ᱢᱤᱫ ᱵᱤᱨ ᱛᱟᱞᱟᱨᱮ ᱢᱤᱫᱴᱟᱹᱝ ᱟᱹᱛᱩ ᱛᱟᱦᱮᱸ ᱠᱟᱱᱟ ᱾ ᱚᱱᱟ ᱟᱹᱛᱩ ᱦᱚᱲ ᱫᱚ ᱪᱮᱫ ᱠᱚᱪᱚ ᱠᱚ ᱵᱷᱩᱞ ᱠᱮᱫ ᱠᱷᱟᱹᱛᱤᱨ ᱚᱱᱟ ᱵᱤᱨ ᱫᱚ ᱵᱟᱜᱟᱦᱤ ᱮᱱᱟ ᱾ ᱟᱹᱛᱩ ᱵᱷᱤᱛᱨᱤ ᱛᱮ ᱠᱩᱞ, ᱵᱟᱱᱟ, ᱛᱟᱹᱨᱩᱵ ᱮᱢᱟᱱ ᱠᱚ ᱦᱮᱡ ᱮᱱᱟ ᱾ ᱟᱨ ᱜᱚᱲᱟ ᱠᱚᱨᱮ ᱠᱷᱚᱱ ᱢᱤᱦᱩᱸ, ᱢᱮᱨᱚᱢ ᱠᱚᱠᱚ ᱟᱹᱛᱠᱤᱨ ᱠᱮᱫ ᱠᱚᱣᱟ ᱟᱨ ᱦᱚᱲ ᱠᱚᱦᱚᱸ ᱠᱚ ᱟᱹᱛᱠᱤᱨ ᱚᱪᱚᱭᱮᱱᱟ ᱾ ᱚᱱᱟ ᱠᱷᱟᱹᱛᱤᱨ ᱚᱱᱟ ᱟᱹᱛᱩ ᱦᱚᱲ ᱫᱚ ᱟᱹᱛᱩ ᱚᱲᱟᱜ ᱵᱟᱹᱜᱤ ᱠᱟᱛᱮ ᱦᱟᱱᱛᱮ ᱱᱷᱟᱛᱮ ᱠᱚ ᱧᱤᱨ ᱪᱟᱵᱟ ᱮᱱᱟ ᱾ ᱟᱫᱚ ᱚᱱᱟ ᱚᱲᱟᱜ ᱠᱚᱨᱮ ᱫᱚ ᱦᱟᱹᱬᱩ, ᱜᱟᱹᱬᱤ ᱠᱚᱠᱚ ᱵᱟᱥᱟ ᱮᱱᱟ ᱾ ᱫᱤᱱ ᱵᱮᱲᱟ ᱠᱷᱟᱱ ᱫᱚᱠᱚ ᱠᱷᱤᱞᱰᱩ ᱮᱱᱮᱡ ᱵᱟᱲᱟ ᱡᱚᱝᱼᱟ ᱟᱨ ᱧᱤᱫᱟᱹ ᱠᱷᱟᱱ ᱫᱚᱠᱚ ᱡᱟᱹᱯᱤᱫ ᱡᱤᱨᱟᱹᱣ ᱡᱚᱝᱟ ᱾
ᱢᱤᱫ ᱫᱤᱱ ᱫᱚ ᱥᱟᱺᱜᱤᱧ ᱯᱮᱲᱟ ᱦᱤᱨᱤ ᱢᱟᱢᱚ ᱵᱷᱚᱬᱡᱟ ᱠᱤᱱ ᱚᱰᱚᱠ ᱟᱠᱟᱱᱟ ᱾ ᱛᱟᱲᱟᱢ ᱛᱟᱲᱟᱢ ᱛᱮ ᱚᱱᱟ ᱟᱹᱛᱩ ᱨᱮ ᱠᱤᱱ ᱟᱹᱭᱩᱵ ᱮᱱ ᱠᱷᱟᱱ ᱟᱫᱚ ᱚᱱᱟ ᱚᱲᱟᱜ ᱨᱮ ᱧᱤᱫᱟᱹ ᱟᱸᱜᱟᱭ ᱞᱟᱹᱜᱤᱫ ᱠᱤᱱ ᱵᱟᱥᱟ ᱮᱱᱟ ᱾ ᱛᱤᱱ ᱡᱚᱦᱚᱜ ᱥᱮᱛᱟᱜ ᱦᱤᱡᱩᱜ ᱠᱟᱱᱟ ᱧᱮᱞ ᱠᱚᱣᱟ ᱠᱤᱱ ᱚᱱᱟ ᱚᱲᱟᱜ ᱨᱮᱫᱚ ᱦᱟᱹᱬᱩ, ᱜᱟᱹᱬᱤ ᱠᱚᱠᱚ ᱡᱟᱹᱯᱤᱫ ᱯᱮᱨᱮᱡ ᱟᱠᱟᱫᱼᱟ ᱾ ᱟᱫᱚ ᱥᱟᱛᱮᱨᱮ ᱢᱤᱫᱴᱟᱹᱝ ᱦᱚᱞᱟᱫ ᱠᱤᱱ ᱧᱮᱞ ᱧᱟᱢ ᱠᱮᱫ ᱠᱷᱟᱱ ᱵᱟᱹᱭ ᱵᱟᱹᱭ ᱛᱮ ᱥᱮᱱ ᱠᱟᱛᱮ ᱚᱱᱟ ᱦᱚᱞᱟᱫ ᱫᱚ ᱠᱤᱱ ᱟᱹᱜᱩ ᱠᱮᱫ ᱛᱮ ᱢᱤᱫᱴᱟᱹᱝ ᱦᱟᱹᱬᱩ ᱫᱚ ᱵᱟᱹᱭ ᱵᱟᱹᱭ ᱛᱮ ᱠᱤᱱ ᱦᱚᱭᱚ ᱯᱷᱟᱨᱪᱟ ᱠᱟᱫᱮᱭᱟ ᱾ ᱟᱨ ᱟᱹᱠᱤᱱ ᱫᱚ ᱢᱤᱫᱴᱟᱹᱝ ᱠᱚᱪᱟ ᱨᱮ ᱠᱤᱱ ᱫᱩᱲᱩᱵ ᱛᱷᱤᱨ ᱟᱠᱟᱱᱟ ᱾ ᱟᱫᱚ ᱩᱱᱤ ᱦᱟᱹᱬᱩ ᱡᱚᱠᱷᱚᱱ ᱮ ᱮᱵᱷᱮᱱ ᱮᱱᱟ, ᱜᱚᱴᱟ ᱦᱚᱲᱢᱚᱭ ᱩᱭᱩᱝ ᱵᱟᱲᱟ ᱮᱱ ᱛᱮ ᱟᱫᱚᱭ ᱢᱮᱱᱮᱫᱼᱟ, ᱟᱪᱷᱟ ᱦᱚᱞᱟᱫ ᱟᱪᱦᱟᱢ ᱦᱚᱭᱚ ᱠᱤᱫᱤᱧᱟ ᱾ ᱟᱫᱚ ᱚᱱᱟ ᱠᱟᱛᱦᱟ ᱟᱸᱡᱚᱢ ᱠᱟᱛᱮ ᱟᱨᱠ ᱚ ᱦᱟᱹᱬᱩ ᱫᱚ ᱠᱷᱩᱱᱩᱜ ᱠᱷᱩᱱᱩᱜ ᱠᱚ ᱞᱟᱸᱫᱟ ᱠᱮᱫᱼᱟ ᱾ ᱤᱱᱟᱹ ᱠᱷᱟᱱ ᱜᱮ ᱩᱱᱠᱤᱱ ᱢᱟᱢᱚ ᱵᱷᱚᱬᱡᱟ ᱦᱚᱸ ᱟᱠᱚᱣᱟᱜ ᱞᱟᱸᱫᱟ ᱟᱸᱡᱚᱢ ᱛᱮ ᱟᱹᱠᱤᱱᱟᱜ ᱞᱟᱸᱫᱟ ᱦᱚᱸ ᱵᱟᱹᱠᱤᱱ ᱥᱟᱸᱵᱽᱲᱟᱣ ᱞᱮᱫ ᱠᱷᱟᱱ ᱟᱹᱠᱤᱱ ᱦᱚᱸ ᱠᱷᱩᱱᱩᱜ ᱠᱷᱩᱱᱩᱜ ᱠᱤᱱ ᱞᱟᱸᱫᱟ ᱠᱮᱫᱼᱟ ᱾ ᱮᱱᱠᱷᱟᱱ ᱜᱮ ᱩᱱᱠᱩ ᱦᱟᱹᱬᱩ ᱜᱟᱹᱬᱤ ᱫᱚ ᱩᱱᱠᱤᱱᱟᱜ ᱞᱟᱸᱫᱟ ᱟᱸᱡᱚᱢ ᱛᱮ ᱫᱚᱢᱮ ᱠᱚ ᱵᱚᱛᱚᱨ ᱮᱱᱟ ᱟᱨᱠ ᱚ ᱫᱟᱹᱲ ᱠᱮᱫᱼᱟ ᱟᱠᱚᱭᱤᱡ ᱢᱟᱹᱡᱷᱤ ᱦᱟᱲᱟᱢ ᱟᱨᱵᱟᱝ ᱡᱚᱛᱚ ᱠᱷᱚᱱ ᱢᱟᱨᱟᱝ ᱛᱟᱹᱨᱩᱵ ᱴᱷᱮᱱ ᱾ ᱟᱫᱚ ᱠᱚ ᱢᱮᱛᱟᱭ ᱠᱟᱱᱟ, ᱢᱟᱡᱷᱤ ᱵᱟᱵᱟ, ᱟᱵᱚᱣᱟᱜ ᱤᱞᱟᱠᱟ ᱨᱮᱫᱚ ᱛᱤᱥ ᱠᱷᱚᱱ ᱪᱚ ᱵᱟᱨᱮᱭᱟ ᱪᱤᱞᱤ ᱪᱚ ᱠᱤᱱ ᱦᱮᱡ ᱟᱠᱟᱱᱟ ᱾ ᱟᱫᱚᱭ ᱢᱮᱛᱟ ᱟᱠᱚ ᱠᱟᱱᱟ, ᱚᱠᱟ ᱨᱮᱯᱮ ᱧᱮᱞ ᱟᱠᱟᱫ ᱠᱤᱱᱟ ? ᱟᱫᱚ ᱠᱚ ᱢᱮᱛᱟᱭ ᱠᱟᱱᱟ, ᱚᱱᱟ ᱚᱲᱟᱜ ᱨᱮ ᱢᱮᱱᱟᱜ ᱠᱤᱱᱟ ᱾ ᱟᱨ ᱱᱩᱭ ᱢᱟ ᱡᱟᱹᱯᱤᱫ ᱨᱮ ᱠᱤᱱ ᱦᱚᱭᱚ ᱯᱷᱟᱨᱪᱟ ᱟᱠᱟ ᱫᱮᱭᱟ ᱾ ᱟᱫᱚ ᱤᱱᱟᱹ ᱠᱷᱟᱱ ᱜᱮ ᱩᱱᱤ ᱢᱟᱡᱷᱤ ᱦᱟᱲᱟᱢ ᱫᱚᱭ ᱨᱟᱹᱜᱤ ᱜᱚ ᱫᱮᱱᱟ, ᱟᱨ ᱮ ᱢᱮᱱᱮᱫᱼᱟ, ᱪᱚᱞᱚ ᱥᱮ ᱫᱮᱠᱷᱟᱣ ᱟᱹᱧ ᱯᱮ, ᱚᱠᱟᱨᱮ ᱢᱮᱱᱟᱜ ᱠᱤᱱᱟ ?
ᱟᱫᱚ ᱩᱱᱠᱤᱱ ᱢᱟᱢᱚ ᱵᱷᱚᱬᱡᱟ ᱫᱚ ᱩᱱᱠᱩ ᱦᱤᱡᱩᱜ ᱢᱟᱬᱟᱝ ᱨᱮᱜᱮ ᱵᱚᱛᱚᱨ ᱛᱮ ᱢᱤᱫᱴᱟᱹᱝ ᱟᱫᱷᱟ ᱵᱷᱟᱛᱟᱣ ᱠᱩᱸᱭ ᱨᱮ ᱠᱤᱱ ᱵᱚᱞᱚ ᱟᱠᱟᱱ ᱛᱮ ᱛᱟᱞᱮ ᱴᱷᱟᱴᱟᱨ ᱛᱮ ᱠᱤᱱ ᱮᱥᱮᱫ ᱟᱠᱟᱱᱟ ᱾ ᱟᱫᱚ ᱩᱱᱠᱩ ᱦᱮᱡ ᱠᱟᱛᱮ ᱚᱱᱟ ᱠᱩᱸᱭ ᱥᱩᱨ ᱨᱮᱜᱮ ᱠᱚ ᱡᱟᱣᱨᱟ ᱮᱱᱟ ᱾ᱟᱨ ᱢᱟᱹᱡᱷᱤ ᱵᱟᱵᱟ ᱫᱚ ᱠᱩᱸᱭ ᱫᱟᱯᱟᱞ ᱟᱠᱟᱱ ᱛᱟᱞᱮ ᱴᱷᱟᱴᱟᱨ ᱨᱮᱜᱮᱭ ᱫᱩᱲᱩᱵ ᱜᱚ ᱫᱮᱱᱟ ᱾ ᱱᱚᱶᱟ ᱠᱚ ᱧᱮᱞ ᱛᱮ ᱢᱟᱢᱚ ᱵᱷᱚᱬᱡᱟ ᱫᱚ ᱛᱟᱺᱦᱩ ᱠᱤᱱ ᱵᱚᱛᱚᱨᱚᱜ ᱠᱟᱱᱟ, ᱱᱤᱛᱚᱜ ᱫᱚᱠᱚ ᱡᱚᱢ ᱪᱟᱵᱟ ᱩᱛᱟᱹᱨ ᱞᱟᱝ ᱜᱮᱭᱟ ᱾ ᱩᱱ ᱦᱚᱸ ᱟᱹᱠᱤᱱ ᱫᱚ ᱚᱱᱟ ᱦᱚᱞᱟᱫ ᱫᱚ ᱠᱤᱱ ᱥᱟᱵ ᱟᱠᱟᱫ ᱜᱮᱭᱟ ᱾ ᱛᱟᱹᱨᱩᱵ ᱢᱟ ᱫᱩᱲᱩᱵ ᱠᱟᱛᱮ ᱪᱟᱭᱞᱚᱢ ᱢᱟ ᱟᱹᱠᱤᱱ ᱥᱮᱫ ᱮ ᱛᱟᱵ ᱟᱠᱟᱫᱼᱟ, ᱩᱱᱠᱤᱱ ᱢᱟᱢᱚ ᱵᱷᱚᱬᱡᱟ ᱫᱚ ᱚᱱᱟ ᱦᱚᱞᱟᱫ ᱛᱮ ᱛᱟᱹᱨᱩᱵᱟᱜ ᱪᱟᱭᱞᱚᱢ ᱫᱚ ᱯᱷᱮᱰᱟᱛ ᱨᱮ ᱠᱤᱱ ᱜᱮᱫ ᱠᱷᱟᱺᱰᱤᱭᱟᱹ ᱠᱟᱫ ᱛᱟᱭᱟ ᱾ ᱮᱱᱠᱷᱟᱱ ᱜᱮ ᱢᱟᱹᱡᱷᱤ ᱛᱟᱹᱨᱩᱵ ᱫᱚ ᱦᱟᱹᱥᱩ ᱟᱨ ᱵᱚᱛᱚᱨ ᱛᱮ ᱡᱚᱛᱚ ᱠᱷᱳᱱ ᱢᱟᱬᱟᱝ ᱨᱮ ᱚᱸᱰᱮ ᱠᱷᱚᱱ ᱮ ᱫᱟᱹᱲ ᱠᱮᱫᱼᱟ ᱾ ᱟᱨ ᱮ ᱢᱮᱛᱟ ᱦᱟᱠᱚ ᱠᱟᱱᱟ, ᱫᱟᱹᱲ ᱯᱮᱭᱟ ᱫᱟᱹᱲ ᱯᱮ, ᱥᱟᱹᱨᱤ ᱜᱮ ᱟᱹᱰᱤ ᱢᱟᱨᱟᱝ ᱢᱟᱨᱟᱝ ᱠᱤᱱ ᱜᱮ ᱪᱤᱞᱤ ᱪᱚ ᱢᱮᱱᱟᱜ ᱠᱤᱱᱟ!! ᱸᱚᱶᱟ ᱟᱸᱡᱚᱢ ᱛᱮ ᱵᱚᱛᱚᱨ ᱛᱮ ᱡᱚᱛᱚ ᱦᱚᱲ ᱚᱸᱰᱮ ᱠᱷᱚᱱ ᱠᱚ ᱫᱟᱹᱲ ᱠᱮᱫᱼᱟ ᱾ ᱤᱱᱟᱹ ᱛᱟᱭᱚᱢ ᱢᱟᱢᱚ ᱵᱷᱚᱬᱡᱟ ᱦᱚᱸ ᱚᱸᱰᱮ ᱠᱷᱚᱱ ᱚᱰᱚᱠ ᱠᱟᱛᱮ ᱥᱟᱦᱟ ᱧᱚᱜ ᱨᱮ ᱢᱤᱫᱴᱟᱹᱝ ᱥᱮᱬᱟ ᱩᱞ ᱫᱟᱨᱮ ᱨᱮ ᱠᱤᱱ ᱫᱮᱡ ᱦᱟᱹᱯᱤ ᱟᱠᱟᱱᱟ ᱾ ᱟᱫᱚ ᱩᱱᱠᱩ ᱵᱤᱨ ᱡᱟᱱᱣᱟ ᱦᱚ ᱸᱟᱨ ᱢᱤᱫ ᱫᱤᱱ ᱟᱠᱚ ᱦᱚᱸ ᱢᱤᱫᱩᱱ ᱠᱚ ᱦᱚᱦᱚ ᱠᱮᱫᱼᱟ ᱾ ᱟᱠᱚ ᱦᱚ ᱸᱚᱱᱟ ᱩᱞ ᱫᱟᱨᱮ ᱵᱩᱴᱟᱹ ᱨᱮᱜᱮ ᱢᱤᱫᱩᱱ ᱞᱟᱹᱜᱤᱫ ᱠᱚ ᱴᱷᱟᱹᱣᱠᱟᱹ ᱠᱮᱫᱼᱟ ᱟᱨ ᱚᱱᱟ ᱩᱞ ᱩᱢᱩᱞ ᱨᱮᱜᱮ ᱠᱚ ᱡᱟᱣᱨᱟ ᱮᱱᱟ ᱾ ᱢᱟᱢᱚ ᱵᱷᱚᱬᱡᱟ ᱦᱚ ᱸᱚᱱᱟ ᱩᱞ ᱫᱟᱨᱮ ᱨᱮᱜᱮ ᱫᱮᱡ ᱠᱟᱛᱮ ᱠᱤᱱ ᱦᱟᱹᱯᱤ ᱟᱠᱟᱱᱟ ᱢᱮᱱᱛᱮ ᱟᱠᱚ ᱫᱚ ᱵᱟᱠᱚ ᱧᱮᱞ ᱟᱠᱟᱫ ᱠᱤᱱᱟ ᱾ ᱟᱨ ᱟᱹᱠᱤᱱ ᱢᱟ ᱟᱠᱚ ᱧᱮᱞ ᱛᱮ ᱛᱟᱹᱦᱩᱸ ᱠᱤᱱ ᱵᱚᱛᱚᱨ ᱡᱚᱝ ᱠᱟᱱᱟ ᱾ ᱟᱫᱚ ᱩᱱᱠᱩ ᱥᱟᱹᱨᱫᱤ ᱠᱚ ᱢᱤᱫᱩᱱ ᱵᱟᱲᱟᱭ ᱛᱮᱫᱚ ᱟᱹᱠᱤᱱ ᱫᱚ ᱢᱤᱫᱴᱟᱹᱝ ᱰᱟᱹᱨ ᱨᱮᱜᱮ ᱠᱤᱱ ᱫᱮᱡ ᱟᱠᱟᱱ ᱛᱟᱦᱮᱸᱱ ᱟᱨ ᱵᱚᱛᱚᱨ ᱛᱮ ᱛᱟᱹᱦᱩᱸ ᱰᱟᱹᱨ ᱨᱮᱱᱟᱜ ᱞᱟᱯᱷᱟᱝ ᱥᱮᱫ ᱠᱤᱱ ᱫᱮᱡ ᱤᱫᱤᱜ ᱠᱟᱱᱟ ᱾ ᱠᱷᱟᱱ ᱜᱮ ᱟᱹᱠᱤᱱᱟᱜ ᱦᱟᱢᱟᱞ ᱛᱮ ᱰᱟᱹᱨ ᱫᱚ ᱨᱟᱴ ᱨᱟᱴ ᱨᱟᱹᱯᱩᱫ ᱧᱩᱨᱩᱜ ᱠᱟᱱᱟ ᱾ ᱚᱱᱟ ᱵᱚᱛᱚᱨ ᱛᱮ ᱵᱷᱚᱬᱡᱟ ᱫᱚᱭ ᱢᱮᱱᱮᱫᱼᱟ, ᱢᱟᱨᱟᱝ ᱤᱡ ᱜᱮ ᱥᱟᱵᱮ ᱢᱮ ᱢᱟᱢᱚ, ᱢᱟᱨᱟᱝ ᱤᱡ ᱜᱮ ᱥᱟᱵᱮ ᱢᱮ ᱾ ᱱᱚᱶᱟ ᱟᱸᱡᱚᱢ ᱛᱮ ᱩᱱᱤ ᱢᱟᱨᱟᱝ ᱛᱟᱹᱨᱩᱵ ᱢᱟᱹᱡᱷᱤ ᱦᱟᱲᱟᱢ ᱢᱟ ᱟᱡ ᱜ ᱮᱟᱨ ᱦᱚᱸ ᱡᱚᱛᱚ ᱠᱷᱚᱱ ᱢᱟᱬᱟᱝ ᱨᱮᱭ ᱫᱟᱹᱲ ᱠᱮᱫᱼᱟ ᱾ ᱫᱟᱹᱲ ᱛᱩᱞᱩᱡ ᱜᱮᱭ ᱢᱮᱱᱮᱫᱼᱟ, ᱥᱟᱲᱟ! ᱢᱤᱫ ᱫᱷᱟᱣ ᱠᱤᱱ ᱵᱟᱺᱰᱤ ᱠᱮᱫ ᱛᱤᱧᱟ ᱪᱟᱭᱞᱚᱢ, ᱟᱨ ᱦᱚ ᱸᱭᱟ ᱤᱧ ᱜᱮ ᱥᱟᱵ ᱥᱟᱱᱟᱭᱮᱫ ᱠᱤᱱ ᱫᱚ ᱾ ᱫᱟᱹᱲ ᱯᱮᱭᱟ ᱫᱟᱲ ᱯᱮᱟ ᱫᱚ ᱵᱟᱵᱚᱱ ᱛᱟᱦᱮᱸᱱᱟ ᱱᱚᱶᱟ ᱵᱟᱜᱟᱦᱤ ᱵᱤᱨ ᱟᱹᱛᱩ ᱨᱮᱫᱚ ᱾
ᱟᱨ ᱢᱤᱫᱴᱟᱹᱝ ᱠᱟᱬᱟ ᱛᱟᱹᱨᱩᱵ ᱫᱚ ᱢᱟᱬᱟᱝ ᱫᱚᱭ ᱯᱷᱩᱴᱟᱹᱬᱤ ᱡᱚᱝ ᱠᱟᱱᱟ, ᱱᱚᱶᱟ ᱢᱮᱱ ᱠᱟᱛᱮ, ᱢᱤᱫ ᱫᱷᱟᱣ ᱥᱟᱵ ᱟᱹᱧ ᱯᱮᱥᱮ ᱱᱷᱟᱜ ! ᱚᱠᱟ ᱞᱮᱠᱟᱹᱧ ᱡᱚᱢᱮᱫ ᱠᱤᱱᱟ ᱾ ᱟᱫᱚ ᱡᱚᱛᱚ ᱠᱚ ᱫᱟᱹᱲ ᱵᱟᱹᱜᱤ ᱟᱫᱮ ᱠᱷᱟᱱ ᱛᱟᱭᱚᱢ ᱫᱚ ᱦᱟᱱᱛᱮ ᱫᱟᱹ/ᱲᱟᱭ ᱦᱟᱱᱟ ᱫᱟᱨᱮ ᱨᱮᱭ ᱛᱟᱹᱠᱤᱡᱚᱜ ᱠᱟᱱᱟ ᱱᱷᱟᱛᱮ ᱫᱟᱹᱲᱟᱭ ᱱᱷᱟᱣᱟ ᱫᱟᱨᱮ ᱨᱮᱭ ᱛᱟᱹᱠᱤᱡᱚᱜ ᱠᱟᱱᱟ ᱾ ᱟᱫᱚ ᱵᱚᱛᱚᱨ ᱛᱮᱭ ᱫᱟᱜ ᱯᱚᱴᱚᱢ ᱩᱛᱟᱹᱨ ᱮᱱᱟ ᱾
ᱟᱫᱚ ᱤᱱᱟᱹ ᱦᱤᱞᱚᱜ ᱨᱮᱜᱮ ᱡᱚᱛᱚ ᱡᱟᱱᱣᱟ ᱠᱚ ᱧᱤᱨ ᱪᱟᱵᱟ ᱮᱱᱟ ᱚᱱᱟ ᱵᱟᱜᱟᱦᱤ ᱵᱤᱨ ᱟᱹᱛᱩ ᱠᱷᱚᱱ ᱫᱚ ᱮᱴᱟᱜ ᱵᱤᱨ ᱛᱮ ᱾ ᱟᱨ ᱢᱟᱢᱚ ᱵᱷᱚᱬᱡᱟ ᱦᱚᱸ ᱚᱲᱟᱜ ᱛᱮ ᱠᱤᱱ ᱨᱩᱣᱟᱹᱲ ᱥᱮᱱ ᱮᱱᱟ ᱾ ᱚᱱᱟ ᱵᱤᱨ ᱟᱨ ᱟᱹᱛᱩ ᱠᱚᱦᱚᱸ ᱫᱚᱦᱲᱟ ᱛᱮ ᱨᱚᱯᱷᱟ ᱨᱩᱣᱟᱹᱲ ᱮᱱᱟ ᱾ ᱟᱨ ᱚᱱᱟ ᱟᱹᱛᱩ ᱦᱚᱲ ᱠᱚᱦᱚᱸ ᱵᱟᱹᱭ ᱵᱟᱹᱭ ᱛᱮ ᱠᱚ ᱦᱮᱡ ᱨᱩᱣᱟᱹᱲ ᱡᱟᱣᱨᱟ ᱮᱱᱟ ᱟᱨ ᱢᱟᱬᱟᱝ ᱞᱮᱠᱟ ᱠᱚ ᱛᱟᱦᱮᱸ ᱨᱩᱣᱟᱹᱲ ᱮᱱᱟ ᱱᱟᱯᱟᱭ ᱜᱮ ᱾
(ᱚᱱᱟ ᱛᱮ ᱠᱟᱛᱷᱟ ᱨᱮ ᱢᱮᱱᱟᱜᱼᱟ, ᱡᱤᱣᱤ ᱦᱚᱲᱢᱚ ᱱᱤᱨᱟᱹᱭ ᱛᱟᱦᱮᱸᱸ ᱠᱷᱟᱱ ᱡᱚᱛᱚᱣᱟᱜ ᱜᱮ ᱱᱟᱯᱟᱭ ᱛᱟᱦᱮᱸᱱᱟ ᱾ ᱢᱚᱱᱮᱨᱮ ᱵᱟᱹᱲᱤᱡ ᱩᱭᱦᱟᱹᱨ, ᱦᱤᱸᱥᱟᱹᱥᱩᱭᱟᱹ, ᱯᱟᱯ ᱢᱚᱱᱟᱱ, ᱛᱟᱦᱮᱸᱱ ᱠᱷᱟᱱ ᱵᱟᱹᱭ ᱵᱟᱹᱭ ᱛᱮ ᱟᱹᱛᱩ ᱚᱲᱟᱜ ᱨᱮᱦᱚᱸ ᱯᱟᱯ, ᱦᱟᱱᱟᱥ ᱮᱢᱟᱱ ᱵᱚᱞᱚᱱᱟ ᱾
ᱵᱩᱫᱷᱤ ᱡᱩᱫᱤ ᱱᱟᱯᱟᱭ ᱥᱟᱹᱦᱤᱸᱡ ᱮᱢ ᱞᱟᱜᱟᱣ ᱜᱟᱱ ᱫᱟᱲᱮᱭᱟᱜᱼᱟ, ᱮᱱᱠᱷᱟᱱ ᱢᱟᱨᱟᱝ ᱠᱷᱚᱱ ᱢᱟᱨᱟᱝ ᱢᱩᱦᱤᱢ ᱠᱷᱚᱱ ᱦᱚᱸᱢ ᱨᱟᱲᱟ ᱫᱩᱜᱚᱜᱼᱟ ᱾ ᱥᱚᱱᱚᱛ ᱜᱮ ᱱᱤᱨᱟᱹᱭ ᱟᱨ ᱵᱩᱫᱷᱤ ᱜᱮ ᱫᱟᱲᱮ ᱾)
