ᱢᱟᱜᱽ ᱵᱚᱸᱜᱟ ᱯᱟᱨᱚᱢ ᱮᱱᱟ
ᱯᱷᱟᱹᱜᱩᱱ ᱵᱚᱸᱜᱟ ᱢᱩᱞᱩᱜ ᱮᱱᱟ
ᱱᱟᱶᱟ ᱥᱟᱠᱟᱢ ᱞᱮᱜᱮᱡᱼᱞᱮᱜᱮᱡ ᱵᱟᱦᱟ ᱢᱚᱦᱮᱸ ᱮᱱᱟ,
ᱢᱟᱛᱠᱚᱢ, ᱥᱟᱨᱡᱚᱢ ᱵᱟᱦᱟ ᱛᱮ
ᱫᱟᱨᱮ ᱰᱟᱹᱨ ᱫᱚ ᱡᱮᱸᱜᱮᱫᱼᱡᱮᱸᱜᱮᱫ ᱾
ᱱᱟᱱᱟ ᱦᱩᱱᱟᱹᱨ ᱫᱟᱨᱮ ᱱᱟᱹᱬᱤ
ᱱᱟᱱᱟ ᱦᱩᱱᱟᱹᱨ ᱵᱟᱦᱟ ᱟᱠᱟᱱ
ᱫᱷᱟᱹᱨᱛᱤ ᱟᱭᱳᱭ ᱥᱟᱡᱟᱣ ᱟᱠᱟᱱ
ᱧᱮᱞ ᱡᱚᱝ ᱛᱮ ᱟᱹᱰᱤ ᱪᱚᱨᱚᱠ,
ᱡᱮᱢᱚᱱ ᱢᱟᱱᱣᱟ ᱠᱚ ᱫᱮ ᱫᱮᱞᱟ
ᱟᱛᱟᱝ ᱫᱟᱨᱟᱢ ᱞᱟᱹᱜᱤᱫ ᱾
ᱯᱷᱟᱹᱜᱩᱱ ᱵᱚᱸᱜᱟ ᱥᱟᱹᱜᱩᱱ ᱢᱟᱦᱟᱸ,
ᱛᱩᱢᱫᱟᱜ ᱴᱟᱢᱟᱠ ᱥᱟᱠᱣᱟ ᱥᱟᱰᱮ ᱠᱟᱱ,
ᱡᱟᱦᱮᱨ ᱟᱭᱳᱭ ᱦᱚᱦᱚ ᱮᱫᱼᱟ,
ᱵᱟᱦᱟ ᱵᱚᱸᱜᱟ ᱨᱮᱱᱟᱜ ᱥᱟᱹᱜᱩᱱ ᱢᱟᱦᱟᱸ ᱨᱮ ᱾
ᱫᱷᱟᱹᱨᱛᱤ ᱟᱭᱳ ᱠᱚᱞᱮᱨᱮ
ᱠᱷᱮᱨᱣᱟᱲ ᱦᱚᱯᱚᱱ ᱠᱚ ᱩᱢᱮᱲ ᱟᱠᱟᱱ,
ᱡᱮᱢᱚᱱ ᱥᱟᱹᱜᱩᱱ ᱥᱩᱯᱟᱹᱲᱤ
ᱯᱮᱨᱮᱡ ᱥᱟᱨᱮᱲ ᱟᱠᱟᱱ ᱾
ᱵᱟᱦᱟ ᱨᱮᱱᱟᱜ ᱥᱚᱸᱫᱷᱟᱲ ᱥᱚᱛᱮ
ᱢᱚᱦᱠᱟᱣᱚᱜ ᱠᱟᱱᱟ ᱵᱤᱨᱼᱵᱩᱨᱩ,
ᱵᱩᱨᱩᱼᱫᱷᱟᱥᱱᱟ ᱟᱹᱛᱩ ᱴᱚᱞᱟ
ᱞᱩᱛᱤ ᱛᱮᱨᱚᱢ ᱵᱷᱟᱶᱟᱨ ᱜᱩᱨᱞᱟᱹᱣᱚᱜ ᱠᱟᱱ ᱠᱚ,
ᱵᱟᱦᱟ ᱨᱟᱥᱟ ᱪᱮᱯᱮᱡ ᱞᱟᱹᱜᱤᱫ ᱾
ᱫᱟᱨᱮ ᱡᱷᱩᱲ ᱨᱮ ᱠᱩᱭᱞᱤ ᱪᱮᱬᱮ
ᱨᱟᱜᱟᱭ ᱠᱩᱦᱩᱼᱠᱩᱦᱩ
ᱯᱷᱟᱹᱜᱩᱱ ᱵᱚᱸᱜᱟ ᱦᱟᱹᱞᱤ ᱦᱟᱹᱨᱭᱟᱹᱲ
ᱠᱩᱭᱞᱤ ᱟᱲᱟᱝ ᱨᱟᱦᱟ ᱛᱮ ᱢᱚᱱᱮ ᱡᱤᱣᱤᱭ ᱡᱤᱭᱟᱹᱲ ᱾᱾
***
