ᱵᱟᱲᱮᱰᱤ ᱟᱛᱳ ᱩᱛᱛᱚᱨ ᱱᱟᱠᱷᱟ ᱫᱚᱼᱵᱟᱹᱴᱤ ᱠᱷᱚᱱ ᱡᱟᱸᱦᱟ ᱟᱨᱟᱜ ᱦᱚᱨ ᱩᱛᱛᱚᱨᱼᱯᱩᱨᱩᱵᱽ ᱥᱮᱫ ᱥᱳᱡᱷᱮ ᱪᱟᱞᱟᱣ ᱟᱠᱟᱱᱟ ᱚᱱᱟ ᱦᱚᱨᱛᱮ ᱠᱟᱹᱡ ᱪᱟᱞᱟᱣ ᱧᱚᱜ ᱞᱮᱱᱠᱷᱟᱱ ᱜᱮ ᱵᱚᱞᱚᱨᱟᱢᱯᱩᱨ ᱟᱛᱳ᱾ᱟᱛᱳ ᱫᱚ ᱨᱟᱹᱥᱤ ᱜᱮᱭᱟ᱾ ᱟᱛᱳ ᱨᱮ ᱜᱮᱞ, ᱜᱮᱞ ᱢᱤᱫ ᱚᱲᱟᱜ ᱞᱮᱠᱟ ᱥᱟᱱᱛᱟᱲ ᱚᱲᱟᱜ ᱢᱮᱱᱟᱜᱼᱟ ᱾ ᱚᱱᱠᱟᱜᱮ ᱥᱟᱞᱢᱮᱥᱟᱞ ᱵᱟᱨᱟᱵᱟᱹᱨᱤ ᱛᱮ ᱢᱮᱱᱟᱜ ᱠᱚᱣᱟ ᱠᱩᱬᱵᱤ, ᱫᱷᱩᱵᱤ, ᱵᱩᱥᱴᱩᱢ, ᱠᱟᱭᱮᱛ ᱟᱨ ᱢᱤᱫ ᱵᱟᱨ ᱵᱟᱵᱽᱬᱮ ᱚᱲᱟᱜ ᱦᱚᱸ ᱢᱮᱱᱟᱜᱼᱟ ᱾ ᱥᱟᱱᱛᱟᱲ ᱚᱲᱟᱜ ᱫᱚ ᱪᱩᱢᱠᱟᱹ ᱪᱩᱢᱠᱟᱹ ᱦᱟᱸᱰᱮ ᱱᱟᱸᱰᱮ ᱾ ᱛᱟᱞᱟ ᱠᱩᱞᱦᱤ ᱡᱟᱦᱟᱸᱨᱮ ᱤᱥᱤ ᱞᱮᱠᱟ ᱠᱚᱪᱮ ᱟᱠᱟᱱᱟ, ᱚᱱᱟ ᱠᱚᱬ ᱨᱮᱜᱮ ᱥᱚᱢᱵᱟᱹᱨᱤᱭᱟᱜ ᱚᱲᱟᱜ ᱾ ᱥᱚᱢᱵᱟᱹᱨᱤ ᱫᱚ ᱟᱹᱰᱤ ᱫᱩᱠᱷᱟᱹᱞᱤ ᱥᱟᱱᱛᱟᱲ ᱨᱟᱺᱰᱤ ᱮᱨᱟ ᱾ ᱵᱟᱨᱭᱟ ᱱᱟᱵᱟᱞᱚᱠ ᱦᱚᱯᱚᱱ ᱪᱷᱟᱰᱟ ᱪᱤᱞᱤ ᱦᱚᱸ ᱵᱟᱹᱱᱩᱜ ᱠᱚ ᱛᱟᱭᱟ ᱾ ᱟᱯᱟᱵᱟᱨᱮ ᱚᱲᱟᱜ ᱥᱮ ᱡᱟᱶᱟᱭ ᱚᱲᱟᱜ ᱯᱟᱦᱴᱟ ᱨᱮᱱ ᱦᱚᱸ ᱪᱤᱞᱤ ᱦᱚᱸ ᱵᱟᱹᱱᱩᱜ ᱠᱚᱣᱟ ᱾ ᱨᱩᱠᱷᱟᱹ ᱫᱤᱥᱚᱢ, ᱡᱟᱦᱟᱸᱨᱮ ᱡᱟᱹᱲᱤ ᱫᱟᱜ ᱜᱮ ᱵᱚᱨᱥᱟ, ᱚᱸᱰᱮ ᱵᱟᱨ ᱵᱤᱜᱷᱟᱹ ᱦᱟᱥᱟ ᱪᱟᱥ ᱠᱟᱛᱮ ᱞᱟᱡ ᱫᱚ ᱵᱟᱝ ᱟᱱᱴᱟᱣᱜᱼᱟ ᱾ ᱤᱱᱟᱹᱛᱮ ᱨᱟᱡᱽ ᱢᱤᱥᱛᱨᱤ ᱥᱟᱞᱟᱜ ᱤᱴᱟᱹ ᱫᱤᱯᱤᱞ, ᱵᱟᱹᱞᱤ ᱜᱮᱢᱮᱨ ᱠᱟᱹᱢᱤ ᱦᱚᱸᱭ ᱪᱟᱞᱟᱜ ᱜᱮᱭᱟ ᱚᱵᱷᱟᱵᱽ ᱨᱮᱫᱚ ᱾ ᱮᱸᱰᱮ ᱦᱟᱹᱵᱤᱡ ᱫᱚ ᱴᱷᱤᱠ ᱜᱮᱭᱟ ᱾ ᱛᱚᱵᱮ ᱵᱟᱹᱲᱤᱡ ᱫᱚ ᱦᱳᱭᱮᱱᱟ ᱥᱚᱢᱵᱟᱹᱨᱤ ᱫᱚᱢᱮ ᱯᱟᱹᱣᱨᱟᱹᱭ ᱧᱩᱭᱟ ᱾ ᱫᱚᱢᱮ ᱠᱷᱟᱱ ᱫᱚᱢᱮ ᱾ ᱢᱩᱪᱟᱹᱫ ᱨᱮ ᱫᱚ ᱧᱩ ᱵᱩᱞ ᱠᱟᱛᱮ ᱛᱟᱦᱟᱬ ᱵᱤᱦᱟᱹᱬᱮ ᱜᱤᱛᱤᱡ ᱠᱚᱜᱼᱟ ᱦᱟᱸᱰᱮ ᱱᱟᱰᱮ ᱟᱨ ᱜᱤᱫᱽᱨᱟᱹ ᱠᱤᱱ ᱦᱚᱸ ᱠᱤᱱ ᱡᱟᱦᱟᱸ ᱢᱟᱱ ᱛᱟᱦᱟᱸ ᱵᱟᱲᱟᱭᱟ ᱾
ᱠᱟᱛᱷᱟ ᱨᱮ ᱵᱟᱠᱚ ᱢᱮᱱᱟ ᱼ ᱪᱟᱸᱫᱚ ᱡᱟᱱᱟᱢᱮ ᱮᱢ ᱟᱠᱟᱣᱟᱫ ᱢᱮᱠᱷᱟᱱ ᱡᱚᱢᱟᱜ ᱦᱚᱸᱭ ᱮᱢᱟᱢᱟ ᱾ ᱟᱫᱚ ᱪᱟᱸᱫᱚ ᱟᱜ ᱮᱢ ᱡᱚᱢᱟᱜ ᱡᱚᱢ ᱡᱚᱢ ᱛᱮᱜᱮ ᱥᱚᱢᱵᱟᱹᱨᱤ ᱨᱮᱱ ᱵᱟᱨᱭᱟ ᱜᱤᱫᱽᱨᱟᱹ ᱫᱚ ᱵᱟᱹᱭ ᱵᱟᱹᱭ ᱛᱮᱠᱤᱱ ᱦᱟᱨᱟᱭᱮᱱ ᱛᱟᱭᱟ ᱾ ᱱᱮᱛᱟᱨ ᱫᱚ ᱟᱹᱠᱤᱱᱟᱜ ᱡᱚᱢ, ᱟᱹᱠᱤᱱ ᱛᱮᱜᱮ ᱠᱤᱱ ᱛᱚᱞᱟᱥ ᱡᱚᱝᱼᱟ ᱾ ᱟᱨ ᱢᱟᱹᱛᱲᱤ ᱥᱚᱢᱵᱟᱹᱨᱤ ᱫᱚ ᱟᱹᱰᱤ ᱠᱤᱱ ᱨᱳᱦᱮᱫ ᱮᱭᱟ ᱾ ᱫᱟᱞ ᱦᱚᱸ ᱠᱤᱱ ᱫᱟᱞᱮ ᱜᱮᱭᱟ ᱾ ᱧᱩ ᱵᱩᱞ ᱥᱚᱢᱵᱟᱹᱨᱤ ᱫᱷᱟᱠᱟᱲ ᱫᱷᱩᱠᱩᱲ ᱵᱮᱨᱮᱫ ᱠᱟᱛᱮ ᱴᱮᱠᱟᱣ ᱫᱟᱨᱟᱢᱮ ᱨᱤᱠᱟᱹᱭᱟ ᱾ ᱜᱟᱵᱟᱰ ᱜᱩᱵᱩᱰ ᱠᱚ ᱛᱟᱯᱟᱢᱟ ᱾ ᱚᱲᱟᱜ ᱨᱮᱱᱟᱜ ᱴᱩᱠᱩᱡ, ᱪᱮᱞᱟᱝ, ᱛᱷᱟᱹᱨᱤ, ᱵᱟᱹᱴᱤ ᱦᱚᱸᱠᱚ ᱦᱩᱨᱞᱟᱹ ᱜᱤᱰᱤᱭᱟ ᱾ ᱫᱚᱥᱟᱨ ᱦᱤᱞᱳᱜ ᱠᱷᱟᱱ ᱜᱮ ᱟᱨᱦᱚᱸ ᱟᱠᱚ ᱜᱮ ᱾ ᱥᱚᱢᱵᱟᱹᱨᱤ ᱫᱟᱹᱛᱟᱹᱱᱤ ᱯᱷᱟᱨᱪᱟᱜ ᱛᱮᱭ ᱡᱚᱢᱟᱜ ᱠᱚᱭ ᱛᱩᱱᱠᱷᱤ ᱛᱚᱞᱟᱥᱟ ᱾ ᱫᱟᱠᱟ ᱩᱛᱩᱭ ᱤᱥᱤᱱᱟ ᱾ ᱜᱤᱫᱽᱨᱟᱹ ᱠᱤᱱ ᱦᱚᱸ ᱠᱩᱞᱦᱤ ᱫᱟᱸᱲᱟᱱ ᱠᱤᱱ ᱚᱰᱚᱠᱚᱜᱼᱟ ᱟᱡᱟᱨᱮ ᱵᱟᱝᱠᱷᱟᱱ ᱛᱟᱥ ᱠᱷᱮᱞ ᱾
ᱦᱩᱰᱤᱧᱤᱡ ᱫᱚ ᱱᱚᱣᱟ ᱟᱜᱷᱟᱬ ᱨᱮᱜᱮ ᱢᱚᱬᱮ ᱥᱮᱨᱢᱟᱭ ᱞᱮᱵᱮᱫᱟ ᱾ ᱞᱟᱹᱭ ᱵᱟᱲᱟᱭᱮᱫ ᱛᱟᱦᱮᱸᱱᱟᱭ ᱵᱟᱝᱢᱟ ᱟᱛᱳᱨᱮᱱ ᱜᱟᱛᱮᱠᱚ ᱥᱟᱞᱟᱜ ᱜᱩᱡᱽᱨᱟᱴ ᱠᱟᱹᱢᱤᱭ ᱪᱟᱞᱟᱜᱼᱟ ᱾ ᱵᱷᱟᱜᱮ ᱠᱟᱛᱷᱟ ᱾ ᱥᱚᱢᱵᱟᱹᱨᱤᱭ ᱞᱟᱹᱭ ᱟᱫ ᱠᱤᱱᱟ – ‘ᱦᱟᱨᱟ ᱟᱠᱟᱱᱟᱵᱤᱱ ᱵᱩᱜᱤ ᱵᱟᱹᱲᱤᱡ ᱵᱩᱡᱷᱟᱹᱣ ᱵᱤᱱ ᱾’ ᱥᱚᱢᱵᱟᱹᱨᱤ ᱱᱮᱛᱟᱨ ᱫᱚ ᱵᱟᱡᱟᱨ ᱥᱮᱫ ᱨᱟᱡᱽᱢᱤᱥᱛᱤᱨᱤ ᱠᱟᱹᱢᱤᱭ ᱪᱟᱞᱟᱜ ᱠᱟᱱᱟ ᱾ ᱟᱠᱚᱣᱟᱜ ᱠᱟᱹᱢᱤᱭᱟᱹ ᱜᱟᱫᱮᱞᱨᱮ ᱠᱩᱲᱤ ᱦᱚᱯᱚᱱ ᱫᱚ ᱵᱟᱹᱱᱩᱜ ᱠᱚ ᱞᱮᱠᱟᱜᱮ ᱾ ᱢᱤᱫ ᱠᱩᱲᱤ ᱦᱚᱯᱚᱱᱮ ᱛᱟᱦᱮᱸ ᱠᱟᱱ ᱨᱮᱦᱚᱸ ᱴᱷᱤᱠ ᱢᱚᱛᱚ ᱫᱚ ᱵᱟᱭ ᱪᱟᱞᱟᱜᱼᱟ ᱾ ᱤᱱᱟᱹᱛᱮ ᱥᱚᱢᱵᱟᱹᱨᱤ ᱫᱚ ᱟᱛᱳ ᱟᱨ ᱫᱷᱟᱨᱟ ᱫᱷᱟᱹᱨᱤ ᱟᱛᱳ ᱨᱮᱱ ᱠᱚᱲᱟ ᱥᱟᱞᱟᱜ ᱜᱮ ᱠᱟᱹᱢᱤ ᱫᱚᱭ ᱪᱟᱞᱟᱜᱼᱟ ᱾ ᱟᱡ ᱨᱮᱱ ᱥᱟᱠᱟᱹᱢᱤᱭᱟᱹ ᱡᱷᱚᱛᱚ ᱠᱚᱲᱟ ᱦᱚᱯᱚᱱ ᱥᱟᱞᱟᱜ ᱜᱮ, ᱥᱚᱢᱵᱟᱹᱨᱤᱭᱟᱜ ᱫᱚ ᱟᱹᱰᱤ ᱵᱷᱟᱜᱮ ᱥᱟᱹᱜᱟᱹᱭ ᱛᱟᱭ ᱾ ᱜᱚᱨᱚᱡᱽ ᱦᱚᱸ ᱾ ᱡᱷᱚᱛᱚ ᱦᱚᱲᱜᱮ ᱟᱠᱚᱣᱟᱜ ᱥᱟᱭᱠᱮᱞ ᱛᱟᱭᱚᱢᱨᱮ ᱥᱚᱢᱵᱟᱹᱨᱤ ᱫᱮᱡ ᱦᱚᱪᱚ ᱨᱮᱱᱟᱜ ᱠᱩᱠᱢᱩ ᱠᱚ ᱧᱮᱞᱟ ᱾ ᱯᱮ ᱜᱮᱞ ᱥᱮᱨᱢᱟ ᱨᱮᱱ ᱨᱟᱺᱰᱤ ᱮᱨᱟ ᱟᱜ ᱟᱸᱴ ᱩᱨᱤᱡ ᱦᱚᱲᱢᱚ ᱨᱮᱱᱟᱜ ᱪᱚᱴᱚᱠ, ᱵᱤᱡᱽᱞᱤ ᱡᱷᱟᱞᱠᱟᱣᱜ ᱞᱮᱠᱟ ᱛᱮᱨᱟᱝ ᱢᱮᱫ ᱠᱚᱯᱚᱭᱚᱜ, ᱦᱚᱲᱢᱚ ᱦᱤᱞᱟᱹᱣ ᱛᱟᱲᱟᱢ ᱵᱟᱲᱟ ᱥᱚᱢᱵᱟᱹᱨᱤᱭᱟᱜ ᱫᱚ ᱠᱚᱲᱟ ᱦᱚᱯᱚᱱ ᱠᱚ ᱠᱚᱝᱠᱟ ᱟᱨ ᱢᱩᱦᱱᱤ ᱞᱮᱠᱟᱱᱟᱜ ᱜᱮ ᱾ ᱤᱱᱟᱹ ᱛᱮᱜᱮ ᱥᱚᱸᱫᱷᱟᱲ ᱵᱟᱦᱟ ᱵᱮᱲᱦᱟᱭ ᱵᱷᱟᱶᱟᱨ ᱞᱮᱠᱟᱜᱮ ᱵᱷᱟᱱ ᱵᱷᱟᱱᱟᱣᱜ ᱟᱠᱚ ᱠᱚᱲᱟ ᱦᱚᱯᱚᱱ ᱠᱚ ᱟᱡ ᱪᱟᱹᱨᱤ ᱫᱷᱟᱨ ᱾ ᱥᱚᱢᱵᱟᱹᱨᱤ ᱦᱚᱸ ᱱᱚᱣᱟ ᱠᱚᱫᱚ ᱟᱹᱰᱤ ᱛᱮᱫ ᱜᱮᱭ ᱫᱮᱼᱫᱮᱞᱟ ᱟᱜ ᱜᱮᱭᱟ ᱾ ᱨᱟᱹᱥᱠᱟᱹᱭ ᱵᱩᱡᱷᱟᱹᱣᱟ ᱢᱚᱱᱮᱨᱮ, ᱯᱟᱴ ᱨᱟᱹᱱᱤ ᱞᱮᱠᱟᱭ ᱟᱹᱭᱠᱟᱹᱣ ᱜᱮᱭᱟ ᱾ ᱧᱩᱛ ᱧᱤᱫᱟᱹ ᱫᱟᱸᱲᱟᱱ ᱥᱮ ᱠᱚᱲᱟ ᱦᱚᱯᱚᱱ ᱠᱚ ᱚᱲᱟᱜ ᱛᱮ ᱟᱫᱮᱨ ᱵᱟᱭ ᱟᱨ ᱵᱟᱝᱠᱷᱟᱱ ᱡᱟᱦᱟᱸᱭ ᱢᱟᱱ ᱛᱟᱦᱟᱸᱭ ᱥᱟᱞᱟᱜ ᱟᱹᱛᱷᱟᱹᱣᱲᱤ ᱯᱟᱛᱟ ᱯᱚᱨᱚᱵᱽ ᱫᱟᱸᱲᱟᱱ ᱫᱚ ᱥᱚᱢᱵᱟᱹᱨᱤᱭᱟᱜ ᱟᱨ ᱢᱤᱫᱴᱟᱹᱝ ᱠᱩᱥᱤᱛᱟᱭ ᱾ ᱚᱱᱠᱟᱱ ᱢᱟᱱᱟ ᱵᱟᱨᱚᱱ ᱦᱚᱲ ᱥᱮ ᱯᱮᱲᱟ ᱯᱟᱹᱦᱬᱟᱹ ᱦᱚᱸ ᱵᱟᱹᱱᱩᱜ ᱠᱚᱣᱟ, ᱥᱚᱢᱵᱟᱹᱨᱤ ᱞᱟᱡᱟᱣ ᱵᱚᱛᱚᱨᱮ ᱵᱩᱡᱷᱟᱹᱣᱟ ᱪᱤᱠᱟᱹᱛᱮ ᱾ ᱟᱨ ᱟᱛᱳ ᱦᱚᱲ ᱦᱚᱸ ᱩᱱᱟᱹᱜ ᱫᱚ ᱵᱟᱠᱚ ᱡᱩᱢᱤᱫᱟ ᱡᱮ ᱡᱟᱦᱟᱸᱭ ᱜᱮ ᱡᱟᱦᱟᱸᱱ ᱵᱟᱹᱲᱤᱡ ᱠᱟᱹᱢᱤ ᱨᱮᱠᱚ ᱴᱮᱠᱟᱣ ᱫᱟᱨᱟᱢᱮᱭᱟ ᱾
ᱚᱱᱟ ᱦᱤᱞᱚᱜ ᱫᱚ ᱛᱟᱦᱮᱸ ᱠᱟᱱᱟ ᱥᱤᱸᱜᱤ ᱢᱟᱦᱟᱸ ᱾ ᱥᱚᱢᱵᱟᱹᱨᱤ ᱠᱟᱹᱢᱤ ᱵᱟᱭ ᱪᱟᱞᱟᱣ ᱟᱠᱟᱱᱟ ᱾ ᱚᱲᱟᱜ ᱨᱮᱜᱮ ᱢᱮᱱᱟᱭ ᱛᱮ ᱥᱮᱛᱟᱜ ᱠᱷᱚᱱ ᱧᱩᱧᱩᱭ ᱫᱷᱩᱨᱟᱹᱣ ᱟᱠᱟᱱᱟ ᱾ ᱵᱟᱹᱥᱭᱟᱹᱢ ᱡᱚᱢ ᱠᱟᱛᱮ ᱜᱤᱫᱽᱨᱟᱹ ᱠᱤᱱ ᱦᱚᱸ ᱚᱠᱟ ᱥᱮᱫ ᱪᱚᱠᱤᱱ ᱚᱰᱚᱠ ᱟᱠᱟᱱᱟ ᱾ ᱚᱱᱟ ᱛᱟᱭᱚᱢ ᱛᱟᱭᱚᱢ ᱜᱮ ᱥᱚᱢᱵᱟᱹᱨᱤ ᱴᱷᱮᱱᱮ ᱦᱮᱡ ᱮᱱᱟ ᱠᱩᱬᱵᱤ ᱴᱚᱞᱟ ᱨᱮᱱ ᱨᱟᱹᱜᱷᱩ ᱠᱩᱬᱵᱤ ᱾ ᱦᱚᱦᱚ ᱦᱚᱦᱚᱛᱮ ᱚᱲᱟᱜ ᱥᱮᱫ ᱜᱮᱭ ᱵᱚᱞᱚᱭᱮᱱᱟ ᱾ ᱨᱟᱹᱜᱷᱩ ᱧᱮᱞᱛᱮ ᱥᱚᱢᱵᱟᱹᱨᱤᱭᱟᱜ ᱢᱮᱫᱼᱢᱩᱠᱷᱟᱹᱱᱨᱮ ᱞᱟᱸᱫᱟ ᱫᱚ ᱯᱟᱥᱱᱟᱣ ᱚᱰᱚᱠ ᱮᱱ ᱛᱟᱭᱟ ᱾ ᱥᱟᱢᱟᱝ ᱥᱮᱫ ᱨᱮᱱᱟᱜ ᱫᱷᱳᱨᱳ ᱫᱷᱳᱥᱳ ᱩᱵ ᱥᱩᱫ ᱥᱟᱢᱴᱟᱣ ᱠᱟᱛᱮ, ᱫᱷᱤᱜᱟᱹᱞ ᱥᱟᱸᱜᱟᱞ ᱦᱚᱯᱚᱨᱚᱜ ᱞᱩᱜᱽᱲᱤ ᱥᱟᱢᱴᱟᱣ ᱥᱟᱢᱴᱟᱣ, ᱫᱚᱠᱛᱟ ᱡᱚᱢ ᱦᱮᱸᱫᱮ ᱰᱟᱴᱟ ᱚᱰᱚᱠ ᱠᱟᱛᱮᱭ ᱞᱟᱸᱫᱟ ᱠᱮᱫᱟ ᱾ ᱟᱫᱚ ᱨᱟᱪᱟᱨᱮ ᱢᱤᱫ ᱢᱚᱪᱟ ᱛᱷᱩᱭ ᱛᱷᱩ ᱚᱰᱚᱠ ᱠᱮᱫᱛᱮ ᱦᱚᱦᱚ ᱠᱮᱫᱟᱭ –‘ᱫᱮᱞᱟ ᱨᱟᱹᱜᱷᱩ! ᱫᱮᱞᱟ ᱾’ ᱨᱟᱹᱜᱷᱩ ᱫᱚ ᱡᱟᱢᱟ ᱵᱷᱤᱛᱟᱹᱨ ᱠᱷᱚᱱᱟᱜ ᱢᱤᱫᱴᱟᱹᱝ ᱯᱟᱹᱣᱨᱟᱹ ᱵᱳᱛᱳᱞᱮ ᱚᱰᱚᱠ ᱠᱮᱫ ᱛᱮ ᱞᱟᱹᱭ ᱠᱮᱫᱟᱭ –‘ᱫᱮᱱ ᱜᱤᱞᱟᱥ ᱠᱚ ᱟᱹᱜᱩᱭ ᱛᱟᱞᱟᱝ ᱢᱮ᱾’ ᱥᱚᱢᱵᱟᱹᱨᱤ ᱛᱷᱟᱠᱟᱲ ᱛᱷᱩᱠᱩᱲ ᱵᱮᱨᱮᱫ ᱮᱱ ᱛᱮ ᱡᱚᱡᱚᱢ ᱛᱤ ᱦᱩᱨᱞᱟᱹ ᱠᱟᱛᱮᱭ ᱞᱟᱹᱭ ᱠᱮᱫᱟ – ‘ᱢᱮᱱ ᱜᱤᱞᱟᱥ ᱢᱤᱞᱟᱥ ᱫᱚ ᱵᱟᱹᱱᱩᱜᱼᱟ᱾’ ᱨᱟᱹᱜᱷᱩ ᱫᱚ ᱥᱚᱢᱵᱟᱹᱨᱤ ᱟᱡ ᱥᱩᱨ ᱨᱮᱭ ᱜᱚᱦᱚᱲ ᱫᱩᱲᱩᱵ ᱠᱮᱫᱮ ᱛᱮᱭ ᱢᱮᱛᱟᱫᱮᱭᱟ –‘ᱮ ᱥᱚᱢᱵᱟᱹᱨᱤ, ᱪᱮᱫ ᱮᱢ ᱩᱥᱟᱹᱫ ᱟᱠᱟᱱᱟ? ’ᱟᱞᱞᱟᱫᱽ ᱥᱟᱹᱦᱤᱸᱡ ᱥᱚᱢᱵᱟᱹᱨᱤᱭ ᱨᱚᱲ ᱠᱮᱫᱟ –‘ᱪᱮᱫ ᱤᱧ ᱩᱥᱟᱹᱫᱚᱜᱼᱟ ᱟᱫᱚ? ᱫᱮᱞᱟ ᱚᱲᱟᱜ ᱵᱷᱤᱛᱟᱹᱨ ᱥᱮᱫ ᱜᱮ ᱾’
ᱠᱩᱞᱦᱤ ᱫᱩᱣᱟᱹᱨ ᱛᱮ ᱱᱚᱶᱟ ᱚᱲᱟᱜ ᱨᱮᱱᱟᱜ ᱪᱤᱛᱟᱹᱨ ᱠᱚᱫᱚ ᱟᱛᱳ ᱦᱚᱲᱟᱜ ᱢᱮᱫᱨᱮ ᱫᱚ ᱥᱟᱱᱟᱢᱟᱜ ᱜᱮ ᱯᱟᱲᱟᱣᱜ ᱜᱮᱭᱟ ᱾ ᱟᱫᱚ ᱠᱚ ᱧᱮᱞ ᱯᱟᱹᱨᱠᱟᱹᱣ ᱟᱠᱟᱱᱟ ᱵᱟᱝᱠᱷᱟᱱ ᱧᱮᱞ ᱠᱟᱛᱮ ᱦᱚᱸ ᱵᱟᱝ ᱧᱮᱞ ᱨᱮᱱᱟᱜ ᱠᱚ ᱵᱟᱦᱱᱟᱭᱟ ᱾ ᱟᱨ ᱱᱮᱜ ᱮ ᱦᱟᱨᱟ ᱡᱩᱣᱟᱹᱱ ᱠᱚᱲᱟ ᱠᱚ ᱢᱟ ᱦᱟᱯᱲᱟᱜ ᱦᱟᱯᱲᱟᱜ ᱯᱷᱳᱱ ᱛᱮ ᱪᱤᱛᱟᱹᱨ ᱥᱮᱸᱫᱽᱨᱟ ᱦᱚᱸᱠᱚ ᱪᱟᱢᱠᱮᱜ ᱜᱮᱭᱟ ᱾ ᱚᱱᱟ ᱠᱚᱫᱚ ᱥᱚᱢᱵᱟᱹᱨᱤ ᱱᱟᱥᱮ ᱦᱚᱸ ᱵᱟᱭ ᱢᱮᱫ ᱞᱩᱛᱩᱨᱟᱜ ᱜᱮᱭᱟ ᱾ ᱟᱛᱳ ᱦᱚᱲ ᱦᱚᱸ ᱫᱚᱢᱮ ᱫᱚᱨᱠᱟᱨ ᱵᱮᱜᱚᱨ ᱱᱚᱶᱟ ᱚᱲᱟᱜ ᱫᱚᱠᱚ ᱮᱛᱚᱢ ᱤᱫᱤ ᱜᱮᱭᱟ ᱾ ᱚᱱᱟ ᱦᱤᱞᱚᱜ ᱥᱟᱱᱛᱟᱲ ᱴᱚᱞᱟ ᱨᱮᱱ ᱪᱷᱟᱹᱰᱩᱭᱤ ᱠᱩᱲᱤ ᱦᱚᱯᱚᱱ ᱢᱟᱹᱱᱩ ᱢᱟᱹᱭ ᱫᱚ ᱯᱩᱭᱥᱟᱹ ᱠᱚᱭ ᱜᱮᱭ ᱦᱮᱡ ᱞᱮᱱᱟ ᱥᱚᱢᱵᱟᱹᱨᱤ ᱟᱜ ᱚᱲᱟᱜ ᱾ ᱛᱤᱥ ᱫᱤᱱ ᱨᱮᱪᱚ ᱥᱚᱢᱵᱟᱹᱨᱤ ᱢᱟᱹᱱᱩ ᱴᱷᱮᱱᱮ ᱩᱫᱷᱟᱹᱨ ᱞᱮᱱᱟ ᱾ ᱛᱮᱦᱮᱧ ᱫᱚ ᱵᱟᱝ ᱜᱟᱯᱟ, ᱜᱟᱯᱟ ᱫᱚ ᱵᱟᱝ ᱢᱮᱭᱟᱝ ᱠᱟᱛᱮᱜᱮ ᱥᱚᱢᱵᱟᱹᱨᱤ ᱫᱚ ᱠᱟᱛᱷᱟ ᱜᱮᱭ ᱯᱟᱨᱚᱢ ᱤᱫᱤᱭᱮᱫ ᱛᱟᱸᱦᱮᱫ ᱾ ᱢᱮᱱᱠᱷᱟᱱ ᱛᱮᱦᱮᱧ ᱫᱚ ᱯᱩᱭᱥᱟᱹ ᱦᱟᱛᱟᱣ ᱠᱟᱛᱮ ᱱᱟᱜ ᱜᱮᱭ ᱪᱟᱞᱟᱜᱼᱟ, ᱢᱮᱱᱛᱮ ᱢᱟᱹᱱᱩ ᱢᱟᱹᱭ ᱫᱚᱭ ᱜᱚᱴᱟ ᱟᱠᱟᱫᱟ ᱾ ᱡᱚᱠᱷᱮᱡ ᱢᱟᱹᱱᱩ ᱢᱟᱹᱭ ᱥᱚᱢᱵᱟᱹᱨᱤᱭᱟᱜ ᱚᱲᱟᱜ ᱮ ᱵᱚᱞᱚᱭᱮᱱᱟ ᱩᱱᱫᱚ ᱨᱟᱹᱜᱷᱩ ᱟᱨ ᱥᱚᱢᱵᱟᱹᱨᱤ ᱫᱚ ᱠᱤᱱ ᱡᱷᱩᱸᱠ ᱜᱚᱫ ᱟᱠᱟᱱᱟ ᱾ ᱯᱟᱹᱣᱨᱟᱹ ᱨᱮᱱᱟᱜ ᱱᱤᱥᱟᱹ, ᱥᱚᱢᱵᱟᱹᱨᱤᱭᱟᱜ ᱨᱤᱡᱷᱟᱹᱣ ᱟᱱᱟᱜ ᱦᱚᱲᱢᱚ ᱨᱮᱱᱟᱜ ᱵᱷᱟᱸᱡᱽ, ᱰᱷᱩᱨᱩ ᱰᱷᱩᱨᱩ ᱢᱮᱫ ᱟᱨ ᱰᱤᱞᱟᱹ ᱦᱚᱯᱚᱨᱚᱜ ᱛᱮ ᱟᱹᱫ ᱚᱛ ᱮ ᱵᱮᱱᱟᱣ ᱟᱠᱟᱫᱟ ᱩᱱ ᱥᱚᱢᱵᱟᱹᱨᱤ ᱟᱨ ᱨᱟᱹᱜᱷᱩᱣᱟᱜ ᱛᱟᱞᱟᱨᱮ ᱾ ᱡᱟᱦᱟᱸ ᱨᱮᱫᱚ ᱞᱟᱡᱟᱣᱼ ᱥᱚᱨᱚᱢ, ᱵᱚᱨᱼ ᱵᱚᱛᱚᱨ ᱟᱨ ᱛᱟᱭᱚᱢᱼ ᱢᱟᱲᱟᱝ ᱩᱭᱦᱟᱹᱨ ᱫᱚ ᱵᱟᱭ ᱵᱚᱞᱚ ᱫᱟᱲᱮᱭᱟᱜᱼᱟ ᱾ ᱢᱟᱹᱱᱩ ᱢᱟᱹᱭ ᱨᱟᱪᱟ ᱠᱷᱚᱱᱟᱜ ᱜᱮᱭ ᱦᱚᱦᱚ ᱠᱮᱫᱟ –‘ᱮ ᱦᱤᱞᱤ … ᱦᱤᱞᱤ ᱾’ ᱥᱚᱢᱵᱟᱹᱨᱤ ᱚᱲᱟᱜ ᱵᱷᱤᱛᱟᱹᱨ ᱠᱷᱚᱱᱟᱜ ᱜᱮ ᱛᱮᱞᱟ ᱨᱩᱣᱟᱹᱲ ᱠᱮᱫᱟᱭ –‘ᱚᱠᱚᱭ, ᱢᱟᱹᱱᱩ ᱥᱮ? ᱦᱟᱯᱮᱱᱟ ᱦᱟᱹᱱᱤ ᱨᱟᱹᱜᱷᱩ ᱥᱟᱞᱟᱜ ᱠᱟᱹᱡ ᱧᱩᱧᱩᱧ ᱫᱷᱩᱨᱟᱹᱣ ᱟᱠᱟᱱᱟ ᱾’
ᱢᱟᱹᱱᱩ ᱢᱟᱹᱭ ᱱᱟᱥᱮᱭ ᱪᱚᱢᱠᱟᱣ ᱜᱚᱫ ᱮᱱᱟ ᱾ ᱨᱟᱹᱜᱷᱩ, ᱟᱹᱭᱤᱡ ᱨᱟᱹᱜᱷᱩ! ᱱᱮᱛᱟᱨ ᱫᱚ ᱵᱟᱝ, ᱦᱟᱱᱮ ᱢᱟᱹᱱᱩ ᱢᱟᱹᱭ ᱵᱟᱯᱞᱟ ᱢᱟᱲᱟᱝ ᱠᱷᱚᱱᱟᱜ ᱜᱮ ᱩᱱᱤ ᱠᱩᱬᱵᱤ ᱠᱚᱲᱟ ᱜᱮ ᱢᱚᱱᱮ ᱢᱚᱱᱮᱛᱮ ᱢᱚᱱᱮᱭ ᱮᱢ ᱠᱟᱣᱫᱮ ᱛᱟᱦᱮᱸᱱᱟ ᱾ ᱟᱨ ᱪᱷᱟᱹᱰᱣᱤ ᱛᱟᱭᱚᱢ ᱟᱯᱟᱵᱟᱨᱮ ᱚᱲᱟᱜ ᱨᱩᱣᱟᱹᱲ ᱠᱟᱛᱮ ᱢᱟ ᱢᱚᱱᱮ ᱨᱮᱱᱟᱜ ᱚᱱᱟ ᱴᱟᱱ ᱟᱨᱦᱚᱸ ᱡᱟᱹᱥᱛᱤ ᱟᱠᱟᱱᱟ ᱾ ᱩᱠᱩ ᱫᱟᱱᱟᱝ ᱛᱷᱩᱛᱤ ᱜᱟᱯᱟᱞᱢᱟᱨᱟᱣ ᱠᱷᱚᱱ ᱮᱦᱚᱵ ᱠᱟᱛᱮ ᱧᱩᱛ ᱧᱤᱫᱟᱹ ᱧᱟᱯᱟᱢ ᱡᱷᱚᱛᱚ ᱜᱮ ᱱᱟᱦᱟᱜ ᱫᱚ ᱵᱟᱹᱲᱛᱤ ᱾ ᱩᱱᱤ ᱨᱟᱹᱜᱷᱩ ᱛᱮᱦᱮᱧ ᱥᱚᱢᱵᱟᱹᱨᱤ ᱴᱷᱮᱱ ᱵᱚᱞᱚᱭ ᱮᱦᱚᱵ ᱟᱠᱟᱱᱟ ᱾ ᱢᱟᱹᱱᱩ ᱢᱟᱹᱭ ᱫᱚ ᱫᱩᱠᱷ ᱦᱚᱸᱭ ᱵᱩᱡᱷᱟᱹᱣ ᱠᱮᱫᱟ ᱟᱨ ᱟᱹᱲᱤᱥ ᱦᱚᱸ ᱾ ᱞᱟᱹᱭ ᱠᱮᱫᱟᱭ –‘ᱦᱮᱱᱟ ᱦᱤᱞᱤ, ᱵᱟᱰᱟᱭᱟᱹᱧ ᱟᱢ ᱫᱚ ᱢᱤᱫᱴᱟᱹᱝ ᱵᱟᱨᱭᱟ ᱛᱮᱫᱚ ᱵᱟᱢ ᱥᱟᱴᱟᱣᱜᱼᱟ ᱾ ᱤᱠᱷᱟᱹᱱ ᱦᱚᱲ ᱨᱮᱱ ᱦᱚᱲ ᱫᱚ ᱪᱮᱫᱟᱜ ᱱᱟᱢ ᱜᱚᱦᱚᱲ ᱥᱟᱢᱴᱟᱣ ᱡᱚᱝ ᱠᱟᱱᱟ? ᱟᱢ ᱫᱚ ᱥᱟᱹᱨᱤ ᱜᱮ ᱩᱱᱟᱹᱜ ᱞᱟᱛᱟᱨᱮᱢ ᱟᱬᱜᱚ ᱟᱠᱟᱱᱟ ᱾ ᱟᱛᱳ ᱚᱲᱟᱜ ᱨᱮᱜᱮ ᱵᱟᱡᱟᱨᱮᱢ ᱵᱟᱹᱭᱥᱟᱹᱣ ᱠᱮᱫᱟ ᱾’ ᱥᱚᱢᱵᱟᱹᱨᱤ ᱵᱤᱧ ᱞᱮᱠᱟ ᱯᱷᱮᱱᱴᱚᱲ ᱥᱟᱲ ᱠᱟᱛᱮᱭ ᱚᱰᱚᱠ ᱮᱱᱛᱮ, ᱠᱤᱠᱭᱟᱹᱣ ᱠᱟᱛᱮᱭ ᱢᱮᱱ ᱠᱮᱫᱟ –‘ᱪᱮᱫ? ᱪᱮᱫ ᱮᱢ ᱞᱟᱹᱭ ᱠᱮᱫᱟ? ᱟᱹᱢᱤᱡ ᱦᱚᱲ! ᱟᱢᱤᱡ ᱦᱚᱲ ᱫᱚ ᱚᱠᱚᱭ ᱱᱟ? ᱤᱧᱤᱧ ᱠᱩᱸᱵᱽᱲᱩ ᱟᱠᱟᱫᱮᱭᱟ ᱥᱮ ᱪᱮᱫ ? ᱪᱮᱫᱟᱜ ᱮ ᱦᱤᱡᱩᱜᱼᱟ ᱤᱧ ᱴᱷᱮᱱ ᱫᱚ ? ᱟᱢ ᱫᱚ ᱵᱟᱢ ᱵᱟᱠᱛᱚ ᱫᱟᱲᱮᱭᱟᱭᱟ?’
ᱚᱱᱠᱟ ᱚᱱᱠᱟ ᱛᱮᱜᱮ ᱢᱚᱪᱟ ᱨᱮᱱᱟᱜ ᱠᱷᱟᱹᱯᱟᱹᱨᱤ ᱟᱹᱰᱤ ᱢᱟᱨᱟᱝ ᱮᱱ ᱛᱟᱹᱠᱤᱱᱟ ᱾ ᱨᱟᱹᱜᱷᱩ ᱫᱚ ᱪᱮᱫ ᱦᱚᱸ ᱵᱟᱭ ᱵᱩᱡᱽ ᱫᱟᱲᱮᱭᱟᱜ ᱠᱟᱱᱟ ᱪᱮᱫ ᱦᱩᱭᱩᱜ ᱠᱟᱱᱟ ᱢᱮᱱᱛᱮ ᱾ ᱱᱤᱥᱟᱹᱛᱮᱭ ᱜᱷᱳᱨ ᱟᱠᱟᱱᱛᱮ ᱠᱩᱴᱵᱩᱨ ᱠᱷᱚᱱ ᱟᱨᱦᱚᱸ ᱚᱛ ᱥᱮᱫ ᱮ ᱠᱩᱴᱵᱩᱨ ᱤᱫᱤᱜ ᱠᱟᱱᱟ ᱾ ᱥᱚᱢᱵᱟᱹᱨᱤ ᱫᱚ ᱨᱟᱪᱟ ᱨᱮ ᱚᱰᱚᱠ ᱠᱟᱛᱮ ᱢᱟᱹᱱᱩ ᱥᱟᱞᱟᱜ ᱛᱟᱯᱟᱢ ᱮ ᱪᱷᱩᱴᱟᱹᱣ ᱮᱱᱟ ᱾ ᱜᱟᱵᱟᱰ ᱜᱩᱵᱩᱰ ᱾ ᱴᱷᱮᱞᱟ ᱴᱷᱤᱞᱤ ᱾ ᱦᱟᱹᱱᱤ ᱞᱤᱸᱵᱚᱫ ᱮ ᱾ ᱱᱩᱭ ᱞᱤᱸᱵᱚᱫ ᱮ ᱾ ᱵᱟᱨᱭᱟ ᱠᱟᱞᱚᱴ ᱮᱸᱜᱟ ᱞᱮᱠᱟ ᱠᱤᱱ ᱠᱷᱟᱹᱯᱟᱹᱨᱤᱜ ᱠᱟᱱᱟ ᱥᱚᱢᱵᱟᱹᱨᱤ ᱟᱨ ᱢᱟᱹᱱᱩ ᱢᱟᱹᱭ ᱾ ᱵᱩᱞ ᱟᱠᱟᱱ ᱥᱚᱢᱵᱟᱹᱨᱤ ᱟᱜ ᱜᱮᱸᱫᱟᱜ ᱠᱷᱟᱹᱰᱣᱟᱹ ᱧᱩᱨᱦᱟᱹᱜ ᱠᱟᱱ ᱛᱟᱭ ᱨᱮᱦᱚᱸ ᱫᱤᱥᱟᱹ ᱵᱟᱥᱟᱜᱮ ᱵᱟᱹᱱᱩᱜ ᱛᱟᱭᱟ ᱾ ᱠᱷᱟᱹᱯᱟᱹᱨᱤ ᱠᱷᱟᱹᱯᱟᱹᱨᱤ ᱛᱮ ᱢᱟᱹᱱᱩ ᱟᱜ ᱩᱵ ᱨᱟᱪᱟᱜ ᱠᱟᱛᱮ ᱡᱮᱠᱷᱚᱱ ᱠᱩᱞᱦᱤ ᱛᱮᱠᱤᱱ ᱚᱰᱚᱠ ᱮᱱᱟ ᱩᱱᱫᱚ ᱥᱚᱢᱵᱟᱹᱨᱤᱭᱟᱜ ᱦᱚᱲᱢᱚ ᱨᱮ ᱢᱤᱫᱴᱟᱹᱝ ᱥᱩᱛᱟᱹᱢ ᱦᱚᱸ ᱵᱟᱹᱱᱩᱜᱼᱟ ᱾ ᱦᱚᱨᱛᱮᱱ ᱦᱚᱲ ᱡᱟᱦᱟᱸᱭ ᱡᱟᱦᱟᱸᱭ ᱠᱚᱫᱚ ᱥᱚᱢᱵᱟᱹᱨᱤ ᱧᱮᱞ ᱛᱮ ᱢᱮᱫ ᱵᱮᱫ ᱠᱟᱛᱮ ᱠᱚ ᱯᱟᱨᱚᱢ ᱪᱟᱞᱟᱜ ᱠᱟᱱᱟ ᱾ ᱚᱠᱚᱭ ᱠᱚᱫᱚ ᱢᱚᱱᱮ ᱢᱚᱱᱮ ᱛᱮᱠᱚ ᱨᱳᱦᱮᱫ ᱮ ᱠᱟᱱᱟ ᱾ ᱚᱠᱚᱭ ᱫᱚ ᱚᱸᱡᱽᱨᱟ ᱥᱟᱱᱛᱟᱲ ᱡᱟᱹᱛ ᱢᱮᱱᱛᱮ ᱠᱚ ᱥᱚᱜ ᱥᱮᱴᱮᱡ ᱮᱫᱟ ᱾ ᱤᱠᱷᱟᱹᱱ ᱚᱠᱚᱭ ᱦᱚᱸ ᱩᱱᱠᱤᱱ ᱪᱷᱟᱰᱟᱣ ᱞᱟᱹᱜᱤᱫ ᱫᱚ ᱵᱟᱝ ᱠᱚ ᱞᱟᱦᱟ ᱦᱤᱡᱩᱜ ᱠᱟᱱᱟ ᱾ ᱨᱟᱹᱥᱠᱟᱹ ᱟᱛᱮ ᱠᱚ ᱧᱮᱞ ᱡᱚᱝ ᱠᱟᱱᱟ ᱢᱤᱫ ᱥᱟᱱᱛᱟᱲ ᱛᱤᱨᱞᱟᱹ ᱟᱜ ᱳᱫᱳᱲ ᱚᱴᱟᱜ ᱡᱩᱣᱟᱹᱱ ᱦᱚᱲᱢᱚ ᱾ ᱡᱟᱦᱟᱸ ᱦᱚᱲᱢᱚ ᱧᱮᱞᱛᱮ ᱦᱟᱨᱟ ᱡᱩᱣᱟᱹᱱ ᱠᱚᱲᱟ ᱟᱜ ᱦᱚᱲᱢᱚ ᱦᱚᱸ ᱨᱤᱡᱷᱟᱹᱣ ᱛᱮ ᱛᱤᱨᱢᱤᱨᱟᱹᱣ ᱜᱚᱫᱚᱜᱼᱟ!
ᱥᱚᱢᱵᱟᱹᱨᱤᱭᱟᱜ ᱫᱚ ᱚᱠᱟ ᱦᱩᱸᱥ ᱜᱮ ᱵᱟᱹᱱᱩᱜᱼᱟ ᱾ ᱛᱟᱞᱟ ᱠᱩᱞᱦᱤ ᱨᱮ ᱤᱧ ᱫᱟᱲᱮᱜ ᱟᱢ ᱫᱟᱲᱮᱜ ᱡᱷᱤᱠᱱᱟᱹ ᱡᱷᱤᱠᱱᱤ, ᱨᱟᱪᱟᱜ ᱨᱟᱯᱟᱪᱟᱜ ᱠᱤᱱ ᱪᱷᱩᱴᱟᱹᱣ ᱟᱠᱟᱱᱟ ᱞᱟᱡᱟᱣ ᱥᱚᱨᱚᱢ ᱫᱮᱭᱟ ᱠᱟᱛᱮ ᱾ ᱚᱱᱟ ᱦᱤᱞᱚᱜ, ᱚᱱᱟ ᱚᱠᱛᱮ ᱥᱚᱢᱵᱟᱹᱨᱤ ᱫᱚ ᱮᱠᱷᱮᱱ ᱟᱡᱟᱜ ᱦᱚᱲᱢᱚ ᱥᱩᱢᱩᱝ ᱫᱚ ᱵᱟᱝ! ᱡᱟᱹᱱᱤᱡ ᱚᱱᱟ ᱦᱤᱞᱚᱜ ᱫᱚ ᱥᱟᱱᱟᱢ ᱥᱟᱱᱛᱟᱲ ᱥᱟᱶᱛᱟ ᱜᱮ ᱚᱴᱟᱜ ᱳᱫᱳᱲ ᱠᱟᱛᱮ ᱠᱩᱞᱦᱤ ᱨᱮᱭ ᱚᱨ ᱚᱰᱚᱠ ᱟᱠᱟᱫᱟ ᱡᱟᱦᱟᱸ ᱨᱮᱱᱟᱜ ᱩᱠᱩ ᱫᱟᱱᱟᱝ ᱴᱚᱴᱷᱟ, ᱳᱫᱳᱲ ᱦᱚᱲᱢᱚ ᱨᱮᱱᱟᱜ ᱵᱷᱟᱸᱡᱽ ᱧᱮᱞ ᱠᱟᱛᱮ ᱠᱚ ᱨᱟᱹᱥᱠᱟᱹ ᱟᱱᱟ, ᱜᱚᱞ ᱥᱩᱭᱩᱲ ᱟᱱᱟ ᱫᱤᱥᱚᱢ ᱫᱩᱱᱤᱭᱟᱹ ᱨᱮᱱ ᱦᱚᱲ!
