᱦᱟᱸ ᱥᱮᱨᱮᱧ ᱜᱮᱢ ᱵᱟᱰᱟᱭ, ᱚᱱᱟᱜᱮ ᱥᱮᱨᱮᱧ ᱢᱮ, ᱥᱟᱱᱛᱟᱲ, ᱦᱤᱸᱫᱤ, ᱵᱟᱝᱞᱟ ᱡᱚᱛᱚ ᱜᱮ ᱜᱟᱱᱚᱜᱼᱟ ᱾ ᱡᱚᱛᱚ ᱦᱚᱲ ᱥᱟᱢᱟᱝ ᱨᱮ ᱦᱮᱡ ᱠᱟᱛᱮ ᱛᱤᱸᱜᱩ ᱢᱟᱭ ᱛᱤᱸᱜᱩ ᱮᱱᱟ, ᱢᱮᱱᱠᱷᱟᱱ ᱥᱮᱨᱮᱧ ᱞᱟᱹᱜᱤᱫ ᱛᱮᱢᱟ ᱟᱞᱟᱝ ᱜᱮ ᱵᱟᱭ ᱩᱞᱴᱟᱹᱣᱜ ᱠᱟᱱᱟ ᱾ ᱢᱟᱪᱮᱛ ᱮ ᱢᱮᱱᱟ, “ᱠᱩᱱᱤ ᱥᱮᱨᱮᱧ ᱢᱮ ᱵᱟᱝᱠᱷᱟᱱ ᱱᱟᱦᱟᱜ ᱢᱤᱫ ᱴᱷᱮᱸᱜᱟᱹᱧ ᱮᱢᱟᱢᱟ ᱟᱨ ᱱᱚᱢᱵᱚᱨ ᱦᱚᱸ ᱵᱟᱹᱧ ᱮᱢᱟᱢᱟ ᱾ ᱥᱮᱨᱮᱧ ᱫᱚ ᱦᱩᱭ ᱟᱢ ᱜᱮᱭᱟ ᱾ ᱛᱟᱭᱚᱢ ᱠᱩᱱᱤ ᱦᱟᱱᱛᱮ ᱱᱟᱛᱮ ᱠᱚᱭᱚᱜ ᱧᱚᱜ ᱠᱟᱛᱮ ᱠᱤᱪᱨᱤᱡ ᱠᱚᱛᱟᱭ ᱮ ᱚᱨ ᱵᱟᱲᱟᱭᱮᱫᱼᱟ ᱾ ᱼ ᱠᱩᱱᱤ ᱞᱚᱜᱚᱱ ᱢᱟ ᱥᱮᱨᱮᱧ ᱢᱮ……ᱹ᱾ ᱛᱟᱭᱚᱢ ᱥᱮᱨᱮᱧ ᱮ ᱮᱦᱚᱵ ᱠᱮᱫᱼᱟ ᱥᱟᱱᱛᱟᱲ ᱛᱮ…ᱹ

ᱼ ”ᱜᱚᱞᱜᱟᱯᱯᱟᱢ ᱡᱚᱢᱟ, ᱵᱟᱝ ᱟᱛᱤᱧᱟ,
ᱼ ᱪᱤᱱᱤ ᱞᱟᱹᱰᱩᱢ ᱡᱚᱢᱟ ᱵᱟᱝ ᱟᱛᱤᱧᱟ,
ᱼ ᱛᱚᱵᱮ ᱫᱩᱞᱟᱹᱲᱤᱭᱟᱹ ᱞᱟᱹᱭ ᱢᱮ ᱪᱮᱫ ᱮᱢ ᱡᱚᱢᱟ,”

ᱱᱚᱝᱠᱟ ᱥᱮᱨᱮᱧ ᱜᱮ ᱥᱮᱨᱮᱧ ᱞᱮᱫᱼᱟᱭ ᱠᱩᱱᱤ, ᱦᱟᱜ ᱦᱟᱜ ᱠᱟᱛᱮ ᱥᱟᱱᱟᱢ ᱠᱮᱞᱟᱥ ᱨᱤᱱ ᱜᱤᱫᱽᱨᱟᱹ ᱠᱚ ᱞᱟᱸᱫᱟ ᱠᱮᱫᱼᱟ ᱾ ᱢᱟᱪᱮᱛ ᱦᱚᱸ ᱞᱟᱸᱫᱟ ᱵᱟᱝ ᱮ ᱥᱟᱸᱵᱽᱲᱟᱣ ᱞᱮᱫᱼᱟ, ᱥᱟᱶᱛᱮ ᱠᱩᱱᱤ ᱦᱚᱸᱭ ᱞᱟᱸᱫᱟ ᱠᱮᱫᱼᱟ ᱾ ᱪᱷᱩᱴᱤ ᱨᱮᱱᱟᱜ ᱜᱷᱟᱹᱱᱴᱤ ᱥᱟᱰᱮᱭᱟ ᱾ ᱥᱟᱱᱟᱢ ᱜᱤᱫᱽᱨᱟᱹ ᱠᱚ ᱞᱟᱸᱫᱟ ᱞᱟᱸᱫᱟ ᱠᱟᱛᱮ ᱚᱲᱟᱜ ᱢᱚᱸᱦᱰᱟ ᱠᱚ ᱨᱩᱣᱟᱹᱲ ᱮᱱᱟ ᱾

ᱟᱹᱛᱩ ᱫᱤᱥᱚᱢ ᱨᱮᱱᱟᱜ ᱰᱟᱦᱟᱨ ᱨᱮ ᱥᱟᱜᱟᱲ ᱜᱟᱹᱰᱤ ᱠᱤᱧᱼᱠᱚᱡ ᱪᱟᱠᱟ ᱟᱹᱪᱩᱨᱚᱜ ᱯᱤᱪᱷᱤ ᱥᱟᱰᱮᱭᱟ, ᱚᱱᱠᱟ ᱜᱮ ᱠᱩᱱᱤ ᱛᱮᱠᱚᱣᱟᱜ ᱜᱷᱟᱨᱚᱸᱡᱽ ᱦᱚᱸ ᱥᱮᱱᱚᱜ ᱠᱟᱱᱟ ᱾ ᱠᱩᱱᱤ ᱟᱡ ᱵᱟᱵᱟ ᱫᱚ ᱟᱡᱤᱡ ᱦᱚᱯᱚᱱ ᱮᱨᱟ ᱟᱨ ᱚᱲᱟᱜ ᱜᱷᱤᱨᱱᱤᱭᱟᱜ ᱫᱚ ᱮᱠᱟᱞ ᱵᱟᱭ ᱩᱭᱦᱟᱹᱨᱟ ᱾ ᱦᱳᱲᱳ ᱪᱟᱥ ᱫᱤᱱ ᱫᱚ ᱦᱳᱲᱳ ᱠᱚ ᱪᱟᱥᱟ, ᱟᱨ ᱮᱴᱟᱜ ᱫᱤᱱ ᱫᱚ ᱦᱟᱴ ᱯᱟᱛᱟ ᱫᱟᱬᱟ, ᱦᱟᱺᱰᱤ ᱯᱟᱹᱨᱣᱟᱹ ᱧᱩ ᱨᱮᱜᱮ ᱡᱚᱵᱮ ᱵᱷᱩᱞᱟᱹᱣ ᱠᱚᱜ ᱟᱭ ᱾ ᱚᱱᱟ ᱠᱚ ᱧᱮᱞᱛᱮ ᱠᱩᱱᱤ ᱟᱨ ᱟᱡ ᱟᱭᱳ ᱫᱚ ᱟᱹᱰᱤ ᱠᱤᱱ ᱟᱹᱲᱤᱥᱚᱜᱼᱟ ᱾ ᱠᱩᱱᱤᱭᱟᱜ ᱫᱤᱱᱟᱹᱢ ᱟᱜ ᱠᱟᱹᱢᱤ ᱫᱚᱠᱟᱱ ᱟᱨ ᱚᱞᱚᱜ ᱟᱥᱲᱟ, ᱥᱟᱶᱛᱮ ᱟᱡ ᱟᱭᱳ ᱚᱲᱟᱜ ᱨᱮᱱᱟᱜ ᱠᱟᱹᱢᱤ ᱠᱚᱨᱮ ᱦᱚᱸᱭ ᱜᱚᱲᱚ ᱟᱭᱟ ᱾ ᱟᱹᱭᱩᱵ ᱵᱮᱲᱟ ᱫᱤᱱᱟᱹᱢ ᱚᱞᱚᱜ ᱮ ᱫᱩᱲᱩᱵᱼᱟ ᱾ ᱟᱡ ᱵᱟᱵᱟ ᱟᱹᱣᱨᱤᱭ ᱦᱤᱡᱩᱜ ᱫᱷᱟᱹᱵᱤᱡ ᱾ ᱟᱡ ᱵᱟᱵᱟ ᱫᱚ ᱫᱤᱱᱟᱹᱢ ᱞᱮᱠᱟ ᱜᱮ ᱵᱩᱞ ᱠᱟᱛᱮᱫ ᱮ ᱦᱤᱡᱩᱜᱼᱟ ᱾ ᱠᱩᱱᱤ ᱟᱭᱳ ᱡᱟᱣ ᱜᱮᱭ ᱢᱟᱱᱟ ᱮᱭᱟ, ᱦᱟᱺᱰᱤ–ᱯᱟᱹᱨᱣᱟᱹ ᱧᱩ ᱫᱚ ᱵᱟᱹᱜᱤ ᱢᱮ ᱾ ᱠᱩᱱᱤ ᱵᱤᱴᱤ ᱱᱤᱛ ᱮ ᱚᱞᱚᱜ ᱠᱟᱱᱟ, ᱩᱱᱤ ᱞᱟᱹᱜᱤᱫ ᱯᱚᱛᱚᱵ ᱟᱨ ᱠᱷᱟᱛᱟ ᱠᱚ ᱡᱟᱣ ᱜᱮ ᱥᱮᱨᱢᱟ ᱯᱤᱪᱷᱤ ᱠᱤᱨᱤᱧ ᱦᱩᱭᱩᱜ ᱠᱟᱱᱟ ᱾ ᱱᱚᱛᱮ ᱦᱚᱲᱢᱚ ᱦᱚᱸᱭ ᱦᱟᱨᱟᱜ ᱠᱟᱱᱟ, ᱠᱤᱪᱨᱤᱡ ᱦᱚᱸ ᱵᱟᱨᱼᱯᱮ ᱥᱮᱨᱢᱟ ᱨᱮᱜᱮ ᱠᱷᱟᱴᱚᱜ ᱠᱟᱱ ᱛᱟᱭᱟ ᱾ ᱼ ᱚᱞᱚᱜ ᱥᱮᱬᱟ ᱠᱟᱛᱮ ᱪᱮᱫ ᱞᱟᱵᱽ ᱦᱩᱭᱩᱜᱼᱟ ᱾ ᱡᱟᱶᱟᱭ ᱚᱲᱟᱜ ᱨᱮ ᱥᱮᱱ ᱠᱟᱛᱮ ᱪᱩᱞᱦᱟᱹ ᱜᱮ ᱱᱟᱦᱟᱜ ᱮ ᱚᱝᱼᱟ ᱾ ᱟᱡ ᱵᱟᱵᱟ ᱟᱨ ᱦᱚᱸᱭ ᱛᱚᱸᱜᱮᱭᱟᱜᱼᱟ, “ᱵᱟᱹᱫᱽ ᱠᱟᱹᱢᱤ ᱥᱮᱵᱮᱭᱮᱢᱮ, ᱤᱱᱟᱹ ᱫᱚ ᱯᱮᱱᱮ ᱦᱚᱲ ᱛᱮ ᱵᱚᱱ ᱠᱟᱹᱢᱤ ᱞᱮᱠᱷᱟᱱ ᱟᱹᱰᱤ ᱩᱥᱟᱹᱨᱟᱹ ᱥᱟᱱᱟᱢ ᱠᱷᱚᱱ ᱞᱟᱦᱟᱛᱮ ᱠᱟᱹᱢᱤ ᱵᱚᱱ ᱥᱟᱹᱛᱼᱟ ᱾”

ᱠᱩᱱᱤ ᱟᱭᱳ ᱢᱮᱨᱚᱢ ᱠᱚᱫᱚ ᱫᱟᱹᱦᱱᱟᱹ ᱞᱮᱠᱟᱛᱮ ᱟᱹᱥᱩᱞ ᱟᱠᱟᱫ ᱠᱚᱣᱟᱭ ᱾ ᱠᱩᱱᱤ ᱟᱭᱳᱭ ᱢᱮᱱᱟ, “ᱵᱤᱴᱤ ᱢᱮᱨᱚᱢ ᱠᱚ ᱧᱮᱞ ᱜᱚᱲᱚᱣᱟᱹᱧ ᱢᱮ ᱾ᱱᱤᱛ ᱢᱟ ᱪᱟᱥ ᱫᱤᱱ ᱠᱟᱱᱟ ᱟᱲᱟᱜ ᱜᱤᱰᱤ ᱦᱚᱸ ᱵᱟᱝ ᱜᱟᱱᱚᱜᱼᱟ ᱾ ᱟᱢ ᱫᱚ ᱫᱤᱱᱟᱹᱢ ᱟᱥᱲᱟ ᱪᱟᱞᱟᱜ ᱞᱟᱦᱟᱨᱮ ᱰᱟᱹᱦᱤ ᱥᱮᱫ ᱨᱮ ᱛᱚᱞ ᱦᱚᱴᱚ ᱠᱟᱠᱚ ᱢᱮ ᱾ ᱨᱩᱣᱟᱹᱲ ᱚᱠᱛᱚ ᱤᱧ ᱠᱷᱚᱱ ᱞᱟᱦᱟᱛᱮᱢ ᱦᱤᱡᱩᱜ ᱠᱷᱟᱱ ᱟᱹᱜᱩ ᱛᱚᱨᱟ ᱠᱚᱢ ᱵᱟᱝ ᱠᱷᱟᱱ ᱤᱧ ᱜᱤᱧ ᱟᱹᱜᱩ ᱛᱟᱨᱟ ᱠᱚᱣᱟ ᱾ᱱᱩᱠᱩ ᱜᱮ ᱛᱟᱞᱟᱝ ᱫᱷᱚᱱ ᱨᱩᱣᱟᱹᱜ ᱦᱟᱹᱥᱩᱜ ᱠᱚᱨᱮ ᱱᱩᱠᱩ ᱜᱮ ᱟᱹᱠᱷᱨᱤᱧ ᱠᱟᱛᱮᱞᱟᱝ ᱨᱟᱱ ᱵᱮᱥᱚᱜᱼᱟ ᱾ ᱼ ᱦᱚᱭ ᱭᱳ ᱧᱮᱞ ᱜᱚᱲᱚᱣᱟᱢᱟᱹᱧ ᱾
ᱧᱮᱞ ᱧᱮᱞᱛᱮ ᱠᱩᱱᱤ ᱜᱮᱯᱩᱱ ᱥᱮᱨᱢᱟᱭ ᱦᱩᱭ ᱮᱱᱟ ᱾

ᱢᱤᱫ ᱫᱤᱱ ᱦᱤᱞᱚᱜ, ᱟᱡ ᱟᱭᱳ ᱦᱚᱸ ᱵᱟᱹᱫᱽ ᱥᱮᱱ ᱠᱟᱛᱮ ᱠᱩᱱᱤ ᱟᱡ ᱵᱟᱵᱟ ᱫᱟᱠᱟᱭ ᱮᱢᱟᱫᱮᱭᱟ ᱾ ᱟᱡ ᱫᱚ ᱛᱚᱞᱟ ᱛᱩᱫ ᱮ ᱮᱦᱚᱵ ᱠᱮᱫᱼᱟ ᱾ᱟᱡ ᱵᱟᱵᱟ ᱫᱟᱠᱟ ᱡᱚᱢ ᱛᱩᱞᱩᱡ ᱜᱮ ᱠᱩᱱᱤ ᱟᱡ ᱟᱭᱳᱭ ᱢᱮᱛᱟᱭᱟ, “ᱠᱩᱱᱤ ᱵᱤᱴᱤ ᱫᱚ ᱵᱟᱢ ᱟᱹᱜᱩ ᱛᱟᱨᱟ ᱞᱮᱫᱮ ᱫᱚ?” ᱟᱡ ᱟᱭᱳᱭ ᱛᱮᱞᱟ ᱜᱚᱫᱟ, ᱼ ᱩᱱᱤ ᱫᱚ ᱫᱚᱠᱟᱱ ᱮ ᱪᱟᱞᱟᱣ ᱮᱱᱟ, ᱚᱸᱰᱮ ᱠᱷᱚᱱ ᱜᱮ ᱚᱞᱚᱜ ᱞᱟᱹᱜᱤᱫ ᱟᱥᱲᱟ ᱛᱮ ᱪᱟᱞᱟᱣᱚᱜ ᱟᱭ ᱾ ᱼ ᱟᱹᱵᱤᱱ ᱫᱚ ᱤᱧᱟᱜ ᱠᱟᱛᱷᱟ ᱜᱮ ᱵᱟᱝ ᱵᱤᱱ ᱟᱸᱡᱚᱢᱟ ᱾ ᱱᱤᱛ ᱥᱟᱹᱨᱫᱤ ᱫᱟᱜ ᱟᱠᱟᱫ ᱟᱭ, ᱡᱚᱛᱚ ᱦᱚᱲ ᱠᱟᱹᱢᱤ ᱠᱚ ᱥᱟᱹᱨᱫᱤ ᱟᱠᱟᱱᱟ ᱾ ᱟᱢ ᱫᱚ ᱚᱞᱚᱜ ᱮᱢ ᱵᱷᱮᱡᱟᱭᱮ ᱠᱟᱱᱟ ᱾ ᱛᱤᱱᱟᱹᱜ ᱡᱮ ᱱᱟᱦᱟᱜ ᱯᱟᱲᱦᱟᱣ ᱠᱟᱛᱮ ᱱᱮᱦᱟᱞᱟ ᱾ ᱟᱡ ᱵᱟᱵᱟᱭ ᱢᱮᱱᱟ ᱾ ᱠᱩᱱᱤ ᱟᱭᱳ ᱪᱮᱫ ᱦᱚᱸ ᱵᱟᱭ ᱢᱮᱱ ᱨᱩᱣᱟᱹᱲ ᱞᱮᱫᱼᱟ ᱾ ᱡᱟᱣᱜᱮ ᱠᱩᱱᱤ ᱟᱡ ᱵᱟᱵᱟ ᱫᱚ ᱨᱟᱹᱜᱤ ᱵᱟᱲᱟᱜ ᱟᱭ ᱾ ᱱᱟᱥᱮ ᱠᱟᱛᱷᱟ ᱠᱚᱛᱮ ᱜᱮ, ᱚᱲᱟᱜ ᱠᱚᱨᱮ ᱦᱚᱸᱭ ᱱᱮᱭᱟᱣᱚᱜᱼᱟ ᱾ ᱠᱩᱱᱤ ᱫᱚ ᱢᱚᱱᱮ ᱢᱚᱱᱮᱛᱮ ᱟᱹᱲᱤᱥᱚᱜ ᱜᱮᱭᱟᱭ, ᱟᱫᱚ ᱪᱮᱫ ᱦᱚᱸ ᱵᱟᱭ ᱞᱟᱹᱭᱟ ᱾ ᱟᱡ ᱵᱟᱵᱟ ᱫᱚ ᱦᱟᱺᱰᱤ ᱯᱟᱹᱨᱣᱟᱹ ᱠᱚ ᱟᱹᱰᱤ ᱜᱮ ᱧᱩ ᱵᱟᱹᱲᱛᱤᱭᱮᱫ ᱠᱟᱱᱟᱭ ᱾ ᱢᱟᱱᱟᱭ ᱮ ᱛᱮᱦᱚᱸ ᱵᱟᱭ ᱟᱸᱡᱚᱢᱟ ᱾ ᱱᱮᱭᱟᱣ ᱨᱩᱣᱟᱹᱲᱚᱜ ᱟᱭ ᱾ ᱟᱡ ᱠᱩᱥᱤ ᱵᱟᱹᱫᱽ ᱨᱮᱦᱚᱸ ᱠᱟᱹᱢᱤ ᱥᱟᱱᱟᱭ ᱠᱷᱟᱱ ᱮ ᱠᱟᱹᱢᱤᱭᱟ ᱵᱟᱝ ᱠᱷᱟᱱ ᱵᱟᱝᱟ ᱾ ᱟᱹᱛᱩ ᱴᱚᱞᱟᱨᱮ ᱞᱟᱹᱭ ᱟᱭ ᱠᱩᱲᱤ ᱜᱤᱫᱽᱨᱟᱹ ᱠᱟᱱ ᱜᱮᱥᱮ ᱛᱤᱧ ᱮ ᱡᱟᱶᱟᱭᱚᱜ ᱟᱭ ᱱᱟᱦᱟᱜ, ᱪᱮᱫ ᱩᱱᱟᱹᱜ ᱩᱭᱦᱟᱹᱨ ᱨᱮᱱᱟᱜ ᱫᱚ !

ᱢᱤᱫ ᱫᱤᱱ ᱦᱤᱞᱚᱜ ᱠᱩᱱᱤ ᱟᱡ ᱵᱟᱵᱟ ᱥᱤᱸᱜᱟᱹᱲ ᱜᱮᱞ ᱴᱟᱲᱟᱝ ᱦᱩᱭᱮᱱ ᱨᱮᱦᱚᱸ ᱵᱟᱝ ᱮ ᱦᱮᱡ ᱞᱮᱱᱟ ᱾ ᱠᱩᱱᱤ ᱦᱚᱸ ᱯᱟᱲᱦᱟᱣ ᱵᱷᱟᱜᱟᱣ ᱜᱚᱫ ᱮᱱᱟᱭ ᱾ ᱟᱡ ᱟᱭᱳ ᱦᱚᱸ ᱤᱱᱟᱹ ᱦᱤᱞᱚᱜ ᱫᱚ ᱠᱟᱹᱢᱤ ᱞᱟᱸᱜᱟ ᱠᱟᱛᱮ ᱟᱹᱰᱤ ᱫᱚᱲ ᱜᱮ ᱡᱟᱹᱯᱤᱫ ᱥᱟᱱᱟᱭ ᱠᱟᱱᱟ ᱾ ᱠᱩᱱᱤ ᱟᱨ ᱟᱡ ᱟᱭᱳ ᱟᱹᱰᱤ ᱫᱚᱲ ᱠᱤᱱ ᱪᱤᱱᱛᱟᱹᱭᱟ ᱾ ᱟᱡ ᱵᱟᱵᱟ ᱟᱜ ᱫᱚ ᱠᱚᱱᱚ ᱩᱭᱦᱟᱹᱨ ᱜᱮ ᱵᱟᱝ, ᱥᱟᱛ ᱥᱟᱺᱜᱤᱭᱟᱹ ᱢᱤᱫ ᱵᱟᱹᱭᱦᱟᱹᱲ ᱜᱟᱹᱪᱷᱭᱟᱹᱣ ᱮ ᱥᱮᱱ ᱞᱮᱱᱟ ᱾ ᱚᱱᱛᱮ ᱛᱟᱨᱟ ᱜᱮ ᱟᱡ ᱨᱤᱱ, ᱢᱟᱛᱟᱞ ᱡᱚᱴᱟᱣ ᱠᱚ ᱥᱟᱶ ᱵᱷᱟᱹᱴᱤ ᱠᱚ ᱩᱴᱷᱟᱹᱣ ᱮᱱᱟ ᱾ ᱟᱡ ᱨᱤᱱ ᱡᱚᱴᱟᱣ ᱯᱟᱹᱨᱣᱟᱹ ᱠᱚ ᱠᱤᱨᱤᱧ ᱟᱫᱮ ᱠᱷᱟᱱ ᱟᱫᱚ ᱚᱸᱰᱮ ᱜᱮ ᱵᱩᱞ ᱠᱟᱛᱮ ᱮ ᱛᱚᱦᱮᱞ ᱮᱱᱟ ᱾ ᱠᱩᱱᱤ ᱟᱨ ᱟᱡ ᱟᱭᱳ ᱫᱟᱠᱟ ᱠᱚ ᱡᱚᱢ ᱠᱟᱛᱮ ᱠᱤᱱ ᱜᱤᱛᱤᱡ ᱮᱱᱟ ᱾

ᱛᱟᱞᱟ ᱧᱤᱸᱫᱟ ᱞᱮᱠᱟ ᱟᱡ ᱵᱟᱵᱟᱭ ᱦᱮᱡ ᱮᱱᱛᱮ, ᱥᱤᱞᱯᱤᱧ ᱮ ᱰᱷᱟᱠᱟᱭᱟ ᱟᱨ ᱮ ᱦᱚᱦᱚᱭᱟ ᱾ ᱠᱩᱞᱦᱤ ᱥᱤᱞᱯᱤᱧ ᱫᱚ ᱴᱤᱱ ᱨᱮᱱᱟᱜ ᱠᱟᱱᱟ ᱾ᱴᱮᱥᱟ ᱴᱷᱮᱸᱜᱟ ᱛᱮᱠᱤᱱ ᱯᱟᱴᱮᱫ ᱞᱮᱫᱼᱟ ᱾ ᱟᱡ ᱟᱭᱳ ᱵᱮᱨᱮᱫ ᱠᱟᱛᱮ ᱰᱤᱵᱟᱹ ᱵᱟᱹᱛᱤ ᱥᱟᱵ ᱠᱟᱛᱮ ᱜᱮ ᱴᱮᱥᱟᱭ ᱚᱪᱚᱜ ᱠᱮᱫᱼᱟ ᱟᱨ ᱥᱤᱞᱯᱤᱧ ᱮ ᱡᱷᱤᱡᱟ ᱾ ᱠᱩᱱᱤ ᱟᱡ ᱵᱟᱵᱟ ᱫᱚ ᱥᱤᱞᱯᱤᱧ ᱨᱮᱜᱮ ᱯᱟᱞᱮᱱ ᱮ ᱴᱮᱸᱰᱟᱨ ᱞᱮᱱᱟ, ᱥᱤᱞᱯᱤᱧ ᱡᱷᱤᱡ ᱥᱟᱶᱛᱮ ᱠᱩᱱᱤ ᱟᱡ ᱵᱟᱵᱟ ᱫᱚ ᱠᱩᱱᱤ ᱟᱭᱳᱭ ᱟᱫᱷᱲᱟᱣ ᱵᱟᱡᱟᱣ ᱠᱮᱫᱮᱭᱟ ᱾ ᱠᱩᱱᱤ ᱟᱭᱳ ᱠᱩᱱᱤ ᱵᱟᱵᱟᱭ ᱢᱮᱛᱟᱭᱟ, ᱼ ᱚᱠᱟᱨᱮᱢ ᱛᱟᱦᱮᱸ ᱠᱟᱱᱟ? ᱱᱤᱛᱮᱢ ᱦᱤᱡᱩᱜ ᱠᱟᱱᱟ ᱾ ᱟᱢᱟᱜ ᱫᱚ ᱚᱲᱟᱜ ᱫᱩᱣᱟᱹᱨ ᱜᱮ ᱵᱟᱹᱱᱩᱜ ᱟᱱᱟ ᱾ ᱵᱟᱹᱨᱥᱤᱧ ᱮᱢ ᱜᱟᱹᱪᱷᱭᱟᱹᱣ ᱠᱮᱫ ᱫᱚ ᱩᱭᱦᱟᱹᱨ ᱠᱮᱫᱼᱟᱢ ᱯᱟᱞᱮ ᱛᱤᱱᱟᱹᱜ ᱮᱢ ᱠᱟᱹᱢᱤ ᱠᱮᱫᱼᱟ, ᱜᱟᱹᱲᱤᱭᱟᱹ ᱯᱚᱴᱟᱜ ᱾ ᱦᱟᱺᱰᱤ ᱯᱟᱹᱨᱣᱟᱹ ᱨᱮᱜᱮ ᱡᱚᱵᱮ ᱠᱚᱜ ᱢᱮ ᱾ ᱵᱟᱹᱦᱩ ᱥᱮ ᱜᱤᱫᱽᱨᱟᱹ, ᱩᱭᱦᱟᱹᱨ ᱜᱮᱛᱟᱢ ᱵᱟᱝ ᱦᱮᱡ ᱟᱫ ᱢᱮᱭᱟ ᱾ ᱠᱩᱱᱤ ᱟᱡ ᱵᱟᱵᱟ ᱫᱚ ᱨᱟᱹᱜᱤ ᱛᱮ ᱵᱚᱦᱚᱜ ᱠᱚᱛᱟᱭ ᱡᱩᱞᱩᱜ ᱠᱟᱱ ᱞᱮᱠᱟᱭ ᱟᱹᱭᱠᱟᱹᱣ ᱮᱫᱼᱟ ᱾ ᱨᱟᱹᱜᱤ ᱛᱮ ᱢᱮᱱ ᱨᱩᱣᱟᱹᱲ ᱠᱮᱫᱼᱟᱭ, “ᱩᱱᱟᱹᱜ ᱢᱚᱪᱟ! ᱟᱢ ᱵᱟᱭ ᱛᱟᱦᱮᱸᱱ ᱥᱟᱱᱟᱢ ᱠᱟᱱ ᱠᱷᱟᱱ ᱩᱴᱷᱟᱹᱣᱜ ᱢᱮ, ᱤᱧᱟᱜ ᱚᱲᱟᱜ ᱠᱷᱚᱱ ᱱᱤᱛ ᱜᱮ, ᱞᱚᱜᱚᱱ ᱾ ᱢᱮᱱ ᱠᱟᱛᱮ ᱛᱤ ᱛᱮ ᱠᱩᱱᱤ ᱟᱭᱳᱭ ᱛᱷᱟᱯᱟ ᱚᱪᱚᱭᱮᱱᱟ ᱾ ᱰᱤᱵᱟᱹ ᱵᱟᱹᱛᱤ ᱥᱟᱵ ᱞᱮᱫᱼᱟᱜ, ᱚᱱᱟ ᱛᱤ ᱠᱷᱚᱱ ᱧᱩᱨ ᱮᱱᱟ ᱾ ᱰᱤᱵᱟᱹ ᱨᱮᱱᱟᱜ ᱥᱩᱱᱩᱢ ᱦᱤᱨᱤᱡ ᱠᱟᱛᱮ ᱟᱡᱟᱜ ᱦᱚᱲᱢᱚ ᱨᱮ ᱥᱮᱸᱜᱮᱞ ᱞᱟᱜᱟᱣ ᱮᱱᱟ ᱾ ᱟᱡ ᱟᱭᱳ ᱦᱚᱸᱭ ᱵᱷᱤᱸᱫᱟᱹᱲ ᱮᱱᱟ, ᱥᱮᱸᱜᱮᱞ ᱧᱮᱞ ᱠᱟᱛᱮ ᱟᱡ ᱟᱭᱳ ᱫᱚᱢᱮᱭ ᱦᱚᱦᱚᱭᱟ, ᱚᱠᱚᱭ ᱢᱮᱱᱟᱜ ᱯᱮᱭᱟ ᱞᱚᱜᱚᱱ ᱫᱮᱞᱟ ᱥᱮ ᱦᱤᱡᱩᱜ ᱯᱮ ᱾ ᱜᱩᱞ ᱟᱸᱡᱚᱢ ᱠᱟᱛᱮ ᱠᱩᱱᱤ ᱫᱟᱹᱲ ᱵᱮᱨᱮᱫᱼᱟᱭ ᱾ ᱧᱮᱞᱮᱭᱟᱭ ᱟᱡ ᱟᱭᱳᱣᱟᱜ ᱟᱧᱪᱟᱨ ᱨᱮ ᱥᱮᱸᱜᱮᱞ ᱞᱟᱜᱟᱣ ᱟᱠᱟᱱᱟ ᱾ ᱥᱮᱸᱜᱮᱞ ᱧᱮᱞ ᱠᱟᱛᱮ ᱟᱡ ᱵᱟᱵᱟᱣᱟᱜ ᱱᱤᱥᱟᱹ ᱠᱚᱛᱟᱭ ᱚᱴᱟᱝᱼᱚᱜᱼᱟ ᱾ ᱵᱟᱱᱟ ᱦᱚᱲ ᱛᱮ ᱟᱡ ᱟᱭᱳᱣᱟᱜ ᱥᱟᱹᱲᱤ ᱨᱮ ᱞᱟᱜᱟᱣ ᱥᱮᱸᱜᱮᱞ ᱤᱬᱤᱡ ᱞᱟᱹᱜᱤᱱ ᱠᱤᱱ ᱪᱷᱩᱴᱟᱹᱣᱜᱼᱟ ᱾ ᱢᱮᱱ ᱫᱚ ᱛᱟᱹᱦᱩᱸ ᱜᱮ ᱦᱚᱲᱢᱚ ᱟᱨ ᱥᱟᱭᱟ ᱠᱚᱨᱮ ᱥᱮᱸᱜᱮᱞ ᱦᱩᱫᱽᱠᱟᱹᱣ ᱡᱩᱞ ᱮᱱᱟ ᱾ ᱟᱡ ᱟᱭᱳ ᱫᱚ ᱵᱚᱛᱚᱨ ᱛᱮ ᱚᱸᱰᱮ ᱜᱮ ᱠᱚᱸᱰᱮᱞ ᱟᱹᱪᱩᱨᱚᱜ ᱠᱟᱱᱟᱭ ᱾ ᱚᱸᱰᱮ ᱠᱷᱚᱱ ᱵᱮᱨᱮᱫ ᱜᱮ ᱵᱟᱭ ᱫᱟᱲᱮᱭᱟᱜ ᱠᱟᱱᱟ ᱾ ᱜᱷᱚᱞᱴᱟ ᱜᱷᱩᱞᱴᱤ ᱠᱟᱛᱮ ᱥᱮᱸᱜᱮᱞ ᱤᱬᱤᱧ ᱥᱟᱱᱟᱭᱟ, ᱢᱮᱱᱠᱷᱟᱱ ᱞᱟᱭᱞᱚᱢ ᱥᱟᱹᱲᱤ ᱛᱟᱦᱮᱸ ᱠᱟᱱ ᱛᱮ ᱚᱱᱟ ᱦᱚᱲᱢᱚ ᱨᱮ ᱞᱟᱴᱷᱟ ᱤᱫᱤᱭᱮᱱᱟ ᱾ ᱠᱩᱱᱤ ᱥᱚᱠᱛᱚᱭ ᱨᱟᱜᱟ, ᱫᱚᱢᱮᱭ ᱦᱚᱦᱭᱟ ᱾ ᱚᱠᱚᱭ ᱦᱚᱸ ᱵᱟᱝ ᱮ ᱟᱹᱭᱠᱟᱹᱣ ᱠᱚ ᱠᱷᱟᱱ, ᱛᱟᱭᱚᱢ ᱠᱩᱞᱦᱤ ᱥᱮᱫ ᱚᱰᱚᱠ ᱠᱟᱛᱮᱭ ᱦᱚᱦᱚᱭᱟ ᱾

ᱛᱟᱞᱟ ᱧᱤᱫᱟᱹ ᱫᱚ ᱡᱚᱛᱚ ᱦᱚᱲ ᱜᱮᱠᱚ ᱡᱟᱹᱯᱤᱫ ᱠᱟᱜᱼᱟ ᱾ ᱞᱚᱜᱚᱱ ᱵᱟᱠᱚ ᱵᱮᱨᱮᱫ ᱠᱟᱱᱟ ᱾ ᱠᱩᱱᱤ ᱫᱚᱢᱮ ᱜᱟᱨᱡᱟᱣᱚᱜ ᱟᱭ ᱾ ᱤᱧ ᱟᱭᱳ ᱫᱚ ᱵᱟᱧᱪᱟᱣ ᱠᱟᱭ ᱯᱮᱥᱮ ᱫᱮᱞᱟ ᱞᱚᱜᱚᱱ ᱦᱤᱡᱩᱜ ᱯᱮ ᱾ ᱥᱮᱸᱜᱮᱞ ᱞᱟᱜᱟᱣ ᱟᱠᱟᱱᱟ ᱾ ᱦᱤᱡᱩᱜ ᱯᱮᱥᱮ ᱫᱮᱞᱟ ᱾ ᱥᱩᱨ ᱥᱟᱰᱜᱮ ᱦᱚᱲ ᱥᱮᱸᱜᱮᱞ ᱢᱮᱱ ᱠᱚ ᱟᱸᱡᱚᱢ ᱛᱮ ᱫᱟᱹᱲ ᱠᱟᱛᱮ ᱠᱚ ᱵᱮᱨᱮᱫᱼᱟ ᱾ ᱟᱨ ᱠᱚ ᱦᱤᱡᱩᱜᱼᱟ ᱾ ᱠᱩᱱᱤ ᱟᱡ ᱟᱭᱳᱣᱟᱜ ᱦᱚᱲᱢᱚ ᱨᱮᱭᱟᱜ ᱞᱩᱜᱽᱲᱤ ᱫᱚ ᱥᱮᱸᱜᱮᱞ ᱛᱮ ᱟᱛᱟᱨ ᱪᱟᱵᱟᱭᱮᱱᱟ ᱾ ᱛᱟᱭᱚᱢ ᱟᱹᱛᱩ ᱨᱤᱱ ᱦᱚᱲ ᱜᱮ ᱞᱩᱜᱽᱲᱤ ᱠᱚ ᱵᱮᱫᱷᱟᱣ ᱮᱭᱟ ᱾ ᱩᱥᱟᱹᱨᱟ ᱥᱚᱨᱠᱟᱨᱤ ᱟᱥᱯᱟᱛᱟᱞ ᱤᱫᱤ ᱠᱟᱛᱮ ᱠᱚ ᱵᱷᱩᱨᱛᱤ ᱮᱭᱟ ᱾ ᱠᱩᱱᱤ ᱟᱨ ᱟᱡ ᱵᱟᱵᱟ ᱦᱚᱸ ᱟᱡ ᱟᱭᱳ ᱥᱟᱶᱛᱮ ᱟᱥᱯᱟᱛᱟᱞ ᱨᱮᱜᱮ ᱠᱤᱱ ᱛᱟᱦᱮᱸ ᱮᱱᱟ ᱾ ᱠᱩᱱᱤ ᱟᱡ ᱵᱟᱵᱟ ᱴᱷᱮᱱ ᱢᱟ ᱢᱤᱫᱴᱟᱹᱝ ᱦᱚᱸ ᱯᱩᱭᱥᱟᱹ ᱵᱟᱹᱱᱩᱜᱼᱟ ᱾ ᱪᱮᱫ ᱛᱮ ᱨᱟᱱᱮ ᱦᱟᱛᱟᱣᱟ, ᱪᱤᱠᱟᱹᱭ ᱟᱭ ᱪᱮᱫ ᱦᱚᱸ ᱵᱟᱝ ᱮ ᱫᱤᱥᱟᱹᱭᱮᱫᱼᱟ ᱾ ᱠᱩᱱᱤ ᱨᱟᱜᱼᱨᱟᱜ ᱛᱮ ᱛᱤ ᱡᱟᱸᱜᱟ ᱠᱚᱛᱟᱭ ᱚᱨᱚᱜ ᱠᱟᱱᱟ ᱾ ᱛᱟᱲᱟᱢ ᱜᱮ ᱵᱟᱭ ᱛᱟᱲᱟᱢ ᱫᱟᱲᱮᱭᱟᱜ ᱠᱟᱱᱟ ᱾ ᱟᱥᱯᱟᱛᱟᱞ ᱨᱮᱭᱟᱜ ᱪᱟᱹᱲᱤ ᱢᱮᱞᱟ ᱨᱮ ᱫᱩᱲᱩᱵ ᱟᱠᱟᱱᱟᱭ ᱾ ᱚᱸᱰᱮ ᱜᱮ ᱚᱸᱵᱟᱜ ᱤᱠᱲᱩᱢ ᱠᱟᱛᱮᱫ ᱮ ᱨᱟᱜᱮᱫᱼᱟ ᱾ ᱪᱮᱫ ᱦᱚᱸ ᱵᱟᱭ ᱴᱷᱤᱠᱟᱹ ᱫᱟᱲᱮᱭᱟᱜ ᱠᱟᱱᱟ, ᱢᱤᱫᱴᱟᱹᱝ ᱱᱟᱨᱥ ᱠᱩᱱᱤ ᱴᱷᱮᱱ ᱦᱮᱡ ᱠᱟᱛᱮ, ᱮᱜᱮᱨ ᱠᱮᱫᱮᱭᱟᱭ ᱾ ᱱᱚᱸᱰᱮ ᱫᱚ ᱨᱟᱜ ᱠᱚ ᱵᱟᱭ ᱦᱩᱭᱩᱜᱼᱟ ᱾ ᱛᱷᱤᱨ ᱠᱚᱜ ᱢᱮ, ᱟᱭᱢᱟ ᱵᱮᱢᱟᱨ ᱦᱚᱲ ᱢᱮᱱᱟᱜ ᱠᱚᱣᱟ ᱾ ᱵᱮᱡᱟᱨᱚᱜ ᱟᱠᱚ ᱾ ᱛᱟᱭᱚᱢ ᱟᱹᱛᱩ ᱨᱤᱱᱤᱡ ᱢᱤᱫ ᱠᱟᱠᱟ ᱦᱚᱲ ᱠᱩᱱᱤᱭ ᱢᱮᱛᱟᱭᱟ, “ᱢᱟᱹᱭ ᱟᱞᱚᱢ ᱨᱟᱜᱟ, ᱟᱢ ᱟᱭᱳ ᱫᱚᱭ ᱵᱮᱥᱚᱜᱼᱟ, ᱱᱤᱛ ᱟᱭᱤ ᱥᱤ ᱭᱩ ᱨᱮᱠᱚ ᱠᱷᱟᱹᱲ ᱟᱠᱟᱫ ᱫᱮᱭᱟ ᱾ ᱟᱞᱚᱢ ᱩᱭᱦᱟᱹᱨᱟ, ᱵᱮᱥ ᱜᱚᱫᱚᱜ ᱟᱭ ᱱᱟᱦᱟᱜ ᱾ ᱟᱡ ᱵᱟᱵᱟ ᱰᱟᱠᱴᱚᱨ ᱥᱟᱶ ᱮ ᱧᱟᱯᱟᱢ ᱮᱱᱟ ᱾ ”ᱰᱟᱠᱴᱟᱨ ᱵᱟᱹᱵᱩ ᱤᱧ ᱡᱩᱨᱤ ᱛᱟᱹᱧ ᱵᱮᱥ ᱠᱟᱭ ᱯᱮ ᱾ ᱤᱧ ᱡᱟᱦᱟᱸ ᱜᱮ ᱯᱩᱭᱥᱟᱹ ᱞᱟᱜᱟᱣᱜᱼᱟ, ᱤᱧ ᱟᱹᱜᱩ ᱟᱢᱟᱹᱧ ᱾” ᱼ ᱴᱷᱤᱠᱼᱟ ᱧᱮᱞᱮ ᱠᱟᱹᱱᱟᱹᱧ ᱾ ᱟᱢ ᱡᱟᱦᱟᱸ ᱨᱟᱱ ᱠᱚ ᱞᱟᱹᱠᱛᱤᱜᱼᱟ, ᱚᱱᱟ ᱟᱹᱜᱩᱣᱟᱹᱧ ᱢᱮ ᱾ ᱼ ᱴᱷᱤᱠ ᱜᱮᱭᱟ ᱾ ᱵᱟᱦᱨᱮ ᱚᱰᱚᱠ ᱠᱟᱛᱮ ᱠᱩᱱᱤᱭ ᱢᱮᱛᱟᱭᱟ, “ᱵᱤᱴᱤ ᱟᱞᱚᱢ ᱨᱟᱜᱟ ᱾”
– ᱟᱢ ᱫᱚ ᱤᱧ ᱵᱟᱵᱟ ᱫᱚᱢ ᱵᱟᱝ ᱠᱟᱱᱟ ᱾ ᱟᱢ ᱠᱷᱟᱹᱛᱤᱨ, ᱟᱢᱟᱜ ᱧᱩ ᱠᱷᱟᱹᱛᱤᱨ ᱛᱮᱦᱮᱧ ᱤᱧ ᱟᱭᱳᱣᱟᱜ ᱱᱚᱶᱟ ᱫᱚᱥᱟ ᱦᱩᱭ ᱟᱠᱟᱱᱟ ᱾ ᱼ ᱱᱚᱝᱠᱟ ᱫᱚ ᱟᱞᱚᱢ ᱢᱮᱱᱟ ᱵᱤᱴᱤ, ᱤᱧ ᱫᱚ ᱟᱢ ᱵᱟᱵᱟ ᱜᱮ ᱾ ᱵᱟᱱᱟ ᱦᱚᱲ ᱫᱚᱢᱮ ᱠᱤᱱ ᱨᱟᱜᱟ ᱾ ᱟᱹᱛᱩ ᱦᱚᱲ ᱠᱩᱱᱤ ᱠᱚ ᱵᱩᱡᱷᱟᱹᱣ ᱮᱭᱟ, ᱼ ᱠᱩᱱᱤ ᱵᱤᱴᱤ ᱵᱟᱵᱟ ᱫᱚ ᱵᱟᱵᱟ ᱠᱟᱱ ᱜᱮᱭᱟᱭ ᱾ ᱚᱱᱠᱟ ᱟᱞᱚᱢ ᱞᱟᱹᱭᱟ ᱾ ᱡᱚᱛᱚ ᱱᱟᱯᱟᱭᱚᱜᱼᱟ ᱾ ᱛᱷᱤᱨᱩᱜ ᱵᱤᱱ ᱾ ᱚᱱᱠᱟ ᱠᱟᱛᱮ ᱥᱮᱛᱟᱜ ᱢᱟᱨᱥᱟᱞᱚᱜ ᱞᱟᱹᱜᱤᱫ ᱾ ᱛᱟᱭᱚᱢ ᱠᱩᱱᱤ ᱫᱚ ᱟᱡ ᱟᱭᱳ ᱡᱟᱞᱱᱟ ᱠᱷᱚᱱᱮ ᱠᱚᱭᱚᱜ ᱮᱭᱟ ᱾ ᱞᱩᱜᱽᱲᱤ ᱛᱮᱠᱚ ᱵᱮᱲ ᱮᱥᱮᱫ ᱟᱠᱟᱫ ᱫᱮᱭᱟ ᱾ ᱵᱟᱭ ᱧᱮᱞ ᱧᱟᱢ ᱫᱟᱲᱮ ᱟᱭᱟ ᱾ ᱵᱟᱭ ᱧᱮᱞ ᱧᱟᱢ ᱫᱟᱲᱮᱭᱟᱫᱮ ᱠᱷᱟᱱ ᱫᱩᱣᱟᱹᱨ ᱥᱩᱨ ᱮ ᱦᱤᱡᱩᱜᱼᱟ ᱾ ᱫᱟᱨᱣᱟᱱ ᱮ ᱢᱮᱛᱟᱭᱟ, “ᱜᱚᱢᱠᱮ ᱢᱤᱫ ᱫᱷᱟᱣ ᱤᱧ ᱟᱭᱳ ᱧᱮᱞ ᱚᱪᱚᱣᱟᱹᱧ ᱢᱮᱥᱮ ᱟᱹᱰᱤ ᱜᱮ ᱧᱮᱞ ᱥᱟᱱᱟᱹᱧ ᱠᱟᱱᱟ ᱾” ᱩᱱᱤ ᱫᱟᱨᱣᱟᱱ ᱵᱟᱭ ᱵᱚᱞᱚ ᱚᱪᱚᱣᱟᱫ ᱫᱮᱭᱟ ᱾ ᱛᱟᱭᱚᱢ ᱢᱟ ᱱᱟᱹᱨᱲᱤ ᱜᱮᱛᱟᱭ ᱯᱷᱩᱞᱟᱹᱣᱜ ᱠᱟᱱᱟ ᱾ ᱨᱟᱜ ᱜᱮ ᱥᱟᱱᱟᱭ ᱠᱟᱱᱟ ᱾ ᱟᱹᱛᱩ ᱨᱤᱱᱤᱡ ᱠᱟᱠᱟ ᱩᱱᱤ ᱫᱟᱨᱣᱟᱱ ᱮ ᱢᱮᱛᱟᱭᱟ, “ᱢᱤᱫ ᱫᱷᱟᱣ ᱧᱮᱞ ᱚᱪᱚᱣᱟᱭ ᱯᱮ ᱜᱤᱫᱽᱨᱟᱹ ᱟᱹᱰᱤ ᱠᱚᱥᱴᱚ ᱛᱮᱞᱮ ᱛᱷᱤᱨ ᱟᱠᱟᱫᱮᱭᱟ ᱾ ᱫᱟᱭᱟ ᱠᱟᱛᱮ ᱢᱤᱫ ᱫᱷᱟᱣ ᱧᱮᱞ ᱚᱪᱚᱣᱟᱭ ᱢᱮ ᱾” ᱵᱟᱝ ᱛᱮ ᱵᱟᱝ ᱮ ᱨᱮᱵᱮᱱ ᱞᱮᱱᱟ ᱟᱡᱟᱜ ᱪᱟᱹᱠᱨᱤ ᱪᱟᱞᱟᱣᱚᱜᱼᱟ ᱞᱟᱹᱭ ᱠᱮᱫᱼᱟᱭ ᱾

ᱥᱮᱛᱟᱜ ᱟᱸᱜᱟ ᱢᱟᱨᱥᱟᱞ ᱮᱱᱟ ᱾ ᱠᱩᱱᱤ ᱟᱨ ᱟᱡ ᱵᱟᱵᱟ ᱥᱟᱶᱛᱮ ᱟᱹᱛᱩ ᱨᱤᱱ ᱠᱚ ᱰᱟᱠᱴᱟᱨ ᱥᱟᱶ ᱠᱟᱛᱷᱟ ᱵᱟᱲᱟ ᱠᱟᱛᱮ, ᱚᱲᱟᱜ ᱛᱮ ᱴᱟᱠᱟ ᱟᱹᱜᱩ ᱠᱚ ᱨᱩᱣᱟᱹᱲ ᱮᱱᱟ ᱾ ᱟᱹᱛᱩ ᱦᱚᱲ ᱟᱯᱟᱱ ᱟᱹᱯᱤᱱ ᱚᱲᱟᱜ ᱠᱚ ᱥᱮᱱ ᱮᱱᱟ ᱾ ᱞᱟᱹᱭ ᱵᱟᱲᱟ ᱦᱚᱴᱚ ᱟᱫᱮᱭᱟ ᱠᱚ ᱠᱩᱱᱤ ᱟᱡ ᱵᱟᱵᱟ ᱠᱚ ᱢᱮᱛᱟᱫ ᱫᱮᱭᱟ, ᱼ ᱠᱟᱹᱣᱰᱤ ᱡᱚᱜᱟᱲ ᱠᱟᱛᱮ ᱟᱥᱯᱟᱛᱟᱞ ᱛᱮ ᱞᱚᱜᱚᱱ ᱨᱩᱣᱟᱹᱲ ᱵᱤᱱ ᱾ ᱠᱩᱱᱤ ᱢᱚᱱᱮ ᱢᱚᱱᱮ ᱛᱮ ᱩᱭᱦᱟᱹᱨ ᱟᱭ ᱾ ᱤᱧ ᱵᱟᱵᱟ ᱠᱷᱟᱹᱛᱤᱨ ᱜᱮ ᱱᱚᱶᱟ ᱠᱚ ᱦᱩᱭᱩᱜ ᱠᱟᱱᱟ ᱾ ᱤᱧ ᱵᱟᱵᱟ ᱟᱨ ᱦᱚᱲ ᱨᱤᱱ ᱵᱟᱵᱟ ᱞᱮᱠᱟ ᱵᱮᱥ ᱠᱟᱹᱢᱤ ᱠᱟᱛᱮ ᱧᱮᱞ ᱞᱤᱧ ᱠᱷᱟᱱ, ᱦᱟᱺᱰᱤ ᱯᱟᱹᱨᱣᱟᱹ ᱠᱚ ᱵᱟᱭ ᱧᱩᱭ ᱠᱷᱟᱱ ᱦᱩᱱᱟᱹᱝ ᱛᱤᱱᱟᱹᱜ ᱱᱟᱯᱟᱭ ᱞᱮ ᱛᱟᱦᱮᱸ ᱠᱚᱜᱼᱟ ᱾ ᱠᱩᱱᱤ ᱫᱚ ᱙ ᱪᱟᱱᱟᱪ ᱨᱮ ᱚᱞᱚᱜ ᱜᱤᱫᱽᱨᱟᱹ ᱠᱟᱱᱟᱭ ᱾ ᱠᱩᱱᱤᱭᱟᱜ ᱡᱟᱦᱟᱸ ᱛᱤᱱᱟᱹᱜ ᱩᱭᱦᱟᱹᱨ ᱵᱩᱡᱷᱟᱹᱣ ᱢᱮᱱᱟᱜᱼᱟ ᱾ ᱩᱱᱟᱹᱜ ᱦᱚᱸ ᱟᱡ ᱵᱟᱵᱟ ᱟᱜ ᱵᱚᱦᱚᱜ ᱨᱮᱭᱟᱜ ᱦᱟᱛᱟᱝ ᱨᱮ ᱵᱩᱫᱷᱤ ᱛᱟᱭ ᱫᱚ ᱵᱟᱹᱱᱩᱜᱼᱟ ᱾ ᱩᱭᱦᱟᱹᱨ ᱟᱹᱰᱤ ᱠᱷᱟᱴᱚ ᱜᱮᱭᱟ ᱾ ᱦᱟᱺᱰᱤ ᱯᱟᱹᱨᱣᱟᱹ ᱜᱮ ᱟᱡ ᱵᱟᱵᱟ ᱟᱜ ᱦᱟᱛᱟᱝ ᱫᱚᱭ ᱥᱮᱭᱟ ᱪᱟᱵᱟ ᱟᱠᱟᱫᱼᱟ ᱾ ᱠᱩᱱᱤ ᱵᱟᱦᱨᱮ ᱢᱮᱞᱟ ᱨᱮ ᱫᱩᱲᱩᱵ ᱠᱟᱛᱮ, ᱱᱚᱶᱟ ᱠᱚᱜᱮᱭ ᱩᱭᱦᱟᱹᱨ ᱵᱟᱲᱟ ᱮᱫᱼᱟ ᱾ ᱩᱭᱦᱟᱹᱨ ᱩᱭᱦᱟᱹᱨ ᱛᱮ ᱟᱡ ᱟᱭᱳᱣᱟᱜ ᱠᱟᱛᱷᱟᱭ ᱩᱭᱦᱟᱹᱨ ᱧᱟᱢ ᱠᱮᱫᱼᱟ ᱾ “ᱨᱩᱣᱟᱹᱜ ᱦᱟᱹᱥᱩᱜ ᱚᱠᱛᱚ ᱨᱮ ᱱᱩᱠᱩ ᱢᱮᱨᱚᱢ ᱜᱮ ᱫᱷᱚᱱ ᱠᱟᱱᱟ ᱠᱚ ᱾” ᱠᱩᱱᱤ ᱩᱭᱦᱟᱹᱨ ᱫᱤᱥᱟᱹ ᱠᱮᱫᱼᱟᱭ, ᱱᱩᱠᱩ ᱢᱮᱨᱚᱢ ᱜᱮ ᱟᱹᱠᱷᱨᱤᱧ ᱦᱩᱭᱩᱜᱼᱟ ᱾ ᱚᱱᱟ ᱯᱩᱭᱥᱟᱹ ᱛᱮᱜᱮ ᱟᱭᱳ ᱞᱤᱧ ᱨᱟᱱ ᱵᱮᱥ ᱚᱪᱚ ᱮᱭᱟ ᱾ ᱠᱩᱱᱤ ᱛᱟᱭᱚᱢ ᱟᱡ ᱵᱟᱵᱟᱭ ᱢᱮᱛᱟᱭᱟ, ᱼ ᱱᱩᱠᱩ ᱢᱮᱨᱚᱢ ᱞᱟᱝ ᱟᱹᱠᱷᱨᱤᱧ ᱠᱚᱣᱟ ᱾ ᱚᱱᱟ ᱴᱟᱠᱟ ᱛᱮ, ᱟᱭᱳ ᱞᱟᱝ ᱨᱟᱱ ᱵᱮᱥᱮᱭᱟ ᱾ ᱟᱡ ᱵᱟᱵᱟ ᱢᱮᱨᱚᱢ ᱦᱟᱴ ᱤᱫᱤ ᱠᱟᱛᱮ ᱮ ᱟᱹᱠᱷᱨᱤᱧ ᱠᱚᱣᱟ ᱾ ᱠᱩᱱᱤ ᱱᱚᱶᱟ ᱠᱟᱛᱷᱟ ᱦᱚᱸ ᱟᱡ ᱵᱟᱵᱟᱭ ᱢᱮᱛᱟᱭᱟ, “ᱡᱚᱛᱚ ᱴᱟᱠᱟ ᱟᱹᱜᱩ ᱠᱟᱛᱮᱢ ᱦᱤᱡᱩᱜᱼᱟ ᱾ ᱵᱟᱝ ᱠᱷᱟᱱ ᱵᱮᱥ ᱵᱟᱭ ᱦᱩᱭᱩᱜᱼᱟ ᱾ ᱤᱧ ᱟᱭᱳᱣᱟᱜ ᱡᱤᱣᱤ ᱠᱷᱚᱱ ᱪᱮᱫ ᱦᱚᱸ ᱵᱟᱭ ᱢᱟᱨᱟᱝᱼᱟ ᱾ ᱩᱭᱦᱟᱹᱨ ᱠᱟᱜ ᱢᱮ ᱾” ᱼ ᱦᱚᱭ ᱵᱤᱴᱤ ᱾ ᱟᱡ ᱵᱟᱵᱟᱭ ᱢᱮᱱᱟ ᱾ᱟᱡ ᱵᱟᱵᱟ ᱢᱮᱨᱚᱢ ᱟᱹᱠᱷᱨᱤᱧ ᱠᱟᱛᱮ ᱠᱟᱹᱣᱰᱤᱭ ᱟᱹᱜᱩᱭ ᱛᱮ ᱚᱲᱟᱜ ᱮ ᱦᱤᱡᱩᱜᱼᱟ ᱾

ᱠᱩᱱᱤ ᱥᱟᱶᱛᱮ ᱟᱨ ᱦᱚᱸ ᱟᱥᱯᱟᱛᱟᱞ ᱠᱤᱱ ᱥᱮᱱᱚᱜᱼᱟ ᱾ ᱠᱩᱱᱤ ᱟᱡ ᱟᱭᱳ ᱧᱮᱞ ᱠᱤᱱ ᱵᱚᱞᱚᱭᱮᱱᱟ ᱾ ᱟᱭᱳ ᱥᱟᱶ ᱠᱤᱱ ᱜᱟᱞᱢᱟᱨᱟᱣ ᱠᱮᱫᱼᱟ ᱾ ᱟᱡ ᱟᱭᱳᱣᱟᱜ ᱢᱮᱫ ᱫᱟᱜ ᱦᱤᱰᱤᱨ ᱦᱤᱰᱤᱨ ᱡᱚᱨᱚᱜ ᱠᱟᱱᱟ ᱾ ᱠᱩᱱᱤ ᱦᱚᱸ ᱟᱡ ᱟᱭᱳᱣᱟᱜ ᱢᱮᱫ ᱫᱟᱜ ᱧᱮᱞ ᱛᱮ ᱟᱡᱟᱜ ᱦᱚᱸ ᱨᱟᱜ ᱚᱰᱚᱠᱚᱜᱼᱟ ᱾ ᱨᱟᱜ ᱨᱟᱜ ᱛᱮᱭ ᱢᱮᱛᱟᱭᱟ, ᱟᱞᱚᱢ ᱨᱟᱜᱟ ᱭᱳ ᱟᱞᱚᱥᱮᱢ ᱨᱟᱜᱟ, ᱢᱮᱨᱚᱢ ᱞᱤᱧ ᱟᱹᱠᱷᱨᱤᱧ ᱠᱮᱫ ᱠᱚᱣᱟ ᱾ ᱚᱱᱟ ᱴᱟᱠᱟ ᱛᱮᱞᱤᱧ ᱨᱟᱱ ᱵᱮᱥ ᱢᱮᱭᱟ ᱾ ᱢᱮᱫ ᱫᱟᱜ ᱡᱚᱫ ᱡᱚᱫ ᱛᱮ ᱠᱩᱱᱤ ᱚᱰᱚᱠ ᱮᱱᱟᱭ, ᱟᱡ ᱟᱭᱳᱣᱟᱜ ᱨᱟᱜ ᱢᱮᱫᱦᱟ ᱵᱟᱝ ᱮ ᱧᱮᱞ ᱫᱟᱲᱮᱭᱟᱜ ᱠᱟᱱᱛᱮ ᱚᱰᱚᱠ ᱮᱱᱟᱭ ᱟᱥᱯᱟᱛᱟᱞ ᱨᱮᱱᱟᱜ ᱪᱟᱹᱲᱤ ᱥᱮᱫ ᱨᱮ ᱫᱩᱲᱩᱵ ᱦᱟᱹᱯᱤ ᱮᱱᱟᱭ ᱾ ᱟᱡ ᱵᱟᱵᱟ ᱟᱡ ᱟᱭᱳ ᱥᱩᱨ ᱨᱮᱜᱮ ᱛᱤᱸᱜᱩ ᱟᱠᱟᱱᱟᱭ ᱾ ᱠᱩᱱᱤ ᱟᱭᱳᱭ ᱢᱮᱛᱟᱭᱟ, “ᱟᱞᱚᱢ ᱨᱟᱜᱟ ᱜᱚ ᱡᱩᱨᱤ ᱛᱤᱧ ᱞᱚᱜᱚᱱ ᱜᱮᱢ ᱵᱮᱥ ᱜᱚᱫᱚᱜᱼᱟ ᱾” ᱟᱡ ᱟᱭᱳ ᱜᱮᱨᱟᱝ ᱟᱛᱮ ᱛᱮᱞᱟ ᱨᱩᱣᱟᱹᱲ ᱟᱭ, “ᱪᱮᱫᱟᱜ ᱮᱢ ᱵᱮᱥᱤᱧᱟ, ᱤᱧ ᱜᱚᱡ ᱞᱮᱱᱠᱷᱟᱱ ᱜᱮᱛᱚ ᱟᱢᱟᱜ ᱵᱮᱥ ᱦᱩᱭᱩᱜᱼᱟ ᱾ ᱟᱫᱚ ᱪᱤᱞᱤ ᱦᱚᱸ ᱵᱟᱝ ᱠᱚ ᱢᱟᱱᱟ ᱢᱮᱭᱟ ᱾ ᱢᱚᱱ ᱠᱩᱥᱤ ᱦᱟᱺᱰᱤ ᱯᱟᱹᱨᱣᱟᱹ ᱨᱮᱢ ᱡᱚᱵᱮ ᱠᱚᱜᱼᱟ ᱾ ᱤᱡ ᱩᱞᱟᱹ ᱦᱟᱹᱵᱤᱡ ᱛᱚᱜᱚᱡᱽ ᱢᱮ ᱪᱮᱫᱟᱜ ᱱᱚᱰᱮ ᱫᱚᱢ ᱦᱮᱡ ᱟᱠᱟᱱᱟ ᱾ ᱥᱮᱱᱚᱜ ᱢᱮ ᱚᱠᱟ ᱠᱚᱨᱮ ᱧᱩᱼᱡᱚᱢ ᱠᱚ ᱮᱢᱟᱢᱟ ᱚᱸᱰᱮ ᱜᱮ, ᱟᱹᱞᱤᱧ ᱫᱚ ᱟᱨ ᱟᱢ ᱨᱤᱱ ᱫᱚᱞᱤᱧ ᱪᱤᱞᱤ ᱠᱟᱱᱟ ᱾ ᱟᱹᱞᱤᱧᱟᱜ ᱡᱩᱫᱤᱢ ᱩᱭᱦᱟᱹᱨ ᱞᱮᱠᱷᱟᱱ ᱚᱱᱠᱟ ᱫᱚ ᱵᱟᱢ ᱩᱭᱦᱟᱹᱨ ᱠᱮᱭᱟ ᱾ ᱛᱮᱦᱮᱧ ᱟᱢᱟᱜ ᱠᱟᱹᱭ ᱠᱷᱟᱹᱛᱤᱨ ᱤᱧᱟᱜ ᱱᱚᱶᱟ ᱫᱚᱥᱟ ᱾ ᱤᱧ ᱟᱫᱚᱧ ᱵᱟᱧᱪᱟᱣᱜᱼᱟ ᱥᱮ ᱵᱟᱝ ᱚᱱᱟ ᱦᱚᱸ ᱵᱟᱹᱧ ᱴᱷᱤᱠᱟᱹ ᱫᱟᱲᱮᱭᱟᱜ ᱠᱟᱱᱟ ᱾ᱡᱤᱣᱤᱫ ᱛᱮ ᱛᱮᱦᱮᱧ ᱢᱟᱢ ᱟᱛᱟᱨ ᱠᱤᱫᱤᱧᱟ ᱾ ᱜᱤᱫᱽᱨᱟᱹ ᱵᱮᱥ ᱛᱮ ᱫᱚᱦᱚᱭᱮᱢ ᱵᱟᱝ ᱠᱷᱟᱱ ᱟᱢ ᱦᱚᱸ ᱯᱟᱹᱯᱤ ᱡᱤᱣᱤᱫ ᱛᱮᱠᱚ ᱛᱤᱡᱩ ᱢᱮᱭᱟ ᱾ᱦᱟᱺᱰᱤ ᱯᱟᱹᱣᱨᱟᱹ ᱟᱢ ᱫᱚᱭ ᱧᱩ ᱩᱫ ᱪᱟᱵᱟ ᱠᱮᱫ ᱢᱮᱭᱟ ᱾ ᱱᱟᱥᱮ ᱦᱚᱸ ᱤᱧᱟᱜ ᱠᱟᱛᱷᱟ ᱜᱮ ᱵᱟᱝᱮᱢ ᱱᱚᱦᱮ ᱟᱫᱼᱟ ᱾” ᱨᱟᱜ ᱨᱟᱜ ᱛᱮ ᱨᱚᱲ ᱛᱮᱜᱮ ᱟᱨ ᱦᱚᱸ ᱵᱮᱦᱩᱥ ᱮᱱᱟᱭ ᱾ ᱟᱡ ᱵᱟᱵᱟ ᱦᱚᱸ ᱩᱭᱦᱟᱹᱨ ᱟᱭ ᱱᱚᱶᱟ ᱫᱚ ᱪᱮᱫ ᱤᱧ ᱪᱤᱠᱟᱹ ᱠᱮᱫᱼᱟ ᱾ ᱦᱚᱦᱚᱭᱟᱭ ᱦᱚᱦᱚ ᱟᱸᱡᱚᱢ ᱠᱟᱛᱮ ᱰᱟᱠᱴᱚᱨ ᱮ ᱦᱤᱡᱩᱜᱼᱟ ᱾ ᱰᱟᱠᱴᱚᱨ ᱠᱩᱱᱤ ᱟᱡ ᱵᱟᱵᱟ ᱥᱚᱠᱛᱚᱭ ᱮᱜᱮᱨ ᱮᱭᱟ, ᱼ ᱢᱟᱱᱟ ᱞᱮᱫ ᱵᱤᱱᱟᱹᱧ ᱥᱮ ᱱᱩᱭ ᱥᱟᱶ ᱨᱚᱯᱚᱲ ᱞᱟᱹᱜᱤᱫ ᱛᱮ, ᱥᱮᱱᱚᱜ ᱢᱮ ᱱᱚᱸᱰᱮ ᱠᱷᱚᱱ ᱟᱨ ᱵᱟᱝ ᱠᱷᱟᱱ ᱟᱢ ᱜᱮ ᱵᱮᱥᱮ ᱢᱮ ᱾ ᱵᱚᱦᱚᱜ ᱛᱤᱨᱩᱵ ᱠᱟᱛᱮ ᱚᱸᱰᱮ ᱠᱷᱚᱱ ᱮ ᱚᱰᱚᱠᱚᱜᱼᱟ ᱾ ᱠᱩᱱᱤ ᱥᱮᱫ ᱮ ᱠᱚᱭᱚᱜᱟ ᱾ ᱠᱩᱱᱤ ᱦᱚᱸ ᱫᱟᱭᱟ ᱜᱮ ᱧᱮᱞᱚᱜ ᱠᱟᱱᱟᱭ, ᱨᱟᱜ ᱨᱟᱜ ᱛᱮ ᱦᱚᱲᱢᱚ ᱛᱟᱭ ᱦᱚᱫ ᱪᱟᱵᱟᱭᱮᱱᱟ ᱾ ᱢᱤᱫ ᱨᱟᱦᱟ ᱢᱮᱫ ᱫᱟᱜ ᱡᱚᱨᱚᱣᱟᱠᱟ ᱢᱮᱱᱟᱜ ᱛᱟᱭᱟ ᱾ ᱠᱩᱱᱤ ᱟᱡ ᱵᱟᱵᱟᱭ ᱫᱤᱥᱟᱹ ᱦᱟᱨᱟᱜᱼᱟ ᱾

ᱱᱚᱛᱮ ᱰᱟᱠᱴᱚᱨ ᱦᱚᱨᱚ ᱵᱚᱨᱚ ᱠᱩᱱᱤ ᱟᱭᱳ ᱟᱭᱤ ᱥᱤ ᱭᱩ ᱛᱮᱠᱚ ᱤᱫᱤᱮᱭᱟ ᱾ ᱚᱠᱥᱤᱡᱮᱱ ᱠᱚ ᱞᱟᱜᱟᱣ ᱞᱟᱜᱟᱣ ᱛᱮᱜᱮ ᱡᱤᱣᱤ ᱛᱟᱭ ᱪᱟᱞᱟᱜᱼᱟ ᱾ ᱟᱥᱯᱟᱛᱟᱞ ᱠᱷᱚᱱ ᱢᱟᱬᱟ ᱤᱫᱤ ᱠᱟᱛᱮ ᱥᱟᱱᱟᱢᱟᱜ ᱠᱟᱹᱢᱤ ᱠᱤᱱ ᱠᱟᱹᱢᱤ ᱠᱮᱫᱼᱟ ᱾ ᱢᱤᱫ ᱦᱟᱴ ᱛᱟᱭᱚᱢ ᱠᱷᱟᱱ ᱜᱮ ᱠᱩᱱᱤ ᱢᱮᱴᱨᱤᱠ ᱵᱤᱱᱤᱰ ᱨᱮᱱᱟᱜ ᱱᱮᱰᱟ ᱜᱚᱸᱰᱟᱭ ᱧᱟᱢ ᱠᱮᱫᱼᱟ ᱾ ᱠᱩᱱᱤ ᱥᱟᱱᱟᱢ ᱫᱩᱠ ᱫᱮᱭᱟ ᱠᱟᱛᱮ ᱵᱤᱱᱤᱰ ᱞᱟᱹᱜᱤᱫ ᱮ ᱪᱷᱩᱴᱟᱹᱣ ᱮᱱᱟ ᱾ ᱟᱡ ᱵᱟᱵᱟ ᱦᱚᱸ ᱦᱟᱺᱰᱤ ᱵᱷᱟᱹᱴᱤ ᱪᱟᱞᱟᱣ ᱮ ᱵᱟᱹᱜᱤ ᱠᱮᱫᱼᱟ ᱾ ᱚᱲᱟᱜ ᱨᱮᱱᱟᱜ ᱥᱟᱱᱟᱢ ᱠᱟᱹᱢᱤ ᱨᱮ ᱠᱩᱱᱤᱭ ᱜᱚᱲᱚᱣᱟᱫ ᱫᱮᱭᱟ ᱾ ᱠᱩᱱᱤ ᱵᱤᱱᱤᱰ ᱱᱟᱯᱟᱭ ᱛᱮ ᱚᱞ ᱠᱮᱫᱼᱟᱭ ᱾ ᱢᱮᱱᱠᱷᱟᱱ ᱱᱚᱛᱮ ᱪᱟᱥ ᱠᱤᱱ ᱰᱷᱤᱞᱟᱹᱣ ᱠᱮᱫᱼᱟ ᱾ ᱦᱳᱲᱳ ᱜᱮᱞᱮᱜ ᱚᱠᱛᱮ ᱨᱮ ᱫᱟᱜ ᱦᱚᱸ ᱵᱟᱝ ᱮ ᱡᱟᱹᱲᱤ ᱞᱮᱫᱼᱟ ᱾ ᱫᱚᱠᱟᱱ ᱠᱚ ᱟᱹᱠᱷᱨᱤᱧ ᱠᱟᱛᱮ ᱵᱷᱟᱸᱰᱟᱱ ᱠᱟᱹᱢᱤ ᱠᱚ ᱠᱤᱱ ᱥᱟᱹᱛ ᱠᱮᱫᱼᱟ ᱾

ᱟᱹᱰᱤ ᱱᱟᱪᱟᱨ ᱮᱱᱟ ᱠᱤᱱ ᱾ ᱟᱫᱚ ᱚᱲᱟᱜ ᱨᱮ ᱪᱮᱫ ᱦᱚᱸ ᱵᱟᱭ ᱥᱟᱨᱮᱡ ᱞᱮᱱᱟ ᱾ ᱟᱡ ᱵᱟᱵᱟ ᱠᱟᱹᱢᱤ ᱱᱟᱞᱦᱟ ᱟᱹᱜᱩᱭ ᱟᱭ ᱛᱚᱵᱮ ᱜᱮ ᱫᱟᱠᱟ ᱴᱩᱠᱩᱡ ᱛᱟᱹᱠᱤᱱ ᱪᱚᱸᱫᱟᱜᱼᱟ ᱾ ᱩᱱᱟᱹᱜ ᱠᱤᱱ ᱱᱤᱫᱷᱟᱹᱱ ᱮᱱᱟ ᱾ ᱟᱡ ᱵᱟᱵᱟ ᱫᱤᱱᱟᱹᱢ ᱜᱮ ᱱᱟᱞᱦᱟ ᱟᱹᱜᱩ ᱴᱟᱠᱟ ᱛᱮᱜᱮ ᱫᱤᱱᱚᱯᱟᱴ ᱛᱟᱹᱠᱤᱱ ᱥᱮᱱᱚᱜ ᱠᱟᱱᱟ ᱾ ᱟᱡ ᱵᱟᱵᱟ ᱠᱷᱟᱴᱟᱣ ᱠᱟᱛᱮ ᱟᱨᱡᱟᱣ ᱟᱹᱜᱩ ᱴᱟᱠᱟ ᱠᱷᱚᱱ ᱜᱮ ᱟᱡᱤᱡ ᱦᱚᱯᱚᱱ ᱮᱨᱟ ᱠᱩᱱᱤ ᱞᱟᱹᱜᱤᱫ ᱦᱚᱸᱭ ᱥᱟᱧᱪᱟᱣ ᱫᱚᱦᱚᱭᱟ ᱾ ᱢᱤᱫ ᱫᱤᱱ ᱦᱤᱞᱚᱜ ᱨᱟᱪᱟ ᱨᱮ ᱵᱤᱞ ᱯᱟᱨᱠᱚᱢ ᱨᱮ ᱫᱩᱲᱩᱵ ᱠᱟᱛᱮ ᱫᱚᱠᱛᱟᱭ ᱛᱤᱨᱢᱤᱫ ᱮᱫᱼᱟ, ᱫᱚᱠᱛᱟ ᱛᱤᱨᱢᱤᱫ ᱛᱤᱨᱢᱤᱫ ᱛᱮ ᱩᱭᱦᱟᱹᱨ ᱮᱫᱼᱟᱭ ᱥᱟᱨᱮᱡ ᱟᱠᱟᱱ ᱦᱚᱲᱢᱚ ᱫᱟᱲᱮ ᱫᱚ ᱠᱩᱱᱤ ᱞᱟᱹᱜᱤᱫ ᱫᱷᱚᱱ ᱟᱨᱡᱟᱣ ᱨᱮ ᱜᱤᱧ ᱞᱟᱜᱟᱣᱟ ᱾ ᱡᱤᱵᱚᱱ ᱨᱮ ᱛᱤᱥ ᱦᱚᱸ ᱥᱩᱠ ᱢᱟ ᱵᱟᱹᱧ ᱮᱢ ᱫᱟᱲᱮᱭᱟᱫᱮᱭᱟ ᱾ ᱡᱚᱢ ᱧᱩ ᱟᱞᱚᱭ ᱠᱚᱥᱴᱚᱜ ᱢᱟ ᱚᱱᱟ ᱞᱟᱹᱜᱤᱫ ᱱᱤᱛᱚᱜ ᱟᱹᱰᱤ ᱠᱟᱹᱢᱤ ᱦᱩᱭᱩᱜ ᱛᱤᱧᱟ ᱾ ᱩᱱ ᱚᱠᱛᱚ ᱢᱤᱫ ᱠᱚᱲᱟ ᱜᱤᱫᱽᱨᱟᱹᱭ ᱦᱤᱡᱩᱜᱼᱟ ᱾ ᱼ ᱤᱧ ᱫᱚ ᱨᱚᱛᱚᱱ ᱧᱩᱛᱩᱢ ᱟᱹᱧᱟ ᱾ ᱤᱧ ᱫᱚ ᱜᱚᱨᱟᱢ ᱥᱮᱵᱚᱠ, ᱜᱚᱨᱟᱢ ᱥᱚᱵᱷᱟ ᱯᱚᱧᱪᱟᱭᱚᱛ ᱯᱟᱦᱴᱟ ᱠᱷᱚᱱ ᱤᱸᱫᱽᱨᱟᱹ ᱟᱣᱟᱥ ᱭᱚᱡᱽᱱᱟ ᱞᱟᱹᱜᱤᱫ ᱞᱮ ᱥᱟᱨᱵᱷᱮᱭᱮᱫᱼᱟ ᱾ ᱨᱚᱛᱚᱱ ᱫᱚ ᱟᱠᱚ ᱯᱚᱧᱪᱟᱭᱚᱛ ᱟᱹᱛᱩ ᱥᱩᱨ ᱨᱤᱱᱤᱡ ᱠᱟᱱᱟᱭ, ᱨᱚᱛᱚᱱ ᱥᱮᱱ ᱠᱟᱛᱮ ᱯᱟᱨᱠᱚᱢ ᱨᱮ ᱫᱩᱲᱩᱵ ᱢᱮᱥᱟ ᱮᱱᱟᱭ, ᱟᱫᱚ ᱠᱩᱞᱤ ᱮᱭᱟᱭ ᱠᱩᱱᱤ ᱟᱡ ᱵᱟᱵᱟ, ᱼ ᱜᱚᱢᱠᱮ ᱟᱢ ᱜᱮ ᱱᱚᱶᱟ ᱚᱲᱟᱜ ᱨᱤᱱ ᱢᱩᱠᱷᱤᱭᱟᱹ ᱫᱚ?” ᱠᱩᱱᱤ ᱟᱡ ᱵᱟᱵᱟᱭ ᱛᱮᱞᱟ ᱨᱩᱣᱟᱹᱲᱟ ᱾ “ᱦᱚᱭ ᱵᱟᱹᱵᱩ ᱤᱧ ᱜᱮ!” ᱼ ᱧᱩᱛᱩᱢ ᱛᱟᱢ ᱫᱚ? ᱠᱩᱱᱤ ᱟᱡ ᱵᱟᱵᱟᱭ ᱢᱮᱱᱟ – “ᱞᱚᱥᱚ” ᱼ ᱛᱤᱱᱟᱹᱜ ᱦᱚᱲ ᱢᱮᱱᱟᱜ ᱯᱮᱭᱟ?
ᱼ ᱵᱟᱨ ᱦᱚᱲ ᱜᱮ, ᱤᱧ ᱟᱨ ᱤᱧᱤᱡ ᱦᱚᱯᱚᱱ ᱮᱨᱟ ᱠᱩᱱᱤ ᱾
ᱼ ᱵᱟᱨ ᱦᱚᱲ ᱥᱩᱢᱩᱝ ᱜᱮ ?
ᱼ ᱦᱚᱭ !
ᱨᱚᱛᱚᱱ ᱮ ᱢᱮᱱᱟ ᱤᱧ ᱫᱚ ᱤᱸᱫᱽᱨᱟᱹ ᱟᱣᱟᱥ ᱭᱚᱡᱽᱱᱟ ᱠᱷᱚᱱ ᱮᱧ ᱦᱮᱡ ᱟᱠᱟᱱᱟ ᱾ ᱚᱲᱟᱜ ᱠᱚ ᱥᱟᱨᱵᱷᱮ ᱞᱟᱹᱜᱤᱫ ᱛᱮ,ᱟᱢᱟᱜ ᱧᱩᱛᱩᱢ ᱛᱮ ᱯᱷᱚᱨᱚᱢ ᱤᱧ ᱯᱮᱨᱮᱡ ᱠᱟᱜ ᱠᱟᱱᱟ ᱾ ᱯᱟᱥ ᱞᱮᱱ ᱠᱷᱟᱱ ᱤᱧ ᱞᱟᱹᱭ ᱟᱢᱟ ᱱᱟᱦᱟᱜ ᱾ ᱠᱩᱱᱤ ᱟᱡ ᱵᱟᱵᱟᱭ ᱛᱮᱞᱟ ᱜᱚᱫᱟ ᱼ ᱟᱹᱰᱤ ᱟᱭᱢᱟ ᱥᱟᱨᱦᱟᱣ ᱵᱟᱹᱵᱩ, ᱟᱢ ᱞᱮᱠᱟᱱ ᱦᱚᱲᱟᱜ ᱜᱮ ᱞᱟᱹᱠᱛᱤ ᱟᱞᱮ ᱞᱮᱠᱟᱱ ᱱᱟᱪᱟᱨ ᱱᱤᱫᱷᱟᱹᱱ ᱦᱚᱲ ᱞᱟᱹᱜᱤᱫ ᱫᱚ ᱾ ᱨᱚᱛᱚᱱ ᱮ ᱢᱮᱱᱟ ᱼ ᱚᱱᱠᱟ ᱫᱚ ᱪᱮᱫᱟᱜ ᱮᱢ ᱢᱮᱱᱮᱫᱼᱟ ᱾ ᱤᱧᱟᱜ ᱫᱚ ᱱᱚᱶᱟ ᱜᱮ ᱠᱟᱹᱢᱤ ᱠᱟᱱᱟ ᱾ ᱼ ᱠᱩᱱᱤ……ᱠᱩᱱᱤ……ᱠᱩᱱᱤ ᱵᱤᱴᱤ ᱫᱮᱥᱮ ᱢᱤᱫ ᱜᱤᱞᱟᱹᱥ ᱫᱟᱜ ᱟᱹᱜᱩᱭ ᱢᱮ ᱾ ᱢᱤᱫᱴᱟᱹᱝ ᱯᱮᱲᱟ ᱦᱚᱲ ᱮ ᱦᱮᱡ ᱟᱠᱟᱱᱟ ᱾ ᱧᱩ ᱞᱟᱹᱜᱤᱫ ᱫᱟᱜ ᱮᱢᱟᱭ ᱢᱮ ᱾ ᱼ ᱠᱩᱱᱤ ᱦᱚᱭ ᱵᱟ! ᱠᱩᱱᱤ ᱫᱟᱜ ᱜᱤᱞᱟᱥ ᱥᱟᱵ ᱠᱟᱛᱮᱫ ᱮ ᱦᱤᱡᱩᱜᱼᱟ, ᱟᱨ ᱜᱤᱞᱟᱹᱥ ᱫᱟᱜ ᱮ ᱥᱟᱵ ᱟᱭᱟ ᱨᱚᱛᱚᱱ ᱛᱤ ᱨᱮ, ᱟᱨ ᱚᱲᱟᱜ ᱛᱮᱭ ᱵᱚᱞᱚ ᱨᱩᱣᱟᱹᱲᱚᱜᱼᱟ ᱾ ᱨᱚᱛᱚᱱ ᱫᱚ ᱜᱤᱞᱟᱹᱥ ᱫᱟᱜ ᱥᱟᱵ ᱠᱟᱛᱮ ᱚᱠᱟ ᱞᱮᱠᱟ ᱛᱟᱲᱟᱢ ᱠᱟᱛᱮ ᱠᱩᱱᱤ ᱚᱠᱟ ᱞᱮᱠᱟᱭ ᱦᱮᱡ ᱮᱱᱟ, ᱢᱮᱫ ᱢᱩᱴᱷᱟᱹᱱ ᱦᱚᱲᱢᱚ, ᱵᱚᱦᱚᱜ ᱩᱵ ᱠᱷᱚᱱ ᱡᱟᱸᱜᱟ ᱨᱟᱢᱟ ᱫᱷᱟᱹᱵᱤᱡ ᱥᱟᱱᱟᱢᱟᱜ ᱮ ᱧᱮᱞ ᱪᱟᱹᱨᱤᱛ ᱠᱮᱫᱮᱭᱟ ᱾ ᱠᱩᱸᱵᱽᱲᱩ ᱢᱚᱱᱮ ᱛᱮᱜᱮ ᱢᱚᱱᱮ –ᱢᱚᱱᱮ ᱛᱮ ᱫᱚᱭ ᱜᱚᱨᱚᱡᱽ ᱟᱫᱮᱭᱟ ᱾ ᱨᱚᱛᱚᱱ ᱫᱚ ᱢᱤᱫ ᱜᱤᱞᱟᱹᱥ ᱫᱟᱜ ᱧᱩ ᱠᱟᱛᱮ ᱟᱫᱚᱭ ᱨᱩᱣᱟᱹᱲ ᱮᱱᱟ ᱾ ᱠᱩᱱᱤ ᱟᱡ ᱵᱟᱵᱟ ᱦᱚᱸ ᱱᱟᱞᱦᱟ ᱠᱟᱹᱢᱤ ᱛᱮ ᱥᱮᱱ ᱮᱱᱟᱭ, ᱥᱟᱠᱨᱟᱛ ᱥᱮᱴᱮᱨᱚᱜ ᱠᱟᱱᱟ ᱠᱤᱥᱟᱹᱬ ᱚᱲᱟᱜ ᱨᱮᱠᱚ ᱢᱮᱛᱟᱭ ᱠᱟᱱᱟ, ᱼ ᱞᱚᱥᱚ ᱵᱟᱹᱵᱩ, ᱡᱷᱟᱹᱱᱴᱤ ᱠᱚᱢᱟᱢ ᱮᱴᱮᱫ ᱦᱩᱭ ᱠᱮᱫᱼᱟ, ᱛᱮᱦᱮᱧ ᱫᱚ ᱥᱟᱦᱟᱱ ᱠᱚ ᱛᱟᱵᱚᱱ ᱡᱚᱜᱟᱲ ᱢᱮ ᱥᱟᱠᱨᱟᱛ ᱯᱟᱨᱟᱵᱽ ᱵᱟᱠᱷᱨᱟ, ᱟᱵᱚ ᱥᱩᱨ ᱨᱮᱢᱟ ᱵᱩᱨᱩ ᱠᱚ ᱦᱚᱸ ᱵᱟᱹᱱᱩᱜ ᱛᱚᱵᱮ ᱫᱚ ᱪᱮᱫ ᱪᱤᱠᱟᱹ ᱦᱩᱭᱩᱜᱼᱟ ᱾ ᱱᱚᱝᱠᱟᱭ ᱢᱮ ᱢᱩᱰᱩ ᱟᱲᱮ ᱨᱮᱭᱟᱜ ᱵᱟᱲᱮ ᱰᱟᱹᱨ ᱜᱮ ᱨᱚᱦᱚᱲ ᱟᱠᱟᱱᱟ ᱚᱱᱟᱜᱮ ᱰᱩᱞᱟᱹᱣ ᱠᱟᱛᱮ, ᱚᱱᱟ ᱠᱚᱜᱮ ᱜᱷᱟᱺᱰᱤᱡᱽ ᱢᱮ ᱾ ᱚᱱᱟ ᱜᱮ ᱯᱤᱴᱷᱟᱹ ᱤᱥᱤᱱ ᱠᱚ ᱵᱟᱠᱷᱨᱟ ᱫᱚ ᱥᱟᱦᱟᱱ ᱟᱞᱮ, ᱠᱤᱥᱟᱹᱬ ᱮ ᱢᱮᱱ ᱠᱮᱫᱼᱟ ᱾

ᱠᱩᱱᱤ ᱟᱡ ᱵᱟᱵᱟ ᱛᱮᱞᱟ ᱨᱩᱣᱟᱹᱲ ᱟᱭ ᱼ ᱠᱤᱥᱟᱹᱬ ᱜᱚᱢᱠᱮ ᱴᱮᱸᱜᱚᱡ ᱢᱟ ᱵᱟᱹᱧ ᱟᱹᱜᱩ ᱟᱠᱟᱫ ᱫᱚ ᱛᱚᱵᱮ ᱟᱯᱮᱭᱟᱜ ᱜᱮ ᱤᱢᱟᱹᱧ ᱯᱮ ᱚᱱᱟ ᱛᱮᱜᱮ ᱰᱟᱹᱨ ᱠᱩᱧ ᱰᱩᱞᱟᱹᱣ ᱟᱹᱜᱩᱭᱟ ᱾
ᱠᱤᱥᱟᱹᱬ ᱮ ᱢᱮᱱᱟ, “ᱟᱞᱮ ᱫᱚ ᱟᱨ ᱚᱠᱚᱭ ᱮ ᱠᱟᱹᱢᱤ ᱛᱮ ᱴᱮᱸᱜᱚᱡ ᱨᱮᱭᱟᱜ ᱫᱚ ᱚᱱᱟ ᱛᱮ ᱵᱟᱞᱮ ᱦᱟᱛᱟᱣ ᱟᱠᱟᱫᱼᱟ ᱾ ᱟᱢ ᱜᱮ ᱨᱩᱣᱟᱹᱲ ᱠᱟᱛᱮ ᱟᱹᱜᱩ ᱜᱚᱫᱽ ᱢᱮ ᱾ ᱠᱩᱱᱤ ᱟᱡ ᱵᱟᱵᱟ “ᱟᱪᱪᱷᱟ ᱴᱷᱤᱠ ᱜᱮᱭᱟ ᱛᱚᱵᱮ ᱥᱮᱱ ᱜᱚᱫᱚᱜ ᱠᱟᱱᱟᱹᱧ ᱟᱹᱜᱩ ᱠᱟᱛᱮ ᱢᱩᱰᱩ ᱟᱲᱮ ᱵᱟᱲᱮ ᱰᱟᱹᱨ ᱤᱧ ᱰᱩᱞᱟᱹᱣᱟ ᱾
ᱠᱤᱥᱟᱹᱬᱼ ᱦᱚᱭ ᱛᱚᱵᱮ᱾
ᱚᱲᱟᱜ ᱮ ᱨᱩᱣᱟᱹᱲ ᱮᱱᱟ ᱠᱩᱱᱤ ᱟᱡ ᱵᱟᱵᱟ, ᱵᱤᱴᱤ ᱠᱩᱱᱤ ᱚᱠᱟ ᱨᱮᱭᱳ ᱢᱮᱱᱟᱢᱟ ᱫᱮᱥᱮ ᱠᱚᱪᱟ ᱨᱮᱭᱟᱜ ᱴᱮᱸᱜᱚᱡ ᱚᱰᱚᱠ ᱜᱚᱫ ᱠᱟᱜ ᱢᱮ, ᱼ ᱮ ᱵᱟ ᱟᱨ ᱦᱚᱸᱢ ᱨᱩᱣᱟᱹᱲ ᱮᱱ ᱫᱚ? ᱼᱦᱚᱭ ᱵᱤᱴᱤ,ᱴᱮᱸᱜᱚᱡ ᱤᱫᱤᱧ ᱨᱩᱣᱟᱹᱲ ᱮᱱᱟ ᱾ ᱫᱮ ᱞᱚᱜᱚᱱ ᱚᱰᱚᱠ ᱜᱚᱫ ᱠᱟᱜ ᱢᱮ ᱾ ᱼ ᱦᱚᱭ ᱵᱟ ᱾
ᱠᱩᱱᱤ ᱠᱚᱪᱟ ᱨᱮᱭᱟᱜ ᱴᱮᱸᱜᱚᱡ ᱥᱟᱵ ᱠᱟᱛᱮ ᱞᱚᱜᱚᱱ ᱮ ᱮᱢ ᱜᱚᱫ ᱟᱫᱮᱭᱟ ᱟᱡ ᱵᱟᱵᱟ ᱾ ᱟᱡ ᱵᱟᱵᱟ ᱩᱭᱦᱟᱹᱨ ᱩᱭᱦᱟᱹᱨ ᱛᱮ ᱥᱮᱱᱚᱜ ᱠᱟᱱᱟᱭ ᱛᱟᱨᱮᱱ ᱨᱮ ᱵᱩᱰᱤᱭᱟᱹ ᱜᱚᱜ ᱟᱠᱟᱫ ᱟᱭ, ᱜᱚᱞᱟᱨ ᱜᱟᱢᱪᱷᱟ ᱛᱮ ᱢᱮᱫᱦᱟ ᱫᱚᱭ ᱡᱚᱫ ᱤᱫᱤᱜ ᱠᱟᱱᱟ ᱾ ᱟᱪᱠᱟ ᱜᱮ ᱛᱚᱦᱚᱫ ᱮᱱᱟᱭ ᱞᱮᱸᱜᱟ ᱡᱟᱸᱜᱟ ᱮᱸᱜᱟ ᱠᱟᱹᱴᱩᱵ ᱨᱮ ᱤᱛᱤᱞ (ᱯᱩᱸᱰ) ᱫᱷᱤᱨᱤ ᱨᱮ ᱟᱹᱰᱤ ᱡᱩᱨ ᱛᱮᱜᱮ ᱥᱩᱴ ᱵᱟᱡᱟᱣ ᱞᱮᱫᱼᱟᱭ ᱞᱮᱸᱜᱟ ᱵᱩᱲᱦᱟᱹ ᱠᱟᱹᱴᱩᱵ ᱫᱚ ᱯᱚᱥᱟᱜ ᱩᱛᱟᱹᱨ ᱮᱱᱟ ᱾ ᱢᱟᱭᱟᱢ ᱛᱮ ᱡᱷᱤᱨᱚ ᱡᱷᱚᱨᱚ, ᱼ ᱦᱟᱭᱜᱟ ᱢᱮᱱ ᱠᱟᱛᱮ ᱚᱸᱰᱮ ᱜᱮ ᱫᱩᱲᱩᱵ ᱩᱛᱟᱹᱨ ᱮᱱᱟᱭ ᱾ ᱦᱟᱹᱥᱩ ᱛᱮ ᱢᱮᱫ ᱫᱟᱜ ᱠᱚᱛᱟᱭ ᱯᱮᱲᱮ ᱯᱮᱲᱮ ᱜᱚᱫ ᱮᱱᱟ ᱾ ᱧᱮᱞᱟᱭ ᱟᱹᱰᱤ ᱡᱩᱨ ᱜᱮ ᱢᱟᱭᱟᱢ ᱚᱰᱚᱠᱚᱜ ᱠᱟᱱᱟ ᱾ ᱦᱚᱨ ᱫᱷᱟᱨᱮ ᱨᱮᱜᱮ ᱜᱷᱚᱥᱨᱚᱫ ᱥᱟᱦᱟ ᱮᱱᱛᱮ ᱡᱟᱸᱜᱟ ᱥᱟᱵ ᱠᱟᱛᱮᱫ ᱮ ᱦᱟᱹᱭᱩ ᱦᱟᱹᱭᱩᱜ ᱵᱟᱲᱟᱜᱼᱟ ᱾ ᱥᱩᱨ ᱨᱮᱜᱮ ᱵᱤᱨ ᱠᱚᱦᱚᱸᱰᱟ ᱟᱲᱟᱜ ᱮ ᱧᱮᱞ ᱧᱟᱢᱟ ᱾ ᱚᱱᱟ ᱥᱟᱠᱟᱢ ᱜᱮ ᱨᱟᱪᱟᱜ ᱠᱟᱛᱮ ᱦᱚᱨᱚ ᱵᱚᱨᱚ ᱛᱤᱨᱢᱤᱫ ᱠᱟᱛᱮ ᱮ ᱞᱟᱜᱟᱣᱟ ᱜᱷᱟᱣ ᱨᱮ, ᱟᱨ ᱦᱚᱴᱚᱜ ᱨᱮᱭᱟᱜ ᱜᱟᱢᱪᱷᱟ ᱪᱤᱨᱟᱹ ᱠᱟᱛᱮ ᱮ ᱛᱚᱞᱟ ᱾ ᱠᱤᱪᱷᱩ ᱜᱷᱟᱹᱲᱤᱠ ᱯᱚᱨᱮ ᱜᱷᱟᱣ ᱦᱟᱹᱥᱩ ᱛᱟᱭ ᱨᱮᱭᱟᱲ ᱧᱚᱜᱚᱜᱼᱟ ᱾ ᱵᱤᱨ ᱠᱚᱦᱚᱸᱰᱟ ᱨᱟᱥᱟ ᱛᱮ ᱛᱟᱭᱚᱢ ᱩᱱᱟᱹᱜ ᱫᱚ ᱵᱟᱭ ᱦᱟᱹᱥᱩ ᱮᱭᱟ, ᱵᱮᱨᱮᱫ ᱨᱩᱣᱟᱹᱲ ᱛᱮ ᱴᱮᱸᱜᱚᱡ ᱥᱟᱵ ᱠᱟᱛᱮ ᱟᱨ ᱦᱚᱸ ᱢᱩᱰᱩ ᱟᱲᱮ ᱥᱮᱫ ᱠᱷᱮᱲᱰᱚᱜ ᱠᱷᱮᱲᱰᱚᱜ ᱮ ᱥᱮᱱᱚᱜᱼᱟ ᱾ ᱢᱩᱰᱩ ᱟᱲᱮ ᱵᱟᱲᱮ ᱫᱟᱨᱮ ᱨᱮ ᱥᱮᱴᱮᱨ ᱮᱱᱟᱭ, ᱥᱩᱨ ᱥᱮᱴᱮᱨ ᱠᱟᱛᱮ ᱮ ᱫᱩᱲᱩᱵ ᱡᱤᱨᱟᱹᱣᱚᱜᱼᱟ ᱾ ᱚᱱᱟ ᱛᱟᱭᱚᱢ ᱫᱟᱨᱮ ᱫᱮᱡ ᱠᱟᱛᱮ ᱞᱟᱛᱟᱨ ᱞᱟᱛᱟᱨ ᱠᱚᱨᱮᱱᱟᱜ ᱨᱚᱦᱚᱲ ᱰᱟᱹᱨ ᱮ ᱰᱩᱞᱟᱹᱣᱟ ᱾ᱩᱭᱦᱟᱹᱨ ᱩᱭᱦᱟᱹᱨ ᱛᱮᱜᱮ ᱫᱟᱨᱮ ᱰᱟᱹᱨ ᱮ ᱰᱩᱞᱟᱹᱣ ᱮᱫᱼᱟ ᱾ ᱵᱟᱨᱭᱟ ᱰᱟᱹᱨ ᱫᱚᱭ ᱰᱩᱞᱟᱹᱣ ᱜᱚᱫ ᱟᱠᱟᱫᱼᱟ ᱾ ᱟᱨ ᱦᱚᱸ ᱢᱤᱫᱴᱟᱹᱝ ᱢᱟᱜᱼᱢᱟᱜ ᱮ ᱪᱷᱩᱴᱟᱹᱣ ᱟᱠᱟᱱᱟᱭ, ᱢᱟᱜ ᱦᱚᱸᱭ ᱢᱟᱜᱮᱫᱼᱟ, ᱟᱨ ᱮᱠᱞᱟ ᱜᱮ ᱵᱚᱠᱚᱲᱼᱵᱚᱠᱚᱲ ᱩᱭᱦᱟᱹᱨ ᱠᱟᱛᱮ ᱨᱚᱲ ᱮ ᱪᱷᱩᱴᱟᱹᱣ ᱟᱠᱟᱱᱟ ᱾

ᱢᱟᱥᱮ ᱩᱱᱟᱹᱜ ᱥᱚᱠᱛᱚ ᱜᱤᱧ ᱛᱚᱦᱚᱫ ᱮᱱ ᱫᱚ, ᱩᱱᱟᱹᱜ ᱢᱟᱭᱟᱢ ᱚᱰᱚᱠ ᱮᱱᱟ ᱾ “ᱮ ᱢᱟᱨᱟᱝ ᱵᱳᱨᱳ ᱞᱚᱜᱚᱱ ᱜᱤᱧ ᱵᱮᱥ ᱠᱚᱜ ᱢᱟ, ᱵᱟᱝᱠᱷᱟᱱ ᱪᱤᱠᱟᱹᱛᱤᱧ ᱠᱟᱹᱢᱤᱭᱟ ᱾ ᱱᱚᱛᱮ ᱢᱟᱨᱟᱝ ᱯᱟᱨᱟᱵᱽ ᱦᱚᱸ ᱥᱮᱴᱮᱨᱚᱜ ᱠᱟᱱᱟ ᱾ ᱤᱧ ᱫᱚ ᱡᱚᱢ ᱟᱨ ᱵᱟᱹᱧ ᱡᱚᱢ ᱜᱤᱫᱽᱨᱟᱹ ᱛᱤᱧ ᱫᱚ ᱡᱚᱛᱚᱣᱟᱜ ᱤᱧ ᱠᱩᱲᱟᱹᱣ ᱟᱭᱟ ᱾ ᱟᱡ ᱟᱭᱳ ᱾ ᱠᱤᱨᱟᱹᱧ ᱮᱢ ᱟᱠᱟᱣᱟᱹᱫ ᱫᱮᱭᱟ ᱠᱩᱱᱤ ᱵᱤᱴᱤ ᱱᱟᱯᱟᱭ ᱛᱤᱧ ᱫᱚᱦᱚ ᱮᱭᱟ ᱢᱮᱱᱛᱮ ᱚᱱᱟ ᱩᱭᱦᱟᱹᱨ ᱵᱟᱲᱟ ᱛᱮᱜᱮ ᱴᱮᱸᱜᱚᱡ ᱫᱚ ᱚᱠᱟ ᱞᱮᱠᱟ ᱪᱚᱭ ᱦᱟᱵᱟᱜ ᱞᱮᱫᱼᱟ ᱢᱟ ᱢᱩᱰᱩ ᱫᱟᱜ ᱨᱮ ᱧᱩᱨ ᱮᱱᱟ ᱾ ᱪᱟᱵᱼᱰᱷᱩᱞ ᱩᱭᱦᱟᱹᱨ ᱫᱤᱥᱚᱢ ᱠᱷᱚᱱ ᱮ ᱨᱩᱣᱟᱹᱲ ᱦᱮᱡ ᱮᱱᱟ, ᱟᱪᱠᱟ ᱜᱮ ᱦᱚᱲᱢᱚ ᱛᱟᱭ ᱦᱤᱞᱟᱹᱣ ᱜᱚᱫ ᱮᱱᱟ ᱾ ᱢᱟᱥᱮ ᱱᱚᱶᱟ ᱪᱮᱫ ᱤᱧ ᱪᱤᱠᱟᱹ ᱠᱮᱫᱼᱟ ᱾ ᱴᱮᱸᱜᱚᱡ ᱢᱩᱰᱩ ᱫᱟᱜ ᱨᱤᱧ ᱧᱩᱨ ᱠᱮᱫᱼᱟ, ᱦᱚᱨᱚ ᱵᱚᱨᱚ ᱫᱟᱨᱮ ᱠᱷᱚᱱ ᱡᱷᱟᱢᱯᱟ ᱟᱛᱮ ᱟᱬᱜᱚ ᱮᱱᱟᱭ, ᱢᱩᱰᱩ ᱫᱟᱜ ᱨᱮ ᱫᱟᱹᱲ ᱵᱚᱞᱚ ᱮᱱᱟᱭ ᱾ ᱪᱩᱨᱟᱹ ᱢᱟᱨᱟ ᱫᱟᱜ ᱨᱮ ᱰᱩᱵᱩᱡ ᱰᱩᱵᱩᱡ ᱛᱮ ᱴᱮᱸᱜᱚᱡ ᱮ ᱯᱟᱱᱛᱮ ᱮᱫᱼᱟ ᱾ ᱵᱟᱭ ᱧᱟᱢ ᱞᱮᱫᱼᱟ ᱾ ᱟᱨ ᱦᱚᱸ ᱫᱟᱜ ᱨᱮ ᱩᱱᱩᱢᱚᱜ ᱟᱭ ᱟᱨ ᱮ ᱦᱟᱛᱣᱟᱭᱟ, ᱮᱱ ᱦᱚᱸ ᱵᱟᱭ ᱧᱟᱢᱟ, ᱫᱟᱜ ᱨᱮ ᱦᱟᱛᱣᱟ ᱵᱷᱟᱜᱟᱣ ᱮᱱᱟᱭ ᱵᱟᱝᱜᱮᱭ ᱧᱟᱢ ᱞᱮᱫᱼᱟ ᱾ ᱡᱟᱸᱜᱟ ᱨᱮᱱᱟᱜ ᱛᱚᱦᱚᱫ ᱜᱷᱟᱣ ᱠᱚᱭ ᱞᱚᱦᱚᱫ ᱠᱮᱫᱼᱟ ᱵᱩᱰᱤᱭᱟᱹ ᱯᱟᱱᱛᱮ ᱛᱮ, ᱛᱟᱭᱚᱢ ᱫᱚ ᱟᱹᱰᱤ ᱜᱚᱥᱚ ᱢᱮᱫᱦᱟ ᱠᱟᱛᱮᱭ ᱨᱩᱣᱟᱹᱲ ᱠᱟᱱᱟ, ᱢᱩᱰᱩ ᱟᱲᱮ ᱨᱟᱠᱟᱵ ᱠᱟᱛᱮ ᱫᱷᱩᱛᱤ ᱠᱚᱭ ᱨᱚᱰᱚᱡ ᱵᱟᱲᱟ ᱧᱚᱜ ᱮᱱᱟ ᱾ ᱟᱨ ᱠᱤᱥᱟᱹᱬ ᱚᱲᱟᱜ ᱥᱮᱱ ᱠᱟᱛᱮ ᱞᱟᱹᱭ ᱟᱠᱚᱣᱟᱭ ᱱᱚᱝᱠᱟ ᱦᱩᱭ ᱮᱱᱟ ᱢᱮᱱᱛᱮ ᱟᱨ ᱚᱲᱟᱜ ᱮ ᱥᱮᱱᱚᱜᱼᱟ ᱾ ᱵᱟᱹᱭᱦᱟᱹᱲ ᱠᱩᱸᱭ ᱠᱷᱚᱱ ᱠᱩᱱᱤ ᱫᱚ ᱫᱟᱜ ᱫᱤᱯᱤᱞ ᱠᱟᱛᱮ ᱮ ᱦᱤᱡᱩᱜ ᱠᱟᱱᱟ ᱾ ᱨᱟᱪᱟ ᱵᱚᱞᱚ ᱥᱟᱶᱛᱮ ᱵᱟᱵᱟ ᱛᱮᱦᱮᱧ ᱫᱚ ᱞᱚᱜᱚᱱ ᱠᱚ ᱪᱷᱩᱴᱤ ᱠᱮᱫ ᱢᱮᱭᱟ ᱢᱮᱱ ᱠᱟᱛᱮ ᱥᱩᱯᱟᱹᱲᱤ ᱫᱚ ᱯᱤᱸᱰᱟᱹᱨᱮ ᱫᱚᱦᱚ ᱜᱚᱫᱟᱭ, ᱵᱟᱵᱟ ᱫᱟᱜ ᱮᱢ ᱧᱩᱭᱟ, ᱨᱮᱭᱟᱲ ᱜᱮᱭᱟ ᱱᱤᱛ ᱜᱤᱧ ᱟᱹᱜᱩ ᱟᱠᱟᱫᱼᱟ ᱾ ᱟᱡ ᱵᱟᱵᱟᱭ ᱢᱮᱱᱟ, ᱼ ᱵᱟᱝᱟ ᱵᱤᱴᱤ ᱵᱟᱹᱧ ᱧᱩᱭᱟ ᱾ ᱨᱟᱪᱟ ᱨᱮᱭᱟᱜ ᱯᱟᱨᱠᱚᱢ ᱜᱮ ᱵᱤᱞ ᱠᱟᱛᱮ ᱮ ᱜᱤᱛᱤᱡ ᱜᱚᱫᱚᱜᱼᱟ ᱾ ᱫᱮᱥᱮ ᱢᱤᱫᱴᱟᱹᱝ ᱠᱟᱱᱛᱷᱟ ᱚᱰᱚᱠ ᱟᱹᱧ ᱢᱮ ᱵᱮᱥ ᱵᱟᱹᱧ ᱵᱩᱡᱷᱟᱹᱣ ᱮᱫᱼᱟ ᱾ ᱨᱩᱣᱟᱹᱼᱨᱩᱣᱟᱹ ᱫᱷᱟᱨᱟ ᱜᱤᱧ ᱟᱹᱭᱠᱟᱹᱣ ᱮᱫᱼᱟ ᱾ ᱠᱩᱱᱤ ᱠᱷᱟᱱᱛᱟ ᱥᱟᱵ ᱠᱟᱛᱮ ᱚᱰᱚᱠ ᱜᱚᱫ ᱮᱱᱟᱭ ᱵᱟᱵᱟ ᱟᱢ ᱫᱚ ᱟᱞᱚᱢ ᱠᱟᱹᱢᱤᱭᱟ ᱾ ᱟᱢ ᱫᱚ ᱯᱟᱞᱮ ᱠᱟᱹᱢᱤ ᱛᱮᱜᱮᱢ ᱨᱩᱣᱟᱹᱜ ᱠᱟᱱᱟ ᱾ ᱤᱧ ᱜᱮ ᱜᱟᱯᱟ ᱠᱷᱚᱱ ᱠᱟᱹᱢᱤᱧ ᱥᱮᱱᱚᱜᱼᱟ ᱾ ᱟᱢ ᱫᱚ ᱚᱲᱟᱜ ᱨᱮ ᱠᱤᱪᱷᱩ ᱫᱤᱱ ᱡᱤᱨᱟᱹᱣᱚᱜ ᱢᱮ ᱾

ᱼ ᱵᱟᱝᱟ ᱵᱤᱴᱤ ᱟᱞᱚᱢ ᱪᱤᱱᱛᱟᱹᱭᱟ ᱟᱢ ᱫᱚ ᱠᱟᱹᱢᱤ ᱫᱚ ᱵᱟᱝ ᱥᱮᱱᱚᱜ ᱦᱩᱭᱩᱜᱼᱟ ᱾ ᱱᱟᱯᱟᱭ ᱞᱮᱱ ᱠᱷᱟᱱ ᱜᱮ ᱟᱨ ᱦᱚᱸ ᱱᱟᱦᱟᱜ ᱮᱧ ᱠᱟᱹᱢᱤᱭᱟ ᱾ ᱵᱤᱴᱤ, ᱥᱤᱸᱜᱤ ᱢᱟᱦᱟ ᱡᱟᱣ ᱢᱟ ᱠᱩᱞᱦᱤ ᱢᱩᱪᱟᱹᱫ ᱚᱲᱟᱜ ᱨᱮ ᱰᱟᱠᱴᱚᱨ ᱮ ᱦᱤᱡᱩᱜ ᱫᱚ ᱱᱮᱛᱟᱨ ᱫᱚᱭ ᱦᱤᱡᱩᱜ ᱠᱟᱱᱟ ᱥᱮ ᱵᱟᱝ ᱟᱹᱛᱩ ᱦᱚᱲ ᱛᱩᱱᱩᱢ ᱪᱟᱹᱯᱩ ᱞᱟᱹᱜᱤᱫ ᱾ ᱠᱩᱱᱤ ᱼ ᱦᱤᱡᱩᱜ ᱠᱟᱱ ᱜᱮᱭᱟᱭ ᱵᱟ ᱾ ᱴᱷᱤᱠᱼᱟ, ᱜᱟᱯᱟ ᱫᱚ ᱛᱚᱵᱮ ᱩᱱᱤ ᱴᱷᱮᱱ ᱜᱮ ᱨᱟᱱ ᱤᱧ ᱦᱟᱛᱟᱣᱟ ᱾ ᱼ ᱦᱚᱭ ᱵᱟ ᱾ ᱫᱚᱥᱟᱨ ᱦᱤᱞᱚᱜ ᱥᱮᱛᱟᱜ ᱨᱮ ᱨᱟᱱ ᱟᱹᱜᱩ ᱠᱮᱫ ᱟᱭ ᱾ ᱦᱮᱡ ᱠᱟᱛᱮ ᱟᱨ ᱦᱚᱸ ᱪᱟᱹᱲᱤ ᱢᱮᱞᱟ ᱨᱮᱜᱮ ᱜᱤᱛᱤᱡ ᱟᱠᱟᱱᱟᱭ ᱾ ᱨᱚᱛᱚᱱ ᱮ ᱦᱮᱡ ᱮᱱᱟ, “ᱚᱠᱚᱭ ᱢᱮᱱᱟᱜ ᱯᱮᱭᱟ ᱥᱮ ᱵᱟᱝᱟ?” ᱠᱩᱱᱤ ᱟᱡ ᱵᱟᱵᱟᱭ ᱛᱮᱞᱟᱭᱟ, ᱼ “ᱢᱮᱱᱟᱜ ᱞᱮ ᱜᱮᱭᱟ ᱵᱟᱹᱵᱩ, ᱢᱟ ᱱᱚᱸᱰᱮ ᱜᱮ ᱫᱩᱲᱩᱵ ᱢᱮ ᱾” ᱟᱨ ᱠᱩᱱᱤ ᱟᱡ ᱵᱟᱵᱟᱭ ᱥᱚᱲᱛᱟ ᱧᱚᱜ ᱜᱚᱫ ᱮᱱᱟ ᱾ ᱼ ᱪᱤᱠᱟᱹ ᱮᱱᱟᱢ ᱜᱚᱢᱠᱮ ᱟᱹᱪᱩᱨ ᱠᱟᱛᱮᱢ ᱜᱤᱛᱤᱡ ᱮᱱ ᱫᱚ? ᱼ ᱨᱩᱣᱟᱹᱜ ᱠᱟᱱᱟᱧ ᱵᱟᱹᱵᱩ ᱾ ᱼ ᱚᱦᱚ, ᱟᱪᱪᱷᱟ, ᱱᱚᱶᱟ ᱯᱷᱚᱨᱚᱢ ᱨᱮ ᱥᱩᱦᱤ ᱵᱟᱝᱠᱷᱟᱱ ᱴᱤᱯᱟᱹ ᱠᱟᱜ ᱵᱤᱱ, ᱱᱚᱰᱮ ᱫᱚᱨᱠᱟᱨᱚᱜ ᱠᱟᱱᱟ ᱵᱟᱝᱠᱷᱟᱱ ᱱᱚᱱᱟ ᱡᱚᱢᱟ ᱵᱟᱭ ᱜᱟᱱᱚᱜᱼᱟ ᱾ ᱨᱚᱛᱚᱱ ᱯᱷᱚᱨᱚᱢ ᱮ ᱥᱟᱢᱟᱝ ᱟᱭ ᱛᱮᱭ ᱢᱮᱱᱟ ᱾ ”ᱵᱟᱝᱠᱷᱟᱱ ᱪᱤᱠᱟᱹᱛᱤᱧ ᱡᱚᱢᱟᱭᱟ ᱾” ᱠᱩᱱᱤ ᱟᱡ ᱵᱟᱵᱟ “ᱦᱚᱭ ᱵᱟᱹᱵᱩ” ᱨᱚᱲ ᱨᱚᱲ ᱛᱮᱜᱮ ᱫᱚᱭᱚᱜ ᱟᱭ ᱛᱟᱭᱚᱢ ᱫᱚ ᱩᱞᱟᱹ ᱩᱛᱟᱹᱨ ᱠᱮᱫᱼᱟᱭ, ᱠᱩᱱᱤ ᱫᱟᱹᱲ ᱠᱟᱛᱮᱫ ᱮ ᱚᱰᱚᱠᱚᱜᱼᱟ ᱾ ᱼ ᱪᱤᱠᱟᱹᱭᱮᱱᱟᱢ ᱵᱟ? ᱫᱟᱜ ᱠᱚᱭ ᱮᱢᱟᱭᱟ ᱚᱱᱟ ᱩᱞᱟᱹ ᱠᱚᱭ ᱥᱟᱯᱷᱟ ᱠᱟᱜᱼᱟ ᱾ ᱨᱚᱛᱚᱱ ᱟᱹᱰᱤ ᱫᱟᱭᱟ ᱜᱮ ᱧᱮᱞ ᱠᱤᱱᱟᱭ ᱾ ᱟᱡ ᱵᱟᱵᱟᱭ ᱠᱩᱞᱤ ᱮᱭᱟ, ᱼ ᱜᱚᱢᱠᱮ ᱵᱮᱥ ᱛᱮ ᱡᱚᱢ ᱧᱩ ᱠᱟᱛᱮ ᱛᱟᱦᱮᱸᱱ ᱵᱤᱱ, ᱚᱠᱛᱚ ᱨᱮ ᱡᱚᱢ ᱠᱚ ᱵᱟᱝ ᱛᱮ ᱦᱚᱸ ᱟᱹᱰᱤ ᱠᱤᱪᱷᱩ ᱨᱩᱣᱟᱹ ᱠᱚ ᱧᱟᱧᱟᱢᱟ ᱾ ᱠᱩᱱᱤ ᱟᱡ ᱵᱟᱵᱟ ᱜᱮᱨᱟᱝ ᱟᱛᱮᱭ ᱢᱮᱱᱟ, ᱼ ᱵᱟᱹᱵᱩ ᱯᱟᱯ ᱟᱠᱟᱫᱼᱟᱹᱧ, ᱚᱱᱟ ᱨᱮᱭᱟᱜ ᱜᱮ ᱯᱟᱞᱮ ᱪᱚᱴ ᱪᱟᱸᱫᱚ ᱫᱚ ᱠᱩᱲᱟᱹᱭ ᱮ ᱮᱢᱟᱹᱧ ᱠᱟᱱᱟ ᱾ ᱼ ᱚᱱᱠᱟ ᱫᱚ ᱪᱮᱫᱟᱜ ᱮᱢ ᱢᱮᱱᱮᱫᱼᱟ ᱾ ᱨᱚᱛᱚᱱ ᱮ ᱢᱮᱱᱟ ᱾ ᱼ ᱦᱚᱭ ᱥᱟᱹᱨᱤ ᱜᱮ ᱤᱧ ᱫᱚ ᱵᱮᱥ ᱦᱚᱲ ᱫᱩᱧ ᱵᱟᱝ ᱠᱟᱱᱟ ᱾ ᱠᱩᱱᱤ ᱟᱡ ᱵᱟᱵᱟ ᱨᱚᱛᱚᱱ ᱥᱟᱱᱟᱢ ᱠᱟᱛᱷᱟᱭ ᱞᱟᱹᱭ ᱟᱭᱟ ᱾ ᱯᱟᱨᱚᱢ ᱟᱠᱟᱱ ᱟᱡᱟᱜ ᱡᱤᱭᱚᱱ ᱨᱮᱭᱟᱜ ᱠᱟᱛᱷᱟ ᱾ ᱨᱚᱛᱚᱱ ᱟᱹᱰᱤ ᱠᱟᱱᱦᱮᱲ ᱠᱟᱛᱮ ᱞᱩᱛᱩᱨ ᱵᱤᱫ ᱟᱛᱮ ᱮ ᱟᱸᱡᱚᱢ ᱠᱮᱫ ᱛᱟᱭᱚᱢ ᱮ ᱢᱮᱱ ᱨᱩᱣᱟᱹᱲᱟ ᱾

“ᱡᱤᱭᱚᱱ ᱨᱮ ᱡᱟᱦᱟᱸ ᱛᱤᱱᱟᱹᱜ ᱜᱮ ᱫᱩᱠ ᱦᱟᱨᱠᱮᱛ ᱯᱟᱨᱚᱢ ᱟᱠᱟᱱᱟ ᱚᱱᱟ ᱠᱚ ᱡᱚᱛᱚ ᱦᱤᱲᱤᱧ ᱵᱤᱱ ᱾ ᱤᱧ ᱦᱚᱸ ᱟᱹᱵᱤᱱ ᱞᱮᱠᱟ ᱴᱩᱣᱟᱹᱨ ᱱᱟᱪᱟᱨ ᱜᱤᱭᱟᱹᱧ ᱾ ᱟᱭᱳ ᱵᱟᱵᱟ ᱦᱚᱸ ᱱᱤᱛ ᱱᱚᱶᱟ ᱫᱷᱩᱲᱤ ᱫᱷᱟᱹᱨᱛᱤ ᱨᱮ ᱮᱠᱞᱟ ᱵᱟᱹᱜᱤ ᱠᱟᱛᱮ ᱠᱤᱱ ᱥᱮᱱ ᱮᱱᱟ ᱵᱚᱸᱜᱟ ᱫᱤᱥᱚᱢ ᱛᱮ ᱾ ᱮᱱᱦᱚᱸ ᱡᱤᱭᱚᱱ ᱢᱟ ᱠᱷᱟᱸᱰᱟᱣ ᱦᱩᱭᱩᱜ ᱜᱮᱭᱟ ᱾ ᱥᱟᱱᱟᱢᱟᱜ ᱦᱤᱲᱤᱧ ᱠᱟᱛᱮ ᱨᱟᱹᱥᱠᱟᱹ ᱥᱮᱞᱮᱫ ᱛᱟᱦᱮᱸᱱ ᱦᱩᱭᱩᱜ ᱜᱮᱭᱟ ᱾ ᱛᱚᱵᱮ ᱮᱱᱟᱝ ᱜᱮ ᱡᱤᱭᱚᱱ ᱨᱮ ᱢᱟᱲᱟᱝ ᱮᱢ ᱞᱟᱦᱟ ᱠᱮᱭᱟ, ᱵᱟᱝ ᱠᱷᱟᱱ ᱫᱚ ᱚᱸᱰᱮ ᱜᱮ ᱢᱟᱹᱲᱤ ᱢᱮᱴᱟᱣᱚᱜᱼᱟ ᱾ ᱤᱧ ᱟᱹᱵᱤᱱᱟᱜ ᱡᱤᱭᱚᱱ ᱨᱮ ᱢᱟᱨᱥᱟᱞ ᱵᱟᱹᱛᱤ ᱡᱮᱨᱮᱫ ᱥᱟᱹᱱᱟᱹᱧ ᱠᱟᱱᱟ ᱾ ᱥᱩᱠ ᱤᱧ ᱟᱹᱜᱩᱭᱟ ᱾ ᱡᱩᱫᱤ ᱵᱤᱱ ᱠᱩᱥᱤᱭᱟᱹᱧ ᱠᱷᱟᱱ, ᱟᱹᱵᱤᱱᱤᱱ ᱡᱟᱶᱟᱭ ᱜᱚᱢᱠᱮ ᱨᱩᱯ ᱛᱮ, ᱟᱹᱵᱤᱱᱤᱱ ᱦᱚᱯᱚᱱ ᱮᱨᱟ ᱥᱚᱱᱟ ᱪᱟᱛᱚᱢ ᱛᱤᱧ ᱩᱢᱩᱞ ᱮᱭᱟ ᱾ ᱤᱧ ᱪᱷᱟᱛᱟ ᱫᱟᱨᱮ ᱨᱩᱯ ᱛᱮ ᱟᱹᱵᱤᱱᱟᱜ ᱜᱷᱟᱨᱚᱸᱡᱽ ᱨᱮ ᱢᱩᱛᱩᱞ ᱠᱷᱩᱱᱴᱤ ᱞᱮᱠᱟ ᱛᱤᱸᱜᱩ ᱥᱟᱱᱟᱭᱮᱫ ᱞᱤᱧᱟ ᱾ ᱛᱤᱥ ᱦᱚᱸ ᱵᱟᱹᱧ ᱫᱩᱠ ᱚᱪᱚ ᱟᱹᱵᱤᱱᱟ ᱾ ᱡᱟᱦᱟᱸ ᱛᱤᱱᱟᱹᱜ ᱜᱮ ᱠᱟᱹᱢᱤ ᱟᱨᱡᱟᱣ ᱟᱹᱜᱩᱭᱟᱹᱧ, ᱚᱱᱟ ᱜᱮ ᱨᱟᱹᱥᱠᱟᱹ ᱥᱮᱞᱮᱫ ᱵᱚᱱ ᱡᱚᱢ ᱦᱟᱹᱴᱤᱧᱟ ! ᱠᱟᱛᱷᱟᱧ ᱮᱢᱟ ᱵᱤᱱ ᱠᱟᱱᱟ ᱾ ᱟᱹᱵᱤᱱ ᱤᱡ ᱦᱚᱯᱚᱱ ᱮᱨᱟ, ᱥᱚᱨᱚᱜᱽ ᱯᱩᱨᱤ ᱨᱮᱱᱟᱜ ᱥᱩᱠ ᱤᱧ ᱪᱟᱞ ᱟᱭᱟ ᱟᱨ ᱟᱹᱵᱤᱱ ᱫᱚ ᱟᱯᱟᱛ ᱨᱩᱯ ᱛᱮ ᱞᱤᱧ ᱥᱮᱵᱟ ᱵᱤᱱᱟ ᱾”

ᱟᱡ ᱵᱟᱵᱟ ᱟᱹᱰᱤ ᱜᱷᱟᱹᱲᱤᱠ ᱮ ᱛᱷᱤᱨ ᱟᱠᱟᱱᱟ ᱾ ᱟᱡ ᱨᱚᱲ ᱞᱟᱹᱜᱤᱫ ᱟᱞᱟᱝ ᱜᱮ ᱛᱟᱭ ᱵᱟᱭ ᱩᱞᱴᱟᱹᱣᱚᱜ ᱠᱟᱱᱟ ᱾ ᱞᱩᱴᱤ ᱛᱷᱟᱨᱛᱷᱟᱨᱟᱣ ᱮᱱᱟ ᱾ ᱨᱚᱲ ᱜᱮ ᱵᱟᱭ ᱯᱩᱥᱴᱟᱹᱣ ᱫᱟᱲᱮᱭᱟᱜ ᱠᱟᱱᱟ ᱾ ᱢᱮᱫ ᱠᱷᱚᱱ ᱢᱮᱫ ᱫᱟᱜ ᱥᱟᱶᱛᱮ ᱨᱚᱦᱚᱲ ᱞᱩᱴᱤ ᱠᱷᱚᱱ ᱨᱚᱲ ᱛᱟᱭ ᱯᱷᱚᱴᱮᱞ ᱮᱱᱟ ᱾ ᱼ ᱚᱠᱟ ᱡᱚᱱᱚᱢ ᱨᱮᱪᱚ, ᱢᱤᱫ ᱵᱮᱲᱟ ᱨᱮ ᱦᱚᱸ ᱯᱟᱞᱮᱱ ᱱᱟᱯᱟᱭ ᱤᱧ ᱠᱟᱹᱢᱤ ᱞᱮᱫᱼᱟ ᱾ ᱚᱱᱟ ᱛᱮ ᱛᱮᱦᱮᱧ ᱥᱚᱱᱟ ᱞᱮᱠᱟᱱ ᱡᱟᱶᱟᱭ ᱥᱚᱱᱟ ᱪᱟᱛᱚᱢ ᱨᱩᱯ ᱛᱤᱧ ᱧᱟᱢ ᱠᱮᱫᱮᱭᱟ ᱾ ᱪᱟᱸᱫᱚ ᱵᱚᱸᱜᱟ ᱞᱮᱠᱟ ᱵᱤᱱ ᱛᱤᱸᱜᱩ ᱮᱱᱟᱹᱹ ᱢᱮᱱ ᱠᱟᱛᱮ ᱯᱟᱨᱠᱚᱢ ᱠᱷᱚᱱ ᱮ ᱵᱮᱨᱮᱫ ᱮᱱᱛᱮ, ᱨᱚᱛᱚᱱ ᱟᱡ ᱡᱟᱯᱟᱜ ᱟᱹᱜᱩ ᱠᱟᱛᱮ ᱜᱟᱛᱮ ᱧᱚᱜ ᱠᱟᱛᱮ ᱡᱚᱡᱚᱢ ᱛᱤ ᱛᱮ ᱡᱚᱡᱚᱢ ᱫᱟᱹᱵᱤ ᱨᱮᱭ ᱥᱟᱵᱮᱭᱟ ᱾ ᱠᱩᱱᱤ ᱫᱚ ᱥᱤᱞᱯᱤᱧ ᱠᱚᱪᱟ ᱨᱮ ᱡᱟᱯᱟᱜ ᱠᱟᱛᱮ ᱡᱚᱛᱚ ᱠᱟᱛᱷᱟᱭ ᱟᱸᱡᱚᱢ ᱟᱠᱟᱫᱼᱟ ᱾ ᱠᱩᱱᱤ ᱦᱚᱸ ᱢᱚᱱᱮ ᱢᱚᱱᱮ ᱛᱮ ᱟᱹᱰᱤ ᱠᱩᱥᱤ ᱮᱱᱟᱭ ᱾ ᱟᱡ ᱵᱟᱵᱟ ᱦᱚᱸ ᱟᱹᱰᱤ ᱡᱩᱨ ᱮ ᱠᱩᱥᱤ ᱮᱱᱟ ᱾ ᱚᱱᱠᱟᱭ ᱟᱹᱭᱠᱟᱹᱣ ᱮᱫ ᱛᱟᱸᱦᱮᱫ ᱩᱱᱠᱤᱱᱟᱜ ᱜᱷᱟᱨᱚᱸᱡᱽ ᱨᱮ ᱥᱚᱱᱟ ᱪᱟᱛᱚᱢ ᱜᱚᱢᱦᱮᱲ ᱩᱢᱩᱞ ᱛᱮ ᱠᱤᱱ ᱩᱢᱩᱞ ᱮᱱᱟ ᱾ ᱢᱟᱨᱥᱟᱞ ᱵᱟᱹᱛᱤ ᱛᱮ ᱡᱤᱭᱚᱱ ᱛᱟᱹᱠᱤᱱ ᱰᱤᱜᱽ ᱰᱤᱜᱽ ᱢᱟᱨᱥᱟᱞ ᱮᱱᱟ ᱾
***