ᱡᱟᱱᱟᱢ ᱛᱚᱨᱟ ᱪᱮᱨᱮᱡ ᱫᱩᱞᱟᱹᱲ ᱛᱮ
ᱟᱭᱳᱣᱟᱜ ᱢᱚᱪᱟ ᱠᱷᱚᱱ ᱢᱟᱲᱟᱝ,
ᱟᱸᱡᱚᱢ ᱟᱸᱡᱚᱢᱛᱮ ᱦᱟᱨᱟ ᱵᱳᱨᱳ ᱞᱮᱱ
ᱚᱱᱟ ᱜᱮ ᱟᱭᱳ ᱟᱲᱟᱝ ᱾
ᱛᱟᱨᱠᱚ ᱞᱮᱱᱟ ᱞᱩᱛᱩᱨ ᱯᱮᱨᱮᱡ
ᱢᱚᱡᱽ ᱜᱮ ᱨᱟᱲᱟᱝ ᱨᱟᱲᱟᱝ,
ᱜᱟᱵᱟᱱ ᱟᱠᱟᱱ ᱫᱩᱯᱩᱞᱟᱹᱲ ᱛᱮ
ᱡᱟᱱᱟᱢ ᱟᱭᱳ ᱟᱲᱟᱝ ᱾
ᱧᱟᱯᱟᱢ ᱨᱚᱯᱚᱲ ᱪᱮᱦᱚᱨ ᱵᱮᱦᱚᱨ
ᱨᱚᱲ ᱫᱚ ᱴᱟᱲᱟᱝ ᱴᱟᱲᱟᱝ,
ᱜᱟᱵᱮ ᱨᱟᱥᱟᱛᱮ ᱛᱚᱞᱚᱢ ᱟᱠᱟᱱ
ᱟᱵᱚᱱᱟᱜ ᱟᱭᱳ ᱟᱲᱟᱝ ᱾
ᱥᱤᱠᱟᱹᱣ ᱯᱟᱲᱦᱟᱣ ᱥᱤᱠᱷᱱᱟᱹᱛ ᱠᱟᱛᱷᱟ
ᱞᱟᱥᱮᱨ ᱜᱚᱫᱟᱭ ᱦᱟᱛᱟᱝ,
ᱮᱜᱮᱨ ᱵᱟᱪᱚᱠ ᱥᱟᱹᱨᱤ ᱠᱟᱛᱷᱟ ᱞᱟᱹᱭ
ᱚᱱᱟᱜᱮ ᱟᱭᱳ ᱟᱲᱟᱝ ᱾
ᱡᱟᱸᱦᱟ ᱠᱚᱨᱮ ᱧᱟᱯᱟᱢ ᱞᱮᱱᱨᱮ
ᱟᱯᱱᱟᱨ ᱡᱟᱹᱛ ᱵᱷᱟᱹᱭ ᱠᱚ ᱥᱟᱶ,
ᱛᱷᱩᱛᱤ ᱜᱟᱞᱚᱪ ᱛᱤᱱᱟᱹᱜ ᱪᱚᱨᱚᱠ
ᱨᱚᱲ ᱡᱚᱝᱨᱮ ᱟᱭᱳ ᱟᱲᱟᱝ ᱾
ᱡᱟᱱᱟᱢ ᱟᱭᱳ ᱠᱚᱲᱟᱢ ᱛᱳᱣᱟ
ᱞᱮᱠᱟ ᱜᱮ ᱜᱟᱵᱮ ᱟᱱᱟᱝ,
ᱥᱚᱲᱚᱢ ᱥᱤᱵᱤᱞ ᱨᱚᱢᱚᱡᱽ ᱨᱟᱥᱟ
ᱟᱵᱚᱟᱜ ᱟᱭᱳ ᱟᱲᱟᱝ ᱾
ᱡᱟᱱᱟᱢ ᱟᱭᱳ ᱡᱟᱱᱟᱢ ᱟᱲᱟᱝ
ᱥᱚᱦᱟᱜᱽ ᱟᱹᱰᱤ ᱫᱩᱞᱟᱹᱲ,
ᱛᱟᱦᱮᱸᱱ ᱜᱮᱭᱟ ᱫᱷᱟᱹᱨᱛᱤ ᱛᱟᱞᱟ
ᱡᱟᱭ ᱡᱩᱜᱽ ᱜᱮ ᱡᱤᱭᱟᱹᱲ ᱾
***
