ᱮ ᱥᱩᱠ ᱟᱢ ᱫᱚ ᱚᱠᱟ ᱨᱮ?
ᱟᱢᱟᱜ ᱴᱷᱟᱹᱣᱠᱟᱹ ᱴᱷᱤᱠᱟᱹᱱᱟ ᱫᱚ ᱚᱠᱟ ᱨᱮ?
ᱪᱮᱫᱟᱜ ᱟᱢᱫᱚᱢ ᱟᱸᱜᱮᱱ ᱮᱱ?
ᱚᱠᱟ ᱨᱮ ᱟᱢ ᱫᱚᱢ ᱫᱟᱱᱟᱝ ᱮᱱ?
ᱫᱤᱥᱚᱢ ᱫᱤᱥᱚᱢ ᱤᱧ ᱯᱟᱱᱛᱮ ᱠᱮᱫ ᱢᱮ,
ᱮᱱ ᱦᱚᱸ ᱵᱟᱝᱤᱧ ᱧᱟᱢ ᱞᱮᱫ ᱢᱮ ᱾
ᱯᱟᱱᱛᱮ ᱞᱮᱫ ᱢᱮᱭᱟᱹᱧ ᱵᱟᱡᱟᱨ ᱛᱟᱞᱟ ᱛᱮ,
ᱯᱟᱱᱛᱮ ᱞᱮᱫ ᱢᱮᱭᱟᱹᱧ ᱯᱟᱠᱟ ᱫᱚᱞᱟᱱ ᱨᱮ ᱾
ᱚᱲᱟᱜ ᱩᱢᱩᱞ ᱨᱮᱦᱚᱸ ᱵᱟᱝᱤᱧ ᱧᱟᱢ ᱞᱮᱫ ᱢᱮ,
ᱨᱮᱭᱟᱲ ᱦᱚᱭ ᱨᱮᱦᱚᱸ ᱵᱟᱝᱤᱧ ᱟᱹᱭᱠᱟᱹᱣ ᱞᱮᱫ ᱢᱮ ᱾
ᱴᱟᱠᱟ ᱵᱟᱠᱥᱟ ᱨᱮᱦᱚᱸ ᱵᱟᱹᱱᱩᱜ ᱢᱮ,
ᱡᱤᱞ ᱫᱟᱠᱟ ᱨᱮᱦᱚᱸ ᱵᱟᱹᱱᱩᱜ ᱢᱮ ᱾
ᱵᱚᱭᱚᱥ ᱦᱚᱸ ᱛᱤᱧ ᱪᱟᱵᱟ ᱤᱫᱤᱜ ᱠᱟᱱᱟ,
ᱩᱭᱦᱟᱹᱨ ᱦᱚᱸᱛᱤᱧ ᱞᱟᱸᱜᱟ ᱤᱫᱤᱜ ᱠᱟᱱᱟ ᱾
ᱮᱱᱦᱚᱸ ᱟᱸᱥ ᱥᱟᱨᱮᱡ ᱢᱮᱱᱟᱜ ᱜᱮ,
ᱯᱟᱹᱛᱭᱟᱹᱣ ᱱᱤᱛ ᱦᱚᱸ ᱢᱮᱱᱟᱜ ᱛᱤᱧ ᱜᱮ ᱾
ᱫᱩᱠ ᱛᱟᱭᱚᱢ ᱥᱩᱠ ᱫᱚ ᱦᱤᱡᱩᱜ ᱜᱮ,
ᱨᱟᱜ ᱛᱟᱭᱚᱢ ᱞᱟᱸᱫᱟ ᱢᱮᱱᱟᱜ ᱜᱮ,
ᱢᱤᱱᱟᱹᱧ ᱱᱤᱛ ᱦᱚᱸ ᱟᱢ ᱛᱟᱺᱜᱤ ᱨᱮ ᱾
ᱤᱧ ᱫᱚ ᱟᱢ ᱨᱮᱜᱤᱧ ᱩᱠᱩ ᱟᱠᱟᱱᱟ,
ᱟᱢᱟᱜ ᱚᱲᱟᱜ ᱨᱮᱜᱤᱧ ᱵᱟᱥᱟ ᱟᱠᱟᱱᱟ ᱾
ᱵᱟᱹᱱᱩᱜ ᱛᱤᱧᱟ ᱤᱧᱟᱜ ᱡᱟᱸᱦᱟᱱ ᱜᱚᱱᱚᱝ,
ᱴᱟᱠᱟ ᱯᱩᱭᱥᱟᱹ ᱛᱮ ᱟᱞᱚᱢ ᱛᱩᱞᱟᱹ ᱤᱧᱟ ᱾
ᱢᱤᱱᱟᱹᱧ ᱤᱧ ᱫᱚ ᱵᱟᱞᱮ ᱜᱤᱫᱽᱨᱟᱹ ᱦᱟᱜ ᱢᱮᱥᱠᱚᱡ ᱞᱟᱸᱫᱟ ᱥᱟᱶ,
ᱢᱤᱱᱟᱹᱧ ᱤᱧ ᱫᱚ ᱟᱭᱳ ᱵᱟᱵᱟ ᱦᱟᱜ ᱛᱷᱩᱢᱟᱱ ᱥᱟᱶ ᱾
ᱡᱟᱱᱟᱢ ᱟᱭᱳᱣᱟᱜ ᱱᱤᱨᱚᱲ ᱫᱩᱞᱟᱹᱲ ᱥᱟᱶ,
ᱵᱚᱭᱦᱟ ᱵᱚᱭᱦᱟ ᱥᱩᱞᱩᱠ ᱥᱟᱹᱜᱟᱹᱭ ᱥᱟᱶ ᱾
ᱦᱟᱲᱟᱢ ᱵᱩᱰᱷᱤ ᱥᱟᱶᱛᱮ ᱫᱩᱲᱩᱵ ᱯᱟᱱᱛᱮ ᱨᱮ,
ᱥᱟᱱᱟᱢ ᱚᱲᱟᱜ ᱦᱚᱲ ᱥᱟᱶᱛᱮ ᱛᱟᱦᱮᱸ ᱢᱤᱫ ᱨᱮ ᱾
ᱢᱤᱱᱟᱹᱧ ᱤᱧ ᱫᱚ ᱛᱤᱨᱭᱟᱹᱣ ᱵᱟᱱᱟᱢ ᱨᱩ ᱨᱟᱦᱟ ᱥᱟᱶ,
ᱦᱚᱱ ᱦᱚᱯᱚᱱ ᱠᱚᱣᱟᱜ ᱡᱤᱛᱠᱟᱹᱨ ᱨᱟᱥᱟ ᱥᱟᱶ ᱾
ᱤᱧ ᱫᱚ ᱢᱤᱫ ᱟᱹᱭᱠᱟᱹᱣ ᱜᱮ ᱠᱟᱹᱱᱟᱹᱧ,
ᱤᱱᱟᱹᱜ ᱠᱟᱜ ᱢᱮ ᱤᱧᱟᱜ ᱯᱟᱱᱛᱮ ᱟᱢ ᱾
ᱡᱟᱸᱦᱟᱢ ᱧᱟᱢ ᱠᱮᱫ ᱚᱱᱟ ᱨᱮᱜᱮ,
ᱨᱤᱠᱟᱹᱭ ᱢᱮ ᱨᱟᱹᱥᱠᱟᱹ ᱛᱟᱸᱦᱮᱱ ᱞᱟᱹᱜᱤᱫ ᱾
ᱛᱮᱦᱮᱧ ᱨᱟᱹᱥᱠᱟᱹᱭ ᱢᱮ ᱟᱞᱚᱢ ᱩᱭᱦᱟᱹᱨ ᱜᱟᱯᱟ ᱞᱟᱹᱜᱤᱫ ᱿
ᱜᱟᱯᱟ ᱞᱟᱹᱜᱤᱫ ᱛᱮ ᱛᱮᱦᱮᱧ ᱟᱞᱚᱢ ᱟᱫᱟ,
ᱤᱧ ᱞᱟᱹᱜᱤᱫ ᱛᱮ ᱛᱤᱥ ᱦᱚᱸ ᱟᱞᱚᱢ ᱨᱟᱜᱟ ᱾
ᱤᱧ ᱞᱟᱹᱜᱤᱫ ᱛᱮ ᱛᱤᱥ ᱦᱚᱸ ᱟᱞᱚᱢ ᱨᱟᱜᱟ ᱿
