ᱛᱤᱨᱞᱟᱹ ᱦᱚᱯᱚᱱ ᱫᱚ ᱟᱭᱢᱟ ᱟᱱᱟᱴ ᱮᱴᱠᱮᱴᱚᱬᱮ ᱛᱟᱞᱟ ᱛᱮᱜᱮ ᱡᱤᱭᱚᱱ ᱵᱤᱛᱟᱹᱣ ᱤᱫᱤ ᱞᱟᱜᱟᱣ ᱟᱵᱚᱱᱟ ᱾ ᱱᱚᱶᱟ ᱡᱮᱜᱮᱛ ᱛᱟᱞᱟᱨᱮ ᱥᱟᱱᱟᱢ ᱠᱚᱜᱮ ᱟᱹᱰᱤ ᱞᱮᱠᱟᱱ ᱡᱟᱸᱜᱮ ᱥᱟᱢᱟᱝ ᱫᱟᱯᱨᱟᱢ ᱨᱮ ᱥᱟᱢᱟᱝ ᱦᱩᱭ ᱟᱠᱚ ᱜᱮᱭᱟ ᱾ ᱮᱱᱛᱮ ᱨᱮᱦᱚᱸ ᱛᱤᱨᱞᱟᱹ ᱦᱚᱯᱚᱱ ᱫᱚ ᱟᱹᱰᱤ ᱛᱮᱫ ᱜᱮᱵᱚᱱ ᱡᱩᱫᱟᱹ ᱜᱮᱭᱟ ᱾ ᱟᱹᱰᱤ ᱦᱟᱨᱠᱮᱛ, ᱥᱟᱥᱮᱛ, ᱱᱟᱦᱟᱪᱟᱨ ᱵᱷᱚᱨᱚᱢ ᱱᱟᱥᱟᱣ, ᱢᱟᱹᱱ ᱤᱡᱽᱡᱚᱛ, ᱦᱟᱱᱟᱣ, ᱟᱹᱰᱤ ᱞᱮᱠᱟᱱᱟᱜ ᱵᱚᱛᱚᱨ ᱢᱩᱦᱤᱢ ᱜᱩᱨᱞᱟᱹᱣ ᱥᱮᱴᱮᱨᱚᱜᱼᱟ ᱛᱤᱨᱞᱟᱹ ᱡᱤᱭᱚᱱ ᱨᱮ ᱾ ᱛᱤᱨᱞᱟᱹ ᱵᱟᱝ ᱠᱷᱟᱱ ᱜᱮᱮ ᱴᱟᱜ ᱫᱩᱣᱟᱹᱨ, ᱜᱷᱟᱨᱚᱸᱡᱽ, ᱥᱚᱝᱥᱟᱨ, ᱥᱟᱶᱛᱟ, ᱥᱚᱢᱟᱡᱽ, ᱱᱚᱶᱟ ᱫᱤᱥᱚᱢ ᱨᱮᱱᱟᱜ ᱞᱟᱦᱟᱱᱛᱤ ᱮᱠᱟᱞ ᱚᱦᱚᱣᱟᱱ ᱜᱮᱭᱟ ᱾ ᱮᱱᱛᱮ ᱨᱮᱦᱚᱸ ᱡᱚᱛᱷᱟᱛ ᱢᱟᱹᱱ ᱫᱚ ᱵᱟᱝ ᱵᱚᱱ ᱧᱟᱢᱮᱫ ᱜᱮᱭᱟ ᱾ ᱟᱵᱚ ᱛᱤᱨᱞᱟᱹ ᱠᱚ ᱪᱮᱫ ᱞᱮᱠᱟᱨᱮ ᱱᱟᱯᱟᱭ ᱛᱮᱵᱚ ᱛᱟᱦᱮᱸᱱᱟ ᱚᱱ ᱟᱜᱮ ᱩᱭᱦᱟᱹᱨ ᱞᱟᱹᱠᱛᱤ ᱠᱟᱱ ᱟᱵᱚᱱᱟ, ᱪᱮᱫ ᱞᱮᱠᱟᱨᱮ ᱟᱱᱟᱴ ᱠᱚ ᱵᱚᱱ ᱥᱚᱞᱦᱮᱭᱟ, ᱚᱱᱟ ᱫᱤᱥ ᱦᱩᱫᱤᱥ ᱯᱟᱱᱛᱮ ᱞᱟᱜᱟᱣ ᱟᱵᱚᱱᱟ ᱾ ᱟᱵᱚᱣᱟᱜ ᱜᱷᱟᱨᱚᱸᱡᱽ, ᱟᱵᱚᱣᱟᱜ ᱥᱟᱶᱛᱟ ᱥᱚᱢᱟᱡᱽ, ᱪᱮᱫ ᱞᱮᱠᱟᱨᱮ ᱨᱤᱞᱟᱹᱢᱟᱞᱟ ᱵᱚᱱ ᱫᱚᱦᱚᱭᱟ ᱚᱱᱟ ᱯᱟᱱᱛᱷᱟ ᱜᱮ ᱛᱚᱞᱟᱥ ᱞᱟᱜᱟᱣ ᱟᱵᱚᱱᱟ ᱾
ᱛᱤᱨᱤ ᱡᱩᱨᱤᱭᱟᱜ ᱢᱚᱱᱮ ᱢᱤᱞᱚᱱ ᱥᱤᱠᱲᱤ ᱛᱤᱱᱟᱹᱜ ᱠᱮᱴᱮᱡᱚᱜᱼᱟ, ᱡᱩᱨᱤ ᱯᱟᱹᱨᱤᱭᱟᱜ ᱱᱟᱯᱟᱭ ᱜᱩᱱᱟᱹᱱ ᱱᱟᱯᱟᱨ ᱵᱮᱵᱷᱟᱨ, ᱜᱟᱹᱦᱤᱸᱨ ᱯᱟᱹᱛᱭᱟᱹᱣ, ᱟᱨ ᱥᱤᱵᱤᱞ ᱫᱩᱞᱟᱹᱲ ᱛᱤᱱᱟᱹᱜ ᱜᱮ ᱜᱟᱵᱮᱭᱟᱱᱟ, ᱚᱱᱟ ᱥᱚᱝᱥᱟᱨ ᱜᱷᱟᱨᱚᱸᱡᱽ ᱨᱮᱫᱚ ᱩᱱᱟᱹᱜ ᱜᱮ ᱠᱩᱥᱤ, ᱨᱟᱹᱥᱠᱟᱹ, ᱥᱩᱯᱩᱞᱩᱠ, ᱨᱮᱱᱟᱜ ᱦᱮᱲᱮᱢ ᱥᱤᱵᱤᱞ ᱨᱟᱥᱟ ᱵᱚᱦᱮᱞ ᱟᱬᱜᱚᱱᱟ ᱾ ᱥᱮᱪᱮᱫ ᱥᱤᱠᱷᱱᱟᱹᱛ ᱛᱮ ᱢᱮᱫ ᱢᱟᱨᱥᱟᱞ ᱟᱱ ᱟᱭᱳ ᱦᱚᱲ ᱜᱮ ᱡᱷᱚᱛᱚ ᱞᱮᱠᱟᱱ ᱟᱱᱟᱴ ᱠᱚ ᱥᱚᱞᱦᱮ ᱫᱟᱲᱮᱭᱟᱜᱼᱟ ᱾ ᱪᱮᱫᱟᱜ ᱵᱟᱝ ᱢᱟ ᱜᱤᱫᱟᱹᱨ ᱯᱤᱫᱟᱹᱨ ᱨᱤᱱ ᱢᱟᱨᱟᱝ ᱢᱟᱪᱮᱛ ᱫᱚ ᱟᱭᱳ ᱜᱮ ᱾ ᱟᱭᱳ ᱡᱩᱫᱤ ᱥᱮᱪᱮᱫ ᱥᱤᱠᱷᱱᱟᱹᱛ, ᱱᱟᱯᱟᱭ ᱜᱩᱱ ᱵᱮᱵᱷᱟᱨ, ᱫᱟᱭᱟ, ᱫᱩᱞᱟᱹᱲ, ᱥᱟᱦᱟᱣ ᱞᱟᱦᱟᱣ ᱢᱩᱞᱞᱚᱵᱚᱫᱷ ᱥᱟᱱᱟᱢ ᱞᱮᱠᱟᱱ ᱱᱟᱯᱟᱭ ᱥᱤᱠᱷᱱᱟᱹᱛ ᱵᱟᱹᱵᱩ, ᱢᱟᱹᱭ ᱛᱮᱠᱚᱭ ᱪᱟᱞ ᱫᱟᱲᱮᱭᱟ ᱠᱚᱣᱟ ᱾ ᱱᱟᱯᱟᱭ ᱪᱩᱨᱤᱛᱟᱱ ᱢᱟᱹᱱᱢᱤ ᱞᱮᱠᱟ ᱢᱟᱹᱱᱢᱤᱭ ᱵᱮᱱᱟᱣ ᱫᱟᱲᱮᱭᱟ ᱠᱚᱣᱟ ᱾ ᱤᱱᱟᱹ ᱫᱚ ᱟᱹᱰᱤ ᱞᱮᱠᱟᱱ ᱢᱩᱦᱤᱢ ᱟᱱᱟᱴ ᱜᱮ ᱟᱹᱰᱤ ᱱᱟᱯᱟᱭ ᱛᱮ ᱥᱚᱞᱦᱮᱜᱼᱟ ᱾ ᱥᱚᱦᱟᱜᱽ ᱫᱩᱞᱟᱹᱲ ᱨᱤᱱᱤᱡ ᱠᱩᱸᱭᱰᱤ ᱢᱤᱨᱩ ᱫᱩᱞᱟᱹᱲ ᱵᱤᱴᱤ ᱱᱟᱯᱟᱭ ᱜᱩᱱᱟᱹᱱ, ᱱᱟᱯᱟᱭ ᱪᱩᱨᱤᱛ ᱟᱱ ᱥᱤᱠᱷᱱᱟᱹᱛ ᱦᱟᱢᱮᱴᱤᱭᱟᱹ ᱦᱩᱭ ᱞᱟᱹᱠᱛᱤᱜ ᱠᱟᱱᱟ ᱾ ᱪᱮᱫᱟᱜ ᱥᱮ ᱩᱱᱤ ᱜᱮ ᱦᱟᱯᱮᱱ ᱡᱟᱦᱟᱸᱭᱤᱡ ᱚᱲᱟᱜ ᱮᱨᱟᱭ ᱵᱮᱱᱟᱣᱜᱼᱟ ᱾ ᱢᱤᱫ ᱫᱤᱱ ᱥᱟᱱᱟᱢ ᱟᱭᱳ ᱛᱚᱣᱟ ᱫᱟᱨᱮ, ᱟᱨ ᱦᱚᱸ ᱢᱤᱫ ᱫᱤᱱᱦᱟᱱᱦᱟᱨ ᱵᱩᱰᱷᱤ ᱦᱚᱸᱭ ᱦᱩᱭᱩᱜᱼᱟ ᱾ ᱢᱤᱫ ᱫᱤᱱ ᱦᱤᱞᱚᱜ ᱱᱟᱯᱟᱭ ᱦᱩᱫᱤᱥ ᱫᱤᱥᱟᱹ ᱩᱫᱩᱜᱤᱡ ᱜᱚᱲᱚᱢ ᱵᱩᱰᱷᱤᱭ ᱵᱮᱱᱟᱣᱜᱼᱟ ᱾ ᱟᱡᱟᱜ ᱱᱟᱯᱟᱭ ᱜᱩᱱᱟᱹᱱ ᱛᱮ ᱚᱲᱟᱜ ᱫᱩᱣᱟᱹᱨ, ᱜᱷᱟᱨᱚᱸᱡᱽ, ᱥᱚᱝᱥᱟᱨ ᱨᱮ ᱠᱩᱥᱤ ᱨᱟᱹᱥᱠᱟᱹ ᱨᱮᱱᱟᱜ ᱯᱮᱨᱮᱡ ᱵᱟᱱ ᱜᱟᱰᱟ ᱪᱷᱤᱞᱠᱟᱹᱣ ᱨᱟᱠᱟᱵᱼᱟ ᱾
ᱫᱩᱞᱟᱹᱲ ᱨᱤᱱᱤᱡ ᱫᱷᱚᱱ ᱥᱚᱦᱟᱜᱽ ᱥᱟᱫᱮᱨ ᱫᱩᱞᱟᱹᱲ ᱡᱟᱦᱟᱸᱭ ᱦᱟᱯᱯᱮᱱ ᱨᱤᱱᱤᱡ ᱞᱟᱹᱣᱲᱤᱭᱟᱹ ᱠᱟᱱᱟᱭ, ᱩᱱᱤ ᱡᱩᱫᱤ ᱱᱟᱯᱟᱭ ᱥᱤᱠᱷᱱᱟᱹᱛ ᱮ ᱧᱟᱢᱟ, ᱱᱟᱯᱟᱭ ᱪᱩᱨᱤᱛ ᱟᱱ ᱦᱚᱲᱮ ᱵᱮᱱᱟᱣᱜᱼᱟ ᱢᱟᱹᱱᱢᱤ ᱞᱮᱠᱟ ᱢᱟᱹᱱᱢᱤᱭ ᱵᱮᱱᱟᱣᱜᱼᱟ ᱩᱱᱤ ᱫᱚ ᱛᱤᱥ ᱨᱮᱦᱚᱸ ᱛᱤᱨᱞᱟᱹ ᱪᱮᱛᱟᱱ ᱱᱟᱦᱟᱪᱟᱨ, ᱵᱷᱚᱨᱚᱢ ᱱᱟᱥᱟᱣ ᱥᱮ ᱢᱟᱹᱱ ᱤᱡᱽᱡᱚᱛᱦᱟᱱᱟᱣ ᱞᱮᱠᱟᱱ ᱵᱟᱹᱲᱤᱡ ᱠᱟᱹᱢᱤ ᱨᱮᱫᱚ ᱛᱤᱥ ᱨᱮᱦᱚᱸ ᱵᱟᱭ ᱵᱚᱲᱦᱮᱜᱼᱟ ᱾ ᱛᱤᱨᱞᱟᱹ ᱦᱚᱯᱚᱱ ᱪᱮᱛᱟᱱ ᱵᱟᱹᱲᱤᱡ ᱩᱭᱦᱟᱹᱨ ᱦᱚᱸ ᱵᱟᱝ ᱦᱤᱡᱩᱜ ᱛᱟᱭᱟ ᱾ ᱛᱤᱨᱞᱟᱹ ᱦᱚᱯᱚᱱᱟᱜ ᱡᱚᱛᱷᱟᱛ ᱢᱟᱹᱱ ᱩᱱᱤ ᱜᱮᱭ ᱪᱟᱞ ᱫᱟᱲᱮᱭᱟᱜᱼᱟ ᱾ ᱩᱱᱤ ᱫᱚ ᱛᱤᱨᱞᱟᱹ ᱦᱚᱯᱚᱱ ᱫᱚ ᱛᱤᱥ ᱨᱮᱦᱚᱸ ᱵᱟᱹᱲᱤᱡ ᱱᱚᱡᱚᱨ ᱛᱮ ᱵᱟᱭ ᱧᱮᱞ ᱠᱚᱣᱟ ᱾ ᱚᱱᱠᱟᱱ ᱵᱟᱹᱲᱤᱡ ᱩᱭᱦᱟᱹᱨ ᱵᱷᱟᱵᱽᱱᱟ ᱜᱮ ᱟᱡᱟᱜ ᱢᱚᱱᱮ ᱨᱮᱱᱟᱜ ᱠᱚᱪᱟ ᱠᱚᱬᱨᱮ ᱵᱟᱝ ᱦᱮᱞᱠᱟᱣ ᱥᱮᱴᱮᱨ ᱟᱭᱟ ᱾ ᱩᱱᱤ ᱜᱮ ᱢᱤᱫ ᱫᱟᱱ ᱥᱚᱛ ᱪᱩᱨᱤᱛ ᱟᱱ ᱜᱤᱫᱽᱨᱟᱹᱭ ᱵᱮᱱᱟᱣᱜᱼᱟ ᱾ ᱱᱟᱯᱟᱭ ᱡᱤᱣᱤ ᱡᱩᱨᱤᱭ ᱵᱮᱱᱟᱣᱜᱼᱟ ᱾ ᱢᱟᱹᱱ ᱟᱱ ᱟᱯᱟᱛ ᱮ ᱵᱮᱱᱟᱣᱜᱼᱟ ᱾ ᱢᱮᱱ ᱫᱚ ᱚᱲᱟᱜ ᱨᱮ ᱜᱷᱟᱨᱚᱸᱡᱽ ᱨᱮ ᱥᱟᱶᱛᱟ ᱨᱮ ᱥᱚᱢᱟᱡᱽ ᱨᱮ, ᱫᱤᱥᱚᱢ ᱛᱟᱞᱟᱨᱮ ᱱᱟᱯᱟᱭ ᱢᱟᱹᱱᱢᱤᱭ ᱵᱮᱱᱟᱣᱜᱼᱟ ᱾ ᱟᱨ ᱟᱵᱚᱣᱟᱜ ᱥᱟᱢᱟᱱᱚᱢ ᱥᱟᱶᱛᱟ ᱨᱤᱱᱤᱡ ᱥᱤᱧ ᱵᱚᱸᱜᱟ ᱞᱮᱠᱟ ᱟᱡᱟᱜ ᱢᱟᱨᱥᱟᱞ ᱛᱟᱨᱟᱥ ᱛᱮ ᱫᱷᱟᱹᱨᱛᱤ ᱰᱤᱜᱽ ᱰᱤᱜᱽ ᱢᱟᱨᱥᱟᱞᱚᱜᱼᱟ ᱾ ᱡᱟᱦᱟᱸᱨᱮ ᱛᱤᱨᱤ ᱯᱩᱨᱩᱥᱟᱜ ᱵᱷᱮᱜᱟᱨ ᱦᱟᱯᱟᱴᱤᱧ ᱵᱟᱝ ᱛᱟᱦᱮᱸᱱᱟ ᱾ ᱟᱨ ᱟᱵᱚ ᱛᱤᱨᱞᱟᱹ ᱦᱚᱸ ᱱᱟᱯᱟᱭ ᱜᱮ ᱨᱤᱞᱟᱹᱢᱟᱞᱟ ᱥᱩᱞᱩᱠ ᱨᱮᱵᱚᱱ ᱛᱟᱦᱮᱸᱱᱟ ᱾
ᱚᱱᱟᱛᱮᱧ ᱢᱮᱱᱟ, ᱫᱮᱞᱟ ᱛᱤᱨᱞᱟᱹ ᱫᱮᱞᱟ ᱵᱚᱱ ᱮᱵᱷᱮᱱᱚᱜᱼᱟ ᱾ ᱫᱮᱞᱟ ᱵᱚᱱ ᱪᱮᱴᱠᱟᱨᱚᱜᱼᱟ ᱾ ᱥᱮᱪᱮᱫ ᱥᱤᱠᱷᱱᱟᱹᱛ ᱛᱮᱵᱚᱱ ᱢᱟᱨᱥᱟᱞᱚᱜᱼᱟ ᱾ ᱟᱵᱚᱣᱟᱜ ᱱᱟᱯᱟᱭ ᱜᱩᱱᱟᱹᱱ ᱛᱮ ᱡᱚᱛᱚᱱ ᱦᱟᱨᱟᱭᱟᱵᱚᱱ ᱟᱵᱚᱣᱟᱜ ᱜᱷᱟᱨᱚᱸᱡᱽ, ᱟᱵᱚᱣᱟᱜ ᱥᱟᱶᱛᱟ, ᱟᱵᱚᱣᱟᱜ ᱥᱚᱢᱟᱡᱽ ᱟᱨ ᱦᱚᱲᱢᱚᱨᱮ ᱡᱚ ᱡᱟᱹᱞᱤ ᱥᱤᱨᱡᱚᱱ ᱞᱮᱱ ᱠᱷᱚᱱ ᱜᱮ ᱱᱟᱯᱟᱭ ᱩᱭᱦᱟᱹᱨ, ᱱᱟᱯᱟᱭ ᱠᱟᱛᱷᱟ, ᱱᱟᱯᱟᱭ ᱦᱩᱫᱤᱥ ᱟᱨ ᱠᱩᱥᱤ ᱨᱟᱹᱥᱠᱟᱹ ᱨᱮᱵᱚᱱ ᱛᱟᱦᱮᱸᱸᱱ, ᱦᱮᱥᱮᱡ ᱥᱮᱠᱮᱡ, ᱟᱨ ᱚᱱᱟ ᱥᱟᱶᱛᱮ ᱟᱵᱚᱣᱟᱜ ᱟᱹᱠᱷᱤᱨ ᱦᱚᱸ ᱵᱚᱱ ᱢᱟᱨᱥᱟᱞᱟ ᱾
***
