ᱠᱟᱛᱷᱟ ᱨᱮᱠᱚ ᱢᱮᱱᱟ ᱫᱷᱟᱹᱨᱛᱤ ᱨᱮ ᱡᱟᱦᱟᱸ ᱛᱤᱱᱟᱹᱜ ᱢᱟ.ᱱ ᱢᱚᱦᱚᱛ ᱵᱷᱟᱹᱞᱟᱹᱭ ᱠᱟᱹᱢᱤ ᱦᱩᱭ ᱟᱠᱟᱱᱟ ᱚᱨᱫᱷᱮᱠ ᱠᱚ ᱠᱟᱹᱢᱤ ᱟᱠᱟᱫᱟ ᱛᱤᱨᱞᱟᱹ ᱟᱨ ᱚᱨᱫᱷᱮᱠ ᱠᱚ ᱠᱟᱹᱢᱤ ᱟᱠᱟᱫᱟ ᱠᱚᱲᱟ ᱦᱚᱯᱚᱱ ᱾ ᱥᱚᱢᱟᱡᱽ, ᱜᱷᱟᱨᱚᱸᱡᱽ, ᱡᱟᱹᱛᱤ ᱩᱛᱱᱟᱹᱣ ᱨᱮ ᱠᱚᱲᱟ ᱦᱚᱯᱚᱱ ᱟᱨ ᱵᱟᱹᱦᱩ ᱠᱩᱲᱤ ᱵᱟᱱᱟ ᱦᱚᱲᱟᱜ ᱥᱚᱢᱟᱱ ᱮᱱᱮᱢ ᱢᱮᱱᱟᱜ ᱟᱠᱟᱫᱼᱟ ᱾ ᱢᱮᱫᱴᱟᱝ ᱫᱤᱥᱚᱢ ᱨᱮ ᱛᱤᱨᱞᱟᱹ ᱠᱚ ᱥᱤᱠᱷᱱᱟᱹᱛ ᱥᱮᱫ ᱛᱮ ᱡᱟᱦᱟᱸ ᱛᱤᱱᱟᱹᱜ ᱠᱚ ᱞᱟᱦᱟᱜᱼᱟ ᱚᱱᱟ ᱫᱤᱥᱚᱢ ᱫᱚ ᱩᱛᱱᱟᱹᱣ ᱥᱮᱫ ᱛᱮ ᱩᱱᱟᱹᱝ ᱜᱮ ᱞᱟᱦᱟ ᱜᱮᱭᱟ ᱟᱨ ᱠᱤᱥᱟᱹᱬᱟ ᱾ ᱱᱤᱛ ᱧᱮᱞᱚᱜ ᱠᱟᱱᱟ ᱚᱞ – ᱯᱟᱲᱦᱟᱣ, ᱚᱞᱼᱵᱮᱞ, ᱥᱟᱶᱦᱮᱫ ᱪᱟᱨᱪᱟ, ᱜᱚᱵᱮᱥᱚᱱᱟ, ᱮᱢᱟᱱ ᱮᱢᱟᱱ ᱠᱟᱹᱢᱤᱨᱮ ᱛᱤᱨᱞᱟᱹ ᱠᱚ ᱜᱷᱟᱨᱚᱸᱡᱽ ᱥᱟᱢᱴᱟᱣ ᱠᱟᱛᱮ ᱥᱚᱨᱮᱥ ᱟᱨ ᱥᱟᱨᱦᱟᱣ ᱟᱱ ᱴᱷᱟᱶ ᱠᱚ ᱦᱟᱢᱮᱴ ᱮᱫᱟ ᱾ ᱚᱱᱟᱛᱮ ᱜᱚᱲᱚ-ᱜᱚᱯᱚᱲᱚ ᱢᱚᱱᱮ ᱠᱟᱛᱮ ᱛᱤᱨᱞᱟᱹ ᱥᱚᱢᱟᱡᱽ ᱡᱚᱫᱤ ᱡᱚᱛᱷᱟᱛ ᱥᱤᱠᱷᱱᱟᱹᱛ ᱠᱚ ᱧᱟᱢᱟ ᱛᱚᱰᱮ ᱜᱮᱭᱟᱱ- ᱵᱩᱨᱫᱷᱤ ᱟᱛᱮ ᱠᱟᱹᱢᱤ ᱛᱟᱞᱟᱛᱮ ᱥᱚᱢᱟᱡᱽ ᱡᱟᱹᱛᱤ ᱠᱚ ᱵᱮᱨᱮᱫ ᱨᱟᱠᱟᱵᱟ, ᱢᱟᱨᱥᱟᱞᱟ ᱾
ᱥᱮᱫᱟᱭ ᱠᱷᱚᱱ ᱜᱮ ᱥᱟᱱᱛᱟᱲ ᱥᱚᱢᱟᱡᱽ ᱨᱮᱱ ᱛᱤᱨᱞᱟᱹ ᱠᱚᱫᱚ ᱠᱚᱲᱟ ᱦᱚᱯᱚᱱ ᱥᱟᱶᱛᱮ ᱥᱚᱢᱟᱱ ᱛᱟᱞ ᱛᱮᱠᱚ ᱠᱟᱹᱢᱤ ᱟᱹᱜᱩ ᱮᱫᱟ ᱾ ᱥᱟᱱᱟᱢ ᱥᱮᱫᱛᱮ ᱫᱟᱭᱤᱛᱚ ᱠᱚᱨᱛᱚᱵᱚ ᱥᱳᱞᱳ ᱟᱱᱟ ᱠᱚ ᱥᱟᱵ ᱫᱚᱦᱚ ᱟᱠᱟᱫᱟ ᱾ ᱥᱤᱠᱷᱱᱟᱹᱛ ᱥᱮᱫ ᱛᱮᱦᱚᱸ ᱛᱤᱨᱞᱟᱹ ᱦᱚᱯᱚᱱ ᱠᱚᱲᱟ ᱦᱚᱯᱚᱱ ᱥᱟᱶ ᱥᱚᱢᱟᱱ ᱛᱟᱞ ᱛᱮᱠᱚ ᱞᱟᱦᱟ ᱪᱟᱞᱟᱜ ᱠᱟᱱᱟ ᱾ ᱛᱤᱨᱞᱟᱹ ᱠᱚ ᱱᱤᱛ ᱥᱟᱱᱟᱢ ᱥᱮᱫ ᱛᱮ ᱡᱤᱛᱠᱟᱹᱨᱚᱜ ᱯᱟᱹᱣᱲᱤ ᱠᱚ ᱞᱟᱦᱟ ᱤᱫᱤ ᱮᱫᱟ ᱾
ᱟᱫᱷᱩᱱᱤᱠ ᱥᱚᱢᱟᱡᱽ ᱥᱮᱫ ᱵᱚ ᱠᱚᱭᱚᱜ ᱞᱮᱠᱷᱟᱱ ᱧᱮᱞ ᱧᱟᱢ ᱟᱵᱚᱱ ᱛᱤᱨᱞᱟᱹ ᱠᱚ ᱡᱟᱶᱟᱭ ᱚᱲᱟᱜ ᱨᱮ ᱥᱚᱝᱥᱟᱨ ᱠᱟᱛᱮ ᱨᱮᱦᱚᱸ ᱨᱟᱥᱴᱚᱨᱯᱚᱛᱤ, ᱯᱚᱨᱫᱷᱟᱱᱢᱚᱱᱛᱨᱤ, ᱞᱳᱠᱥᱚᱵᱷᱟ ᱨᱮᱱ ᱥᱯᱤᱠᱟᱨ, ᱵᱤᱨᱳᱫᱷᱤ ᱫᱚᱞᱚ ᱱᱮᱛᱟ, ᱠᱮᱱᱫᱽᱨᱤᱭ ᱢᱚᱱᱛᱨᱤ, ᱢᱩᱠᱷᱚ ᱢᱚᱛᱨᱤ, ᱨᱟᱡᱚᱯᱟᱞ ᱥᱟᱶᱛᱮ ᱟᱹᱰᱤ ᱜᱩᱱ ᱟᱱᱟᱝ ᱠᱟᱹᱢᱤ ᱴᱷᱟᱶ ᱨᱮ ᱥᱟᱡᱟᱣ -ᱥᱟᱯᱲᱟᱣ ᱠᱟᱛᱮ ᱠᱚ ᱠᱟᱹᱢᱤ ᱠᱟᱱᱟ ᱾ ᱟᱵᱚ ᱥᱟᱶᱛᱟ ᱥᱚᱢᱟᱡᱽ ᱨᱮᱦᱚᱸ ᱛᱤᱨᱞᱟᱹ ᱠᱚᱜᱮ ᱟᱭᱳ, ᱠᱟᱹᱠᱤ, ᱱᱟᱱᱟ, ᱵᱟᱹᱦᱩ, ᱜᱚᱲᱚᱢ ᱵᱩᱰᱷᱤ ᱟᱨ ᱚᱲᱟᱜ ᱞᱚᱠᱷᱤ ᱾ ᱤᱥᱤᱱ – ᱵᱟᱥᱟᱝ, ᱚᱲᱟᱜ ᱥᱚᱝᱥᱟᱨ, ᱜᱤᱫᱟᱹᱨ – ᱯᱤᱫᱟᱹᱨ ᱵᱟᱜᱟᱣ ᱠᱟᱛᱮ ᱥᱚᱝᱥᱟᱨ ᱪᱟᱞᱟᱣ ᱨᱮ ᱜᱚᱲᱚ ᱮᱢ ᱞᱟᱹᱜᱤᱫ ᱢᱟᱴ – ᱜᱷᱟᱴ ᱪᱟᱥ ᱠᱟᱹᱢᱤ, ᱠᱩᱭᱞᱟᱹ ᱠᱷᱟᱫᱟᱱ, ᱫᱷᱤᱨᱤ ᱠᱷᱟᱫᱟᱱ, ᱤᱴ ᱵᱷᱟᱴᱟ, ᱯᱟᱛᱲᱟ ᱯᱟᱹᱴᱤ, ᱯᱟᱹᱴᱭᱟᱹ ᱜᱟᱞᱟᱝ, ᱡᱚᱱᱚᱜ ᱜᱟᱞᱟᱝ, ᱮᱢᱟᱱ ᱮᱢᱟᱱ ᱠᱟᱹᱢᱤ ᱨᱮ ᱡᱚᱯᱚᱲᱟᱣ ᱢᱮᱱᱟᱜ ᱠᱚᱣᱟ ᱾ ᱥᱤᱠᱷᱱᱟᱹᱛᱟᱱ ᱛᱤᱨᱞᱟᱹ ᱠᱚᱦᱚᱸ ᱚᱲᱟᱜ ᱜᱷᱟᱨᱚᱸᱡᱽ ᱠᱟᱹᱢᱤ ᱥᱟᱹᱛ ᱥᱟᱯᱲᱟᱣ ᱠᱟᱛᱮ ᱯᱟᱭᱞᱚᱴ, ᱰᱟᱠᱛᱟᱨ, ᱱᱟᱨᱥ, ᱤᱧᱡᱤᱱᱤᱭᱟᱨ, ᱢᱟᱪᱮᱫ, ᱯᱨᱚᱯᱷᱮᱥᱟᱨ, ᱯᱨᱚᱥᱟᱥᱚᱠ ᱟᱨ ᱱᱟᱯᱟᱭ ᱱᱟᱯᱟᱭ ᱥᱟᱶᱛᱟ ᱵᱷᱟᱹᱞᱟᱹᱭ ᱠᱟᱹᱢᱤ ᱠᱚ ᱠᱟᱹᱢᱤ ᱠᱟᱱᱟ ᱾ ᱡᱟᱹᱛᱤ ᱟᱹᱨᱤ ᱠᱟᱹᱣᱰᱤ ᱟᱹᱨᱤ ᱱᱤᱛᱤ ᱨᱮᱦᱚᱸ ᱟᱹᱰᱤᱜᱟᱱ ᱮᱱᱮᱢ ᱢᱮᱱᱟᱜ ᱛᱟᱠᱚᱣᱟ ᱾ ᱫᱤᱥᱚᱢ ᱟᱨ ᱥᱚᱢᱟᱡᱽ ᱞᱟᱹᱜᱤᱫ ᱥᱚᱢᱟᱱ ᱛᱮᱠᱚ ᱠᱟᱹᱢᱤ ᱠᱟᱱᱟ ᱾
ᱥᱟᱱᱛᱟᱲ ᱥᱚᱢᱟᱡᱽ ᱨᱮᱱ ᱛᱤᱨᱞᱟᱹ ᱚᱲᱟᱜ ᱠᱚ ᱯᱩᱸᱰ ᱡᱮᱨᱮᱲᱟ, ᱥᱟᱡᱟᱣ ᱥᱟᱯᱷᱟᱭᱟ, ᱜᱤᱫᱟᱹᱨ – ᱯᱤᱫᱟᱹᱨ ᱠᱚ ᱦᱟᱨᱟᱵᱩᱨᱩ ᱠᱚᱣᱟ ᱡᱟᱛᱮ ᱱᱟᱯᱟᱭ ᱟᱹᱨᱤᱪᱟᱹᱞᱤ ᱟᱛᱮ ᱥᱚᱛ ᱪᱚᱨᱤᱛᱨᱚᱵᱟᱱ ᱠᱚ ᱵᱮᱱᱟᱣᱜ ᱢᱟ ᱾ ᱟᱭᱳ ᱜᱮ ᱥᱚᱝᱥᱟᱨ ᱨᱮ ᱥᱩᱠᱷᱚ ᱥᱟᱹᱱᱛᱤᱭ ᱛᱚᱞ ᱫᱚᱦᱚᱭᱟ ᱟᱨ ᱚᱸᱰᱮ ᱠᱩᱲᱤ ᱜᱤᱫᱟᱹᱨ ᱟᱨ ᱠᱚᱲᱟ ᱜᱤᱫᱟ.ᱨ ᱱᱟᱯᱟᱭ ᱥᱟᱹᱦᱤᱸᱡ ᱠᱚ ᱦᱟᱨᱟ ᱵᱩᱨᱩᱜᱼᱟ ᱾
ᱱᱟᱯᱟᱭ ᱜᱷᱟᱨᱚᱸᱡᱽ ᱵᱮᱱᱟᱣ ᱨᱮ ᱥᱟᱱᱛᱟᱲ ᱥᱚᱢᱟᱡᱽ ᱨᱮᱱ ᱛᱤᱨᱞᱟᱹ ᱠᱚᱣᱟᱜ ᱟᱭᱫᱟᱨ, ᱥᱚᱢᱢᱟᱱ ᱟᱨ ᱢᱟᱹᱱ ᱢᱮᱱᱟᱜ ᱟᱠᱟᱫᱟ ᱾ ᱫᱷᱚᱨᱚᱢ ᱜᱩᱨᱩ ᱠᱚᱣᱟᱜ ᱠᱟᱛᱷᱟ ᱞᱮᱠᱟᱛᱮ ᱥᱟᱱᱛᱟᱲ ᱥᱚᱢᱟᱡᱽ ᱨᱮᱱ ᱛᱤᱨᱞᱟᱹ ᱠᱚ ᱡᱮᱢᱚᱱ ᱪᱷᱤᱛᱟᱹ, ᱠᱟᱹᱯᱨᱟᱹ, ᱦᱤᱥᱤ, ᱰᱩᱢᱱᱤ, ᱫᱟᱹᱱᱜᱤ, ᱯᱩᱬᱜᱤ, ᱠᱷᱤᱱᱛᱤ ᱫᱷᱚᱨᱚᱢ ᱠᱚᱨᱚᱢ, ᱥᱚᱢᱟᱡᱽ ᱥᱚᱝᱥᱟᱨ ᱛᱚᱨᱟᱣ ᱨᱟᱠᱟᱵ ᱨᱮ ᱟᱹᱰᱤᱜᱟᱱ ᱮᱱᱮᱢ ᱠᱚ ᱫᱚᱦᱚ ᱦᱚᱴᱚ ᱟᱠᱟᱫᱟ ᱾ ᱪᱷᱤᱛᱟᱹ – ᱠᱟᱹᱯᱨᱟᱹ ᱫᱷᱚᱨᱚᱢ ᱛᱷᱟᱱ ᱠᱤᱱ ᱵᱮᱱᱟᱣ ᱟᱠᱟᱫᱼᱟ ᱥᱟᱹᱨᱤ ᱥᱟᱨᱡᱚᱢ ᱵᱩᱴᱟᱹᱨᱮ ᱾ ᱦᱤᱥᱤ, ᱰᱩᱢᱱᱤ, ᱫᱟᱹᱱᱜᱤ, ᱯᱩᱬᱜᱤ, ᱠᱷᱤᱱᱛᱤ ᱱᱟᱯᱟᱭ ᱜᱷᱟᱨᱚᱸᱡᱽ – ᱥᱚᱢᱟᱡᱽ ᱥᱚᱝᱥᱟᱨ ᱵᱮᱱᱟᱣ ᱨᱮ ᱜᱚᱲᱚ ᱮᱱᱮᱢ ᱠᱚ ᱫᱚᱦᱚ ᱦᱚᱴᱚ ᱟᱠᱟᱫᱼᱟ ᱾ ᱯᱷᱩᱞᱚ- ᱡᱷᱟᱱᱚ ᱤᱝᱨᱟᱡᱽ ᱡᱳᱛ ᱫᱟᱨ, ᱡᱚᱢᱤᱫᱟᱨ ᱥᱟᱶᱛᱮ ᱠᱚ ᱞᱟᱹᱲᱦᱟᱹᱭ ᱟᱠᱟᱫᱼᱟ ᱾ ᱥᱟᱶᱛᱟ ᱞᱟᱭ ᱞᱟᱠᱪᱟᱨ, ᱫᱷᱚᱨᱚᱢ -ᱠᱚᱨᱚᱢ ᱠᱟᱹᱢᱤ ᱨᱮᱦᱚᱸ ᱛᱤᱨᱞᱟᱹ ᱠᱚ ᱜᱚᱲᱚ-ᱜᱚᱯᱚᱲᱚ ᱟᱛᱮ ᱡᱚᱯᱚᱲᱟᱣ ᱢᱮᱱᱟᱜ ᱠᱚᱣᱟ ᱾ ᱵᱚᱸᱜᱟ ᱵᱩᱨᱩᱨᱮ ᱜᱮᱡ ᱜᱩᱨᱤᱡ ᱠᱟᱛᱮ ᱫᱮᱵᱟ ᱥᱮᱵᱟ ᱠᱟᱹᱢᱤᱨᱮ ᱛᱤᱨᱞᱟᱹ ᱠᱚᱜᱮ ᱞᱟᱦᱟ ᱨᱮᱠᱚ ᱛᱟᱦᱮᱸᱱᱟ ᱾
ᱛᱤᱨᱞᱟᱹ ᱱᱤᱛ ᱫᱚ ᱥᱟᱱᱟᱢ ᱠᱟᱹᱢᱤᱨᱮ ᱥᱚᱢᱟᱱ ᱫᱟᱣ ᱠᱚ ᱧᱟᱢ ᱟᱠᱟᱫᱼᱟ ᱾ ᱫᱤᱥᱚᱢ ᱵᱷᱟᱹᱞᱟᱹᱭ ᱠᱟᱹᱢᱤᱨᱮ ᱛᱤᱨᱞᱟᱹ ᱠᱚ ᱯᱷᱩᱨᱜᱟᱹᱞ ᱥᱟᱹᱦᱤᱸᱡ ᱠᱚ ᱠᱟᱹᱢᱤ ᱠᱟᱱᱟ ᱫᱤᱞ ᱫᱟᱲᱮ ᱟᱛᱮ ᱾ ᱥᱟᱱᱟᱢ ᱠᱟᱹᱢᱤᱨᱮ ᱢᱟ.ᱱ ᱟᱨ ᱥᱚᱨᱮᱥ ᱴᱷᱟᱶ ᱠᱚ ᱦᱟᱢᱮᱴ ᱮᱫᱼᱟ ᱾ ᱤᱱᱫᱽᱨᱟ ᱜᱟᱱᱫᱷᱤ, ᱯᱨᱚᱛᱤᱵᱷᱟ ᱯᱟᱴᱤᱞ, ᱨᱟᱹᱱᱤ ᱨᱟᱥᱢᱚᱱᱤ, ᱥᱟᱨᱚᱫᱟ ᱫᱮᱵᱤ, ᱵᱤᱡᱚᱭ ᱞᱚᱠᱥᱢᱤ ᱯᱚᱱᱰᱤᱛ, ᱫᱨᱳᱯᱳᱫᱤ ᱢᱩᱨᱢᱩ ᱮᱢᱟᱱ ᱮᱢᱟᱱ ᱛᱤᱨᱞᱟᱹ ᱠᱚ ᱫᱤᱥᱚᱢ ᱵᱷᱟᱹᱞᱟᱹᱭ ᱠᱟᱹᱢᱤᱨᱮ ᱥᱚᱨᱮᱥ ᱴᱷᱟᱶ ᱠᱚ ᱦᱟᱢᱮᱴ ᱟᱠᱟᱫᱼᱟ ᱾ ᱤᱥᱞᱟᱢ ᱛᱤᱨᱞᱟᱹ ᱵᱮᱜᱚᱢ ᱨᱳᱠᱮᱭᱟ ᱟᱡᱟᱜ ᱫᱤᱞ- ᱫᱟᱲᱮ ᱟᱛᱮ ᱛᱤᱨᱞᱟᱹ ᱥᱚᱢᱟᱡᱽ ᱪᱤᱛᱟᱹᱨ ᱯᱟᱞᱴᱟᱣ ᱞᱟᱹᱜᱤᱫ ᱮ ᱠᱩᱨᱩᱢᱩᱴᱩ ᱟᱠᱟᱫᱼᱟ ᱟᱨ ᱟᱠᱚ ᱥᱚᱢᱟᱡᱽ ᱨᱮ ᱛᱤᱨᱞᱟᱹ ᱠᱚ ᱟᱹᱰᱤ ᱜᱟᱱ ᱴᱷᱟᱶ ᱨᱮ ᱥᱚᱨᱮᱥ ᱴᱷᱟᱶ ᱠᱚ ᱦᱟᱢᱮᱴ ᱟᱠᱟᱫᱼᱟ ᱾ ᱥᱚᱢᱟᱡᱽ ᱥᱟᱶᱛᱟ ᱡᱚᱫᱤ ᱵᱚ ᱞᱟᱦᱟᱭᱟ ᱛᱚᱵᱮ ᱛᱤᱨᱞᱟᱹ ᱠᱚ ᱫᱤᱞ ᱫᱟᱲᱮ ᱟᱛᱮ ᱞᱟᱦᱟ ᱦᱩᱭᱩᱜ ᱛᱟᱵᱚᱱᱟ ᱟᱨ ᱞᱟᱦᱟ ᱨᱮᱱᱟᱜ ᱩᱫᱽᱜᱟᱹᱣ ᱫᱟᱲᱮ ᱡᱚᱜᱟᱣ ᱦᱩᱭᱩᱜ ᱛᱟᱵᱚᱱᱟ ᱾
ᱜᱤᱫᱟᱹᱨ ᱯᱤᱫᱟᱹᱨ ᱯᱚᱯᱚᱲᱟᱝ ᱠᱚᱜᱮ ᱦᱟᱯᱮᱱ ᱫᱤᱱ ᱨᱮᱱ ᱞᱟᱹᱣᱲᱤᱭᱟᱹ ᱠᱟᱱᱟ ᱠᱚ, ᱡᱚᱛᱷᱟᱛ ᱥᱟᱹᱦᱤᱸᱡ ᱦᱟᱨᱟ ᱵᱩᱨᱩ ᱨᱮ ᱛᱤᱨᱞᱟᱹ ᱠᱚᱜᱮ ᱟᱹᱰᱤ ᱜᱩᱨᱩᱛᱚ ᱟᱛᱮ ᱠᱚ ᱠᱟᱹᱢᱤᱭᱟ, ᱥᱤᱥᱩ- ᱠᱩᱪᱤ ᱩᱢᱮᱨ ᱠᱷᱚᱱ ᱜᱮ ᱟᱭᱳ ᱜᱮ ᱪᱚᱜ ᱪᱮᱨᱮᱡ ᱟᱛᱮ ᱟ.ᱰᱤ ᱡᱚᱛᱚᱱ ᱛᱮ ᱦᱟᱨᱟ ᱵᱩᱨᱩ ᱮᱭᱟᱭ ᱾ ᱡᱟᱶᱟᱭ ᱚᱲᱟᱜ ᱨᱮ ᱛᱤᱨᱞᱟᱹ ᱦᱚᱯᱚᱱ ᱟᱹᱰᱤ ᱫᱤᱞ ᱫᱟᱲᱮ ᱟᱛᱮ ᱢᱤᱫ ᱢᱚᱱᱮᱛᱮ ᱠᱚᱲᱟ ᱦᱚᱯᱚᱱ ᱥᱟᱶᱛᱮ ᱠᱚ ᱠᱟᱹᱢᱤᱭᱟ ᱾ ᱫᱩᱞᱟᱹᱲ ᱫᱟᱲᱮ ᱛᱮ ᱥᱚᱝᱥᱟᱨ ᱠᱚ ᱛᱚᱞ ᱫᱚᱦᱚᱭᱟ ᱾ ᱥᱚᱝᱥᱟᱨ ᱨᱮᱱᱟᱜ ᱥᱟᱱᱟᱢᱟᱜ ᱠᱚ ᱡᱚᱜᱟᱲ ᱡᱚᱛᱚᱱᱟ ᱟᱨ ᱟ.ᱰᱤ ᱠᱚᱥᱴᱚᱠᱚᱨ ᱯᱚᱨᱤᱥᱛᱤᱛᱷᱤ ᱥᱟᱶᱛᱮ ᱠᱚ ᱢᱟᱱᱟᱣ ᱢᱮᱥᱟᱜᱼᱟ ᱾ ᱡᱩᱜᱽ ᱡᱩᱜᱽ ᱠᱷᱚᱱ ᱥᱟᱱᱛᱟᱲ ᱥᱟᱶᱛᱟ ᱨᱮᱱ ᱛᱤᱨᱞᱟᱹ ᱦᱚᱯᱚᱱ ᱚᱲᱟᱜ ᱥᱚᱝᱥᱟᱨ ᱥᱟᱢᱴᱟᱣ ᱠᱟᱛᱮ ᱵᱟᱦᱮᱨ ᱠᱟᱹᱢᱤ ᱠᱚ ᱚᱰᱚᱠᱚᱜᱼᱟ ᱾ ᱠᱚᱲᱟ ᱦᱚᱯᱚᱱ ᱥᱟᱶᱛᱮ ᱮᱱᱛᱮ ᱨᱮᱦᱚᱸ ᱥᱚᱢᱟᱡᱽ ᱥᱚᱝᱥᱟᱨ ᱵᱟᱝ ᱞᱟᱦᱟᱜ ᱞᱟᱹᱜᱤᱫᱚᱜ ᱠᱟᱱᱟ, ᱠᱟᱨᱚᱱ ᱫᱚ ᱢᱤᱫᱴᱟᱹᱝ ᱛᱤᱨᱞᱟᱹ ᱜᱮ ᱱᱟᱯᱟᱭ ᱵᱟᱹᱦᱩ ᱠᱩᱲᱤᱭᱟᱜ, ᱥᱳᱦᱟᱜᱽ ᱫᱩᱞᱟᱹᱲ ᱯᱮᱨᱮᱡ ᱟᱭᱳ ᱟᱨ ᱟ.ᱰᱤ ᱫᱤᱞ ᱫᱟᱲᱮ ᱟᱛᱮ ᱚᱲᱟᱜ ᱟᱨ ᱵᱟᱦᱮᱨ ᱨᱮᱭ ᱠᱟᱹᱢᱤᱭᱟ ᱾ ᱥᱚᱝᱥᱟᱨ ᱵᱟᱜᱟᱣ ᱠᱟᱛᱮ ᱠᱚᱲᱟ ᱦᱚᱯᱚᱱ ᱥᱟᱶᱛᱮ ᱠᱟᱹᱢᱤ ᱚᱰᱚᱠ ᱞᱮᱱᱠᱷᱟᱱ ᱜᱤᱫᱟᱹᱨ ᱯᱤᱫᱟᱹᱨ ᱥᱮᱫ ᱴᱷᱤᱠ ᱥᱟᱹᱦᱤᱸᱡ ᱚᱦᱚᱢ ᱱᱚᱡᱚᱨ ᱠᱮᱭᱟ ᱚᱸᱰᱮ ᱟ.ᱰᱤ ᱢᱟᱨᱟᱝ ᱯᱷᱟᱸᱠᱟ ᱛᱟᱦᱮᱸᱱ ᱠᱟᱱᱟ ᱾ ᱛᱤᱨᱞᱟᱹ ᱫᱚ ᱥᱚᱝᱥᱟᱨ ᱨᱮᱱ ᱫᱩᱠᱷᱚ ᱯᱚᱨᱤᱪᱟᱞᱚᱠ ᱟᱨ ᱱᱮᱛᱟ ᱾
ᱛᱤᱨᱞᱟᱹ ᱦᱚᱯᱚᱱ ᱟᱨ ᱠᱚᱲᱟ ᱦᱚᱯᱚᱱ ᱪᱷᱟᱰᱟ ᱢᱮᱫᱴᱟᱝ ᱱᱟᱯᱟᱭ ᱜᱷᱟᱨᱚᱸᱡᱽ ᱵᱟᱝ ᱵᱮᱱᱟᱣᱜᱼᱟ ᱾ ᱠᱚᱲᱟ ᱦᱚᱯᱚᱱ ᱥᱟᱶᱛᱮ ᱛᱤᱨᱞᱟᱹ ᱠᱚ ᱫᱤᱞ ᱫᱟᱲᱮ ᱟᱛᱮ ᱠᱚ ᱠᱟᱹᱢᱤᱭᱟ ᱢᱮᱫᱴᱟᱝ ᱜᱷᱟᱨᱚᱸᱡᱽ ᱛᱚᱨᱟᱣ ᱨᱟᱠᱟᱵ ᱞᱟᱹᱜᱤᱫ ᱾ ᱠᱚᱲᱟ ᱦᱚᱯᱚᱱᱟᱜ ᱡᱤᱭᱚᱱ ᱠᱷᱟᱸᱰᱟᱣ ᱠᱟᱹᱢᱤᱦᱚᱨᱟ, ᱡᱤᱭᱚᱱ ᱠᱷᱟᱸᱰᱟᱣ ᱞᱟᱹᱜᱤᱫ ᱞᱟᱹᱲᱦᱟᱹᱭ ᱠᱟᱹᱢᱤᱨᱮ ᱫᱤᱞ – ᱫᱟᱲᱮ, ᱥᱟᱦᱟᱥ ᱩᱫᱽᱜᱟᱹᱣ, ᱡᱤᱣᱤ ᱨᱟᱲᱮᱡ ᱡᱚᱛᱚ ᱠᱤᱪᱷᱩᱭ ᱧᱟᱢᱟ ᱟᱡ ᱨᱮᱱ ᱡᱤᱭᱚᱱ ᱜᱟᱛᱮ ᱛᱤᱨᱞᱟᱹ ᱴᱷᱮᱱ ᱠᱷᱚᱱ ᱾ ᱠᱚᱲᱟ ᱦᱚᱯᱚᱱ ᱡᱚᱠᱷᱚᱱ ᱜᱷᱟᱨᱚᱸᱡᱽ ᱪᱟᱞᱟᱣ ᱨᱮᱱ ᱞᱟᱹᱣᱲᱤᱭᱟᱹ ᱠᱟᱱᱟᱭ ᱩᱱᱤ ᱫᱚ ᱟᱡ ᱨᱮᱱ ᱡᱤᱣᱤ ᱡᱩᱨᱤ ᱜᱮ ᱫᱤᱞ – ᱫᱟᱲᱮ ᱡᱚᱜᱟᱣ ᱨᱮ ᱜᱚᱲᱚᱭ ᱮᱢᱟᱭᱟ ᱾
ᱢᱮᱫᱴᱟᱝ ᱵᱟᱹᱦᱩ ᱠᱩᱲᱤ ᱜᱮ ᱜᱷᱟᱨᱚᱸᱡᱽ ᱨᱮᱱ ᱟᱭᱳ ᱠᱟᱱᱟᱭ ᱾ ᱟᱭᱳ ᱦᱚᱲ ᱦᱤᱥᱟᱹᱵᱽ ᱛᱮ ᱢᱮᱫᱴᱟᱝ ᱛᱤᱨᱞᱟᱹ ᱫᱤᱞ ᱫᱩᱞᱟᱹᱲ ᱫᱟᱲᱮ ᱟᱛᱮ ᱡᱤᱣᱤ ᱟᱞᱟᱭ ᱠᱟᱛᱮᱭ ᱠᱟᱹᱢᱤᱭᱟ ᱾ ᱪᱮᱫ ᱠᱚᱥᱴᱚ ᱜᱮ ᱠᱚᱥᱴᱚ ᱢᱮᱱᱛᱮ ᱵᱟᱭ ᱢᱚᱱᱮᱭᱟ ᱾ ᱜᱤᱫᱟᱹᱨ ᱡᱟᱱᱟᱢ ᱠᱷᱚᱱ ᱮᱦᱚᱵ ᱠᱟᱛᱮ ᱡᱚᱛᱷᱟᱛ ᱥᱟᱹᱦᱤᱸᱡ ᱦᱟᱨᱟ ᱵᱩᱨᱩ ᱫᱷᱟᱹᱵᱤᱡ ᱟᱭᱳ ᱦᱚᱲ ᱟ.ᱰᱤ ᱠᱚᱥᱴᱚ ᱥᱟᱦᱟᱣ ᱦᱩᱭᱩᱜ ᱛᱟᱠᱚᱣᱟ ᱡᱟᱦᱟᱸ ᱠᱚᱥᱴᱚ ᱫᱚ ᱫᱷᱟᱹᱨᱛᱤ ᱨᱮᱱᱟᱜ ᱡᱟᱦᱟᱸ ᱛᱤᱱᱟᱹᱜ ᱠᱚᱥᱴᱚ ᱢᱮᱱᱟᱜ ᱟᱠᱟᱫᱼᱟ ᱚᱠᱟᱴᱟᱜ ᱥᱚᱸᱜᱮ ᱦᱚᱸ ᱛᱩᱞᱟᱹ ᱡᱚᱠᱷᱟ ᱵᱟᱝ ᱜᱟᱱᱚᱜᱼᱟ, ᱚᱱᱟ ᱠᱚᱥᱴᱚ ᱫᱚ ᱪᱟ.ᱫᱚ ᱵᱚᱸᱜᱟ ᱜᱮ ᱟᱹᱭᱠᱟᱹᱣ ᱫᱟᱲᱮᱟᱜᱼᱟᱭ ᱾ ᱠᱩᱲᱤ ᱜᱤᱫᱟᱹᱨ ᱦᱩᱭᱩᱜ ᱠᱚᱲᱟ ᱜᱤᱫᱟᱹᱨ ᱦᱩᱭᱩᱜ ᱯᱩᱭᱞᱩ ᱥᱤᱠᱷᱱᱟᱹᱛ ᱫᱚᱭ ᱧᱟᱢᱟ ᱟᱭᱳ ᱴᱷᱮᱱ ᱠᱷᱚᱱ ᱾ ᱚᱱᱟᱛᱮ ᱱᱮᱯᱳᱞᱤᱭᱚᱱ ᱮ ᱢᱮᱱ ᱟᱠᱟᱫᱼᱟ, “ᱥᱮᱪᱮᱫ ᱟᱱ ᱟᱭᱳ ᱮᱢᱟᱹᱧ ᱯᱮ ᱟᱨ ᱚᱱᱟ ᱵᱚᱫᱚᱞ ᱛᱮ ᱟᱯᱮ ᱥᱤᱠᱷᱱᱟᱹᱛ ᱟᱱ ᱥᱮ ᱥᱤᱠᱷᱤᱛᱚ ᱡᱟᱹᱛᱤᱧ ᱮᱢᱟ ᱯᱮᱭᱟ” ᱾ ᱜᱷᱟᱨᱚᱸᱡᱽ ᱨᱮ ᱛᱤᱨᱞᱟᱹ ᱟᱡᱟᱜ ᱜᱷᱟᱨᱚᱸᱡᱽ ᱞᱟᱹᱜᱤᱫ ᱡᱤᱣᱤ ᱟᱞᱟᱭ ᱠᱟᱛᱮ ᱥᱟᱱᱟᱢᱟᱜ ᱩᱡᱟᱹᱲ ᱠᱟᱛᱮ ᱮᱢᱟᱭ ᱟᱨ ᱚᱱᱟ ᱵᱚᱫᱚᱞ ᱛᱮ ᱫᱷᱟᱹᱨᱛᱤ ᱨᱮ ᱪᱮᱫ ᱜᱮ ᱵᱟᱹᱱᱩᱜ ᱟᱱ ᱾ ᱡᱟᱦᱟᱸ ᱞᱮᱠᱟᱱ ᱯᱚᱨᱤᱥᱛᱷᱤᱛᱤ ᱨᱮ ᱛᱤᱨᱞᱟᱹ ᱦᱚᱯᱚᱱ ᱫᱚ ᱜᱷᱟᱨᱚᱸᱡᱽ ᱮ ᱡᱚᱜᱟᱣ ᱛᱟᱭᱟ ᱟᱨ ᱜᱷᱟᱨᱚᱸᱡᱽ ᱨᱮᱱ ᱦᱚᱲ ᱠᱚ ᱞᱟᱦᱟ ᱪᱟᱞᱟᱜ ᱨᱮᱱᱟᱜ ᱩᱫᱽᱜᱟᱹᱣ ᱫᱟᱲᱮ ᱮᱢᱟ ᱠᱚᱣᱟᱭ ᱾ ᱱᱤᱡᱮ ᱵᱟᱝ ᱡᱚᱢ ᱠᱟᱛᱮ ᱜᱷᱟᱨᱚᱸᱡᱽ ᱨᱮᱱ ᱦᱚᱲ ᱮ ᱡᱚᱢ ᱚᱪᱚ ᱠᱚᱣᱟ ᱾ ᱦᱚᱲᱢᱚ ᱡᱤᱣᱤ ᱵᱟᱹᱲᱤᱡ ᱮ ᱟᱹᱭᱠᱟᱹᱣ ᱨᱮᱦᱚᱸ ᱦᱟᱱᱦᱟᱨ ᱦᱚᱧᱦᱟᱨ, ᱡᱟᱶᱟᱭ ᱛᱮᱫ ᱟᱨ ᱜᱤᱫᱟᱹᱨ ᱯᱤᱫᱟᱹᱨ ᱡᱚᱜᱟᱣ ᱡᱚᱛᱚᱱ ᱵᱷᱮᱫᱽ ᱨᱮᱭ ᱸᱛᱟᱦᱮᱸᱱᱟ ᱾
ᱠᱟᱛᱷᱟ ᱨᱮᱠᱚ ᱢᱮᱱᱟ, ᱜᱷᱟᱨᱚᱸᱡᱽ ᱥᱩᱠᱷᱤᱜᱼᱟ ᱛᱤᱨᱞᱟᱹ ᱜᱩᱱᱛᱮ ᱾ ᱛᱤᱨᱞᱟᱹ ᱞᱚᱴᱟ ᱫᱟᱜ ᱛᱮ ᱥᱟᱹᱜᱩᱱ ᱯᱮᱲᱟᱭ ᱫᱟᱨᱟᱢ ᱠᱚᱣᱟ ᱾ ᱜᱤᱫᱟᱹᱨ ᱯᱤᱫᱟᱹᱨ ᱮ ᱦᱟᱨᱟ ᱠᱚᱣᱟ, ᱚᱲᱟᱜ ᱜᱷᱟᱨᱚᱸᱡᱽ ᱨᱮᱱᱟᱜ ᱥᱟᱱᱟᱢᱟᱜ ᱮ ᱧᱮᱞ ᱥᱟᱢᱴᱟᱣ ᱥᱟᱸᱜᱮᱭᱟ ᱾ ᱠᱷᱮᱨᱣᱟᱲ ᱥᱟᱶᱛᱟ ᱨᱮᱫᱚ ᱟᱭᱳ ᱦᱚᱲ ᱵᱟᱵᱟ ᱦᱚᱲ ᱵᱟᱱᱟ ᱦᱚᱲ ᱛᱮ ᱫᱷᱚᱱ ᱠᱤᱱ ᱟᱨᱡᱟᱣᱟ ᱟᱨ ᱚᱱᱟ ᱫᱷᱚᱱ ᱫᱚ ᱛᱤᱨᱞᱟᱹ ᱜᱮ ᱜᱷᱟᱨᱚᱸᱡᱽ ᱨᱮ ᱱᱟᱯᱟᱭ ᱥᱟᱹᱦᱤᱸᱡ ᱮ ᱵᱮᱵᱚᱦᱟᱨᱟ ᱟᱨ ᱮ ᱡᱚᱜᱟᱣ ᱡᱚᱛᱚᱱᱟ ᱾ ᱚᱱᱟᱛᱮ ᱠᱚᱵᱤ ᱱᱚᱡᱚᱨᱩᱞ ᱮ ᱞᱟᱭ ᱟᱠᱟᱫᱼᱟ, ᱵᱤᱥᱷᱮ ᱡᱟᱠᱤᱪᱷᱩ ᱢᱚᱦᱟᱱ ᱥᱤᱨᱤᱥᱴᱤ ᱪᱤᱨᱚ ᱠᱚᱞᱞᱟᱱᱠᱚᱨ, ᱚᱨᱫᱷᱮᱠ ᱛᱟᱨ ᱠᱚᱨᱤᱭᱟᱪᱷᱮ ᱱᱟᱨᱤ, ᱚᱨᱫᱷᱮᱠ ᱛᱟᱨ ᱱᱚᱨᱚ ᱾
***
