ᱵᱷᱟᱨᱚᱛ ᱫᱤᱥᱚᱢ ᱵᱚᱰᱟᱨ ᱱᱟᱜᱟᱨ
ᱥᱤᱢᱟᱹ ᱟᱲᱮᱨᱮ ᱛᱤᱸᱜᱩ ᱢᱮᱱᱟᱢᱟ,
ᱡᱟᱱᱟᱢ ᱫᱤᱥᱚᱢ ᱵᱟᱧᱪᱟᱣ ᱞᱟᱹᱜᱤᱫ
ᱵᱚᱱᱫᱩᱠ, ᱵᱟᱹᱨᱩᱫᱽ ᱟᱛᱮᱢ ᱞᱟᱲᱹᱦᱟᱹᱭ ᱠᱟᱱ ।
ᱪᱮᱫ ᱥᱤᱧ, ᱪᱮᱫ ᱧᱤᱫᱟᱹ ᱥᱟᱨᱟᱜᱷᱟᱹᱲᱤ
ᱢᱮᱫ ᱨᱮ ᱡᱟᱹᱯᱤᱫ ᱵᱟᱹᱱᱩᱜᱼᱟ,
ᱟᱢ ᱪᱮᱛᱟᱱ ᱨᱮ ᱢᱮᱱᱟᱜ ᱫᱤᱥᱚᱢ
ᱨᱩᱠᱷᱭᱟᱹ ᱨᱮᱱᱟᱜ ᱢᱟᱨᱟᱝ ᱟᱺᱜᱤᱵᱷᱟᱨ ।
ᱜᱟᱹᱰᱤ ᱛᱮᱠᱚ ᱥᱟᱜᱟᱲ ᱯᱮ ᱦᱟᱱᱛᱮ-ᱱᱷᱟᱛᱮ
ᱵᱟᱹᱱᱩᱜ ᱴᱷᱟᱹᱣᱠᱟ ᱥᱟᱹᱦᱤᱸᱡ ᱴᱷᱟᱶ,
ᱛᱮᱦᱮᱧ ᱱᱚᱰᱮ, ᱜᱟᱯᱟ ᱦᱟᱸᱰᱮ
ᱛᱟᱦᱮᱸᱱ ᱞᱟᱹᱜᱤᱫ ᱜᱷᱟᱹᱴᱤ ᱯᱮ ᱚᱰᱟᱣ ।
ᱥᱤᱛᱩᱝ, ᱞᱚᱞᱚ ᱡᱷᱚᱛᱚᱭᱟᱜ ᱮᱢ ᱥᱟᱦᱟᱣ
ᱵᱩᱨᱩ ᱫᱷᱟᱨᱮ,ᱫᱷᱤᱨᱤ ᱫᱟᱱᱟᱝ, ᱵᱚᱨᱳᱯᱷ ᱛᱟᱞᱟ,
ᱞᱟᱹᱲᱦᱟᱹᱭ ᱞᱟᱹᱜᱤᱫ ᱛᱟᱦᱮᱸᱱᱟᱢ ᱥᱟᱯᱲᱟᱣ
ᱵᱚᱱᱫᱩᱠ ᱟᱛᱮ ᱟᱢ ᱨᱮᱱ ᱵᱟᱭᱹᱨᱤ ᱠᱚ ᱥᱟᱞᱟᱜ ।
ᱟᱢ ᱫᱚ ᱵᱷᱟᱨᱚᱛ ᱫᱤᱥᱚᱢ ᱨᱮᱱ ᱜᱚᱨᱚᱵᱽ
ᱫᱤᱥᱚᱢ ᱟᱭᱳᱭᱤᱡ ᱟᱢ ᱫᱚ ᱡᱩᱣᱟᱹᱱ ᱵᱤᱨ,
ᱟᱢ ᱠᱷᱟᱹᱛᱤᱨ ᱛᱮᱦᱮᱧ ᱩᱰᱟᱹᱣᱜ ᱠᱟᱱ ᱵᱷᱟᱨᱚᱛ
ᱫᱤᱥᱚᱢ ᱥᱤᱢᱟᱹ ᱟᱲᱮᱨᱮ ᱪᱤᱨᱜᱟᱹᱞ ᱪᱤᱨ ।
ᱜᱷᱟᱨᱚᱸᱡᱽ ᱢᱟᱭᱟ, ᱡᱚᱲᱟᱣ ᱥᱤᱠᱲᱤ
ᱛᱚᱯᱟᱜ ᱠᱟᱛᱮ ᱢᱚᱱᱮᱢ ᱜᱚᱴᱟ ᱠᱮᱫ,
ᱡᱤᱣᱤ ᱟᱞᱟᱭ ᱠᱟᱛᱮ ᱨᱮᱦᱚᱸ ᱡᱟᱱᱟᱢ ᱫᱤᱥᱚᱢ
ᱵᱟᱱᱪᱟᱣ ᱨᱮᱱᱟᱜ ᱠᱤᱨᱟᱹᱢ ᱦᱟᱛᱟᱣ ᱠᱮᱫ ।
ᱵᱟᱹᱭᱨᱤ ᱠᱚᱣᱟᱜ ᱵᱚᱱᱫᱩᱠ, ᱵᱩᱞᱮᱴ ᱥᱮᱸᱜᱮᱞ
ᱡᱷᱟᱸᱡᱽᱨᱟ ᱠᱮᱫᱟᱭ ᱟᱢᱟᱜ ᱠᱚᱲᱟᱢ,
ᱥᱤᱧᱚᱛ, ᱦᱟᱥᱟ ᱨᱮ ᱞᱤᱸᱜᱤ ᱟᱹᱛᱩᱭᱮᱱ
ᱟᱢᱟᱜ ᱦᱚᱲᱢᱚ ᱵᱮᱨᱮᱞ ᱞᱚ-ᱞᱚ ᱢᱟᱭᱟᱢ ।
ᱟᱢ ᱧᱮᱞᱛᱮ ᱛᱮᱦᱮᱧ ᱫᱤᱥᱚᱢ ᱟᱭᱳᱣᱟᱜ
ᱠᱚᱲᱟᱢ ᱠᱮᱪᱟᱜᱚᱜ, ᱦᱚᱢᱚᱨ ᱦᱟᱞᱟᱝ ᱠᱟᱱ,
ᱮᱱᱛᱮ ᱨᱮᱦᱚᱸ ᱟᱢ ᱫᱚ ᱡᱩᱣᱟᱹᱱ ᱵᱟᱝ ᱮᱢ ᱟᱸᱡᱚᱢ
ᱢᱮᱱᱟᱜ ᱢᱮᱭᱟ ᱛᱷᱤᱨ ᱪᱮᱫ ᱜᱮ ᱵᱟᱝ ᱮᱢ ᱨᱚᱨᱚᱲ ᱠᱟᱱ ।
ᱦᱟᱭᱨᱮ ᱡᱩᱣᱟᱹᱱ ᱡᱟᱱᱟᱢ ᱫᱤᱥᱚᱢ ᱮᱢ ᱵᱟᱹᱜᱤᱭᱟᱫ
ᱛᱮᱦᱮᱧ ᱟᱢ ᱫᱚᱢ ᱦᱳᱭᱮᱱᱟ ᱥᱚᱦᱤᱫᱽ,
ᱢᱮᱫ ᱡᱟᱹᱯᱤᱫ ᱞᱟᱦᱟ ᱢᱤᱫ ᱠᱟᱛᱷᱟ, ᱢᱤᱫ ᱟᱲᱟᱝ
ᱢᱮᱱ ᱞᱮᱫᱟᱢ ᱡᱚᱭᱦᱤᱱᱫᱽ,ᱡᱚᱭᱦᱤᱱᱫᱽ ।
ᱡᱟᱱᱟᱢ ᱫᱤᱥᱚᱢ ᱵᱚᱰᱟᱨ ᱟᱲᱮ ᱞᱟᱹᱲᱦᱟᱹᱭ ᱨᱮ
ᱡᱟᱱᱟᱢ ᱟᱭᱳᱭ ᱟᱫ ᱠᱮᱫᱮ ᱡᱟᱱᱟᱢ ᱦᱚᱯᱚᱱ,
ᱧᱩᱛᱩᱢᱮᱢ ᱚᱞ ᱠᱮᱫ ᱡᱤᱭᱤ ᱟᱞᱟᱭ ᱠᱟᱛᱮ
ᱱᱚᱣᱟ ᱜᱮ ᱛᱟᱦᱮᱸ ᱞᱮᱱᱟ ᱡᱟᱹᱱᱤᱡ ᱢᱚᱞᱚᱝ ᱞᱤᱠᱷᱚᱱ ।
ᱛᱮᱦᱮᱧ ᱟᱢ ᱵᱟᱹᱱᱩᱜ ᱢᱮᱭᱟ ᱢᱮᱫ ᱥᱟᱢᱟᱝ
ᱫᱤᱥᱚᱢ ᱟᱭᱳ ᱦᱚᱯᱚᱱ ᱵᱤᱨ ᱡᱩᱣᱟᱹᱱ,
ᱟᱢ ᱞᱟᱹᱜᱤᱫ ᱤᱧᱟᱜ ᱢᱤᱫᱴᱟᱹᱝ ᱜᱮ ᱟᱲᱟᱝ
ᱡᱚᱭᱦᱤᱱᱫᱽ, ᱡᱚᱭᱦᱤᱱᱫᱽ, ᱡᱚᱭᱦᱤᱱᱫᱽ ।।
