ᱛᱟᱨᱟᱥᱤᱧ ᱪᱟᱸᱫᱚ ᱦᱟᱹᱥᱩᱨᱚᱜ ᱞᱟᱦᱟ ᱨᱮᱜᱮ, ᱫᱮᱣᱞᱟ ᱠᱟᱹᱢᱤ ᱠᱷᱚᱱ ᱦᱮᱡ ᱠᱟᱛᱮ ᱛᱤ ᱡᱟᱸᱜᱟᱭ ᱟᱹᱨᱩᱵ ᱯᱷᱟᱹᱨᱪᱟᱹ ᱮᱱᱟ᱾ ᱫᱮᱣᱞᱟ ᱫᱚ ᱯᱮ ᱪᱟᱸᱫᱚ ᱠᱷᱚᱱ ᱟᱠᱚ ᱟᱹᱛᱩ ᱥᱩᱨ ᱨᱮᱱᱟᱜ ᱢᱤᱫ ᱪᱷᱟᱹᱛᱤᱠ ᱟᱹᱛᱩ ᱨᱮ ᱢᱟᱪᱮᱛᱟᱹᱱᱤ ᱠᱟᱹᱢᱤᱭ ᱥᱟᱵ ᱟᱠᱟᱫᱟ᱾ ᱢᱤᱫ ᱜᱤᱞᱟᱹᱥ ᱨᱮ ᱫᱟᱜ ᱮ ᱵᱷᱩᱨᱟᱹᱜ ᱚᱰᱚᱠ ᱠᱮᱫᱛᱮ, ᱨᱟᱪᱟ ᱯᱤᱸᱰᱟᱹ ᱨᱮ ᱫᱩᱲᱩᱵ ᱠᱟᱛᱮ ᱫᱟᱜ ᱮ ᱧᱩᱭᱮᱫ ᱠᱟᱱᱟ ᱾ ᱛᱟᱞᱟ ᱜᱤᱞᱟᱹᱥ ᱜᱮ ᱫᱟᱜ ᱮ ᱧᱩ ᱜᱚᱫ ᱟᱠᱟᱫᱼᱟ, ᱩᱱ ᱚᱠᱛᱚ ᱨᱮ ᱛᱩᱢᱫᱟᱜ ᱴᱟᱢᱟᱠ ᱨᱩ ᱥᱟᱰᱮ ᱟᱸᱡᱚᱢᱚᱜᱼᱟ ᱾ ᱫᱮᱣᱞᱟ ᱟᱜ ᱞᱩᱛᱩᱨ ᱨᱮ ᱫᱟᱨᱟᱢ ᱫᱟᱜ ᱨᱩ ᱛᱟᱨᱠᱚ ᱮᱱᱟ ᱾ ᱫᱤᱱᱤᱝ ᱫᱟᱜ ᱰᱤᱰᱤᱝ ᱫᱟᱜ ᱦᱮᱛᱟᱝ ᱛᱩᱢᱫᱟᱜ ᱨᱩ ᱥᱟᱰᱮ ᱟᱸᱡᱚᱢ ᱥᱟᱶᱛᱮ , ᱫᱩᱲᱩᱵ ᱠᱷᱚᱱ ᱮ ᱛᱤᱸᱜᱩ ᱜᱚᱫ ᱮᱱᱟ ᱾ ᱟᱡ ᱟᱭᱳ ᱨᱟᱪᱟ ᱨᱮᱜᱮᱭ ᱛᱟᱦᱮᱸ ᱠᱟᱱᱟ ᱾ ᱫᱮᱣᱞᱟ ᱟᱫᱚ ᱟᱡ ᱟᱭᱳᱭ ᱠᱩᱞᱤ ᱮ ᱠᱟᱱᱟ, “ᱦᱮᱸ ᱭᱳ! ᱚᱛᱮ ᱨᱩ ᱟᱸᱡᱚᱢᱚᱜ ᱠᱟᱱ ᱫᱚ ᱞᱟᱛᱟᱨ ᱠᱩᱞᱦᱤ ᱥᱮᱫ ᱨᱮ” ᱾
ᱟᱡ ᱟᱭᱳ ᱛᱮᱞᱟ ᱨᱩᱣᱟᱹᱲ ᱜᱚᱫᱟᱭ, “ᱦᱚᱭ ᱵᱤᱴᱤ ᱞᱟᱛᱟᱨ ᱠᱩᱞᱦᱤ ᱱᱟᱭᱠᱮ ᱚᱲᱟᱜ ᱦᱩᱰᱤᱧ ᱟᱢ ᱠᱟᱠᱟ ᱨᱤᱱ ᱜᱤᱫᱽᱨᱟᱹ ᱠᱚ ᱧᱩᱛᱩᱢ ᱮ ᱠᱟᱱᱟ ᱾”
ᱼ ᱮ ᱭᱳ! ᱢᱚᱲᱮ ᱮᱨᱟ ᱧᱩᱛᱩᱢ ᱢᱤᱫ ᱦᱚᱲ ᱢᱟ ᱥᱮᱱᱚᱜ ᱦᱩᱭᱩᱜ ᱜᱮᱭᱟ? ᱛᱚᱵᱮ ᱟᱢ ᱵᱚᱫᱚᱞ ᱛᱮ ᱛᱮᱦᱮᱧ ᱫᱚ ᱤᱧᱤᱧ ᱥᱮᱱᱚᱜᱼᱟ ᱾
ᱼᱵᱟᱝ ᱵᱤᱴᱤ ᱟᱢ ᱫᱚ ᱪᱮᱫ ᱦᱚᱸ ᱵᱟᱢ ᱵᱟᱰᱟᱭᱟ ᱾ ᱪᱮᱫ ᱮᱢ ᱪᱤᱠᱟᱹᱭᱟ ? ᱤᱧᱜᱤᱧ ᱥᱮᱱ ᱞᱮᱱ ᱠᱷᱟᱱ ᱠᱟᱹᱢᱤ ᱠᱩᱧ ᱜᱚᱲᱚ ᱟᱠᱚᱣᱟ ᱾ ᱟᱹᱭᱩᱵᱚᱜ ᱠᱟᱱᱟ ᱟᱢ ᱫᱚ ᱫᱟᱠᱟ ᱠᱚ ᱪᱚᱸᱫᱟᱭ ᱢᱮ ᱾ ᱟᱡ ᱟᱭᱳᱭ ᱢᱮᱱ ᱠᱮᱫᱟ ᱾ ᱫᱮᱣᱞᱟ ᱵᱟᱭ ᱟᱸᱡᱚᱢ ᱞᱮᱫ ᱜᱮᱭᱟ, ᱢᱟᱱᱟ ᱠᱟᱛᱷᱟ ᱾ ᱟᱡ ᱜᱮ ᱪᱟᱞᱟᱣ ᱮ ᱨᱮᱦᱬᱟ ᱮᱱᱟ᱾ ᱛᱟᱭᱚᱢ ᱫᱚ ᱟᱡ ᱟᱭᱳᱭ ᱢᱮᱱᱟ, “ᱦᱚᱭ ᱛᱚᱵᱮ ᱵᱤᱴᱤ ᱫᱩ ᱟᱢᱜᱮ ᱥᱮᱱᱚᱜ ᱢᱮ ᱾”
ᱫᱮᱣᱞᱟ ᱞᱚᱜᱚᱱ ᱛᱤ ᱡᱟᱸᱜᱟ ᱠᱚ ᱟᱹᱨᱩᱵ ᱠᱟᱛᱮ, ᱵᱚᱦᱚᱜ ᱠᱟᱹᱴᱤᱡ ᱧᱚᱜ ᱪᱮᱛᱟᱱ ᱪᱮᱛᱟᱱ ᱮ ᱱᱟᱹᱠᱤᱡ ᱧᱚᱜ ᱮᱱᱛᱮ ᱫᱟᱹᱲ ᱟᱛᱮᱭ ᱥᱮᱱ ᱮᱱᱟ ᱾ ᱥᱮᱴᱮᱨ ᱠᱟᱛᱮ ᱧᱮᱞ ᱠᱚᱣᱟᱭ ᱡᱚᱲ ᱠᱚ ᱟᱡᱚᱜ ᱮᱫ ᱠᱤᱱᱟ ᱾ ᱟᱭᱳᱼᱵᱟᱵᱟ , ᱚᱱᱟ ᱛᱟᱭᱚᱢ ᱯᱮ ᱡᱚᱲ ᱟᱨᱦᱚᱸ ᱠᱚ ᱚᱡᱚᱜ ᱠᱮᱫ ᱠᱚᱣᱟ ! ᱚᱱᱟ ᱛᱟᱭᱚᱢ ᱛᱮ ᱜᱤᱫᱽᱨᱟᱹ ᱠᱚ ᱧᱩᱛᱩᱢ ᱠᱮᱫᱮᱭᱟ ᱾ ᱜᱤᱫᱽᱨᱟᱹ ᱥᱮᱛᱟ ᱰᱟᱴᱟ ᱛᱟᱭ ᱛᱟᱦᱮᱸ ᱠᱟᱱᱟ ᱾ ᱚᱱᱟᱛᱮ ᱥᱮᱛᱟ ᱵᱟᱯᱞᱟ ᱠᱚ ᱫᱤᱥᱟᱹ ᱞᱮᱫ ᱛᱟᱦᱮᱸ ᱠᱟᱱᱟ᱾ ᱥᱮᱛᱟ ᱵᱟᱠᱚ ᱧᱟᱢ ᱞᱮᱫᱮᱭᱟ᱾ ᱟᱫᱚ ᱫᱟᱺᱭᱦᱟᱹ ᱫᱟᱨᱮ ᱥᱟᱶ ᱜᱮ ᱵᱟᱯᱞᱟ ᱞᱟᱹᱜᱤᱫ ᱠᱚ ᱥᱟᱯᱲᱟᱣᱚᱜ ᱠᱟᱱᱟ ᱾ ᱢᱚᱲᱮ ᱮᱨᱟ ᱠᱚ ᱥᱟᱠᱟᱢ ᱠᱚ ᱵᱟᱪᱷᱟᱣ ᱠᱮᱫᱼᱟ ᱾ ᱫᱮᱣᱞᱟ ᱫᱚ ᱩᱱᱠᱩ ᱥᱟᱠᱟᱢ ᱵᱟᱪᱷᱟᱣ ᱵᱩᱰᱷᱤ ᱮᱨᱟ ᱠᱚ ᱥᱟᱶ ᱮ ᱫᱩᱲᱩᱵ ᱢᱮᱥᱟᱭᱮᱱᱟ ᱾ ᱥᱟᱥᱟᱝ ᱠᱚ ᱵᱟᱪᱷᱟᱣ ᱠᱮᱫᱛᱮ, ᱫᱮᱣᱞᱟ ᱠᱚ ᱢᱮᱛᱟᱫ ᱫᱮᱭᱟ ᱱᱮ ᱫᱮᱣᱞᱟ ᱢᱟᱹᱭ ᱥᱟᱥᱟᱝ ᱨᱤᱫ ᱜᱚᱫ ᱠᱟᱜ ᱢᱮ ᱾ ᱫᱮᱣᱞᱟ ᱥᱟᱥᱟᱝ ᱮ ᱨᱤᱫ ᱠᱮᱫᱼᱟ ᱾ ᱞᱩᱜᱽᱲᱤ ᱠᱚ ᱥᱟᱥᱟᱝ ᱠᱮᱫᱼᱟ, ᱥᱩᱛᱟᱹᱢ ᱦᱚᱸ ᱠᱚ ᱥᱟᱥᱟᱝ ᱛᱟᱨᱟ ᱠᱮᱫᱼᱟ ᱾ ᱛᱷᱟᱹᱨᱤ ᱨᱮ ᱢᱚᱬᱮ ᱜᱚᱴᱟᱝ ᱠᱟᱛᱮ ᱯᱷᱩᱲᱩᱜ, ᱵᱟᱨᱭᱟ ᱛᱷᱟᱹᱨᱤ ᱨᱮ ᱠᱚ ᱥᱟᱡᱟᱣ ᱠᱮᱫᱼᱟ ᱾ ᱚᱱᱟ ᱯᱷᱩᱲᱩᱜ ᱨᱮ ᱥᱩᱱᱩᱢ, ᱥᱟᱥᱟᱝ, ᱟᱫᱽᱣᱟ ᱪᱟᱣᱞᱮ, ᱫᱷᱩᱵᱤ ᱜᱷᱟᱸᱥ, ᱛᱟᱵᱮᱱ ᱞᱟᱹᱰᱩ, ᱱᱟᱹᱠᱤᱡ, ᱥᱟᱥᱟᱝ, ᱥᱟᱥᱟᱝ ᱞᱩᱜᱽᱲᱤ, ᱥᱤᱸᱫᱩᱨ, ᱟᱨ ᱵᱟᱨᱭᱟ ᱞᱚᱴᱟ ᱨᱮ ᱫᱟᱜ ᱢᱤᱫᱴᱟᱹᱝ ᱞᱚᱴᱟ ᱨᱮᱫᱚ ᱩᱞ ᱰᱷᱟᱹᱣᱨᱟᱹᱜ ᱠᱚ ᱡᱚᱵᱮ ᱠᱮᱫᱼᱟ ᱾ ᱢᱤᱫᱴᱟᱹᱝ ᱨᱮᱫᱚ ᱵᱟᱝ ᱾ ᱜᱤᱫᱽᱨᱟᱹ ᱟᱡ ᱟᱭᱳ ᱛᱮᱠᱚ ᱦᱩᱰᱤᱧ ᱢᱟᱨᱟᱝ ᱢᱚᱬᱮ ᱦᱚᱲ ᱨᱤᱱ ᱢᱚᱬᱮ ᱮᱨᱟ ᱠᱚ ᱡᱚᱛᱚ ᱦᱚᱲ ᱠᱚ ᱥᱮᱯᱮᱧ ᱨᱟᱠᱟᱵ ᱠᱮᱫᱛᱮ ᱫᱟᱺᱭᱦᱟᱹ ᱵᱟᱯᱞᱟ ᱪᱟᱞᱟᱜ ᱞᱟᱹᱜᱤᱫ ᱠᱚ ᱥᱟᱯᱲᱟᱣ ᱮᱱᱟ ᱾ ᱡᱟᱦᱟᱸᱭ ᱫᱟᱺᱭᱦᱟᱹ ᱫᱟᱨᱮ ᱧᱟᱢ ᱟᱠᱟᱫ ᱟᱭ, ᱩᱱᱤ ᱨᱟᱭᱵᱟᱨ ᱦᱟᱲᱟᱢ ᱢᱟᱬᱟᱝ ᱢᱟᱬᱟᱝ ᱛᱮ ᱛᱟᱲᱟᱢ ᱠᱮᱫ ᱟᱭ᱾ ᱟᱨ ᱩᱱᱤ ᱜᱤᱫᱽᱨᱟᱹ ᱫᱚᱠᱚ ᱜᱷᱚᱸᱬᱟ ᱠᱮᱫᱮ ᱛᱮ ᱵᱟᱯᱞᱟ ᱠᱚ ᱨᱮᱞᱟᱣ ᱮᱱᱟ ᱾ ᱛᱩᱢᱫᱟᱜ ᱴᱟᱢᱟᱠ ᱨᱩ ᱥᱟᱶᱛᱮ ᱟᱹᱛᱩ ᱢᱚᱲᱮ ᱦᱚᱲ ᱟᱨ ᱯᱮᱲᱟ ᱯᱩᱨᱵᱩ ᱠᱚ ᱥᱮᱨᱮᱧ ᱤᱫᱤᱭᱮᱫᱼᱟ ᱾ ᱫᱮᱣᱞᱟ ᱦᱚᱸ ᱛᱟᱭᱚᱢ ᱛᱟᱭᱚᱢ ᱛᱮ ᱢᱮᱥᱟ ᱟᱠᱟᱱᱟᱭ ᱢᱚᱲᱮ ᱮᱨᱟ ᱥᱟᱶ ᱾ ᱫᱮᱣᱞᱟ ᱚᱱᱟᱠᱚ ᱧᱮᱞ ᱠᱟᱛᱮ, ᱟᱹᱰᱤ ᱠᱩᱥᱤ ᱨᱟᱹᱥᱠᱟᱹᱭ ᱵᱩᱡᱷᱟᱹᱣ ᱮᱫᱼᱟ ᱾ ᱪᱮᱫᱟᱜ ᱥᱮ ᱜᱤᱫᱽᱨᱟᱹ ᱠᱷᱚᱱ ᱱᱤᱛ ᱫᱷᱟᱹᱵᱤᱡ ᱛᱮ ᱫᱟᱺᱭᱷᱟᱹ ᱵᱟᱯᱞᱟ ᱫᱚ ᱫᱮᱣᱞᱟ ᱛᱤᱥ ᱦᱚᱸ ᱵᱟᱭ ᱧᱮᱞ ᱞᱮᱫ ᱛᱟᱦᱮᱸ ᱠᱟᱱᱟ ᱾ ᱟᱡ ᱜᱚᱲᱚᱢ ᱦᱟᱲᱟᱢ ᱟᱜ ᱥᱤᱸᱜᱟᱹᱲ ᱚᱠᱛᱚ ᱨᱮᱭᱟᱜ ᱯᱟᱦᱲᱟ ᱨᱮᱜᱮ ᱟᱸᱡᱚᱢ ᱥᱮᱪᱮᱫ ᱞᱮᱱᱟᱭ ᱾ ᱫᱮᱣᱞᱟ ᱟᱨ ᱟᱡ ᱜᱚᱲᱚᱢ ᱦᱟᱲᱟᱢ ᱛᱤᱠᱤᱱ ᱫᱚ ᱟᱹᱰᱤ ᱜᱮ ᱯᱚᱴᱟᱣ ᱢᱮᱱᱟᱜ ᱠᱤᱱᱟ ᱾ ᱫᱤᱱᱟᱹᱢ ᱜᱮ ᱥᱤᱸᱜᱟᱹᱲ ᱵᱮᱲᱟ ᱫᱚ ᱢᱤᱫ ᱜᱷᱟᱹᱲᱤᱠ ᱫᱩᱲᱩᱵ ᱠᱟᱛᱮᱫ ᱟᱡ ᱜᱚᱲᱚᱢ ᱦᱟᱲᱟᱢ ᱥᱮᱫᱟᱭ ᱠᱟᱛᱷᱟ ᱠᱚᱭ ᱞᱟᱹᱭ ᱪᱮᱢᱮᱫ ᱟᱭᱟ ᱾ ᱡᱚᱠᱷᱚᱱ ᱢᱮᱫ ᱛᱮ ᱛᱮᱦᱮᱧ ᱮ ᱧᱮᱞᱮᱫ ᱠᱷᱟᱱ ᱟᱹᱰᱤ ᱠᱩᱥᱤ ᱥᱟᱞᱟᱜ ᱨᱟᱹᱥᱠᱟᱹᱭ ᱟᱹᱭᱠᱟᱹᱣ ᱮᱫᱼᱟ ᱾ ᱢᱚᱱᱮ ᱨᱟᱹᱥᱠᱟᱹ ᱛᱮ ᱛᱟᱭ ᱪᱷᱤᱞᱠᱟᱹᱼᱪᱷᱤᱞᱠᱤᱜ ᱠᱟᱱᱟ ᱾ ᱫᱮᱣᱞᱟ ᱛᱮᱠᱚ ᱫᱟᱺᱭᱷᱟᱹ ᱫᱟᱨᱮ ᱴᱷᱮᱱ ᱥᱤᱢᱟᱹ ᱵᱟᱦᱨᱮ ᱠᱚ ᱥᱮᱴᱮᱨ ᱮᱱᱟ ᱾ ᱚᱱᱟ ᱫᱟᱺᱭᱦᱟᱹ ᱫᱟᱨᱮ ᱨᱮ ᱯᱮ ᱫᱷᱟᱣ ᱠᱚ ᱟᱹᱪᱩᱨ ᱮᱱᱟ ᱾ ᱚᱱᱟ ᱛᱟᱭᱚᱢ ᱪᱟᱸᱫᱚ ᱨᱟᱠᱟᱵ ᱥᱮᱫ ᱠᱚ ᱥᱟᱢᱟᱝ ᱠᱮᱫᱼᱟ ᱾ ᱫᱟᱨᱮ ᱯᱷᱮᱰᱟᱛ ᱨᱮᱠᱚ ᱜᱩᱨᱤᱡ ᱠᱮᱫᱼᱟ ᱾ ᱫᱟᱺᱭᱦᱟᱹ ᱫᱟᱨᱮ ᱠᱮ ᱥᱩᱱᱩᱢ ᱥᱟᱥᱟᱝ ᱱᱟᱹᱠᱤᱡ ᱪᱩᱢᱟᱹᱣᱲᱟ ᱠᱮᱫᱮᱭᱟᱠᱚ, ᱛᱟᱭᱚᱢ ᱜᱤᱫᱽᱨᱟᱹ ᱚᱱᱟ ᱫᱟᱨᱮ ᱨᱮ ᱥᱩᱛᱟᱹᱢ ᱯᱮ ᱫᱷᱟᱣ ᱠᱚ ᱵᱮᱫᱷᱟᱣ ᱦᱚᱪᱚ ᱠᱮᱫᱮᱭᱟ, ᱯᱮ ᱫᱷᱟᱣ ᱥᱟᱥᱟᱝ ᱞᱩᱜᱽᱲᱤ ᱦᱚᱸᱠᱚ ᱵᱮᱫᱷᱟᱣ ᱚᱪᱚ ᱠᱮᱫᱮᱭᱟ ᱠᱚᱲᱟ ᱜᱤᱫᱽᱨᱟᱹ ᱾
ᱚᱱᱟᱛᱮ ᱠᱚ ᱜᱩᱞᱮᱫᱼᱟ ᱦᱚᱲ ᱠᱚ ᱵᱟᱹᱵᱩ ᱵᱟᱹᱦᱩ ᱫᱚ ᱵᱮᱥ ᱴᱷᱤᱠ ᱵᱟᱸᱫᱮ ᱠᱟᱭ ᱢᱮ, ᱞᱚᱴᱟ ᱫᱟᱜ ᱩᱞ ᱰᱷᱟᱹᱣᱨᱟᱹᱜ ᱛᱮ ᱯᱮ ᱫᱷᱟᱣ ᱠᱚ ᱛᱤᱨᱯᱤ ᱦᱚᱪᱚ ᱠᱮᱫᱮᱭᱟ ᱾ ᱜᱤᱫᱽᱨᱟᱹ ᱦᱤᱴᱤ ᱦᱤᱴᱤ ᱞᱟᱸᱫᱟ ᱟᱛᱮ ᱮ ᱠᱚᱭᱚᱜ ᱟᱠᱟᱫ ᱜᱮᱭᱟ᱾ ᱩᱱᱤ ᱜᱤᱫᱽᱨᱟᱹ ᱠᱚ ᱢᱮᱛᱟᱭᱟ ᱢᱟ ᱵᱟᱹᱵᱩ ᱥᱤᱸᱫᱩᱨ ᱮᱢ ᱯᱮ ᱫᱷᱟᱣ ᱵᱚᱥᱢᱚᱛᱟ ᱨᱮ ᱮᱢ ᱠᱟᱛᱮ ᱚᱱᱟ ᱫᱟᱨᱮ ᱨᱮ ᱥᱤᱸᱫᱩᱨ ᱨᱟᱠᱟᱵᱽ ᱢᱮ ᱾ ᱟᱫᱚ ᱩᱱ ᱚᱠᱛᱚ ᱨᱮ ᱩᱱᱤ ᱜᱤᱫᱽᱨᱟᱹ ᱟᱜ ᱡᱚᱡᱚᱢ ᱛᱤ ᱥᱟᱵ ᱠᱟᱛᱮ ᱥᱤᱸᱫᱩᱨ ᱫᱚ ᱚᱛᱨᱮ ᱱᱟᱦᱟᱜ ᱠᱚ ᱜᱤᱰᱤ ᱚᱪᱚᱭᱮ ᱞᱟᱹᱜᱤᱫ ᱾ ᱩᱱ ᱨᱮ ᱫᱮᱣᱞᱟ, ᱟᱡ ᱜᱚᱲᱚᱢ ᱦᱟᱲᱟᱢ ᱟᱜ ᱠᱟᱛᱷᱟ ᱩᱭᱦᱟᱹᱨ ᱜᱚᱫᱟᱭ ᱾ ᱜᱚᱲᱚᱢ ᱦᱟᱲᱟᱢ ᱮ ᱞᱟᱹᱭ ᱞᱮᱫ ᱛᱟᱦᱮᱸ ᱠᱟᱱᱟ, ᱥᱮᱛᱟ ᱰᱟᱴᱟ ᱨᱮᱫᱚ ᱵᱟᱫᱷᱚᱠ ᱛᱟᱦᱮᱸᱱᱟ, ᱟᱨ ᱚᱱᱟ ᱵᱟᱫᱷᱚᱠ ᱪᱷᱟᱰᱟᱣ ᱞᱟᱹᱜᱤᱫ ᱜᱮ ᱥᱮᱛᱟ ᱵᱟᱝ ᱠᱷᱟᱱ ᱫᱟᱺᱭᱦᱟᱹ ᱫᱟᱨᱮ ᱥᱟᱶ ᱠᱚ ᱵᱟᱯᱞᱟ ᱠᱚᱣᱟ ᱾ ᱵᱟᱯᱞᱟ ᱚᱠᱛᱚ ᱫᱚ ᱞᱮᱸᱜᱟ ᱛᱤᱛᱮ ᱜᱮᱠᱚ ᱠᱟᱹᱢᱤ ᱚᱪᱚ ᱮᱭᱟ ᱾ ᱡᱟᱦᱟᱸᱭ ᱜᱤᱫᱽᱨᱟᱹ ᱠᱚ ᱵᱟᱯᱞᱟ ᱮ ᱠᱟᱱᱟ, ᱟᱨ ᱱᱚᱶᱟ ᱦᱚᱸᱛᱚᱭ ᱞᱟᱹᱭ ᱞᱮᱫᱟ, ᱞᱮᱫᱼᱟ ᱛᱤ ᱨᱮᱭᱟᱜ ᱥᱤᱡ ᱠᱟᱹᱴᱩᱵ ᱛᱮᱜᱮ ᱥᱤᱸᱫᱩᱨ ᱫᱚᱭ ᱜᱤᱰᱤᱭᱟ ᱾ ᱛᱚᱵᱮ ᱮᱱᱟᱝ ᱥᱤᱸᱫᱩᱨ ᱫᱚᱭ ᱨᱟᱠᱟᱵᱟ ᱢᱮᱱᱠᱷᱟᱱ ᱱᱩᱠᱩ ᱢᱟ ᱡᱚᱡᱚᱢ ᱛᱤ ᱛᱮ ᱠᱚ ᱨᱟᱠᱟᱵ ᱦᱚᱪᱚ ᱮ ᱠᱟᱱᱟ ᱾ ᱱᱚᱶᱟ ᱫᱚ ᱯᱟᱞᱮ ᱵᱟᱹᱲᱤᱡ ᱦᱩᱭᱩᱜ ᱠᱟᱱᱟ᱾ ᱫᱮᱣᱞᱟ ᱩᱭᱦᱟᱹᱨ ᱟᱹᱪᱩᱨ ᱨᱮᱫᱼᱟᱭ ᱪᱮᱫ ᱫᱩᱧ ᱢᱮᱱᱟ ᱪᱮᱫ ᱫᱚ ᱵᱟᱝ᱾ ᱵᱩᱡᱷᱟᱹᱣ ᱜᱮ ᱵᱟᱭ ᱫᱟᱲᱮᱭᱟᱜ ᱠᱟᱱᱟ ᱾ ᱥᱟᱸᱜᱮ ᱦᱚᱲ ᱧᱮᱞᱛᱮ, ᱢᱚᱱᱮ ᱠᱮᱴᱮᱡ ᱠᱟᱛᱮ ᱢᱮᱱ ᱠᱮᱫᱼᱟᱭ, “ᱦᱟᱯᱮ ᱠᱟᱠᱟ! ᱟᱞᱚ ᱯᱮ ᱥᱤᱸᱫᱩᱨ ᱦᱚᱪᱚᱣᱟᱭᱟ ᱾ ᱡᱚᱡᱚᱢ ᱛᱤ ᱛᱮᱫᱚ ᱵᱟᱝ ᱞᱮᱸᱜᱟ ᱛᱤ ᱥᱤᱡ ᱠᱟᱹᱴᱩᱵ ᱛᱮ ᱥᱤᱸᱫᱩᱨ ᱦᱚᱪᱚᱭᱮᱯᱮ, ᱟᱨ ᱠᱟᱠᱟ ᱦᱤᱨᱞᱟᱹ ᱢᱟᱨᱟᱝ ᱵᱳᱨᱳ ᱢᱮᱱ ᱯᱮ ᱛᱷᱤᱨ ᱟᱠᱟᱱ ᱫᱚᱯᱮ᱾ ”ᱟᱡ ᱢᱮᱱ ᱟᱹᱣᱨᱤ ᱯᱩᱨᱟᱹᱣ ᱨᱮᱜᱮ ᱡᱚᱡᱚᱢ ᱛᱤ ᱛᱮᱜᱮ ᱥᱤᱸᱫᱩᱨ ᱠᱮᱫᱮᱭᱟᱭ “ᱦᱤᱨᱞᱟᱹ ᱢᱟᱨᱟᱝ ᱵᱳᱨᱳ ᱦᱤᱨᱞᱟᱹ” ᱰᱟᱠ ᱦᱚᱸ ᱢᱤᱫ ᱫᱦᱟᱣ ᱜᱮ ᱠᱚ ᱰᱟᱠ ᱠᱮᱫᱼᱟ ᱾ ᱯᱮ ᱫᱷᱟᱣ ᱫᱚ ᱵᱟᱝ᱾ ᱫᱮᱣᱞᱟ ᱠᱚ ᱢᱮᱛᱟᱭ ᱠᱟᱱᱟ ᱢᱟᱹᱡᱷᱤ ᱢᱚᱲᱮ ᱟᱹᱛᱩ ᱦᱚᱲ, “ᱟᱢ ᱠᱩᱲᱤ ᱜᱤᱫᱽᱨᱟᱹ ᱴᱷᱮᱱ ᱱᱩᱱᱟᱹᱜ ᱥᱟᱦᱚᱥ ᱛᱟᱢ ᱦᱩᱭ ᱮᱱᱟ ᱫᱤᱥᱚᱢ ᱯᱮᱲᱟ ᱥᱟᱢᱟᱝ ᱨᱮ ᱫᱟᱺᱭᱷᱟᱹ ᱵᱟᱯᱞᱟ ᱥᱤᱸᱫᱩᱨ ᱨᱮᱭᱟᱜ ᱠᱟᱛᱷᱟᱢ ᱞᱟᱹᱭ ᱪᱮᱫ ᱟᱞᱮ ᱠᱟᱱᱟ ᱾ ᱟᱞᱮ ᱫᱚ ᱛᱤᱥ ᱦᱚᱸ ᱵᱟᱞᱮ ᱧᱮᱞ ᱟᱠᱟᱫᱼᱟ ᱥᱮ ᱠᱟᱹᱢᱤ ᱜᱮ ᱵᱟᱞᱮ ᱠᱚᱨᱟᱣ ᱟᱠᱟᱫᱼᱟ ᱾ ᱟᱢ ᱛᱮᱦᱮᱧ ᱮᱢ ᱥᱮᱪᱮᱫ ᱮᱫ ᱞᱮᱭᱟ ᱾ ᱟᱹᱱᱼᱟᱹᱨᱤ ᱱᱤᱭᱟᱢ ᱠᱟᱹᱱᱩᱱ, ᱟᱢ ᱫᱚ ᱢᱤᱫ ᱠᱩᱲᱤ ᱜᱤᱫᱽᱨᱟᱹ ᱠᱟᱱᱟᱢ ᱩᱱᱟᱹᱜ ᱨᱚᱲ ᱨᱮᱱᱟᱜ ᱩᱫᱷᱤᱠᱟᱨ ᱜᱮ ᱵᱟᱹᱱᱩᱜ ᱛᱟᱢᱟ᱾ ᱞᱤᱱ ᱞᱮᱢ ᱠᱷᱟᱱ ᱛᱳᱣᱟ ᱜᱮ ᱛᱟᱢ ᱚᱰᱚᱠᱚᱜᱼᱟ ᱾ ᱢᱚᱪᱟ ᱥᱮᱫ ᱠᱷᱚᱱ, ᱟᱢ ᱫᱚ ᱱᱚᱰᱮ ᱢᱟᱥᱴᱚᱨᱱᱤ ᱠᱚᱫᱚ ᱵᱟᱝ ᱵᱮᱱᱟᱣ ᱦᱩᱭᱩᱜᱼᱟ ᱾ ᱟᱢ ᱫᱚ ᱢᱤᱫ ᱠᱩᱲᱤ ᱜᱤᱫᱽᱨᱟᱹ ᱠᱟᱱᱟᱢ ᱟᱨ ᱟᱞᱮ ᱫᱚ ᱠᱚᱲᱟ ᱠᱟᱱᱟ ᱞᱮ, ᱟᱨ ᱡᱚᱛᱚ ᱟᱹᱱ ᱟᱹᱨᱤ ᱱᱤᱭᱟᱹᱢ ᱠᱚᱫᱚ ᱡᱚᱛᱚ ᱞᱮ ᱵᱟᱰᱟᱭᱟ᱾”
ᱵᱟᱯᱞᱟ ᱯᱩᱨᱟᱹᱣ ᱠᱟᱛᱮ ᱡᱚᱛᱚ ᱦᱚᱲ ᱠᱚ ᱨᱩᱣᱟᱹᱲ ᱮᱱᱟ᱾ ᱚᱲᱟᱜ ᱡᱚᱢ ᱧᱩ ᱠᱟᱛᱮ ᱫᱚᱝ ᱠᱚ ᱮᱱᱮᱡ ᱠᱟᱱᱟ ᱨᱟᱹᱥᱠᱟᱹ ᱜᱮ, ᱫᱮᱣᱞᱟ ᱫᱚ ᱨᱟᱜ ᱢᱮᱫᱦᱟ ᱠᱟᱛᱮ ᱚᱲᱟᱜ ᱨᱩᱣᱟᱹᱲ ᱦᱮᱡ ᱥᱟᱱᱟᱭ ᱠᱟᱱ ᱛᱟᱦᱮᱸ ᱠᱟᱱᱟ, ᱩᱱᱨᱮ ᱟᱠᱚ ᱠᱩᱰᱟᱹᱢ ᱨᱤᱱᱤᱡ ᱯᱟᱭᱚ ᱵᱩᱰᱷᱤ ᱥᱟᱵ ᱨᱩᱣᱟᱹᱲ ᱠᱮᱫᱮᱭᱟ, ᱢᱮᱛᱟᱭᱟ, “ᱮ ᱱᱟ ᱜᱚᱲᱚᱢ ᱢᱤᱫ ᱟᱛᱨᱮ ᱞᱟᱝ ᱮᱱᱮᱡ ᱞᱮᱜᱮ ᱚᱲᱟᱜ ᱫᱚ ᱱᱟᱦᱟᱜ ᱞᱟᱝ ᱥᱮᱱᱚᱜ ᱜᱮᱭᱟ᱾” ᱩᱱᱤ ᱯᱟᱭᱚ ᱵᱩᱰᱷᱤ ᱥᱟᱶ ᱚᱜᱚᱨᱚᱡᱽ ᱠᱟᱛᱮ ᱦᱚᱸ ᱫᱚᱝ ᱮᱱᱮᱡ ᱨᱮ ᱥᱮᱞᱮᱫ ᱮᱱᱟᱭ ᱾
ᱯᱟᱭᱚ ᱵᱩᱰᱷᱤ ᱥᱟᱶ ᱜᱮ ᱮᱱᱮᱡ ᱵᱟᱲᱟ ᱠᱟᱛᱮ ᱚᱲᱟᱜ ᱛᱮ ᱦᱮᱡ ᱮᱱᱟᱭ ᱾ ᱚᱲᱟᱜ ᱦᱮᱡ ᱠᱟᱛᱮ ᱟᱡ ᱫᱟᱫᱟᱭ ᱞᱟᱹᱭ ᱟᱭᱟ᱾ ᱫᱟᱺᱭᱦᱟᱹ ᱵᱟᱯᱞᱟ ᱚᱠᱛᱚ ᱜᱤᱫᱽᱨᱟᱹ ᱫᱚ ᱡᱚᱡᱚᱢ ᱛᱤ ᱛᱮᱠᱚ ᱥᱤᱸᱫᱩᱨ ᱚᱪᱚ ᱠᱮᱫᱮᱭᱟ ᱾ ᱩᱱ ᱚᱠᱛᱚ ᱤᱧ ᱵᱷᱩᱞᱚᱜ ᱠᱟᱱᱟ ᱢᱮᱱᱛᱤᱧ ᱨᱚᱲ ᱞᱮᱫ ᱨᱮ ᱢᱚᱬᱮ ᱦᱚᱲ ᱠᱚ ᱟᱹᱲᱤᱥ ᱮᱱᱟ᱾ ᱟᱡ ᱫᱟᱫᱟ ᱦᱚᱸ ᱩᱱ ᱨᱮ ᱟᱹᱰᱤ ᱡᱩᱨ ᱮ ᱨᱩᱦᱤᱫ ᱮᱭᱟ ᱾
ᱼ ᱟᱢᱟᱜ ᱫᱚ ᱚᱸᱰᱮ ᱢᱮᱱ ᱨᱮᱭᱟᱜ ᱩᱪᱤᱛ ᱜᱮ ᱵᱟᱭ ᱛᱟᱦᱮᱸ ᱠᱟᱱᱟ ᱾ ᱟᱢ ᱥᱟᱶᱛᱮ ᱟᱞᱮ ᱦᱚᱸᱢ ᱚᱯᱚᱢᱟᱱ ᱠᱮᱫ ᱞᱮᱭᱟ ᱾
ᱼ “ᱫᱟᱫᱟ ᱱᱚᱶᱟ ᱫᱚ ᱪᱮᱫ ᱮᱢ ᱢᱮᱱᱮᱫᱼᱟ?ᱡᱟᱦᱟᱸ ᱱᱤᱭᱟᱹᱢ ᱨᱮᱭᱟᱜ ᱠᱟᱛᱷᱟ ᱠᱟᱱᱟ, ᱚᱱᱟ ᱜᱮᱛᱩᱧ ᱨᱚᱲ ᱟᱠᱟᱫᱼᱟ ᱾ ᱚᱱᱟᱛᱮ ᱫᱚ ᱪᱮᱫ ᱤᱧ ᱚᱯᱚᱢᱟᱱ ᱠᱮᱫ ᱯᱮᱭᱟ᱾ ᱫᱟᱫᱟ ᱚᱱᱟ ᱠᱚᱫᱚ ᱪᱮᱫᱟᱜ ᱮᱢ ᱢᱮᱛᱟᱹᱧ ᱠᱟᱱᱟ ᱾ ᱪᱮᱫ ᱟᱵᱚ ᱥᱟᱶᱛᱟ ᱨᱤᱱ ᱛᱤᱨᱞᱟᱹ ᱫᱚ ᱵᱟᱠᱚ ᱞᱟᱹᱭ ᱠᱮᱭᱟ? ᱵᱟᱹᱲᱤᱡ ᱦᱩᱭᱩᱜ ᱠᱟᱱᱟ ᱚᱱᱟ ᱥᱩᱥᱟᱹᱨ ᱨᱮᱭᱟᱜ ᱠᱟᱛᱷᱟ ᱜᱮᱛᱩᱧ ᱨᱚᱲ ᱟᱠᱟᱫᱼᱟ ᱾ ᱚᱱᱟᱛᱮ ᱫᱚ ᱚᱠᱟᱨᱤᱧ ᱚᱯᱚᱢᱟᱱ ᱠᱮᱫ ᱯᱮᱭᱟ ᱟᱹᱛᱩ ᱢᱚᱲᱮ ᱦᱚᱸ ᱚᱱᱟ ᱜᱮᱠᱚ ᱢᱮᱱᱮᱫᱼᱟ, ᱟᱢ ᱦᱚᱸ ᱫᱟᱫᱟ ᱚᱱᱟ ᱜᱮᱢ ᱢᱮᱱᱮᱫ ᱾”
ᱫᱮᱣᱞᱟ ᱛᱮᱦᱮᱧ ᱟᱹᱰᱤ ᱫᱩᱠ ᱮ ᱟᱹᱭᱠᱟᱹᱣ ᱮᱫᱼᱟ ᱾ ᱟᱡ ᱟᱭᱳ ᱦᱚᱸ ᱩᱱᱠᱤᱱᱟᱜ ᱠᱟᱛᱷᱟ ᱟᱸᱡᱚᱢ ᱠᱟᱛᱮ ᱢᱮᱛᱟᱭ ᱠᱟᱱᱟ,
ᱼ ᱵᱤᱴᱤ ᱟᱢ ᱫᱚ ᱢᱤᱫ ᱠᱩᱲᱤ ᱜᱤᱫᱽᱨᱟᱹ ᱠᱟᱱᱟᱢ ᱾ ᱟᱢ ᱫᱚ ᱢᱤᱫ ᱠᱩᱲᱤ ᱜᱤᱫᱽᱨᱟᱹ ᱞᱮᱠᱟ ᱜᱮ ᱛᱟᱦᱮᱸᱱ ᱢᱮ ᱾ ᱫᱮᱣᱞᱟᱜ ᱢᱚᱪᱟ ᱢᱮᱫᱦᱟ ᱠᱚᱛᱟᱭ ᱜᱚᱥᱚ ᱠᱟᱛᱮ ᱦᱩᱰᱤᱧᱼᱦᱩᱰᱤᱧ ᱮᱱᱟ ᱾ ᱨᱟᱜ ᱢᱮᱫᱦᱟ ᱛᱮ ᱚᱲᱟᱜ ᱥᱮᱫ ᱮ ᱵᱚᱞᱚ ᱮᱱᱟ ᱾ ᱟᱡᱟᱜ ᱜᱤᱛᱤᱡ ᱯᱟᱨᱠᱚᱢ ᱨᱮ ᱫᱩᱲᱩᱵ ᱦᱟᱹᱯᱤ ᱮᱱᱟ᱾ᱠᱤᱪᱷᱤ ᱜᱷᱟᱹᱲᱤᱠ ᱛᱟᱭᱚᱢ ᱮ ᱜᱤᱛᱤᱡ ᱮᱱᱟ ᱾ ᱫᱮᱣᱞᱟᱭ ᱜᱤᱛᱤᱡᱼᱜᱤᱛᱤᱡᱻᱮ ᱫᱤᱥᱟᱹᱭᱮᱫᱼᱟ, ᱪᱮᱫ ᱚᱱᱠᱟᱱ ᱵᱟᱹᱲᱤᱡ ᱠᱟᱛᱷᱟᱧ ᱢᱮᱱ ᱜᱚᱫ ᱠᱮᱫᱛᱮ, ᱟᱹᱛᱩ ᱦᱚᱲ ᱥᱟᱶᱛᱮ ᱚᱲᱟᱜ ᱦᱚᱲ ᱦᱚᱸ ᱠᱚ ᱨᱩᱦᱤᱫ ᱤᱧ ᱠᱟᱱᱟ ᱾ ᱚᱱᱟᱠᱚ ᱩᱭᱦᱟᱹᱨ ᱫᱤᱥᱟᱹ ᱛᱮᱜᱮ ᱛᱤᱱ ᱨᱮᱪᱚᱭ ᱡᱟᱹᱯᱤᱫ ᱠᱮᱫᱼᱟ, ᱟᱡ ᱦᱚᱸ ᱵᱟᱝ ᱮ ᱴᱷᱤᱠᱟᱹ ᱫᱟᱲᱮᱭᱟᱫᱼᱟ ᱾
ᱫᱚᱥᱟᱨ ᱦᱤᱞᱚᱜ ᱪᱟᱸᱫᱚ ᱨᱟᱠᱟᱵ ᱫᱷᱟᱹᱵᱤᱡ ᱮ ᱜᱤᱛᱤᱡ ᱞᱮᱱ ᱛᱟᱦᱮᱸ ᱠᱟᱱᱟ ᱾ ᱵᱟᱲᱜᱮ ᱨᱮᱱᱟᱜ ᱡᱚᱡᱚ ᱫᱟᱨᱮ ᱨᱮ ᱟᱭᱢᱟ ᱠᱤᱥᱱᱤ ᱪᱮᱬᱮ ᱠᱚ ᱜᱮᱯᱮᱨ ᱛᱟᱯᱟᱢ ᱠᱟᱱᱟ ᱾ ᱩᱱᱠᱩ ᱪᱮᱬᱮᱭᱟᱜ ᱪᱮᱨᱚ ᱵᱮᱨᱚ ᱛᱮ ᱫᱮᱣᱞᱟ ᱡᱟᱹᱯᱤᱫ ᱠᱷᱚᱱ ᱮ ᱵᱮᱨᱮᱫ-ᱟ ᱾ ᱱᱚᱛᱮ ᱚᱱᱟ ᱛᱟᱠ ᱨᱮᱜᱮ ᱟᱡ ᱟᱭᱳ ᱦᱚᱸᱭ ᱦᱚᱦᱚ ᱵᱮᱨᱮᱫ ᱞᱮᱫᱼᱟ ᱾ ᱵᱮᱨᱮᱫ ᱠᱟᱛᱮ ᱵᱟᱲᱜᱮ ᱨᱮᱱᱟᱜ ᱠᱩᱧ ᱛᱮ ᱪᱟᱞᱟᱣ ᱮᱱᱛᱮ ᱢᱮᱫᱦᱟ ᱠᱚᱭ ᱟᱻᱵ ᱯᱷᱟᱹᱨᱪᱟᱹ ᱮᱱᱟ ᱾ ᱪᱟᱹᱲᱤ ᱨᱮᱱᱟᱜ ᱢᱤᱫ ᱠᱚᱪᱟ ᱠᱷᱚᱱ ᱢᱤᱫ ᱞᱩᱠᱩᱭ ᱡᱚᱱᱚᱜ ᱮ ᱥᱟᱵ ᱠᱮᱫᱛᱮ ᱠᱩᱞᱷᱤ ᱪᱷᱟᱴᱠᱟ ᱠᱚᱭ ᱡᱚᱜ ᱵᱟᱲᱟ ᱠᱮᱫᱛᱮ ᱟᱨᱦᱚᱸ ᱚᱱᱟ ᱡᱚᱱᱚᱜ ᱫᱚ ᱚᱱᱟ ᱠᱚᱪᱟ ᱨᱮᱜᱮ ᱪᱟᱯᱟᱫ ᱠᱮᱫ ᱟᱭ ᱾ ᱡᱷᱟᱹᱱᱴᱤ ᱨᱮᱜᱮ ᱛᱟᱦᱮᱸ ᱠᱟᱱ ᱢᱤᱫ ᱱᱤᱢ ᱯᱚᱦᱟᱭ ᱯᱮᱴᱮᱡ ᱠᱮᱫ ᱛᱮ ᱫᱟᱹᱛᱟᱹᱣᱱᱤ ᱮᱱᱛᱮ ᱠᱩᱧ ᱯᱤᱸᱰᱟ ᱨᱮ ᱛᱟᱦᱮᱸ ᱠᱟᱱ ᱵᱟᱹᱞᱴᱤᱧ ᱫᱟᱜ ᱛᱮ ᱦᱩᱛᱩᱢ ᱯᱷᱟᱹᱨᱪᱟᱹᱭᱮᱱᱟ ᱾
ᱚᱲᱟᱜ ᱮ ᱵᱚᱞᱚᱱᱟ ᱾ ᱢᱤᱫ ᱵᱟᱹᱴᱤ ᱨᱮ ᱯᱩᱱ ᱪᱩᱯᱩᱫ ᱠᱷᱟᱹᱡᱟᱹᱲᱤ ᱚᱰᱚᱠ ᱠᱮᱫᱟᱭ ᱟᱨ ᱧᱤᱫᱟᱹ ᱥᱟᱨᱮᱡ ᱩᱛᱩ (ᱟᱹᱞᱩ, ᱵᱮᱸᱜᱟᱲ ᱟᱨ ᱵᱤᱞᱟᱹᱛᱤ)ᱭ ᱞᱩ ᱠᱮᱫᱼᱟ ᱾ ᱨᱟᱹᱞᱤ ᱯᱮᱭᱟᱸᱡᱽ ᱢᱤᱫ ᱜᱟᱸᱰᱟ ᱟᱨ ᱢᱤᱫ ᱵᱮᱨᱮᱞ ᱢᱟᱹᱨᱤᱪ ᱮ ᱥᱟᱵ ᱠᱮᱫᱛᱮ ᱨᱟᱪᱟ ᱯᱤᱸᱰᱟ ᱨᱮ ᱥᱟᱛᱮ ᱯᱟᱹᱲ ᱴᱮᱥᱟ ᱠᱷᱩᱸᱴᱤ ᱨᱮ ᱴᱮᱸᱰᱟᱨ ᱫᱩᱲᱩᱵ ᱮᱱᱛᱮ ᱥᱤᱯᱤ ᱠᱟᱛᱮᱫ ᱮ ᱡᱚᱢᱟ ᱾ ᱠᱷᱟᱹᱡᱟᱹᱲᱤ ᱡᱚᱢ ᱦᱩᱭ ᱠᱟᱛᱮ ᱫᱟᱜ ᱟᱨᱮᱡ ᱨᱮ ᱵᱟᱹᱴᱤ ᱫᱚᱦᱚ ᱠᱟᱛᱮ ᱵᱟᱲᱜᱮ ᱥᱮᱫ ᱮ ᱪᱟᱞᱟᱚᱜᱼᱟ ᱾
ᱛᱮᱦᱮᱧ ᱦᱚᱸ ᱟᱡᱟᱜ ᱢᱚᱱᱮ ᱨᱮ ᱦᱚᱞᱟ ᱱᱟᱜ ᱠᱟᱛᱷᱟ ᱜᱩᱨᱞᱟᱹᱣ ᱟᱹᱪᱩᱨᱚᱜ ᱠᱟᱱ ᱜᱮᱭᱟ ᱾ ᱵᱟᱲᱜᱮ ᱫᱚ ᱥᱤᱨᱤᱥ ᱡᱷᱟᱹᱱᱴᱤ ᱛᱮᱠᱚ ᱮᱥᱮᱫ ᱟᱠᱟᱫᱼᱟ ᱾ ᱢᱤᱫ ᱠᱚᱬ ᱨᱮᱫᱚ ᱠᱚ ᱡᱷᱟᱴᱟ ᱟᱠᱟᱫᱼᱟ ᱾ ᱡᱷᱟᱴᱟ ᱨᱮᱫᱚ ᱥᱚᱠᱚᱨᱠᱮᱸᱫᱟ, ᱰᱤᱸᱵᱩ, ᱠᱩᱸᱫᱽᱨᱤ ᱟᱨ ᱠᱚᱸᱦᱰᱟ ᱱᱟᱹᱲᱤ ᱨᱟᱠᱟᱵ ᱟᱠᱟᱱᱟ ᱾ ᱜᱟᱺᱫᱷᱟᱹᱨᱤ ᱟᱲᱟᱜ ᱠᱚ ᱪᱟᱥ ᱟᱠᱟᱫᱼᱟ ᱵᱟᱲᱜᱮ ᱨᱮ ᱾ ᱚᱸᱰᱮ ᱜᱮ ᱫᱩᱲᱩᱵ ᱮᱱᱛᱮ ᱟᱲᱟᱜ ᱛᱟᱞᱟ ᱨᱮ ᱢᱮᱱᱟᱜ ᱜᱷᱟᱸᱥ ᱠᱚ ᱛᱩᱫ ᱠᱟᱛᱮ ᱢᱚᱱᱮ ᱛᱟᱭ ᱵᱷᱩᱞᱟᱹᱣ ᱨᱮᱱᱟᱜ ᱮ ᱨᱤᱠᱟᱹᱭᱮᱫ ᱛᱟᱦᱮᱸ ᱠᱟᱱᱟ ᱾ ᱩᱱ ᱚᱠᱛᱚ ᱨᱮ ᱟᱡ ᱜᱚᱲᱚᱢ ᱦᱟᱲᱟᱢ ᱮ ᱦᱚᱦᱚᱭᱟ, “ᱮ ᱫᱮᱣᱞᱟ ᱵᱤᱴᱤ! ᱫᱮᱥᱮ ᱥᱩᱠᱛᱤᱡ ᱛᱮ ᱚᱱᱟ ᱰᱷᱤᱝᱠᱤ ᱢᱮᱞᱟ ᱨᱮ ᱢᱮᱱᱟᱜ ᱴᱷᱮᱠᱟ ᱠᱷᱚᱱ ᱢᱚᱬᱮ ᱪᱩᱯᱩᱫ ᱜᱟᱱ ᱠᱷᱚᱫᱮ ᱪᱟᱣᱞᱮ ᱟᱹᱜᱩᱭ ᱢᱮ ᱾” ᱟᱡ ᱜᱚᱲᱚᱢ ᱦᱟᱲᱟᱢ ᱫᱚ ᱩᱱ ᱚᱠᱛᱚ ᱥᱟᱠᱟᱢ ᱯᱩᱸᱜᱤ ᱮ ᱵᱮᱜᱼᱱᱟᱣ ᱠᱟᱱ ᱛᱟᱦᱮᱸ ᱠᱟᱱᱟ ᱾
ᱫᱮᱣᱞᱟ ᱵᱟᱝ ᱮ ᱜᱚᱝ ᱞᱮᱫᱮᱭᱟ ᱢᱮᱱᱠᱷᱟᱱ ᱵᱟᱲᱜᱮ ᱠᱷᱚᱱ ᱮ ᱦᱮᱡ ᱮᱱᱟ᱾ ᱪᱮᱫ ᱟᱲᱟᱜ ᱮᱢ ᱥᱤᱫ ᱠᱮᱫᱼᱟ ᱾ ᱥᱚᱠᱚᱨᱠᱮᱸᱫᱟ, ᱰᱤᱸᱵᱩ ᱟᱨ ᱠᱚᱸᱦᱰᱟ ᱟᱲᱟᱜ᱾ ᱢᱩᱱᱜᱟᱹ ᱟᱲᱟᱜ ᱦᱚᱸ ᱢᱮᱥᱟ ᱧᱚᱜ ᱢᱮ ᱤᱱᱟᱫᱚ ᱤᱧ ᱵᱟᱹᱲᱛᱤ ᱟᱞᱚ ᱛᱚᱜᱚᱡ ᱦᱩᱭᱟᱧᱢᱟ ᱾ ᱦᱚᱭ ᱟᱨ ᱮᱢ ᱫᱟᱹᱛᱟᱹᱣᱱᱤ ᱟᱠᱱᱟ ᱥᱮ ᱵᱟᱝ ᱾ ᱵᱤᱱ ᱫᱟᱹᱛᱟᱹᱣᱱᱤ ᱠᱟᱛᱮ ᱫᱚ ᱢᱩᱱᱜᱟᱹ ᱟᱲᱟᱜ ᱟᱞᱚᱢ ᱛᱤᱭᱩᱜᱟ᱾ ᱵᱟᱝ ᱠᱷᱟᱱ ᱢᱩᱱᱜᱟ ᱫᱟᱨᱮ ᱠᱚ ᱜᱟᱸᱰᱟᱨᱟ᱾ᱫᱮᱣᱞᱟ ᱥᱩᱠᱛᱤᱡ ᱨᱮ ᱠᱷᱚᱫᱮ ᱪᱟᱣᱞᱮ ᱟᱹᱜᱩ ᱠᱟᱛᱮ ᱟᱡ ᱜᱚᱲᱚᱢ ᱦᱟᱲᱟᱢ ᱮ ᱮᱢᱟᱭᱟ ᱾ ᱱᱚᱸᱰᱮ ᱤᱧ ᱥᱩᱨ ᱨᱮ ᱫᱩᱲᱩᱵ ᱢᱮ ᱾ ᱟᱭᱳ ᱰᱤᱞᱤ ᱠᱷᱚᱱ ᱦᱳᱲᱳ ᱚᱰᱚᱠ ᱡᱚᱠᱷᱚᱱ ᱮ ᱞᱟᱹᱭᱟ, ᱨᱮᱸᱜᱮᱡ ᱛᱮ ᱟᱞᱚᱢ ᱚᱰᱚᱠᱟ ᱾” ᱩᱣᱟᱺᱥ ᱨᱮ ᱵᱟᱸᱫᱤ ᱷᱩᱲᱩ ᱫᱚ ᱵᱟᱠᱚ ᱵᱚᱜᱚᱡᱟ ᱾ ᱦᱳᱲᱳ ᱞᱚᱦᱚᱫ ᱦᱚᱸ ᱵᱟᱭ ᱜᱟᱱᱚᱜᱼᱟ ᱾ ᱦᱳᱲᱳ ᱜᱮ ᱡᱤᱣᱤᱫ ᱮ ᱫᱚᱦᱚ ᱵᱚᱱᱟ ᱾ ᱫᱟᱠᱟ ᱵᱟᱢ ᱡᱚᱢ ᱞᱮᱠᱷᱟᱱ ᱫᱚ ᱡᱤᱣᱤᱫ ᱪᱤᱠᱟᱹᱢ ᱛᱟᱦᱮᱸ ᱠᱮᱭᱟ ᱾ ᱦᱳᱲᱳ ᱪᱟᱣᱞᱮ ᱚᱲᱟᱜ ᱨᱮᱜᱮ ᱟᱹᱪᱩᱨᱚᱜᱼᱟ ᱾ ᱨᱮᱸᱜᱮᱡ ᱛᱮ ᱚᱰᱚᱠ ᱞᱮᱠᱷᱟᱱ ᱞᱟᱡ ᱠᱷᱟᱹᱞᱤ ᱛᱟᱦᱮᱸᱱ ᱞᱮᱠᱟ ᱚᱲᱟᱜ ᱠᱷᱚᱱ ᱦᱳᱲᱳ ᱪᱟᱣᱞᱮ ᱦᱚᱸ ᱠᱷᱟᱹᱞᱤᱜᱼᱟ ᱾ ᱦᱟᱯᱲᱟᱢ ᱵᱤᱫᱟᱹᱞ ᱦᱟᱯᱲᱟᱢ ᱧᱮᱞ ᱟᱹᱜᱩ ᱟᱠᱟᱱᱟ ᱾
ᱼ ᱦᱚᱭ ᱜᱚᱲᱚᱢ ᱵᱤᱴᱤ ᱨᱮᱸᱜᱮᱡ ᱛᱮ ᱚᱸᱰᱚᱠ ᱞᱮᱠᱷᱟᱱ ᱦᱳᱲᱳ ᱠᱚ ᱵᱟᱝ ᱥᱟᱦᱟᱨᱚᱜᱼᱟ ᱾ ᱢᱮᱱ ᱛᱩᱞᱩᱡ ᱜᱮ ᱥᱩᱠᱛᱤᱡ ᱠᱷᱚᱱ ᱢᱤᱫ ᱵᱟᱨ ᱪᱩᱯᱩᱫ ᱨᱟᱪᱟ ᱨᱮ ᱥᱤᱢ ᱮ ᱮᱨᱼᱟᱫ ᱠᱚᱣᱟ ᱾ ᱥᱟᱹᱲᱤᱢ ᱪᱮᱛᱟᱱ ᱨᱮ ᱛᱟᱦᱮᱸ ᱠᱟᱱ ᱯᱟᱨᱣᱟ ᱦᱚᱸ ᱡᱚᱢ ᱞᱟᱹᱜᱤᱫ ᱛᱮ ᱯᱷᱟᱫᱽᱼᱯᱷᱟᱫᱟᱣ ᱟᱛᱮ ᱠᱚ ᱟᱬᱜᱚᱱ ᱠᱟᱱᱟ ᱾ ᱡᱚᱢ ᱠᱟᱛᱮ ᱟᱨ ᱦᱚᱸ ᱟᱹᱠᱤᱱ ᱥᱩᱨ ᱠᱚᱛᱮ ᱠᱚ ᱟᱬᱜᱚ ᱨᱟᱠᱟᱵ ᱮᱱᱟ ᱾ ᱩᱱᱨᱮ ᱜᱚᱲᱚᱢ ᱦᱟᱲᱟᱢ ᱮ ᱢᱮᱱᱟ, ᱼ ᱪᱮᱞᱮ ᱫᱮᱣᱞᱟ ᱵᱤᱴᱤ ᱛᱤᱱᱟᱹᱜ ᱱᱟᱯᱟᱭ ᱱᱩᱠᱩ ᱯᱟᱨᱣᱟᱼᱟᱜ ᱯᱷᱟᱹᱠᱬᱟᱹᱜ ᱨᱮᱱᱟᱜ ᱦᱚᱭ ᱵᱟᱡᱟᱣ ᱜᱚᱫᱚᱜ ᱠᱟᱱᱟ ᱾ ᱱᱚᱝᱠᱟᱱ ᱦᱚᱭ ᱫᱚ ᱵᱤᱡᱽᱞᱤ ᱠᱚᱲ ᱛᱮ ᱪᱟᱹᱞᱩᱜ ᱯᱟᱝᱠᱷᱟ ᱨᱮᱫᱚ ᱵᱟᱢ ᱧᱟᱢᱟ ᱾” ᱫᱮᱣᱞᱟ ᱪᱮᱫ ᱦᱚᱸ ᱵᱟᱭ ᱢᱮᱱᱟ ᱟᱡ ᱜᱚᱲᱚᱢ ᱦᱟᱲᱟᱢᱟᱜ ᱢᱮᱫᱦᱟ ᱜᱮ ᱠᱚᱭᱚᱜ ᱦᱟᱹᱯᱤ ᱠᱟᱜ ᱟᱭ ᱾ ᱢᱤᱫ ᱨᱟᱪᱟ ᱟᱹᱠᱤᱱ ᱥᱟᱢᱟᱝ ᱨᱮ ᱥᱤᱢ ᱟᱨ ᱯᱟᱨᱣᱟ ᱢᱤᱫᱛᱮ ᱠᱚ ᱟᱹᱛᱤᱧ ᱠᱟᱱᱟ ᱾ ᱩᱱ ᱚᱠᱛᱚ ᱥᱮᱬᱟ ᱥᱟᱺᱰᱤ, ᱦᱩᱰᱩᱧ ᱵᱩᱥᱟᱹᱜ ᱠᱚᱫᱚ ᱠᱚ ᱛᱚᱵᱟᱜ ᱥᱟᱥᱦᱟᱭᱮᱫ ᱠᱚᱣᱟ ᱟᱨ ᱪᱟᱨᱟ ᱠᱚ ᱡᱚᱢ ᱮᱫᱟ ᱾ ᱩᱱᱠᱩ ᱥᱤᱢ ᱵᱩᱥᱟᱹᱜ ᱦᱚᱸ ᱟᱹᱪᱩᱨ ᱧᱚᱜ ᱠᱟᱛᱮ ᱥᱟᱦᱟ ᱫᱷᱟᱨᱟ ᱨᱮ ᱠᱟᱞᱚᱴ ᱥᱟᱶ ᱪᱟᱨᱟ ᱠᱚ ᱡᱚᱢ ᱮᱫᱼᱟ ᱾ ᱜᱚᱲᱚᱢ ᱦᱟᱲᱟᱢ ᱮ ᱢᱮᱱᱟ, ᱼ ᱧᱮᱞᱮᱫ ᱠᱚᱣᱟᱢ ᱥᱮ ᱫᱮᱣᱞᱟ ᱵᱤᱴᱤ, ᱪᱮᱫ ᱞᱮᱠᱟ ᱥᱮᱬᱟ ᱥᱤᱢ ᱦᱩᱰᱤᱧ ᱠᱚᱠᱚ ᱛᱚᱵᱟᱜ ᱥᱟᱦᱟ ᱠᱟᱛᱮ ᱟᱠᱚ ᱜᱮ ᱮᱠᱞᱟ ᱡᱚᱢ ᱥᱟᱱᱟᱭᱮᱫ ᱠᱚᱣᱟ᱾ ᱫᱮᱣᱞᱟ ᱵᱚᱦᱚᱜ ᱨᱩᱠᱩ ᱟᱛᱮ ᱢᱮᱱᱟᱭ, “ᱦᱩᱸ”!
ᱼ ᱚᱱᱮ ᱚᱱᱠᱟ ᱜᱮ ᱦᱚᱞᱟ ᱟᱢ ᱦᱚᱸᱠᱚ ᱢᱮᱛᱟᱫ ᱢᱮ ᱛᱟᱦᱮᱸ ᱠᱟᱱᱟ ᱾ ᱩᱱᱠᱩᱣᱟᱜ ᱢᱮᱱ ᱛᱮᱜᱮ ᱪᱮᱫ ᱟᱢ ᱵᱟᱹᱲᱤᱡ ᱮᱢ ᱠᱟᱹᱢᱤᱭᱟ ᱾ ᱥᱚᱡᱷᱮ ᱥᱮ ᱥᱩᱞᱩᱠ ᱰᱟᱦᱟᱨ ᱛᱮ ᱛᱟᱲᱟᱢ ᱮᱢ ᱵᱟᱹᱜᱤᱭᱟ᱾ ᱪᱷᱟᱹᱛᱤᱠ ᱫᱚ ᱠᱚᱲᱟᱼᱠᱩᱲᱤ ᱢᱤᱫ ᱥᱟᱶᱛᱮ ᱠᱚ ᱛᱟᱲᱟᱢ ᱮᱫ ᱛᱮ ᱛᱮᱦᱮᱧ ᱟᱹᱰᱤᱛᱮᱫ ᱠᱚ ᱞᱟᱦᱟ ᱡᱤᱛᱟᱹᱣ ᱜᱚᱫ ᱟᱠᱟᱱᱟ᱾ ᱟᱵᱚ ᱥᱟᱶᱛᱟ ᱨᱤᱱ ᱦᱚᱲ ᱦᱚᱸ ᱠᱚᱲᱟ ᱠᱩᱲᱤ ᱵᱟᱝ ᱵᱷᱮᱜᱮᱫ ᱠᱟᱛᱮ ᱛᱟᱲᱟᱢ ᱞᱟᱹᱠᱛᱤ ᱠᱟᱱᱟ ᱾ ᱚᱱᱟ ᱠᱚᱫᱚ ᱜᱚᱲᱚᱢ ᱵᱤᱴᱤ ᱟᱞᱚᱢ ᱥᱟᱵᱟ ᱾ ᱤᱧ ᱡᱟᱦᱟᱸ ᱜᱤᱧ ᱞᱟᱹᱭ ᱥᱮᱪᱮᱫ ᱟᱠᱟᱣᱟᱫ ᱢᱮᱭᱟ ᱚᱱᱟᱜᱮ ᱥᱟᱹᱨᱤᱭᱟ ᱾ ᱩᱱᱠᱩ ᱜᱮ ᱵᱷᱩᱞ ᱠᱚ ᱠᱟᱹᱢᱤᱭᱟᱠᱟᱫ-ᱟ᱾ ᱩᱱᱠᱩᱣᱟᱜ ᱠᱟᱛᱷᱟ ᱩᱭᱦᱟᱹᱨ ᱫᱤᱥᱟᱹᱭ ᱢᱮ ᱪᱮᱫ ᱠᱚ ᱢᱮᱛᱟᱫ ᱢᱮ ᱛᱟᱦᱮᱸ ᱠᱟᱱᱟ᱾ ᱟᱢ ᱜᱤᱫᱽᱨᱟᱹ ᱪᱮᱫ ᱦᱚᱸ ᱵᱟᱢ ᱵᱟᱰᱟᱭᱟ ᱾ ᱛᱮᱦᱮᱧ ᱟᱢ ᱢᱩᱠᱨᱩᱲ ᱢᱮ ᱛᱮᱦᱮᱧ ᱠᱷᱚᱱ ᱟᱵᱚ ᱥᱟᱶᱛᱟ ᱨᱮᱱᱟᱜ ᱥᱟᱱᱟᱢ ᱟᱹᱱᱼᱟᱹᱨᱤᱢ ᱪᱮᱫᱟ ᱾
ᱼ ᱦᱚᱭ ᱜᱚᱲᱚᱢ ᱵᱟ ᱛᱮᱦᱮᱧ ᱠᱷᱚᱱ ᱥᱟᱱᱟᱢ ᱟᱹᱱ ᱟᱹᱨᱤᱧ ᱥᱮᱬᱟᱭᱟ ᱾ ᱦᱤᱡᱩᱜ ᱠᱟᱱ ᱫᱤᱱ ᱨᱮ ᱜᱤᱫᱽᱹᱨᱟ ᱠᱚᱦᱩᱧ ᱥᱮᱬᱟ ᱟᱠᱚᱣᱟ᱾
