ᱛᱤᱨᱞᱟᱹ ᱟᱢᱟᱜ ᱡᱤᱵᱚᱱ ᱨᱮᱱᱟᱝ
ᱟᱹᱰᱤ ᱡᱚᱛᱷᱟᱛ ᱠᱟᱛᱷᱟ,
ᱦᱟᱨᱟᱭᱮᱱᱟᱢ ᱵᱩᱨᱩᱭᱮᱱᱟᱢ
ᱠᱩᱸᱭᱰᱤ ᱢᱤᱨᱩ ᱥᱚᱱᱟ ᱵᱤᱴᱤ ᱛᱤᱧ ᱿
ᱛᱤᱥ ᱠᱷᱚᱱ ᱪᱚᱝ ᱩᱠᱩ ᱩᱠᱩ
ᱟᱢ ᱠᱚ ᱪᱟᱹᱨᱤᱛ ᱞᱮᱫ ᱢᱮ,
ᱟᱢᱟᱜ ᱱᱟᱯᱟᱭ ᱱᱤᱨᱚᱲ ᱵᱮᱵᱷᱟᱨ ᱾
ᱫᱤᱥᱣᱟᱹ ᱠᱚ ᱵᱟᱰᱟᱭ ᱠᱮᱫ
ᱠᱩᱲᱤ ᱦᱚᱯᱚᱱ ᱡᱟᱱᱟᱢ ᱵᱤᱴᱤ
ᱮᱴᱟᱜ ᱚᱲᱟᱜ ᱜᱮ,
ᱱᱤᱛ ᱱᱚᱰᱮ ᱫᱷᱤᱱᱟᱹᱝ ᱦᱟᱸᱰᱮ
ᱟᱸᱲᱜᱚ ᱨᱟᱠᱟᱵ ᱜᱮ ᱿
ᱡᱟᱱᱟᱢ ᱚᱲᱟᱜ ᱵᱟᱹᱜᱤ ᱠᱟᱛᱮ
ᱟᱭᱳ ᱵᱟᱵᱟ ᱫᱩᱞᱟᱹᱲ ᱫᱮᱭᱟ ᱠᱟᱛᱮ,
ᱪᱷᱩᱰᱟᱹᱨ ᱵᱟᱹᱜᱤ ᱦᱩᱭᱩᱜ ᱜᱮᱭᱟ
ᱥᱟᱱᱟᱢ ᱞᱮᱠᱟᱱ ᱥᱟᱹᱜᱟᱹᱭ ᱿
ᱛᱟᱲᱟᱢ ᱦᱩᱭᱩᱜ ᱛᱟᱢᱟ
ᱥᱩᱞᱩᱠ ᱰᱟᱦᱟᱨ ᱛᱮ,
ᱡᱮᱨᱮᱫ ᱦᱩᱭᱩᱜ ᱫᱩᱞᱟᱹᱲ
ᱱᱟᱶᱟ ᱜᱷᱟᱨᱚᱸᱡᱽ ᱨᱮ ᱿
ᱱᱤᱛ ᱟᱢ ᱫᱚ ᱜᱷᱟᱨᱚᱸᱡᱽ ᱨᱤᱱᱤᱡ
ᱚᱲᱟᱜ ᱨᱟᱹᱱᱤ ᱠᱟᱱ,
ᱥᱚᱛ ᱪᱩᱨᱤᱛ ᱰᱟᱦᱟᱨ ᱛᱮ
ᱛᱟᱲᱟᱢ ᱛᱟᱨᱥᱮ ᱛᱟᱢ ᱿
ᱥᱟᱱᱟᱢ ᱩᱭᱦᱟᱹᱨ ᱵᱷᱟᱵᱽᱱᱟ
ᱥᱟᱱᱟᱢ ᱞᱮᱠᱟᱱ ᱢᱟᱨᱮ ᱥᱟᱹᱜᱟᱹᱭ,
ᱥᱟᱦᱟ ᱨᱮ ᱫᱚᱦᱚ ᱠᱟᱛᱮ
ᱜᱷᱟᱨᱚᱸᱡᱽ ᱥᱟᱶᱟᱨ ᱛᱟᱢ ᱿
ᱢᱚᱱᱮ ᱢᱩᱠᱨᱩᱲ ᱠᱟᱛᱮ
ᱡᱤᱣᱤ ᱜᱚᱴᱟ ᱠᱟᱛᱮ,
ᱛᱟᱦᱮᱸ ᱠᱮᱴᱮᱡ ᱦᱩᱭᱩᱜ
ᱡᱩᱨᱤ ᱜᱟᱛᱮ ᱥᱟᱶ ᱿
ᱟᱢᱜᱮ ᱥᱤᱨᱡᱚᱱᱤᱭᱟᱹ
ᱡᱟᱱᱟᱢ ᱟᱭᱳ ᱛᱳᱣᱟ ᱫᱟᱨᱮ
ᱟᱢᱟᱜ ᱜᱷᱟᱨᱚᱸᱡᱽ ᱟᱢ ᱜᱮ
ᱟᱦᱞᱟ ᱢᱟᱨᱥᱟᱞ ᱛᱟᱢ ᱿
ᱪᱚᱜ ᱪᱮᱨᱮᱡ ᱟᱛᱮ
ᱵᱟᱞᱚᱠ ᱪᱟᱪᱚ ᱠᱮᱴᱮᱡ ᱮᱢ,
ᱫᱷᱤᱱᱟᱹᱝ ᱵᱤᱫᱟᱹᱞ ᱟᱢᱟᱜ
ᱧᱩᱛᱩᱢ ᱪᱷᱟᱸᱫᱷᱮᱲ ᱛᱟᱢ ᱿
ᱦᱟᱨᱟ ᱵᱩᱨᱩ ᱠᱟᱛᱮ
ᱛᱷᱩᱢ ᱪᱟᱞ ᱟᱛᱮ,
ᱫᱤᱥᱟᱹ ᱩᱫᱩᱜ ᱟᱭ ᱢᱮ
ᱟᱜᱟᱢ ᱟᱨᱥᱟᱞ ᱞᱟᱹᱜᱤᱫ ᱿
ᱟᱢᱟᱜ ᱚᱲᱟᱜ ᱨᱮ ᱦᱮᱡ ᱮᱱ
ᱱᱟᱣᱟ ᱵᱟᱹᱦᱩ ᱵᱤᱴᱤ,
ᱪᱩᱢᱟᱣᱲᱟ ᱦᱟᱛᱮ ᱟᱢ ᱫᱚ
ᱥᱟᱹᱜᱩᱱ ᱫᱟᱨᱟᱢ ᱮᱢ ᱿
ᱥᱟᱱᱟᱢ ᱞᱮᱠᱟᱱ ᱟᱪᱟᱨ ᱵᱮᱵᱷᱟᱨ
ᱞᱟᱹᱭ ᱪᱮᱫᱮᱢ ᱜᱷᱟᱨᱚᱸᱡᱽ ᱨᱮᱱᱟᱝ,
ᱟᱢ ᱫᱚ ᱦᱟᱱᱦᱟᱨ ᱟᱭᱳ
ᱟᱯᱱᱟᱨ ᱦᱩᱭᱩᱜ ᱛᱟᱢ ᱿
ᱯᱟᱹᱛᱭᱟᱣ ᱫᱚᱦᱚᱭ ᱢᱮ
ᱩᱱᱤ ᱥᱤᱨᱡᱚᱱᱤᱭᱟᱹ ᱴᱷᱮᱱ,
ᱛᱤᱨᱞᱟᱹ ᱢᱮᱱᱛᱮ ᱡᱟᱸᱦᱟᱭᱼᱮ
ᱥᱤᱨᱡᱚᱱ ᱟᱠᱟᱫ ᱢᱮ ᱿
***
