ᱦᱩᱦᱤ

ᱦᱚᱯᱚᱱ ᱢᱟ.ᱭ ᱟᱜ ᱥᱟᱨ ᱥᱟ.ᱜᱩᱱ ᱵᱟᱯᱞᱟ ᱾ ᱵᱟᱯᱞᱟ ᱫᱚ ᱱᱮᱸᱰᱟ ᱟᱠᱟᱱᱟ ᱑᱙᱙᱐ ᱥᱟᱞ ᱨᱮᱱᱟᱜ ᱵᱟ.ᱭᱥᱟ.ᱠᱷ ᱕ ᱢᱟᱦᱟ ᱦᱤᱞᱳᱜ ᱾ ᱧᱮᱞ ᱧᱮᱯᱮᱞᱟ, ᱥᱟᱨ ᱥᱟ.ᱜᱩᱱ, ᱡᱟᱶᱟᱭ ᱦᱚᱨᱟᱜ ᱥᱟᱱᱟᱢ ᱠᱟ.ᱢᱤ ᱥᱟ.ᱛ ᱟᱠᱟᱱᱟ ᱾ ᱢᱤᱫ ᱫᱤᱱ ᱛᱟᱨᱟᱥᱤᱧ ᱰᱟᱠ ᱯᱤᱭᱳᱱ ᱪᱤᱴᱷᱤ ᱥᱟᱵ ᱠᱟᱛᱮᱭ ᱥᱮᱴᱮᱨ ᱮᱱᱟ ᱦᱚᱯᱚᱱ ᱢᱟ.ᱭ ᱛᱟᱠᱳ ᱚᱲᱟᱜ ᱛᱮ ᱾ ᱪᱤᱴᱷᱤ ᱫᱚ ᱦᱚᱯᱚᱱ ᱢᱟ.ᱭ ᱜᱮᱭ ᱟᱛᱟᱝ ᱠᱮᱫᱟ ᱾ ᱞᱟᱲᱟ ᱵᱷᱩᱲᱤ ᱠᱟᱛᱮ ᱯᱟᱲᱦᱟᱣ ᱠᱟᱛᱮᱭ ᱵᱟᱰᱟᱭ ᱠᱮᱫᱟ ᱾ ᱱᱚᱣᱟ ᱪᱤᱴᱷᱤ ᱨᱮᱭᱟᱜ ᱠᱟᱛᱷᱟ ᱚᱲᱟᱜ ᱨᱮᱱ ᱥᱟᱱᱟᱢ ᱦᱚᱲ ᱠᱚ ᱵᱟᱰᱟᱭ ᱠᱮᱫᱟ ᱾ ᱩᱱᱠᱩ ᱫᱚ ᱪᱮᱫ ᱦᱚᱸ ᱵᱟᱹᱲᱤᱡᱟᱜ ᱫᱚ ᱵᱟᱠᱳ ᱢᱚᱱᱮ ᱞᱮᱫᱟ ᱾ ᱢᱮᱱ ᱥᱟᱣᱦᱟ ᱠᱮᱫᱟ ᱠᱚ ᱱᱚᱝᱠᱟᱱ ᱩᱲᱟ. ᱪᱤᱴᱷᱤ ᱫᱚ ᱛᱤᱱᱟ.ᱜ ᱦᱚᱲ ᱠᱚ ᱧᱟᱢ ᱟᱠᱟᱫᱟ ᱾ ᱩᱲᱟ. ᱪᱤᱴᱷᱤ ᱞᱮᱠᱟ ᱜᱮ ᱱᱚᱣᱟ ᱪᱤᱴᱷᱤ ᱨᱮᱱᱟᱜ ᱠᱟᱛᱷᱟ ᱫᱚ ᱠᱚ ᱦᱩᱦᱤ ᱚᱴᱟᱝ ᱠᱮᱫᱟ ᱟᱨ ᱵᱟᱯᱞᱟ ᱥᱟᱹᱦᱤ ᱡᱩᱦᱤ ᱨᱮ ᱠᱚ ᱪᱷᱩᱴᱟᱹᱣ ᱮᱱᱟ ᱾

ᱵᱟ.ᱭᱥᱟ.ᱠᱷ ᱕ ᱢᱟᱦᱟ ᱥᱮᱴᱮᱨ ᱮᱱᱟ ᱾ ᱟᱛᱳ ᱢᱚᱲᱮ ᱦᱚᱲ ᱜᱤᱨᱟ. ᱠᱚ ᱛᱟᱞ ᱠᱮᱫᱟ ᱾ ᱦᱚᱯᱚᱱ ᱢᱟ.ᱭ ᱟᱡ ᱵᱟᱵᱟ ᱫᱚ ᱟᱛᱳ ᱢᱚᱲᱮ ᱦᱚᱲ ᱴᱷᱮᱱᱮ ᱞᱟ.ᱭ ᱠᱮᱫᱟ – ᱟᱛᱳ ᱢᱟ.ᱡᱷᱤ ᱵᱟᱵᱟ ᱵᱟ.ᱨᱭᱟ.ᱛ ᱠᱚ ᱢᱮᱱ ᱮᱫᱟ ᱢᱤᱫ ᱧᱤᱫᱟᱹ ᱛᱮ ᱵᱟᱯᱞᱟ ᱠᱟᱛᱮᱫ ᱜᱮ ᱠᱚ ᱨᱩᱣᱟ.ᱲ ᱪᱟᱞᱟᱜ ᱟᱠᱳ ᱾ ᱥᱮᱛᱟᱜ ᱨᱮᱜᱮ ᱵᱤᱫᱟ.ᱭ ᱠᱚ ᱦᱟᱛᱟᱣᱟ ᱾ ᱢᱟ.ᱡᱷᱤ ᱵᱟᱵᱟᱭ ᱠᱩᱠᱞᱤ ᱠᱮᱫᱟ – ᱵᱟ.ᱨᱭᱟ.ᱛ ᱠᱚ ᱵᱷᱚᱡᱽ ᱫᱚ ᱵᱟᱢ ᱮᱢ ᱫᱟᱲᱮᱭᱟᱠᱳ ᱛᱮ ᱮᱠᱟᱨᱟ.ᱛᱤᱭᱟ. ᱵᱟᱯᱞᱟ ᱠᱚ ᱠᱷᱚᱡᱽ ᱠᱟᱱᱟ? ᱦᱚᱯᱚᱱ ᱢᱟ.ᱭ ᱟᱡ ᱵᱟᱵᱟᱭ ᱞᱟ.ᱭ ᱠᱮᱫᱟ – ᱵᱷᱚᱡᱽ ᱫᱚ ᱠᱚ ᱡᱚᱢ ᱜᱮᱭᱟ, ᱨᱟᱭᱵᱟᱨ ᱴᱷᱮᱱ ᱠᱚ ᱞᱟ.ᱭ ᱠᱳᱞ ᱟᱠᱟᱫᱟ ᱠᱟᱛᱷᱟ ᱫᱚ ᱾ ᱚᱱᱟ ᱛᱮᱧ ᱢᱮᱱ ᱮᱫᱟ ᱟᱵᱳ ᱟᱛᱳ ᱨᱮᱱ ᱥᱟᱱᱟᱢ ᱦᱚᱲ ᱞᱟ.ᱜᱤᱫ ᱜᱮᱵᱚᱱ ᱵᱷᱚᱡᱟ ᱾ ᱵᱟ.ᱨᱭᱟᱛ ᱠᱚ ᱟ.ᱣᱨᱤ ᱦᱤᱡᱩᱜ ᱨᱮᱜᱮ ᱵᱚᱱ ᱡᱚᱢ ᱧᱩ ᱦᱟᱛᱟᱲᱟ ᱾ ᱵᱟ.ᱨᱭᱟ.ᱛ ᱠᱚ ᱠᱚ ᱦᱮᱡ ᱞᱮᱱ ᱠᱷᱟᱱ ᱵᱟ.ᱨᱭᱟ.ᱛ ᱠᱚ ᱵᱚᱱ ᱵᱷᱚᱡᱽ ᱟᱠᱳᱣᱟ ᱾ ᱢᱮᱱ ᱠᱷᱟᱱ ᱢᱟ.ᱡᱷᱤ ᱵᱟᱵᱟ ᱫᱚ ᱵᱟᱭ ᱥᱤᱠᱟ.ᱨ ᱞᱮᱫᱟ ᱾ ᱢᱮᱱ ᱠᱮᱫᱟᱭ ᱵᱟᱯᱞᱟ ᱠᱟ.ᱢᱤ ᱵᱟᱝ ᱥᱟ.ᱛ ᱞᱮᱱ ᱠᱷᱟᱱ ᱵᱟᱞᱮ ᱡᱚᱢᱟ ᱵᱷᱚᱡᱽ ᱫᱚ ᱾ ᱢᱤᱫ ᱧᱤᱫᱟᱹ ᱵᱟᱯᱞᱟ ᱨᱮ ᱫᱚ ᱵᱟ.ᱨᱭᱟ.ᱛ ᱠᱚ ᱵᱷᱚᱡᱽ ᱫᱚ ᱵᱟᱝ ᱵᱚᱱ ᱮᱢᱟ ᱠᱚᱣᱟ ᱾ ᱦᱚᱯᱚᱱ ᱢᱟ.ᱭ ᱟᱡ ᱵᱟᱵᱟ ᱫᱚ ᱟ.ᱰᱤ ᱵᱷᱟ.ᱵᱤᱛ ᱨᱮᱭ ᱯᱟᱲᱟᱣ ᱮᱱᱟ ᱾ ᱦᱚᱯᱚᱱ ᱢᱟ.ᱭ ᱟᱜ ᱵᱟᱯᱞᱟ ᱧᱩᱛᱩᱢ ᱪᱷᱟᱢᱰᱟ ᱢᱟᱸᱰᱮᱣᱟ ᱦᱳᱭ ᱥᱟ.ᱛ ᱮᱱᱟ ᱾ ᱛᱟᱞᱟ ᱨᱟᱪᱟ ᱨᱮ ᱛᱩᱢᱫᱟ.ᱜ ᱴᱟᱢᱟᱠ ᱠᱚ ᱟᱠᱟ ᱠᱮᱫᱟ ᱾ ᱛᱤᱱᱟᱹᱜ ᱨᱟ.ᱥᱠᱟ. ᱟᱭᱠᱟ.ᱜ ᱠᱟᱱᱟ, ᱩᱱᱟᱹᱜ ᱜᱮ ᱵᱷᱟᱵᱱᱟ ᱦᱚᱸ ᱟ.ᱭᱠᱟ.ᱜ ᱠᱟᱱᱟ ᱾ᱪᱮᱫᱟᱜ ᱥᱮ ᱦᱚᱯᱚᱱ ᱢᱟ.ᱭ ᱟᱡ ᱵᱟᱵᱟ ᱫᱚ ᱟᱛᱳ ᱦᱚᱲ ᱴᱷᱮᱱ ᱮ ᱱᱮᱦᱚᱨᱚᱜ ᱠᱟᱱᱟ ᱵᱟ.ᱨᱭᱟ.ᱛ ᱠᱚ ᱞᱟ.ᱜᱤᱫ ᱵᱷᱚᱡᱽ ᱫᱟᱠᱟ ᱤᱥᱤᱱ ᱞᱟ.ᱜᱤᱫ, ᱢᱮᱨᱚᱢ ᱜᱚᱡᱮ ᱞᱟ.ᱜᱤᱫ ᱾ ᱢᱮᱱ ᱠᱷᱟᱱ ᱚᱠᱟ ᱠᱟᱛᱷᱟ ᱜᱮ ᱵᱟᱝ ᱠᱚ ᱟᱸᱡᱚᱢ ᱞᱮᱫᱟ ᱾ ᱢᱟ.ᱡᱷᱤ ᱵᱟᱵᱟ ᱵᱟᱭ ᱦᱩᱠᱩᱢ ᱞᱮᱫ ᱛᱮᱜᱮ ᱚᱠᱚᱭ ᱦᱚᱸ ᱵᱟᱝ ᱠᱚ ᱟᱸᱡᱚᱢ ᱞᱮᱫᱟ ᱾

ᱥᱤᱸᱜᱟ.ᱲ ᱧᱤᱫᱟᱹ ᱵᱟ.ᱨᱭᱟ.ᱛ ᱠᱚ ᱥᱮᱴᱮᱨ ᱮᱱᱟ ᱟ.ᱰᱤ ᱨᱟ.ᱥᱠᱟ. ᱜᱮ ᱾ ᱴᱮᱨᱟᱠ ᱨᱮ ᱢᱟᱭᱤᱠ ᱞᱟᱫᱮ ᱠᱟᱛᱮ ᱟ.ᱰᱤ ᱡᱳᱨ ᱥᱟᱰᱮ ᱠᱟᱛᱮ ᱠᱚ ᱥᱮᱴᱮᱨ ᱮᱱᱟ ᱾ ᱠᱩᱞᱦᱤ ᱢᱩᱪᱟᱹᱫ ᱨᱮ ᱵᱟ.ᱨᱭᱟ.ᱛ ᱠᱚ ᱞᱟ.ᱜᱤᱫ ᱜᱩᱲ ᱫᱟᱜ ᱠᱚ ᱤᱫᱤ ᱠᱮᱫᱟ ᱾ ᱵᱟ.ᱨᱭᱟ.ᱛ ᱠᱚ ᱜᱩᱲ ᱠᱚ ᱡᱚᱢ ᱠᱮᱫᱟ, ᱫᱟᱜ ᱠᱚ ᱧᱩ ᱠᱮᱫᱟ ᱾ ᱢᱤᱫ ᱜᱷᱟ.ᱲᱤᱡ ᱛᱟᱭᱚᱢ ᱜᱮ ᱠᱚ ᱵᱟᱰᱟᱭ ᱠᱮᱫᱟ ᱵᱟᱝ ᱢᱟ ᱵᱟ.ᱨᱭᱟ.ᱛ ᱠᱚ ᱞᱟ.ᱜᱤᱫ ᱵᱷᱚᱡ ᱫᱟᱠᱟ ᱵᱟᱝ ᱠᱚ ᱤᱥᱤᱱ ᱮᱫᱟ ᱾ ᱩᱱᱠᱷᱟᱱ ᱜᱮ ᱢᱚᱱᱮ ᱨᱮ ᱵᱟᱝ ᱠᱚ ᱠᱩᱥᱤᱜ ᱠᱟᱱᱟ ᱾ ᱫᱟᱨᱟᱢ ᱫᱟᱜ ᱠᱚ ᱥᱟ.ᱛ ᱠᱟᱛᱮᱫ ᱪᱷᱟᱴᱠᱟ ᱫᱩᱣᱟᱹᱨ ᱨᱮ ᱵᱟ.ᱨᱭᱟ.ᱛ ᱠᱚ ᱠᱚ ᱫᱟᱨᱟᱢ ᱟᱜᱩ ᱠᱮᱫ ᱠᱚᱣᱟ ᱾ ᱨᱟᱭᱵᱟᱨᱤᱡ ᱫᱚ ᱦᱟᱨᱮ ᱯᱷᱟᱨᱮ ᱫᱟ.ᱣᱲᱟ. ᱛᱮ ᱥᱤᱸᱫᱩᱨ ᱞᱩᱜᱽᱲᱤᱡ ᱮ ᱦᱮᱨᱢᱮᱫ ᱟ.ᱜᱩ ᱠᱮᱫᱟ ᱾ ᱟᱫᱚ ᱦᱚᱯᱚᱱ ᱢᱟ.ᱭ ᱥᱤᱸᱫᱩᱨ ᱥᱟᱲᱤ ᱛᱮ ᱠᱚ ᱥᱟᱡᱟᱣ ᱮ ᱠᱟᱱᱟ ᱾ ᱵᱟ.ᱨᱭᱟ.ᱛ ᱠᱚ ᱢᱩᱫ ᱨᱮ ᱕ ᱦᱚᱲ ᱱᱟᱣᱟ ᱵᱟ.ᱦᱩ ᱟᱜ ᱫᱟ.ᱣᱲᱟ. ᱡᱚᱴᱮᱫ ᱞᱟ.ᱜᱤᱫ ᱚᱲᱟᱜ ᱠᱚ ᱵᱚᱞᱚᱱ ᱞᱟ.ᱜᱤᱫ, ᱩᱱ ᱥᱮᱨᱮᱧ ᱛᱟᱞᱟ ᱛᱮ ᱠᱚ ᱮᱥᱮᱫ ᱠᱮᱫ ᱠᱚᱣᱟ ᱾ ᱥᱮᱨᱮᱧ ᱫᱚ ᱱᱚᱝᱠᱟ –

ᱚᱠᱟ ᱨᱮᱱ ᱞᱚᱵᱟ ᱵᱟ.ᱨᱭᱟ.ᱛ
ᱚᱠᱟ ᱠᱩᱞᱦᱤ ᱯᱮ ᱵᱚᱞᱚᱱ ᱞᱟ.ᱜᱤᱫ
ᱰᱚᱢ ᱠᱩᱞᱤ ᱥᱮ
ᱦᱟ.ᱰᱤ ᱠᱩᱞᱦᱤ ᱯᱮ ᱵᱚᱞᱚᱱ ᱞᱟ.ᱜᱤᱫ ?

ᱵᱟ.ᱨᱭᱟ.ᱛ ᱠᱚᱣᱟᱜ ᱱᱚᱰᱮ ᱛᱮᱞᱟ ᱫᱚ –

ᱰᱟᱢ ᱠᱩᱞᱦᱤ ᱦᱚᱸ ᱵᱟᱞᱮ ᱵᱚᱞᱚᱱ
ᱦᱟ.ᱰᱤ ᱠᱩᱞᱦᱤ ᱦᱚᱸ ᱵᱟᱝ
ᱡᱟᱦᱟ ᱠᱩᱞᱦᱤ ᱨᱮ
ᱩᱞ ᱰᱷᱟ.ᱨᱣᱟᱜ ᱟᱠᱟ ᱢᱮᱱᱟᱜ
ᱚᱱᱟ ᱠᱩᱞᱦᱤ ᱞᱮ ᱵᱚᱞᱚᱱᱟ ᱿

ᱢᱮᱱᱠᱷᱟᱱ ᱚᱱᱟ ᱥᱮᱨᱮᱧ ᱨᱮᱱᱟᱜ ᱛᱮᱞᱟ ᱫᱚ ᱵᱟ.ᱨᱭᱟ.ᱛ ᱠᱚ ᱵᱟᱝ ᱠᱚ ᱮᱢ ᱫᱟᱲᱮᱭᱟᱜ ᱛᱮ ᱟᱛᱳ ᱨᱮᱱ ᱠᱩᱲᱤ ᱦᱚᱯᱚᱱ ᱠᱚ ᱜᱮ ᱚᱱᱟ ᱨᱮᱱᱟᱜ ᱛᱮᱞᱟ ᱫᱚ ᱠᱚ ᱮᱢᱟᱫᱟ ᱾ ᱟᱫᱚ ᱠᱚ ᱵᱚᱞᱚ ᱚᱪᱚ ᱟᱫ ᱠᱚᱣᱟ ᱾ ᱟᱨ ᱦᱚᱸ ᱡᱚᱠᱷᱚᱱ ᱨᱟᱪᱟ ᱵᱚᱞᱚ ᱠᱟᱛᱮᱫ ᱡᱟᱦᱟ ᱚᱲᱟᱜ ᱨᱮ ᱦᱚᱯᱚᱱ ᱢᱟ.ᱭ ᱱᱟᱣᱟ ᱵᱟ.ᱦᱩ ᱥᱟᱡ ᱛᱮ ᱫᱟ.ᱣᱲᱟ. ᱨᱮ ᱥᱟᱡᱟᱣ ᱠᱟᱛᱮᱫ ᱢᱮᱱᱟᱭ ᱚᱸᱰᱮ ᱵᱚᱞᱚᱱ ᱚᱠᱛᱚ ᱟᱨ ᱦᱚᱸ ᱥᱮᱨᱮᱧ ᱛᱟᱞᱟ ᱛᱮ ᱠᱚ ᱮᱥᱮᱫ ᱠᱮᱫ ᱠᱚᱣᱟ ᱾ ᱥᱮᱨᱮᱧ ᱫᱚ ᱱᱚᱝᱠᱟ –
ᱮ ᱵᱟ.ᱨᱭᱟ.ᱛ ᱞᱚᱵᱟ ᱵᱟ.ᱨᱭᱟ.ᱛ
ᱵᱷᱤᱴᱣᱟᱫ ᱵᱟᱦᱟ ᱯᱮ ᱤᱫᱤᱭ ᱞᱟ.ᱜᱤᱫ
ᱥᱮ ᱵᱤᱱ ᱵᱷᱤᱴᱣᱟᱫ ᱵᱟᱦᱟ

ᱵᱟ.ᱨᱭᱟ.ᱛ ᱠᱚᱣᱟᱜ ᱛᱮᱞᱟ ᱫᱚ –

ᱵᱷᱤᱴᱣᱟᱫ ᱵᱟᱦᱟ ᱦᱚᱸ ᱵᱟᱞᱮ ᱤᱫᱤ
ᱵᱤᱱ ᱵᱷᱤᱴᱣᱟᱫ ᱵᱟᱦᱟ ᱦᱚᱸ ᱵᱟᱝ
ᱟᱞᱮ ᱛᱮᱞᱮ ᱵᱷᱤᱴᱣᱟᱫ ᱟᱜ-ᱟ
ᱚᱱᱟ ᱵᱟᱦᱟ ᱜᱮᱞᱮ ᱤᱫᱤᱭ ᱞᱟ.ᱜᱤᱫ᱾

ᱱᱚᱣᱟ ᱛᱮᱞᱟ ᱦᱚᱸ ᱵᱟᱝ ᱠᱚ ᱮᱢ ᱫᱟᱲᱮᱭᱟᱫᱟ ᱛᱮ ᱵᱟ.ᱨᱭᱟ.ᱛ ᱠᱚ ᱚᱱᱟ ᱦᱚᱸ ᱚᱸᱰᱮ ᱠᱚ ᱥᱮᱴᱮᱨ ᱛᱟᱦᱮ ᱠᱟᱱ ᱠᱩᱲᱤ ᱦᱚᱯᱚᱱ ᱠᱚ ᱜᱮ ᱠᱚ ᱛᱮᱞᱟ ᱨᱩᱣᱟ.ᱲ ᱠᱮᱫᱟ ᱟᱨ ᱚᱲᱟᱜ ᱵᱷᱤᱛᱟ.ᱨ ᱠᱚ ᱵᱚᱞᱚ ᱚᱪᱚ ᱟᱫ ᱠᱚᱣᱟ ᱾ ᱵᱟ.ᱨᱭᱟ.ᱛ ᱠᱚ ᱦᱟᱺᱰᱤ ᱠᱚ ᱧᱩ ᱠᱮᱫᱟ, ᱪᱩᱴᱤ ᱛᱷᱟᱢᱟᱠᱩᱨ ᱠᱚ ᱡᱚᱢ ᱠᱮᱫᱟ ᱾ ᱦᱚᱯᱚᱱ ᱢᱟ.ᱭ ᱫᱚ ᱱᱟᱣᱟ ᱵᱟ.ᱦᱩ ᱥᱟᱡ ᱛᱮ ᱫᱟ.ᱣᱲᱟ. ᱪᱮᱛᱟᱱ ᱨᱮᱭ ᱫᱩᱲᱩᱵ ᱟᱠᱟᱱᱟ ᱾ ᱚᱱᱟ ᱫᱟ.ᱣᱲᱟ. ᱡᱚᱴᱮᱫ ᱚᱴᱚ ᱠᱟᱛᱮᱫ ᱵᱟ.ᱨᱭᱟ.ᱛ ᱠᱚ ᱫᱚ ᱠᱚ ᱳᱰᱳᱠ ᱪᱟᱞᱟᱣ ᱮᱱᱟ ᱾ ᱳᱰᱳᱠ ᱪᱟᱞᱟᱣ ᱛᱟᱭᱚᱢ ᱜᱮ ᱵᱟ.ᱨᱭᱟ.ᱛ ᱠᱚ ᱢᱚᱡᱟ ᱠᱚ ᱞᱟ.ᱜᱤᱫ ᱛᱮ ᱜᱮ ᱢᱤᱫ ᱴᱟᱝ ᱠᱚᱲᱟ ᱜᱤᱫᱽᱨᱟᱹ ᱥᱟᱥᱟᱝ ᱠᱷᱟᱸᱰᱤ ᱛᱮ ᱯᱚᱴᱚᱢ ᱠᱟᱛᱮ ᱡᱷᱚᱲᱟ ᱨᱮ ᱫᱩᱲᱩᱵ ᱠᱟᱛᱮ ᱠᱚ ᱛᱩᱞ ᱳᱰᱳᱠ ᱠᱮᱫᱮᱭᱟ ᱪᱷᱟᱴᱠᱟ ᱫᱩᱣᱟᱹᱨ ᱛᱮ ᱾ ᱟᱫᱚᱢ ᱠᱚᱲᱟ ᱜᱤᱫᱽᱨᱟᱹ ᱠᱚ ᱫᱚ ᱠᱚ ᱢᱮᱱ ᱠᱮᱫᱟ ᱢᱟ ᱢᱟ ᱵᱟ.ᱨᱭᱟ.ᱛ ᱠᱚ ᱡᱟᱶᱟᱭ ᱜᱷᱟᱲᱟᱭᱮᱯᱮ, ᱵᱟᱝ ᱦᱟᱢᱟᱞᱮᱫ ᱞᱮᱭᱟ ᱫᱚ, ᱢᱟ ᱢᱟ ᱞᱚᱜᱚᱱ ᱜᱷᱚᱲᱟᱭᱮᱯᱮ ᱾ ᱵᱟ.ᱨᱭᱟ.ᱛ ᱠᱚ ᱦᱚᱸ ᱱᱟᱣᱟ ᱡᱟᱶᱟᱭ ᱠᱚ ᱜᱷᱚᱲᱟ ᱠᱮᱫᱮᱭᱟ᱾ ᱩᱱᱠᱷᱟᱱ ᱜᱮ ᱡᱷᱚᱲᱟ ᱠᱚ ᱯᱷᱮᱰ ᱠᱮᱫ ᱛᱮ ᱠᱚ ᱠᱚᱲᱟ ᱜᱤᱫᱽᱨᱟᱹ ᱫᱚᱭ ᱫᱚᱱ ᱟᱬᱜᱳᱭᱮᱱᱟ, ᱟᱨ ᱦᱚᱲ ᱠᱚ ᱛᱟᱞᱟ ᱨᱮᱭ ᱧᱤᱨ ᱵᱚᱞᱚᱭᱮᱱᱟ ᱾ ᱵᱟ.ᱨᱭᱟ.ᱛ ᱠᱚ ᱫᱚ ᱟ.ᱰᱤ ᱜᱮ ᱠᱚ ᱴᱷᱚᱠᱟᱣ ᱮᱱᱟ, ᱞᱟᱡᱟᱣ ᱮᱱᱟ ᱠᱚ ᱾

ᱤᱱᱟ. ᱛᱟᱭᱚᱢ ᱛᱮᱜᱮ ᱱᱟᱣᱟ ᱵᱟ.ᱦᱩ ᱦᱚᱸ ᱠᱚ ᱛᱩᱞ ᱳᱰᱳᱠ ᱠᱮᱫᱮᱭᱟ ᱾ ᱨᱟᱭᱵᱟᱨ ᱫᱚ ᱞᱟᱦᱟ ᱛᱮᱭ ᱳᱰᱳᱠ ᱦᱤᱡᱩᱜ ᱠᱟᱱᱟ ᱾ ᱚᱱᱟ ᱛᱟᱭᱚᱢ ᱛᱮ ᱱᱟᱣᱟ ᱵᱟ.ᱦᱩ ᱨᱮᱱ ᱵᱟᱢᱲᱮ ᱩᱞ ᱰᱷᱟ.ᱨᱣᱟᱜ ᱞᱚᱴᱟ ᱫᱟᱜ ᱥᱟᱵ ᱠᱟᱛᱮᱭ ᱵᱟᱠᱷᱮᱲ ᱮᱫᱟ ᱢᱟᱻᱢᱟ ᱦᱳ ᱜᱷᱚᱲᱟᱭᱮᱯᱮ ᱦᱟ.ᱱᱤ ᱵᱟ.ᱦᱩ ᱠᱚ ᱛᱩᱞ ᱟ.ᱜᱩ ᱠᱮᱫᱮᱭᱟ ᱾ ᱢᱮᱱᱠᱷᱟᱱ ᱵᱟᱢᱲᱮ ᱫᱚ ᱵᱟᱭ ᱵᱟᱲᱟᱭᱟ ᱱᱚᱣᱟ ᱞᱟᱦᱟ ᱪᱮᱫ ᱪᱮᱠᱟᱣᱟᱠᱟᱱᱟ ᱢᱮᱱ ᱛᱮ ᱾ ᱵᱟ.ᱨᱭᱟ.ᱛ ᱠᱚ ᱫᱚ ᱡᱟᱶᱟᱭ ᱵᱟᱝ ᱜᱷᱚᱲᱟ ᱠᱟᱛᱮᱫ ᱡᱮᱡᱟᱨ ᱠᱚ ᱨᱚᱲ ᱠᱟᱱᱟ ᱦᱟᱱᱟ ᱱᱟᱣᱟ ᱠᱟᱛᱷᱟ, ᱟᱞᱮ ᱫᱚ ᱡᱟᱦᱟᱭ ᱴᱟᱜ ᱞᱟᱦᱟ ᱛᱮ ᱯᱮ ᱛᱩᱞ ᱳᱰᱳᱠ ᱟᱠᱟᱫ ᱞᱮᱭᱟ ᱩᱱᱤᱴᱟᱜ ᱜᱮ ᱞᱮ ᱥᱤᱸᱫᱩᱨ ᱟᱭᱟ ᱾ ᱱᱩᱭ ᱫᱚ ᱵᱟᱞᱮ ᱥᱤᱸᱫᱩᱨ ᱟᱭᱟ ᱾ ᱟ.ᱜᱩᱭᱮᱯᱮ ᱩᱱᱤ ᱠᱚᱲᱟ ᱥᱮ ᱠᱩᱲᱤ ᱠᱟᱱᱟᱭ ᱩᱱᱤ ᱜᱮᱞᱮ ᱤᱫᱤᱭᱮᱭᱟ ᱾ ᱦᱚᱯᱚᱱ ᱢᱟ.ᱭ ᱨᱮᱱ ᱟᱡ ᱫᱟ.ᱭ ᱫᱚ ᱦᱚᱯᱚᱱ ᱛᱩᱲᱤᱭ ᱮᱨᱮ ᱠᱟᱱᱟ, ᱟᱨ ᱫᱟ.ᱣᱲᱟ ᱪᱮᱛᱟᱱ ᱨᱮ ᱢᱮᱱᱟᱭ ᱦᱚᱯᱚᱱ ᱢᱟ.ᱭ ᱥᱮᱫ ᱟᱨ ᱢᱤᱫ ᱫᱷᱟᱣ ᱫᱚ ᱵᱟ.ᱨᱭᱟ.ᱛ ᱠᱚ ᱥᱮᱫ ᱮ ᱠᱚᱭᱚᱜ ᱮᱫᱟ ᱾ ᱪᱮᱫ ᱪᱮᱠᱟ ᱟᱠᱟᱱᱟ ᱱᱚᱣᱟ ᱠᱟᱛᱷᱟ ᱫᱚ ᱯᱩᱥᱴᱟ.ᱣ ᱥᱟ.ᱦᱤᱡ ᱫᱚ ᱵᱟᱭ ᱵᱟᱰᱟᱭ ᱫᱟᱲᱮᱭᱟᱜ ᱠᱟᱱᱟ ᱾ ᱠᱩᱲᱤ ᱜᱤᱫᱽᱨᱟᱹ ᱟᱜ ᱵᱟᱯᱞᱟ ᱟᱭᱳ ᱵᱟᱵᱟ ᱫᱚ ᱵᱟᱠᱳ ᱧᱮᱞ ᱛᱮ ᱦᱚᱯᱚᱱ ᱢᱟ.ᱭ ᱟᱡ ᱵᱟᱵᱟ ᱫᱚ ᱚᱲᱟᱜ ᱨᱮ ᱢᱮᱱᱟᱭᱟ ᱾ ᱚᱱᱟ ᱛᱮ ᱵᱟᱭ ᱵᱟᱰᱟᱭ ᱡᱚᱝ ᱠᱟᱱᱟ ᱪᱮᱫ ᱪᱮᱠᱟ ᱟᱠᱟᱱᱟ ᱾ ᱦᱚᱯᱚᱱ ᱢᱟ.ᱭ ᱟᱡ ᱛᱮᱭᱟᱝ ᱫᱚ ᱞᱚᱴᱟ ᱫᱟᱜ ᱥᱟᱵ ᱠᱟᱛᱮ ᱜᱮ ᱚᱲᱟᱜ ᱵᱟᱠᱷᱳᱞ ᱥᱮᱫ ᱞᱮ ᱵᱚᱞᱚᱭᱮᱱᱟ ᱾ ᱦᱚᱧᱦᱟᱨ ᱛᱮᱫ ᱮ ᱢᱮᱛᱟᱭ ᱠᱟᱱᱟ – ᱵᱟᱵᱟ ᱫᱮᱞᱟ ᱦᱤᱡᱩᱜ ᱵᱮᱱ, ᱟᱸᱡᱚᱢ ᱵᱮᱱ ᱪᱮᱫ ᱪᱮᱠᱟ ᱟᱠᱟᱱᱟ ᱾ ᱵᱟᱯᱞᱟ ᱵᱟᱝ ᱦᱳᱭᱳᱜ ᱠᱟᱱᱟ ᱾ ᱵᱟ.ᱨᱭᱟ.ᱛ ᱠᱚ ᱡᱟᱶᱟᱭ ᱵᱟᱝ ᱠᱚ ᱜᱷᱚᱲᱟᱭᱮ ᱠᱟᱱᱟ ᱾ ᱦᱚᱯᱚᱱ ᱢᱮ.ᱭ ᱟᱡ ᱵᱟᱵᱟ ᱫᱚ ᱟ.ᱴᱩ ᱯᱟ.ᱴᱩ ᱚᱲᱟᱜ ᱠᱷᱚᱱ ᱪᱷᱟᱴᱠᱟ ᱛᱮᱭ ᱥᱚᱦᱚᱨ ᱥᱮᱴᱮᱨᱮᱱᱟ ᱾

ᱦᱚᱯᱚᱱ ᱢᱟ.ᱭ ᱫᱚ ᱫᱟ.ᱣᱲᱟᱨᱮ ᱫᱩᱲᱩᱵ ᱠᱟᱛᱮ ᱪᱮᱫ ᱜᱮ ᱵᱟᱝ ᱨᱚᱲ ᱠᱟᱛᱮ ᱦᱚᱸ ᱡᱚᱛᱚ ᱠᱟᱛᱷᱟᱭ ᱟᱸᱡᱚᱢ ᱮᱫᱟ ᱟᱨ ᱵᱩᱨᱥᱤ ᱥᱮᱸᱜᱮᱞ ᱞᱮᱠᱟ ᱡᱤᱣᱤ ᱞᱚᱜ ᱠᱟᱱ ᱛᱟᱭᱟ ᱾ ᱫᱟ.ᱣᱲᱟ. ᱪᱮᱛᱟᱱ ᱫᱮᱡᱚᱜ ᱞᱟᱦᱟ ᱫᱚᱭ ᱨᱟᱜ ᱮᱫᱟ ᱰᱟ ᱠᱟᱱᱟ ᱟᱭᱳ ᱵᱟᱵᱟ ᱥᱚᱦᱟᱜ ᱫᱩᱞᱟ.ᱲ ᱪᱷᱟᱰᱟᱣ ᱠᱷᱟ.ᱛᱤᱨ ᱟᱨ ᱫᱟ.ᱣᱲᱟ. ᱨᱮ ᱫᱩᱲᱩᱵ ᱠᱟᱛᱮᱫ ᱫᱚᱭ ᱨᱟᱜ ᱮᱫᱟ ᱱᱚᱣᱟ ᱢᱚᱱᱮ ᱠᱟᱛᱮ ᱡᱮ – ᱟᱭᱟᱜ ᱫᱚ ᱢᱚᱞᱚᱝ ᱵᱟ.ᱲᱤᱡ ᱜᱮᱭᱟ, ᱢᱚᱞᱚᱝ ᱦᱚᱨᱟᱥᱤ ᱨᱮ ᱥᱤᱸᱫᱩᱨ ᱵᱟᱝ ᱧᱩᱨ ᱠᱟᱛᱮ ᱟᱭᱟᱜ ᱢᱚᱞᱚᱝ ᱫᱚ ᱠᱚᱞᱚᱝ ᱠᱚ ᱜᱮᱭᱟ ᱡᱟᱱᱤᱡ ᱾ ᱦᱚᱯᱚᱱ ᱢᱟ.ᱭ ᱮ ᱢᱮᱱ ᱮᱫᱟ – ᱚᱠᱚᱭ ᱵᱷᱟᱞᱟ ᱪᱮᱫ ᱠᱚ ᱪᱮᱠᱟ ᱠᱮᱫᱟ? ᱚᱠᱚᱭ ᱫᱚ ᱤᱧᱨᱮᱱ ᱵᱟ.ᱫᱤᱭ ᱛᱮᱸᱜᱳ ᱟᱠᱟᱱᱟ ᱾ ᱤᱧᱟᱜ ᱵᱟ.ᱲᱤᱡ ᱦᱳᱭᱳᱜ ᱞᱮᱠᱟ ᱫᱚ ᱪᱟᱜ ᱯᱮ ᱠᱟ.ᱢᱤ ᱮᱫᱟ ? ᱠᱩᱫ ᱠᱩᱫ ᱮ ᱨᱟᱜ ᱮᱫᱟ, ᱦᱚᱨᱤ ᱵᱤᱠᱚᱞ ᱡᱤᱣᱤ ᱫᱚ ᱞᱚᱜ ᱠᱟᱱ ᱛᱟᱭᱟ ᱾

ᱦᱚᱯᱚᱱ ᱢᱟ.ᱭ ᱟᱡ ᱢᱟᱨᱟᱝ ᱫᱟ.ᱭ ᱫᱚ ᱦᱚᱯᱚᱱ ᱢᱟ.ᱭ ᱥᱮᱫ ᱛᱩᱲᱤᱭ ᱨᱮ ᱮᱫ ᱜᱮᱭᱟ ᱾ ᱚᱠᱚᱭ ᱪᱮᱫ ᱠᱟᱛᱷᱟ ᱦᱚᱸ ᱵᱟᱠᱚ ᱟᱸᱡᱚᱢ ᱮᱫ ᱛᱮ ᱪᱮᱫ ᱦᱚᱸ ᱵᱟᱭ ᱵᱩᱡᱷᱟ.ᱣ ᱫᱟᱲᱮᱭᱟᱜ ᱠᱟᱱᱟ ᱾ ᱥᱮᱴᱮᱨ ᱟᱠᱟᱱ ᱠᱚ ᱟᱫᱚᱢ ᱦᱚᱲ ᱠᱚᱣᱟᱜ ᱢᱚᱪᱟ ᱠᱷᱚᱱ ᱟᱸᱡᱚᱢ ᱠᱮᱫᱟᱭ, ᱵᱷᱟ.ᱨᱭᱟ.ᱛ ᱠᱚ ᱫᱚ ᱞᱮᱞᱦᱟ ᱜᱮᱭᱟ ᱾ ᱧᱮᱧᱮᱞ ᱜᱮ ᱵᱟᱠᱳ ᱧᱮᱧᱮᱞ ᱠᱟᱱᱟ ᱾ ᱨᱟᱭᱵᱟᱨ ᱟᱣᱨᱤᱭ ᱳᱰᱳᱠᱚᱜ ᱨᱮᱜᱮ, ᱟᱣᱨᱤᱭ ᱢᱮᱛᱟ ᱠᱚᱣᱟ ᱛᱩᱞᱮ ᱯᱮ ᱢᱮᱱ ᱛᱮ, ᱟᱨ ᱮᱴᱟᱜ ᱦᱚᱲᱟᱜ ᱠᱟᱛᱷᱟ ᱛᱮ ᱠᱚ ᱛᱩᱞ ᱟᱠᱟᱫᱮᱭᱟ, ᱟᱨ ᱠᱚ ᱡᱷᱩᱠᱚᱜ ᱠᱟᱱᱟ ᱾ ᱥᱮᱫᱟᱭ ᱠᱷᱚᱱ ᱱᱚᱝᱠᱟᱱ ᱟ.ᱨᱤ ᱪᱟ.ᱞᱤ ᱫᱚ ᱢᱮᱱᱟᱜ ᱜᱮᱭᱟ, ᱢᱚᱡᱟ ᱴᱷᱚᱠᱟᱣ ᱠᱚᱣᱟ ᱠᱚ ᱾ ᱱᱚᱣᱟ ᱫᱚ ᱱᱟᱣᱟ ᱟ.ᱨᱤ ᱫᱚ ᱵᱟᱝ ᱠᱟᱱᱟ ᱾ ᱥᱮᱫᱟᱭ ᱦᱤᱞᱳᱜ ᱠᱷᱚᱱ ᱦᱮᱡ ᱦᱤᱡᱩᱜ ᱠᱟᱱ ᱜᱮᱭᱟ ᱾

ᱦᱚᱯᱚᱱ ᱢᱟ.ᱭ ᱟᱡ ᱵᱟᱵᱟ ᱪᱷᱟᱴᱠᱟ ᱛᱮ ᱥᱮᱴᱮᱨ ᱛᱮ ᱫᱚ ᱠᱟ.ᱣᱨᱟ.ᱣ ᱜᱮᱭ ᱟᱸᱡᱚᱢ ᱮᱫᱟ, ᱚᱠᱟ ᱨᱟᱲ ᱜᱮ ᱵᱟᱭ ᱵᱩᱡᱷᱟ.ᱣ ᱮᱫᱟ ᱾ ᱵᱷᱟ.ᱨᱭᱟ.ᱛ ᱠᱚ ᱥᱮᱫ ᱠᱚᱭᱚᱜ ᱨᱮᱫᱚᱭ ᱧᱮᱞ ᱠᱚ ᱱᱟᱣᱟ ᱡᱟᱶᱟᱭ ᱫᱚᱭ ᱫᱟ.ᱲ ᱟᱠᱟᱫᱟ, ᱛᱟᱞᱟ ᱠᱩᱞᱦᱤ ᱨᱮᱫᱚ ᱵᱟ.ᱱᱩᱜᱮᱭᱟ ᱾ ᱦᱚᱯᱚᱱ ᱢᱟ.ᱭ ᱟᱡ ᱵᱟᱵᱟ ᱠᱩᱞᱤ ᱵᱟᱲᱟ ᱠᱟᱛᱮᱭ ᱵᱟᱰᱟᱭ ᱠᱮᱫᱟ ᱵᱟᱝ ᱢᱟ ᱢᱤᱫ ᱴᱟᱝ ᱠᱚᱲᱟ ᱜᱤᱫᱽᱨᱟᱹ ᱥᱟᱥᱟᱝ ᱞᱩᱜᱽᱲᱤᱡ ᱛᱮ ᱯᱚᱴᱚᱢ ᱠᱟᱛᱮ ᱠᱚ ᱛᱩᱞ ᱳᱰᱳᱠ ᱠᱮᱫᱮᱭᱟ ᱾ ᱩᱱ ᱚᱠᱛᱚ ᱩᱱᱤ ᱠᱚᱲᱟ ᱜᱤᱫᱽᱨᱟᱹ ᱫᱚ ᱡᱷᱚᱲᱟ ᱠᱷᱚᱱ ᱫᱚᱱ ᱟᱬᱜᱳ ᱠᱟᱛᱮᱫ ᱟᱨ ᱠᱚ ᱦᱚᱲ ᱛᱟᱞᱟ ᱨᱮᱭ ᱫᱟ.ᱲ ᱢᱮᱥᱟ ᱞᱮᱱᱟ ᱾ ᱚᱱᱟ ᱛᱮ ᱱᱟᱣᱟ ᱡᱟᱶᱟᱭ ᱫᱚᱭ ᱢᱮᱱ ᱮᱫᱟ ᱤᱧ ᱫᱚ ᱯᱮ ᱴᱷᱚᱠᱟᱣ ᱟᱠᱟᱫᱤᱧᱟ, ᱵᱟ.ᱦᱩ ᱫᱚ ᱵᱟᱝ ᱤᱧ ᱥᱤᱸᱫᱩᱨ ᱟᱭᱟ ᱢᱮᱱ ᱠᱟᱛᱮᱫ ᱜᱮ ᱡᱟᱶᱟᱭ ᱠᱚᱲᱟ ᱫᱚ ᱴᱮᱨᱟᱠ ᱜᱟ.ᱰᱤ ᱨᱮᱭ ᱫᱩᱲᱩᱵ ᱟᱠᱟᱱᱟ ᱾ ᱥᱟᱱᱟᱢ ᱠᱟᱛᱷᱟ ᱵᱟᱰᱟᱭ ᱠᱟᱛᱮᱫ ᱦᱚᱯᱚᱱ ᱢᱟ.ᱭ ᱟᱡ ᱵᱟᱵᱟ ᱫᱚ ᱱᱟᱣᱟ ᱡᱟᱶᱟᱭ ᱴᱷᱮᱱ ᱪᱟᱞᱟᱣ ᱠᱟᱛᱮ ᱛᱤᱱᱟᱹᱜ ᱮ ᱱᱮᱦᱚᱨ ᱟᱫᱮᱭᱟ ᱾ ᱢᱮᱛᱟᱭ ᱠᱟᱱᱟᱭ ᱫᱮᱞᱟ ᱵᱟᱵᱟ ᱦᱤᱡᱩᱜ ᱵᱮᱱ, ᱡᱟᱦᱟ ᱜᱮ ᱦᱳᱭ ᱟᱠᱟᱱ ᱥᱤᱸᱫᱩᱨ ᱫᱟᱱ ᱫᱚ ᱦᱳᱭ ᱚᱪᱚ, ᱟᱵᱮᱱ ᱞᱟ.ᱜᱤᱫ ᱫᱟ.ᱣᱲᱟ. ᱨᱮ ᱦᱚᱯᱚᱱ ᱮᱨᱟᱧ ᱛᱩᱞ ᱠᱟᱛᱮ ᱠᱚ ᱥᱮᱯᱮᱧ ᱟᱠᱟᱫᱮᱭᱟ ᱾ ᱟᱞᱤᱧᱟᱜ ᱠᱟ.ᱭ ᱫᱚ ᱵᱟᱝ ᱠᱟᱱᱟ, ᱦᱚᱯᱚᱱ ᱮᱨᱟᱧ ᱟᱜ ᱦᱚᱸ ᱚᱠᱟ ᱠᱟ.ᱭ ᱦᱚᱸ ᱵᱟ.ᱱᱩᱜ ᱛᱟᱭᱟ ᱾ ᱩᱱᱤ ᱞᱟ.ᱜᱤᱫ ᱱᱟᱥᱮ ᱵᱷᱟ.ᱵᱤᱛᱚᱜ ᱵᱮᱱ ᱾ ᱟᱞᱳ ᱵᱮᱱ ᱥᱟᱥᱟᱝ ᱪᱷᱟ.ᱰᱣᱤᱭᱮᱭᱟ ᱾ ᱫᱮᱞᱟ ᱥᱮ ᱦᱤᱡᱩᱜ ᱵᱮᱱ ᱟᱵᱮᱱᱟᱜ ᱥᱟᱱᱟᱢ ᱠᱟᱛᱷᱟ ᱛᱟᱭᱚᱢ ᱛᱮᱞᱤᱧ ᱟᱸᱡᱚᱢᱟ ᱾ ᱱᱟᱶᱟ ᱡᱟᱶᱟᱭ ᱜᱮᱭ ᱨᱚᱲ ᱨᱩᱣᱟᱹᱲ ᱠᱮᱫᱟ – ᱵᱟᱝ ᱟᱞᱤᱧ ᱫᱚ ᱵᱟᱝ ᱞᱤᱧ ᱪᱟᱞᱟᱜ-ᱟ ᱾ ᱟᱞᱤᱧ ᱠᱚ ᱚᱯᱚᱢᱟᱱ ᱟᱠᱟᱫ ᱞᱤᱧᱟ ᱾ ᱟᱵᱮᱱᱟᱜ ᱦᱚᱸ ᱠᱟ.ᱭ ᱢᱮᱱᱟᱜ-ᱟ ᱾ ᱟᱨ ᱵᱟᱝ ᱠᱷᱟᱱ ᱵᱟ.ᱨᱭᱟ.ᱛ ᱠᱚ ᱵᱷᱚᱡ ᱯᱮ ᱮᱢ ᱠᱮᱠᱚᱣᱟ ᱾ ᱱᱚᱣᱟ ᱫᱚ ᱦᱚᱯᱚᱱ ᱮᱨᱟ ᱵᱟᱝ ᱮᱢᱚᱜ ᱨᱮᱭᱟᱜ ᱪᱟᱞ ᱠᱟᱱᱟ ᱾ ᱦᱚᱯᱚᱱ ᱢᱟ.ᱭ ᱟᱡ ᱵᱟᱵᱟᱭ ᱛᱮᱞᱟ ᱨᱩᱣᱟ.ᱲ ᱠᱮᱫᱟ – ᱵᱟᱝ ᱟ ᱵᱟᱝ ᱵᱟᱵᱟ ᱵᱟᱝ, ᱚᱱᱟ ᱠᱟᱛᱷᱟ ᱫᱚ ᱵᱟᱝ ᱠᱟᱱᱟ ᱾ ᱟᱵᱮᱱ ᱫᱚ ᱵᱷᱩᱞ ᱵᱮᱱ ᱵᱩᱡᱷ ᱮᱫᱟ ᱾ ᱮᱴᱟᱜᱟᱜ ᱠᱟᱛᱷᱟ ᱫᱚ ᱛᱟᱭᱚᱢ ᱛᱮᱞᱤᱧ ᱟᱸᱡᱚᱢ ᱮᱫ ᱛᱟᱵᱮᱱᱟ ᱾ ᱱᱤᱨ ᱫᱚ ᱦᱚᱯᱚᱱ ᱮᱨᱟᱧ ᱥᱤᱸᱫᱩᱨ ᱛᱮ ᱵᱩᱸᱫᱤᱭᱮᱵᱮᱱ, ᱫᱟ.ᱣᱲᱟ. ᱪᱮᱛᱟᱱ ᱨᱮ ᱫᱩᱲᱩᱵ ᱠᱟᱛᱮᱭ ᱨᱟ ᱨᱟᱜ ᱠᱟᱱᱟ ᱾ ᱟᱵᱮᱱ ᱵᱟᱝᱠᱷᱟᱱ ᱩᱱᱤᱭᱟᱜ ᱢᱮᱫ ᱫᱟᱜ ᱫᱚ ᱵᱟᱝᱞᱮ ᱞᱟᱲᱮᱡ ᱠᱮᱭᱟ ᱵᱟᱵᱟ ᱾

ᱦᱚᱯᱚᱱ ᱢᱟ.ᱭ ᱢᱤᱫ ᱜᱷᱚᱱᱴᱟ ᱜᱟᱱ ᱠᱚ ᱛᱩᱞ ᱫᱚᱦᱚ ᱟᱠᱟᱫᱮᱭᱟ ᱱᱟᱣᱟ ᱡᱟᱶᱟᱭ ᱨᱩᱣᱟ.ᱲ ᱟᱥ ᱛᱮ ᱾ ᱦᱚᱯᱚᱱ ᱢᱟ.ᱭ ᱮ ᱨᱟᱜ ᱮᱫᱟ ᱦᱩᱨᱤ ᱵᱤᱠᱚᱞ ᱾ ᱟᱛᱳ ᱨᱮᱱ ᱥᱟᱱᱟᱢ ᱯᱮᱲᱟ ᱠᱚ ᱦᱟᱭ ᱪᱚᱜ ᱮᱫᱟ ᱟᱨ ᱠᱚ ᱢᱮᱱ ᱮᱫᱟ ᱱᱚᱣᱟ ᱫᱚ ᱥᱮᱫᱟᱭ ᱟ.ᱨᱤ ᱪᱟ.ᱞᱤ ᱜᱮ ᱠᱚ ᱠᱟ.ᱢᱤ ᱟᱠᱟᱫᱟ ᱾ ᱱᱳᱠᱳ ᱵᱟ.ᱨᱭᱟ.ᱛ ᱠᱚ ᱜᱮ ᱟ.ᱰᱤ ᱠᱚ ᱳᱸᱰᱳᱜ ᱜᱮᱭᱟ ᱾ ᱥᱟᱨ ᱥᱟ.ᱜᱩᱱ ᱵᱟᱯᱞᱟ ᱨᱮᱫᱚ ᱟ.ᱰᱤ ᱞᱮᱠᱟᱱ ᱞᱤᱜᱤᱵᱷᱤᱜᱤ ᱦᱮᱱᱟᱜ-ᱟ ᱥᱮᱫᱟᱭ ᱦᱤᱞᱳᱜ ᱠᱷᱚᱱ ᱜᱮ ᱾ ᱪᱟᱜ ᱪᱚᱠᱚ ᱦᱤᱲᱤᱧ ᱮᱫᱟ ᱴᱚᱭᱟ ᱵᱟ.ᱨᱭᱟ.ᱛ ᱫᱚ ᱾ ᱨᱟᱭᱵᱟᱨᱤᱡ ᱟᱣᱨᱤᱭ ᱳᱰᱳᱠᱚᱜ ᱨᱮᱜᱮ ᱠᱚ ᱜᱷᱚᱲᱟ ᱟᱠᱟᱫᱮᱭᱟ ᱾ ᱦᱩᱦᱤ ᱠᱟᱛᱷᱟ ᱫᱚ ᱠᱚ ᱦᱤᱲᱤᱧ ᱟᱠᱟᱫᱟ ᱾