ᱤᱧ ᱵᱩᱰᱤ ᱟᱭᱳᱣᱟᱜ ᱩᱢᱮᱨ ᱞᱮᱠᱷᱟ ᱡᱚᱠᱷᱟ ᱯᱮ ᱤᱥᱤ ᱥᱟᱨᱟ ᱥᱟᱹᱴᱩᱜ ᱠᱟᱹᱢᱤ ᱠᱟᱛᱮ ᱛᱟᱦᱮᱸᱱᱟᱭ ᱟᱹᱰᱤ ᱠᱩᱥᱤ ᱾ ᱯᱷᱩᱲᱩᱜ ᱠᱷᱟᱞᱟᱜ ᱥᱚᱲᱛᱟ ᱯᱟᱛᱲᱟ ᱯᱟᱹᱴᱤ ᱨᱚᱜ ᱥᱤᱞᱟᱹᱭ ᱵᱮᱱᱟᱣᱼᱟᱭ ᱯᱟᱹᱴᱤᱭᱟᱹ ᱟᱨ ᱡᱚᱱᱚᱜ ᱠᱚᱦᱚᱸ ᱱᱟᱯᱟᱭ ᱪᱚᱨᱚᱠ ᱜᱟᱞᱟᱝ ᱟᱭ ᱾ ᱴᱩᱠᱩᱡ ᱨᱮ ᱦᱟᱺᱰᱤ ᱦᱟᱹᱨ ᱠᱟᱛᱮ ᱨᱚᱠᱟ ᱵᱟᱥᱟ ᱡᱟᱣᱟᱭᱟᱭ ᱦᱟᱴ ᱦᱤᱞᱚᱜ ᱦᱚᱨ ᱟᱛᱚᱢᱨᱮ ᱡᱷᱟᱨ ᱵᱚᱰᱚᱡ ᱵᱮᱯᱟᱨ ᱟᱭ ᱾ ᱟᱭᱳ ᱴᱩᱠᱩᱡ ᱫᱤᱯᱤᱞ ᱠᱟᱛᱮ ᱤᱫᱤ ᱥᱮᱴᱮᱨ ᱚᱴᱚ ᱟᱭᱟᱭ ᱥᱟᱶᱛᱮ ᱴᱟᱠᱟ ᱯᱩᱭᱥᱟᱹ ᱠᱚᱦᱚᱸ ᱞᱮᱠᱷᱟ ᱦᱤᱥᱟᱹᱵᱽ ᱜᱚᱲᱚ ᱟᱭ ᱾ ᱢᱤᱫ ᱫᱤᱱᱤᱧ ᱪᱟᱞᱟᱣ ᱞᱮᱱᱟ ᱠᱷᱩᱞᱟᱹ ᱢᱮᱞᱟ ᱫᱚᱠᱟᱱ ᱴᱷᱮᱱ ᱧᱮᱞ ᱠᱮᱫ ᱠᱚᱣᱟᱹᱧ ᱠᱷᱟᱹᱞᱤ ᱵᱩᱞ ᱢᱟᱛᱟᱲ ᱦᱚᱲ ᱮᱠᱷᱮᱱ ᱾ ᱤᱧ ᱵᱩᱰᱤ ᱟᱭᱳ ᱢᱮᱛᱟᱧᱟᱭ ᱮ ᱱᱟ ᱜᱚᱲᱚᱢ ᱢᱟᱥᱮ ᱢᱟᱥᱮ ᱯᱷᱩᱲᱩᱜ ᱠᱷᱟᱞᱟᱜ ᱜᱚᱦᱨᱟᱠ ᱛᱟᱞᱟᱝ ᱪᱟᱞ ᱵᱟᱲᱟ ᱜᱚᱫ ᱟᱠᱚ ᱢᱮ ᱾ ᱟᱭᱳ ᱦᱚᱸᱭ ᱟᱹᱪᱩ ᱜᱚᱫᱤᱧᱟ ᱢᱟᱥᱮ ᱭᱳ ᱞᱚᱜᱚᱱ ᱢᱟᱼᱢᱟ ᱥᱚᱝ ᱟᱺᱬᱛᱤ ᱜᱚᱫ ᱟᱠᱚ ᱢᱮ ᱢᱟᱹᱴᱷᱤᱭᱟᱹ ᱫᱚ ᱚᱱᱮ ᱛᱟᱨᱟ ᱾
ᱵᱟᱱᱟ ᱦᱚᱲᱤᱧ ᱢᱮᱛᱟᱫ ᱠᱤᱱᱟ ᱤᱧ ᱫᱚ ᱵᱟᱝ ᱟᱹᱛᱤᱧᱟ ᱵᱟᱹᱧ ᱪᱟᱪᱟᱞ ᱵᱟᱹᱧ ᱥᱚᱥᱚᱝ ᱤᱧ ᱫᱩᱧ ᱚᱞ ᱯᱟᱲᱦᱟᱣᱜᱼᱟ ᱾ ᱚᱞ ᱫᱚᱭ ᱩᱜᱼᱫᱩ ᱥᱩᱜᱼᱛᱩᱜᱼᱟ ᱢᱟᱨᱥᱟᱞ ᱦᱚᱨ ᱰᱟᱦᱟᱨ ᱛᱮ ᱮᱢᱚᱜ ᱟᱭ ᱟᱹᱠᱤᱞ ᱜᱮᱭᱟᱱ ᱵᱤᱪᱟᱹᱨ ᱵᱮᱵᱷᱟᱨ ᱫᱤᱞ ᱫᱟᱲᱮ ᱾ ᱯᱟᱲᱦᱟᱣ ᱯᱩᱨᱟᱹᱣ ᱠᱟᱛᱮ ᱢᱤᱫᱼᱫᱤᱱ ᱢᱟᱪᱮᱛᱟᱹᱱᱤ ᱜᱮ ᱵᱮᱱᱟᱣ ᱥᱟᱹᱱᱟᱹᱧ ᱟᱵᱚ ᱥᱟᱶᱛᱟ ᱨᱤᱱ ᱦᱚᱲ ᱠᱚ ᱪᱮᱫ ᱥᱮᱪᱮᱫ ᱥᱤᱠᱷᱱᱟᱹᱛ ᱠᱚᱣᱟᱹᱧ ᱾ ᱦᱟᱺᱰᱤ ᱟᱹᱠᱷᱨᱤᱧ ᱵᱮᱯᱟᱨ ᱨᱮ ᱟᱢᱫᱟ ᱟᱹᱣᱦᱟᱹ ᱞᱟᱵᱽ ᱧᱟᱢᱚᱜᱼᱟ ᱧᱩᱧᱩ ᱦᱚᱲᱟᱜ ᱜᱷᱟᱸᱨᱚᱡᱽ ᱨᱮ ᱤᱠᱷᱟᱹᱱ ᱥᱩᱠ ᱥᱩᱞᱩᱠ ᱩᱡᱟᱹᱲᱚᱜᱼᱟ ᱾ ᱯᱟᱹᱨᱠᱟᱹᱣ ᱠᱷᱟᱹᱛᱤᱨ ᱧᱩᱻᱭᱟᱭ ᱫᱷᱟᱨ ᱩᱫᱷᱟᱹᱨ ᱠᱤᱨᱤᱧ ᱠᱟᱛᱮ ᱪᱟᱠᱷᱱᱟ ᱪᱟᱴᱚᱜ ᱠᱚᱴᱚᱜ ᱠᱟᱜᱼᱟᱭ ᱱᱟᱞᱦᱟ ᱠᱩᱲᱟᱹᱭ ᱥᱟᱱᱟᱢ ᱡᱮᱛᱮ ᱾ ᱫᱟᱠᱟ ᱴᱩᱠᱩᱡ ᱰᱤᱵᱽᱨᱤ ᱵᱟᱹᱛᱤ ᱨᱚᱦᱚᱲ ᱨᱚᱠᱚᱲ ᱨᱚᱠᱚᱲ ᱚᱲᱟᱜᱨᱮ ᱵᱟᱹᱱᱩᱜ ᱟᱱ ᱥᱟᱣᱫᱟ ᱯᱚᱛᱚᱨ ᱪᱮᱫ ᱦᱚᱸ ᱥᱩᱱᱩᱢ ᱵᱩᱞᱩᱝ ᱪᱟᱣᱞᱮ ᱾ ᱚᱵᱷᱟᱵᱽ ᱟᱱᱟᱴ ᱞᱟᱜᱟᱣ ᱠᱚᱜᱼᱟ ᱦᱚᱨᱚᱜ ᱵᱟᱸᱫᱮ ᱡᱚᱢ ᱧᱩᱨᱮ ᱱᱮᱭᱟᱣ ᱨᱚᱯᱚᱲ ᱫᱟᱯᱟᱞ ᱛᱚᱯᱚᱞᱟᱭ ᱮᱨᱟ ᱥᱟᱶ ᱜᱷᱟᱨᱚᱸᱡᱽ ᱨᱮ ᱫᱤᱱ ᱜᱮ ᱾ ᱟᱡ ᱨᱤᱱ ᱦᱚᱱ ᱦᱚᱯᱚᱱ ᱜᱤᱫᱽᱨᱟᱹ ᱥᱮᱱᱚᱜ ᱠᱟᱱ ᱠᱚ ᱚᱞᱚᱜ ᱟᱥᱲᱟ ᱯᱚᱛᱚᱵ ᱠᱷᱟᱛᱟ ᱠᱚᱞᱚᱢ ᱠᱤᱪᱨᱤᱫ ᱵᱟᱭ ᱠᱩᱲᱟᱹᱣ ᱫᱟᱲᱮ ᱟᱠᱚᱣᱟ ᱾
ᱢᱚᱱᱮ ᱨᱮᱱᱟᱜ ᱠᱟᱛᱷᱟ ᱡᱚᱛᱚ ᱞᱟᱹᱭ ᱥᱚᱫᱚᱨ ᱠᱮᱫ ᱠᱷᱟᱹᱱᱤᱧ ᱟᱭᱳ ᱵᱩᱰᱤ ᱟᱭᱳ ᱵᱟᱱᱟ ᱦᱚᱲ ᱟᱹᱰᱤ ᱠᱤᱱ ᱠᱚᱭᱚᱜ ᱛᱷᱤᱨ ᱠᱤᱫᱤᱧ ᱾ ᱠᱟᱹᱢᱤᱨᱮ ᱩᱫᱩᱜ ᱥᱚᱫᱚᱨ ᱢᱮ ᱵᱩᱰᱤ ᱟᱭᱳᱭ ᱢᱮᱛᱟᱫ ᱫᱤᱧᱟ ᱡᱟᱦᱟᱸ ᱡᱟᱦᱟᱸ ᱠᱟᱛᱷᱟ ᱠᱚᱢ ᱨᱚᱲ ᱟᱸᱡᱚᱢ ᱟᱫ ᱞᱤᱧᱟ ᱾ ᱟᱭᱳᱭ ᱢᱮᱱ ᱡᱩᱴᱤᱡ ᱟᱹᱫᱤᱧ ᱜᱚᱨᱚᱡᱽ ᱟᱛᱮ ᱯᱟᱲᱦᱟᱣᱜ ᱢᱮ ᱡᱚᱥ ᱥᱮᱴᱮᱨ ᱥᱟᱱᱟᱢ ᱠᱟᱱᱠᱷᱟᱱ ᱢᱚᱱᱮ ᱨᱤᱦᱤᱴ ᱫᱚᱲᱦᱚᱭ ᱢᱮ ᱾ ᱤᱱ ᱦᱤᱞᱚᱜ ᱠᱷᱚᱱᱟᱜ ᱜᱮ ᱟᱹᱰᱤ ᱠᱩᱨᱩᱢᱩᱴᱩᱧ ᱚᱞᱚᱜ ᱠᱟᱱᱟ ᱢᱤᱫ ᱢᱟᱪᱮᱛᱟᱹᱱᱤ ᱵᱮᱱᱟᱣ ᱞᱟᱹᱜᱤᱫ ᱟᱸᱥ ᱛᱤᱧ ᱴᱷᱟᱹᱣᱠᱟᱹ ᱟᱠᱟᱱᱟ ᱾
