(ᱱᱚᱶᱟ ᱫᱚ ᱥᱮᱫᱟᱭ ᱠᱟ.ᱦᱱᱤ ᱠᱷᱚᱱ ᱛᱩᱢᱟᱹᱞ ᱟᱠᱟᱱᱟ)
ᱢᱤᱫ ᱟ.ᱛᱩ ᱨᱮ ᱢᱚᱬᱮ ᱵᱚᱭᱦᱟ ᱠᱚᱲᱟ ᱟᱨ ᱢᱤᱫᱴᱤᱡ ᱥᱩᱢᱩᱝ ᱢᱤᱥᱨᱟ ᱛᱟᱠᱚ, ᱡᱚᱛᱚ ᱵᱚᱭᱦᱟ ᱠᱷᱚᱱ ᱦᱩᱰᱤᱧ ᱮ ᱛᱟᱦᱮᱸ ᱠᱟᱱᱟ ᱾ ᱩᱱᱤ ᱫᱚ ᱫᱩᱞᱟ.ᱲ ᱛᱮ ᱦᱩᱰᱤᱧ ᱢᱟ.ᱭ ᱜᱮ ᱠᱚ ᱢᱮᱛᱟᱭ ᱛᱟᱦᱮᱸᱫ ᱾ ᱩᱱᱠᱩ ᱫᱚ ᱟ.ᱰᱤ ᱠᱤᱥᱟ.ᱬ ᱠᱚ ᱛᱟᱦᱮᱸ ᱠᱟᱱᱟ ᱾ ᱟᱠᱚ ᱨᱮᱱ ᱵᱟᱨᱭᱟ ᱟ.ᱥᱩᱞ ᱥᱮᱛᱟ ᱠᱤᱱ ᱛᱟᱦᱮᱸ ᱠᱟᱱᱟ ᱾ ᱧᱩᱛᱩᱢ ᱛᱟ.ᱠᱤᱱ ᱫᱚ ᱪᱟᱶᱨᱟ ᱟᱨ ᱵᱷᱟᱶᱨᱟ ᱾ ᱦᱩᱰᱤᱧ ᱢᱟ.ᱭ ᱫᱚ ᱩᱱᱠᱤᱱ ᱥᱮᱛᱟ ᱟ.ᱰᱤᱭ ᱫᱩᱞᱟ.ᱲ ᱠᱤᱱ ᱛᱟᱦᱮᱸᱫ ᱟᱨ ᱟ.ᱰᱤ ᱱᱟᱯᱟᱭ ᱜᱮ ᱵᱚᱞᱟᱣ ᱠᱮᱫ ᱠᱤᱱᱟ ᱾ ᱚᱱᱟ ᱠᱷᱟᱹᱛᱤᱨ ᱩᱱᱠᱤᱱ ᱥᱮᱛᱟ ᱦᱚᱸ ᱦᱩᱰᱤᱧ ᱢᱟ.ᱭ ᱟᱜ ᱠᱟᱛᱷᱟ ᱠᱤᱱ ᱟᱸᱡᱚᱢ ᱛᱟᱦᱮᱸᱫ ᱾ ᱤᱠᱷᱟᱹᱱ ᱡᱚᱛᱚ ᱠᱷᱚᱱ ᱢᱟᱨᱟᱝ ᱫᱟᱫᱟ ᱟᱨ ᱦᱤᱞᱤ ᱫᱚ ᱪᱮᱫ ᱠᱚ ᱠᱷᱟᱹᱛᱤᱨ ᱛᱮ ᱪᱚᱝ ᱦᱩᱰᱤᱧ ᱢᱟ.ᱭ ᱱᱟᱥᱮ ᱦᱚᱸ ᱵᱟᱝ ᱠᱤᱱ ᱠᱩᱥᱤ ᱟᱭᱟ ᱾ ᱟᱨ ᱦᱩᱰᱤᱝ ᱢᱟ.ᱭ ᱜᱚᱡ ᱢᱩᱪᱟ.ᱫ ᱮ ᱞᱟ.ᱜᱤᱫ ᱯᱷᱮᱸᱫᱽ ᱠᱤᱱ ᱵᱟ.ᱭ ᱠᱮᱫ-ᱟ ᱾ ᱢᱤᱫ ᱫᱤᱱ ᱫᱚ ᱢᱟᱨᱟᱝ ᱫᱟᱫᱟ ᱟᱨ ᱦᱤᱞᱤ ᱛᱤᱠᱤᱱ ᱢᱩᱞᱤᱭᱟ. ᱠᱚ ᱧᱮᱧᱮᱞ ᱧᱩᱛᱩᱢ ᱵᱟ.ᱫᱽ ᱥᱮᱫ ᱥᱮᱱᱚᱜ ᱠᱤᱱ ᱥᱟᱯᱲᱟᱣ ᱮᱱᱟ ᱟᱨ ᱦᱩᱰᱤᱧ ᱢᱟ.ᱭ ᱠᱤᱱ ᱢᱮᱛᱟᱫᱮᱭᱟ ᱫᱮᱞᱟ ᱟᱢ ᱦᱚᱸ ᱟ.ᱞᱤᱧ ᱥᱟᱶ ᱵᱟ.ᱫᱽ ᱥᱮᱱ ᱛᱟᱨᱟᱜ ᱢᱮ ᱾ ᱠᱷᱟᱱ ᱡᱚᱛᱚ ᱦᱚᱲ ᱜᱮ ᱵᱟ.ᱫᱽ ᱠᱚ ᱥᱮᱱ ᱮᱱᱟ ᱾ ᱵᱟ.ᱫᱽ ᱠᱷᱚᱱ ᱨᱩᱣᱟ.ᱲ ᱡᱚᱦᱚᱜ ᱦᱩᱰᱤᱧ ᱢᱟ.ᱭ ᱠᱤᱱ ᱢᱮᱛᱟᱭ ᱠᱟᱱᱟ ᱟᱵᱚ ᱫᱚ ᱫᱮᱞᱟ ᱵᱩᱨᱩ ᱠᱷᱚᱱ ᱥᱟᱠᱟᱢ ᱠᱚ ᱫᱟ.ᱛᱟ.ᱣᱱᱤ ᱠᱚ ᱵᱚᱱ ᱦᱮᱡ ᱯᱮᱴᱮᱡ ᱛᱟᱨᱟᱭᱟ ᱾ ᱚᱱᱟ ᱢᱮᱱ ᱠᱟᱛᱮ ᱢᱟᱨᱟᱝ ᱫᱟᱫᱟ ᱦᱤᱞᱤ ᱛᱤᱠᱤᱱ ᱫᱚ ᱦᱩᱰᱤᱧ ᱢᱟ.ᱭ ᱫᱚ ᱜᱮᱞᱵᱟᱨ ᱵᱩᱨᱩ ᱯᱟᱨᱚᱢ ᱚᱨᱚᱱ ᱵᱚᱨᱚᱱ ᱵᱤᱨ ᱛᱟᱞᱟ ᱛᱮ ᱠᱤᱱ ᱤᱫᱤ ᱠᱮᱫᱮᱭᱟ ᱟᱨ ᱚᱸᱰᱮ ᱞᱟᱲ ᱞᱟᱴᱟ ᱵᱟᱸᱫᱚ ᱱᱟ.ᱬᱤ ᱛᱮ ᱠᱤᱱ ᱛᱚᱞ ᱠᱮᱫᱮᱭᱟ ᱟᱨ ᱠᱤᱱ ᱵᱟ.ᱜᱤ ᱚᱴᱚ ᱟᱫᱮᱭᱟ ᱾ ᱟᱨ ᱟ.ᱠᱤᱱ ᱫᱚ ᱚᱲᱟᱜ ᱛᱮ ᱠᱤᱱ ᱨᱩᱣᱟ.ᱲ ᱦᱮᱡ ᱮᱱᱟ ᱾
ᱦᱩᱰᱤᱧ ᱢᱟ.ᱭ ᱵᱟᱝ ᱠᱚ ᱧᱮᱞ ᱞᱮᱫᱮ ᱨᱮ ᱦᱩᱰᱤᱧ ᱫᱟᱫᱟ ᱛᱮᱠᱚ ᱢᱟᱨᱟᱝ ᱫᱟᱫᱟ ᱦᱤᱞᱤ ᱠᱚ ᱠᱩᱞᱤ ᱠᱮᱫ ᱠᱤᱱᱟ – ᱦᱩᱰᱤᱧ ᱢᱟ.ᱭ ᱫᱚ ᱚᱠᱟ ᱮᱱᱟᱭ ᱵᱟᱝ ᱜᱮ ᱧᱮᱞᱚᱜ ᱠᱟᱱ ᱫᱚᱭ ᱾ ᱠᱷᱟᱱ ᱜᱮ ᱢᱟᱨᱟᱝ ᱫᱟᱫᱟ ᱦᱤᱞᱤ ᱛᱤᱠᱤᱱ ᱠᱤᱱ ᱢᱮᱱ ᱠᱮᱫᱼᱟ ᱦᱚᱨ ᱨᱮ ᱦᱤᱡᱩᱜ ᱚᱠᱛᱚ ᱟᱡ ᱯᱷᱩᱞ ᱛᱮᱠᱚ ᱥᱟᱶ ᱧᱟᱯᱟᱢ ᱦᱩᱭ ᱮᱱᱟ ᱟᱨ ᱚᱱᱛᱮ ᱛᱟᱨᱟ ᱟᱠᱚ ᱚᱲᱟᱜ ᱠᱚ ᱤᱫᱤ ᱛᱟᱨᱟ ᱠᱮᱫᱮᱭᱟ ᱾ ᱚᱱᱟ ᱛᱟᱭᱚᱢ ᱡᱚᱛᱚ ᱦᱚᱲ ᱠᱚ ᱜᱤᱛᱤᱡ ᱮᱱᱟ ᱾ ᱤᱱᱟ. ᱦᱤᱞᱚᱜ ᱫᱚ ᱟ.ᱰᱤ ᱜᱮ ᱦᱚᱭ ᱫᱟᱜ ᱦᱮᱡ ᱮᱱᱟ ᱟᱨ ᱦᱩᱰᱤᱧ ᱢᱟ.ᱭ ᱫᱚ ᱠᱩᱞ ᱠᱚ ᱡᱚᱢ ᱮ ᱞᱟ.ᱜᱤᱫ ᱠᱚ ᱟ.ᱪᱩᱨ ᱵᱟᱲᱟᱜ ᱠᱟᱱᱟ ᱾ ᱮᱱᱠᱷᱟᱱ ᱦᱩᱰᱤᱧ ᱢᱟ.ᱭ ᱫᱚ ᱵᱚᱛᱚᱨ ᱛᱮ ᱟ.ᱰᱤ ᱡᱩᱨ ᱛᱮ ᱨᱟᱜ ᱟᱛᱮ ᱟᱠᱚ ᱨᱮᱱ ᱟ.ᱥᱩᱞ ᱥᱮᱛᱟᱭ ᱦᱚᱦᱚ ᱟ.ᱠᱤᱱ ᱠᱟᱱᱟ ᱾
(ᱨᱟᱜ ᱦᱚᱢᱚᱨ ᱟᱛᱮ)
“ᱞᱟ. ᱨᱮ ᱪᱟᱶᱨᱟ
ᱞᱟ. ᱨᱮ ᱵᱷᱟᱶᱨᱟ
ᱵᱩᱨᱩ ᱵᱩᱨᱩ ᱯᱟᱨᱚᱢ
ᱜᱮᱞᱵᱟᱨ ᱵᱩᱨᱩ ᱯᱟᱨᱚᱢ
ᱞᱟᱲ ᱞᱟᱴᱟ ᱵᱟᱸᱫᱚ ᱱᱟ.ᱬᱤ ᱨᱮ
ᱫᱮᱞᱟ ᱥᱮ ᱥᱮᱴᱮᱨ ᱠᱟᱛᱮ
ᱫᱩᱜ ᱠᱟ.ᱧ ᱵᱤᱱ ᱿”
ᱦᱩᱰᱤᱧ ᱢᱟ.ᱭ ᱟᱜ ᱨᱟᱜ ᱦᱚᱢᱚᱨ ᱟᱸᱡᱚᱢ ᱠᱟᱛᱮ ᱦᱚᱴᱚᱜ ᱨᱮ ᱛᱚᱞ ᱟᱠᱟᱱ ᱥᱤᱠᱲᱤ ᱠᱤᱱ ᱜᱮᱨ ᱛᱚᱯᱟᱜ ᱠᱮᱫᱼᱟ ᱟᱨ ᱜᱮᱞᱵᱟᱨ ᱠᱟᱯᱟᱴ ᱫᱩᱣᱟᱹᱨ ᱫᱚᱱ ᱯᱟᱨᱚᱢ ᱠᱟᱛᱮ ᱦᱩᱰᱤᱧ ᱢᱟ.ᱭᱟᱜ ᱨᱟᱜ ᱦᱚᱢᱚᱨ ᱟᱸᱡᱚᱢ ᱟᱛᱮᱱ ᱤᱫᱤ ᱠᱟᱛᱮ ᱜᱮᱞᱵᱟᱨ ᱵᱩᱨᱩ ᱠᱤᱱ ᱫᱟ.ᱲ ᱥᱮᱴᱮᱨ ᱮᱱᱟ ᱾ ᱟᱨ ᱦᱩᱰᱤᱧ ᱢᱟ.ᱭ ᱠᱤᱱ ᱧᱮᱞᱮᱭᱟ ᱫᱚ ᱞᱟᱲ ᱵᱟᱸᱫᱚ ᱱᱟ.ᱬᱤ ᱛᱮᱭ ᱛᱚᱞ ᱟᱠᱟᱱᱟ ᱟᱨ ᱟᱡ ᱥᱩᱨ ᱨᱮ ᱠᱩᱞ ᱵᱟᱱᱟ ᱠᱚ ᱟ.ᱪᱩᱨ ᱵᱟᱲᱟᱭ ᱠᱟᱱᱟ ᱾ ᱩᱱᱠᱩ ᱧᱮᱞ ᱠᱟᱛᱮ ᱥᱮᱛᱟ ᱫᱚ ᱟ.ᱰᱤ ᱫᱚᱲ ᱠᱤᱱ ᱨᱟ.ᱜᱤᱭᱮᱱᱟ ᱟᱨ ᱢᱤᱢᱤᱴᱤᱡ ᱛᱮ ᱡᱚᱛᱚ ᱠᱤᱱ ᱞᱟᱜᱟ ᱠᱮᱫ ᱠᱚᱣᱟ ᱟᱨ ᱦᱩᱰᱤᱧ ᱢᱟ.ᱭ ᱫᱩᱜ ᱠᱟᱛᱮ ᱚᱲᱟᱜ ᱠᱤᱱ ᱟ.ᱜᱩ ᱥᱮᱴᱮᱨ ᱠᱮᱫᱮᱭᱟ ᱾ ᱤᱠᱷᱟᱹᱱ ᱟᱠᱚᱣᱚᱟᱜ ᱚᱲᱟᱜ ᱠᱟᱯᱟᱴ ᱥᱤᱧ ᱜᱮ ᱛᱟᱦᱮᱸ ᱠᱟᱱᱟ ᱾ ᱦᱩᱰᱤᱧ ᱢᱟ.ᱭ ᱨᱟᱜ ᱦᱚᱢᱚᱨ ᱟᱛᱮ ᱟᱡ ᱫᱟᱫᱟ ᱛᱮᱠᱚᱭ ᱦᱚᱦᱚ ᱟᱠᱚ ᱠᱟᱱᱟ ᱼ
ᱡᱷᱤᱡ ᱟ.ᱧ ᱯᱮ ᱫᱟᱫᱟ
ᱠᱟᱯᱟᱴ ᱫᱩᱣᱟᱹᱨ
ᱡᱷᱤᱡ ᱟ.ᱧ ᱯᱮ,
ᱢᱟᱨᱟᱝ ᱫᱟᱫᱟ ᱦᱤᱞᱤ ᱠᱤᱱ
ᱦᱤᱨᱠᱟ. ᱟ.ᱫᱤᱧᱟ
ᱟᱯᱮ ᱨᱮᱦᱚᱸ ᱫᱟᱭᱟ ᱟ.ᱧ ᱯᱮ
ᱠᱟᱯᱟᱴ ᱫᱚ ᱡᱷᱤᱡ ᱟ.ᱧ ᱯᱮ ᱿
ᱛᱟᱞᱟ ᱫᱟᱫᱟ ᱛᱮᱠᱚ ᱟᱸᱡᱚᱢ ᱠᱟᱛᱮ ᱠᱚ ᱢᱮᱱ ᱮᱫᱼᱟ ᱪᱤ ᱱᱚᱶᱟ ᱢᱟ ᱦᱩᱰᱤᱧ ᱢᱟ.ᱭᱟᱜ ᱦᱚᱦᱚ ᱞᱮᱠᱟ ᱜᱮ ᱟ.ᱭᱠᱟ.ᱣᱚᱜ ᱠᱟᱱᱟ ᱾ ᱟᱫᱚ ᱫᱩᱣᱟᱹᱨ ᱡᱷᱤᱡ ᱠᱟᱛᱮ ᱧᱮᱞᱮᱭᱟ ᱫᱚ ᱦᱩᱰᱤᱧ ᱢᱟ.ᱭ ᱜᱮ ᱞᱚᱦᱚᱫ ᱞᱚᱥᱚᱫ ᱟᱛᱮ ᱥᱟᱢᱟᱝ ᱫᱩᱣᱟᱹᱨ ᱨᱮ ᱛᱤᱸᱜᱩ ᱟᱠᱟᱱᱟᱭ ᱾ ᱩᱱᱤ ᱧᱮᱞ ᱠᱟᱛᱮ ᱠᱚ ᱠᱩᱞᱤ ᱠᱮᱫᱮᱭᱟ ᱢᱟ.ᱭ ᱪᱮᱫ ᱪᱮᱠᱟᱭᱮᱱᱟ ? ᱦᱩᱰᱤᱧ ᱢᱟ.ᱭ ᱫᱚ ᱢᱟᱨᱟᱝ ᱫᱟᱫᱟ ᱦᱤᱞᱤ ᱟᱜ ᱡᱚᱛᱚ ᱠᱟ.ᱨᱫᱷᱟ.ᱱᱤ ᱠᱟᱛᱷᱟᱭ ᱞᱟ.ᱭ ᱟᱫ ᱠᱚᱣᱟ ᱾ ᱚᱱᱟ ᱠᱚ ᱟᱸᱡᱚᱢ ᱠᱟᱛᱮ ᱛᱟᱞᱟ ᱫᱟᱫᱟ ᱛᱮᱠᱚ ᱟ.ᱰᱤ ᱠᱚ ᱫᱩᱠ ᱢᱩᱦᱤᱢ ᱮᱱᱟ ᱟᱨ ᱟᱠᱚ ᱨᱮᱱ ᱢᱟᱨᱟᱝ ᱫᱟᱫᱟ ᱦᱤᱞᱤ ᱛᱤᱠᱤᱱ ᱫᱚ ᱠᱚ ᱵᱷᱮᱜᱟᱨ ᱠᱟᱫ ᱠᱤᱱᱟ ᱾ ᱫᱤᱱ ᱯᱟᱨᱚᱢ ᱤᱫᱤᱭᱮᱱ ᱥᱟᱶᱛᱮ ᱦᱩᱰᱤᱧ ᱢᱟ.ᱭ ᱨᱮᱱ ᱯᱮᱲᱟ ᱠᱚ ᱵᱚᱞᱚ ᱮᱱᱟ ᱟᱨ ᱟ.ᱰᱤ ᱠᱤᱥᱟᱹᱬ ᱚᱲᱟᱜ ᱨᱮ ᱠᱚ ᱮᱢ ᱠᱮᱫᱮᱭᱟ ᱾ ᱠᱤᱪᱷᱩ ᱫᱤᱱ ᱛᱟᱭᱚᱢ ᱛᱮ ᱫᱚ ᱢᱟᱨᱟᱝ ᱫᱟᱫᱟ ᱦᱤᱞᱤ ᱛᱤᱠᱤᱱ ᱫᱚ ᱟ.ᱰᱤ ᱠᱤᱱ ᱨᱮᱸᱜᱮᱡ ᱤᱫᱤᱭᱮᱱᱟ ᱾ ᱡᱚᱢᱟᱜ ᱧᱩᱣᱟᱜ ᱛᱮ ᱵᱟᱝ ᱠᱤᱱ ᱠᱩᱲᱟ.ᱣ ᱞᱮᱱᱟ ᱾ ᱟᱫᱚ ᱦᱩᱰᱤᱧ ᱢᱟ.ᱭ ᱠᱤᱱ ᱩᱭᱦᱟ.ᱨ ᱠᱮᱫᱮᱭᱟ ᱟᱨ ᱟᱡ ᱴᱷᱮᱱ ᱠᱷᱚᱱ ᱜᱚᱲᱚ ᱧᱟᱢᱚᱜ ᱠᱷᱟᱹᱛᱤᱨ ᱟᱸᱥ ᱫᱚᱦᱚ ᱠᱟᱛᱮ ᱠᱤᱱ ᱥᱮᱱᱮᱱᱟ ᱾ ᱦᱩᱰᱤᱧ ᱢᱟ.ᱭ ᱫᱚ ᱟᱡ ᱢᱟᱨᱟᱝ ᱫᱟᱫᱟ ᱦᱤᱞᱤ ᱛᱤᱠᱤᱱ ᱵᱟᱥᱠᱮ ᱫᱟᱠᱟ ᱥᱟᱶ ᱯᱟᱞᱣᱟ ᱞᱩᱵᱩᱜ ᱮᱭ ᱮᱢᱟᱫ ᱠᱤᱱᱟ ᱾ ᱟᱨ ᱟᱡ ᱛᱟᱞᱟ ᱫᱟᱫᱟ ᱛᱮᱠᱚ ᱫᱚ ᱯᱟᱛᱲᱟ ᱫᱟᱠᱟ ᱟᱨ ᱡᱤᱞ ᱩᱛᱩᱭ ᱮᱢᱟᱫ ᱠᱚᱣᱟ ᱾
( ᱱᱚᱶᱟ ᱠᱟ.ᱦᱱᱤ ᱠᱷᱚᱱ ᱥᱤᱠᱷᱱᱟ.ᱛ ᱧᱟᱢᱚᱜ ᱠᱟᱱᱟ ᱼ “ᱠᱟ.ᱢᱤ ᱡᱟ.ᱱᱤᱡ ᱠᱩᱲᱟ.ᱭ” ᱾)
