ᱫᱷᱟᱹᱨᱛᱤ ᱨᱮᱢᱟᱢ ᱡᱟᱱᱟᱢ ᱟᱠᱟᱱ ᱾
ᱪᱟᱸᱫᱚ ᱥᱤᱨᱡᱚᱱ ᱡᱤᱭᱚᱱ ᱛᱟᱢ ᱾᱾
ᱢᱚᱱᱮ ᱡᱤᱣᱤ ᱟᱞᱚᱢ ᱠᱷᱟᱴᱚᱭ ᱾
ᱛᱤᱨᱞᱟᱹ ᱦᱚᱯᱚᱱ ᱟᱢ ᱾᱾
ᱢᱮᱱᱟᱜ ᱛᱟᱢᱟ ᱵᱩᱫᱷᱤ ᱫᱤᱥᱟᱹ ᱾
ᱢᱮᱫ ᱢᱩᱴᱷᱟᱹᱱ ᱱᱤᱯᱷᱩᱴ ᱦᱚᱲᱢᱚ ᱾᱾
ᱱᱤᱫᱷᱟᱹᱱ ᱱᱟᱪᱟᱨ ᱟᱞᱚᱢ ᱢᱮᱱᱚᱜ ᱾
ᱛᱤᱨᱞᱟᱹ ᱦᱚᱯᱚᱱ ᱟᱢ ᱾᱾
ᱟᱭᱳᱼᱵᱟᱵᱟ, ᱦᱟᱱᱦᱟᱨᱼ ᱦᱚᱧᱦᱟᱨ ᱾
ᱩᱱᱠᱩ ᱡᱤᱣᱤᱫ ᱵᱚᱸᱜᱟ ᱛᱟᱢ ᱾᱾
ᱩᱱᱠᱩ ᱛᱷᱩᱢ ᱛᱮ ᱥᱩᱞᱩᱠᱮᱢ ᱛᱟᱦᱮᱸᱱ ᱾
ᱛᱤᱨᱞᱟᱹ ᱦᱚᱯᱚᱱ ᱟᱢ ᱾᱾
ᱮᱴᱠᱮᱴᱚᱬᱮ ᱮᱛᱚᱢ ᱠᱟᱛᱮ ᱾
ᱜᱷᱟᱨᱚᱸᱡᱽ ᱥᱩᱞᱩᱠ ᱫᱚᱦᱚᱭ ᱛᱟᱢ ᱾᱾
ᱥᱟᱶᱛᱟ ᱥᱩᱥᱟᱹᱨ ᱠᱟᱹᱢᱤ ᱨᱮᱦᱚᱸ ᱾
ᱛᱤᱨᱞᱟᱹ ᱦᱚᱯᱚᱱ ᱟᱢ ᱾᱾
ᱨᱟᱡᱽ ᱟᱹᱨᱤ, ᱥᱟᱶᱛᱟ ᱟᱹᱨᱤ ᱾
ᱡᱷᱚᱛᱚ ᱨᱮᱜᱮ ᱦᱚᱠ ᱛᱟᱢ ᱾᱾
ᱠᱟᱹᱢᱤ ᱛᱮᱭᱟᱜ ᱠᱟᱹᱢᱤ ᱞᱟᱹᱜᱤᱫ ᱾
ᱛᱤᱨᱞᱟᱹ ᱦᱚᱯᱚᱱ ᱟᱢ ᱾᱾
