“ᱠᱩᱲᱤ ᱦᱚᱯᱚᱱᱟᱜ ᱫᱚ ᱢᱤᱫᱴᱟ.ᱝ ᱡᱚᱱᱚᱢ ᱨᱮ
ᱵᱟᱨ ᱫᱷᱟᱣ ᱛᱟᱭ ᱡᱟᱱᱟᱢ ᱾
ᱟᱹᱰᱤ ᱫᱩᱞᱟᱹᱲ ᱛᱮ ᱦᱟᱨᱟ ᱵᱩᱨᱩ ᱟᱭ ᱟᱭᱳ ᱵᱟᱵᱟ ᱚᱲᱟᱜ ᱨᱮ
ᱧᱟᱢ ᱫᱩᱞᱟᱹᱲ ᱜᱮ ᱦᱟᱹᱴᱤᱧᱟᱭ ᱡᱟᱶᱟᱭᱟᱜ ᱜᱷᱟᱨᱚᱸᱡᱽ ᱥᱟᱱᱟᱢ” ᱾᱾
ᱱᱚVᱟ ᱵᱟᱨ ᱯᱚᱫᱽ ᱨᱚᱲ ᱯᱷᱤᱫᱽᱞᱤ ᱵᱤᱥᱲᱤ ᱞᱮᱠᱷᱟᱱ ᱠᱩᱲᱤ ᱦᱚᱯᱚᱱᱟᱜ ᱡᱚᱱᱚᱢ ᱡᱟᱱᱟᱢ ᱡᱤᱵᱚᱱ ᱠᱟᱛᱷᱟ ᱯᱟᱨᱦᱟᱲ ᱱᱤᱥᱴᱟᱹ ᱯᱩᱥᱴᱟᱹ ᱥᱟᱺᱦᱤᱧ ᱯᱟᱭᱛᱟᱨ ᱵᱟᱰᱟᱭᱚᱜᱼᱟ ᱾ ᱠᱩᱲᱤ ᱦᱚᱯᱚᱱ ᱡᱟᱦᱟᱸ ᱛᱤᱱᱟ.ᱜ ᱫᱩᱞᱟᱹᱲ ᱛᱮ ᱦᱟᱨᱟ ᱵᱩᱨᱩ ᱠᱚᱜ ᱨᱮᱦᱚᱸᱭ ᱟᱭᱳ ᱵᱟᱵᱟ ᱚᱲᱟᱜ ᱨᱮ ᱢᱤᱫ ᱫᱤᱱ ᱦᱤᱞᱚᱜ ᱫᱚ ᱵᱩᱠᱟᱹ ᱛᱚᱯᱟ ᱫᱩᱣᱟᱹᱨ ᱜᱟᱱᱟᱰᱮ ᱪᱟᱸᱰᱟᱝ ᱫᱚ ᱯᱟᱨᱚᱢ ᱠᱟᱛᱮ ᱟᱨ ᱢᱤᱫᱴᱟ.ᱝ ᱜᱷᱟᱨᱚᱸᱡᱽ ᱨᱤᱱ ᱦᱚᱲ ᱠᱚ ᱟᱯᱱᱟᱨ ᱱᱤᱡᱚᱨ ᱛᱮ ᱦᱩᱭ ᱟᱭᱟ ᱾ ᱢᱤᱫ ᱠᱩᱲᱤ ᱦᱚᱯᱚᱱ ᱡᱚᱠᱷᱚᱱ ᱵᱟᱯᱞᱟ ᱠᱟᱛᱮ ᱡᱟᱶᱟᱭ ᱚᱲᱟᱜ ᱛᱮ ᱪᱟᱞᱟᱜ ᱟᱭ ᱛᱚᱠᱷᱚᱱ ᱜᱮ ᱵᱟᱨᱭᱟ ᱜᱷᱟᱨᱚᱸᱡᱽ ᱨᱤᱱ ᱦᱚᱲ ᱵᱟᱞᱟ ᱵᱚᱸᱫᱷᱩ ᱥᱟᱹᱜᱟᱹᱭ ᱛᱮᱠᱚ ᱛᱚᱞ ᱛᱚᱯᱚᱞᱚᱜᱼᱟ ᱾ ᱚᱱᱟ ᱥᱟᱶ ᱥᱟᱶᱛᱮ ᱵᱟᱨᱭᱟ ᱟᱹᱛᱩ ᱴᱚᱞᱟ ᱴᱚᱴᱷᱟ ᱨᱤᱱ ᱦᱚᱲ ᱠᱚᱦᱚᱸ ᱢᱤᱫ ᱯᱮᱲᱟ ᱥᱟᱹᱜᱟᱹᱭ ᱛᱮᱠᱚ ᱡᱚᱯᱚᱲᱟᱣᱼᱟ ᱾ ᱵᱟᱹᱦᱩ ᱠᱩᱲᱤ ᱞᱮᱱᱠᱷᱟᱱᱮ ᱛᱤᱨᱮ ᱢᱮᱬᱦᱮᱫ ᱥᱟᱠᱚᱢ ᱦᱚᱨᱟᱥᱤ ᱨᱮ ᱥᱤᱸᱫᱩᱨ ᱟᱨ ᱜᱮ ᱱᱟᱶᱟ ᱱᱟᱶᱟ ᱥᱟᱹᱜᱟᱹᱭ ᱛᱮ ᱦᱚᱦᱚ ᱦᱚᱯᱚᱦᱚ ᱠᱷᱟᱹᱛᱤᱨ ᱫᱤᱥᱚᱢ ᱫᱩᱱᱤᱭᱟᱹ ᱠᱚ ᱵᱚᱫᱚᱞ ᱪᱟᱵᱟ ᱮᱱ ᱞᱮᱠᱟ ᱵᱩᱡᱷᱟᱹᱣ ᱟᱭ ᱢᱤᱫ ᱠᱩᱲᱤ ᱦᱚᱯᱚᱱ ᱾ ᱮᱱᱦᱚᱸ ᱵᱟᱝ ᱩᱯᱨᱩᱢ ᱥᱟᱞᱟᱥ ᱧᱮᱯᱮᱞ ᱦᱚᱲ ᱠᱚ ᱛᱟᱞᱟᱨᱮ ᱟᱹᱱᱟᱹᱲᱤ ᱵᱤᱨᱱᱟᱹ ᱡᱚᱛᱚ ᱥᱟᱢᱜᱮ ᱛᱮ ᱦᱩᱭ ᱟᱭᱟ ᱾ ᱟᱨ ᱱᱚᱶᱟ ᱥᱟᱶᱛᱮ ᱠᱩᱲᱤ ᱦᱚᱯᱚᱱᱟᱜ ᱟᱨ ᱢᱤᱫᱴᱟᱹᱝ ᱡᱟᱱᱟᱢ ᱵᱟᱹᱦᱩ ᱠᱩᱲᱤ ᱨᱩᱯ ᱛᱮ ᱦᱩᱭ ᱥᱟᱹᱛ ᱠᱚᱜᱼᱟ ᱾ ᱠᱷᱟᱹᱞᱤ ᱤᱱᱟᱹᱜ ᱥᱩᱢᱩᱝ ᱫᱚ ᱵᱟᱝᱼᱟ ᱚᱱᱟ ᱥᱟᱞᱟᱜ ᱛᱮ ᱡᱟᱶᱟᱭ ᱚᱲᱟᱜ ᱜᱷᱟᱨᱚᱸᱡᱽ ᱨᱮᱱᱟᱜ ᱟᱺᱜᱤᱵᱷᱟᱨ ᱦᱚᱸ ᱟᱡ ᱴᱷᱮᱱ ᱟᱡ ᱟᱡ ᱛᱮ ᱞᱟᱫᱮ ᱦᱟᱣᱟᱞᱚᱜᱼᱟ ᱾ ᱡᱮᱞᱮᱠ ᱥᱟᱹᱜᱟᱹᱭ ᱢᱟᱱᱟᱣ ᱵᱟᱛᱟᱣ, ᱟᱪᱟᱨ ᱵᱮᱵᱷᱟᱨ, ᱠᱟᱹᱢᱤ ᱠᱟᱹᱨᱫᱷᱟᱹᱱᱤ ᱮᱢᱟᱱ ᱾
ᱡᱟᱶᱟᱭ ᱚᱲᱟᱜ ᱜᱷᱟᱨᱚᱸᱡᱽ ᱨᱮᱫᱚ ᱟᱭᱳ ᱵᱟᱵᱟ ᱵᱟᱫᱟᱞ ᱛᱮ ᱦᱟᱱᱦᱟᱨ ᱦᱚᱸᱧᱦᱟᱨ ᱠᱤᱱ ᱧᱟᱢᱚᱜᱼᱟ ᱾ ᱩᱱᱠᱤᱱ ᱥᱟᱶᱛᱮ ᱜᱚᱲᱚᱢ ᱟᱭᱳ ᱜᱚᱲᱚᱢ ᱵᱟᱵᱟ ᱟᱨ ᱮᱴᱟᱜ ᱢᱟᱨᱟᱝ ᱦᱚᱲ ᱠᱚ ᱛᱟᱦᱮᱸᱱ ᱠᱷᱟᱱ ᱩᱱᱠᱩ ᱢᱟᱹᱱ ᱩᱢᱟᱹᱬ ᱟᱠᱚ ᱟᱨ ᱵᱩᱜᱤ ᱵᱟᱹᱲᱤᱡ ᱫᱤᱥ ᱩᱫᱤᱥ ᱦᱟᱛᱟᱣ ᱢᱟᱱᱟᱣ ᱞᱮᱠᱷᱟᱱ ᱜᱷᱟᱨᱚᱸᱡᱽ ᱨᱮ ᱥᱩᱯᱩᱞᱩᱠ ᱥᱩᱜᱩᱲᱚᱜᱼᱟ ᱾ ᱤᱨᱤᱞ ᱠᱚᱲᱟ ᱠᱩᱲᱤ ᱠᱚᱫᱚ ᱱᱤᱡᱚᱨ ᱵᱚᱭᱦᱟ ᱵᱩᱦᱤᱱ ᱞᱮᱠᱟ ᱫᱩᱞᱟᱹᱲ ᱟᱫᱚᱨ ᱛᱮ ᱦᱩᱭᱩᱜᱼᱟ ᱾ ᱠᱟᱛᱷᱟ ᱨᱮᱠᱚ ᱢᱮᱱᱟ ᱫᱟᱫᱟ ᱫᱚ ᱵᱟᱵᱟ ᱥᱚᱢᱟᱱ ᱾ ᱚᱱᱟ ᱦᱤᱥᱟᱹᱵᱽ ᱛᱮ ᱦᱤᱞᱤ ᱦᱚᱸ ᱟᱭᱳ ᱵᱟᱨᱟᱵᱟᱹᱨᱤ ᱜᱮ ᱦᱩᱭᱩᱜ ᱟᱭ ᱾ ᱵᱟᱵᱟ ᱴᱷᱮᱱ ᱡᱟᱦᱟᱸ ᱠᱟᱛᱷᱟ ᱠᱚ ᱞᱟᱹᱞᱟᱹᱭ ᱵᱟᱝ ᱫᱤᱞ ᱵᱟᱝ ᱵᱚᱨᱥᱟᱼᱟ ᱾ ᱚᱱᱟ ᱠᱟᱛᱷᱟ ᱠᱚ ᱟᱹᱰᱤ ᱟᱞᱜᱟ ᱛᱮ ᱟᱭᱳ ᱴᱷᱮᱱ ᱫᱚ ᱞᱟᱹᱭᱩᱜᱚᱜᱼᱟ ᱾ ᱚᱱᱠᱟ ᱜᱮ ᱤᱨᱤᱞ ᱠᱚᱲᱟ ᱠᱩᱲᱤ ᱠᱚᱦᱚᱸ ᱫᱟᱫᱟ ᱴᱷᱮᱱ ᱵᱟᱝ ᱠᱟᱛᱮ ᱦᱤᱞᱤ ᱴᱷᱮᱱ ᱜᱮᱠᱚ ᱚᱡᱽᱼᱟ ᱠᱷᱚᱡᱽᱼᱟ ᱾ ᱩᱱᱠᱩᱣᱟᱜ ᱥᱩᱵᱤᱫᱷᱟᱹ ᱚᱥᱩᱵᱤᱫᱷᱟᱹ ᱠᱟᱛᱷᱟ ᱵᱩᱡᱷᱟᱹᱣ ᱠᱟᱛᱮ ᱩᱱᱠᱩ ᱵᱮᱥ ᱦᱚᱨ ᱰᱟᱦᱟᱨ ᱩᱫᱩᱜ ᱫᱤᱥᱟᱹ ᱟᱠᱚ ᱥᱟᱶᱛᱮ ᱟᱠᱚᱣᱟᱜ ᱱᱤᱡᱚᱨ ᱡᱟᱸᱜᱟ ᱛᱮ ᱛᱤᱸᱜᱩ ᱠᱮᱴᱮᱡ ᱠᱟᱠᱚ ᱦᱚᱸ ᱟᱹᱰᱤ ᱢᱟᱨᱟᱝ ᱠᱟᱹᱢᱤ ᱠᱟᱱᱟ ᱜᱷᱟᱨᱚᱸᱡᱽ ᱨᱤᱱ ᱵᱟᱹᱦᱩ ᱠᱩᱲᱤᱭᱟᱜ ᱾ ᱟᱡᱷᱱᱟᱨ ᱫᱟᱹᱭ ᱟᱨ ᱵᱟᱼᱦᱚᱧᱦᱟᱨ ᱠᱚᱫᱚ ᱵᱟᱵᱚ ᱧᱩᱛᱩᱢ ᱠᱚᱣᱟ ᱟᱵᱚ ᱥᱟᱶᱛᱟ ᱨᱮ ᱾ ᱵᱷᱩᱞ ᱛᱮ ᱧᱩᱛᱩᱢ ᱩᱛᱟᱹᱨᱚᱜ ᱠᱷᱟᱱ ᱠᱤᱱ ᱟᱨ ᱵᱟᱝ ᱠᱷᱟᱱ ᱫᱚᱨᱠᱟᱨ ᱯᱟᱲᱟᱣ ᱠᱚᱨᱮ ᱧᱩᱛᱩᱢ ᱠᱤᱱ ᱠᱷᱟᱱ ᱛᱟᱭᱚᱢ ᱛᱮ ᱛᱷᱩ ᱛᱷᱩᱠᱲᱩᱢ ᱵᱚ ᱢᱮᱱᱟ ᱾ ᱟᱡᱷᱱᱟᱨ ᱫᱟᱹᱭ ᱠᱚᱫᱚ ᱵᱚᱦᱚᱜ ᱨᱮ ᱵᱟᱵᱚ ᱫᱤᱯᱤᱞ ᱟᱠᱚᱣᱟ ᱪᱮ ᱫᱮᱭᱟ ᱦᱚᱸ ᱵᱟᱵᱚᱱ ᱤᱥᱠᱤᱨ ᱠᱚᱣᱟ ᱾ ᱟᱨ ᱜᱮ ᱠᱤᱢᱤᱱ ᱢᱟᱲᱟᱝ ᱱᱟᱹᱠᱤᱡ ᱠᱚᱜ ᱠᱷᱟᱱᱮ ᱱᱟᱹᱠᱤᱡ ᱟᱹᱨᱩᱵ ᱠᱟᱛᱮ ᱮᱱᱟᱝ ᱟᱡᱷᱱᱟᱨ ᱫᱟᱹᱭ ᱫᱚᱭ ᱱᱟᱹᱠᱤᱡᱚᱜᱼᱟ ᱾ ᱵᱟᱼᱦᱚᱧᱦᱟᱨ ᱥᱟᱶ ᱡᱚᱯᱚᱴᱮᱫ ᱟᱵᱚ ᱫᱚ ᱵᱟᱨᱚᱱ ᱜᱮᱭᱟ ᱾ ᱟᱡᱟᱜ ᱩᱢᱩᱞ ᱦᱚᱸ ᱩᱢᱩᱞ ᱵᱚ ᱥᱟᱦᱟ ᱦᱟᱜᱼᱟ ᱵᱟᱵᱚ ᱞᱮᱵᱮᱫᱟ ᱾ ᱵᱷᱩᱞ ᱛᱮ ᱡᱩᱫᱤ ᱠᱤᱱ ᱡᱚᱯᱚᱴᱮᱫ ᱮᱱᱟ ᱾ ᱮᱱᱠᱷᱟᱱ ᱜᱷᱟᱨᱚᱸᱡᱽ ᱨᱤᱱ ᱵᱟᱝᱠᱷᱟᱱ ᱵᱷᱟᱹᱭᱟᱹᱫᱽ ᱨᱤᱱ ᱜᱟᱱᱚᱜ ᱥᱟᱹᱜᱟᱹᱭ ᱦᱚᱲ ᱜᱩᱨᱤᱡ ᱫᱟᱜ ᱛᱤᱨᱯᱤ ᱠᱟᱛᱮ ᱡᱟᱹᱛᱤ ᱠᱟᱹᱠᱤᱱᱟᱭ ᱾ ᱟᱨ ᱵᱟᱰᱟᱭ ᱵᱟᱰᱟᱭ ᱛᱩᱞᱩᱡ ᱛᱮᱠᱤᱱ ᱡᱚᱯᱚᱴᱮᱫ ᱠᱷᱟᱱ ᱡᱮᱞᱮᱠ ᱮᱠᱞᱟᱨᱮ ᱵᱷᱤᱸᱫᱟᱹᱲ
ᱠᱚᱜ ᱠᱷᱟᱱᱮ ᱵᱮᱨᱮᱫ ᱠᱟᱭ ᱡᱷᱚᱜ ᱵᱟᱝᱠᱷᱟᱱ ᱠᱚ ᱫᱟᱯᱟᱞ ᱛᱚᱯᱚᱞ ᱠᱟᱱ ᱠᱷᱟᱱ ᱫᱩᱜ ᱡᱷᱟᱯᱟᱰᱟᱣ ᱡᱷᱚᱜ ᱠᱚᱨᱮ ᱮᱢᱟᱱ ᱾ ᱮᱱᱠᱷᱟᱱ ᱟᱹᱛᱩ ᱴᱚᱞᱟ ᱨᱤᱱ ᱵᱚᱸᱜᱟ ᱵᱩᱨᱩ ᱵᱟᱰᱟᱭ ᱦᱚᱲ ᱥᱤᱢ ᱵᱟᱠᱷᱟᱱ ᱢᱮᱨᱚᱢ ᱵᱚᱸᱜᱟ ᱠᱟᱛᱮ ᱢᱟᱭᱟᱢ ᱛᱤᱨᱯᱤ ᱠᱟᱛᱮ ᱡᱟᱹᱛᱤ ᱠᱤᱱᱟᱭ ᱾ ᱵᱟᱼᱦᱚᱧᱦᱟᱨ ᱥᱟᱢᱟᱝ ᱨᱮ ᱵᱚᱦᱚᱜ ᱩᱵ ᱟᱲᱟᱜ ᱵᱟᱨᱚᱱ ᱜᱮᱭᱟ ᱟᱵᱚ ᱥᱟᱶᱛᱟ ᱨᱮ ᱾ ᱟᱨ ᱟᱠᱚ ᱥᱟᱢᱟᱝ ᱨᱮ ᱯᱟᱨᱠᱚᱢ ᱨᱮ ᱫᱩᱲᱩᱵ ᱠᱚᱜ ᱦᱚᱸ ᱠᱷᱟᱹᱛᱤᱨ ᱵᱟᱹᱱᱩᱜ ᱟᱱ ᱪᱮ ᱵᱟᱵᱚ ᱢᱟᱱᱟᱣ ᱵᱟᱛᱟᱣ ᱮᱫ ᱠᱚᱣᱟ ᱢᱮᱱᱛᱮ ᱞᱮᱠᱷᱟᱜᱼᱟ ᱾ ᱚᱱᱟ ᱛᱮᱜᱮ ᱫᱤᱥᱚᱢ ᱠᱚᱨᱮ ᱫᱚ ᱵᱟᱼᱦᱚᱧᱦᱟᱨ ᱠᱚᱫᱚ ᱚᱲᱟᱜ ᱠᱷᱚᱱ ᱠᱚ ᱚᱰᱚᱠ ᱵᱚᱞᱚᱱ ᱡᱷᱚᱜ ᱠᱷᱩᱜ ᱮᱦᱮᱢ ᱧᱚᱜᱟᱠᱚ ᱾ ᱤᱱᱟᱹ ᱫᱚ ᱦᱚᱱ ᱠᱤᱢᱤᱱ ᱠᱚᱠᱚ ᱛᱟᱦᱮᱸᱱ ᱠᱷᱟᱱ ᱥᱟᱦᱟ ᱟᱛᱚᱢᱚᱜ ᱟᱠᱚ ᱾ ᱟᱨ ᱢᱤᱫᱴᱟᱹᱝ ᱠᱟᱛᱷᱟ ᱡᱟᱦᱟᱸᱭᱟᱜ ᱥᱩᱦᱤᱡᱩᱦᱤ ᱛᱮ ᱨᱟᱹᱦᱤ ᱪᱟᱹᱣᱰᱟᱹᱞ ᱪᱮᱛᱟᱱ ᱛᱤ ᱨᱮ ᱛᱤᱭᱟᱹᱜ ᱠᱟᱛᱮ ᱛᱮᱦᱮᱧ ᱡᱟᱦᱟᱸ ᱚᱲᱟᱜ ᱨᱮᱵᱚ ᱚᱰᱚᱠ ᱵᱚᱞᱚᱱ ᱠᱟᱱ ᱩᱱᱤ ᱡᱤᱣᱤ ᱡᱩᱨᱤ ᱾ ᱩᱱᱤ ᱦᱚᱸ ᱚᱠᱚᱭ ᱨᱤᱱ ᱦᱚᱯᱚᱱ ᱚᱠᱚᱭ ᱨᱤᱱ ᱵᱚᱭᱦᱟ ᱟᱨ ᱢᱤᱫ ᱜᱷᱟᱨᱚᱸᱡᱽ ᱨᱤᱱ ᱢᱩᱛᱩᱞ ᱠᱷᱩᱱᱴᱤ ᱠᱟᱱᱟᱭ ᱾ ᱟᱡ ᱪᱮᱛᱟᱱ ᱨᱮ ᱱᱤᱡᱚᱨᱟᱜ ᱡᱟᱦᱟᱸ ᱛᱤᱱᱟᱹᱜ ᱦᱚᱠ ᱢᱮᱱᱟᱜᱼᱟ ᱩᱱᱠᱩ ᱡᱚᱛᱚ ᱦᱚᱲ ᱦᱚᱸ ᱩᱱᱟᱹᱜ ᱜᱮᱠᱚ ᱫᱟᱹᱵᱤᱫᱟᱨ ᱠᱟᱱᱟ ᱵᱷᱟᱹᱵᱤ ᱠᱟᱛᱮ ᱪᱚᱲᱟᱣ ᱞᱮᱱ ᱮᱱᱟᱝ ᱜᱷᱟᱨᱚᱸᱡᱽ ᱨᱮ ᱥᱩᱠ ᱥᱟᱹᱱᱛᱤ ᱵᱟᱦᱟᱞᱚᱜ ᱥᱟᱶᱛᱮ ᱚᱲᱟᱜ ᱦᱚᱸ ᱫᱚᱲᱦᱚᱜᱼᱟ ᱾ ᱪᱮᱫᱟᱜ ᱥᱮ ᱟᱵᱚ ᱫᱚᱵᱚ ᱢᱟᱹᱱᱢᱤ ᱠᱟᱱᱟ ᱥᱟᱶᱛᱟ ᱨᱮᱵᱚ ᱛᱟᱦᱮᱱᱟ ᱾ ᱡᱩᱫᱤ ᱞᱟᱡ ᱴᱩᱠᱩᱱ ᱟᱨ ᱥᱩᱛᱩᱜ ᱦᱚᱯᱚᱱ ᱥᱩᱢᱩᱝ ᱟᱹᱥᱩᱞ ᱜᱮᱵᱚ ᱠᱟᱹᱢᱤᱭᱟ ᱮᱱᱠᱷᱟᱱ ᱡᱤᱵᱽ ᱡᱟᱱᱣᱟᱨ ᱥᱟᱞᱟᱜ ᱵᱚ ᱥᱚᱢᱟᱱ ᱩᱛᱟᱹᱨᱚᱜᱼᱟ ᱾
ᱱᱟᱯᱟᱭ ᱟᱨ ᱵᱷᱟᱹᱜᱤ ᱟᱪᱟᱨ ᱵᱮᱵᱷᱟᱨ ᱫᱚ ᱵᱟᱹᱦᱩ ᱠᱩᱲᱤᱭᱟᱜ ᱢᱤᱫ ᱥᱟᱡᱽ ᱠᱟᱱᱟ ᱾ ᱱᱚᱶᱟ ᱜᱩᱱ ᱥᱟᱡᱽ ᱥᱟᱶᱟᱨ ᱫᱚ ᱢᱚᱦᱚᱨ ᱢᱩᱴᱷᱟᱹᱱ ᱪᱮᱦᱨᱟ ᱧᱮᱞ ᱚᱪᱚ ᱥᱟᱶᱛᱮ ᱦᱚᱲᱢᱚ ᱨᱮᱱᱟᱜ ᱨᱩᱯ ᱨᱚᱝ ᱦᱚᱸᱭ ᱪᱚᱨᱚᱠ ᱚᱪᱚᱭᱟ ᱾ ᱟᱨ ᱱᱚᱶᱟ ᱟᱪᱟᱨ ᱵᱮᱵᱷᱟᱨ ᱜᱩᱱ ᱫᱚ ᱥᱚᱱᱟ ᱨᱩᱯᱟᱹ ᱠᱷᱚᱱ ᱦᱚᱸ ᱜᱚᱱᱚᱝ ᱟᱱᱟ ᱾ ᱡᱟᱦᱟᱸ ᱛᱤᱥ ᱦᱚᱸ ᱵᱟᱝ ᱢᱟᱹᱭᱞᱟᱹ ᱢᱟᱹᱞᱪᱷᱟᱹᱜᱼᱟ ᱾ ᱵᱟᱹᱦᱩ ᱠᱩᱲᱤ ᱜᱷᱟᱨᱚᱸᱡᱽ ᱨᱤᱱ ᱢᱟᱨᱟᱝ ᱦᱩᱰᱤᱧ ᱠᱚ ᱢᱟᱹᱱ ᱵᱮᱵᱷᱟᱨ ᱟᱨ ᱫᱩᱞᱟᱹᱲ ᱟᱫᱚᱨ ᱠᱚ ᱥᱟᱶᱛᱮ ᱯᱮᱲᱟ ᱯᱚᱨᱵᱷᱩ ᱚᱲᱟᱜ ᱛᱮ ᱠᱚ ᱥᱮᱴᱮᱨ ᱞᱮᱱᱠᱷᱟᱱ ᱟᱛᱟᱝ ᱫᱟᱨᱟᱢ ᱨᱚᱲ ᱥᱟᱰᱮ ᱟᱠᱚ ᱟᱭ ᱾ ᱟᱡ ᱢᱟᱲᱟᱝ ᱞᱚᱴᱟ ᱫᱟᱜ ᱫᱚᱲᱚᱢ ᱠᱟᱛᱮ ᱡᱚᱦᱟᱨ ᱵᱮᱵᱷᱟᱨ ᱟᱭ ᱾ ᱛᱚᱵᱮ ᱠᱟᱛᱮ ᱮᱱᱟᱝ ᱜᱷᱟᱨᱚᱸᱡᱽ ᱨᱤᱱ ᱠᱚᱲᱟ ᱦᱚᱯᱚᱱ ᱥᱟᱶᱛᱮ ᱮᱴᱟᱜ ᱠᱚᱠᱚ ᱡᱚᱦᱟᱨ ᱵᱮᱵᱷᱟᱨᱼᱟ ᱾
ᱟᱵᱚ ᱡᱚᱛᱚ ᱦᱚᱲᱟᱜ ᱟᱹᱰᱤ ᱠᱩᱥᱤ ᱨᱟᱹᱥᱠᱟᱹ ᱟᱱᱟᱜ ᱜᱮ ᱢᱟᱢᱚ ᱚᱲᱟᱜ ᱫᱚ ᱾ ᱚᱱᱠᱟ ᱜᱮ ᱵᱟᱹᱦᱩ ᱠᱩᱲᱤ ᱮᱱ ᱛᱟᱭᱚᱢ ᱵᱷᱚᱬᱡᱟ ᱵᱷᱟᱹᱬᱡᱤ ᱠᱚᱫᱚ ᱵᱷᱚᱬᱡᱟ ᱜᱚ ᱵᱷᱟᱹᱬᱡᱤ ᱜᱚ ᱵᱟᱝᱠᱷᱟᱱ ᱧᱩᱛᱩᱢ ᱟᱛᱮ ᱨᱮᱦᱚᱸ ᱜᱚ ᱞᱟᱜᱟᱣ ᱟᱛᱮ ᱜᱮᱵᱚᱱ ᱦᱚᱦᱚ ᱟᱠᱚᱣᱟ ᱾ ᱜᱚ ᱟᱹᱲᱟᱹ ᱨᱮᱫᱚ ᱱᱤᱡᱚᱨ ᱟᱯᱱᱟᱨ ᱵᱷᱟᱵᱽ ᱯᱮᱨᱮᱡ ᱩᱢᱟᱹᱬ ᱪᱟᱞᱚᱜᱼᱟ ᱾ ᱡᱟᱦᱟᱸ ᱞᱮᱠᱟ ᱢᱟᱨᱟᱝ ᱥᱟᱹᱜᱟᱹᱭ ᱠᱚ ᱦᱟᱱᱦᱟᱨ ᱦᱚᱧᱦᱟᱨ ᱟᱡᱷᱱᱟᱨ ᱵᱟᱼᱦᱚᱧᱦᱟᱨ ᱠᱚ ᱵᱟᱹᱦᱩ ᱠᱩᱲᱤ ᱫᱚ ᱵᱟᱹᱦᱩ ᱜᱚ ᱜᱮᱠᱚ ᱢᱮᱛᱟᱭᱟ ᱾ ᱚᱱᱟ ᱛᱮᱜᱮ ᱠᱟᱛᱷᱟ ᱨᱮ ᱠᱚ ᱢᱮᱱᱟ ᱢᱚᱪᱟ ᱨᱚᱲ ᱨᱮᱜᱮ ᱥᱤᱵᱤᱞ ᱢᱟ ᱾ ᱪᱮᱫᱟᱜ ᱛᱚᱵᱮ ᱨᱚᱲ ᱫᱚᱢ ᱟᱞᱱᱟ ᱥᱟᱵᱟᱜ ᱥᱤᱴᱷᱟᱹ ᱠᱷᱟᱨᱟ ᱠᱷᱟᱨᱟᱯ ᱚᱪᱚᱭᱟ ᱾
ᱥᱮᱛᱟᱜ ᱵᱮᱨᱮᱫ ᱛᱟᱨᱟ ᱠᱷᱚᱱ ᱧᱤᱫᱟᱹ ᱡᱟᱹᱯᱤᱫ ᱫᱷᱟᱹᱨᱤᱡ ᱵᱟᱹᱦᱩ ᱠᱩᱲᱤ ᱫᱚ ᱢᱤᱢᱤᱫ ᱴᱤᱭᱟᱹᱝ ᱛᱮ ᱚᱲᱟᱜ ᱨᱮᱱᱟᱜ ᱡᱚᱛᱚ ᱠᱟᱹᱢᱤ ᱪᱟᱹᱯᱩ ᱡᱚᱴᱮᱫ ᱯᱩᱨᱟᱹᱣ ᱛᱮ ᱦᱩᱭ ᱟᱭᱟ ᱾ ᱵᱷᱤᱛᱟᱹᱨ ᱫᱩᱣᱟᱹᱨ ᱠᱷᱚᱱ ᱵᱟᱹᱫᱽ ᱵᱟᱹᱭᱦᱟᱹᱲ ᱦᱳᱲᱳ ᱮᱨ ᱠᱷᱚᱱ ᱤᱨ ᱟᱫᱮᱨ ᱫᱷᱟᱹᱨᱤᱡ ᱡᱚᱛᱚ ᱠᱟᱹᱢᱤ ᱨᱮ ᱵᱟᱹᱦᱩ ᱠᱩᱲᱤᱭᱟᱜ ᱮᱱᱮᱢ ᱢᱮᱱᱟᱜᱼᱟ ᱾ ᱥᱟᱶᱛᱮ ᱱᱟᱞᱦᱟ ᱛᱩᱢᱟᱹᱞ ᱪᱟᱹᱠᱨᱤ ᱱᱩᱠᱨᱤ ᱟᱨᱡᱟᱣ ᱠᱟᱛᱮ ᱜᱷᱟᱨᱚᱸᱡᱽ ᱦᱚᱲ ᱩᱯᱟᱹᱥ ᱵᱟᱭ ᱛᱟᱦᱮᱸ ᱚᱪᱚ ᱟᱠᱚᱣᱟ ᱾ ᱪᱩᱞᱦᱟᱹ ᱚᱲᱟᱜ ᱨᱮᱱᱟᱜ ᱥᱟᱱᱟᱢ ᱪᱚᱸᱫᱟ ᱵᱟᱥᱟᱝ ᱠᱟᱹᱢᱤ ᱫᱚ ᱵᱟᱹᱦᱩ ᱠᱩᱲᱤᱭᱟᱜ ᱜᱮ ᱾ ᱥᱟᱶᱛᱮ ᱚᱲᱟᱜ ᱫᱩᱣᱟᱹᱨ ᱥᱟᱯᱷᱟ ᱥᱟᱹᱯᱷᱤ ᱜᱮᱡ ᱜᱩᱨᱤᱡ ᱠᱚᱦᱚᱸ ᱾ ᱤᱥᱤᱱ ᱦᱩᱭ ᱞᱮᱠᱷᱟᱱᱮ ᱦᱟᱱᱦᱟᱨ ᱦᱚᱧᱦᱟᱨ ᱞᱚᱴᱟ ᱫᱟᱜ ᱫᱚᱲᱚᱢ ᱠᱟᱛᱮ ᱮᱢᱟ ᱠᱤᱱᱟᱭ ᱥᱟᱶᱛᱮ ᱜᱷᱟᱨᱚᱸᱡᱽ ᱨᱤᱱ ᱥᱟᱱᱟᱢ ᱦᱚᱲ ᱠᱚ ᱾ ᱚᱱᱟ ᱛᱟᱭᱚᱢ ᱟᱡ ᱦᱚᱸᱭ ᱡᱚᱢᱟ ᱾ ᱚᱱᱛᱮ ᱫᱚ ᱥᱟᱴᱟᱣ ᱨᱮᱦᱚᱸᱭ ᱨᱚᱢᱚᱡ ᱠᱚᱴᱚᱡ ᱟᱨ ᱵᱟᱭ ᱥᱟᱴᱟᱣ ᱨᱮᱦᱚᱸ ᱾ ᱜᱷᱟᱨᱚᱸᱡᱽ ᱨᱤᱱ ᱡᱚᱛᱚ ᱦᱚᱲ ᱞᱩ ᱥᱟᱴᱟᱣ ᱠᱚᱨᱮ ᱜᱮ ᱟᱡ ᱫᱚ ᱵᱩᱡᱷᱟᱹᱣ ᱟᱭ ᱟᱹᱰᱤ ᱠᱩᱥᱤ ᱾ ᱚᱱᱟ ᱛᱮᱜᱮ ᱛᱚ ᱵᱟᱹᱦᱩ ᱠᱩᱲᱤ ᱫᱚ ᱜᱷᱟᱨᱚᱸᱡᱽ ᱨᱤᱱ ᱞᱩᱠᱷᱤ ᱢᱮᱱᱛᱮ ᱧᱩᱛᱩᱢᱚᱜ ᱟᱭ ᱾
ᱢᱤᱫ ᱵᱟᱹᱦᱩ ᱠᱩᱲᱤ ᱢᱚᱱᱮ ᱢᱩᱠᱨᱩᱲ ᱠᱷᱟᱱᱮ ᱡᱟᱦᱟᱸ ᱛᱤᱱᱟᱹᱜ ᱚᱵᱷᱟᱵᱽ ᱚᱥᱩᱵᱤᱫᱷᱟᱹ ᱨᱮ ᱦᱚᱸ ᱥᱩᱠ ᱥᱟᱹᱱᱛᱤ ᱥᱩᱞᱩᱠ ᱟᱹᱜᱩ ᱠᱟᱛᱮ ᱜᱷᱟᱨᱚᱸᱡᱽ ᱥᱚᱨᱚᱜᱽ ᱵᱮᱱᱟᱣ ᱫᱟᱲᱮᱭᱟᱜ ᱟᱭ ᱾ ᱟᱨ ᱢᱚᱱᱮ ᱨᱮᱜᱮ ᱵᱟᱭ ᱨᱤᱠᱟᱹᱭ ᱠᱷᱟᱱ ᱵᱮᱱᱟᱣ ᱜᱚᱰᱷᱚᱬ ᱟᱠᱟᱱ ᱥᱚᱨᱚᱜᱽ ᱥᱚᱢᱟᱱ ᱜᱷᱟᱨᱚᱸᱡᱽ ᱦᱚᱸ ᱱᱚᱨᱚᱠ ᱨᱮ ᱵᱚᱫᱚᱞ ᱫᱟᱲᱮᱭᱟᱜᱼᱟᱭ ᱾ ᱛᱚᱞ ᱛᱚᱯᱚᱞ ᱜᱟᱜ ᱜᱟᱵᱟᱱ ᱟᱠᱟᱱ ᱥᱟᱹᱜᱟᱹᱭ ᱦᱚᱸᱭ ᱛᱚᱯᱟᱜ ᱪᱷᱤᱢ ᱪᱷᱤᱛᱤᱵᱤᱛᱤ ᱜᱚᱫ ᱠᱟᱜᱼᱟ ᱾ ᱡᱟᱦᱟᱸ ᱞᱮᱠᱟ ᱟᱭᱱᱚᱢ ᱠᱟᱡᱚᱞ ᱢᱮᱫ ᱫᱷᱟᱨᱮ ᱨᱮ ᱞᱟᱜᱟᱣ ᱞᱮᱠᱷᱟᱱ ᱢᱮᱫ ᱟᱦᱟ ᱪᱚᱨᱚᱠ ᱚᱪᱚᱭᱟᱭ ᱾ ᱟᱨ ᱚᱱᱟ ᱦᱮᱸᱫᱮ ᱜᱮ ᱮᱴᱟᱜ ᱥᱮᱫᱨᱮ ᱡᱟᱫᱽᱜᱚᱜ ᱠᱷᱟᱱ ᱦᱚᱲᱢᱚᱭ ᱜᱚᱭᱟᱜᱽᱼᱟ ᱾ ᱴᱷᱤᱠ ᱚᱱᱠᱟ ᱜᱮ ᱵᱟᱹᱦᱩ ᱠᱩᱲᱤ ᱦᱚᱸ ᱟᱹᱰᱤ ᱦᱩᱥᱤᱭᱟᱹᱨ ᱥᱚᱱᱛᱚᱨ ᱥᱟᱺᱦᱤᱡ ᱜᱷᱟᱨᱚᱸᱡᱽ ᱨᱤᱱ ᱥᱟᱱᱟᱢ ᱦᱚᱲ ᱠᱚᱣᱟᱜ ᱢᱚᱱᱮ ᱢᱤᱞᱟᱹᱣ ᱠᱟᱛᱮ ᱪᱚᱲᱟᱣ ᱛᱮ ᱦᱩᱭ ᱟᱭᱟ ᱾ ᱮᱱ ᱮᱱᱟᱝ ᱟᱭᱳ ᱵᱟᱵᱟ ᱥᱟᱶᱛᱮ ᱡᱟᱶᱟᱭ ᱚᱲᱟᱜ ᱨᱮ ᱟᱡᱟᱜ ᱧᱩᱛᱩᱢ ᱮ ᱢᱟᱨᱥᱟᱞ ᱫᱟᱲᱮᱭᱟᱜᱼᱟ ᱾ ᱥᱟᱶᱛᱮ ᱟᱹᱛᱩ ᱴᱚᱞᱟ ᱟᱨ ᱥᱟᱶᱛᱟ ᱨᱤᱱ ᱦᱚᱸ ᱢᱤᱫ ᱫᱟᱹᱭᱠᱟᱹᱭ ᱦᱩᱭ ᱫᱟᱲᱮᱭᱟᱜᱼᱟ ᱾
***
