ᱥᱤᱨᱡᱚᱱ ᱨᱮᱱᱟᱜ ᱨᱤᱛ ᱡᱟᱦᱟᱸ ᱞᱮᱠᱟ ᱦᱟᱦᱟᱲᱟ ᱜᱮᱭᱟ, ᱫᱷᱟᱹᱨᱛᱤ ᱯᱩᱨᱤ ᱨᱮ ᱠᱩᱲᱤ ᱦᱚᱯᱚᱱᱟᱜ ᱡᱟᱱᱟᱢ ᱟᱨ ᱩᱱᱠᱩᱣᱟᱜ ᱡᱤᱭᱚᱱ, ᱚᱞᱚᱝ ᱞᱤᱠᱷᱚᱱ ᱚᱱᱠᱟ ᱜᱮ ᱦᱟᱦᱟᱲᱟ ᱜᱮᱭᱟ ᱾
ᱱᱚᱶᱟ ᱫᱷᱟᱹᱨᱛᱤ ᱯᱩᱨᱤ ᱨᱤᱱ ᱢᱟᱹᱱᱢᱤ ᱠᱚ ᱦᱚᱛᱮᱛᱮ ᱥᱟᱶᱛᱟ ᱨᱮᱱᱟᱜ ᱨᱟᱭᱨᱤᱛ ᱞᱮᱠᱟᱛᱮ ᱥᱤᱧᱚᱛ ᱫᱤᱥᱚᱢ ᱥᱟᱶᱛᱮ ᱛᱤᱱᱟᱹᱝ ᱜᱟᱱ ᱫᱤᱥᱚᱢ ᱨᱤᱱ ᱠᱩᱲᱤ ᱦᱚᱯᱚᱱ ᱠᱚᱣᱟᱜ ᱚᱞᱚᱝ ᱞᱤᱠᱷᱚᱱ ᱫᱚ ᱮᱴᱟᱜ ᱚᱲᱟᱜ ᱡᱤᱭᱚᱱ ᱾ ᱱᱚᱝᱠᱟ ᱜᱮ ᱥᱟᱱᱛᱟᱲ ᱥᱟᱶᱛᱟ ᱨᱤᱱ ᱠᱩᱲᱤ ᱦᱚᱯᱚᱱ ᱠᱚᱣᱟᱜ ᱚᱞᱚᱝ ᱞᱤᱠᱷᱚᱱ ᱨᱮᱦᱚᱸ ᱮᱴᱟᱜ ᱚᱲᱟᱜ ᱟᱯᱱᱟᱨ ᱜᱮ ᱚᱞ ᱟᱠᱟᱱᱟ ᱾ ᱟᱨ ᱮᱴᱟᱜ ᱚᱲᱟᱜ ᱜᱮ ᱟᱡᱟᱜ ᱚᱲᱟᱜ ᱫᱚ ᱾
ᱢᱤᱫ ᱦᱚᱯᱚᱱ ᱮᱨᱟ, ᱡᱟᱱᱟᱢ ᱚᱲᱟᱜ ᱠᱷᱚᱱ ᱵᱤᱫᱟᱹᱭ ᱠᱟᱛᱮ ᱡᱟᱶᱟᱭ ᱚᱲᱟᱜ ᱨᱮ ᱵᱟᱹᱦᱩ ᱠᱩᱲᱤᱭᱟᱜ ᱨᱩᱯ ᱛᱮᱭ ᱵᱚᱞᱚᱭᱮᱱ ᱠᱷᱟᱱ ᱜᱮ ᱩᱱᱤᱭᱟᱜ ᱫᱚ ᱱᱚᱶᱟ ᱫᱷᱟᱹᱨᱛᱤ ᱯᱩᱨᱤ ᱨᱮ ᱫᱚᱥᱟᱨ ᱡᱟᱱᱟᱢ ᱦᱩᱭ ᱮᱱ ᱛᱟᱭᱟ, ᱪᱮᱫᱟᱜ ᱥᱮ ᱟᱨ ᱢᱤᱫ ᱚᱲᱟᱜ ᱨᱮ ᱵᱟᱹᱦᱩ ᱠᱩᱲᱤ ᱞᱮᱠᱟᱛᱮ ᱡᱟᱸᱜᱟᱭ ᱟᱬᱜᱚᱭ ᱛᱟᱭᱟ ᱾ ᱚᱱᱟ ᱚᱲᱟᱜ ᱨᱮ ᱟᱹᱰᱤ ᱞᱮᱠᱟᱱ ᱱᱟᱶᱟ ᱥᱟᱹᱜᱟᱹᱭ ᱛᱮᱭ ᱛᱚᱞᱚᱜᱼᱟ ᱾ ᱯᱩᱭᱞᱩ ᱢᱟ ᱟᱡᱤᱡ ᱡᱤᱛᱟᱹ ᱥᱟᱶ ᱥᱟᱹᱜᱟᱹᱭ, ᱤᱱᱟᱹ ᱛᱟᱭᱚᱢ ᱦᱟᱱᱦᱟᱨ ᱦᱚᱧᱦᱟᱨ ᱟᱭᱳ ᱵᱟᱵᱟ ᱥᱟᱶ ᱥᱟᱹᱜᱟᱹᱭ, ᱵᱟᱦᱟ ᱦᱚᱧᱦᱟᱨ, ᱧᱟᱛᱮᱭᱟ ᱥᱟᱶ ᱥᱟᱹᱜᱟᱹᱭ ᱟᱨ ᱚᱝᱥᱚ ᱵᱚᱝᱥᱚ ᱥᱮ ᱟᱹᱛᱩ ᱴᱚᱞᱟ ᱦᱚᱲ ᱥᱟᱶ ᱦᱚᱸ ᱦᱩᱰᱤᱧ ᱢᱟᱨᱟᱝ ᱟᱹᱰᱤ ᱞᱮᱠᱟᱱ ᱥᱟᱹᱜᱟᱹᱭ ᱛᱟᱦᱮᱸᱱᱟ ᱾ ᱜᱚᱴᱟᱯᱟᱲᱟ ᱠᱷᱚᱱ ᱵᱟᱹᱦᱩ, ᱦᱤᱞᱤ, ᱦᱚᱯᱚᱱ ᱟᱭᱳ ᱥᱟᱹᱜᱟᱹᱭ ᱦᱚᱦᱚ ᱛᱮ ᱚᱲᱟᱜ ᱠᱚ ᱟᱸᱫᱚᱲ ᱜᱚᱫᱚᱜᱼᱟ ᱾ ᱚᱱᱟ ᱚᱲᱟᱜ ᱨᱮᱱᱟᱜ ᱥᱟᱱᱟᱢ ᱯᱟᱲᱟ ᱟᱡ ᱞᱟᱹᱜᱤᱫ ᱫᱚ ᱱᱟᱶᱟ ᱜᱮ ᱛᱟᱦᱮᱸ ᱠᱚᱜᱼᱟ ᱾ ᱚᱱᱟ ᱚᱲᱟᱜ ᱨᱮᱱᱟᱜ ᱡᱚᱛᱚ ᱥᱟᱢᱟᱱ ᱟᱡ ᱞᱟᱹᱜᱤᱫ ᱫᱚ ᱱᱟᱶᱟ ᱜᱮᱭᱟ ᱾ ᱯᱩᱭᱞᱩ ᱫᱚ ᱡᱚᱛᱚ ᱜᱮ ᱛᱟᱦᱟᱣ ᱛᱟᱦᱟᱣ ᱛᱮᱭ ᱥᱟᱵᱟ ᱾ ᱯᱩᱭᱞᱩ ᱯᱩᱭᱞᱩ ᱫᱚ ᱟᱡ ᱜᱚᱲᱚᱣᱟᱭ ᱞᱟᱹᱜᱤᱫ ᱛᱮ ᱟᱡ ᱨᱤᱱ ᱧᱟᱛᱮᱭᱟ ᱟᱨ ᱤᱨᱤᱞ ᱠᱩᱲᱤ ᱠᱚ ᱥᱟᱶᱨᱮ ᱜᱟᱛᱮ ᱞᱮᱠᱟ ᱛᱟᱦᱮᱸ ᱠᱟᱛᱮ ᱥᱟᱱᱟᱢ ᱠᱟᱹᱢᱤ ᱠᱚ ᱩᱨᱩᱢ ᱜᱚᱲᱚ ᱟᱭᱟ ᱾ ᱚᱲᱟᱜ ᱨᱤᱱ ᱢᱟᱨᱟᱝ ᱥᱟᱹᱜᱟᱹᱭᱟᱱ ᱦᱚᱲ ᱠᱚ ᱪᱮᱫ ᱠᱚᱠᱚ ᱠᱩᱥᱤᱭᱟᱜᱼᱟ ᱚᱱᱟ ᱠᱚᱭ ᱠᱩᱞᱤ ᱡᱤᱜᱟᱺᱥ ᱡᱚᱝᱼᱟ ᱾
ᱵᱟᱹᱦᱩ ᱠᱩᱲᱤ ᱫᱚ ᱡᱟᱶᱟᱭ ᱚᱲᱟᱜ ᱨᱮ ᱧᱩᱛᱟᱹᱛ ᱨᱮ ᱢᱟᱨᱥᱟᱞ ᱵᱟᱹᱛᱤ ᱞᱮᱠᱟ ᱾ ᱚᱲᱟᱜ ᱞᱩᱠᱷᱤ ᱠᱟᱱᱟᱭ ᱩᱱᱤ ᱫᱚ ᱾ ᱵᱟᱹᱦᱩ ᱠᱩᱲᱤ ᱢᱤᱫ ᱜᱷᱟᱨᱚᱸᱡᱽ ᱫᱚᱭ ᱥᱚᱝ ᱯᱩᱨᱩᱱᱟ ᱾ ᱚᱰᱚᱠ ᱵᱚᱞᱚᱱ ᱨᱮ ᱚᱲᱟᱜ ᱫᱩᱣᱟᱹᱨ ᱮ ᱥᱚᱵᱷᱟᱭᱟ ᱾ ᱨᱚᱲ, ᱞᱟᱸᱫᱟ, ᱥᱤᱵᱤᱞ ᱥᱚᱲᱚᱢ ᱵᱮᱵᱷᱟᱨ ᱛᱮ ᱚᱲᱟᱜ ᱮ ᱪᱚᱲᱟᱝ ᱠᱟᱜᱼᱟ ᱾
ᱵᱟᱹᱦᱩ ᱠᱩᱲᱤᱭᱟᱜ ᱯᱩᱭᱞᱩ ᱟᱺᱜᱤᱵᱷᱟᱨ ᱫᱚ, ᱚᱲᱟᱜ ᱨᱮᱱᱟᱜ ᱥᱟᱱᱟᱢ ᱠᱟᱹᱢᱤ ᱚᱠᱛᱚᱨᱮ ᱥᱟᱹᱛ ᱚᱪᱚᱭ ᱟᱨ ᱥᱟᱱᱟᱢ ᱥᱟᱹᱜᱟᱹᱭ ᱫᱩᱞᱟᱹᱲ ᱵᱮᱵᱷᱟᱨ ᱥᱟᱶᱛᱮ ᱡᱚᱛᱚᱱ ᱫᱚᱦᱚᱭ ᱾
ᱟᱵᱚᱣᱟᱜ ᱫᱚ ᱟᱹᱛᱩ ᱫᱤᱥᱚᱢ ᱜᱮ ᱛᱟᱵᱚᱱ ᱫᱤᱥᱚᱢ ᱫᱚ ᱾ ᱚᱱᱟ ᱞᱮᱠᱟᱛᱮ ᱢᱤᱫ ᱚᱲᱟᱜ ᱜᱤᱨᱱᱤ ᱵᱟᱹᱦᱩ ᱠᱩᱲᱤᱭᱟᱜ ᱫᱤᱱᱟᱹᱢ ᱠᱟᱹᱢᱤ ᱫᱚ ᱦᱩᱭᱩᱜ ᱠᱟᱱᱟ, ᱥᱤᱢᱨᱟᱜ ᱛᱮ ᱵᱮᱨᱮᱫ ᱠᱟᱛᱮ ᱦᱳᱲᱳ ᱠᱚᱭ ᱦᱮᱰᱮᱡ ᱛᱤᱠᱤᱭᱟ ᱾ ᱚᱱᱟ ᱥᱟᱶᱛᱮ ᱨᱟᱪᱟ ᱪᱷᱟᱴᱠᱟ ᱜᱩᱨᱤᱡ ᱫᱟᱜ ᱤᱨᱪᱤ ᱠᱟᱛᱮᱭ ᱡᱚᱜ ᱥᱟᱯᱷᱟᱭᱟ ᱾ ᱨᱟᱪᱟ ᱪᱷᱟᱴᱠᱟ ᱨᱮ ᱜᱩᱨᱤᱡ ᱫᱟᱜ ᱤᱨᱪᱤ ᱫᱚ ᱫᱤᱱᱟᱹᱢ ᱦᱤᱞᱚᱜᱟᱜ ᱟᱹᱰᱤ ᱜᱮ ᱞᱟᱹᱠᱛᱤ ᱟᱱᱟᱜ ᱠᱟᱹᱢᱤᱦᱚᱨᱟ ᱠᱟᱱᱟ ᱾ ᱚᱱᱟ ᱫᱚ ᱱᱤᱦᱟᱹᱛᱤ ᱜᱮ ᱤᱨᱪᱤ ᱦᱩᱭᱩᱜᱼᱟ ᱾ ᱤᱱᱟᱹ ᱛᱟᱭᱚᱢ ᱛᱩᱯᱩ ᱯᱷᱟᱨᱪᱟ ᱠᱟᱛᱮ ᱮᱱᱟᱝ, ᱫᱟᱠᱟ ᱚᱲᱟᱜ ᱥᱮ ᱵᱷᱤᱛᱟᱹᱨ ᱚᱲᱟᱜ ᱠᱚᱫᱚᱭ ᱜᱩᱨᱤᱡ ᱞᱩᱸᱰᱟᱹᱭᱟ ᱾ ᱫᱟᱠᱟ ᱪᱚᱸᱫᱟᱭ ᱞᱟᱦᱟᱨᱮ ᱪᱩᱞᱦᱟᱹ ᱨᱮᱱᱟᱜ ᱛᱚᱨᱚᱡ ᱫᱚ ᱫᱤᱱᱟᱹᱢ ᱜᱮ ᱚᱰᱚᱠ ᱜᱤᱰᱤ ᱠᱟᱛᱮ ᱪᱩᱞᱦᱟᱹ ᱫᱚᱭ ᱪᱷᱚᱸᱪᱟ ᱾ ᱤᱱᱟᱹ ᱛᱟᱭᱚᱢ ᱜᱟᱥᱟᱣ ᱜᱤᱛᱤᱞ ᱥᱟᱯᱷᱟ ᱟᱠᱟᱫ ᱴᱩᱠᱩᱡ, ᱪᱮᱞᱟᱝ ᱨᱮᱜᱮ ᱫᱟᱠᱟ, ᱩᱛᱩ ᱫᱚᱭ ᱤᱥᱤᱱᱟ ᱾ ᱱᱚᱝᱠᱟ ᱛᱮ ᱱᱚᱶᱟ ᱠᱟᱹᱢᱤ ᱠᱚᱫᱚ ᱚᱲᱟᱜ ᱨᱤᱱ ᱮᱴᱟᱜ ᱦᱚᱲ ᱠᱚ ᱩᱢ, ᱟᱹᱨᱩᱵ ᱯᱷᱟᱨᱪᱟᱜ ᱞᱟᱦᱟ ᱨᱮᱜᱮ ᱥᱟᱹᱛ ᱛᱮ ᱦᱩᱭ ᱟᱭᱟ ᱾ ᱤᱱᱟᱹ ᱛᱟᱭᱚᱢ ᱩᱱᱠᱩ ᱡᱚᱢ ᱮᱢᱟ ᱟᱠᱚ ᱟᱨ ᱩᱥᱟᱹᱨᱟ ᱜᱮ ᱵᱟᱹᱫᱽ, ᱵᱟᱹᱭᱦᱟᱹᱲ ᱠᱟᱹᱢᱤ ᱦᱚᱸ ᱚᱰᱚᱠᱚᱜ ᱦᱩᱭᱩᱜ ᱜᱮᱭᱟ ᱾
ᱵᱟᱹᱦᱩ ᱠᱩᱲᱤᱭ ᱛᱟᱦᱮᱸᱱ ᱚᱲᱟᱜ ᱨᱮᱫᱚ, ᱟᱺᱭᱴᱷᱟᱹ ᱡᱩᱴᱷᱟᱹ ᱵᱟᱹᱴᱤ ᱫᱷᱟᱹᱨᱤ ᱦᱚᱸ ᱦᱤᱨᱤᱡ ᱯᱟᱹᱥᱤᱨ ᱫᱚ ᱛᱟᱦᱮᱸ ᱵᱟᱝ ᱞᱟᱹᱠᱛᱤ ᱠᱟᱱᱟ ᱾ ᱫᱟᱜ ᱴᱷᱤᱞᱤ, ᱥᱩᱯᱟᱹᱲᱤ ᱠᱚᱫᱚ ᱞᱮᱛᱟᱲ ᱜᱮ ᱯᱮᱨᱮᱡ ᱪᱚᱲᱟᱝ ᱜᱮ ᱛᱟᱦᱮᱸᱱᱟ ᱾
ᱚᱲᱟᱜ ᱨᱮ ᱦᱟᱱᱦᱟᱨ ᱦᱚᱧᱦᱟᱨ ᱟᱭᱳ ᱵᱟᱵᱟ ᱥᱮ ᱢᱟᱨᱟᱝ ᱥᱟᱹᱜᱟᱹᱭ ᱟᱱ ᱦᱚᱲ ᱠᱚᱫᱚ ᱚᱠᱛᱚ ᱨᱮ ᱫᱟᱠᱟ ᱡᱚᱢ ᱞᱟᱹᱜᱤᱫ ᱯᱮᱨᱮᱡ ᱞᱚᱴᱟ ᱫᱟᱜ ᱤᱫᱤ ᱠᱟᱛᱮ ᱟᱠᱚ ᱥᱟᱢᱟᱝ ᱨᱮ ᱫᱚᱦᱚ ᱠᱟᱛᱮ ᱟᱨᱵᱟᱝ ᱪᱟᱞ ᱠᱟᱛᱮ ᱫᱟᱠᱟ ᱡᱚᱢ ᱞᱟᱹᱜᱤᱫ ᱟᱹᱨᱩᱵᱚᱜ ᱮ ᱢᱮᱛᱟ ᱠᱚᱣᱟ ᱾ ᱛᱤᱥ ᱨᱮᱦᱚᱸ ᱵᱤᱱ ᱞᱚᱴᱟ ᱫᱟᱜ ᱛᱮ ᱫᱟᱠᱟ ᱡᱚᱢ ᱫᱚ ᱵᱟᱭ ᱦᱚᱦᱚ ᱟᱠᱚᱣᱟ ᱾ ᱫᱟᱠᱟ ᱞᱩ ᱠᱟᱛᱮ ᱫᱟᱠᱟ ᱡᱩᱴᱤᱡ ᱞᱟᱹᱜᱤᱫ ᱦᱚᱸ ᱫᱟᱠᱟ ᱟᱹᱜᱩ ᱠᱟᱛᱮ ᱫᱮᱠᱷᱟᱣ ᱠᱟᱛᱮ ᱜᱮᱢ ᱠᱩᱞᱤ ᱮᱭᱟ, ᱫᱟᱠᱟ ᱵᱟᱭ ᱡᱚᱢ ᱠᱷᱟᱱ ᱫᱚᱭ ᱢᱟᱱᱟ ᱢᱮᱭᱟ, ᱵᱟᱝ ᱠᱷᱟᱱ ᱫᱟᱠᱟ ᱮᱢᱚᱜ ᱞᱟᱹᱜᱤᱫ ᱮ ᱟᱲᱟᱜ ᱟᱢᱟ ᱾ ᱛᱤᱥ ᱦᱚᱸ ᱠᱩᱞᱤ ᱞᱟᱦᱟ ᱠᱟᱛᱮ ᱫᱟᱠᱟ ᱫᱚ ᱵᱟᱝ ᱠᱚ ᱡᱩᱴᱤᱡ ᱟᱠᱚᱣᱟ ᱾ ᱫᱟᱠᱟ ᱡᱚᱢ ᱵᱮᱨᱮᱫ ᱥᱟᱶᱛᱮ ᱟᱺᱭᱴᱷᱟᱹ ᱵᱟᱹᱴᱤ ᱩᱴᱷᱟᱹᱣ ᱠᱟᱛᱮ ᱡᱚᱢ ᱟᱠᱟᱫ ᱴᱷᱟᱶ ᱞᱩᱸᱰᱟᱹ ᱛᱟᱨᱟ ᱠᱟᱛᱮ ᱵᱟᱹᱴᱤ ᱛᱷᱟᱹᱨᱤ ᱫᱚ ᱜᱟᱥᱟᱣ ᱜᱤᱛᱤᱞ ᱛᱟᱨᱟ ᱠᱟᱜ ᱜᱮ ᱵᱟᱹᱦᱩ ᱠᱩᱲᱤᱭᱟᱜ ᱱᱟᱯᱟᱭ ᱜᱩᱱ ᱫᱚ ᱠᱟᱱᱟ ᱾
ᱚᱲᱟᱜ ᱨᱮ ᱡᱩᱫᱤ ᱵᱟᱦᱟ ᱦᱚᱧᱦᱟᱨ ᱮ ᱛᱟᱦᱮᱸᱱᱟ, ᱩᱱᱤ ᱥᱟᱞᱟᱜ ᱨᱚᱲ ᱞᱟᱹᱠᱛᱤ ᱡᱟᱹᱱᱤ ᱜᱮ, ᱟᱹᱰᱤ ᱱᱮᱢᱚᱥ ᱟᱲᱟᱝ ᱛᱮᱜᱮ ᱨᱚᱯᱚᱲ ᱫᱚ ᱦᱩᱭᱩᱜᱼᱟ ᱾ ᱦᱚᱧᱦᱟᱨᱮᱭᱟ ᱟᱜ ᱫᱚ ᱪᱮᱫ ᱥᱟᱢᱟᱱ ᱦᱚᱸ ᱡᱚᱴᱮᱫ ᱡᱚᱯᱚᱴᱮᱫ ᱫᱚ ᱥᱟᱶᱛᱟ ᱨᱮᱱᱟᱜ ᱨᱟᱭᱨᱤᱛ ᱞᱮᱠᱟᱛᱮ ᱵᱟᱨᱚᱢ ᱛᱟᱦᱮᱸᱱᱟ ᱾ ᱟᱨ ᱟᱹᱠᱤᱱ ᱦᱚᱧᱦᱟᱨᱮᱭᱟ ᱡᱚᱴᱮᱫ ᱡᱚᱯᱚᱴᱮᱫ ᱦᱚᱸ ᱢᱟᱱᱟ ᱜᱮᱭᱟ ᱾ ᱡᱟᱦᱟᱸᱱᱟᱜ ᱡᱤᱱᱤᱥ ᱦᱚᱧᱦᱟᱨ ᱛᱮᱫ ᱮᱢᱟᱦᱟᱭ ᱨᱮᱱᱟᱜ ᱛᱟᱦᱮᱸᱱ ᱠᱷᱟᱱ ᱫᱚ, ᱟᱡ ᱥᱟᱢᱟᱝ ᱨᱮ ᱞᱟᱹᱭ ᱟᱭ ᱛᱩᱞᱩᱡ ᱥᱟᱺᱜᱤᱧ ᱫᱷᱟᱨᱟ ᱨᱮ ᱚᱛᱨᱮ ᱫᱚᱦᱚᱣᱟᱭ ᱦᱩᱭᱩᱜᱼᱟ ᱾
ᱤᱨᱤᱞ ᱠᱩᱲᱤ ᱠᱚᱲᱟ ᱥᱟᱶ ᱫᱚ ᱡᱚᱴᱟᱣ ᱞᱮᱠᱟᱱ ᱥᱟᱹᱜᱟᱹᱭ ᱾ ᱱᱩᱠᱩ ᱥᱟᱶ ᱫᱚ ᱵᱩᱜᱤ, ᱵᱟᱹᱲᱤᱡ, ᱜᱟᱱᱚᱜ ᱵᱟᱝ ᱜᱟᱱᱚᱜ ᱡᱚᱛᱚ ᱥᱟᱶ ᱜᱮ ᱡᱚᱛᱚᱣᱟᱜ ᱨᱚᱯᱚᱲ ᱜᱟᱯᱟᱞᱢᱟᱨᱟᱣ ᱜᱟᱱᱚᱜᱼᱟ ᱾
ᱯᱟᱨᱟᱵᱽ ᱯᱩᱱᱟᱹᱭ ᱵᱚᱸᱜᱟ ᱵᱳᱨᱳ ᱨᱮ ᱟᱹᱰᱤ ᱱᱤᱨᱵᱟᱨ ᱠᱟᱛᱮ, ᱥᱟᱡᱟᱣ ᱥᱟᱯᱲᱟᱣ, ᱡᱚᱲ ᱡᱚᱜᱟᱲ ᱦᱩᱭ ᱟᱭᱟ ᱾ ᱯᱮᱲᱟ ᱯᱟᱹᱦᱬᱟᱹ ᱦᱤᱨᱤ ᱠᱚ ᱦᱤᱡᱩᱜ ᱨᱮ, ᱩᱱᱠᱩ ᱯᱩᱭᱞᱩ ᱫᱚ ᱢᱟᱹᱪᱤ, ᱯᱟᱨᱠᱚᱢ ᱵᱤᱞ ᱠᱟᱛᱮ ᱫᱩᱲᱩᱵ ᱢᱮᱛᱟ ᱠᱚ ᱦᱩᱭᱩᱜᱼᱟ ᱾ ᱤᱱᱟᱹ ᱛᱟᱭᱚᱢ ᱥᱟᱯᱷᱟ ᱞᱚᱴᱟᱨᱮ ᱯᱮᱨᱮᱡ ᱫᱟᱜ ᱟᱹᱜᱩ ᱠᱟᱛᱮ ᱦᱩᱰᱤᱧ ᱢᱟᱨᱟᱝ ᱵᱚᱭᱚᱥ ᱟᱨᱵᱟᱝ ᱥᱟᱹᱜᱟᱹᱭ ᱞᱮᱠᱟ ᱛᱮ ᱜᱚᱰ ᱡᱚᱦᱟᱨ ᱟᱠᱚ ᱦᱩᱭᱩᱜᱼᱟ ᱾ ᱤᱱᱟᱹ ᱛᱟᱭᱚᱢ ᱯᱮᱨᱮᱡ ᱞᱚᱴᱟ ᱫᱟᱜ ᱟᱹᱜᱩ ᱠᱟᱛᱮ ᱡᱚᱢ ᱞᱟᱹᱜᱤᱫ ᱫᱮᱞᱟ ᱟᱠᱚ ᱦᱩᱭᱩᱜᱼᱟ ᱾ ᱵᱟᱹᱦᱩ ᱠᱩᱲᱤ ᱞᱟᱹᱜᱤᱫ ᱫᱚ ᱯᱮᱲᱟ ᱯᱟᱹᱦᱬᱟᱹ ᱞᱟᱹᱜᱤᱫ ᱜᱚᱨᱚᱡᱽ ᱟᱛᱟᱝ ᱫᱟᱨᱟᱢ ᱟᱨ ᱥᱤᱵᱤᱞ ᱨᱚᱲ ᱜᱮ ᱟᱹᱰᱤ ᱢᱟᱨᱟᱝ ᱠᱟᱛᱷᱟ ᱠᱟᱱᱟ ᱾ ᱵᱟᱹᱦᱩ ᱠᱩᱲᱤᱭᱟᱜ ᱵᱮᱵᱷᱟᱨ ᱱᱟᱯᱟᱭ ᱛᱟᱦᱮᱸᱱ ᱠᱷᱟᱱ ᱯᱮᱲᱟ ᱯᱟᱹᱦᱬᱟᱹ ᱦᱚᱸ ᱦᱤᱨᱤ ᱦᱤᱯᱨᱤ ᱦᱤᱡᱩᱜ ᱨᱮ ᱠᱩᱥᱤ ᱠᱚ ᱵᱩᱡᱷᱟᱹᱣᱟ ᱾
ᱦᱚᱱ ᱦᱚᱯᱚᱱ ᱠᱚ ᱡᱟᱱᱟᱢ ᱮᱱ ᱛᱟᱭᱚᱢ ᱩᱱᱠᱩ ᱦᱟᱨᱟ ᱵᱩᱨᱩ ᱟᱨ ᱥᱮᱵᱟ ᱡᱚᱛᱚᱱ ᱠᱚᱦᱚᱸ ᱵᱟᱹᱦᱩ ᱠᱩᱲᱤ ᱥᱮ ᱟᱭᱳᱣᱟᱜ ᱟᱺᱜᱤᱵᱷᱟᱨ ᱜᱮ ᱠᱟᱱᱟ ᱾ ᱦᱟᱨᱟ ᱵᱩᱨᱩ ᱥᱟᱶᱛᱮ ᱱᱟᱯᱟᱭ ᱥᱮᱪᱮᱫ ᱮᱢᱟᱠᱚ ᱦᱚᱸ ᱵᱟᱹᱦᱩ ᱠᱩᱲᱤ ᱥᱮ ᱟᱭᱳᱣᱟᱜ ᱠᱟᱹᱢᱤ ᱜᱮ ᱠᱟᱱᱟ ᱾ ᱚᱱᱟᱛᱮ ᱵᱟᱹᱦᱩ ᱠᱩᱲᱤ ᱥᱮ ᱟᱭᱳ ᱦᱚᱸ ᱥᱟᱱᱟᱢ ᱞᱮᱠᱟᱱ ᱥᱮᱪᱮᱫ ᱛᱮ ᱥᱚᱝ ᱯᱩᱨᱩᱱ ᱛᱟᱦᱮᱸᱱ ᱞᱟᱹᱠᱛᱤ ᱠᱟᱱᱟ ᱾ ᱥᱮᱪᱮᱫ ᱟᱠᱟᱱ ᱟᱭᱳ ᱜᱮ ᱦᱚᱱ ᱦᱚᱯᱚᱱ ᱠᱚ ᱱᱟᱯᱟᱭ ᱥᱮᱪᱮᱫ ᱟᱨ ᱱᱟᱯᱟᱭ ᱞᱟᱦᱟᱜ ᱦᱚᱨ ᱮ ᱩᱫᱩᱜ ᱫᱟᱲᱮᱭᱟ ᱠᱚᱣᱟ ᱾
ᱡᱤᱭᱚᱱ ᱨᱮ ᱜᱷᱟᱨᱚᱸᱡᱽ ᱨᱮ ᱡᱟᱦᱟᱸ ᱛᱤᱱ ᱢᱟᱨᱟᱝ ᱢᱟᱨᱟᱝ ᱟᱱᱟᱴ ᱮᱴᱠᱮᱴᱚᱬᱮ ᱜᱮ ᱦᱩᱭᱩᱜ, ᱡᱟᱦᱟᱸ ᱞᱮᱠᱟᱛᱮ ᱚᱱᱟ ᱟᱱᱟᱴ ᱥᱩᱫᱷᱟᱹᱨ ᱠᱟᱛᱮ ᱵᱟᱹᱦᱩ ᱠᱩᱲᱤ ᱟᱡᱟᱜ ᱜᱷᱟᱨᱚᱸᱡᱽ ᱡᱚᱛᱚᱱ ᱫᱚᱦᱚ ᱦᱩᱭ ᱟᱭᱟ ᱾ ᱢᱤᱫ ᱵᱟᱹᱦᱩ ᱠᱩᱲᱤ ᱦᱟᱞᱟᱛ ᱴᱷᱮᱱ ᱦᱟᱨᱟᱣ ᱠᱟᱛᱮ ᱫᱚ ᱛᱤᱥ ᱦᱚᱸ ᱡᱟᱶᱟᱭ ᱚᱲᱟᱜ ᱵᱟᱭ ᱵᱟᱹᱜᱤᱭᱟᱜᱼᱟ ᱾ ᱪᱮᱫᱟᱜ ᱥᱮ ᱡᱟᱶᱟᱭ ᱠᱮᱫᱮ ᱛᱟᱭᱚᱢ ᱟᱡᱟᱜ ᱚᱲᱟᱜ ᱢᱟ ᱚᱱᱟ ᱜᱮ ᱾ ᱟᱡᱟᱜ ᱫᱩᱠ ᱥᱩᱠ ᱵᱩᱜᱤ ᱵᱟᱹᱲᱤᱡ ᱦᱚᱸ ᱚᱸᱰᱮ ᱜᱮ ᱾ ᱡᱩᱫᱤ ᱦᱟᱞᱟᱛ ᱥᱟᱶ ᱵᱟᱝ ᱫᱟᱲᱮ ᱠᱟᱛᱮ ᱡᱟᱦᱟᱸᱱ ᱮᱛᱮᱫ ᱠᱷᱟᱹᱛᱤᱨ ᱜᱮ ᱵᱟᱹᱦᱩ ᱠᱩᱲᱤ ᱡᱟᱱᱟᱢ ᱚᱲᱟᱜ ᱠᱷᱚᱱ ᱡᱟᱭᱡᱩᱜᱽ ᱞᱟᱹᱜᱤᱫ ᱮ ᱚᱰᱚᱠ ᱥᱟᱹᱨᱤ ᱮᱱᱟ, ᱱᱚᱶᱟ ᱫᱚ ᱩᱱᱤ ᱠᱩᱲ ᱦᱚᱯᱚᱱᱟᱜ ᱡᱤᱭᱚᱱ ᱨᱮᱱᱟᱜ ᱛᱟᱲᱟᱢ ᱰᱟᱦᱟᱨ ᱵᱤᱱᱤᱰ ᱨᱮ ᱡᱚᱛᱚ ᱠᱷᱚᱱ ᱢᱟᱨᱟᱝ ᱦᱟᱨᱟᱣ ᱠᱟᱱ ᱛᱟᱭᱟ ᱾ ᱚᱱᱟᱛᱮ ᱢᱤᱫ ᱠᱩᱲᱤ ᱦᱚᱯᱚᱱ ᱥᱮ ᱵᱟᱹᱦᱩ ᱠᱩᱲᱤ ᱫᱚ ᱟᱡᱟᱜ ᱜᱷᱟᱨᱚᱸᱡᱽ ᱵᱟᱧᱪᱟᱣ ᱫᱚᱦᱚᱭ ᱜᱮ ᱡᱚᱛᱚ ᱠᱷᱚᱱ ᱢᱟᱨᱟᱝ ᱟᱺᱜᱤᱵᱷᱟᱨ ᱠᱟᱱ ᱛᱟᱭᱟ ᱾
***
