NIT ᱫᱩᱨᱜᱟᱯᱩᱨ ᱨᱮ ᱯᱩᱭᱞᱩ ᱥᱮᱨᱢᱟ ᱨᱮᱱᱟᱜ ᱢᱤᱫ ᱡᱷᱚᱞᱚᱠ
ᱤᱧ ᱜᱤᱫᱽᱨᱟᱹᱧ ᱛᱟᱦᱮᱸ ᱠᱟᱱ ᱚᱠᱛᱚ ᱟᱭᱳ ᱵᱟᱵᱟ ᱛᱤᱠᱤᱱ ᱯᱟᱛᱟ ᱡᱟᱛᱨᱟ ᱟᱨ ᱵᱮᱦᱟ ᱵᱟᱯᱞᱟ ᱞᱮᱠᱟᱱ ᱜᱟᱫᱮᱞ ᱨᱮ
ᱟᱠᱚ ᱨᱤᱱ ᱜᱤᱫᱽᱨᱟᱹ ᱠᱚᱣᱟᱜ ᱚᱞᱚᱜ ᱯᱟᱲᱦᱟᱣ ᱤᱫᱤ ᱠᱟᱛᱮ ᱯᱮᱲᱟ ᱯᱟᱹᱦᱬᱟᱹ ᱠᱚ ᱥᱟᱶ ᱨᱚᱯᱚᱲ ᱤᱧ ᱟᱸᱡᱚᱢ ᱟᱠᱟᱫ
ᱠᱤᱱᱟ᱾ ᱛᱟᱱᱟᱞᱟ ᱥᱮᱪᱮᱫ ᱠᱷᱚᱱ ᱮᱦᱚᱵ ᱠᱟᱛᱮ ᱪᱮᱛᱟᱱ ᱛᱟᱱᱟᱞᱟ ᱥᱮᱪᱮᱫ ᱨᱮᱱᱟᱜ ᱡᱤᱭᱚᱱ ᱰᱟᱦᱟᱨ ᱥᱟᱶᱛᱮ
ᱟᱥᱩᱞᱚᱜ ᱨᱮᱱᱟᱜ ᱦᱚᱨ ᱰᱟᱦᱟᱨ ᱤᱫᱤ ᱠᱟᱛᱮ ᱟᱹᱰᱤ ᱜᱮ ᱟᱭᱳ ᱵᱟᱵᱟ ᱠᱚ ᱨᱚᱯᱚᱲ ᱛᱟᱦᱮᱸᱱ᱾ᱱᱟᱶᱟ ᱱᱟᱶᱟ ᱥᱟᱬᱮᱥ
ᱪᱮᱛᱟᱱ ᱨᱮ ᱯᱟᱲᱦᱟᱣ ᱥᱟᱶᱛᱮ ᱱᱟᱶᱟ ᱱᱟᱶᱟ ᱡᱟᱭᱜᱟ ᱨᱮᱱᱟᱜ ᱦᱚᱭ ᱦᱤᱥᱤᱫ ᱪᱮᱛᱟᱱ ᱨᱮ ᱥᱮᱪᱮᱫ ᱦᱟᱛᱟᱣ ᱠᱟᱛᱮ
ᱫᱷᱟᱹᱨᱛᱤ ᱨᱮ ᱢᱟᱹᱱᱢᱤ ᱞᱮᱠᱟ ᱛᱤᱸᱜᱩᱱ ᱞᱟᱹᱜᱤᱫ ᱱᱟᱯᱟᱭ ᱜᱟᱞᱚᱪ ᱟᱭᱳ ᱵᱟᱵᱟ ᱟᱨ ᱥᱟᱶᱛᱮᱱ ᱠᱚᱣᱟᱜ ᱟᱲᱟᱝ ᱫᱚ
ᱯᱟᱞᱮ ᱞᱩᱛᱩᱨ ᱨᱮ ᱥᱮ ᱦᱟᱛᱟᱝ ᱨᱮ ᱫᱚ ᱵᱟᱝ ᱵᱚᱞᱚ ᱞᱮᱱᱟ ᱪᱤᱠᱟᱹᱛᱮ ᱩᱱ ᱚᱠᱛᱚ ᱢᱟ ᱤᱧ ᱤᱛᱩᱱ ᱟᱥᱲᱟ ᱨᱮᱱᱟᱜ
ᱨᱟᱹᱥᱠᱟᱹ ᱡᱚᱴᱟᱣ ᱠᱚ ᱥᱟᱶ ᱤᱧ ᱦᱟᱹᱴᱤᱧ ᱡᱚᱝ ᱠᱟᱱ ᱛᱟᱦᱮᱸᱱ ᱾ ᱚᱠᱛᱚ ᱯᱚᱞᱚᱢ ᱤᱫᱤ ᱮᱱᱟ, ᱢᱚᱱᱮᱨᱮ ᱫᱷᱟᱫᱚᱥ ᱟᱨ
ᱩᱭᱦᱟᱹᱨ ᱦᱮᱡ ᱮᱱᱟ ᱟᱭᱳ ᱵᱟᱵᱟ ᱠᱟᱛᱷᱟ… ᱛᱤᱱ ᱡᱷᱚᱜ ᱤᱧ ᱤᱱᱡᱤᱱᱤᱭᱚᱨᱤᱝ ᱵᱚᱞᱚᱱ ᱵᱤᱱᱤᱰ ᱨᱮ ᱴᱷᱟᱶ ᱤᱧ ᱟᱢᱮᱴ
ᱠᱮᱜᱼᱟ ᱾ ᱟᱹᱰᱤ ᱟᱹᱰᱤ ᱠᱟᱶᱱᱥᱮᱞ ᱛᱟᱭᱚᱢ ᱧᱩᱛᱩᱢᱟᱱ ᱡᱟᱹᱛᱤᱭᱟᱹᱨᱤ ᱵᱤᱨᱫᱟᱹᱜᱟᱲ ᱱᱮᱥᱱᱟᱞ ᱤᱱᱥᱴᱤᱪᱩᱴ ᱚᱯᱷ ᱴᱮᱠᱱᱚᱞᱚᱡᱤ, ᱫᱩᱨᱜᱟᱹᱯᱩᱨ ᱨᱮ ᱠᱚᱢᱯᱩᱴᱟᱨ ᱥᱟᱬᱮᱥ ᱪᱮᱛᱟᱱ ᱨᱮ ᱤᱧᱟᱜ ᱟᱸᱥ ᱞᱮᱠᱟᱛᱮ ᱥᱮᱪᱮᱫᱚᱜ ᱞᱟᱹᱜᱤᱫ ᱤᱧ ᱵᱷᱩᱨᱛᱤ ᱮᱱᱟ ᱾
ᱱᱟᱶᱟ ᱵᱤᱨᱫᱟᱹᱜᱟᱲ, ᱱᱟᱶᱟ ᱴᱷᱟᱶ, ᱱᱟᱶᱟ ᱱᱟᱶᱟ ᱡᱚᱴᱟᱣ, ᱱᱟᱶᱟ ᱦᱚᱭ ᱦᱤᱥᱤᱫ, ᱱᱟᱶᱟ ᱢᱚᱱᱮ ᱟᱨ ᱟᱸᱥ ᱤᱫᱤ ᱠᱟᱛᱮ
ᱨᱟᱹᱥᱠᱟᱹ ᱥᱟᱛᱞᱟᱜ ᱫᱷᱟᱫᱚᱥ ᱢᱚᱱᱮ ᱥᱟᱶᱛᱮ ᱥᱩᱴᱠᱮᱥ ᱨᱮ ᱞᱤᱡᱟᱹᱜ ᱞᱟᱯᱚᱜ ᱯᱚᱴᱚᱢ ᱠᱟᱛᱮ ᱟᱭᱳ ᱵᱟᱵᱟ ᱥᱟᱶ
ᱥᱮᱛᱟᱜ ᱨᱮᱞᱮ ᱥᱮᱴᱮᱨ ᱮᱱᱟ ᱮᱱᱹᱟᱤᱹᱴᱤᱹ, ᱫᱩᱨᱜᱟᱹᱯᱩᱨ ᱾ ᱠᱚᱞᱮᱡᱽ ᱜᱮᱴ ᱠᱷᱚᱱ ᱛᱤᱸᱜᱩ ᱠᱟᱛᱮᱧ ᱠᱚᱭᱚᱜ ᱠᱮᱫ ᱨᱮ
ᱧᱮᱞᱚᱜ ᱠᱟᱱᱟ ᱱᱟᱯᱟᱭ ᱦᱟᱹᱞᱤ ᱦᱟᱹᱨᱭᱟᱲ ᱫᱟᱨᱮ ᱞᱟᱨᱮ ᱠᱚ ᱛᱟᱞᱟᱨᱮ ᱟᱹᱰᱤ ᱪᱚᱨᱚᱠ ᱪᱚᱨᱚᱠ ᱵᱤᱞᱰᱤᱝ, ᱟᱹᱰᱤ ᱦᱟᱦᱟᱲᱟ
ᱜᱮ᱾ᱤᱧ ᱞᱮᱠᱟ ᱟᱨᱦᱚᱸ ᱟᱹᱰᱤ ᱜᱟᱱ ᱜᱤᱫᱽᱨᱟᱹ ᱠᱚᱞᱮᱡᱽ ᱜᱮᱴ ᱨᱮ ᱛᱤᱸᱜᱩ ᱠᱟᱛᱮ ᱦᱟᱦᱟᱲᱟ ᱥᱟᱛᱞᱟᱜ ᱠᱚ ᱠᱚᱭᱚᱜ ᱮᱫᱼᱟ
ᱟᱨ ᱯᱟᱞᱮ ᱤᱧ ᱞᱮᱠᱟ ᱜᱮ ᱠᱚ ᱩᱭᱦᱟᱹᱨ ᱮᱫᱼᱟ ᱡᱮ ᱱᱚᱶᱟ ᱥᱮᱪᱮᱫ ᱢᱟᱰᱣᱟ ᱜᱮ ᱢᱤᱫ ᱫᱤᱱ ᱱᱟᱯᱟᱭ ᱢᱟᱹᱱᱤ ᱵᱮᱱᱟᱣ
ᱟᱠᱚᱣᱟ᱾ᱧᱩᱛᱩᱢ ᱫᱟᱠᱷᱚᱞ ᱠᱟᱹᱢᱤ ᱦᱚᱸ ᱩᱱᱟᱹᱜ ᱜᱮ ᱟᱸᱴᱼᱟ ᱡᱮᱞᱮᱠᱟ ᱱᱤᱱᱤᱰ ᱥᱟᱹᱛ᱾ ᱵᱟᱨ ᱯᱮ ᱴᱟᱬᱟᱝ ᱨᱮᱭᱟᱜ
ᱫᱟᱠᱷᱚᱞ ᱰᱟᱦᱟᱨ ᱨᱮ ᱢᱤᱫ ᱴᱷᱚᱯ ᱫᱟᱜ ᱧᱩᱻ ᱞᱟᱹᱜᱤᱫ ᱚᱠᱛᱚ ᱵᱟᱝ ᱠᱚ ᱮᱢᱚᱜᱼᱟ᱾ ᱟᱭᱳ ᱵᱟᱵᱟ ᱵᱟᱦᱨᱮ ᱨᱮ ᱠᱚ
ᱫᱩᱲᱩᱵ ᱠᱟᱠᱚᱣᱟ᱾ᱨᱮᱸᱜᱮᱡ ᱛᱮᱛᱟᱝ ᱥᱟᱦᱟᱣ ᱠᱟᱛᱮ ᱛᱤᱱ ᱨᱮ ᱫᱟᱠᱷᱚᱞ ᱥᱟᱹᱛ ᱦᱩᱭᱩᱜᱼᱟ , ᱚᱱᱟᱜᱮ ᱟᱭᱳ
ᱵᱟᱵᱟ ᱠᱚᱸᱜ ᱞᱮᱠᱟ ᱠᱚ ᱠᱚᱭᱚᱜ ᱠᱟᱜᱼᱟ ᱾
ᱛᱤᱱ ᱨᱮ ᱫᱟᱠᱷᱚᱞ ᱥᱟᱹᱛ ᱮᱱᱟ, ᱩᱱ ᱮᱱᱟ ᱤᱧ ᱨᱤᱧ ᱟᱭᱳ ᱵᱟᱵᱟ ᱦᱚᱸ
ᱨᱮᱭᱟᱲ ᱠᱤᱱ ᱥᱟᱦᱮᱫ ᱨᱩᱣᱟᱹᱲ ᱞᱮᱫᱼᱟ ᱟᱨ ᱯᱟᱞᱮ ᱡᱚᱛᱚ ᱜᱤᱫᱽᱨᱟᱹ ᱨᱤᱱ ᱟᱭᱳ ᱵᱟᱵᱟ ᱦᱚᱸ ᱱᱚᱝᱠᱟ ᱜᱮ ᱠᱚ
ᱦᱟᱨᱠᱮᱛ ᱟᱠᱟᱱᱟ᱾ ᱡᱚᱛᱚ ᱜᱮ ᱠᱚ ᱞᱚᱜᱚᱱᱚᱜ ᱠᱟᱱᱟ ᱟᱨ ᱤᱧ ᱦᱚᱸ ᱚᱱᱠᱟ ᱜᱮ ᱞᱚᱜᱚᱱᱚᱜ ᱠᱟᱱᱟᱹᱧ᱾ ᱚᱱᱠᱟ ᱦᱟᱨᱠᱮᱛ
ᱛᱟᱞᱟᱨᱮ ᱫᱟᱠᱷᱚᱞ ᱤᱧ ᱥᱟᱹᱛ ᱠᱮᱫ ᱛᱟᱭᱚᱢ ᱯᱩᱭᱞᱩ ᱥᱮᱨᱢᱟ ᱠᱩᱲᱤ ᱜᱤᱫᱽᱨᱟᱹ ᱠᱚᱣᱟᱜ ᱦᱚᱥᱴᱮᱞ ᱤᱧ ᱥᱮᱱ
ᱮᱱᱟ ᱟᱭᱳ ᱵᱟᱵᱟ ᱥᱟᱶ ᱾ ᱵᱟᱨ ᱦᱚᱲ ᱥᱟᱦᱚᱵ ᱞᱮᱠᱟᱱ ᱛᱟᱦᱮᱸᱱ ᱴᱷᱟᱶ ᱦᱚᱸ ᱠᱚ ᱮᱢᱟ ᱫᱤᱧᱟ ᱦᱚᱥᱴᱮᱞ ᱨᱮ᱾ᱦᱚᱥᱴᱮᱞ
ᱫᱩᱣᱟᱹᱨ ᱨᱮᱜᱮ ᱣᱟᱨᱰᱮᱱ ᱮ ᱟᱛᱟᱝ ᱫᱟᱨᱟᱢ ᱠᱮᱫ ᱞᱮᱭᱟ᱾ ᱜᱤᱛᱤᱡ ᱯᱟᱨᱠᱚᱢ ᱟᱨ ᱚᱲᱟᱜ ᱱᱟᱥᱮ ᱥᱚᱻ ᱟᱴᱠᱟᱨᱚᱜ
ᱠᱟᱱ ᱛᱟᱦᱮᱸᱱ, ᱪᱮᱠᱟᱛᱮ ᱢᱤᱫ ᱵᱟᱨ ᱪᱟᱸᱫᱚ ᱚᱲᱟᱜ ᱵᱚᱸᱫᱽ ᱜᱮ ᱛᱟᱦᱮᱸ ᱠᱟᱱᱟ ᱾ ᱢᱮᱱᱠᱷᱟᱱ ᱚᱠᱚᱭ
ᱪᱤᱛᱟᱹᱨᱤᱭᱟᱹ ᱪᱚ ᱱᱟᱯᱟᱭ ᱪᱚᱨᱚᱠ ᱡᱚᱲ ᱪᱮᱬᱮ ᱠᱟᱸᱛ ᱨᱮᱭ ᱪᱤᱛᱟᱹᱨ ᱟᱠᱟᱫ ᱠᱤᱱᱟ, ᱧᱮᱞᱚᱜ ᱨᱮᱫᱚ ᱟᱹᱰᱤ ᱪᱚᱨᱚᱠ᱾ ᱤᱧ
ᱥᱟᱶ ᱟᱨ ᱢᱤᱫᱴᱟᱹᱝ ᱠᱩᱲᱤ ᱜᱤᱫᱽᱨᱟᱹ ᱠᱚ ᱮᱢᱟ ᱫᱮᱭᱟ ᱚᱱᱟ ᱚᱲᱟᱜ ᱨᱮ ᱟᱨ ᱩᱱᱤ ᱜᱮ ᱤᱧᱤᱡ ᱱᱟᱶᱟ ᱡᱚᱴᱟᱣ ᱫᱚ ᱯᱩᱭᱞᱩ
ᱫᱷᱟᱯ ᱨᱮ ᱾ ᱚᱱᱟ ᱠᱚ ᱥᱟᱹᱛ ᱮᱱ ᱛᱟᱭᱚᱢ ᱜᱮ ᱤᱧ ᱨᱤᱱ ᱟᱭᱳ ᱵᱟᱵᱟ ᱫᱚ ᱟᱹᱰᱤ ᱜᱮ ᱠᱤᱱ ᱩᱞᱟᱹᱥ ᱮᱱᱟ ᱟᱨ ᱨᱟᱹᱥᱠᱟᱹ
ᱥᱟᱛᱞᱟᱜ ᱨᱮᱭᱟᱲ ᱜᱮ ᱥᱟᱦᱮᱫ ᱠᱤᱱ ᱟᱲᱟᱜ ᱞᱮᱫᱼᱟ ᱾ ᱢᱮᱱᱠᱷᱟᱱ ᱵᱤᱴᱤ ᱯᱩᱱ ᱥᱮᱨᱢᱟ ᱞᱮᱠᱟ ᱦᱚᱥᱴᱮᱞ ᱨᱮ ᱛᱟᱦᱮᱸᱱ ᱟᱭ
ᱟᱹᱠᱤᱱ ᱠᱷᱚᱱ ᱥᱟᱦᱟ ᱨᱮ ᱚᱱᱟ ᱤᱫᱤ ᱠᱟᱛᱮ ᱱᱟᱥᱮ ᱠᱤᱱ ᱫᱷᱟᱫᱚᱥ ᱞᱮᱱᱟ ᱾ ᱱᱟᱯᱟᱭ ᱨᱮ ᱛᱟᱦᱮᱸ ᱠᱟᱛᱮ ᱵᱮᱥ ᱞᱮᱠᱟ
ᱚᱞ ᱯᱟᱲᱦᱟᱣ ᱠᱟᱛᱮ ᱢᱟᱹᱱᱢᱤ ᱞᱮᱠᱟ ᱵᱮᱱᱟᱣᱜ ᱢᱮ ᱛᱷᱩᱢ ᱠᱟᱛᱮ ᱤᱧ ᱨᱤᱱ ᱟᱭᱳ ᱵᱟᱵᱟ ᱤᱧ ᱵᱟᱹᱜᱤ ᱦᱚᱴᱚ ᱠᱟᱛᱮ
ᱡᱟᱱᱟᱢ ᱚᱲᱟᱜ ᱠᱤᱱ ᱨᱩᱣᱟᱹᱲ ᱮᱱᱟ᱾ ᱢᱮᱱᱠᱷᱟᱱ ᱯᱩᱭᱞᱩ ᱧᱤᱫᱟᱹ ᱫᱚ ᱵᱮᱥ ᱛᱮ ᱵᱟᱹᱧ ᱡᱟᱹᱯᱤᱫ ᱞᱮᱫᱼᱟ, ᱪᱮᱠᱟᱛᱮ
ᱡᱟᱱᱟᱢ ᱫᱤᱥᱚᱢ ᱨᱮ ᱤᱧ ᱵᱚᱭᱦᱟ ᱠᱚᱧ ᱩᱭᱦᱟᱹᱨ ᱠᱮᱫ ᱠᱚᱣᱟ, ᱡᱟᱦᱟᱸᱭ ᱥᱟᱶ ᱫᱚ ᱜᱷᱟᱱᱮ ᱞᱮᱛᱟᱲ ᱛᱟᱯᱟ ᱢᱟᱨ ᱮᱯᱮᱨᱦᱮᱸᱰᱮ ᱦᱩᱭ ᱜᱚᱫᱚᱜ ᱛᱟᱦᱮᱸᱫ ᱾
ᱤᱧ, ᱢᱟᱨᱟᱝ ᱦᱚᱲ ᱴᱷᱮᱱ ᱤᱧ ᱟᱸᱡᱚᱢ ᱟᱠᱟᱫᱼᱟ ᱠᱚᱞᱮᱡᱽ ᱫᱚ ᱱᱤᱡᱽ ᱟᱜ ᱦᱟᱛᱟᱝ ᱞᱟᱥᱮᱨ ᱞᱟᱹᱜᱤᱫ ᱟᱨ ᱢᱟᱹᱱᱢᱤ ᱞᱮᱠᱟ
ᱛᱤᱸᱜᱩᱱ ᱞᱟᱹᱜᱤᱫ ᱢᱤᱫ ᱴᱷᱟᱶ ᱠᱟᱱᱟ᱾ ᱟᱭᱢᱟ ᱞᱮᱠᱟᱱ ᱥᱟᱛᱟᱢ ᱪᱮᱛᱟᱱ ᱨᱮᱢ ᱵᱤᱰᱟᱹᱣᱟ ᱟᱭᱢᱟ ᱞᱮᱠᱟᱱ ᱟᱲᱟᱝ
ᱛᱮ᱾ ᱦᱟᱨᱟᱜ ᱨᱮᱱᱟᱜ ᱟᱭᱢᱟ ᱠᱩᱠᱢᱩ ᱥᱟᱶᱛᱮ ᱟᱯᱱᱟᱨ ᱟᱜ ᱞᱟᱹᱭ ᱞᱟᱠᱪᱟᱨ ᱵᱟᱧᱪᱟᱣ ᱠᱟᱛᱮ ᱫᱷᱟᱹᱨᱛᱤ ᱡᱟᱠᱟᱛ ᱨᱤᱱ
ᱡᱚᱴᱟᱣ ᱥᱟᱶ ᱛᱟᱦᱮᱸᱱ ᱫᱚ ᱢᱤᱫ ᱦᱟᱦᱟᱲᱟ ᱜᱮᱭᱟ᱾ ᱢᱟᱨᱟᱝ ᱦᱚᱲ ᱵᱮᱱᱟᱣᱜ ᱨᱮᱱᱟᱜ ᱟᱸᱥ ᱫᱚᱦᱚ ᱠᱟᱛᱮ ᱥᱟᱱᱟᱢ
ᱡᱟᱹᱛ ᱨᱤᱱ ᱡᱚᱴᱟᱣ ᱠᱚ ᱥᱟᱶ ᱱᱟᱯᱟᱭ ᱨᱮ ᱛᱟᱦᱮᱸᱱ ᱞᱟᱹᱜᱤᱫ ᱱᱚᱶᱟ ᱵᱤᱨᱫᱟᱹᱜᱟᱲ ᱫᱚ ᱢᱤᱫ ᱫᱟᱹᱭᱠᱟᱹ ᱠᱟᱱᱟ ᱾ ᱡᱮᱛᱮ ᱦᱚᱲ
ᱜᱮ ᱡᱤᱱᱤᱥ ᱟᱨ ᱥᱟᱢᱟᱱ ᱦᱚᱸ ᱟᱹᱰᱤ ᱜᱮ ᱠᱚ ᱟᱹᱜᱩ ᱛᱟᱨᱟ ᱟᱠᱟᱫᱼᱟ, ᱚᱱᱟ ᱠᱚ ᱡᱚᱛᱚᱱ ᱪᱮᱫᱚᱜ ᱥᱟᱶᱛᱮ ᱨᱮᱸᱜᱮᱡ
ᱨᱮ ᱡᱚᱢ ᱞᱟᱹᱜᱤᱫ ᱠᱷᱟᱹᱡᱟᱹᱲᱤ ᱞᱟᱹᱰᱩ ᱠᱚ ᱦᱚᱸ ᱠᱚ ᱟᱹᱜᱩ ᱟᱠᱟᱫᱼᱟ ᱾ ᱦᱚᱥᱴᱮᱞ ᱫᱟᱠᱟ ᱩᱛᱩ ᱱᱟᱯᱟᱭ
ᱟᱱᱟ, ᱢᱮᱱᱠᱷᱟᱱ ᱱᱟᱶᱟ ᱡᱟᱭᱜᱟ ᱠᱷᱟᱹᱛᱤᱨ ᱧᱩᱻ ᱫᱟᱜ ᱧᱟᱢ ᱟᱨ ᱛᱷᱟᱹᱨᱤ ᱜᱤᱛᱤᱞ ᱴᱷᱟᱶ ᱧᱟᱢ ᱫᱚ ᱯᱩᱭᱞᱩ ᱛᱮ
ᱟᱹᱰᱤ ᱜᱮ ᱢᱩᱥᱠᱤᱞ ᱮᱱᱟᱹᱧ ᱾ ᱥᱮᱛᱟᱜ ᱱᱟᱥᱛᱟ ᱡᱚᱢ ᱠᱟᱛᱮ ᱠᱚᱞᱮᱡᱽ ᱥᱮᱱᱚᱜ ᱦᱩᱭᱩᱜᱼᱟ᱾ ᱤᱛᱩᱱ ᱟᱥᱲᱟ ᱞᱮᱠᱟ
ᱩᱱᱤᱯᱷᱚᱨᱢ ᱠᱚ ᱫᱚ ᱵᱟᱹᱱᱩᱜᱼᱟ ᱟᱨ ᱯᱟᱲᱦᱟᱣ ᱫᱚ ᱘ᱹ᱑᱕ ᱴᱟᱲᱟᱝ ᱠᱷᱚᱱ ᱟᱹᱭᱩᱵ ᱕ᱹ᱓᱐ ᱦᱟᱹᱵᱤᱡ ᱦᱩᱭᱩᱜᱼᱟ ᱾
ᱛᱤᱠᱤᱱ ᱫᱟᱠᱟ ᱡᱚᱢ ᱪᱷᱩᱴᱤ ᱫᱚ ᱢᱤᱫ ᱜᱷᱚᱱᱴᱟ ᱾ ᱡᱮᱛᱮ ᱯᱨᱚᱯᱷᱮᱥᱚᱨ ᱠᱚ ᱱᱟᱶᱟ ᱜᱮᱭᱟ ᱟᱞᱮ ᱞᱟᱹᱜᱤᱫ ᱮᱱ ᱦᱚᱸ
ᱟᱠᱚ ᱥᱟᱶ ᱥᱮᱪᱮᱫ ᱤᱫᱤ ᱠᱟᱛᱮ ᱨᱚᱯᱚᱲ ᱫᱚ ᱟᱹᱰᱤ ᱱᱟᱯᱟᱭ ᱟᱱᱟ ᱾ ᱵᱟᱝ ᱠᱚ ᱟᱹᱲᱤᱥᱚᱜᱼᱟ ᱾
ᱱᱟᱯᱟᱭ ᱠᱚ ᱵᱩᱡᱷᱟᱹᱣ ᱟᱞᱮᱭᱟ ᱡᱮᱛᱮ ᱞᱮᱠᱟᱱ ᱟᱲᱟᱝ ᱛᱮ᱾ ᱯᱩᱭᱞᱩ ᱥᱮᱨᱢᱟ ᱠᱷᱟᱹᱛᱤᱨ ᱦᱚᱥᱴᱮᱞ ᱣᱟᱨᱰᱮᱱ ᱟᱞᱮᱭᱟᱜ ᱠᱚᱞᱮᱡᱽ ᱥᱮᱱᱚᱜ ᱟᱨ ᱨᱩᱣᱟᱹᱲ ᱫᱚᱭ ᱪᱟᱹᱨᱤᱛ ᱠᱟᱜᱼᱟ ᱾ ᱛᱟᱭᱚᱢ ᱢᱤᱫ ᱵᱟᱨ ᱦᱟᱯᱛᱟ ᱠᱷᱟᱱ ᱜᱮ ᱡᱮᱛᱮ ᱜᱤᱫᱽᱨᱟᱹ ᱜᱮ ᱠᱚᱞᱮᱡᱽ ᱨᱮᱱᱟᱜ ᱦᱚᱭ ᱦᱤᱥᱤᱫ ᱟᱨ ᱟᱹᱨᱤᱪᱟᱹᱞᱤ ᱠᱚ ᱵᱟᱰᱟᱭ ᱠᱮᱫ ᱠᱷᱟᱱ ᱟᱹᱰᱤ ᱨᱟᱹᱥᱠᱟᱹ ᱠᱚ ᱟᱴᱠᱟᱨ ᱠᱮᱫᱼᱟ᱾ ᱛᱟᱦᱮᱸᱱ ᱰᱟᱦᱟᱨ,
ᱦᱚᱨᱚᱜ ᱵᱟᱸᱫᱮ ᱥᱟᱡᱽ ᱥᱟᱯᱲᱟᱣ ᱡᱚᱛᱚ ᱜᱮ ᱪᱚᱞᱚᱱ ᱜᱮᱭᱟ, ᱢᱟᱱᱟ ᱵᱟᱝᱼᱟ ᱾ ᱢᱚᱱ ᱠᱩᱥᱤ ᱡᱚᱴᱟᱣ ᱠᱚ ᱥᱟᱶ ᱡᱚᱢ
ᱟᱨ ᱵᱮᱰᱨᱩᱢ ᱡᱚᱴᱟᱣ ᱛᱩᱞᱩᱡ ᱱᱟᱱᱟ ᱦᱩᱱᱟᱹᱨ ᱨᱚᱯᱚᱲ ᱟᱛᱮ ᱚᱠᱛᱚ ᱠᱷᱮᱢᱟᱣ ᱤᱫᱤᱭᱮᱱᱟ ᱾ ᱫᱮᱥ ᱫᱤᱥᱚᱢ ᱨᱤᱱ
ᱥᱟᱱᱛᱟᱲ ᱜᱤᱫᱽᱨᱟᱹ ᱠᱚ ᱥᱟᱶ ᱧᱟᱯᱟᱢ ᱟᱨ ᱨᱚᱯᱚᱲ ᱢᱤᱫ ᱦᱟᱦᱟᱲᱟ ᱟᱨ ᱟᱹᱰᱤ ᱢᱚᱡᱽ ᱟᱴᱠᱟᱨᱚᱜᱼᱟ ᱾ ᱤᱛᱩᱱ ᱟᱥᱲᱟ
ᱨᱮᱢᱟ ᱤᱧ ᱜᱮ ᱯᱟᱹᱨᱩᱠᱷᱤᱭᱟᱹ ᱢᱮᱱᱛᱮᱧ ᱵᱟᱰᱟᱭ ᱞᱮᱱᱟ, ᱢᱮᱱᱠᱷᱟᱱ ᱱᱚᱶᱟ ᱠᱚᱞᱮᱡᱽ ᱨᱮᱢᱟ ᱟᱭᱢᱟ ᱞᱮᱠᱟᱱ
ᱯᱟᱹᱨᱩᱠᱷᱤᱭᱟᱹ ᱟᱨ ᱵᱟᱰᱚᱦᱤ ᱢᱮᱱᱟᱜ ᱠᱚᱣᱟ, ᱡᱟᱦᱟᱸ ᱫᱚ ᱢᱤᱫ ᱪᱮᱫᱚᱜ ᱟᱱ ᱜᱩᱱ ᱠᱟᱱᱟ ᱾ ᱚᱱᱠᱟᱱ ᱜᱩᱱ ᱟᱱ
ᱡᱚᱴᱟᱣ ᱠᱚ ᱛᱩᱞᱩᱡ ᱤᱧ ᱱᱟᱥᱮᱧ ᱵᱚᱛᱚᱨ ᱮᱱᱟ, ᱮᱱ ᱦᱚᱸ ᱩᱱᱠᱩ ᱥᱟᱶ ᱢᱤᱫ ᱛᱮ ᱛᱟᱲᱟᱢ ᱞᱟᱹᱜᱤᱫ ᱤᱧ ᱨᱤᱠᱟᱹ
ᱠᱮᱫᱼᱟ᱾ ᱯᱟᱲᱦᱟᱣ ᱦᱚᱸ ᱠᱩᱨᱩᱢᱩᱴᱩ ᱠᱮᱫᱼᱟᱹᱧ ᱾ ᱫᱤᱱᱥᱟᱨᱟ ᱟᱹᱰᱤ ᱞᱮᱠᱟᱱ ᱠᱟᱛᱷᱟ ᱠᱚ ᱨᱚᱯᱚᱲ ᱛᱟᱞᱟ ᱨᱮ ᱟᱹᱭᱩᱵ ᱫᱚ
ᱟᱭᱳ ᱵᱟᱵᱟ ᱥᱟᱶ ᱨᱚᱯᱚᱲᱚᱜ ᱨᱮᱱᱟᱜ ᱫᱟᱣ ᱦᱚᱸ ᱢᱮᱱᱟᱜ ᱜᱮ ᱛᱟᱞᱮᱭᱟ ᱾ ᱩᱱ ᱨᱮ ᱢᱚᱱᱮ ᱨᱮᱱᱟᱜ ᱦᱟᱨᱠᱮᱛ,
ᱥᱟᱥᱮᱛ ᱟᱭᱳ ᱵᱟᱵᱟ ᱴᱷᱮᱱ ᱞᱮ ᱥᱚᱫᱚᱨᱼᱟ ᱾ ᱟᱭᱳ ᱵᱟᱵᱟ ᱫᱚ ᱠᱷᱟᱹᱞᱤ ᱯᱟᱲᱦᱟᱣ ᱠᱟᱛᱷᱟ ᱟᱨ ᱴᱟᱠᱟ ᱠᱟᱹᱣᱰᱤ
ᱠᱟᱛᱷᱟ ᱠᱚ ᱠᱩᱠᱞᱤᱭᱟ ᱾ ᱛᱟᱞᱟ ᱛᱟᱞᱟ ᱨᱮ ᱤᱧ ᱧᱮᱧᱮᱞ ᱞᱟᱹᱜᱤᱫ ᱫᱩᱨᱜᱟᱹᱯᱩᱨ ᱠᱚ ᱦᱤᱡᱩᱜᱼᱟ ᱾ ᱞᱟᱛᱟᱨ ᱤᱛᱩᱱ ᱟᱥᱲᱟ
ᱞᱮᱠᱟ ᱪᱷᱩᱴᱤ ᱠᱚ ᱫᱚ ᱵᱟᱝ ᱛᱟᱦᱮᱸᱱᱟ ᱾ ᱥᱮᱛᱟᱜ ᱵᱮᱨᱮᱫ ᱠᱟᱛᱮ ᱱᱟᱥᱛᱟ ᱡᱚᱴᱟᱣ ᱠᱚ ᱥᱟᱶ ᱡᱚᱢ ᱟᱨ ᱟᱹᱭᱩᱵ ᱚᱠᱛᱚ
ᱠᱷᱤᱞᱚᱸᱰ ᱠᱚ ᱟᱹᱰᱤ ᱜᱮ ᱢᱚᱡᱽᱼᱟ ᱾ ᱠᱚᱞᱮᱡᱽ ᱦᱚᱛᱮᱛᱮ ᱛᱟᱢᱤᱞᱱᱟᱰᱩ ᱨᱮᱱᱟᱜ ᱥᱩᱨᱚᱛᱠᱚᱲ ᱮᱱᱹᱟᱤᱹᱴᱤᱹ ᱨᱮ ᱵᱟᱥᱠᱮᱴ
ᱵᱚᱞ ᱠᱷᱤᱞᱚᱸᱰ ᱦᱮᱯᱨᱟᱣ ᱨᱮ ᱫᱟᱣ ᱤᱧ ᱧᱟᱢ ᱞᱮᱫ ᱛᱟᱭᱚᱢ ᱠᱚᱞᱮᱡᱽ ᱨᱮ ᱤᱧᱟᱜ ᱩᱯᱨᱩᱢ ᱡᱚᱴᱟᱣ ᱠᱚ ᱴᱷᱮᱱ
ᱯᱟᱥᱱᱟᱣ ᱮᱱᱟ ᱾
ᱥᱮᱨᱢᱟ ᱢᱩᱪᱟᱹᱫ ᱵᱤᱱᱤᱰ ᱟᱹᱣᱨᱤ ᱪᱟᱵᱟᱜ ᱨᱮᱜᱮ ᱠᱚᱨᱚᱱᱟ ᱟᱡᱟᱨ ᱟᱵᱚ ᱫᱤᱥᱚᱢ ᱨᱮ ᱯᱷᱚᱴᱮᱞ ᱮᱱᱟ ᱟᱨ ᱚᱱᱟ ᱤᱫᱤ
ᱠᱟᱛᱮ ᱠᱚᱞᱮᱡᱽ ᱫᱚ ᱠᱚ ᱦᱟᱹᱯᱤ ᱦᱟᱱᱛᱟᱲ ᱟᱠᱟᱫᱼᱟ ᱾ ᱡᱚᱛᱚ ᱜᱤᱫᱽᱨᱟᱹ ᱜᱮ ᱡᱟᱱᱟᱢ ᱫᱤᱥᱚᱢ ᱠᱚ ᱵᱷᱮᱡᱟ ᱨᱩᱣᱟᱹᱲ
ᱟᱠᱟᱫ ᱠᱚᱣᱟ ᱟᱨ ᱤᱧ ᱦᱚᱸ ᱡᱟᱱᱟᱢ ᱫᱤᱥᱚᱢ ᱦᱮᱡ ᱦᱩᱭ ᱟᱠᱟᱣ ᱫᱤᱧᱟ᱾ᱠᱚᱞᱮᱡᱽ ᱨᱮ ᱢᱤᱫ ᱥᱮᱨᱢᱟ ᱯᱩᱨᱟᱹᱣ ᱮᱱᱟ,
ᱛᱤᱱᱟᱹᱜ ᱪᱚ ᱵᱮᱥ ᱟᱨ ᱛᱤᱱᱟᱹᱜ ᱪᱚ ᱵᱟᱹᱲᱤᱡ ᱤᱧᱟᱜ ᱢᱟᱱᱮᱨᱮ ᱟᱨ ᱡᱤᱣᱤ ᱨᱮ ᱡᱷᱟᱞᱠᱟᱣ ᱟᱠᱟᱱᱟ ᱾ ᱠᱚᱞᱮᱡᱽ ᱮᱦᱚᱵ
ᱞᱮᱱᱠᱷᱟᱱ ᱟᱨᱦᱚᱸ ᱞᱟᱥᱮᱨ ᱦᱟᱛᱟᱝ ᱟᱱ ᱡᱚᱴᱟᱣ ᱠᱚ ᱛᱩᱞᱩᱡ ᱱᱟᱶᱟ ᱱᱟᱶᱟ ᱥᱟᱛᱟᱢ ᱪᱮᱫᱚᱜ ᱤᱧ ᱨᱤᱠᱟᱹᱭᱟ ᱟᱨ ᱟᱭᱳ
ᱵᱟᱵᱟ ᱛᱤᱠᱤᱱᱟᱜ ᱟᱸᱥ ᱞᱮᱠᱟᱛᱮ ᱜᱩᱱ ᱟᱱ ᱢᱟᱨᱟᱝ ᱦᱚᱲ ᱵᱮᱱᱟᱣᱜ ᱞᱟᱹᱜᱤᱫ ᱤᱧ ᱠᱩᱨᱩᱢᱩᱴᱩᱭᱟ ᱾
***
