ᱨᱮᱸᱜᱮᱡ ᱫᱚ ᱚᱠᱚᱭ ᱦᱚᱸ ᱡᱟᱱᱟᱢ ᱡᱚᱦᱚᱜ ᱫᱚ ᱵᱟᱵᱚ ᱟᱹᱜᱩ ᱛᱟᱨᱟ ᱟᱠᱟᱫ-ᱟ ᱾ ᱨᱮᱸᱜᱮᱡ ᱟᱨ ᱱᱟᱪᱟᱨ ᱫᱚ ᱟᱵᱚᱣᱟᱜ ᱪᱷᱩᱴᱟᱹᱣ ᱟᱨ ᱵᱟᱝ ᱯᱟᱹᱛᱭᱟᱹᱣ ᱪᱮᱛᱟᱱ ᱨᱮᱵᱚ ᱥᱟᱢᱟᱝ-ᱟ ᱾ ᱨᱮᱸᱜᱮᱡ ᱫᱚ ᱧᱚᱞᱦᱟᱫ ᱦᱮᱸᱫᱮ ᱞᱮᱠᱟᱱ ᱡᱤᱱᱤᱥ ᱠᱟᱱᱟ ᱾ ᱟᱢᱟᱜ ᱦᱚᱲᱢᱚ ᱦᱟᱨᱛᱟ ᱨᱮ ᱛᱷᱚᱠᱲᱮ ᱟᱠᱟᱱ ᱧᱚᱞᱦᱟᱫ ᱟᱢ ᱡᱩᱫᱤᱢ ᱡᱚᱫ ᱥᱟᱯᱷᱟᱭᱟ, ᱵᱟᱹᱭ ᱵᱟᱹᱭ ᱛᱮ ᱥᱟᱯᱷᱟᱜ-ᱟ ᱟᱨ ᱡᱩᱫᱤ ᱛᱤᱥ ᱦᱚᱸ ᱡᱚᱫ ᱜᱮ ᱵᱟᱢ ᱡᱚᱫ ᱥᱟᱯᱷᱟᱭᱟ ᱧᱚᱞᱦᱟᱫ ᱫᱚ ᱚᱱᱟ ᱪᱮᱛᱟᱱ ᱚᱱᱟ ᱟᱨ ᱦᱚᱸ ᱞᱟᱴᱷᱟ ᱵᱟᱹᱲᱛᱤ ᱤᱫᱤᱜ-ᱟ ᱤᱠᱷᱟᱹᱱ ᱥᱟᱯᱷᱟ ᱫᱚ ᱛᱤᱥ ᱦᱚᱸ ᱟᱡ ᱛᱮᱫᱚ ᱵᱟᱝ ᱥᱟᱯᱷᱟᱜ-ᱟ ᱾
ᱨᱮᱸᱜᱮᱡ ᱦᱚᱸ ᱢᱤᱫ ᱱᱚᱝᱠᱟᱱ ᱡᱤᱱᱤᱥ ᱜᱮ ᱠᱟᱱᱟ ᱾ ᱫᱷᱟᱹᱨᱛᱤ ᱯᱩᱨᱤ ᱨᱮ ᱢᱟᱹᱱᱢᱤ ᱵᱚᱱ ᱡᱟᱱᱟᱢ ᱟᱠᱟᱱᱟ ᱾ ᱢᱟᱹᱱᱢᱤ ᱫᱚ ᱢᱤᱫ ᱡᱚᱛᱚ ᱠᱷᱚᱱ ᱥᱚᱨᱮᱥ ᱡᱟᱱᱣᱟ ᱠᱟᱱᱟ ᱵᱚᱱ ᱾ ᱟᱵᱚ ᱴᱷᱮᱱ ᱩᱭᱦᱟᱹᱨ ᱫᱟᱲᱮ ᱢᱮᱱᱟᱜ-ᱟ ᱾ ᱩᱭᱦᱟᱹᱨ ᱫᱟᱲᱮ ᱮᱴᱟᱜ ᱨᱮ ᱯᱷᱚᱴᱮᱞ ᱫᱟᱲᱮᱭᱟᱜ ᱞᱮᱠᱟᱱ ᱫᱟᱲᱮ ᱦᱚᱸ ᱢᱮᱱᱟᱜ-ᱟ ᱾ ᱩᱭᱦᱟᱹᱨ ᱫᱟᱲᱮ ᱠᱟᱹᱢᱤ ᱨᱮ ᱯᱷᱮᱨᱟᱹᱣ ᱫᱟᱲᱮᱭᱟᱜ ᱨᱮᱱᱟᱜ ᱫᱟᱲᱮ ᱦᱚᱸ ᱢᱮᱱᱟᱜ-ᱟ ᱢᱟᱹᱱᱢᱤ ᱴᱷᱮᱱ ᱫᱚ ᱾
ᱞᱟᱡ ᱨᱮᱱᱟᱜ ᱨᱮᱸᱜᱮᱡ ᱥᱩᱢᱩᱝ ᱜᱮ ᱨᱮᱸᱜᱮᱡ ᱫᱚ ᱵᱟᱝ ᱠᱟᱱᱟ ᱾ ᱚᱱᱟ ᱨᱮᱸᱜᱮᱡ ᱞᱟᱡ, ᱵᱷᱟᱛᱟᱣ ᱞᱟᱹᱜᱤᱫ ᱥᱤᱧ ᱧᱤᱫᱟᱹ ᱡᱤᱵᱽ ᱡᱟᱱᱣᱟ, ᱪᱮᱬᱮ ᱪᱤᱯᱨᱩᱜ ᱞᱮᱠᱟ ᱠᱷᱟᱴᱟᱣᱜ ᱜᱮ ᱨᱮᱸᱜᱮᱡ ᱫᱚ ᱾ ᱢᱤᱫ ᱵᱮᱲᱟ ᱦᱚᱸ ᱥᱩᱞᱩᱠ ᱡᱤᱭᱚᱱ ᱨᱮ ᱫᱩᱲᱩᱵ ᱜᱟᱱ ᱠᱟᱛᱮ ᱵᱟᱝ ᱡᱚᱢ ᱫᱟᱲᱮᱭᱟᱜ ᱜᱮ ᱨᱮᱸᱜᱮᱡ ᱫᱚ ᱾ ᱯᱤᱲᱦᱤ ᱛᱟᱭᱚᱢ ᱯᱤᱲᱦᱤ ᱢᱩᱞᱤᱭᱟᱹ ᱠᱟᱛᱮ, ᱮᱴᱟᱜ ᱚᱲᱟᱜ ᱨᱮ, ᱪᱷᱟᱹᱛᱤᱠ ᱵᱟᱹᱫᱽ ᱨᱮ ᱠᱟᱹᱢᱤ ᱠᱟᱛᱮ ᱟᱹᱥᱩᱞᱚᱜ ᱜᱮ ᱨᱮᱸᱜᱮᱡ ᱫᱚ ᱾ ᱜᱤᱫᱟᱹᱨ ᱯᱤᱫᱟᱹᱨ ᱠᱚ ᱚᱞ ᱯᱟᱲᱦᱟᱣ ᱞᱟᱹᱜᱤᱫ ᱴᱷᱤᱠ ᱚᱠᱛᱚ ᱨᱮ ᱴᱟᱠᱟ, ᱠᱟᱹᱣᱰᱤ ᱵᱟᱝ ᱡᱚᱜᱟᱲ ᱫᱟᱲᱮᱭᱟᱠᱚ ᱟᱨ ᱡᱚᱵᱚᱨ ᱛᱮ ᱵᱟᱹᱫᱽ, ᱵᱟᱹᱭᱦᱟᱹᱲ, ᱰᱟᱺᱜᱽᱨᱤ , ᱠᱟᱰᱟ ᱠᱚ ᱟᱹᱠᱷᱨᱤᱧ ᱠᱟᱛᱮ ᱠᱟᱹᱣᱰᱤ ᱡᱚᱜᱟᱲ ᱦᱚᱸ ᱨᱮᱸᱜᱮᱡ ᱜᱮ ᱾ ᱡᱩᱜᱽ ᱛᱟᱭᱚᱢ ᱡᱩᱜᱽ ᱟᱯᱚᱱ ᱛᱮ ᱵᱚᱦᱚᱜ ᱩᱢᱩᱞ ᱵᱟᱹᱠᱷᱩᱞ ᱵᱟᱝ ᱵᱟᱹᱭ ᱫᱟᱲᱮ ᱠᱟᱛᱮ ᱥᱚᱨᱠᱟᱨ ᱵᱮᱱᱟᱣ ᱠᱚᱞᱚᱱᱤ ᱚᱲᱟᱜ ᱨᱮ ᱵᱚᱦᱚᱜ ᱩᱢᱩᱞ ᱦᱚᱸ ᱨᱮᱸᱜᱮᱡ ᱜᱮ ᱾
ᱚᱠᱚᱭ ᱢᱟᱹᱱᱢᱤ ᱦᱚᱸ ᱨᱮᱸᱜᱮᱡ ᱟᱹᱜᱩ ᱠᱟᱛᱮ ᱫᱚ ᱵᱟᱝ ᱵᱚᱱ ᱡᱟᱱᱟᱢ ᱟᱠᱟᱱᱟ ᱾ ᱤᱠᱷᱟᱹᱱ ᱡᱟᱦᱟᱸᱭ ᱦᱚᱲ ᱟᱹᱥᱩᱞᱚᱜ ᱨᱮᱱᱟᱜ ᱦᱚᱨ ᱵᱟᱭ ᱩᱭᱦᱟᱹᱨ ᱫᱟᱲᱮᱭᱟᱜ ᱠᱟᱱᱟ, ᱥᱟᱢᱟᱝ ᱨᱮ ᱢᱮᱱᱟᱜ ᱦᱚᱨ ᱵᱟᱭ ᱟᱯᱱᱟᱨ ᱫᱟᱲᱮᱭᱟᱜ ᱠᱟᱱᱟ, ᱟᱹᱥᱩᱞᱚᱜ ᱨᱮᱱᱟᱜ ᱦᱚᱨ ᱛᱤ ᱠᱷᱚᱱ ᱮ ᱯᱩᱪᱩᱡᱟ, ᱟᱨ ᱢᱤᱫ ᱵᱮᱲᱟ ᱞᱟᱡ ᱵᱷᱟᱛᱟᱣ ᱞᱟᱹᱜᱤᱫ, ᱢᱤᱫ ᱥᱟᱸᱡᱽ ᱡᱚᱢᱟᱜ ᱧᱟᱢ ᱞᱟᱹᱜᱤᱫ ᱮ ᱟᱴᱚᱜᱴᱟᱸᱵᱚᱜᱚᱜ-ᱟ, ᱚᱱᱟ ᱜᱮ ᱟᱨ ᱩᱱᱤ ᱜᱮ ᱨᱮᱸᱜᱮᱡ ᱫᱚ ᱾
ᱦᱚᱲᱢᱚ ᱨᱮ ᱛᱤ ᱡᱟᱸᱜᱟ ᱵᱚᱦᱚᱜ ᱦᱟᱛᱟᱜ ᱥᱟᱶᱛᱮ ᱩᱭᱦᱟᱹᱨ ᱫᱟᱲᱮ, ᱨᱚᱲ ᱫᱟᱲᱮ, ᱠᱟᱹᱢᱤ ᱫᱟᱲᱮ ᱡᱟᱦᱟᱸᱭ ᱴᱷᱮᱱ ᱢᱮᱱᱟᱜ-ᱟ, ᱩᱱᱤ ᱜᱮ ᱢᱟᱹᱱᱢᱤ ᱫᱚ ᱾ ᱤᱠᱷᱟᱹᱱ ᱡᱟᱹᱛᱤ ᱟᱨ ᱯᱟᱹᱨᱥᱤ ᱮᱴᱟᱜ ᱮᱱ ᱠᱷᱟᱱ ᱜᱮ ᱢᱟᱹᱱᱢᱤᱭᱟᱜ ᱫᱟᱲᱮ ᱵᱷᱮᱜᱟᱨ ᱮᱱᱟ, ᱢᱟᱹᱱᱢᱤᱭᱟᱜ ᱩᱯᱨᱩᱢ ᱮᱴᱟᱜ ᱮᱱᱟ ᱾ ᱢᱤᱫ ᱡᱟᱹᱛᱤ ᱫᱚ ᱟᱹᱨᱥᱤ ᱞᱮᱠᱟᱭ ᱡᱷᱟᱞᱠᱟᱣ ᱠᱮᱫ ᱛᱟᱭᱟ ᱵᱟᱡᱟᱨ ᱱᱟᱜᱟᱨ ᱢᱤᱫ ᱴᱩᱰᱟᱹᱜ ᱫᱷᱩᱲᱤ ᱨᱮᱱᱟᱜ ᱨᱩᱯ ᱦᱚᱸ ᱵᱟᱭ ᱧᱮᱞ ᱡᱚᱝ ᱠᱟᱱᱟ ᱮᱱ ᱦᱚᱸᱭ ᱡᱚᱢᱮᱫ ᱜᱮᱭᱟ ᱟᱨ ᱢᱤᱫ ᱡᱟᱹᱛᱤ ᱫᱚ ᱤᱱᱟᱹ ᱫᱷᱟᱹᱨᱛᱤ ᱨᱮᱜᱮ ᱡᱚᱢ ᱟᱹᱥᱩᱞᱚᱜ ᱞᱟᱹᱜᱤᱫ ᱡᱩᱜᱽ ᱛᱟᱭᱚᱢ ᱡᱩᱜᱽ ᱵᱤᱨ ᱵᱩᱨᱩ ᱨᱮᱜᱮ ᱾ ᱥᱤᱧ ᱧᱤᱫᱟᱹ ᱫᱷᱩᱲᱤ ᱛᱮ ᱞᱩᱴᱩᱯᱩᱸᱰᱩ ᱾ ᱢᱤᱫ ᱥᱟᱸᱡᱽ ᱞᱟᱡ ᱵᱷᱟᱛᱟᱣ ᱞᱟᱹᱜᱤᱫ ᱡᱤᱣᱤ ᱟᱠᱟᱞ ᱥᱟᱠᱟᱞ ᱾
ᱦᱚᱲ ᱮ ᱵᱤᱠᱱᱟᱹᱣᱮᱫ ᱢᱮᱭᱟ ᱨᱮᱸᱜᱮᱡ ᱦᱚᱲ, ᱟᱢᱮᱢ ᱢᱟᱱᱟᱣ ᱟᱠᱟᱱᱟ, ᱦᱚᱭ, ᱤᱧ ᱫᱚ ᱨᱮᱸᱜᱮᱡ ᱦᱚᱲ ᱾ ᱦᱚᱲᱮ ᱪᱷᱟᱹᱴᱭᱟᱹᱨ ᱟᱠᱟᱫ ᱢᱮᱭᱟ ᱟᱢ ᱫᱚ ᱵᱤᱨ ᱦᱚᱲ ᱾ ᱟᱨ ᱟᱢ ᱫᱚᱢ ᱠᱩᱥᱤ ᱡᱚᱝ ᱠᱟᱱᱟ, ᱦᱚᱭ ᱤᱧ ᱫᱚ ᱵᱤᱨ ᱦᱚᱲ ᱾ ᱵᱚᱦᱚᱜ ᱩᱢᱩᱞ ᱥᱟᱹᱲᱤᱢ ᱦᱚᱸ ᱵᱟᱢ ᱵᱮᱱᱟᱣ ᱫᱟᱲᱮ ᱡᱚᱝ ᱨᱮᱱᱟᱜ ᱩᱯᱨᱩᱢ ᱫᱷᱟᱹᱨᱛᱤ ᱨᱮᱭ ᱪᱟᱞ ᱟᱠᱟᱣᱟᱫ ᱢᱮᱛᱮ, ᱵᱚᱦᱚᱜ ᱩᱢᱩᱞ ᱥᱟᱹᱲᱤᱢ ᱦᱚᱸ ᱦᱚᱲ ᱴᱷᱮᱱᱮᱢ ᱵᱮᱱᱟᱣ ᱚᱪᱚᱜ ᱠᱟᱱᱟ ᱾ ᱱᱚᱶᱟ ᱫᱚ ᱢᱤᱫ ᱡᱟᱹᱛᱤ ᱯᱟᱹᱨᱥᱤ ᱨᱮᱱᱟᱜ ᱨᱮᱸᱜᱮᱡ ᱫᱚ ᱵᱟᱝ ᱠᱟᱱᱟ ᱾ ᱱᱚᱶᱟ ᱫᱚ ᱚᱱᱟ ᱡᱟᱹᱛᱤ ᱨᱤᱱ ᱢᱟᱹᱱᱢᱤᱭᱟᱜ ᱩᱭᱦᱟᱹᱨ ᱨᱮᱱᱟᱜ ᱨᱮᱸᱜᱮᱡ ᱠᱟᱱᱟ ᱾ ᱡᱟᱦᱟᱸᱨᱮ ᱩᱭᱦᱟᱹᱨ ᱨᱮᱱᱟᱜ ᱨᱮᱸᱜᱮᱡ ᱛᱟᱦᱮᱸᱱᱟ, ᱚᱸᱰᱮ ᱫᱚ ᱥᱟᱱᱟᱢᱟᱜ ᱛᱮ ᱨᱮᱸᱜᱮᱡ ᱾ ᱨᱮᱸᱜᱮᱡ ᱞᱮᱠᱟᱱ ᱩᱯᱨᱩᱢ ᱜᱮ ᱱᱚᱶᱟ ᱫᱷᱟᱹᱨᱛᱤ ᱨᱮ ᱵᱟᱹᱱᱩᱜ ᱟᱱᱟ ᱾ ᱨᱮᱸᱜᱮᱡ ᱢᱮᱱᱛᱮ ᱫᱚ ᱩᱱᱤ ᱦᱚᱲᱮ ᱩᱨᱩᱢᱚᱜ-ᱟ, ᱡᱟᱦᱟᱸᱭ ᱦᱚᱲ, ᱦᱚᱲᱟᱜ ᱠᱟᱛᱷᱟ ᱨᱮᱭ ᱛᱟᱦᱮᱸᱱᱟ, ᱡᱟᱦᱟᱸᱭ ᱴᱷᱮᱱ ᱫᱟᱲᱮ ᱢᱮᱱᱟᱜ ᱨᱮᱦᱚᱸ ᱵᱟᱰᱟᱭ ᱠᱟᱛᱮ ᱜᱮ ᱠᱟᱹᱢᱤ ᱨᱮ ᱵᱟᱭ ᱦᱮᱞᱟᱣᱟ ᱾ ᱡᱟᱦᱟᱸᱭ ᱦᱚᱲ, ᱦᱚᱲᱟᱜ ᱩᱫᱩᱜ ᱦᱚᱨ ᱛᱮᱭ ᱛᱟᱲᱟᱢᱟ ᱾ ᱨᱮᱸᱜᱮᱡ ᱫᱚ ᱟᱡ ᱛᱮᱫᱚ ᱚᱠᱚᱭ ᱴᱷᱮᱱ ᱦᱚᱸ ᱵᱟᱝ ᱡᱮᱨᱮᱫ ᱵᱟᱲᱟᱭᱟ ᱾ ᱟᱢ ᱜᱮ ᱨᱮᱸᱜᱮᱡ ᱴᱷᱮᱱᱮᱢ ᱡᱟᱯᱟᱜ ᱡᱮᱨᱮᱫ ᱵᱟᱲᱟᱭ ᱠᱷᱟᱱ, ᱨᱮᱸᱜᱮᱡ ᱫᱚ ᱟᱢ ᱛᱤᱥ ᱦᱚᱸ ᱵᱟᱭ ᱵᱟᱹᱜᱤᱭᱟᱢᱟ ᱾ ᱟᱨ ᱫᱷᱟᱹᱨᱛᱤ ᱨᱮᱢ ᱵᱤᱠᱱᱟᱹᱣᱜ-ᱟ ᱟᱢ ᱫᱚ ‘ᱨᱮᱸᱜᱮᱡ’ ᱾
