ᱥᱟᱱᱛᱟᱲ ᱥᱟᱶᱛᱟ ᱨᱮ ᱠᱩᱲᱤ ᱦᱚᱯᱚᱱᱟᱜ ᱴᱷᱟᱶ ᱫᱚ ᱟᱹᱰᱤ ᱞᱟᱯᱷᱟᱝ ᱨᱮ ᱢᱮᱱᱟᱜᱼᱟ ᱾ ᱠᱩᱲᱤ ᱜᱤᱫᱽᱨᱟᱹᱭ ᱡᱟᱱᱟᱢ ᱞᱮᱱᱠᱷᱟᱱ, ᱮᱴᱟᱜ ᱥᱟᱶᱛᱟ ᱨᱤᱱ ᱦᱚᱲ ᱟᱹᱰᱤ ᱜᱮ ᱫᱩᱠ ᱠᱚ ᱟᱴᱠᱟᱨᱟ, ᱢᱮᱫ ᱫᱟᱜ ᱛᱟᱠᱚ ᱡᱚᱨᱚᱜᱼᱟ, ᱪᱟᱸᱫᱚ ᱵᱚᱸᱜᱟ ᱠᱚ ᱨᱟᱜ ᱦᱚᱢᱚᱨᱟᱭᱟ, ᱮ ᱪᱟᱸᱫᱚ ᱪᱟᱜ ᱤᱧ ᱫᱚ ᱠᱩᱲᱤ ᱜᱤᱫᱽᱨᱟᱹᱢ ᱮᱢᱟᱫᱤᱧᱟ ᱾ ᱥᱟᱱᱛᱟᱲ ᱥᱚᱢᱟᱡᱽ ᱨᱮ ᱠᱩᱲᱤ ᱜᱤᱫᱽᱨᱟᱹᱭ ᱡᱟᱱᱟᱢ ᱞᱮᱱᱠᱷᱟᱱ ᱜᱷᱟᱨᱚᱸᱡᱽ ᱨᱤᱱ ᱦᱚᱲ ᱠᱚ ᱟᱹᱰᱤ ᱜᱮᱠᱚ ᱠᱩᱥᱤᱜᱼᱟ ᱾ ᱞᱩᱠᱷᱤᱭ ᱦᱮᱡ ᱟᱠᱟᱱ, ᱜᱚᱲᱟᱭ ᱯᱮᱨᱮᱡᱟ ᱢᱮᱱ ᱠᱟᱛᱮ ᱠᱟᱸᱥᱟ ᱵᱟᱹᱴᱤ ᱠᱚ ᱨᱩᱭᱟ ᱾ ᱛᱚᱵᱮ ᱩᱱᱤ ᱠᱩᱲᱤ ᱜᱤᱫᱽᱨᱟᱹ ᱜᱮ ᱛᱟᱭᱚᱢ ᱵᱤᱫᱟᱹᱞ ᱛᱮ ᱦᱟᱨᱟ ᱵᱩᱨᱩ ᱠᱟᱛᱮ ᱡᱟᱶᱟᱭ ᱞᱮᱠᱷᱟᱱ ᱥᱚᱢᱟᱡᱽ ᱥᱟᱶᱛᱟ ᱟᱨ ᱚᱲᱟᱜ ᱜᱷᱟᱨᱚᱸᱡᱽ ᱞᱟᱹᱜᱤᱫ ᱟᱺᱜᱤᱵᱷᱟᱨ ᱫᱚ ᱟᱹᱰᱤ ᱦᱟᱢᱟᱞ ᱫᱤᱯᱤᱞ ᱛᱮ ᱦᱩᱭ ᱟᱭᱟ ᱾
ᱡᱟᱶᱟᱭ ᱚᱲᱟᱜ ᱨᱮ ᱠᱩᱲᱤ ᱦᱚᱯᱚᱱᱟᱜ ᱟᱺᱜᱤᱵᱷᱟᱨ ᱫᱚ ᱯᱮ ᱛᱷᱚᱠ ᱨᱮ ᱦᱟᱹᱴᱤᱧ ᱜᱟᱱᱚᱜᱼᱟ ᱾ ᱚᱱᱟ ᱠᱚᱫᱚ ᱦᱩᱭᱩᱜ ᱠᱟᱱᱟ –
᱑ᱹ ᱥᱟᱹᱜᱟᱹᱭ ᱞᱮᱠᱟᱛᱮ ᱟᱺᱜᱤᱵᱷᱟᱨ
᱒ᱹ ᱜᱷᱟᱨᱚᱸᱡᱽ ᱨᱮ ᱥᱩᱞᱩᱠ ᱱᱤᱨᱟᱹᱭ ᱟᱺᱜᱤᱵᱷᱟᱨ
᱓ᱹ ᱥᱚᱢᱟᱡᱽ ᱥᱟᱶᱛᱟ ᱨᱮᱱᱟᱜ ᱟᱺᱜᱤᱵᱷᱟᱨ ᱾
᱑ᱹ ᱥᱟᱹᱜᱟᱹᱭ ᱞᱮᱠᱟᱛᱮ ᱟᱺᱜᱤᱵᱷᱟᱨ ᱺᱼ ᱠᱩᱲᱤ ᱦᱚᱯᱚᱱ ᱡᱟᱶᱟᱭ ᱞᱮᱠᱷᱟᱱ ᱡᱟᱶᱟᱭ ᱚᱲᱟᱜ ᱨᱮᱱᱟᱜ ᱥᱟᱹᱜᱟᱹᱭ ᱞᱮᱠᱟᱛᱮ ᱟᱨ ᱦᱚᱸᱭ ᱛᱚᱞᱚᱜᱼᱟ ᱾ ᱡᱮᱞᱮᱠᱟ ᱡᱟᱶᱟᱭ ᱚᱲᱟᱜ ᱨᱮ ᱩᱱᱤ ᱫᱚ ᱵᱟᱹᱦᱩ, ᱠᱤᱢᱤᱱ, ᱦᱤᱞᱤᱭᱟ ᱟᱨ ᱟᱭᱳ ᱨᱩᱯ ᱛᱮ ᱟᱺᱜᱤᱵᱷᱟᱨ ᱫᱤᱯᱤᱞ ᱛᱮ ᱦᱩᱭ ᱟᱭᱟ ᱾
ᱚ) ᱵᱟᱹᱦᱩ ᱺᱼ ᱡᱟᱶᱟᱭ ᱞᱮᱠᱷᱟᱱ ᱩᱱᱤ ᱫᱚ ᱯᱩᱭᱞᱩ ᱨᱮ ᱵᱟᱹᱦᱩ ᱨᱩᱯ ᱛᱮ ᱚᱲᱟᱜ ᱮ ᱵᱚᱞᱚᱱᱟ ᱾ ᱡᱟᱦᱟᱸᱭᱟᱜ ᱛᱤ ᱥᱟᱵ ᱠᱟᱛᱮ ᱡᱟᱶᱟᱭ ᱚᱲᱟᱜ ᱮ ᱵᱚᱞᱚᱱᱟ, ᱩᱱᱤᱭᱟᱜ ᱥᱟᱱᱟᱢ ᱞᱮᱠᱟᱱᱟᱜ ᱠᱟᱹᱢᱤᱨᱮ ᱜᱚᱲᱚ ᱥᱚᱦᱚᱫ ᱜᱮ ᱡᱚᱛᱚ ᱠᱷᱚᱱ ᱢᱟᱨᱟᱝ ᱟᱺᱜᱤᱵᱷᱟᱨ ᱠᱟᱱᱟ ᱾ ᱠᱩᱲᱤ ᱦᱚᱯᱚᱱᱟᱜ ᱡᱤᱭᱚᱱ ᱫᱚ ᱵᱮᱨᱮᱞ ᱫᱟᱜ ᱞᱮᱠᱟ, ᱡᱮᱢᱚᱱ ᱡᱟᱦᱟᱸ ᱞᱮᱠᱟᱱᱟᱜ ᱡᱤᱱᱤᱥ ᱨᱮ ᱫᱟᱜ ᱮᱢ ᱫᱩᱞᱟ ᱚᱱᱟ ᱨᱮᱱᱟᱜ ᱨᱩᱯ ᱚᱱᱟ ᱞᱮᱠᱟᱭ ᱵᱚᱫᱚᱞᱟ ᱾ ᱡᱮᱢᱚᱱ ᱵᱩᱛᱩᱞ ᱨᱮ ᱠᱷᱟᱱ ᱪᱩᱭᱞᱟᱹᱜ, ᱛᱷᱟᱹᱨᱤ ᱨᱮ ᱠᱷᱟᱱ ᱯᱟᱥᱱᱟᱣᱜᱼᱟ, ᱪᱩᱠᱟᱹᱜ ᱨᱮ ᱠᱷᱟᱱ ᱪᱩᱠᱟᱹᱜ ᱞᱮᱠᱟ ᱛᱟᱨᱥᱮᱜᱼᱟ ᱾ ᱥᱤᱱᱟᱹᱢ ᱚᱱᱠᱟ ᱜᱮ ᱡᱟᱶᱟᱭᱟᱜ ᱠᱩᱲᱤ ᱟᱨ ᱟᱸᱥ ᱞᱮᱠᱟᱛᱮ ᱟᱡᱟᱜ ᱢᱚᱱᱮ ᱟᱪᱟᱨ ᱵᱮᱵᱷᱟᱨ ᱵᱚᱫᱚᱞ ᱛᱮ ᱦᱩᱭᱩᱜᱼᱟ ᱾ ᱛᱚᱵᱮ ᱮᱱᱟᱝ ᱢᱤᱫ ᱥᱩᱞᱩᱠ, ᱱᱤᱨᱟᱹᱭ, ᱱᱟᱯᱟᱭ ᱜᱷᱟᱨᱚᱸᱡᱽ ᱮ ᱵᱮᱱᱟᱣ ᱠᱮᱭᱟ ᱾ ᱟᱡᱤᱡ ᱪᱷᱟᱛᱟ ᱫᱟᱨᱮ ᱜᱮ ᱯᱷᱮᱰᱟᱛ ᱦᱚᱲ ᱠᱟᱱᱟᱭ ᱾ ᱩᱱᱤᱭᱟᱜ ᱞᱟᱦᱟᱱᱛᱤ, ᱩᱱᱤᱭᱟᱜ ᱱᱟᱯᱟᱭ ᱩᱭᱦᱟᱹᱨ ᱟᱨ ᱠᱟᱹᱢᱤ ᱜᱮ ᱠᱩᱲᱤ ᱦᱚᱯᱚᱱᱟᱜ ᱡᱚᱛᱚ ᱠᱷᱚᱱ ᱢᱟᱨᱟᱝ ᱟᱺᱜᱤᱵᱷᱟᱨ ᱫᱚ ᱾ ᱟᱡᱤᱡ ᱪᱷᱟᱛᱟ ᱫᱟᱨᱮᱭᱟᱜ ᱢᱚᱱᱮ ᱢᱚᱥᱨᱟᱜ ᱨᱮ ᱫᱤᱞ ᱵᱷᱚᱨᱥᱟᱭ ᱮᱢᱟᱭᱟ, ᱫᱟᱲᱮ ᱥᱤᱨᱡᱟᱹᱣᱟᱭ, ᱢᱟᱬᱟᱝ ᱥᱮᱫ ᱞᱟᱦᱟᱜ ᱞᱟᱹᱜᱤᱫ ᱢᱤᱫ ᱨᱟᱦᱟ ᱩᱱᱤ ᱥᱟᱶ ᱨᱮᱭ ᱛᱟᱦᱮᱸ ᱠᱚᱜᱼᱟ ᱩᱱᱤᱭᱟᱜ ᱩᱢᱩᱞ ᱛᱟᱱᱟᱜ ᱞᱮᱠᱟ ᱾ ᱩᱱᱤᱭᱟᱜ ᱥᱩᱠ ᱨᱮ ᱟᱡ ᱮ ᱞᱟᱸᱫᱟᱭᱟ, ᱩᱱᱤᱭᱟᱜ ᱫᱩᱠ ᱨᱮ ᱫᱤᱞ ᱵᱷᱚᱨᱥᱟᱭ ᱮᱢᱟᱭᱟ, ᱚᱱᱟ ᱜᱮᱛᱚ ᱡᱤᱣᱤ ᱡᱩᱨᱤ ᱥᱟᱶ ᱨᱮᱱᱟᱜ ᱢᱟᱨᱟᱝ ᱟᱺᱜᱤᱵᱷᱟᱨ ᱫᱚ ᱾ ᱠᱟᱛᱷᱟ ᱨᱮ ᱢᱮᱱᱟᱜᱼᱟ – ᱠᱚᱲᱟ ᱦᱚᱯᱚᱱᱟᱜ ᱥᱟᱱᱟᱢ ᱞᱟᱦᱟᱱᱛᱤ ᱛᱟᱭᱚᱢ ᱨᱮ ᱢᱤᱫ ᱠᱩᱲᱤ ᱦᱚᱯᱚᱱᱟᱜ ᱜᱚᱲᱚ ᱛᱟᱦᱮᱸ ᱠᱚᱜᱼᱟ ᱾ ᱢᱤᱫ ᱠᱟᱛᱷᱟ ᱛᱮ ᱢᱮᱱ ᱜᱟᱱᱚᱜᱼᱟ, ᱟᱡᱤᱡ ᱡᱤᱣᱤ ᱡᱩᱨᱤ, ᱟᱡᱤᱡ ᱪᱷᱟᱛᱟ ᱫᱟᱨᱮ, ᱟᱡᱤᱡ ᱡᱤᱭᱚᱱ ᱨᱟᱡᱟ ᱞᱟᱹᱜᱤᱫ ᱠᱩᱲᱤ ᱦᱚᱯᱚᱱ ᱫᱚ ᱡᱤᱣᱤ ᱟᱞᱟᱭ ᱠᱟᱜ ᱛᱟᱭᱟᱭ ᱾ ᱥᱟᱱᱟᱢ ᱞᱮᱠᱟᱱᱟᱜ ᱜᱚᱲᱚ ᱠᱚᱲᱟ ᱵᱟᱹᱲᱤᱡ ᱦᱚᱨ ᱛᱮᱭ ᱛᱟᱲᱟᱢ ᱞᱮᱠᱷᱟᱱ ᱟᱭᱳ, ᱵᱟᱵᱟ, ᱵᱚᱭᱦᱟ ᱵᱩᱦᱤᱱ, ᱟᱹᱛᱩ ᱴᱚᱞᱟ ᱦᱚᱲ ᱥᱟᱶ ᱮᱯᱮᱨ ᱦᱮᱸᱰᱮᱨ ᱞᱮᱱ ᱨᱮ ᱵᱩᱜᱤ ᱦᱚᱨ ᱛᱮ ᱥᱩᱛᱩᱜ ᱟᱹᱜᱩ ᱦᱚᱸ ᱠᱩᱲᱤ ᱦᱚᱯᱚᱱᱟᱜ ᱜᱮ ᱟᱺᱜᱤᱵᱷᱟᱨ ᱠᱟᱱᱟ ᱾
ᱟ) ᱠᱤᱢᱤᱱ ᱨᱩᱯ ᱛᱮ ᱺᱼ ᱡᱟᱶᱟᱭ ᱚᱲᱟᱜ ᱨᱮ ᱠᱩᱲᱤ ᱦᱚᱯᱚᱱ ᱫᱚ ᱠᱤᱢᱤᱱ ᱨᱩᱯ ᱛᱮ ᱟᱡᱟᱜ ᱟᱭᱢᱟ ᱟᱺᱜᱤᱵᱷᱟᱨ ᱢᱮᱱᱟᱜ ᱛᱟᱭᱟ ᱾ ᱡᱟᱱᱟᱢ ᱟᱭᱳ ᱟᱨ ᱦᱟᱱᱦᱟᱨ ᱟᱭᱳ ᱨᱮ ᱟᱹᱰᱤ ᱜᱮ ᱛᱚᱯᱷᱟᱛ, ᱡᱟᱱᱟᱢ ᱚᱲᱟᱜ ᱨᱮ ᱠᱩᱲᱤ ᱦᱚᱯᱚᱱ ᱟᱭᱳ ᱵᱟᱵᱟ ᱫᱮᱵᱟ ᱥᱮᱵᱟᱨᱮ ᱱᱟᱥᱮ ᱦᱚᱸᱭ ᱰᱷᱤᱞᱟᱹᱣ ᱨᱮ ᱚᱠᱟ ᱦᱚᱸ ᱵᱟᱹᱲᱤᱡ ᱵᱟᱝ ᱦᱩᱭᱩᱜᱼᱟ ᱾ ᱛᱚᱵᱮ ᱡᱟᱶᱟᱭ ᱚᱲᱟᱜ ᱨᱮ ᱦᱟᱱᱦᱟᱨ ᱟᱭᱳ ᱦᱚᱧᱦᱟᱨ ᱵᱟᱵᱟ ᱫᱮᱵᱟ ᱥᱮᱵᱟᱨᱮ ᱱᱟᱥᱮ ᱰᱷᱤᱞᱟᱹᱣ ᱞᱮᱠᱷᱟᱱ ᱟᱹᱰᱤ ᱢᱟᱨᱟᱝ ᱜᱩᱱᱦᱟᱹ ᱠᱟᱱᱟ ᱾ ᱟᱭᱳ ᱵᱟᱵᱟ ᱫᱚ ᱥᱟᱹᱭᱠᱟᱹᱛ ᱵᱚᱸᱜᱟ ᱠᱟᱱᱟ ᱠᱚ ᱾ ᱩᱱᱠᱤᱱ ᱫᱚ ᱡᱟᱱᱟᱢ ᱟᱭᱳ ᱵᱟᱵᱟ ᱟᱨ ᱵᱟᱝ ᱦᱟᱱᱦᱟᱨ ᱦᱚᱧᱦᱟᱨ ᱟᱭᱳ ᱵᱟᱵᱟ ᱜᱮ ᱠᱤᱱ ᱦᱩᱭᱩᱜ, ᱟᱹᱠᱤᱱ ᱫᱮᱵᱟ ᱥᱮᱵᱟ ᱫᱚ ᱵᱚᱸᱜᱟ ᱵᱳᱨᱳ ᱫᱮᱵᱟ ᱥᱮᱵᱟ ᱥᱟᱶ ᱥᱚᱢᱟᱱᱟ ᱾ ᱚᱱᱟ ᱩᱭᱦᱟᱹᱨ ᱠᱟᱛᱮ ᱠᱩᱲᱤ ᱦᱚᱯᱚᱱ ᱡᱟᱶᱟᱭ ᱚᱲᱟᱜ ᱨᱮ, ᱫᱮᱵᱟ ᱥᱮᱵᱟ ᱞᱮᱠᱚ ᱮᱱᱟᱝ ᱥᱩᱞᱩᱠ ᱥᱚᱝᱥᱟᱨ ᱥᱮᱯᱮᱧ ᱨᱟᱠᱟᱵ ᱫᱟᱲᱮᱭᱟᱜ ᱟᱭ ᱾ ᱦᱟᱱᱦᱟᱨ ᱟᱭᱳ ᱠᱤᱢᱤᱱᱟᱜ ᱡᱚᱜᱛᱚᱱ ᱨᱟᱱ ᱢᱩᱨᱜᱟᱹᱱ ᱨᱮ ᱩᱱᱠᱤᱱ ᱥᱟᱶ ᱛᱟᱦᱮᱸᱱ ᱦᱟᱲᱟᱢ ᱫᱩᱲᱩᱢ ᱨᱮ ᱩᱱᱠᱤᱱ ᱥᱟᱶᱨᱮ ᱛᱟᱦᱮᱸᱱ ᱠᱩᱲᱤ ᱦᱚᱯᱚᱱᱟᱜ ᱜᱮ ᱟᱺᱜᱤᱵᱷᱟᱨ ᱠᱟᱱᱟ ᱾
ᱠᱟᱛᱷᱟ ᱨᱮ ᱢᱮᱱᱟᱜᱼᱟ –
“ᱵᱚᱸᱜᱟ ᱵᱳᱨᱳᱢ ᱥᱮᱵᱟᱭᱮ ᱨᱮ
ᱛᱷᱩᱢ ᱫᱚ ᱛᱤᱥ ᱪᱚᱝ ᱧᱟᱢᱚᱜ
ᱟᱭᱳ ᱵᱟᱵᱟᱢ ᱥᱮᱵᱟᱭᱮ ᱨᱮ
ᱛᱷᱩᱢ ᱫᱚ ᱥᱚᱸᱜᱮ ᱜᱮ ᱧᱟᱢᱚᱜ ᱾”
ᱤ) ᱵᱟᱦᱟ ᱦᱚᱧᱦᱟᱨ ᱺᱼ ᱡᱟᱶᱟᱭ ᱚᱲᱟᱜ ᱨᱮᱱᱟᱜ ᱡᱚᱛᱚ ᱠᱷᱚᱱ ᱦᱟᱢᱟᱞ ᱥᱟᱹᱜᱟᱹᱭ ᱫᱚ ᱵᱟᱦᱟ ᱦᱚᱧᱦᱟᱨ ᱟᱨᱵᱟᱝ ᱦᱚᱧᱦᱟᱨ ᱾ ᱡᱟᱶᱟᱭ ᱨᱤᱱ ᱫᱟᱫᱟ ᱛᱮᱠᱚ ᱦᱚᱧᱦᱟᱨ ᱠᱚ ᱢᱮᱛᱟ ᱠᱚᱣᱟ ᱾ ᱵᱟᱦᱟ ᱦᱚᱧᱦᱟᱨ ᱢᱟᱱᱟᱣ ᱵᱟᱛᱟᱣ ᱞᱟᱹᱜᱤᱫ ᱛᱮ ᱟᱺᱜᱤᱵᱷᱟᱨ ᱛᱟᱦᱮᱸᱱᱟ ᱾ ᱦᱚᱧᱦᱟᱨ ᱟᱠᱟᱫᱮ ᱦᱚᱲᱟᱜ ᱞᱩᱜᱽᱲᱤ ᱞᱟᱯᱚ ᱛᱟᱠᱚ, ᱵᱤᱪᱷᱱᱟᱹ ᱮᱢᱟᱱ ᱱᱚᱝᱠᱟ ᱠᱤ ᱟᱡ ᱵᱮᱵᱷᱟᱨ ᱡᱤᱱᱤᱥ ᱠᱚ ᱵᱟᱝ ᱠᱚ ᱥᱟᱵᱟ ᱾ ᱦᱚᱧᱦᱟᱨ ᱠᱷᱚᱱ ᱞᱮᱛᱟᱲ ᱜᱮ ᱥᱟᱦᱟ ᱨᱮ ᱛᱟᱦᱮᱸᱱ ᱦᱩᱭᱩᱜᱼᱟ ᱾ ᱩᱱᱤ ᱥᱟᱶ ᱡᱚᱯᱚᱴᱮᱫ ᱫᱚ ᱥᱚᱢᱟᱡᱽ ᱥᱟᱶᱛᱟᱨᱮ ᱜᱩᱱᱦᱟᱹ ᱠᱟᱱᱟ ᱾ ᱩᱱᱤ ᱥᱟᱶ ᱨᱚᱯᱚᱲ ᱦᱚᱸ ᱟᱹᱰᱤ ᱞᱮᱠᱷᱟ ᱡᱚᱠᱷᱟ ᱜᱮ ᱛᱟᱦᱮᱸ ᱠᱚᱜᱼᱟ ᱾ ᱩᱱᱤ ᱚᱲᱟᱜ ᱨᱮᱭ ᱛᱟᱦᱮᱸ ᱞᱮᱱᱠᱷᱟᱱ ᱩᱵ ᱟᱲᱟᱜ ᱠᱟᱛᱮ ᱵᱟᱹᱦᱩ ᱠᱩᱲᱤᱭᱟᱜ ᱫᱟᱬᱟᱱ ᱮᱠᱟᱞ ᱢᱟᱱᱟ ᱜᱮᱭᱟ ᱾ ᱠᱩᱲᱤ ᱦᱚᱯᱚᱱ ᱡᱟᱶᱟᱭ ᱚᱲᱟᱜ ᱨᱮ ᱱᱚᱶᱟ ᱟᱺᱜᱤᱵᱷᱟᱨ ᱟᱹᱰᱤ ᱱᱟᱯᱟᱭ ᱛᱮ ᱢᱟᱱᱟᱣ ᱵᱟᱛᱟᱣ ᱦᱩᱭᱩᱜ ᱛᱟᱭᱟ ᱾ ᱢᱟᱱᱟᱣ ᱵᱟᱛᱟᱣ ᱜᱮ ᱥᱚᱝᱥᱟᱨ ᱫᱚᱭ ᱥᱚᱨᱮᱥᱟ ᱾
ᱩ) ᱤᱨᱤᱞ ᱠᱚᱲᱟ ᱠᱩᱲᱤ ᱺᱼ ᱡᱟᱶᱟᱭ ᱚᱲᱟᱜ ᱨᱮᱱᱟᱜ ᱡᱚᱛᱚ ᱠᱷᱚᱱ ᱦᱮᱲᱮᱢ ᱥᱟᱹᱜᱟᱹᱭ ᱫᱚ ᱦᱤᱞᱤᱭᱟ ᱾ ᱱᱩᱠᱩ ᱥᱟᱶ ᱜᱟᱯᱟᱞ ᱢᱟᱨᱟᱣ ᱫᱚ ᱟᱹᱰᱤ ᱜᱟᱵᱮᱭᱟᱱᱟ ᱾ ᱦᱤᱞᱤ ᱴᱷᱮᱱ ᱫᱚ ᱡᱚᱛᱚ ᱦᱚᱲ ᱵᱷᱤᱛᱨᱤ ᱵᱟᱦᱨᱮ ᱠᱟᱛᱷᱟ ᱠᱚ ᱨᱚᱲ ᱥᱚᱫᱚᱨᱟ ᱾ ᱜᱟᱱᱚᱜ ᱵᱟᱝ ᱜᱟᱱᱚᱜ ᱱᱚᱶᱟ ᱥᱟᱹᱜᱟᱹᱭ ᱨᱮᱫᱚ ᱡᱚᱛᱚ ᱜᱮ ᱱᱟᱯᱟᱭ ᱛᱟᱦᱮᱸᱱᱟ ᱾ ᱤᱨᱤᱞ ᱠᱩᱲᱤ, ᱤᱨᱤᱞ ᱠᱚᱲᱟ ᱡᱟᱦᱟᱸ ᱠᱟᱛᱷᱟ ᱟᱭᱳ ᱵᱟᱵᱟ, ᱵᱚᱭᱦᱟ ᱢᱤᱥᱨᱟ ᱴᱷᱮᱱ ᱵᱟᱠᱚ ᱞᱟᱹᱭ ᱫᱟᱲᱮᱭᱟᱜᱼᱟ ᱚᱱᱟ ᱠᱟᱛᱷᱟ ᱦᱤᱞᱤ ᱴᱷᱮᱱ ᱠᱚ ᱞᱟᱹᱭ ᱯᱷᱚᱴᱮᱞ ᱫᱟᱲᱮᱭᱟᱜᱼᱟ ᱾ ᱚᱱᱟ ᱠᱟᱛᱷᱟ ᱠᱚ ᱨᱮᱵᱮᱫ ᱫᱚᱦᱚ ᱠᱟᱛᱮ ᱜᱷᱟᱨᱚᱸᱡᱽ ᱨᱮᱱᱟᱜ ᱚᱠᱟ ᱵᱷᱟᱹᱞᱟᱹᱭ ᱦᱩᱭᱩᱜᱼᱟ ᱚᱱᱟ ᱛᱟᱲ ᱯᱚᱨᱛᱟᱲ ᱠᱟᱛᱮ ᱜᱷᱟᱨᱚᱸᱡᱽ ᱨᱤᱱ ᱢᱟᱨᱟᱝ ᱦᱚᱲ ᱴᱷᱮᱱ ᱥᱚᱫᱚᱨ ᱦᱚᱸ ᱠᱩᱲᱤ ᱦᱚᱯᱚᱱᱟᱜ ᱢᱟᱨᱟᱝ ᱟᱺᱜᱤᱵᱷᱟᱨ ᱠᱟᱱᱟ ᱾
ᱮ) ᱟᱭᱳ ᱞᱮᱠᱟᱛᱮ ᱺᱼ ᱢᱟᱹᱱᱢᱤ ᱥᱚᱢᱟᱡᱽ ᱨᱮ ᱟᱭᱳ ᱫᱚ ᱟᱹᱰᱤ ᱫᱩᱞᱟᱹᱲ, ᱢᱚᱡᱽ ᱟᱨ ᱥᱩᱨ ᱥᱟᱹᱜᱟᱹᱭ ᱠᱟᱱᱟ ᱾ ᱠᱩᱥᱤ ᱨᱮ ᱨᱟᱹᱥᱠᱟᱹ ᱨᱮ, ᱫᱩᱠ ᱨᱮ ᱵᱤᱯᱚᱫᱽ ᱨᱮ ᱟᱭᱳ ᱫᱚᱭ ᱩᱭᱦᱟᱹᱨᱚᱜᱼᱟ ᱾ ᱟᱭᱳ ᱥᱩᱨ ᱨᱮᱭ ᱛᱟᱦᱮᱸᱱ ᱵᱟᱭ ᱛᱟᱦᱮᱸᱱ ᱟᱭᱳ ᱟᱦᱞᱟ ᱫᱚ ᱦᱚᱱ ᱦᱚᱯᱚᱱ ᱴᱷᱮᱱ ᱞᱮᱛᱟᱲ ᱜᱮ ᱡᱟᱯᱟᱜ ᱠᱚᱜᱼᱟ ᱾ ᱟᱭᱳ ᱠᱩᱠᱷᱤ ᱨᱮ ᱟᱨᱮ ᱪᱟᱸᱫᱚ ᱛᱟᱦᱮᱸ ᱠᱟᱛᱮ ᱡᱟᱦᱟᱸᱭ ᱜᱤᱫᱽᱨᱟᱹ ᱫᱷᱟᱹᱨᱛᱤ ᱫᱷᱩᱲᱤ ᱞᱮᱵᱮᱫ ᱠᱟᱜᱼᱟᱭ ᱫᱷᱟᱹᱨᱛᱤ ᱨᱮᱱᱟᱜ ᱢᱟᱨᱥᱟᱞ ᱮ ᱧᱮᱞ ᱠᱟᱜᱼᱟ, ᱫᱷᱟᱹᱨᱛᱤ ᱨᱮᱱᱟᱜ ᱥᱩᱞᱩᱠ, ᱦᱤᱥᱤᱫ ᱦᱚᱭ ᱮ ᱟᱹᱭᱠᱟᱹᱣ ᱠᱟᱜᱼᱟ, ᱩᱱᱤ ᱪᱤᱠᱟᱛᱮᱭ ᱦᱤᱲᱤᱧᱟ ᱟᱭᱳ ᱟᱦᱞᱟ ᱾ ᱛᱚᱵᱮ ᱟᱭᱳ ᱢᱮᱫ ᱛᱮ ᱧᱮᱞ ᱞᱮᱠᱷᱟᱱ ᱜᱤᱫᱟᱹᱨ ᱯᱤᱫᱟᱹᱨ ᱞᱟᱹᱜᱤᱫ ᱛᱤᱱᱟᱹᱜ ᱟᱺᱜᱤᱵᱷᱟᱨ ᱟᱡᱟᱜ ᱜᱮ ᱾ ᱟᱡᱟᱜ ᱵᱮᱨᱮᱞ ᱦᱚᱲᱢᱚ ᱨᱮ ᱟᱨᱮ ᱪᱟᱸᱫᱚ ᱜᱟᱲᱦᱟᱣ ᱠᱟᱛᱮ ᱡᱟᱱᱟᱢ ᱮᱱᱟᱭ ᱜᱤᱫᱽᱨᱟᱹ ᱾ ᱡᱟᱱᱟᱢ ᱠᱟᱛᱮ ᱦᱟᱨᱟ ᱵᱩᱨᱩᱭᱮ ᱟᱨ ᱦᱟᱨᱟ ᱵᱩᱨᱩ ᱠᱟᱛᱮ ᱥᱟᱶᱛᱟ ᱨᱮ ᱛᱤᱸᱜᱩ ᱠᱮᱴᱮᱡ ᱜᱮ ᱟᱭᱳᱣᱟᱜ ᱢᱟᱨᱟᱝ ᱟᱺᱜᱤᱵᱷᱟᱨ ᱫᱚ ᱾
ᱵᱟᱵᱟ ᱫᱚᱭ ᱠᱟᱹᱢᱤᱭᱟ ᱚᱲᱟᱜ ᱞᱟᱹᱜᱤᱫ ᱡᱚᱢᱮ ᱟᱹᱜᱩᱭᱟ ᱾ ᱟᱭᱳ ᱫᱚ ᱚᱲᱟᱜ ᱨᱮ ᱛᱟᱦᱮᱸ ᱠᱟᱛᱮ ᱜᱤᱫᱽᱨᱟᱹ ᱯᱤᱫᱽᱨᱟᱹᱭ ᱧᱮᱞ ᱠᱚᱣᱟ ᱟᱨᱵᱟᱝ ᱱᱟᱞᱦᱟ ᱠᱟᱹᱢᱤ ᱥᱮᱱᱚᱜ ᱨᱮᱦᱚᱸᱭ ᱜᱤᱫᱽᱨᱟᱹ ᱧᱮᱞ ᱫᱚ ᱵᱟᱹᱲᱛᱤ ᱠᱟᱛᱮ ᱟᱡᱟᱜ ᱜᱮ ᱟᱺᱜᱤᱵᱷᱟᱨ ᱛᱟᱦᱮᱸᱱ ᱛᱟᱭᱟ ᱾
ᱠᱟᱛᱷᱟ ᱨᱮ ᱢᱮᱱᱟᱜᱼᱟ ᱺᱼ
“ᱞᱚᱥᱚᱫ ᱦᱟᱥᱟ ᱛᱮᱜᱮ ᱴᱩᱠᱩᱡ ᱫᱚ ᱵᱮᱱᱟᱣᱜ
ᱨᱟᱯᱟᱜ ᱦᱟᱥᱟ ᱛᱮᱫᱚ ᱵᱟᱝ
ᱜᱤᱫᱽᱨᱟᱹ ᱡᱷᱚᱜ ᱜᱮ ᱥᱤᱠᱷᱟᱹᱣ ᱫᱚ ᱜᱟᱱᱚᱜ
ᱦᱟᱲᱟᱢ ᱠᱟᱛᱮ ᱫᱚ ᱵᱟᱝ ᱾”
ᱟᱭᱳ, ᱜᱤᱫᱽᱨᱟᱹ ᱚᱠᱛᱚ ᱨᱮᱜᱮ ᱱᱟᱯᱟᱭ ᱱᱟᱯᱟᱭ ᱠᱟᱛᱷᱟ ᱠᱟᱹᱦᱱᱤ, ᱥᱚᱢᱟᱡᱽ ᱥᱟᱶᱛᱟ ᱠᱟᱛᱷᱟ ᱢᱟᱨᱟᱝ ᱦᱚᱲ ᱠᱚ ᱢᱟᱹᱱ ᱮᱢᱚᱜ, ᱥᱟᱱᱟᱢ ᱦᱚᱲ ᱥᱟᱶ ᱚᱠᱟ ᱞᱮᱠᱟᱭ ᱠᱟᱛᱷᱟᱜᱼᱟ, ᱚᱞᱚᱜ ᱯᱚᱲᱦᱚᱱ ᱨᱮ ᱢᱚᱱᱮ ᱮᱢ ᱮᱢᱟᱱ ᱠᱟᱛᱷᱟ ᱠᱚᱭ ᱥᱤᱠᱷᱟᱹᱣ ᱯᱟᱲᱦᱟᱣᱮᱭᱟ ᱾ ᱟᱜᱟᱢ ᱫᱤᱱ ᱨᱮ ᱪᱮᱫ ᱞᱮᱠᱟᱭ ᱵᱮᱱᱟᱣᱜᱼᱟ ᱚᱱᱟ ᱫᱚ ᱟᱭᱳ ᱠᱷᱚᱱ ᱜᱮ ᱮᱛᱚᱦᱚᱵᱚᱜᱼᱟ ᱾ ᱚᱱᱟᱛᱮ ᱜᱤᱫᱽᱨᱟᱹ ᱥᱟᱶᱨᱮ ᱟᱭᱳ ᱛᱟᱦᱮᱸ ᱠᱟᱛᱮ ᱩᱱᱠᱩ ᱡᱩᱛ ᱥᱟᱹᱦᱤᱸᱡ ᱦᱟᱨᱟ ᱵᱩᱨᱩ ᱜᱮ ᱟᱭᱳᱣᱟᱜ ᱢᱟᱨᱟᱝ ᱟᱺᱜᱤᱵᱷᱟᱨ ᱠᱟᱱᱟ ᱾
ᱳ) ᱮᱢᱟᱱ ᱛᱮᱭᱟᱜ ᱺᱼ ᱱᱚᱶᱟ ᱥᱟᱹᱜᱟᱹᱭ ᱠᱚ ᱵᱷᱮᱜᱮᱫ ᱟᱨ ᱦᱚᱸ ᱟᱹᱰᱤ ᱜᱚᱴᱟᱝ ᱥᱟᱹᱜᱟᱹᱭ ᱢᱮᱱᱟᱜᱼᱟ ᱾ ᱡᱚᱛᱚ ᱞᱮᱠᱟᱱ ᱥᱟᱹᱜᱟᱹᱭ ᱥᱟᱶ ᱵᱷᱮᱜᱟᱨ ᱵᱷᱮᱜᱟᱨ ᱵᱮᱵᱷᱟᱨ ᱢᱮᱱᱟᱜᱼᱟ ᱱᱚᱶᱟ ᱠᱚ ᱠᱩᱲᱤ ᱦᱚᱯᱚᱱ ᱪᱮᱫᱚᱜ ᱛᱮ ᱦᱩᱭᱩᱜᱼᱟ, ᱯᱮᱲᱟ ᱠᱚᱠᱚ ᱦᱮᱡ ᱞᱮᱱᱠᱷᱟᱱ ᱞᱟᱦᱟᱛᱮ ᱞᱚᱴᱟ ᱫᱟᱜ ᱫᱚᱲᱚᱢ ᱠᱟᱛᱮ ᱡᱚᱦᱟᱨ ᱦᱩᱭᱩᱜᱼᱟ ᱾ ᱥᱟᱹᱜᱟᱹᱭ ᱚᱝᱥᱟᱨ ᱜᱚᱰ ᱡᱚᱦᱟᱨ ᱪᱮᱫᱚᱜ ᱛᱮ ᱦᱩᱭᱩᱜᱼᱟ ᱾ ᱟᱨ ᱯᱮᱲᱟ ᱵᱮᱵᱷᱟᱨ ᱦᱚᱸ ᱪᱮᱫᱚᱜ ᱛᱮ ᱦᱩᱭᱩᱜᱼᱟ ᱾ ᱛᱚᱵᱮ ᱮᱱᱟᱜ ᱯᱮᱲᱟ ᱢᱟᱹᱱ ᱠᱚ ᱧᱟᱢᱟ ᱟᱨ ᱯᱮᱲᱟ ᱢᱟᱹᱱ ᱠᱚ ᱧᱟᱢ ᱞᱮ ᱮᱱᱟᱝ ᱦᱤᱨᱤ ᱠᱚ ᱦᱤᱡᱩᱜᱼᱟ ᱵᱩᱜᱤ ᱵᱟᱹᱲᱤᱡ ᱨᱮ ᱜᱚᱲᱚ ᱠᱚ ᱮᱢᱚᱜᱼᱟ ᱾
᱒ᱹ ᱜᱷᱟᱨᱚᱸᱡᱽ ᱨᱮ ᱥᱩᱞᱩᱠ ᱱᱤᱨᱟᱹᱭ ᱟᱺᱜᱤᱵᱷᱟᱨ – ᱠᱩᱲᱤ ᱦᱚᱯᱚᱱ ᱵᱟᱹᱦᱩ ᱨᱩᱯ ᱛᱮ ᱡᱟᱶᱟᱭ ᱚᱲᱟᱜ ᱨᱮᱭ ᱵᱚᱞᱚ ᱞᱮᱱ ᱠᱷᱟᱱ ᱵᱟᱹᱭ ᱵᱟᱹᱭ ᱛᱮ ᱚᱱᱟ ᱚᱲᱟᱜ ᱨᱮᱱᱟᱜ ᱠᱟᱹᱢᱤᱦᱚᱨᱟ ᱨᱮ ᱟᱺᱜᱤᱵᱷᱟᱨ ᱦᱟᱛᱟᱣ ᱛᱮ ᱦᱩᱭᱩᱜᱼᱟ ᱾ ᱜᱷᱟᱨᱚᱸᱡᱽ ᱨᱮᱱᱟᱜ ᱡᱚᱢ ᱧᱩᱣᱟᱱ ᱮᱢᱟᱱ ᱟᱨ ᱠᱷᱚᱨᱚᱪ ᱵᱚᱨᱚᱪ ᱵᱩᱡᱷᱟᱹᱣ ᱛᱮ ᱦᱩᱭᱟᱭᱟ ᱾ ᱡᱟᱦᱟᱸᱭ ᱵᱟᱹᱦᱩ ᱠᱩᱲᱤ ᱠᱚ ᱚᱲᱟᱜ ᱨᱮᱜᱮ ᱠᱚ ᱛᱟᱦᱮᱸ ᱠᱚᱜᱼᱟ ᱩᱱᱠᱩ ᱫᱚ ᱚᱲᱟᱜ ᱨᱮᱱᱟᱜ ᱡᱚᱜ ᱨᱟᱪᱟ, ᱤᱥᱤᱱ ᱵᱟᱥᱟᱝ ᱠᱟᱛᱮ ᱯᱮᱲᱟ ᱵᱮᱵᱷᱟᱨ ᱠᱚ ᱛᱚᱨᱟᱣ ᱦᱩᱭᱩᱜᱼᱟ ᱾ ᱚᱱᱠᱟ ᱜᱮ ᱡᱟᱦᱟᱸᱭ ᱵᱟᱹᱦᱩ ᱠᱩᱲᱤ ᱠᱚ ᱱᱟᱞᱦᱟ ᱠᱚ ᱪᱟᱞᱟᱜᱼᱟ ᱪᱟᱹᱠᱨᱤ ᱱᱩᱠᱨᱤ ᱨᱮᱠᱚ ᱥᱟᱶ ᱠᱚᱜᱼᱟ, ᱩᱱᱠᱩ ᱠᱚᱣᱟᱜ ᱜᱷᱟᱨᱚᱸᱡᱽ ᱨᱮᱱᱟᱜ ᱟᱺᱜᱤᱵᱷᱟᱨ ᱫᱚ ᱵᱟᱹᱲᱛᱤ ᱛᱟᱦᱮᱸᱱ ᱛᱟᱠᱚᱣᱟ ᱾ ᱚᱲᱟᱜ ᱨᱮᱱᱟᱜ ᱡᱚᱜ ᱨᱟᱪᱟ, ᱫᱟᱠᱟ ᱩᱛᱩ ᱵᱮᱱᱟᱜ ᱠᱟᱛᱮ ᱜᱤᱫᱽᱨᱟᱹ ᱯᱤᱫᱽᱨᱟᱹ ᱠᱚ ᱡᱚᱢ ᱚᱪᱚ ᱠᱟᱛᱮ ᱚᱞᱚᱜ ᱯᱚᱲᱦᱚᱱ ᱞᱟᱹᱜᱤᱫ ᱥᱚᱡᱽ ᱥᱟᱯᱲᱟᱣ ᱚᱪᱚ ᱠᱟᱛᱮ ᱟᱡᱟᱜ ᱫᱤᱱᱟᱹᱢ ᱠᱟᱹᱢᱤ ᱴᱷᱟᱶ ᱛᱮ ᱥᱮᱴᱮᱨᱚᱜ ᱛᱮ ᱦᱩᱭᱩᱜᱼᱟ ᱾ ᱢᱮᱱ ᱜᱟᱱᱚᱜᱼᱟ ᱵᱟᱹᱦᱩ ᱠᱩᱲᱤ ᱡᱟᱶᱟᱭ ᱚᱲᱟᱜ ᱨᱮ ᱢᱤᱫ ᱢᱮᱱᱮᱡᱚᱨ ᱞᱮᱠᱟ ᱛᱮ ᱟᱺᱜᱤᱵᱷᱟᱨ ᱦᱟᱛᱟᱣ ᱛᱮ ᱦᱩᱭᱩᱜᱼᱟ ᱾
᱓ᱹ ᱥᱚᱢᱟᱡᱽ ᱥᱟᱶᱛᱟ ᱞᱟᱹᱜᱤᱫ ᱟᱺᱜᱤᱵᱷᱟᱨ – ᱜᱷᱟᱨᱚᱸᱡᱽ ᱞᱟᱦᱟᱱᱛᱤᱨᱮ ᱥᱚᱢᱟᱡᱽ ᱥᱟᱶᱛᱟ ᱦᱟᱜ ᱟᱹᱰᱤ ᱢᱟᱨᱟᱝ ᱟᱺᱜᱤᱵᱷᱟᱨ ᱛᱟᱦᱮᱸᱱᱟ ᱾ ᱡᱟᱦᱟᱸ ᱥᱚᱢᱟᱡᱽ ᱡᱟᱦᱟᱸ ᱛᱤᱱᱟᱹᱜ ᱥᱚᱨᱮᱥᱟ, ᱚᱱᱟ ᱥᱚᱢᱟᱡᱽ ᱨᱤᱱ ᱦᱚᱲ ᱠᱚ ᱩᱱᱟᱹᱜ ᱱᱟᱯᱟᱭ ᱠᱚ ᱛᱟᱦᱮᱸ ᱠᱮᱭᱟ ᱾ ᱚᱱᱟᱛᱮ ᱥᱚᱢᱟᱡᱽ ᱥᱟᱶᱛᱟ ᱞᱟᱦᱟᱱᱛᱤ ᱞᱟᱹᱜᱤᱫ ᱫᱚ ᱠᱩᱲᱤ ᱞᱟᱹᱭ ᱠᱚᱲᱟ ᱞᱟᱹᱭ ᱡᱩᱢᱤᱫᱽ ᱠᱟᱛᱮ ᱠᱟᱹᱢᱤ ᱛᱮ ᱦᱩᱭᱩᱜᱼᱟ ᱾ ᱚᱲᱟᱜ ᱨᱮᱱᱟᱜ ᱠᱟᱹᱢᱤ ᱠᱷᱚᱱ ᱚᱠᱛᱚ ᱚᱰᱚᱠ ᱠᱟᱛᱮ ᱥᱚᱢᱟᱡᱽ ᱥᱟᱶᱛᱟ ᱞᱟᱹᱜᱤᱫ ᱠᱟᱹᱢᱤ ᱨᱮᱱᱟᱜ ᱟᱺᱜᱤᱵᱷᱟᱨ ᱦᱟᱛᱟᱣ ᱦᱩᱭᱩᱜᱼᱟ ᱾ ᱟᱹᱛᱩ ᱫᱤᱥᱚᱢ ᱨᱮ ᱛᱟᱦᱮᱸᱱ ᱦᱚᱲ ᱠᱚ ᱫᱚ ᱵᱷᱟᱸᱰᱟᱱ ᱨᱮ, ᱵᱟᱯᱞᱟ ᱨᱮ, ᱪᱷᱩᱛ ᱨᱮ ᱪᱷᱟᱹᱴᱭᱟᱹᱨ ᱨᱮ ᱵᱚᱸᱜᱟ ᱵᱳᱨᱳ ᱨᱮ ᱢᱮᱥᱟᱜ ᱛᱮ ᱦᱩᱭᱩᱜᱼᱟ ᱾ ᱢᱟᱨᱮ ᱦᱚᱲ ᱠᱷᱚᱱ ᱟᱹᱨᱤᱪᱟᱹᱞᱤ, ᱟᱪᱟᱨ ᱵᱮᱵᱷᱟᱨ ᱵᱷᱟᱹᱜᱤ ᱰᱟᱦᱟᱨ ᱨᱮᱱᱟᱜ ᱥᱤᱠᱷᱱᱟᱹᱛ ᱦᱟᱛᱟᱣ ᱠᱟᱛᱮ ᱨᱮᱵᱮᱫ ᱫᱚᱦᱚ ᱦᱩᱭᱩᱜᱼᱟ ᱾ ᱵᱮᱼᱰᱟᱦᱟᱨ ᱛᱮ ᱡᱩᱣᱟᱹᱱ ᱠᱚᱲᱟ ᱠᱩᱲᱤ ᱠᱚ ᱞᱟᱦᱟᱜ ᱠᱷᱟᱱ, ᱩᱱᱠᱩ ᱫᱚ ᱥᱤᱠᱷᱱᱟᱹᱛ ᱠᱟᱠᱚ ᱦᱚᱸ ᱠᱩᱲᱤ ᱦᱚᱯᱚᱱᱟᱜ ᱟᱺᱜᱤᱵᱷᱟᱨ ᱠᱟᱱᱟ ᱾ ᱚᱞᱼᱵᱮᱞ ᱛᱟᱞᱟ ᱛᱮ ᱥᱚᱢᱟᱡᱽ ᱥᱟᱶᱛᱟ ᱞᱟᱹᱜᱤᱫ ᱠᱟᱹᱢᱤ ᱨᱮᱱᱟᱜ ᱟᱺᱜᱤᱵᱷᱟᱨ ᱦᱟᱛᱟᱣ ᱛᱮ ᱦᱩᱭᱩᱜᱼᱟ ᱾
ᱡᱟᱶᱟᱭ ᱚᱲᱟᱜ ᱨᱮ ᱠᱩᱲᱤ ᱦᱚᱯᱚᱱ ᱟᱡᱟᱜ ᱟᱺᱜᱤᱵᱷᱟᱨ ᱱᱟᱯᱟᱭ ᱟᱨ ᱱᱤᱥᱴᱟᱹ ᱥᱟᱹᱦᱤᱸᱡ ᱮ ᱟᱯᱱᱟᱨ ᱞᱮᱠᱷᱟᱱ ᱟᱡᱟᱜ ᱜᱷᱟᱨᱚᱸᱡᱽ ᱥᱟᱶ ᱥᱚᱢᱟᱡᱽ ᱥᱟᱶᱛᱟ ᱦᱚᱸ ᱞᱟᱦᱟᱱᱛᱤ ᱦᱚᱨ ᱛᱮ ᱛᱟᱲᱟᱢ ᱫᱟᱲᱮᱭᱟᱜᱼᱟ ᱾
***
