ᱯᱟᱨᱟᱝᱜᱚᱛ

ᱵᱷᱚᱲᱵᱷᱩᱲᱤᱭᱟᱹ ᱜᱚᱢᱠᱮ ᱡᱤᱣᱤ ᱡᱩᱨᱤ ᱥᱟᱶ ᱡᱟᱦᱟᱸ ᱛᱤᱥ ᱜᱮ ᱡᱟᱦᱟᱸᱱ ᱵᱩᱜᱤ ᱵᱟᱹᱲᱤᱡ ᱥᱩᱠ ᱫᱩᱠ ᱠᱟᱛᱷᱟ ᱜᱟᱯᱟᱞᱢᱟᱨᱟᱣ ᱢᱟᱭ ᱜᱟᱯᱟᱞᱢᱟᱨᱟᱣ ᱥᱟᱹᱛ ᱞᱮᱠᱷᱟᱱ ᱠᱤᱱ ᱟᱡ ᱵᱟᱹᱦᱩ ᱢᱮᱢᱮᱱᱟᱭ ᱟᱢᱟᱜ ᱫᱚ ᱜᱚ ᱪᱚᱴ ᱞᱩᱴᱤ ᱨᱮ ᱨᱟᱹᱜᱤ ᱛᱟᱢ ᱾ ᱟᱢ ᱥᱟᱶ ᱜᱟᱯᱟᱞᱢᱟᱨᱟᱣ ᱡᱟᱦᱟᱸ ᱵᱩᱞ ᱦᱚᱲ ᱥᱟᱶ ᱜᱟᱯᱟᱞᱢᱟᱨᱟᱣ ᱛᱟᱦᱟᱸ ᱾ ᱟᱢᱟᱜ ᱠᱟᱛᱷᱟ ᱨᱮ ᱦᱚᱲ ᱠᱚ ᱨᱮᱵᱮᱱ, ᱯᱟᱹᱛᱭᱟᱹᱣ, ᱨᱟᱹᱡᱤᱜ ᱢᱟ ᱢᱮᱱᱛᱮ ᱢᱤᱫᱴᱟᱹᱝ ᱠᱟᱛᱷᱟ ᱜᱮ ᱜᱮᱞ ᱫᱷᱟᱣ ᱛᱮᱢ ᱨᱚᱲᱟ ᱵᱩᱞ ᱦᱚᱲ ᱞᱮᱠᱟ ᱾ ᱵᱟᱠᱚ ᱟᱸᱡᱚᱢ ᱠᱷᱟᱱ ᱥᱟᱲ ᱵᱤᱧ ᱞᱮᱠᱟ ᱯᱷᱟᱸ ᱯᱷᱚᱸ ᱥᱟᱦᱮᱫ ᱠᱚᱛᱟᱢ ᱨᱟᱹᱜᱤ ᱛᱮ ᱥᱟᱰᱮᱭᱟ ᱾ ᱡᱮᱢᱚᱱ ᱟᱢ ᱜᱮ ᱡᱚᱛᱚᱣᱟᱜ ᱴᱷᱤᱠ ᱮᱢ ᱨᱚᱲ ᱮᱫᱼᱟ ᱾ ᱡᱚᱛᱚ ᱠᱟᱛᱷᱟ ᱟᱢ ᱜᱮ ᱰᱷᱮᱨ ᱮᱢ ᱵᱟᱰᱟᱭᱟ ᱾ ᱚᱱᱟ ᱛᱮᱜᱮ ᱛᱚ ᱜᱚ ᱟᱢᱟᱜ ᱠᱟᱛᱷᱟ ᱫᱚ ᱚᱠᱚᱭ ᱥᱟᱶ ᱵᱟᱝ ᱯᱚᱴᱟᱣᱜᱼᱟ ? ᱚᱠᱚᱭ ᱥᱟᱶ ᱦᱚᱸ ᱵᱟᱝ ᱜᱟᱯᱟᱱᱟ ? ᱢᱟᱥᱮ ᱦᱟᱸᱜ ᱴᱷᱤᱠ ᱪᱮ ᱵᱷᱩᱞ ᱤᱧ ᱢᱮᱱ ᱮᱫᱼᱟ ? ᱵᱷᱚᱲᱵᱷᱩᱲᱤᱭᱟᱹ ᱜᱚᱢᱠᱮ ᱟᱡ ᱵᱟᱹᱦᱩᱣᱟᱜ ᱱᱚᱣᱟ ᱨᱚᱲ ᱟᱸᱡᱚᱢ ᱟᱸᱡᱚᱢ ᱛᱮ ᱵᱷᱮᱸᱰᱨᱮ ᱥᱟᱭ ᱮᱱᱠᱷᱟᱱᱮ ᱢᱤᱫ ᱫᱤᱱ ᱫᱚ ᱫᱩᱲᱩᱵ ᱴᱷᱤᱠ ᱠᱟᱛᱮ ᱩᱭᱦᱟᱹᱨ ᱟᱹᱪᱩᱨ ᱜᱩᱱᱤ ᱵᱷᱟᱹᱵᱤᱛᱚᱜ ᱟᱭ ᱾ ᱡᱤᱵᱚᱱ ᱨᱮᱱᱟᱜ ᱱᱟᱜᱟᱢ ᱥᱮᱫ ᱠᱚᱭᱚᱜ ᱨᱩᱣᱟᱹᱲ ᱠᱟᱛᱮ ᱛᱩᱱᱠᱷᱤ ᱛᱚᱞᱟᱥ ᱵᱤᱥᱲᱤ ᱯᱷᱤᱫᱽᱞᱤ ᱥᱟᱞᱟ ᱵᱟᱪᱷᱟᱣ ᱠᱟᱛᱮ ᱯᱚᱨᱚᱠ ᱵᱟᱰᱟᱭ ᱫᱟᱲᱮᱭᱟᱜ ᱟᱭ ᱟᱡ ᱵᱟᱹᱦᱩᱣᱟᱜ ᱠᱟᱛᱷᱟᱨᱮ ᱱᱟᱥᱮ ᱪᱷᱚᱲᱮ ᱥᱚᱛ ᱢᱮᱱᱟᱜ ᱜᱮᱭᱟ ᱯᱟᱞᱮᱱ ᱾ ᱪᱮᱠᱟᱛᱮ ᱟᱠᱚ ᱵᱷᱟᱹᱭᱟᱹᱫᱽ ᱟᱨ ᱜᱮ ᱥᱩᱨ ᱥᱟᱺᱜᱤᱧ ᱯᱮᱲᱟ ᱚᱲᱟᱜ ᱵᱟᱝᱠᱷᱟᱱ ᱟᱹᱛᱩ ᱴᱚᱞᱟ ᱠᱚᱨᱮ ᱡᱟᱦᱟᱸᱱᱟᱜ ᱵᱩᱜᱤ ᱵᱟᱹᱲᱤᱡ ᱠᱟᱢᱠᱟᱡᱽ ᱪᱷᱩᱛ ᱪᱷᱟᱹᱴᱭᱟᱹᱨ, ᱵᱟᱯᱞᱟ ᱵᱮᱦᱟ, ᱵᱷᱟᱸᱰᱟᱱ ᱛᱩᱯᱩᱱ, ᱮᱢᱟᱱ ᱠᱚᱨᱮ ᱟᱡ ᱫᱚ ᱚᱠᱚᱭ ᱦᱚᱸ ᱵᱟᱠᱚ ᱰᱚᱰᱮ ᱮᱭᱟ ᱪᱮ ᱵᱟᱠᱚ ᱡᱚᱴᱟᱣ ᱮᱭᱟ ᱾ ᱟᱠᱚ ᱥᱟᱶ ᱢᱮᱥᱟᱜ ᱥᱟᱱᱟᱭ ᱠᱷᱟᱱ ᱠᱚ ᱮᱨᱮᱲ ᱮᱭᱟ ᱾

ᱢᱤᱫ ᱫᱷᱟᱣ ᱠᱩᱢᱟᱹᱝ ᱠᱩᱲᱤᱭᱟᱜ ᱚᱲᱟᱜ ᱫᱩᱣᱟᱹᱨ ᱧᱮᱧᱮᱞ ᱥᱮᱱᱚᱜ ᱡᱷᱚᱜᱟᱜ ᱠᱟᱛᱷᱟ, ᱢᱟᱢᱚ ᱢᱟᱹᱢᱤ, ᱦᱟᱛᱚᱢ ᱠᱩᱢᱟᱹᱝ, ᱠᱟᱠᱟ ᱜᱩᱸᱜᱩ ᱰᱚᱯᱚᱰᱮ ᱠᱚ ᱥᱟᱡᱟᱣ ᱥᱟᱯᱲᱟᱣᱜ ᱠᱟᱱᱟ ᱾ ᱟᱡ ᱦᱚᱸ ᱟᱠᱚ ᱥᱟᱶᱛᱮ ᱪᱟᱞᱟᱜ ᱞᱟᱹᱜᱤᱫ ᱢᱚᱱᱮ ᱢᱚᱱᱮ ᱛᱮ ᱦᱟᱸᱜ ᱥᱟᱯᱲᱟᱣᱜ ᱠᱟᱱᱟᱭ ᱾ ᱮᱱᱠᱷᱟᱱ ᱦᱚᱸᱧᱦᱟᱨ ᱛᱮᱫ ᱢᱮᱱ ᱠᱮᱫᱼᱟᱭ “ᱵᱷᱚᱲᱵᱷᱩᱲᱤᱭᱟᱹ ᱡᱟᱶᱟᱭ ᱫᱚ ᱵᱟᱵᱚᱱ ᱤᱫᱤ ᱮᱭᱟ ᱾ ᱜᱟᱱ ᱜᱟᱱᱟᱜ ᱦᱚᱸᱭ ᱨᱟᱹᱯᱩᱫ ᱠᱟᱜᱼᱟ ᱾ ᱵᱮᱱᱟᱣ ᱵᱮᱱᱟᱣᱟᱜ ᱠᱟᱛᱷᱟ ᱦᱚᱸᱭ ᱵᱮᱸᱰᱟᱣ ᱜᱤᱰᱤ ᱠᱟᱜᱼᱟ” ᱾ ᱛᱟᱨ ᱨᱮ ᱛᱟᱥᱮ ᱞᱟᱱ ᱥᱟᱹᱲᱤ ᱞᱩᱜᱽᱲᱤ ᱫᱟᱱᱟᱝ ᱠᱷᱚᱱ ᱱᱚᱣᱟ ᱠᱟᱛᱷᱟ ᱫᱚᱭ ᱟᱸᱡᱚᱢ ᱧᱟᱢ ᱠᱮᱫᱼᱟ ᱵᱷᱚᱲᱵᱷᱩᱲᱤᱭᱟᱹ ᱜᱚᱢᱠᱮ ᱾ ᱩᱱ ᱡᱷᱚᱜ ᱛᱤ ᱠᱷᱚᱱ ᱯᱩᱪᱩᱡ ᱧᱩᱨ ᱛᱮ ᱟᱹᱨᱥᱤ ᱡᱷᱟᱝ ᱡᱷᱩᱝ ᱨᱟᱹᱯᱩᱫ ᱮᱱ ᱞᱮᱠᱟ ᱠᱩᱥᱤ ᱨᱟᱹᱥᱠᱟᱹ ᱡᱚᱛᱚ ᱛᱟᱭ ᱜᱮᱡᱮᱨ ᱪᱷᱤᱛᱤᱵᱤᱛᱤ ᱮᱱᱟ ᱾ ᱚᱱᱟᱛᱮ ᱛᱤᱸᱜᱩ ᱴᱷᱟᱶ ᱠᱷᱚᱱ ᱟᱸᱡᱚᱢ ᱥᱟᱣᱸᱛᱮ ᱦᱩᱯᱩᱡ ᱥᱟᱺᱦᱤᱧ ᱮ ᱥᱟᱦᱟ ᱡᱚᱝ ᱟᱱ ᱛᱟᱦᱮᱸᱱ ᱾ ᱚᱱᱠᱟ ᱜᱮ ᱟᱨ ᱢᱤᱫ ᱫᱷᱟᱣ ᱫᱚ ᱜᱚᱲᱚᱢ ᱦᱟᱲᱟᱢ ᱦᱤᱥᱟᱹᱵᱽ ᱦᱩᱭᱩᱜ ᱟᱭ ᱵᱷᱟᱹᱭᱟᱹᱫᱽ ᱨᱤᱱᱤᱡᱟᱜ ᱡᱟᱝ ᱵᱟᱦᱟ ᱛᱩᱯᱩ ᱥᱮᱱᱚᱜ ᱡᱷᱚᱜᱟᱜ ᱠᱟᱛᱷᱟ ᱾ ᱟᱡ ᱦᱚᱸᱭ ᱥᱟᱯᱲᱟᱣ ᱚᱰᱚᱠ ᱟᱠᱟᱱᱟ ᱦᱟᱸᱜ ᱮᱱᱠᱷᱟᱱ ᱡᱚᱜᱚ ᱟᱹᱥᱟᱹᱢᱤ ᱢᱮᱛᱟᱭ ᱠᱟᱱᱟᱭ “ᱱᱩᱭ ᱵᱷᱚᱲᱵᱷᱩᱲᱤᱭᱟᱹ ᱦᱚᱸᱭ ᱥᱟᱯᱲᱟᱣ ᱟᱠᱟᱱ ᱫᱚ ᱟᱵᱚ ᱥᱟᱶ ᱪᱟᱞᱟᱜ ᱞᱟᱹᱜᱤᱫ ᱥᱮ ᱪᱮᱫ” ? ᱦᱚᱸ ᱦᱚᱸ ᱦᱚᱭ ᱵᱷᱟᱹᱭ ᱟᱹᱥᱟᱹᱢᱤ ᱢᱮᱱ ᱨᱩᱣᱟᱹᱲ ᱠᱮᱫᱼᱟᱭ ᱾ ᱼᱮᱱᱠᱷᱟᱱ ᱤᱧ ᱫᱚ ᱵᱟᱹᱧ ᱪᱟᱜᱼᱞᱟᱣᱼᱟ ᱾ ᱱᱩᱭ ᱟᱪᱷᱟ ᱢᱩᱥᱠᱤᱞ ᱠᱮᱨᱟᱸᱴ ᱦᱚᱲ ᱠᱟᱱᱟᱭ ᱾ ᱦᱟᱹᱱᱤ ᱠᱟᱹᱛᱩ ᱦᱟᱲᱟᱢᱟᱜ ᱡᱷᱚᱜ ᱠᱚᱢᱮ ᱟᱸᱫᱽᱢᱟᱫᱟᱣ ᱟᱠᱟᱫ ᱞᱮᱭᱟ ᱾ ᱟᱯᱱᱟᱨ “ᱦᱤᱨᱞᱟᱹ ᱢᱟᱨᱟᱝ ᱵᱳᱨᱳ” ᱰᱟᱠ ᱠᱷᱟᱱᱮᱢ ᱟᱡ ᱫᱚ ᱢᱮᱛᱟᱢᱟᱭ “ᱦᱚᱨᱤ ᱵᱳᱞ” ᱢᱮᱱ ᱯᱮ ᱾ ᱞᱮᱜᱽ ᱵᱷᱮᱜᱽ ᱡᱷᱚᱜ ᱦᱚᱸ ᱟᱯᱱᱟᱨ ᱦᱟᱯᱲᱟᱢ ᱴᱷᱮᱱ ᱠᱷᱚᱱ ᱧᱮᱞ ᱟᱹᱜᱩ ᱪᱮᱫ ᱟᱹᱜᱩ ᱟᱠᱟᱫ ᱞᱮᱠᱟ ᱩᱱᱩᱢ ᱠᱟᱛᱮ ᱡᱟᱝ ᱵᱟᱦᱟ ᱟᱹᱛᱩᱭ ᱠᱷᱟᱱᱮᱢ ᱟᱡ ᱫᱚᱭ ᱢᱮᱛᱟᱢᱟ “ ᱦᱚᱸ ᱛᱤ ᱛᱮ ᱵᱚᱦᱮᱞ ᱜᱚᱫ ᱠᱟᱜ ᱨᱮᱦᱚᱸ ᱜᱟᱱᱚᱜ ᱜᱮᱭᱟ ᱾ ᱥᱮᱼᱭᱤ ᱢᱤᱫ ᱠᱟᱛᱷᱟ ᱜᱮ” ᱾ ᱩᱱ ᱡᱷᱚᱜ ᱦᱚᱸ ᱡᱚᱜᱚ ᱵᱟᱭ ᱵᱟᱰᱟᱭ ᱛᱟᱦᱮᱸᱱ ᱵᱷᱚᱲᱵᱷᱩᱲᱤᱭᱟᱹ ᱜᱚᱢᱠᱮ ᱫᱚ ᱟᱡ ᱯᱟᱹᱪᱷᱞᱟᱹ ᱥᱮᱫ ᱨᱮ ᱢᱮᱱᱟᱭᱟ ᱢᱮᱱᱛᱮ ᱾ ᱱᱚᱣᱟ ᱠᱟᱛᱷᱟᱭ ᱟᱸᱡᱚᱢ ᱠᱮᱫ ᱠᱷᱟᱱ ᱰᱟᱹᱨᱤ ᱜᱷᱩᱨ ᱠᱟᱛᱮ ᱯᱟᱹᱪᱷᱞᱟᱹ ᱨᱩᱣᱟᱹᱲ ᱮᱱ ᱞᱮᱠᱟ ᱵᱷᱚᱲᱵᱷᱩᱲᱤᱭᱟᱹ ᱜᱚᱢᱠᱮ ᱫᱟᱹᱲ ᱨᱩᱣᱟᱹᱲ ᱞᱮᱱᱟᱭ ᱚᱱᱟ ᱴᱷᱟᱶ ᱠᱷᱚᱱ ᱤᱱᱦᱤᱞᱚᱜ ᱾

ᱟᱨᱜᱮ ᱵᱤᱨ ᱥᱚᱲᱮ ᱡᱷᱚᱜ ᱦᱚᱸ ᱥᱟᱸᱜᱮ ᱦᱚᱲ ᱛᱮ ᱤᱥᱤᱱ ᱵᱟᱥᱟᱝ ᱠᱷᱟᱹᱛᱤᱨ ᱟᱨ ᱦᱟᱹᱱᱤ ᱯᱟᱹᱨᱤ ᱱᱟᱹᱭ ᱯᱟᱹᱨᱤ ᱵᱩᱞᱩᱝ ᱮᱨ ᱡᱟᱞᱟ ᱞᱮᱴᱚ ᱱᱟᱥᱮᱱᱟᱜ ᱠᱷᱟᱨᱟ ᱧᱚᱜ ᱞᱮᱱᱟ ᱾ ᱦᱚᱲ ᱢᱚᱱᱮ ᱢᱚᱱᱮ ᱛᱮᱠᱚ ᱨᱟᱹᱜᱤ ᱵᱟᱲᱟ ᱮᱱ ᱜᱮᱭᱟ ᱵᱩᱜᱤ ᱛᱟᱨᱟ᱾ ᱮᱱᱦᱚᱸ ᱜᱮ ᱠᱟᱛᱷᱟ ᱵᱟᱠᱚ ᱥᱟᱰᱮ ᱚᱪᱚ ᱞᱮᱫᱼᱟ ᱢᱚᱪᱟ ᱠᱷᱚᱱ ᱾ ᱡᱟᱦᱟᱸᱭ ᱠᱚᱠᱚ ᱢᱮᱱ ᱠᱮᱫᱼᱟ ᱨᱚᱲ ᱥᱚᱵᱷᱟᱜ ᱞᱮᱠᱟ ᱠᱚ ᱢᱮᱱ ᱠᱮᱫᱼᱟ “ᱥᱟᱸᱜᱮ ᱦᱚᱲᱟᱜ ᱨᱮᱫᱚ ᱢᱤᱢᱤᱫ ᱫᱷᱟᱣ ᱵᱮᱵᱷᱩᱞ ᱦᱩᱭ ᱜᱚᱫᱚᱜ ᱜᱮᱭᱟ ᱾ ᱟᱨ ᱫᱚᱦᱲᱟ ᱡᱮᱢᱚᱱ ᱪᱮᱫ ᱞᱮᱠᱟᱨᱮ ᱵᱷᱩᱞ ᱟᱞᱚ ᱦᱩᱭᱩᱜ ᱢᱟ ᱚᱱᱟ ᱞᱟᱹᱜᱤᱫ ᱥᱚᱱᱛᱚᱨ ᱵᱚ ᱛᱟᱦᱮᱸᱱ ᱢᱟ ᱵᱟᱲᱮ” ᱾ ᱤᱠᱷᱟᱹᱱ ᱱᱩᱭ ᱵᱷᱚᱲᱵᱷᱩᱲᱤᱭᱟᱹ ᱜᱚᱢᱠᱮ ᱫᱚ ᱞᱮᱴᱚ ᱡᱚᱢ ᱛᱟᱨᱟ ᱪᱟᱠᱷᱟ ᱥᱟᱶᱛᱮ ᱵᱷᱚᱴᱚᱨ ᱵᱷᱚᱴᱚᱨ ᱨᱚᱲ ᱮ ᱮᱦᱚᱵ ᱠᱮᱫᱼᱟ “ᱫᱤᱥᱩᱣᱟᱹ ᱦᱟᱜ ᱨᱮ ᱱᱚᱝᱠᱟ ᱯᱮ ᱤᱥᱤᱱ ᱟᱠᱟᱫᱼᱟ ᱾ ᱟᱞᱱᱟ ᱦᱟᱜ ᱨᱮᱫᱚ ᱵᱩᱞᱩᱝ ᱮᱢ ᱮᱨ ᱡᱩᱴᱤᱡᱟᱜᱼᱟ ᱾ ᱱᱚᱣᱟ ᱠᱷᱟᱨᱟ ᱦᱟᱜ ᱨᱮ ᱵᱟᱝᱫᱚ ᱦᱮᱲᱮᱢᱟᱜ, ᱦᱮᱣᱮᱨᱟᱜ ᱪᱮ ᱦᱟᱲᱦᱟᱫᱟᱜ ᱮᱢ ᱢᱮᱥᱟ ᱦᱟᱜ ᱠᱷᱟᱱ ᱜᱟᱱᱚᱜᱼᱟ” ᱾ ᱩᱱ ᱡᱷᱚᱜ ᱠᱷᱚᱱ ᱵᱤᱨ ᱥᱚᱲᱮ ᱵᱟᱠᱚ ᱰᱚᱰᱮ ᱮᱭᱟ ᱪᱮ ᱯᱩᱭᱥᱟᱹ ᱩᱴᱷᱟᱹᱣ ᱦᱚᱸ ᱟᱡᱟᱜ ᱫᱩᱣᱟᱹᱨ ᱦᱚᱲ ᱵᱟᱠᱚ ᱥᱮᱱᱚᱜᱼᱟ ᱾ ᱴᱚᱞᱟ ᱡᱟᱠ ᱦᱚᱲ ᱰᱚᱯᱚᱰᱮ ᱠᱚ ᱪᱟᱞᱟᱜᱼᱟ ᱡᱷᱚᱲᱟ ᱚᱰᱚᱠ ᱟᱠᱟᱫ ᱠᱚ ᱞᱮᱠᱟ ᱾ ᱠᱷᱟᱹᱞᱤ ᱵᱷᱚᱲᱵᱷᱩᱲᱤᱭᱟᱹ ᱜᱚᱢᱠᱮ ᱛᱮᱠᱚ ᱚᱲᱟᱜ ᱦᱚᱲ ᱪᱷᱟᱰᱟ ᱠᱟᱛᱮ ᱾ ᱢᱟᱲᱟᱝ ᱢᱟᱲᱟᱝ ᱱᱚᱣᱟ ᱜᱷᱚᱴᱱᱟ ᱠᱚ ᱵᱟᱭ ᱦᱮᱛᱟ ᱦᱟᱜ ᱠᱟᱱ ᱛᱟᱦᱮᱸᱱ ᱾ ᱫᱤᱱᱟᱹᱢ ᱫᱤᱱᱟᱹᱢ ᱫᱷᱟᱨᱟ ᱩᱱᱟᱸᱜ ᱫᱷᱟᱣ ᱠᱚ ᱮᱨᱮᱲ ᱠᱮᱫᱮ ᱠᱷᱟᱱ ᱮᱠᱞᱟ ᱜᱮ ᱵᱩᱡᱷᱟᱹᱣ ᱪᱟᱵᱟ ᱠᱮᱫᱼᱟᱭ ᱾ ᱚᱠᱚᱭ ᱦᱚᱸ ᱪᱤᱞᱤ ᱦᱚᱸᱜᱮ ᱵᱟᱠᱚ ᱦᱮᱛᱟ ᱦᱟᱭ ᱠᱟᱱᱟ ᱪᱮ ᱨᱚᱲ ᱦᱚᱸ ᱛᱟᱭ ᱵᱟᱠᱚ ᱠᱷᱮᱥᱚᱢᱟᱜ ᱠᱟᱱᱟ ᱢᱮᱱᱛᱮ ᱵᱟᱰᱟᱭ ᱪᱟᱵᱟ ᱠᱮᱫᱼᱟᱭ᱾ ᱪᱮᱫ ᱮ ᱪᱮᱠᱟᱭᱟ ? ᱵᱩᱫᱷᱤ ᱜᱮ ᱵᱟᱝ ᱫᱤᱥᱟᱹ ᱦᱟᱫᱮᱭᱟ ᱾ ᱚᱠᱚᱭ ᱴᱷᱮᱱᱮ ᱞᱟᱹᱭᱼᱭᱟ ᱵᱷᱚᱨᱥᱟ ᱦᱚᱸ ᱵᱟᱝ ᱠᱩᱲᱟᱹᱣ ᱟᱫᱮᱭᱟ ? ᱨᱩᱣᱟᱹ ᱵᱮᱢᱟᱨ ᱠᱚᱜ ᱨᱮᱥᱮᱫ ᱰᱟᱠᱛᱚᱨ ᱴᱷᱮᱱᱮ ᱪᱟᱞᱟᱜᱼᱟ ᱾

ᱦᱟᱺᱰᱤ ᱯᱟᱹᱣᱨᱟᱹ ᱧᱩ ᱵᱟᱹᱜᱤ ᱥᱟᱱᱟᱭ ᱠᱷᱟᱱ ᱱᱤᱥᱟᱹ ᱠᱚᱵᱚᱪ ᱛᱟᱞᱢᱟ ᱛᱮ ᱪᱟᱞᱟᱜ ᱟᱭ ᱾ ᱟᱨ ᱜᱮ ᱫᱩᱠ ᱢᱩᱦᱤᱢᱨᱮ ᱯᱟᱲᱟᱣ ᱠᱚ ᱨᱮᱦᱚᱸᱭ ᱦᱩᱱᱟᱹᱝ ᱟᱹᱠᱤᱞ ᱜᱮᱭᱟᱱ ᱦᱚᱲ ᱴᱷᱮᱱ ᱮ ᱥᱮᱱᱚᱜᱼᱟ ᱫᱤᱥ ᱦᱩᱫᱤᱥ ᱵᱩᱫᱷᱤ ᱠᱚᱠᱚᱭ ᱾ ᱵᱷᱚᱲᱵᱷᱩᱲᱤᱭᱟᱹ ᱱᱚᱣᱟ ᱠᱟᱛᱷᱟ ᱠᱚ ᱪᱤᱱᱛᱟᱹ ᱪᱤᱱᱛᱟᱹ ᱛᱮ ᱢᱚᱱ ᱫᱩᱠ ᱨᱮ ᱜᱷᱟᱱᱮ ᱛᱟᱦᱮᱸ ᱮᱱᱠᱷᱟᱱᱮ ᱵᱮᱥ ᱴᱷᱤᱠ ᱛᱮ ᱚᱠᱚᱭ ᱥᱟᱶ ᱦᱚᱸ ᱵᱟᱭ ᱜᱟᱯᱟᱞᱢᱟᱨᱟᱣ ᱞᱮᱱᱟ ᱪᱮ ᱡᱚᱢ ᱧᱩ ᱦᱚᱸ ᱵᱟᱭ ᱥᱤᱵᱤᱞ ᱞᱮᱫᱮᱭᱟ ᱾ ᱥᱟᱨᱟ ᱜᱷᱟᱹᱲᱤ ᱨᱩᱸᱭ ᱨᱩᱸᱭ ᱛᱟᱦᱮᱸ ᱮᱱᱟᱭ᱾ ᱪᱮᱸᱜᱷᱟ ᱜᱮ ᱵᱟᱭ ᱧᱮᱞᱚᱜ ᱠᱟᱱᱠᱷᱟᱱ ᱢᱤᱫ ᱫᱤᱱ ᱫᱚ ᱟᱡ ᱵᱟᱹᱦᱩ ᱠᱩᱞᱤ ᱮ ᱠᱟᱱᱟᱭ “ᱮ ᱛᱮ ᱜᱚ ᱱᱤᱭᱟᱹ ᱵᱟᱹᱨᱥᱤᱧ ᱢᱟ ᱟᱹᱰᱤ ᱛᱷᱤᱨ ᱮᱢ ᱛᱷᱤᱨ ᱠᱚᱜ ᱠᱟᱱ ᱫᱚ ᱾ ᱚᱠᱟ ᱞᱮᱠᱟ ᱠᱟᱛᱷᱟ? ᱪᱮᱫ ᱞᱮᱠᱟ ᱠᱷᱚᱵᱚᱨ? ᱼᱠᱟᱛᱷᱟ ᱠᱷᱚᱵᱚᱨ ᱠᱚ ᱡᱚᱛᱚ ᱱᱟᱯᱟᱭ ᱜᱮᱭᱟ ᱾ ᱼᱩᱸ ᱦᱩᱸᱜ ᱮᱲᱮ ᱤᱧ ᱠᱟᱱᱟᱢ ᱾ ᱜᱟᱹᱦᱤᱸᱨ ᱪᱤᱱᱛᱟᱹ ᱨᱮ ᱥᱟᱨᱟ ᱜᱷᱟᱹᱲᱤᱢ ᱩᱱᱩᱢ ᱠᱚᱜ ᱠᱟᱱᱟ ᱾ ᱟᱹᱰᱤ ᱠᱩᱞᱤ ᱮᱫ ᱢᱮᱨᱮ ᱨᱚᱲ ᱠᱟᱱᱟᱢ ᱾ ᱯᱟᱪᱷᱮ ᱪᱮᱫ ᱠᱟᱛᱷᱟ ᱪᱮᱫ ᱠᱷᱚᱵᱚᱨ ᱠᱚ ᱢᱮᱱᱟᱜᱼᱟ? ᱼᱤᱧ ᱢᱟᱹᱧ ᱵᱮᱥ ᱜᱮ ᱾ ᱡᱚᱢ ᱮᱫᱼᱟᱹᱧ ᱧᱩ ᱮᱫᱼᱟᱹᱧ ᱟᱨ ᱠᱟᱹᱢᱤ ᱠᱟᱱᱟᱹᱧ ᱟᱨ ᱪᱮᱫ ᱵᱟᱝ ? ᱼᱩᱸ ᱦᱩᱸᱜ ᱮᱲᱮ ᱤᱧ ᱠᱟᱱᱟᱢ ᱜᱚ ᱪᱮᱫ ᱪᱚᱝ ᱠᱟᱛᱷᱟ ᱪᱮᱫ ᱪᱚᱝ ᱠᱷᱚᱵᱚᱨ ᱢᱮᱱᱟᱜ ᱜᱮᱭᱟ ᱡᱚᱨᱩᱨ ᱛᱮ᱾ ᱼ ᱳ ᱦᱚ! ᱠᱷᱟᱹᱞᱤ ᱛᱚᱢ ᱨᱚᱜᱚᱲ ᱠᱮᱫᱼᱟ ᱠᱟᱛᱷᱟ ᱪᱮᱫ ᱠᱷᱚᱵᱚᱨ ᱪᱮᱫ? ᱞᱟᱹᱭ ᱟᱢ ᱠᱷᱟᱹᱱᱤᱧ ᱪᱮᱫ ᱯᱷᱩᱨᱜᱟᱹᱞ ᱜᱚᱫ ᱠᱟᱹᱧ ᱟᱢ ? ᱼᱞᱟᱹᱭ ᱜᱮ ᱞᱟᱹᱭ ᱞᱮᱜᱷᱟᱭ ᱢᱮᱥᱮ ᱾ ᱪᱮᱫ ᱞᱮᱠᱟ ᱪᱤᱱᱛᱟᱹ ᱵᱷᱟᱵᱽᱱᱟ ᱠᱷᱚᱱ ᱵᱟᱹᱧ ᱯᱷᱩᱨᱜᱟᱹᱞ ᱟᱠᱟᱫ ᱢᱮᱠᱷᱟᱱ ᱾ ᱼᱟᱨ ᱵᱟᱢ ᱯᱷᱩᱨᱜᱟᱹᱞ ᱟᱠᱟᱫ ᱫᱤᱧ ᱠᱷᱟᱱ ᱾ ᱼᱚᱱᱮ ᱟᱢᱟᱜ ᱢᱟ ᱪᱚᱴ ᱞᱩᱴᱤ ᱨᱮ ᱨᱟᱹᱜᱤ ᱛᱟᱢ ᱾ ᱼᱟᱢ ᱮᱢ ᱢᱮᱱ ᱮᱫᱼᱟ ᱟᱨ ᱦᱚᱲ ᱠᱚᱦᱚᱸ ᱠᱚ ᱢᱮᱱ ᱮᱫᱼᱟ ᱾ ᱤᱧᱟᱜ ᱫᱚ ᱪᱚᱴ ᱞᱩᱴᱤ ᱨᱮ ᱨᱟᱹᱜᱤ ᱾ ᱨᱟᱹᱜᱤ ᱜᱤᱭᱟᱹᱧ ᱾ ᱚᱱᱟᱛᱮ ᱚᱠᱚᱭ ᱥᱟᱶ ᱦᱚᱸ ᱨᱚᱲ, ᱜᱟᱯᱟᱞᱢᱟᱨᱟᱣ ᱛᱤᱧ ᱵᱟᱝ ᱯᱚᱴᱟᱣᱜᱼᱟ ᱵᱟᱝ ᱜᱟᱯᱟᱱᱟ ᱾ ᱵᱟᱰᱟᱭᱟᱢ ᱪᱮ ᱜᱚ ᱪᱮᱴᱨᱟ ᱧᱮᱞ ᱛᱮ ᱵᱷᱤᱰᱤ ᱵᱷᱤᱲ ᱵᱷᱤᱲ ᱠᱚ ᱧᱤᱨ ᱞᱮᱠᱟ ᱤᱧ ᱧᱮᱞ ᱛᱮ ᱦᱚᱲ ᱦᱚᱨ ᱠᱷᱚᱱ ᱟᱛᱚᱢ ᱠᱟᱛᱮ ᱮᱴᱟᱜ ᱥᱮᱫ ᱛᱮᱠᱚ ᱪᱟᱞᱟᱜ ᱠᱟᱱᱟ ᱾

ᱮᱴᱟᱜ ᱥᱮᱫ ᱠᱚ ᱠᱚᱭᱚᱜᱮᱫᱼᱟ ᱾ ᱼᱳ ! ᱱᱚᱣᱟ ᱠᱟᱛᱷᱟ ᱞᱟᱹᱜᱤᱫ ᱩᱱᱟᱹᱜ ᱢᱚᱱ ᱫᱩᱠ᱾ ᱼᱵᱟᱹᱧ ᱢᱚᱱ ᱫᱩᱠᱩᱜᱼᱟ ᱾ ᱡᱤᱣᱤᱫ ᱡᱤᱵᱚᱱ ᱨᱮ ᱜᱚᱡ ᱦᱚᱲ ᱢᱟᱬᱟᱸ ᱛᱟᱹᱱᱤᱡ ᱜᱤᱛᱤᱡ ᱜᱤᱰᱤ ᱠᱚᱜ ᱞᱮᱠᱟ ᱤᱧ ᱫᱚ ᱵᱷᱮᱜᱟᱨ ᱥᱮᱫ ᱨᱮ ᱮᱠᱞᱟ ᱢᱮᱱᱟᱹᱧᱟ᱾ ᱱᱩᱱ ᱢᱟᱨᱟᱝ ᱫᱷᱟᱹᱨᱛᱤ ᱨᱮ ᱥᱟᱜᱟᱞ ᱥᱟᱜᱟᱞ ᱦᱚᱲ ᱜᱟᱫᱮᱞ ᱨᱮ ᱤᱧ ᱫᱚ ᱤᱧ ᱥᱩᱢᱩᱝ ᱮᱠᱞᱟ ᱜᱮ ᱾ ᱼᱦᱚᱴᱟᱜ ᱯᱟᱹᱥᱤᱨ ᱦᱚᱲ ᱨᱚᱲ ᱦᱟᱹᱥᱩ ᱠᱚ ᱞᱮᱠᱟ ᱪᱷᱟᱝ ᱪᱷᱚᱝ ᱫᱚ ᱟᱞᱚᱥᱮᱢ ᱨᱚᱲᱟ ᱾ᱨᱚᱲ ᱮᱫ ᱠᱟᱛᱷᱟ ᱠᱚ ᱠᱟᱹᱴᱤᱡ ᱩᱭᱦᱟᱹᱨ ᱟᱹᱪᱩᱨ ᱠᱟᱛᱮ ᱨᱚᱲ ᱢᱮ ᱾ ᱪᱮᱫ ᱦᱟᱸᱜ ᱱᱟᱯᱟᱭ ᱱᱚᱨᱚᱢ ᱨᱚᱲ ᱛᱮ ᱟᱞᱟᱝ ᱛᱟᱢ ᱦᱮᱲ ᱢᱟᱨᱮᱜ ᱠᱟᱱᱟ ᱪᱮ ᱞᱟᱸᱵᱮᱫ ᱜᱤᱛᱟᱹᱜᱚᱜ ᱠᱟᱱ ᱛᱮ ᱵᱟᱝ ᱩᱞᱴᱟᱹᱣᱜ ᱠᱟᱱᱟ? ᱤᱱᱟᱹᱜ ᱠᱷᱟᱱ ᱜᱮ ᱛᱚ ᱦᱚᱲ ᱨᱚᱲ ᱵᱟᱭ ᱦᱟᱹᱥᱩ ᱠᱚᱣᱟ ᱵᱟᱠᱚ ᱨᱟᱹᱜᱤ ᱟᱢᱟ ᱾ ᱼᱤᱧ ᱫᱚ ᱟᱹᱪᱩᱨ ᱵᱤᱦᱩᱨ ᱨᱚᱲ ᱠᱚ ᱵᱟᱹᱧ ᱵᱟᱰᱟᱭᱟ ᱾ ᱨᱚᱠ ᱴᱷᱚᱠ ᱴᱷᱟᱜ ᱴᱷᱚᱜ ᱦᱚᱠ ᱠᱟᱛᱷᱟᱹᱧ ᱨᱚᱲᱟ ᱾ ᱚᱱᱟᱛᱮᱜᱮ ᱛᱚ ᱤᱧᱟᱜ ᱢᱩᱬ ᱧᱩᱛᱩᱢ ᱜᱩᱸᱡᱟᱹᱭ ᱟᱨ ᱟᱭᱳ ᱵᱟᱵᱟ ᱮᱢ ᱫᱩᱞᱟᱹᱲ ᱧᱩᱛᱩᱢ ᱜᱚᱝᱜᱟ ᱵᱟᱫᱟᱞ ᱛᱮ ᱦᱚᱲ ᱢᱟᱠᱚ ᱦᱚᱦᱚᱣᱟᱹᱧ ᱵᱷᱚᱲᱵᱷᱩᱲᱤᱭᱟᱹ ᱾ ᱼᱦᱚᱭ ᱛᱚᱵᱮ ᱢᱤᱫ ᱠᱟᱛᱷᱟᱧ ᱢᱮᱛᱟᱢ ᱠᱟᱱᱟ ᱟᱸᱡᱚᱢ ᱞᱮᱢᱮ ᱾ ᱨᱟᱹᱜᱤᱜ ᱠᱷᱟᱱ ᱢᱮᱫ ᱠᱩᱴᱤ ᱩᱵ ᱠᱚ ᱨᱤᱥ ᱨᱤᱥᱤᱜ ᱟᱪᱮ ᱵᱟᱝ ᱾ ᱢᱮᱫ ᱠᱚ ᱟᱨᱟᱜ ᱯᱩᱸᱰ ᱢᱟᱨᱟᱝ ᱢᱟᱨᱟᱝ ᱞᱟᱸᱰᱟ ᱞᱩᱸᱰᱩ ᱧᱮᱞᱚᱜ ᱟᱪᱮ ᱵᱟᱝ ᱴᱷᱤᱠ ᱡᱷᱤᱸᱠ ᱨᱟᱹᱜᱤ ᱠᱚᱜ ᱡᱷᱚᱜ ᱞᱮᱠᱟ ᱾ ᱚᱱᱠᱟ ᱜᱮ ᱦᱚᱲ ᱦᱚᱸ ᱵᱚᱛᱚᱨᱟᱱ ᱜᱮᱢ ᱧᱮᱞᱚᱜᱼᱟ ᱾

ᱥᱟᱢᱟᱝ ᱨᱤᱱᱤᱡ ᱦᱚᱲ ᱵᱚᱛᱚᱨᱟᱢᱟᱭ ᱡᱟᱦᱟᱸ ᱛᱤᱱᱟᱹᱜ ᱚᱱᱟ ᱠᱷᱚᱱ ᱟᱨ ᱦᱚᱸ ᱰᱷᱮᱨ ᱦᱤᱨᱠᱟᱹ ᱦᱤᱞᱟᱹᱝ ᱟᱢᱟᱭ ᱾ ᱟᱨ ᱠᱩᱥᱤ ᱠᱩᱥᱤ ᱠᱟᱛᱷᱟᱜ ᱠᱷᱟᱱᱮᱢ ᱵᱟᱦᱟ ᱞᱮᱠᱟ ᱨᱟᱹᱥᱠᱟᱹ ᱜᱮᱢ ᱧᱮᱞᱚᱜᱼᱟ ᱾ ᱨᱚᱲ ᱠᱚᱦᱚᱸ ᱱᱟᱯᱟᱭ ᱜᱮ ᱟᱸᱡᱚᱢᱚᱜᱼᱟ ᱾ ᱥᱟᱢᱟᱝ ᱨᱤᱱᱤᱡ ᱦᱚᱲ ᱢᱤᱫ ᱰᱚᱸᱰᱮᱠ ᱞᱟᱹᱜᱤᱫ ᱨᱮᱦᱚᱸ ᱫᱩᱠ ᱦᱟᱨᱠᱮᱛ ᱦᱤᱲᱤᱧ ᱜᱚᱫᱟᱭ ᱾ ᱚᱱᱟ ᱛᱤᱧ ᱢᱮᱛᱟᱢ ᱠᱟᱱᱟ ᱜᱚ ᱡᱷᱤᱸᱠ ᱟᱨ ᱵᱟᱦᱟ ᱦᱟᱜ ᱠᱟᱛᱷᱟ ᱦᱮᱛᱟ ᱧᱚᱜᱽ ᱢᱮ ᱦᱚᱲ ᱠᱚ ᱥᱟᱶ ᱜᱟᱯᱟᱞᱢᱟᱨᱟᱣ ᱡᱷᱚᱜ ᱫᱚ ᱾ ᱼᱫᱷᱟᱴ ᱫᱷᱟᱴ ᱡᱷᱤᱸᱠ ᱟᱨ ᱵᱟᱦᱟ ᱦᱟᱜ ᱠᱟᱛᱷᱟᱧ ᱩᱭᱦᱟᱹᱨ ᱵᱟᱲᱟᱭᱟ ᱾ ᱠᱟᱹᱢᱤ ᱢᱟᱛᱤᱧ ᱪᱮᱫ ᱦᱚᱸ ᱵᱟᱹᱱᱩᱜ ᱟᱱᱟᱝ? ᱼᱵᱟᱝ ᱠᱷᱟᱱ ᱵᱟᱢ ᱩᱭᱦᱟᱹᱨ ᱠᱮᱫ ᱜᱮ ᱾ ᱵᱩᱫᱷᱤᱧ ᱞᱟᱹᱭ ᱟᱢ ᱠᱟᱱ ᱠᱷᱟᱱ ᱵᱮᱰᱮᱢ ᱜᱚᱨᱚᱵᱽ ᱠᱟᱱᱟ ᱫᱷᱚᱢᱚᱠ ᱮᱢ ᱫᱮᱠᱷᱟᱣ ᱟᱹᱧ ᱠᱟᱱᱟ᱾ ᱢᱟᱹᱨ ᱟᱢᱟᱜ ᱠᱟᱛᱷᱟ ᱟᱢ ᱱᱤᱡᱮ ᱵᱩᱡᱷᱟᱹᱣ ᱢᱮ ᱤᱧ ᱫᱩᱧ ᱪᱟᱞᱟᱜ ᱠᱟᱱᱟ ᱢᱮᱱ ᱠᱟᱛᱮ ᱵᱟᱹᱦᱩ ᱛᱟᱭ ᱵᱮᱨᱮᱫ ᱵᱟᱹᱜᱤ ᱟᱫᱮᱭᱟ ᱾ ᱵᱷᱚᱲᱵᱷᱩᱲᱤᱭᱟᱹ ᱜᱚᱢᱠᱮ ᱮᱠᱞᱟᱨᱮ ᱩᱭᱦᱟᱹᱨ ᱟᱭ ᱯᱷᱩᱴᱟᱹᱣ ᱥᱟᱲ ᱵᱟᱦᱟ ᱦᱟᱜ ᱞᱟᱸᱫᱟ ᱞᱟᱸᱫᱟ ᱢᱩᱴᱷᱟᱹᱱ ᱛᱤᱱᱟᱹᱜ ᱪᱮᱦᱨᱟ ᱧᱮᱞᱚᱜᱼᱟ ᱾ ᱧᱮᱞᱛᱮ ᱢᱚᱱᱮᱨᱮ ᱥᱩᱠ ᱥᱟᱹᱱᱛᱤ ᱵᱩᱡᱷᱟᱹᱣ ᱜᱚᱫᱚᱜᱼᱟ ᱾ ᱟᱨ ᱡᱷᱤᱸᱠ ᱫᱚ ᱨᱟᱹᱜᱤ ᱠᱚᱜ ᱡᱷᱚᱜ ᱢᱟ ᱵᱚᱛᱚᱨᱟᱱ ᱜᱮ ᱧᱮᱞᱚᱜ ᱟᱭ᱾ ᱡᱟᱸᱦᱟᱭ ᱜᱮ ᱵᱚᱛᱚᱨ ᱜᱩᱡᱩᱜ ᱟᱭ ᱾

ᱟᱡ ᱦᱚᱸ ᱯᱟᱞᱮᱱ ᱨᱟᱹᱜᱤ ᱠᱚᱜ ᱡᱷᱚᱜ ᱫᱚ ᱡᱷᱤᱸᱠ ᱞᱮᱠᱟ ᱜᱮ ᱧᱮᱞᱚᱜ ᱟᱭ ᱾ ᱚᱱᱟᱛᱮ ᱚᱠᱚᱭ ᱦᱚᱸ ᱨᱚᱲ ᱛᱟᱭ ᱵᱟᱠᱚ ᱠᱩᱥᱤᱭᱟᱜᱼᱟ ᱪᱮ ᱡᱟᱦᱟᱸ ᱥᱮᱫ ᱵᱟᱠᱚ ᱰᱚᱰᱮ ᱫᱮ ᱫᱮᱞᱟ ᱦᱟᱭᱟ ᱾ ᱱᱚᱣᱟ ᱨᱚᱠ ᱴᱷᱚᱠ ᱴᱷᱟᱜ ᱴᱷᱚᱜ ᱨᱚᱲ ᱥᱟᱶᱛᱮ ᱨᱟᱹᱜᱤ ᱵᱟᱹᱜᱤ ᱞᱟᱹᱜᱤᱫ ᱛᱮᱠᱷᱟᱱ ᱡᱤᱣᱤ ᱡᱩᱨᱤᱭᱟᱜ ᱠᱟᱛᱷᱟ ᱢᱟᱱᱟᱣ ᱵᱟᱛᱟᱣ ᱛᱮᱜᱮ ᱦᱩᱭ ᱟᱭᱟ ᱾ ᱟᱨ ᱵᱟᱝ ᱠᱷᱟᱱ ᱫᱚ “ᱯᱟᱨᱟᱝᱜᱚᱛ” ᱛᱟᱭ ᱵᱟᱹᱱᱩᱜ ᱟᱱᱟᱝ ᱢᱮᱱᱛᱮ ᱢᱚᱱᱮ ᱡᱤᱣᱤ ᱚᱱᱛᱚᱨ ᱨᱮ ᱵᱤᱪᱟᱹᱨ ᱠᱟᱛᱮ ᱵᱟᱰᱟᱭ ᱵᱩᱡᱷᱟᱹᱣ ᱠᱮᱫᱼᱟᱭ ᱾ ᱱᱮᱜ ᱮ ᱛᱤᱱᱟᱹᱜ ᱫᱤᱱ ᱦᱩᱭᱩᱜ ᱠᱟᱱᱟ ᱵᱷᱚᱲᱵᱷᱩᱲᱤᱭᱟᱹ ᱵᱟᱹᱦᱩ ᱯᱚᱨᱚᱠ ᱮᱫᱼᱟᱭ ᱵᱷᱚᱲᱵᱷᱩᱲᱤᱭᱟᱹ ᱜᱚᱢᱠᱮ ᱢᱟᱲᱟᱝ ᱞᱮᱠᱟ ᱵᱟᱭ ᱨᱟᱹᱜᱤᱜ ᱠᱟᱱᱟ ᱾ ᱯᱟᱪᱷᱮ ᱫᱷᱚᱨᱟ ᱮᱢᱟᱱᱚᱜ ᱟᱭ ᱢᱮᱱᱛᱮ ᱯᱟᱞᱮ ᱵᱟᱦᱟ ᱢᱚᱦᱮ ᱟᱠᱟᱱ ᱞᱮᱠᱟ ᱢᱮᱫ ᱟᱦᱟ ᱛᱟᱭ ᱥᱚᱫᱚᱨᱚᱜ ᱠᱟᱱᱟ ᱜᱟᱯᱟᱞᱢᱟᱨᱟᱣ ᱡᱷᱚᱜ ᱾ ᱟᱫᱚ ᱯᱟᱹᱛᱭᱟᱹᱣ ᱢᱮᱱᱟᱜ ᱛᱟᱭᱟ ᱵᱟᱦᱟ ᱢᱚᱦᱮ ᱟᱠᱟᱱ ᱠᱷᱟᱱ ᱥᱩᱨ ᱫᱤᱱᱨᱮ ᱜᱮ ᱦᱟᱸᱜ ᱵᱩᱥᱟᱹᱲᱚᱜᱼᱟ ᱾ ᱟᱨ ᱜᱚᱴᱟ ᱯᱟᱲᱟ ᱜᱩᱱ ᱦᱚᱸ ᱢᱚᱦᱠᱟᱣ ᱵᱟᱰᱟᱭᱚᱜ ᱜᱮᱭᱟ ᱾ ᱢᱤᱫ ᱫᱤᱱ ᱦᱤᱞᱚᱜ ᱵᱷᱚᱲᱵᱷᱩᱲᱤᱭᱟᱹ ᱵᱟᱹᱦᱩ ᱪᱷᱟᱴᱠᱟ ᱨᱮ ᱛᱤᱸᱜᱩ ᱟᱠᱟᱱᱟᱭ ᱾ ᱧᱮᱞ ᱧᱟᱢ ᱠᱮᱫᱮ ᱠᱷᱟᱱ ᱤᱨᱤᱞ ᱦᱤᱥᱟᱹᱵᱽ ᱦᱩᱭᱩᱜ ᱟᱭ ᱴᱚᱞᱟ ᱨᱤᱱ ᱢᱤᱫᱴᱟᱹᱝ ᱠᱚᱲᱟ ᱢᱮᱱ ᱠᱮᱫᱼᱟᱭ “ᱮ ᱦᱤᱞᱤ ᱪᱮᱫ ᱞᱮᱠᱟᱨᱮ ᱤᱧ ᱫᱟᱫᱟ ᱫᱚᱭ ᱵᱚᱫᱚᱞ ᱮᱱᱟ ? ᱤᱧ ᱫᱚ ᱪᱮᱫ? ᱴᱚᱞᱟ ᱡᱟᱠ ᱦᱚᱲ ᱠᱚ ᱦᱟᱦᱟᱲᱟ ᱵᱷᱟᱹᱲᱩᱢᱵᱷᱟᱜ ᱪᱟᱵᱟ ᱮᱱᱟ ᱾ ᱵᱷᱚᱲᱵᱷᱩᱲᱤᱭᱟᱹ ᱵᱟᱹᱦᱩ ᱠᱟᱛᱷᱟ ᱛᱮᱞᱟ ᱨᱩᱣᱟᱹᱲ ᱠᱟᱛᱮ ᱢᱮᱱᱟᱭ “ᱠᱟᱢᱟᱨ ᱥᱟᱲᱨᱮ ᱠᱟᱢᱟᱨ ᱢᱮᱬᱦᱮᱫ ᱞᱚᱞᱚ ᱞᱟᱹᱵᱤᱫ ᱠᱚᱜ ᱛᱟᱠ ᱨᱮ ᱨᱩᱯ ᱮ ᱜᱚᱲᱦᱚᱱᱟᱜ ᱞᱮᱠᱟ ᱦᱚᱲᱟᱜ ᱢᱚᱱ ᱦᱚᱸ ᱛᱟᱠ ᱡᱟᱹᱱᱤ ᱯᱟᱡᱟᱣ ᱞᱮᱠᱷᱟᱱ ᱵᱚᱫᱚᱞᱚᱜ ᱜᱮᱭᱟ ᱵᱟᱹᱵᱩ” ᱾

ᱵᱷᱚᱲᱵᱷᱩᱲᱤᱭᱟᱹ ᱜᱚᱢᱠᱮ ᱫᱚ ᱛᱟᱭᱚᱢ ᱥᱮᱫ ᱨᱮ ᱛᱤᱸᱜᱩ ᱠᱟᱛᱮ ᱟᱸᱜᱼᱡᱚᱢ ᱠᱟᱱᱟᱭ ᱛᱤᱱ ᱨᱮᱪᱚᱝ ᱦᱮᱡ ᱛᱷᱤᱨ ᱠᱟᱛᱮ ᱾ ᱵᱟᱰᱟᱭ ᱫᱟᱲᱮ ᱟᱫᱟ ᱟᱭ ᱟᱡᱟᱜ ᱠᱟᱛᱷᱟ ᱜᱮᱠᱤᱱ ᱜᱟᱯᱟᱞᱢᱟᱨᱟᱣ ᱠᱟᱱᱟ ᱾ ᱚᱱᱟᱛᱮ ᱞᱟᱸᱫᱟ ᱵᱟᱭ ᱥᱟᱸᱵᱽᱲᱟᱣ ᱫᱟᱲᱮᱭᱟᱜᱼᱟ ᱾ ᱱᱚᱛᱮ ᱞᱟᱸᱫᱟᱭ ᱠᱷᱟᱱ ᱦᱚᱸᱭ ᱞᱟᱡᱟᱣᱜ ᱠᱟᱱᱟ ᱾ ᱚᱱᱟᱛᱮ ᱞᱟᱸᱫᱟ ᱫᱚ ᱠᱷᱩᱜ ᱥᱮᱫ ᱵᱚᱫᱚᱞ ᱠᱟᱫᱟ ᱟᱭ ᱾ ᱠᱷᱩᱜ ᱟᱸᱡᱚᱢ ᱛᱮ ᱵᱷᱚᱲᱵᱷᱩᱲᱤᱭᱟᱹ ᱵᱟᱹᱦᱩ ᱯᱟᱹᱪᱷᱞᱟᱹ ᱥᱮᱫ ᱠᱚᱭᱚᱜ ᱠᱮᱫ ᱠᱷᱟᱱ ᱵᱷᱚᱲᱵᱷᱩᱲᱤᱭᱟᱹ ᱜᱚᱢᱠᱮ ᱫᱚ ᱚᱛ ᱠᱚᱭᱚᱜ ᱠᱟᱛᱮ ᱛᱤᱨᱩᱵ ᱛᱷᱤᱨ ᱮᱱᱟᱭ ᱾ ᱮᱱᱠᱷᱟᱱ ᱵᱷᱚᱲᱵᱷᱩᱲᱤᱭᱟᱹ ᱵᱟᱹᱦᱩ ᱯᱟᱹᱛᱭᱟᱹᱣ ᱩᱛᱟᱹᱨ ᱮᱱᱟᱭ ᱟᱡ ᱞᱟᱹᱭ ᱥᱤᱠᱷᱟᱹᱣ ᱟᱠᱟᱫᱮ ᱡᱷᱤᱸᱠ ᱟᱨ ᱵᱟᱦᱟᱦᱟᱜ ᱠᱟᱛᱷᱟ ᱵᱷᱚᱲᱵᱷᱩᱲᱤᱭᱟᱹ ᱜᱚᱢᱠᱮ ᱯᱟᱹᱛᱭᱟᱹᱣ ᱟᱠᱟᱣᱫᱟᱭ ᱟᱨ ᱱᱚᱜᱼᱚᱭ ᱥᱟᱹᱨᱤ ᱥᱟᱹᱨᱤ ᱠᱟᱹᱢᱤ ᱨᱮᱦᱚᱸᱭ ᱩᱫᱩᱜ ᱠᱮᱫᱼᱟ ᱾

***