ᱥᱟᱦᱮᱵᱽ ᱠᱚᱣᱟᱜ ᱥᱚᱦᱚᱫ

ᱥᱟᱦᱮᱵᱽ ᱠᱚᱠᱚ ᱦᱮᱡᱼᱟ ᱱᱚᱰᱮ ᱵᱮᱯᱟᱨ ᱵᱟᱹᱱᱤᱡ ᱢᱮᱱᱛᱮ
ᱟᱵᱚ ᱠᱚ ᱞᱟᱹᱵᱽᱲᱩᱡ ᱧᱮᱞ ᱛᱮ ᱩᱭᱦᱟᱹᱨ ᱮᱱᱟ ᱠᱚ ᱥᱟᱥᱚᱱ ᱞᱟᱹᱜᱤᱫ ᱛᱮ ᱾
ᱚᱛ ᱨᱮᱢᱟ ᱥᱚᱱᱟ ᱨᱩᱯᱟᱹ ᱠᱚ ᱯᱮᱨᱮᱡ ᱛᱟᱦᱮᱸ ᱠᱟᱱ ᱫᱚ
ᱮᱲᱮ ᱟᱺᱰᱤᱡ ᱤᱫᱤ ᱞᱮᱠᱟ ᱛᱟᱦᱮᱸᱭᱟ ᱛᱟᱠᱚ ᱢᱚᱱ ᱫᱚ !
ᱚᱱᱟ ᱛᱮᱜᱮ ᱩᱱᱠᱩ ᱥᱟᱥᱚᱱ ᱞᱮᱫ ᱵᱚᱱ ᱠᱚ ᱟᱵᱚ ᱠᱚ
ᱡᱤᱣᱤ ᱡᱟᱸᱫᱮ ᱛᱟᱸᱫᱮ ᱦᱟᱯᱲᱟᱢ ᱠᱚᱣᱟᱜ ᱵᱤᱫᱟᱹᱞ ᱩᱱ ᱫᱚ !
ᱥᱟᱥᱚᱱ ᱟᱠᱟᱫ ᱵᱚᱱ ᱨᱮᱦᱚᱸ ᱠᱚ ᱥᱚᱦᱚᱫ ᱟᱠᱟᱫ ᱵᱚᱱ ᱜᱮᱠᱚ
ᱟᱵᱚ ᱠᱚᱣᱟᱜ ᱥᱟᱶᱦᱮᱫ ᱦᱚᱸ ᱩᱱᱠᱩ ᱜᱮᱠᱚ ᱫᱚᱲᱦᱚ ᱚᱴᱚ ᱟᱠᱟᱣᱟᱫ ᱵᱚ !
ᱯᱷᱤᱞᱤᱯ ᱢᱮᱠᱯᱷᱮᱞ ᱵᱚᱰᱤᱝ ᱮᱢᱟᱱ ᱥᱟᱦᱮᱵᱽ ᱞᱮᱠᱟᱱ ᱠᱚᱫᱚ
ᱦᱚᱲ ᱦᱚᱯᱚᱱᱟᱜ ᱥᱟᱶᱦᱮᱫ ᱟᱹᱰᱤ ᱜᱮᱠᱚ ᱫᱚᱲᱦᱚ ᱚᱴᱚ ᱠᱟᱫ ᱫᱚ !
ᱯᱷᱩᱨᱜᱟᱹᱞᱚᱜ ᱞᱟᱹᱜᱤᱫ ᱦᱚᱸᱛᱚ ᱥᱟᱦᱮᱵᱽ ᱜᱮᱠᱚ ᱞᱟᱹᱭ ᱟᱹᱭᱩᱨ ᱠᱮᱫ ᱵᱚ
ᱥᱮᱪᱮᱫ ᱵᱮᱜᱚᱨ ᱚᱱᱟ ᱢᱟ ᱛᱤᱥ ᱦᱚᱸ ᱵᱟᱝ ᱫᱩᱠᱷᱢᱟᱹ ᱧᱟᱢ ᱠᱚᱜ ᱫᱚ !
ᱫᱤᱥᱚᱢ ᱨᱮ ᱩᱱᱠᱩ ᱜᱮ ᱟᱵᱚ ᱠᱚ ᱥᱮᱪᱮᱫ ᱠᱚ ᱮᱦᱚᱵ ᱠᱮᱫᱼᱟ ᱢᱮᱱᱛᱮ
ᱯᱷᱩᱨᱜᱟᱹᱞ ᱠᱚᱜ ᱪᱚᱵᱚᱱ ᱵᱟᱝ ᱪᱚ ᱚᱱᱟ ᱵᱟᱝᱠᱷᱟᱱ ᱫᱚ ᱤᱫᱩᱪᱚᱝ ᱜᱮ !
ᱪᱮᱠᱟᱛᱮ, ᱥᱮᱪᱮᱫᱚᱜ ᱩᱱ ᱫᱚ ᱟᱵᱚ ᱠᱚᱫᱚ ᱵᱟᱨᱚᱱ ᱛᱟᱦᱮᱸᱭᱟ
ᱵᱟᱵᱽᱬᱮ ᱥᱩᱢᱩᱝ ᱥᱮᱫᱟᱭ ᱫᱚ ᱥᱮᱪᱮᱫᱚᱜ ᱟᱹᱭᱫᱟᱹᱨᱤ ᱛᱟᱦᱮᱸᱭᱟ !
ᱟᱢ ᱫᱚ ᱩᱱ ᱡᱷᱚᱜ ᱥᱮᱪᱮᱫ ᱢᱟ ᱵᱟᱢ ᱥᱮᱪᱮᱫ ᱠᱮᱭᱟ
ᱥᱟᱺᱜᱤᱧ ᱠᱷᱚᱱ ᱥᱮᱪᱮᱫᱚᱜ ᱠᱚ ᱵᱟᱢ ᱟᱸᱡᱚᱢ ᱠᱮ ᱠᱚᱣᱟ !
ᱚᱱᱠᱟᱱᱟᱜ ᱠᱩᱪᱤᱛ ᱦᱚᱨ ᱫᱚ ᱥᱟᱦᱮᱵᱽ ᱠᱚ ᱢᱟᱜ ᱯᱷᱟᱫᱟ ᱞᱮᱫᱼᱟ
ᱢᱟᱨᱥᱟᱞ ᱦᱚᱨ ᱛᱮ ᱩᱱᱠᱩ ᱜᱮ ᱫᱤᱥᱚᱢ ᱦᱚᱲ ᱠᱚ ᱟᱹᱜᱩ ᱞᱮᱫ ᱠᱚᱣᱟ !
ᱥᱮᱪᱮᱫ ᱠᱷᱟᱹᱛᱤᱨ ᱜᱮᱥᱮ ᱟᱵᱚ ᱦᱚᱠ ᱟᱹᱭᱫᱟᱹᱨᱤ ᱵᱚᱱ ᱵᱟᱰᱟᱭᱟᱱ
ᱵᱮᱱᱟᱣᱮᱱ ᱵᱚ ᱟᱵᱚ ᱦᱚᱸ ᱛᱟᱭᱚᱢ ᱫᱟᱜ ᱛᱮ ᱚᱨ ᱠᱷᱟᱹᱠᱟᱹᱲ ᱛᱟᱭᱟᱱ !
ᱫᱤᱥᱚᱢ ᱯᱷᱩᱨᱜᱟᱹᱞ ᱞᱟᱹᱜᱤᱫ ᱟᱞᱟᱢ ᱟᱠᱴᱟᱵᱷᱭᱟᱢ ᱦᱭᱩᱢ ᱥᱟᱦᱮᱵᱽ ᱫᱚ
ᱠᱚᱸᱜᱽᱨᱮᱥ ᱵᱮᱨᱮᱫ ᱠᱟᱛᱮ ᱦᱚᱲ ᱠᱚᱭ ᱡᱩᱢᱤᱫᱽ ᱞᱮᱫ ᱠᱚ ᱛᱟᱦᱮᱸ ᱫᱚᱜ !
ᱠᱚᱸᱜᱽᱨᱮᱥ ᱨᱮᱱᱟᱜ ᱢᱮᱱᱮᱛ ᱫᱚ ᱦᱚᱲ ᱠᱚ ᱡᱩᱢᱤᱫᱽ ᱢᱤᱫᱩᱜ ᱜᱮ
ᱚᱱᱟ ᱫᱚ ᱟᱨ ᱦᱚᱸ ᱥᱟᱦᱮᱵᱽ ᱟᱛᱮ ᱵᱮᱱᱟᱣᱟᱜ ᱜᱚᱱᱚᱴᱷᱚᱱ ᱜᱮ !
ᱚᱱᱟ ᱛᱟᱞᱟ ᱛᱮᱫᱚ ᱫᱤᱥᱚᱢ ᱦᱚᱲ ᱠᱚ ᱡᱩᱢᱤᱫᱽ ᱡᱩᱲᱦᱟᱹᱣ ᱞᱮᱱ ᱜᱮᱛᱮ
ᱥᱟᱦᱮᱵᱽ ᱯᱟᱹᱨᱤ ᱟᱠᱚ ᱫᱤᱥᱚᱢ ᱠᱚ ᱞᱟᱜᱟ ᱨᱩᱣᱟᱹᱲ ᱚᱪᱚᱭᱮᱱᱟ ᱚᱱᱟᱛᱮ !
ᱚᱱᱠᱟ ᱞᱮᱠᱟᱛᱮ ᱚᱱᱟ ᱟᱵᱚ ᱯᱷᱩᱨᱜᱟᱹᱞ ᱱᱤᱛᱚᱜ ᱦᱩᱭ ᱟᱠᱟᱱ ᱜᱮ
ᱟᱵᱚ ᱥᱟᱱᱛᱟᱲ ᱠᱚᱣᱟᱜ ᱦᱚᱸ ᱥᱟᱶᱦᱮᱫ ᱟᱹᱰᱤ ᱞᱟᱦᱟ ᱟᱠᱟᱱ ᱜᱮ !
ᱥᱟᱥᱚᱱ ᱞᱮᱫ ᱵᱚᱱ ᱨᱮᱦᱚᱸ ᱠᱚ ᱥᱚᱦᱚᱫ ᱟᱠᱟᱫ ᱵᱚᱱ ᱜᱮᱭᱟ ᱠᱚ
ᱩᱱᱠᱩ ᱵᱟᱝ ᱠᱷᱟᱱ ᱟᱨ ᱦᱚᱸ ᱛᱤᱱᱟᱹᱜ ᱪᱚ ᱛᱟᱭᱚᱢ ᱨᱮ ᱟᱵᱚ ᱠᱚ !
ᱢᱟᱹᱱᱢᱤ ᱦᱚᱸᱵᱚᱱ ᱚᱱᱠᱟᱱ ᱵᱩᱜᱤ ᱥᱟᱶᱛᱮ ᱵᱟᱹᱲᱤᱡ ᱡᱚᱛᱚ ᱜᱮ
ᱡᱚᱛᱚ ᱦᱚᱲ ᱴᱷᱮᱱ ᱜᱮ ᱛᱟᱦᱮᱸᱱᱟ ᱚᱱᱟ ᱡᱟᱜ ᱠᱟᱛᱮ ᱞᱮᱠᱟᱜᱮ !
ᱟᱵᱚ ᱫᱚ ᱢᱮᱱᱠᱷᱟᱱ ᱦᱚᱲᱟᱜ ᱵᱟᱹᱲᱤᱡᱟᱜ ᱜᱮᱵᱚᱱ ᱧᱮᱞ ᱧᱟᱢᱟ
ᱚᱱᱟ ᱛᱮᱜᱮ ᱫᱤᱱᱟᱹᱢ ᱱᱮᱭᱟᱣ ᱠᱷᱟᱹᱯᱟᱹᱨᱤᱭᱟᱹᱣ ᱵᱚᱱ ᱵᱮᱱᱟᱣᱟ !
ᱥᱟᱹᱨᱤ ᱜᱮ ᱧᱮᱞ ᱞᱮᱠᱷᱟᱱ ᱥᱟᱦᱮᱵᱽ ᱠᱚ ᱥᱚᱦᱚᱫ ᱟᱠᱟᱫ ᱵᱚᱱ ᱜᱮ
ᱩᱱᱠᱩ ᱵᱟᱝᱠᱷᱟᱱ ᱟᱵᱚ ᱤᱫᱩ ᱪᱚᱝ ᱱᱚᱶᱟ ᱴᱷᱟᱶ ᱨᱮᱫᱚ ᱵᱟᱝ ᱜᱮ !
ᱚᱱᱟᱛᱮ ᱥᱟᱨᱦᱟᱣ ᱯᱟᱲᱟᱣᱜ ᱜᱮᱭᱟ ᱥᱟᱦᱮᱵᱽ ᱠᱚ ᱟᱵᱚ ᱫᱚ
ᱩᱱᱠᱩ ᱜᱮᱛᱚ ᱠᱚ ᱵᱚᱫᱚᱞ ᱚᱴᱚ ᱟᱠᱟᱫᱼᱟ ᱟᱵᱚ ᱠᱚᱣᱟᱜ ᱚᱱᱟ ᱞᱚᱦᱚᱫ ᱵᱚᱲ ᱫᱚ !