ᱢᱮᱨᱚᱢ ᱜᱩᱯᱤ ᱜᱩᱯᱤ ᱡᱚᱲᱟᱣ ᱮᱱᱟ ᱥᱟᱹᱜᱟᱹᱭ ᱵᱟᱝ ᱠᱚ ᱠᱩᱥᱤᱜ ᱚᱲᱟᱜ ᱨᱤᱱ ᱢᱚᱱᱮ ᱨᱟᱜᱟᱭ ᱾
ᱟᱞᱚᱢ ᱤᱫᱤᱭᱤᱧ ᱱᱟᱞᱦᱟ ᱟᱹᱛᱩ ᱠᱷᱚᱱ ᱫᱚ ᱵᱟᱡᱟᱨ ᱵᱟᱠᱚ ᱮᱢᱚᱜ ᱠᱷᱟᱴᱟᱣ ᱠᱩᱲᱟᱭ ᱴᱟᱠᱟ ᱦᱟᱡᱟᱨ ᱾
ᱫᱚᱦᱚ ᱠᱟᱹᱧ ᱢᱮ ᱟᱢ ᱥᱟᱶ ᱜᱚᱢᱦᱮᱬ ᱩᱢᱩᱞ ᱨᱮ ᱩᱨᱜᱩᱢ ᱠᱟᱢᱟᱧ ᱚᱱᱛᱚᱨ ᱫᱩᱞᱟᱲ ᱜᱷᱟᱨᱚᱸᱡᱽ ᱨᱮ ᱾
ᱦᱟᱨᱠᱮᱛ ᱥᱟᱥᱮᱛ ᱨᱮᱸᱜᱮᱡ ᱵᱮᱱᱟᱣ ᱟᱞᱟᱝ ᱚᱲᱟᱜ ᱥᱟᱦᱟᱣ ᱟᱞᱟᱝ ᱯᱟᱪᱷᱮ ᱦᱚᱲᱟᱜ ᱠᱟᱛᱷᱟ ᱨᱚᱲᱟᱜ ᱾
ᱫᱩᱠ ᱠᱚᱥᱴᱚ ᱦᱤᱡᱩᱜ ᱫᱩᱧ ᱥᱟᱦᱟᱣ ᱯᱟᱨᱚᱢ ᱜᱚᱫᱟ ᱡᱚᱨᱚᱜ ᱨᱮᱦᱚᱸ ᱢᱮᱫ ᱫᱟᱜ ᱩᱠᱩ ᱟᱸᱪᱟᱨ ᱛᱤᱧ ᱡᱚᱫᱟ ᱾
ᱚᱲᱟᱜ ᱠᱷᱚᱱ ᱢᱟ ᱵᱟᱝ ᱠᱚ ᱮᱢᱟ ᱞᱟᱝᱼᱟ ᱡᱩᱲᱩ ᱴᱷᱤᱠᱟ ᱥᱟᱵ ᱦᱟᱥᱟ ᱠᱷᱟᱴᱟᱣ ᱟᱨᱡᱟᱣ ᱟᱞᱟᱝ ᱦᱩᱲᱩ ᱾
ᱟᱹᱥᱩᱞ ᱠᱚᱣᱟ ᱞᱟᱝ ᱢᱮᱨᱚᱢ, ᱰᱟᱺᱜᱽᱨᱤ ᱠᱟᱰᱟ ᱪᱮᱫ ᱢᱮ ᱛᱟᱞᱟᱝ ᱟᱢᱦᱚᱸ ᱦᱩᱲᱩ ᱠᱚ ᱢᱟᱰᱟ ᱾
ᱢᱤᱫ ᱠᱚᱪᱟᱨᱮ ᱵᱮᱱᱟᱣ ᱟᱞᱟᱝ ᱰᱷᱩᱞᱟ ᱵᱷᱤᱛᱟᱹᱨ ᱯᱩᱸᱰ ᱦᱟᱥᱟ ᱛᱮ ᱯᱚᱛᱟᱣ ᱱᱟᱱᱟ ᱦᱩᱱᱟᱹᱨ ᱪᱤᱛᱟᱹᱨ ᱾
ᱯᱟᱨᱟᱵᱽ ᱯᱩᱱᱟᱹᱭ ᱦᱟᱯᱲᱟᱢ ᱦᱟᱺᱰᱤ ᱪᱚᱰᱚᱨ ᱥᱟᱴᱟᱣ ᱟᱹᱛᱩ ᱴᱚᱞᱟ ᱦᱚᱲ ᱥᱟᱶ ᱛᱟᱦᱮ ᱱᱟᱞᱟᱝ ᱯᱚᱴᱟᱣ ᱾
ᱩᱨᱩᱱ ᱯᱩᱨᱩᱱ ᱢᱟ ᱩᱱᱟᱜ ᱵᱟᱞᱟᱝ ᱡᱚᱢ ᱠᱩᱲᱟᱹᱣ ᱡᱚᱢ ᱠᱷᱚᱱ ᱜᱮ ᱠᱟᱹᱴᱤᱡ ᱠᱟᱹᱴᱤᱡ ᱞᱟᱝ ᱡᱩᱲᱟᱹᱣ ᱾
ᱦᱩᱲᱩ ᱠᱚᱢᱟ ᱞᱟᱝ ᱪᱟᱵᱟ ᱠᱮᱫ ᱱᱤᱛ ᱤᱨᱩᱜ ᱫᱟᱞ ᱛᱤ ᱚᱴᱟᱝ ᱯᱮᱴᱮᱡ ᱛᱮ ᱥᱮᱛᱟᱜ ᱞᱟᱝ ᱡᱩᱨᱩᱜ ᱾
ᱵᱟᱞᱟᱝ ᱫᱚᱦᱚᱭ ᱮᱠᱷᱮᱱ ᱰᱷᱩᱞᱟ ᱫᱚ ᱠᱷᱟᱞᱤ ᱫᱚᱲᱚᱢ ᱟᱞᱟᱝ ᱢᱤᱫ ᱵᱟᱺᱫᱤ ᱱᱤᱭᱟᱹ ᱦᱟᱞᱤ ᱾
ᱯᱮᱴᱮᱨ ᱡᱟᱨᱣᱟᱭ ᱢᱮ ᱫᱤᱱ ᱫᱤᱱ ᱛᱮ ᱵᱚᱲ ᱵᱟᱺᱫᱤ ᱞᱮᱠᱷᱟᱱ ᱞᱟᱝ ᱵᱟᱰᱟᱭ ᱜᱮᱭᱟ ᱠᱚ ᱦᱚᱲ ᱾
ᱵᱟᱺᱫᱤ ᱜᱮᱭᱟ ᱞᱟᱝ ᱟᱜᱷᱟᱬ ᱯᱩᱥ ᱵᱚᱸᱜᱟ ᱞᱟᱲᱟᱣ ᱯᱟᱨᱚᱢ ᱟᱞᱟᱝ ᱵᱟᱱ ᱜᱟᱰᱟ ᱫᱟᱜ ᱨᱮ ᱰᱷᱚᱸᱜᱟ ᱾
ᱵᱟᱱᱟ ᱦᱚᱲ ᱛᱮ ᱡᱚᱛᱚᱱ ᱚᱰᱚᱠ ᱵᱚᱞᱚᱱ ᱫᱤᱱ ᱟᱧᱡᱚᱢ ᱠᱩᱥᱤ ᱟᱠᱚ ᱛᱟᱭᱚᱢ ᱥᱟᱱᱟᱢ ᱚᱲᱟᱜ ᱨᱤᱱ ᱾
ᱟᱨᱮ ᱵᱚᱸᱜᱟ ᱜᱮᱞ ᱫᱤᱱ ᱰᱷᱩᱞᱟᱼᱨᱮ ᱞᱟᱝ ᱫᱚᱦᱚᱭ ᱡᱟᱦᱟ ᱞᱮᱠᱟ ᱵᱟᱹᱫ ᱨᱮ ᱦᱩᱲᱩ ᱞᱟᱝ ᱨᱚᱦᱚᱭ ᱾
ᱫᱤᱱ ᱞᱮᱠᱷᱟ ᱡᱚᱠᱷᱟ ᱵᱷᱟᱫᱚᱨ ᱵᱚᱸᱜᱟ ᱯᱩᱨᱟᱣ ᱦᱚᱭ ᱵᱟᱹᱨᱰᱩ ᱞᱮᱠᱟ ᱢᱚᱱ ᱛᱟᱞᱟᱝ ᱜᱩᱨᱞᱟᱣ ᱾
ᱵᱟᱺᱫᱤ ᱥᱟᱢᱴᱟᱣ ᱦᱩᱲᱩ ᱵᱟᱧᱪᱟᱣᱜ ᱞᱟᱹᱜᱤᱫ ᱫᱷᱚᱱ ᱡᱤᱭᱟᱲ ᱫᱚᱦᱚᱭ ᱛᱟᱞᱟᱝ ᱟᱜᱟᱢ ᱫᱤᱱ ᱨᱮ ᱢᱚᱱ ᱾
ᱵᱟᱺᱫᱤ ᱵᱚᱜᱚᱡ ᱞᱮᱱ ᱠᱷᱟᱱ ᱵᱟᱞᱟᱝ ᱨᱮᱸᱜᱮᱡᱼᱟ ᱧᱮᱞᱛᱮ ᱚᱲᱟᱜ ᱦᱚᱲᱟᱜ ᱯᱟᱪᱷᱮ ᱢᱚᱱ ᱵᱚᱫᱚᱞᱚᱜ ᱾
ᱫᱚᱦᱚ ᱨᱩᱣᱟᱹᱲ ᱜᱮᱭᱟ ᱞᱟᱝ ᱟᱭᱳ ᱵᱟᱵᱟ ᱧᱩᱛᱩᱢ ᱵᱚᱸᱜᱟ ᱫᱤᱥᱚᱢ ᱠᱷᱚᱱ ᱮᱢᱟ ᱞᱟᱝᱼᱟ ᱠᱤᱱ ᱛᱷᱩᱢ ᱾
@@@
